1. Haasayiyo imotaa nuussi immiday oonee?

 NU SIIQO Xoossay nuussi haasayiyo imotaa immiis. Koyro bitanee Addaamee meretti simmidi takkennan, saluwan deˈiya ba Aawaara haasayanawu qaalata goˈettiis. I ooratta qaalatakka medhdhiis. Addaamee ubba mehiyawu doˈawu sunttaa sunttiyo wode hegaadan oottiis. (Doo. 2:19) Addaamee puulanchcha gidida ba machchee Hewaaniira koyro haasayido wode keehi ufayttennan aggenna.—Doo. 2:22, 23.

2. Asay beni iita qaalaa waati goˈettidee, qassi ha wodiyan waati goˈettii?

² Daro takkennan haasayiyo imotaa bessenna ogiyan goˈettidosona. Seexaanaa Dabloosi Hewaanissi worddotiis, qassi he worddoy asay nagaranchcha gidanaadan oottiis. (Doo. 3:1-4) Addaamee ba mooruwaa Hewaaninne Yihoowan gaasoyido wode ba inxxarssaa bessenna ogiyan goˈettiis. (Doo. 3:12) Qaayeeli ba ishaa Aabeela wori simmidi Yihoowassi worddotiis. (Doo. 4:9) Guyyeppe, Qaayeela zare gidida Laameeki ba xaafido danttuwan he wode deˈiya danuwaabaa qonccissiis. (Doo. 4:23, 24) Ha wodiyan deˈiya asaa hanotay ay malee? Polotikaa asati iita qaalaa dabaaban coo goˈettiyoogaa akeekoos. Ha wodiyan deˈiya daro pilimetun amarida iita qaalay deˈees. Tamaareti timirtte keettan, qassi gasttati ooso sohuwan iita qaalaa siyoosona. Ha wodiyan iita qaalay meeze gididoogee alamee keehi iiti iiti biyoogaa bessiyaaba.

3. Nuuni ay oottennaadan naagettana koshshii, qassi nuuni ha huuphe yohuwan ay beˈanee?

³ Nuuni naagettana xayikko, siyiiddi takkido iita qaalata goˈettiyoogaa doommana danddayoos. Nuuni Kiristtaane gidiyoogaadan,  Yihoowa ufayssana koyiyo gishshawu, iita qaalaa mule goˈettokko. SHin nuuni haasayiyo imotaa nu Xoossaa sabbanawu loˈˈo ogiyan goˈettana koshshees. Nuuni (1) haggaazuwan, (2) gubaaˈe shiiqotun, qassi (3) galla galla haasayiyo haasayan hegaadan waati oottana danddayiyaakko ha huuphe yohuwan beˈana. SHin koyro, nuuni haasayiyoobay Yihoowa qofissiyoy aybissakko ane beˈoos.

4. Milkkiyaasa 3:16y yootiyoogaadan, nuuni haasayiyoobay Yihoowa qofissiyoy aybissee?

⁴ Milkkiyaasa 3:16 nabbaba. Yihooway baassi yayyiyaageetunne ba sunttaa bonchchiyaageetu sunttay ba ‘hassayiyo maxaafan’ xaafettanaadan oottidoy aybissakko qoppana danddayay? Nu haasayay nu wozanan deˈiyaabaa qonccissees. Yesuusi hagaadan giis: “Doonai wozana giddon kumidabaa haasayees.” (Maa. 12:34) Nu haasayiyoobay nuuni Yihoowa ay keenaa siiqiyaakko qonccissees. Qassi Yihooway A siiqiyaageeti ooratta alamiyan merinawu ufayttidi deˈanaadan koyees.

5. (a) Nu goynoy nuuni haasayiyoobaara waani gayttii? (b) Misiliyan qonccidaagaadan, nu haasayiyoobaa xeelliyaagan nuuni ay naagettana bessii?

⁵ Nuuni haasayiyo ogee Yihooway nu haggaazuwan ufayttanaadan woy ufayttennaadan oottana danddayees. (Yaaq. 1:26) Xoossaa siiqenna amaridaageeti hanqquwan, meqetti baynna ogiyaaninne otorettiyoogaa bessiya hanotan haasayaana danddayoosona. (2 Xim. 3:1-5) Nuuni eta milatanawu koyennaagee qoncce. Nuuni haasayiyooban Yihoowa ufayssanawu keehi koyoos. SHin nuuni Kiristtaane shiiqotun woy haggaazuwan kehatettan haasayiyaageeta gidikkonne, harati beˈananne siyana danddayenna wode nu soo asaara meqetti baynna ogiyaaninne siiqennaagaa bessiya ogiyan haasayiyaaba gidikko, Yihooway nunan ufayttanee?—1 PHe. 3:7.

6. Kimbarla loˈˈo ogiyan haasayido gishshawu demmido loˈˈo ayfee aybee?

⁶ Haasayiyo imotaa nuuni loytti goˈettiyo wode, Yihoowawu haggaaziyoogaa haratussi bessoos. “Xoossaassi azazettiyaageetuppenne azazettennaageetuppe gidduwan de7iya” dummatettaa harati loytti akeekanaadan  maaddoos. (Mil. 3:18) Kimbarli * giyo michchee hanotay hegee tuma gidiyoogaa waati qonccissiyaakko beˈa. Timirtte keettan imettida amarida oosuwaa banaara tamaariyaariira oottanaadan maddabettaasu. Issippe ootti simmin, iira tamaariyaara Kimbarla hara tamaaretuppe dumma gidiyoogaa akeekaasu. A harata xeelliyaagan iitabaa haasayukku, kehatettan haasayawusunne iita qaalaa goˈettikku. Kimbarliira tamaariyaara keehi garamettaasunne Kimbarliira Geeshsha Maxaafaa xannaˈiyoogaa guyyeppe doommaasu. Nuuni asay tumaa siyanawu koyanaadan oottiya ogiyan haasayiyo wode Yihooway keehi ufayttees!

7. Xoossay immido haasayiyo imotaa neeni waata goˈettanawu koyay?

⁷ Nuuni ubbay Yihoowa bonchchissiyaanne nu ishanttukko shiiqanaadan maaddiya ogiyan haasayanawu koyoos. Yaatiyo gishshawu nuuni ubbatoo ‘haasayan leemiso gidana’ danddayiyo amarida ogeta ane haˈˈi beˈoos.

8. Yesuusi haggaazuwan haasayido haasayan nuuyyo aybin leemiso gididee?

⁸ Harati nena hanqqetissiyo wode kehatettaaninne bonchchuwan haasaya. Yesuusi saˈan haggaaziyo wode, asay A ushshanchchaa, yoraa, Dabloosa wolqqan oottiyaagaa, Sambbataa higgiyaa naagennaagaa, ubba qassi Xoossaa cayiyaagaa giidi wordduwan mootiis. (Maa. 11:19; 26:65; Luq. 11:15; Yoh. 9:16) Gidikkonne, Yesuusi hanqquwan zaaribeenna. Harati nuna meqetti baynna ogiyan haasayissiyo wode, nuuni etaagaadan zaarennan aggiyoogan Yesuusa milatana koshshees. (1 PHe. 2:21-23) SHin harati nuna kehatetti baynna ogiyan haasayissiyo wode, keha gidiyoogee metiyaaba. (Yaaq. 3:2) Nuna aybi maaddana danddayii?

9. Nuuni sabbakiyo wode haasayiyooban naagettanaadan nuna aybi maaddana danddayii?

⁹ Neeni haggaaziyo wode issi uri ne bolli iitabaa haasayikko, yiillotennan agganawu mala. Saama giyo issi ishay hagaadan giis, “He uri Xoossaabaa tumaa eriyoogee keehi koshshiyaaba gidiyoogaa qoppanawunne I laamettana danddayiyoogaa hassayanawu malays.” Nuuni injjetenna saatiyan biido gishsha xallawu keettaaway issi issitoo hanqqettees. Nuuni hanqqettida uraa haasayissiyo wode, michchee Lusiyiigaadan oottana danddayoos. Nuuni woppu gaanaadaaninne iitabaa woy bonchchennaagaa bessiyaabaa haasayennaadan Yihooway nuna maaddana mala qantta woosaa woossana danddayoos.

10. Koyro Ximootiyoosa 4:13y yootiyoogaadan, nuuni ay halchchana koshshii?

¹⁰ Gooba asttamaare gida. Ximootiyoosi gooba asttamaare gidikkonne, tamaarissiyoogan kaseppe qara gidana koshshiis. (1 Ximootiyoosa 4:13 nabbaba.)  Nuuni haggaazuwan kaseegaappe aaruwan waani qara gidana danddayiyoo? Nuuni loytti giigettana bessees. Qara asttamaare gidanaadan nuna maaddana danddayiya daro miishshati deˈiyo gishshawu nuuni galatoos. Nabbabanawunne Tamaarissanawu Keehippe Minna giya brooshuriyaaninne Kiristtaanetu Deˈuwaanne Haggaazuwaa—Xannaˈiyo Xuufiyan “Minnada Haggaaza” giya shaahuwan maaddiyaabaa demmana danddayaasa. Neeni ha xuufetun goˈettaydda deˈay? Nuuni loytti giigettikko, keehi yayyokko, qassi xalatettan haasayoos.

11. Amarida Kiristtaaneti waani gooba asttamaare gidana danddayiyoonaa?

¹¹ Nuuni gubaaˈiyan deˈiya haratuppe tamaariyoogankka gooba asttamaare gidana danddayoos. Qommoora abaa denttido Saami, ‘Amarida Kiristtaaneti gooba asttamaare gidanaadan eta aybi maaddidee?’ giidi bana oychchees. I eti tamaarissiyo hiillata xannaˈees, yaatidi eta leemisuwaa kaallanawu malees. Taaliyo giyo michchiyaa haasayaa haasayiyoogan gooba gididaageeti dere haasayaa waati haasayiyaakko loytta akeekawusu. Yaatiyoogan, A asay darotoo haggaazuwan oychchiyoobaa waata tobbanaakko eraasu.

12. Amaridaageeti waatanawu metootiyoonaa?

¹² Nuuni ubbay gubaaˈe shiiqotun issippe yexxananne loytti giigettidi qofaa yootana danddayoos. (Maz. 22:22) Amaridaageeti shiiqotun yexxanawunne qofaa yootanawu metootoosona. Neenikka metootay? Yaatikko, shiiqotun yexxanawu woy qofaa yootanawu yayyennaadan harata aybi maaddidaakko eriyoogee nena maaddana.

13. SHiiqotun wozanappe yexxanaadan nena aybi maaddana danddayii?

¹³ Wozanappe yexxa. Nuuni nu shiiqotun mazamureta yexxiyo waanna gaasoy Yihoowa sabbiyoogaa. Saaro giyo michchiyaa yexxiyoogan gooba gidikke gaada qoppawusu. SHin, A mazamuriyan Yihoowa sabbanawu koyawusu. Hegaa gishshawu, A shiiquwawu giigettiyo wode, mazamuretakka meezetawusu. A yaatiyoogan mazamuretu danttoti shiiquwan tamaariyoobaara waani gayttiyaakko akeekanawu malawusu. A, “Taani qaalatubaa qoppiyo wode, ta loytta yexxiyoogaa woy yexxennaagaa xeelliyaagan darin qoppikke” yaagasu.

14. Neeni yayyiyaaba gidikko, shiiquwan qofaa yootanaadan nena aybi maaddana danddayii?

¹⁴ Ubbatoo qofaa yoota. Hagee amaridaageetussi keehi metiyaaba. Qommoora ibaa denttido Taaliya hagaadan gaasu: “Hara asaa sinttan haasayiyo wode taani keehi yayyays. Hegaa gishshawu, qofaa yootanawu taani keehi metootays.” SHin hegee Taaliya qofaa yootiyoogaa agganaadan oottibeenna. A  shiiquwawu giigettiyo wode, oyshawu koyro zaariyo zaaroy qanttanne qoncce gidana bessiyoogaa hassayawusu. A hagaadan gaasu: “Hegaa giyoogee ta zaaroy qantta, akeekanawu metennaagaanne waanna qofaa qonccissiyaagaa gidikko aynneba giyoogaa, ayssi giikko, xinaatiyaa kaalettiyaagee hegaa mala zaaruwaa koyees.”

15. Nu zaaruwaa xeelliyaagan nuuni ay hassayana koshshii?

¹⁵ Dungguuxa gidenna Kiristtaanetikka issi issitoo qofaa yootennan aggana danddayoosona. Aybissi? Juliyet giyo michchiyaa hagaadan gaasu: “Ta zaaroy keehi qanttanne loˈˈo gidenna gaada taani yayyiyo gishshawu zaaranawu issi issitoo mammottays.” SHin, nuuni zaarana danddayiyo loˈˈo zaaruwaa zaaranaadan Yihooway koyiyoogaa hassaya. * Nuuni issi issitoo yayyiyaaba gidikkonne, shiiqotun zaaranawu nuussi danddayettida ubbabaa oottiyo wode I keehi ufayttees.

16. Nuuni ay mala haasayaappe naagettana koshshii?

¹⁶ ‘Cayoppa.’ (Efi. 4:31) Qommoora beˈidoogaadan, issi Kiristtaanee iita haasayaa mule haasayana bessenna. Haray atto, nuuni geeman cayennaadankka naagettana bessees. Leemisuwawu, nuuni hara wogan diccida asaabaa, hara qommuwaabaa woy zariyaabaa haasayiyo wode, iitabaa haasayennaadan naagettana koshshees. Qassi, nuuni iitabaa haasayidi harata qohanawu mule koyokko. Issi ishay hagaadan giis: “Taani miichchiyaabanne qohennaba gaada qoppiyoobaa issi issitoo haasayaas, shin hegee tumuppe iitabanne harata qohiyaaba. Taani ta machchiyoonne harata qohiya iitabaa haasayiyo wode A taassi buzo yootiyoogan tana daro layttawu maaddaasu.”

17. Efisoona 4:29 maaraadan, nuuni harata waati minttettana danddayiyoo?

¹⁷ Harata minttettiya ogiyan haasaya. Harata boriyoogaappe woy amassaliyoogaappe eta galatanawu eesotiyaagaa gida. (Efisoona 4:29 nabbaba.) Israaˈeelatussi galatanaadan oottiya darobay deˈikkonne, eti darotoo amassalidosona. Nuuni darotoo amassaliyaageeta gidikko, hegee haratikka amassaliyaageeta gidanaadan oottana danddayees. Wochchiya tammu asati worddo oduwaa ehiidoogee ‘Israaˈeela asay ubbay Muuse bolli zuuzummanaadan’ oottidoogaa hassaya. (Qoo. 13:31–14:4) SHin nuuni harata galatiyoogee eti ubbay ufayttanaadan maaddana danddayees. Yofttaahe naˈiyaa I laggeti O ‘galatido’ gishshawu, ba oosuwaa aggennan  oottanawu A hegan keehi minettidoogaa ammanettana danddayoos. (Daan. 11:40, NW) Qommoora ibaa denttido Saara hagaadan gaasu: “Nuuni galatiyo wode, harati banttana Yihooway siiqiyoogaa akeekanaadan oottoosinne gubaaˈiyan deˈiya harati eta siiqiyoogaa eti eranaadankka maaddoos.” Yaatiyo gishshawu, ne ishanttanne michchontta galatiyo ogiyaa koya.

18. Mazamure 15:1, 2 maaraadan, nuuni tumaa haasayana bessiyoy aybissee, qassi hegaadan oottanawu waatana koshshii?

¹⁸ Tumaa haasaya. Nuuni tumaa haasayana xayikko, Yihoowa ufayssana danddayokko. Yihooway worddo ubbaa ixxees. (Lee. 6:16, 17) Ha wodiyan daro asay worddotiyoogaa meeze gididabadan xeelliyaaba gidikkonne, Yihooway hegee bala gidiyoogaa yootiyo gishshawu, nuuni hegaappe naagettana koshshees. (Mazamure 15:1, 2 nabbaba.) Nuuni worddobaa haasayiyoogaappe naagettiyoogaa xalla gidennan, balabaa eriiddi haratuyyo yootiyoogaappekka naagettoos.

19. Nuuni naagettana koshshiya harabay aybee?

¹⁹ Zigirennaadan naagetta. (Lee. 25:23; 2 Tas. 3:11) Qommoora ibaa denttido Juliyeta zigiriyoogee O keehi qohiyoogaa yootaasu. A hagaadan gaasu: “Zigirssaa siyoogee hidootaa qanxxanaadaaninne zigiriyaa uraa ammaniyoogaa taani agganaadankka oottees. Qassi I woy A tabaa hara urawu zigirennaagaa taani waata eriyaanaa?” Haasayay zigirissawu laamettiiddi deˈiyoogaa neeni akeekikko, hegaa aggada minttettiyaabaa haasaya.—Qol. 4:6.

20. Neeni haasayiyoobaara gayttidaagan waatanawu murttadii?

²⁰ Nuuni iita haasayay kumido alamiyan deˈiyo gishshawu, nu haasayiyoobay Yihoowa ufayssanaadan nuuni mintti baaxetana koshshees. Haasayay Yihoowa imotaa gidiyoogaanne nuuni hegaa goˈettiyo ogee A keehi qofissiyoogaa hassaya. Nuuni haggaazuwan, shiiqotuninne galla galla haasayiyo haasayan loˈˈo ogiyan haasayanawu wozanappe baaxetikko, I nuna anjjana. Yihooway ha iita alamiyaa xayssiyo wode, nuuni haasayiyooban Yihoowa bonchchissanawu metootokko. (Yih. 15) He wode gakknaashin, ‘ne doonaappe kiyiya qaalay’ Yihoowa ufayssiyaagaa gidanaadan murtta.—Maz. 19:14.