1. სოვრეშე მიღნა ჩიებაშ უნარ?

 ჩიებაშ უნარ საჩუქარ რე ჩქინ მოჸოროფე ღორონთშე. თე საჩუქარ ადამს საშვალებას არზენდჷ, ურთიერთობა უღუდკო მუშ მოჸოროფე ზეციერ მუმაწკუმა. ადამს თინა ხოლო შეულებუდ, ნამდა მუშ ლექსიკას ახალ სიტყვეფ ქიმშუძინკო. თე უნარს თინა მუშ პასუხიშმგებლობაშ შეიოსრულებერო, ცხოველეფშა სახელეფიშ გიოდვალარო, ირინუანდჷ (დაბ. 2:19). მუ გახარებულ იჸუაფუდ თინა, მუჟამსით პირველო ქუდურაგადუანდჷ ადამიანს, მუშ ძვირფას მეუღლეს, ევას (დაბ. 2:22, 23).

2. მუჭო გიმირინუანდეს ჯვეშო დო მუჭო გიმირინუანა ამდღა ჩიებაშ უნარს უბადოთ?

² ადამიანეფიშ გოჭყაფაშ უკულ ხეთეშე ჩიებაშ უნარქ უბადოთ იჸუ გიმორნაფილქ. სატანა ეშმაკიქ დაღორ ევა. თე ტყურას ადამიანეფიშ ცოდვა დო არასრულყოფილებაქ ქუმაჸუნ (დაბ. 3:1—4). ადამქ ჩიებაშ უნარ უბადოთ გიმირინუ, მუჟამსით მუშ შეცდომა დიო ევას დო უკულ იეჰოვას ხოლო გეგნაბრალ (დაბ. 3:12). კაენქ მუშ ჯიმაშ ჸვილუაშ უკულ ტყურა ქუწუ იეჰოვას (დაბ. 4:9). უმოს გვიანო კაენიშ ართ-ართ გამნარყიქ, ლამექიქ, თქუ ლექს, ნამუთ ხუჯის უკინენდჷ თიმ დროს გავრცელებურ უბადობას (დაბ. 4:23, 24). მუ მდგომარეობა რე ამდღა? მაგალთო, ქიდვეკვირებუთ-და, პოლიტიკურ ლიდერეფ თავისფალო ირინუანა უწმაწურ სიტყვეფს სახალხოთ. თიცალ კინოშ გორუა ხოლო ძნელ რე, სოდეთ უწმაწურ სიტყვეფ ვა რე გიმორნაფილ. ბილწსიტყვაობას ბაღანეფ სკოლას ირჩქილენა დო უნჩაშეფ — სამუშას. სანარღოთ, უწმაწურ ჩიება თის ოძირანს, მუნერ გილალუაფირ რე მსოფლიოს ზნეობრივ ნორმეფ.

3. მუ საფრთხეშ წოხოლე გივორეთ დო მუს გუვარჩიენთ თე სტატიას?

 ³ ფრთხილას ვეპჸით-და, შილებე თეშ ქიმვარჩქვანათ გლახა სიტყვეფიშ მორჩქილაფას, ნამდა ჭიჭე ხანშა ჩქი ხოლო ქიდიბჭყათ თაშ ჩიება. მუშო ოკო რაგად, მუჭოთ ქრისტიანეფს, მოკონა, განვადიდათ იეჰოვა, მუდგაშა ხვალე გლახა სიტყვეფიშ რაგადშე დუდიშ ეჩილითაფა ვემშურს; ჩქი მოკონა, თე ძვირფას საჩუქარ იეჰოვაშ ოდიდებელო გეგმიბრინუათ. თე სტატიას გუვარჩიენთ, მუჭო შემლებნა თეშ კეთება 1) მსახურებას, 2) ქრისტიანულ შეხვალამეფს დო 3) ირდღაშიან ჩიებეფიშ დროს. მარა, პირველ რიგის, გუვარჩუათ, მუშენ რე იეჰოვაშო მნიშვნელოვან, მუჭო იბრინუანთ რაგადიშ უნარს.

4. მუჭოთ მალაქიაშ 3:16-შე იძირე, მუშენ რე ჩქინ ჩიება იეჰოვაშო მნიშვნელოვან?

⁴ წეკითხით მალაქიაშ 3:16. შეილებნანო ქიმიჸუნათ მიზეზეფ, მუშ გურშენ შილებე იეჰოვა მუშ „გასაშინე წიგნის“ ინაჭარანდას თინეფიშ სახელეფს, მით ჩიებათ ოძირანს, ნამდა უღჷ თიშ შიშ დო ფიქრენს თიშ სახელშე? ჩქინ ჩიებაშე იძირე, მუ მიღნა გურს. იესოქ თქუ: „პიჯ თის იჩიებ, მუთ კოჩის გურს უღჷ“ (მათ. 12:34). მუშ გურშენ იფჩიებუთინ თევრეშე იძირე, მუზმათ მიჸორა იეჰოვა, მიდგას ოკო, მუშ მოჸოროფეეფქ მარადიულ სიცოცხლეთ გეხარან ახალ ქვეყნიერებას.

5. ა) მუჭო რე დაკავშირებულ ართიანწკუმა ჩქინ რაგადიშ უნარიშ გიმორნაფა დო ღორონთიშ თაყვანიშცემა? ბ) მუჭოთ ილუსტრაციაშე იძირე, მუნერ ჩიებას ოკო ეუჩილითუათ დუდ?

⁵ რაგადიშ უნარს მუჭო იბრინუანთინ თიშა რე დამოკიდებულ, მიღენს დო ვარ იეჰოვა ჩქინ თაყვანიშცემას (იაკ. 1:26). ნამთინეს, მიდგას ვა უჸორს ღორონთ აგრესიულ დო დუმამცირებელ ჩიება უღჷ წესო (2 ტიმ. 3:1—5). ჩქი, მუშო ოკო რაგად, ვა მოკონა, თინეფცალ ვორდათ. თეშ გინაწონს, მთელ გურით მოკონა, ჩქინ ჩიებათ იეჰოვას გუხარათ გურ. მარა გუხარენთო თის გურს, მუჟამსით ქრისტიანულ შეხვალამეფს ვარდა მსახურებას გემუანო იფჩიებუთ, მარა ჸუდეს ოჯახიშ წევრეფწკუმა ხვალე ქუდოფსქიდუთუნ,  უხეშ დო დუმამცირებელ სიტყვეფს იბრინუანთ? (1 პეტ. 3:7).

6. მუ ჯგირ შედეგიქ მაჸუნ კიმბერლიშ დადებით ჩიებას?

⁶ მუჟამსით ჩიებაშ ძღვინს ჯგირო იბრინუანთ, ვოძირანთ, ნამდა ვორეთ იეჰოვაშ თაყვანიშმცემელეფ. თეშნერო შხვეფს ვოხვარუთ თიშ გაგებას, მუ განსხვავება რე „ღორონთიშ მსახურ დო თიშ შქას, მით თის ვამსახურ“ (მალ. 3:18). გუვარჩუათ, მუჭო იძირ თექ და კიმბერლიშ * შემთხვევას. თის კლასელწკუმა დავალება ქიმეჩეს. ართო მუშობაშ უკულ კლასელქ ქოძირ, ნამდა კიმბერლი შხვა მოსწავლეეფს ვა გუდჷ; თინა ვაკრიტიკენდჷ შხვეფს დო ირო დადებითო იჩიებუდ. თეწკუმა ართო, ვერინუანდჷ უწმაწურ სიტყვეფს. თიქ დეინტერეს, მუშენ ვა გუდჷ კიმბერლი შხვეფს დო საბოლათ ბიბლიაშ გურაფა ქიდიჭყჷ. იეჰოვას მანგარო ოხიოლ, მუჟამსით თეშ იბრინუანთ რაგადიშ ძღვინს, ნამდა თენა ხალხის ჭეშმარიტებათ აინტერესენს.

7. მუ გინგოჭყვიდირაფუანა, ღორონთიშ მოჩამილ ჩიებაშ ძღვინ სწორას გეგმირინუათ?

⁷ არძას მოკონა, ჩქინ ჩიებათ განვადიდათ იეჰოვა დო დევეახლოვათ და დო ჯიმალეფს. ასე გუვარჩუათ ნამთინე პრაქტიკულ საშვალება, ნამდგათ შემლებნა ვორდათ „სამაგალითო . . . რაგადის“.

8. მუ მაგალით დომტუეს იესოქ მსახურებას ჩიებაწკუმა დაკავშირებით?

⁸ იჩით გემუანო დო პატიცემათ, მუჟამსით გონირზნა. დედამიწას მსახურებაშ დროს იესოს ეკაწამენდეს, ნამდა თინა რდჷ ურძღაფელა, შუმას გინოჸუნელ, ეშმაკიშ მოშქუმალირ, ვეცვენდჷ საბატონს დო თინა ხოლო ქოთქუეს, ნამდა ღორონთის მიორინუანდჷ შეურაცხყოფას (მათ. 11:19; 26:65; ლუკ. 11:15; იოან. 9:16). მარა იესო გურმულირო ვა პასუხენდჷ თინეფს. იესოცალო, ჩქი ხოლო დღას ოკო ვა უპასუხათ მითინს გურმულირო თიმწკუმა ხოლო, მუჟამსით აგრესიულო მეჩიებნა (1 პეტ. 2:21—23). მუშო ოკო რაგად, თეშ კეთება ვა რე ადვილ (იაკ. 3:2). მუს შეულებ ჩქინ მოხვარა?

9. მუ მიმეხვარებნა, ვაკონტროლათ ჩქინ ჩიება მსახურებაშ დროს?

⁹ ქეცადით, გურქ ვა მოირთან, მუჟამსით მსახურებას უხეშო დოირაგადუანა. ჯიმა სემ იჩიებ: „ვოცადუქ, ყურადღება თიშა გეგნიბღე, ნამდა მობინადრეს მანგარო ოსაჭირ სახიოლო ამბე დო შეულებ თირუა“. მინშა მობინადრეს შილებე თიშ გურშენ მოურთას გურქ, ნამდა უბრალოთ გლახა დროს მეფრთით. მუჟამსით გაღიზიანებულ კოჩწკუმა იფჩიებუთ, შემლებნა და ლუსიაცალო მიფქცუათ — მოკლეთ ქიბლოცათ დო ქოფთხუათ იეჰოვას, ვა ვოდინუათ სიმშვიდე დო ვა ფთქუათ მუთუნ  თიცალ, მუთ უპატიცემლობა იჸუაფუდ თე პიროვნებაშ მიმართ.

10. მუჭოთ 1 ტიმოთეშ 4:13-ს ბკითხულენთ, მუ მიზან ოკო მიღდან?

¹⁰ გინირთით უჯგუშ მასწავლებერო. ტიმოთე გამოცდილ ქრისტიან რდჷ, მარა გაუჯგუშება იშენით ოსაჭირუდ (წეკითხით 1 ტიმოთეშ 4:13). მუჭო შემლებნა გინიფრთათ უჯგუშ მასწავლებერო? თეშო მომზადება რე საჭირო. მარდულეფ ვორეთ, ნამდა მიღნა ბრელნერ საშვალება, გუვაუჯგუშათ ჩქინ გურაფაშ უნარეფ. თქვა მიგეხვარებნა ბროშურა „გაუჯგუშ კითხირიშ დო გურაფაშ უნარი“ დო „ჩქინ ცხოვრება დო მსახურებაშ ომეცადინებელ ფურცელს“ მოჩამილ ნაწილ „გაუჯგუშ მსახურება“. ქირინუანთო თე პუბლიკაციეფს? ჯგირო მემზადებუთ-და, ნაკლების ინერვიანენთ დო უმოს თავდაჯერებულ იჸუაფუთ.

11. მუქ მეხვარ ნამთინე ქრისტიანს, გინირთკო უჯგუშ მასწავლებერო?

¹¹ უჯგუშ მასწავლებერეფო შხვეფშა დაკვირება დო თინეფშე გურაფა ხოლო გინმოშქვანა. სემ, ნამუთ ჟიშე მიფშინეთ, მუშ დუდის ოკითხ, მუქ მეხვარ ნამთინე თანაქრისტიანს, ჸოფედკო ჯგირ მასწავლებერ. თინა ოკვირ თინეფიშ მეთოდეფს დო ოცად, მუქ ხოლო თეშ გაკეთას. ართ და, სახელო ტალია, გამოცდილ მომხსენებელეფშე დაკვირებათ გურაფლენს, მუჭო იმსჯელას თი საკითხეფშე, ნამუთ მსახურებას წიმიჭკირუ.

12. მუშ კეთება რე ნამთინეშო ძნელ?

¹² ჩქი არძას შემლებნა კრებაშ შეხვალამეფს მონაწილებაშ მეღება ობირეშეფიშ ბირათ დო ჯგირო მომზადებულ კომენტარეფით (ფსალმ. 22:22). ნამთინეშო ძნელ რე სახალხოთ ბირა ვარდა კომენტარიშ რაგად. თქვა ხოლო თაშ რეთო? თაშ ქორენ-და, თქვა დეგეინტერესებნა თინეფიშ მაგალითეფ, მიდგაქ უკვე გიორჯგინეს თეს.

13. მუ მიგეხვარებნა, მთელ გურით ქიბირათ კრებაშ შეხვალამეფს?

¹³ ქიბირით მთელ გურით. მუჟამსით სამეფოშ ობირეშეფს იბიბრთ, მთავარ ყურადღება მიზანშა, იეჰოვაშ განდიდებაშა, ოკო მაფდან გინოღალირ. ართ დას, სარას, შუროთ ვემიორჩქ მუშ დუდ ჯგირ მაბირეთ, მარა იშენით ოკო ობირეშეფით იეჰოვაშ განდიდება. თეშ გურშენ თინა კრებაშო მომზადებაშ დროს ობირეშეფს ხოლო ამზადენს. თე დროს თინა ოკვირ, მუჭო რე დაკავშირებულ ობირეშეფიშ ტექსტ გარჩიებელ თემაწკუმა. სარა იჩიებ: „თენა მოხვარ, ყურადღება სიტყვეფშა გეგნიბღე დო ვართ ხოლო ჩქიმ ბირაშ უნარშა“.

14. მორდებუან ქორეთ-და, მუ მიგეხვარებნა კრებას კომენტარიშ კეთებას?

¹⁴ რეგურალურო გაკეთით კომენტარეფ. ჟიშე მოშინაფილ ტალია იჩიებ: „მა  თიცალ ლახალა მიღჷ, ნამდა, მუჟამსით ხალხიშ წოხოლე იფჩიებუქ, მანგარ ნერვიანობა მაჭყაფ, მარა თენა ხონარს ვეგმოხე. თაშ ნამდა, კომენტარეფიშ რაგად ჩქიმო მანგარ ძნელ რე“. მარა თეშ გურშენ ტალიას ვემუტებ კომენტარეფიშ კეთება. მომზადებაშ დროს თინა ითვალისწინენს, ნამდა პირველ პასუხ ირო მოკლე დო პირდაპირ ოკო რდას. ტალია აგრძელენს: „ჩქიმ პასუხ მოკლე დო მარტივ ქორენ-და, თენა თის ნიშნენს, ნამდა კომენტარ ჯგირ რე. ჩუმატარებელ ხოლო ზუსტას თეს ელჷ“.

15. მუ ოკო ფშუდან კომენტარეფწკუმა დაკავშირებით?

¹⁵ თი ქრისტიანეფს ხოლო, მით იშენდოიშენ ვა რენა მორდებუანეფ, მინშა შილებე უჭირდან კომენტარეფიშ კეთება. მუშენ? ართ და, სახელო ჯულიეტ, იჩიებ: „მინშა ფიფქრენქ, ნამდა ჩქიმ კომენტარ იშენდოიშენ ჯგირ ვა რე დო ათეშენ ვეფჩიებუქ თის“. ვაგმოჭყორდან, ნამდა იეჰოვას ოკო, თიცალ კომენტარ გუვაკეთათ, მუნერით შემლებნა. * თინა მანგარო აფასენს ჩქინ გადაწყვეტილებას, განვადიდათ კრებაშ შეხვალამეფს დო ვემეფჩათ შიშის საშვალება, მეცილან თეშ კეთებას.

16. მუნერ ჩიებას ოკო ეუჩილითუათ დუდ?

¹⁶ დუდ ეუჩილითეთ ირნერ ლანძღუას (ეფეს. 4:31). მუჭოთ ჟიშე მიფშინეთ, უწმაწურ სიტყვეფს ქრისტიან დღას ოკო ვერინუანდას. მარა თიქ შეურაცხმყოფელ ჩიებაშ შხვა ფორმეფს ხოლო ოკო ეუჩილითუას დუდ. მაგალთო, ფრთხილას ოკო ვორდათ, ნამდა უარყოფითო ვეფჩუათ ნამთინე კულტურაშე, ტომშე ვარდა ეროვნებაშე. ჩქი ვა მოკონა მითინს გურ უწყუნუათ შეურაცხმყოფელ სიტყვეფით. ართ ჯიმა იშინანს: „თიცალ მუდგარენეფს იფჩიებუდ, ნამუთ ჩქიმ აზრით ოძიცე დო ნორმალურ რდჷ, მარა შხვეფს გურს მიკაბინუდ. ჩქიმ მეუღლე წანეფიშ დინახალე მოხვარუდ თირუას დო ხვალე ვორდითინ თიმწკუმა ემინწყუნდჷ, მუჭო უწყუნუანდჷ ჩქიმ ჩიება შხვეფს გურს“.

17. მუჭოთ ეფესოელეფიშ 4:29-შე იძირე, მუჭო შემლებნა შხვეფს გურშა ელუკინათ?

¹⁷ თქვან ჩიებათ შხვეფს გურშა ელუკინით. მზათ რდათ ცქვაფაშო დო ვართ ხოლო კრიტიკა დო გერაგადინშო (წეკითხით ეფესოელეფიშ 4:29). ისრაელეფს მარდულობაშ ბრელ მიზეზ უღდეს, მარა თინეფ ირო მუდგარენიშ გურშენ იჭირებდეს. მუჟამსით კოჩ ირო იჭირებ, თენა შხვეფს ხოლო გინადვალუ. ქიგიშინით, მუქ მაჸუნ ვით მზვერავიშ ჭირებას — „ისრაელეფ მოსეს დო აარონს საყვედურენდეს“  (რიცხ. 13:31—14:4). თეშ გინაწონს, ცქვაფას შეულებ ბრელ ჯგირ საქმეშ კეთება. დარწმუნებულ ვორეთ, ნამდა იფთახიშ ცირასქუას მუშ მეგობრეფიშ ცქვაფა ქიმეხვარებუდ დანიშნულებაშ შესრულებას (მსაჯ. 11:40). ჟიშე მოშინაფილ სარა იჩიებ: „მუჟამსით შხვეფს ვოცქვანთ, თინეფს ვოგინაფუანთ, ნამდა იეჰოვას უჸორს დო ორგანიზაციას ხოლო აფასენა“. თაშ ნამდა, ირნერო ეცადით, შხვეფს შურ დო გურით ქაცქუათ.

18. მუჭოთ ფსალმუნიშ 15:1, 2-ს ბკითხულენთ, მუშენ ოკო იფჩუათ ალალას დო მუ მიშურს თეშა?

¹⁸ იჩით ალალას. ალალას ვეფჩიებუთ-და, იეჰოვაშ განდიდება ვეშმალებენა. თის ჯოგჷ ტყურაშ არძანერ ფორმა (იგავ. 6:16, 17). ადამიანეფიშ უმენტაშის მიორჩქ, ნამდა ტყურა ჩვეულებრივ ჩიებაშ ნაწილ რე, მარა ჩქი იეჰოვაშ აზრის იფთვალისწინენთ (წეკითხით ფსალმუნიშ 15:1, 2). მუშო ოკო რაგად, ჩქი დუდის ეუჩილითუანთ, მუჭოთ პირდაპირ ტყურაშ რაგადის, თეშ მუდგარენეფიშ ფულუათ შხვეფიშ შეცდომაშა მიშაჸუნაფას.

19. მუს ოკო მივაქცუათ ყურადღება?

¹⁹ დუდ ეუჩილითეთ ჭორაობას (იგავ. 25:23; 2 თეს. 3:11). ჯულიეტ, ნამუთ უკვე მიფშინეთ, ენწყუნს, მუ გლახათ მოქმედენს თიშა ჭორაობა: „ჭორაობაშ რჩქილა გურს მიტახუნს დო თი პიროვნებაშ ნდობას მიდინუანს, მიდგაშ გურშენ მეჩიებნა. ირფელს დუდ დუვანებათინ, სოვრეშე მიჩქჷ, ნამდა თინა, მით შხვაშ გურშენ ჩქიმწკუმა იჩიებ, შხვადო ჩქიმიშ გურშენ ვა დიჭყანს ჩიებას?“. მუჟამსით ქოძირუნთ, ნამდა ჩიება ჭორაობაშა გინურს, ქეცადით, შხვა თემაშა გინილათ (კოლ. 4:6).

20. მუშ კეთება გაფნა გინოჭყვიდილ თქვან ჩიებათ?

²⁰ ჩქი ფცხოვრენთ მსოფლიოს, სოდეთ ადამიანეფიშ უმენტაშ ჩიებაშ გლახა ფორმეფს ირინუანს. ათეშენ დიდ მონდომა რე საჭირო, ნამდა ჩქინ ჩიებათ იეჰოვა განვადიდათ. რშუდან, რაგადიშ უნარ იეჰოვაშ საჩუქარ რე დო თინა ოკვირ, მუჭო იბრინუანთ თის. ღორონთ აკურთხენს ჩქინ მონდომას, ნამდა ჯგირო გეგმიბრინუათ ჩიებაშ უნარ მსახურებას, ქრისტიანულ შეხვალამეფს დო ჩქინ ირდღაშიან ჩიებეფიშ დროს. მუჟამსით თე უღორონთე სისტემა გენადგურებ, უმოს ადვილ მაჸინა ჩქინ ჩიებათ იეჰოვაშ განდიდება (იუდ. 15). თე დროშ მულაშახ გინოჭყვიდილ მაფდან, გურ გუხარათ იეჰოვას ჩქინ სიტყვეფით (ფსალმ. 19:14).