1. Baka aminjovy ma fahaizantsika mivolan̈a?

 FAHAIZAN̈A mivolan̈a io kadô baka amy Zan̈ahary. Efa nahavita nikoran̈a tamy Babany andan̈itry an̈y io edy i Adama, olombelon̈o voanalohany, niaraka izy niasainy Jehovah. Nahavita namôron̈o voambolan̈a (na vocabulaire) vaovao koa i Adama. Zen̈y raha nataony taminizy nan̈amia an̈aran̈a biby jiaby. (Gen. 2:19) Hay be fa ravoravo mare izy taminizy somilany nikoran̈a taminy Eva, vady tsara salakady zatôvo namezany Jehovah izy.​—Gen. 2:22, 23.

2. Akory ahitan̈a fa maro olo tsy mahay mampiasa fahaizandro mivolan̈a, na taloha zen̈y na avahizo?

² Tsy ela tafaranizen̈y, Satana Devoly nampiasa fahaizany mivolan̈a io tamy fomba ratsy. Navandesany i Eva, ke baka tamy vandy nataony io nahavy olombelon̈o nanjary panota ndreky tsy lavorary. (Gen. 3:1-4) Karaha zen̈y koa i Adama. Izy koa fa nan̈ano raha tsy mety, nahifiny taminolo hafa hadisovan̈anany. Tsy i Eva fo namezany tsin̈y fa firaka amy Jehovah. (Gen. 3:12) Navandy tamy Jehovah koa i Kaina, izy koa fa baka namono i Abela rahalahiny. (Gen. 4:9) Tafara, nisy lelahy araiky an̈isany taranakany Kaina namôron̈o tononkalo. Lameka an̈arany. Hita tamy tononkalo nataony fa kafiry mare olo tamy zen̈y. (Gen. 4:23, 24) Ary karakory fo amy zioty? Tsy men̈atra foeky pan̈ano pôlitìky man̈ano volandratsy an̈ivonolo maro. Vitsy fo koa filma tsisy asaha ndreky volandratsy. Avio na a lekaoly na ampiasàn̈a, efa mahazatra olo maharen̈y volan̈a tsisy fan̈ajan̈a na tihitihy. Hita baka amy raha jiaby zen̈y fa ten̈a efa ratsy ankitin̈y donia ty.

3. Ino raha mila tandremantsika, avio ino raha hidinihintsika ato?

³ Izikoa atsika tsy mitandrin̈y, mety ho zatra han̈ano volandratsy edy atsika, fotony efa zen̈y fo raha ren̈intsika matetiky. Mazava ho azy, fa tsy mety atsika eky tihan̈ano zen̈y.  Atsika baka Kristianin̈y, ke atsika tihamparavoravo Jehovah. Ravoravo Jehovah izikoa ampiasaintsika hideran̈a izy kadô miavaka namezany atsika io. Hidinihintsika amy lahatsoratra ty ato akory hahavitantsika zen̈y 1) lera manompo, 2) lera mivory, avio 3) lera atsika mikoran̈a andavanandra. Fa alohanizen̈y, alô hizahavantsika antsendriky nan̈ino raha volan̈intsika io ten̈a raha maventy amy Jehovah.

4. Nan̈ino Jehovah mangala onon̈o raha koran̈intsika? (Malakia 3:16)

⁴ Vakia Malakia 3:16. Koran̈iny andininy io fa nisoratiny Jehovah tan̈atiny “boky fahatsiarovan̈a” an̈aran̈anolo mavozo izy ndreky mieritreritry momba an̈aran̈anany. Asa nan̈ino? Koran̈a ataontsika ahitan̈a raha an̈atiny fôntsika. Karaha ty ho Jesosy: “Zay raha mameno fônolo fo volan̈iny vavanany.” (Mat. 12:34) Hita amy koran̈antsika fo izikoa atsika tia Jehovah marin̈y. Tiany Jehovah hankafỳ fiainan̈a mandrakizay amy donia vaovao lan̈iany olo tia izy.

5. a) Ino ifandraisany fanompoan̈antsika ndreky raha volan̈intsika? b) Koa sary io zahavan̈a, ino raha tsy tokony hataontsika izikoa tiantsika hamparavoravo Jehovah fo raha volan̈intsika?

⁵ Hita amy fomba fikoran̈antsika fo izikoa ankasitrahiny Jehovah na tsy ikeny fanompoan̈antsika. (Jak. 1:26) Sasany aminolo tsy tia Zan̈ahary koa fa mivolan̈a, matetiky iro masiaka, man̈amia bigavo, baka io poerapoera. (2 Tim. 3:1-5) Atsika tsy tihan̈ano karaha zen̈y. Tiantsika hamparavoravo Jehovah fo raha volan̈intsika. Akory ndraiky izikoa atsika tsara fan̈ahy sady man̈aja olo izikoa fa ampivorian̈a, kanefa masiaka sady tsisy fan̈ajan̈a foeky volan̈antsika lera atsika mikoran̈a aminolo tran̈o araiky amintsika? Mamparavoravo Jehovah edy raha zen̈y va?​—1 Pet. 3:7.

6. Ino vokany, Kimberly koa fa nitandrin̈y tsara amy raha nivolan̈iny?

⁶ Izikoa ampiasaintsika tsara fahaizan̈a mivolan̈a namezan̈a atsika io, ho hita fa atsika panompony Jehovah ankitin̈y. Ho hitanolo man̈odidin̈y atsika fa tsy miran̈a ‘olo manompo Zan̈ahary ndreky olo tsy manompo izy.’ (Mal. 3:18) Diniha baka raha nandalo  tamy ranabavy Kimberly. b Tandraraiky, nirahiny papianatrandro han̈azava raha niaraka tamy tsaiky man̈angy klasy araiky taminany izy. Koa fa vita devoarandro, hitany tsaiky io fa tsy miran̈a tsaiky hafa i Kimberly. Izy tsy mitsiko olo, tsara fan̈ahy salakady tsy man̈asaha. Nahalian̈a tsaiky man̈angy io raha zen̈y ke izy nan̈eky hianatra Baiboly. Ravoravo mare Jehovah izikoa baka amy fomba fivolan̈anantsika mahavy olo avoantsory amy fahamarin̈ana.

7. Nan̈ino ma anao tihampiasa fahaizan̈a mivolan̈a namezany Jehovah io amy fomba tsara?

⁷ Tiantsika izikoa fomba fivolan̈anantsika han̈amia voninahitry Jehovah ndreky hahavy atsika hinaman̈a tsara amy piaramanompo. Ke atsika iziô handiniky raha sasany han̈ampy atsika ho ‘modely fo amy fahaizan̈a mivolan̈a.’

8. Koa zahan̈a modely nambelany Jesosy, akory tokony hampiasantsika fahaizantsika mivolan̈a lera atsika manompo?

⁸ Ndray misy olo man̈ano raha mampameloko anao, aboà fo fa anao tsara fan̈ahy ndreky man̈aja olo. Tamy Jesosy nan̈ano fanompoan̈anany tambony tany teto, izy nataonolo mamolava, angoain̈y, olony Devoly, tsy man̈aja Sabata, ndreky tsy man̈isy fôtiny Zan̈ahary. (Mat. 11:19; 26:65; Lioka 11:15; Jaona 9:16) Ndray izy man̈ano zen̈y, Jesosy tsy nasiaka tamindro. Tokony hangala tahaka izy koa atsika lera misy olo masiaka amintsika. (1 Pet. 2:21-23) Ndray zen̈y, tsy mora mifehy ten̈a. (Jak. 3:2) Kanefa, ino raha han̈ampy atsika hahavita zen̈y?

9. Lera atsika mitory, ino raha han̈ampy atsika hitandrin̈y amy volan̈a aboakantsika?

⁹ Ndray masiaka olo itorianao, anao aza meloko aminany. Karaha ty ho Rahalahy Sam: “Alaiko onon̈o fo fa mila maharen̈y ny marin̈y olo itoriako io, baka io izy mety mbala hiova fo.” An̈isany raha mety mampameloko olo itoriantsika, tsy tamy fotoan̈a mety taminany naviantsika. Izikoa atsika tôjo olo karaha zen̈y, atsika mety man̈ano karaha nataony Ranabavy Lucia. Nan̈ano vavaka fôhiky fo izy, beky Jehovah han̈ampy izy ho kalma fo ndreky ho tsara fan̈ahy fa tsy han̈ano volan̈a tsy pare na tsy man̈aja.

10. Koa 1 Timoty 4:13 io zahan̈a, ino ma tanjon̈ontsika?

¹⁰ Ampitombosa fahaizanao mampianatra. Ten̈a nahay nitory i Timoty. Fa ndray zen̈y, izy mbala nila nankatsara fahaizany mampianatra fo. (Vakia 1 Timoty 4:13.) Zen̈y koa raha tokony hataontsika. Ino raha han̈ampy atsika hahavita zen̈y? Atsika mila man̈oman̈a tsarabe. Mankasitraka Jehovah atsika, fotony atsika manan̈a fitaovan̈a fampianaran̈a isankarazany. Fampiasantsika iro fitaovan̈a aby io  han̈ampy atsika hankatsara fahaizantsika mampianatra. Ohatra, hahita hevitry tsara anao izikoa mamaky bokikely Mifen̈a Mare amy Vakiteny Avio Fampianaran̈a ndreky “Fampiofan̈ana amy Fanompoan̈a” amy Fomba Fiain̈ana Kristianin̈y Ndreky Fanompoan̈a: Boky Fianaran̈a. Asa anao mba mampiasa fitaovan̈a aby io? Izikoa atsika man̈oman̈a tsarabe, tsy havozovozo foeky atsika koa fa mampianatra sady hahaihatoky ten̈a fo.

11. Akory nahavy piaramanompo sasany nanjary nahay nampianatra mare?

¹¹ Hahaihitombo koa fahaizantsika mampianatra, izikoa atsika mandiniky raha ataonolo an̈ivony fiangonan̈a, ndreky mangala fianaran̈a baka amy zen̈y. Karaha zen̈y nataony Sam, araiky nikoran̈intsika in̈y. Nalainy onon̈o ino mahavy piaramanompo sasany mahay mampianatra mare. Nidinihiny koa fomba fampianarandro, avio nalainy tahaka raha nataondro. Ranabavy Talia ndraiky nanjary nahay namaly fan̈ontanian̈a fapetrakanolo itorian̈a. Akory nataony? Koa fa man̈ano kabaro rahalahy araiky mahay, nalainy onon̈o karakory ataony rahalahy io man̈azava hevitry.

12. Ino raha mety hanahiran̈a sasany amintsika?

¹² Milamin̈y ndreky mampahery tsara fivorian̈a, izikoa miaraka mihira olo jiaby avio samby man̈amia valinteny avoaoman̈a tsarabe. (Sal. 22:22) Tsy mora aminolo sasany mihira na mamaly teny an̈ivonolo maro zen̈y. Asa anao mba karaha zen̈y? Mety ho tianao hahay raha nataonolo sasany beky iro tsy havozo hihira ankilanolo ndreky han̈amia valinteny.

13. Ino raha han̈ampy anao hihira amy fô jiaby, koa fa mivory?

¹³ Mihirà amy fô jiaby. Ino ma antony maventy mahavy atsika mihira koa fa mivory? Atsika tihidera Jehovah. Sara, ranabavy araiky zay nivolan̈a fa izy tsy mahay mihira. Fa ndray zen̈y, izy mba tihidera Jehovah aminy hira. Akory nataony? Lera izy man̈oman̈a raha ianaran̈a amy fivorian̈a, omaniny koa hira. Ampodimpodiny fo hira io, avio dinihiny ino ifandraisany raha volan̈iny hira io amy raha handeha hianaran̈a amy fivorian̈a. Karaha ty koa ho izy: “Fan̈anaovako zen̈y man̈ampy zaho hifantoko amy raha volan̈iny hira io, fa tsy amy fahaizako mihira.”

14. Izikoa anao bihen̈amaso, ino raha han̈ampy anao han̈amia valinteny?

¹⁴ Isaka fivorian̈a, mifen̈a fo han̈amia valinteny. Tsy mora aminolo sasany mare raha zen̈y. Ho Talia, araiky nikoran̈intsika taloha tarỳ in̈y: “Tsy azoazoko foeky ain̈inaka, zaho koa fa an̈ivonolo maro. Ke sahiran̈a mare zaho koa fa hamaly teny. Fa raha zen̈y tsy hainolo aby, fotony matetiky feonaka kalma.” Ndray zen̈y, tsy nataony Talia tamban̈a  tsy han̈amezan̈a valinteny raha zen̈y. Lera izy man̈oman̈a fivorian̈a, alainy onon̈o fo fa valinteny voanalohany tokony fôhiky, tsotra avio mivantan̈a. Ke ho izy: “Dikanizen̈y, tsy man̈ino aby ndray valinteninaka ataoko fôhiky, tsotra avio mivantan̈a, fotony karaha zen̈y valinteny tadiaviny pitariky fianaran̈a.”

15. Ino raha tokony halaintsika onon̈o momba valintenintsika?

¹⁵ Kristianin̈y sasany ndraiky tsy bihen̈amaso fa iro tsy masaky mamaly teny. Asa nan̈ino? Ty raha nazavainy ranabavy araiky, Juliette an̈arany: “Misy lera zaho misalasala hamaly teny, fotony hitako karaha tsotra loatra na tsy dia tsara valinteny tiako hatao.” Tsaraova fa, tiany Jehovah han̈amia valinteny farany tsara vitantsika atsika. c Ravoravo mare koa izy mahita atsika tapakevitry hidera izy izikoa fa mivory, ke mamaly teny fo atsika ndray mavozo.

16. Volan̈a karakory ma tsy tokony hataontsika?

¹⁶ Aza ‘manihitihy.’ (Efes. 4:31) Efa hitantsika tiô fa olo Kristianin̈y zen̈y tsy tokony han̈ano volandratsy foeky. Misy karazan̈a tihitihy sasany karaha tsy ten̈a mivantan̈a, kanefa tsy tokony hatao. Ohatra iziô, mitandrin̈y atsika baka tsy hankaratsy olo tsy karazan̈a araiky amintsika, na tsy tany araiky favian̈a amintsika. Tsy tiantsika koa hivolan̈a raha mamparary fô olo. Karaha ty ho rahalahy araiky: “Misy fotoan̈a zaho mieritreritry fa raha nivolan̈iko in̈y raha zisty mampimoe fo sady tsy man̈ino aby. Kaiky raha ty tsy manjary sady namparary fônolo. Nakiry izy, vadiko nan̈ampy zaho fo tan̈atiny taon̈o maro. Kahiany mitokan̈a zaho izikoa hitany fa mahitsihitsy ndreky mamparary fônany na ninolo hafa fomba fivolan̈ako.”

17. Eraka raha koran̈iny Efesianina 4:29, ino raha tôkotro hataontsika izikoa atsika tihankahery olo?

¹⁷ Man̈anaova koran̈a mankahery. Aza malaky mikritìky na mitretre, fa mitadiava antony hideran̈a olo. (Vakia Efesianina 4:29.) Iro Israelita aby io zatra nin̈on̈on̈o, kanefa maro raha mety nan̈anaovandro mersy Jehovah. Farandraha mora mifindra eky fahazaran̈a min̈on̈on̈o io. Ohatra iziô, ‘nin̈on̈on̈o tamy Mosesy aby Israelita jiaby’ izikoa iro efa naharen̈y tatitry ratsy nataondro pitsikilo folo aby in̈y. (Nom. 13:31–14:4) Manjary mahavita raha tsara ndraiky olo araiky izikoa fa mahazo teny fideran̈a. Karaha zen̈y iziô zanaka Jefta. Matoky atsika fa nanjary nahavita nanohy fanompoan̈anany tsaiky man̈angy io, fotony iro kamaradiny aby io nidera izy. (Mpits. 11:40) Karaha ty ho Sara, araiky nikoran̈intsika in̈y: “Atsika koa fa midera olo, ny  raha misy, olo io manjary mahatsapa fa tiany Jehovah ndreky tianolo amy fiangonan̈a ao izy.” Ke mitadiava ôkazion hideran̈a olo.

18. Nan̈ino ma atsika tsy maintsy mivolan̈a ny marin̈y fo, izikoa Salamo 15:1, 2 zahavan̈a? Ino raha tafiditry amy zen̈y?

¹⁸ Aza mavandy. Tsy ho ravoravo amintsika foeky Jehovah izikoa atsika tsy mivolan̈a ny marin̈y. Halany aby karazan̈a vandy jiaby. (Ohab. 6:16, 17) Amy zioty, tsisy dikany aminolo foeky mavandy zen̈y. Kanefa, atsika tsy tokony han̈ano zen̈y fotony izio halany Jehovah. (Vakia Salamo 15:1, 2.) Marin̈y ndraiky fa mila mivolan̈a ny marin̈y atsika, fa zen̈y tsy ampy. Mila mitandrin̈y koa atsika tsao kinia manitriky fan̈azavan̈a, ke hahavy olo mitandren̈y atsika ho diso hevitry.

19. Ino koa raha tokony tandremantsika?

¹⁹ Mitandrema tsao mitsiko olo. (Ohab. 25:23; 2 Tes. 3:11) Nivolan̈a i Juliette, araiky nikoran̈intsika taloha in̈y, fa nisy vokany ratsy taminany koran̈a tsy mankahery nataonolo. Ho izy: “Tsy mankahery foeky maharen̈y naman̈a mitsiko olo. Manjary tsy atokisako eky izy. Haiko aia, asa mitsiko zaho fo izy ambadimbadiky an̈y?” Ke ivoà malaky koran̈a izikoa hitanao fa komansy mivadiky fitsikoan̈a olo koran̈anaro.​—Kol. 4:6.

20. Tapakevitry han̈ino ma anao?

²⁰ Donia ty feno olo man̈ano volandratsy ndreky koran̈a tsy mankahery, ke tsy maintsy mifen̈y mare atsika beky koran̈a ataontsika mamparavoravo Jehovah fo. Tsaraova fa, kadô baka amy Jehovah fahaizantsika mivolan̈a io, ke misy kôntiny aminany fomba ampiasantsika izio. Hamezany hatsaran̈a atsika izikoa mitandrin̈y tsara amy raha volan̈intsika lera atsika manompo ndreky mivory, baka io lera atsika mikoran̈a andavanandra. Lera donia ratsy ty ravan̈iny Jehovah an̈y, ho moramora amintsika han̈ano koran̈a man̈amia voninahitry izy. (Joda 15) Fa parpavianizen̈y, ataova fo raha hahavy ‘volan̈a aboakany vavanao’ hamparavoravo Jehovah.​—Sal. 19:14.