DILONGI 15
Ngie Widi “Kifuani [Kimboti]. . . mu Thubulu”?
“Ba kifuani kuidi bakuikama mu thubulu.”—1 TIMO. 4:12.
NKUNGA 90 Tukindasananga Befu na Befu
MAMBU TUANLONGUKA *
1. Nani wu tuvana nkhailu wu kukoluka?
LUAKU lu kukoluka widi nkhailu wu Nzamb’itu yi luzolo. Bo dibakala ditheti Adami kavangu, nandi wuba luaku lu kukoluka na Tat’andi yi diyilu ayi kulonguka bikuma binkaka. Adami wusadila luaku alolo muingi kuvanga kiyeku bamvana ki kuvana mazina kuidi bibulu bioso. (Ngene. 2:19) Yindula buidi nandi kabela mu mayangi bo kayoluka mu khumbu—yitheti na nkazi’andi Eva!—Ngene. 2:22, 23.
2. Tona mu thangu yikhulu nati bubu, buidi batu bansadilanga nkhailu wu kukoluka?
2 Vasa vioka ko beni thangu, batu batona kusadila bubi nkhailu wu kukoluka. Satana nkadi’aphemba wuvuna Eva ayi luvunu alolo lutuadisa disumu. (Ngene. 3:1-4) Adami kasa sadila ko buboti luaku lu kukoluka bo kavana fotu Eva—ayi Yave mu—mambu mamonika. (Ngene. 3:12) Kayini wuvuna Yave bo kavonda khomb’andi Abeli. (Ngene. 4:9) Buviokila thagu wumueka mu nkunu Kayini babe tedilanga Lameki wusonika buidi batu mu thangu’andi babela buphunya. (Ngene. 4:23, 24) Mbi tulenda tuba matedi bilumbu bitu? Bubu tummonanga zimfumu zi luyalu kusadila thubulu mu phila yimbi. Ayi phasi beni kumona filme bakhambu sadila thubulu mu phila yimbi. Bana ba kikola bankuwanga bikuma bikhambu fuana mu kikola ayi batu bansalanga bankuwanga biawu ku kisalu. Phila batu mu nza yimvimba bansadilanga thubulu, yidi mbonosono ti batu bavuanga ko nkinza nkhailu awowo.
3. Mambu mbi tufueti bela keba keba ayi mbi tuenlonguka mu dilongi adidi?
3 Befu kukhambu ba keba keba, tulenda khuku mu phila batu bankolukilanga bubu ayi kutona mvandi kukolukila mu phila beni. Mu kuba Baklisto, tuntomba kukuangidika Yave kubika to mu kukhambu sadila nkhailu wu thubulu mu phila yimbi. Vayi tufueti sadila nkhailu awowo muingi—kutuadisa nzitusu kuidi Nzambi. Mu dilongi adidi tuentubila buidi tulenda vangila mawu, (1) mu kisalu ki kusamuna, (2) mu zikhutukunu ayi (3) bo tunkoluka na bankaka. Vayi theti tuammona kibila mbi Yave kamvuilanga nkinza mambu tuntuba.
YAVE WUMVUANGA NKINZA MAMBU TUNKOLUKA
Buidi mambu wuntuba mammonisina mambu widi mu ntima? (Tala matangu 4-5) *
4. Dedi bummonisina Malaki 3:16, kibila mbi Yave kamvuilanga nkinza mambu tuntuba?
4 Tanga Malaki 3:16. Ngie zebi kibila mbi Yave kasonikina mu “buku yimbambukulu moyo” mazina ma batu bammonisanga ti bakumvuminanga mu mambu bantuba ayi bankinzikanga dizina diandi? Mambu tunkoluka mammonisanga mambu tuidi mu ntima. Yesu wutuba: “Mambu mambasikanga mu munu mamfuminanga mu ntima.” (Matai 12:34) Mambu tunkoluka mammonisanga kitesu ki luzolo tuidi mu Yave. Ayi Yave wuntomba batu ba kunzolanga, babaka ndandu yi kuzinga mvu ka mvu mu nza yimona.
5. (a) Buidi mbuongimin’itu yididi nguizani na mambu tunkoluka? (b) Dedi bummonisina foto, mbi tufueti tebukanga moyo mu matedi mambu tunkoluka?
5 Mambu tuntuba malenda monisa boti Yave wunkuiza kikinina mbuongimin’itu. (Yako. 1:26) Batu bakhambu sadilanga Yave bankolukilanga mu lukasu ayi mu lungundayi. (2 Timo. 3:1-5) Bukiedika, tuisintomba ko kuba dedi bawu vayi tuntomba kukuangidika Yave mu mambu tunkoluka. Yave wunkuiza ba mu mayangi befu kukolukilanga mu luzolo ayi kumonisa mamboti mu kisalu ki kusamuna ayi mu zikhutukunu. Vayi bukiedika ti Yave wunkuiza kikinina mbuongimin’itu befu kukolukilanga mu lukasu ayi mu phila yikhambu fuana na batu va dikanda ditu?—1 Pete. 3:7.
6. Ndandu mbi yaya Kimberly kabaka mu kusadila buboti thubulu?
6 Befu kusadila buboti nkhailu wu kukoluka, tunkuiza ba bazabakana banga Zimbangi zi Yave. Mvandi tunsadisanga batu kumona disuasana didi kuidi mutu “wunsadilanga Nzambi ayi no wukhambu kunsadilanga.” (Mala. 3:18) Mona bivisa bi mambu amomo mu kifuani ki yaya Kimberly. * Nandi ayi ditoko dimueka waba kotanga yandi kikola, baba vana kisalu muingi bavanga. Bo batona kusala, ditoko beni wumona ti yaya Kimberly wuba disuasana na bana bankaka ba kikola. Nandi kabasa tubilanga ko bankaka bubi, wuba thubulu yimboti ayi kasa tuba ko mafunza. Ditoko beni wuyituka ayi wukikinina ndongukulu yi Kibibila. Yave wumbanga mu mayangi bo tunsadila nkhailu awowo muingi kusadisa batu kuzaba kiedika!
7. Buidi ngie wuntombila kusadila nkhailu wu kukoluka Nzambi ka kuvana?
7 Befu boso tuntomba kutuba mambu mankuiza zitisa Yave ayi mankuiza tusadisa kufikama zikhomba zitu. Buabu, tuemmona ziphila tulenda tatiminina kuvana “kifuani kimboti. . . mu thubulu.”
BA KIFUANI KIMBOTI MU KISALU KI KUSAMUNA
Kukolukila mu luzolo mu kisalu ki kusamuna kunkuangidikanga Yave (Tala matangu 8-9)
8. Kifuani mbi Yesu ka tuvana mu matedi phila kaba kolukilanga na batu?
8 Yolukila mu lukinzu kheti ba kusoka mu kisalu ki kusamuna. Bo Yesu kaba va ntoto, batu baba tubanga ti nandi wuba kikolu mbungu, wabe dianga beni, wabe tuadusulu kuidi Satana, kabasa kinzikanga ko kilumbu ki kisabala ayi kabasa monisanga ko lukinzu kuidi Nzambi. (Matai 11:19; 26:65; Luka 11:15; Yoa. 9:16) Vayi kheti bobo, Yesu kabasa kolukilanga ko yawu mu nganzi. Dedi Yesu, befu mvitu tulendi kolukilanga ko mu lukasu voti mu nganzi. (1 Pete. 2:21-23) Vayi tuzebi ti disi ko diambu diluelu kuvanga mawu. (Yako. 3:2) Mbi bilenda ku tusadisa?
9. Mbi bilenda ku tusadisa kuyala mambu tuntuba mu kisalu ki kusamana?
9 Bika kusikika mayindu mu phila mutu kankolukila yaku mu kisalu ki kusamuna. Yaya Sam wutuba: “Yinsikikanga mayindu mami mu tsatu mutu kadi yi kukuwa zitsangu zimboti ayi yimbanga lufiatu ti nandi kalenda balula mayindu mandi.” Khumbu zinkaka mutu beki nzo wumbanga mu nganzi kibila tube kuenda mu thangu yikhambu fuana. Bo tundengana mutu widi mu nganzi, tulenda vanga mambu yaya Lucia kamvanganga. Kusambila mu thinu muingi kudinda kuidi Yave ka tusadisa tuba bavumbama ayi kubika tuba mambu makhambu fuana.
10. Dedi bummonisina 1 Timoteo 4:13, makani mbi tufueti baka?
10 Ba nlongisi wupisuka. Timoteo wuba nlongisi wupisuka vayi kheti bobo, vabe tombulu nandi kutatamana kupisuka. (Tanga 1 Timoteo 4:13.) Buidi tulenda bela minlongisi mipisuka mu kisalu ki kusamuna? Tufueti kubamanga buboti. Befu tuidi bilongulu biwombo bilenda tusadisa kuba minlongisi mipisuka. Wunkuiza zola beni kufiongunina mua buku Bwela Pisuka mu Kutanga ayi Kulonga ayi kikhuku “Pisuka mu Kisalu ki Kusamuna” mu Nzingulu ayi Kisalu—Kitu Ki Buklisto. Bukiedika ti ngie widi mu kubaka ndandu mu zithuadusulu aziozio? Befu kukubamanga buboti tunkuiza yolukilanga mu lufiatu ayi mu khambu boma.
11. Buidi minsamuni minkaka bayiza bela minsamuni mipisuka?
11 Mvandi tulenda ba minlongisi mipisuka mu kulonguka mu bifuani bi minsamuni minkaka. Sam tube tubila kumbusa wukikuvusanga, mbi binsadisanga minlongisi minkaka kuba bapisuka? Nandi wunlongukanga buidi bawu bansamuninanga ayi wunlandakananga bifuani biawu. Khomba mueka bantedilanga Talia, wulonguka mu kifuani ki minsamuni mipisuka buidi kalenda tambudila biuvu bankuvulanga beni mu kisalu ki kusamuna.
BA KIFUANI KIMBOTI MU ZIKHUTUKUNU
Kukuimbila mu ntima woso mu zikhutukunu kunzitisanga Yave (Tala matangu 12-13)
12. Bikaku mbi zikhomba zinkaka bamviokilanga?
12 Befu boso tulenda sadisa muingi zikhutukunu zivangimina mu phila yifuana mu kukuimbilanga ayi kukubamanga buboti muingi kuvana mimvutu. (Minku. 22:22) Vayi bankaka bammonanga phasi kukuimbila ayi kuvana mimvutu mu zikhutuku. Buawu mvaku wummuenanga? Boti buawu, wunkuiza zola kuzaba mbi bisadisa zikhomba zinkaka kununga boma abobo.
13. Mbi bilenda ku tusadisa kukuimbila mu ntima woso mu zikhutukunu?
13 Yimbila mu ntima woso. Bo tunkuimbila minkunga mu zikhutukunu, makani mitu mambanga ma kukembisa Yave. Khomba mueka bantedilanga Sara waba yindulanga ti kasi ko mbembu yimboti muingi kukuimbila. Vayi kheti bobo, nandi wuntombanga kukembisa Yave mu kukuimbila. Diawu, dedi bo kankubikilanga zikhutukunu nandi mvandi wunkubikanga minkunga. Nandi wumvanganga mawu mu kukuimbila minkunga ayi kumona buidi miawu mididi nguizani na mambu bankuiza tubila mu lukutukunu. Nandi wutuba “mawu ma kutsadisanga kusikika mayindu mu bikuma bansadila mu nkunga kubika kuandi mu phila yinkuiza yodila wawu.”
14. Boti wummonanga zitsonyi, mbi bilenda kusadisa kuvana mimvutu mu zikhutukunu?
14 Vananga mimvutu mu zikhutukunu. Tuzebi ti kuvanga mawu dilenda ba diambu diphasi kuidi bankaka. Yaya Talia wutuba: “Kheti bankaka banunganga ko kumona, vayi minu yimmonanga phasi kukoluka vantuala batu, diawu kuvana mimvutu, didi diambu diphasi kuidi minu”. Vayi kheti bobo, mawu mantulanga ko nkaku muingi kubika vana mimvutu. Bo kankubika lukutukunu, nandi zebi ti mvutu mutu kafueti vana wufueti ba wukhufi ayi wukhambulu phasi. Nandi wutuba: “Yizebi ti mvutu wukhufi ayi wusulama wawu ntuadisi kantomba.”
15. Mbi tufueti tebukanga moyo matedi kuvana mimvutu?
15 Kheti zikhomba bakhambu monanga zitsonyi, Khumbu zinkaka balenda mona phasi kuvana mimvutu mu zikhutukunu. Kibila mbi? Tala mambu khomba yinkieto bantedilanga Juliet katuba: “Khumbu zinkaka yimmonanga boma kibila yinyindulanga ti mvutu’ama widi beni wukhufi ayi wisi ko beni wusulama.” Vayi tebukanga moyo ti Yave wuntomba tuvana mimvutu tulenda nunga. * Nandi wuntondanga beni mu kumona mangolo tumvanga muingi kuvana mimvutu ayi kukhambu bika boma bu tutula nkaku muingi kuvanga mawu.
BA KIFUANI KIMBOTI BO WUNKOLUKA NA BANKAKA
16. Ntindu mbi thubulu tufueti bika?
16 Bika ziphila zioso ‘zithubulu zikhambu fuana.” (Efe. 4:31) Dedi bo tuma tubila, Baklisto bafueti bika zithubulu zimbi. Vayi vadi phila yimueka yi thubulu tufueti belanga keba keba. Dedi, tufueti banga keba keba muingi tubika dedikisanga batu badi mimvila ayi bikhulu biviakana. Mvandi tuisintomba ko kunyongisa zikhomba mu mambu tuntuba. Khomba mueka wutuba: “Khumbu zinkaka yaba kolukanga mambu muingi kuvanga bankaka kuseva, vayi mawu maba luekanga mintima mi bankaka”. Ayi mu mimvu miwombo nkazi’ama waba kukhambanga mu thangu yinsadila bikuma bi kunyongisa ayi mvandi biabe nyongisanga bankaka.”
17. Dedi bummonisina Efeso 4:29, buidi tulenda kindisila bankaka?
17 Sadila bikuma binkindisa bankaka. Ba kifu ki kufika nyunganga bankaka kubika kuandi kunyungutanga voti kukuana. (Tanga Efeso 4:29.) Basi Isaeli baba bibila biwombo muingi kutonda, vayi bawu batona kunyunguta. Kifu ki kunyungutanga kilenda tambakana kuidi bankaka. Tebuka moyo ti kipolo 10 di minlenga mambu bavana, kivanga basi “Isaeli boso kunyungutina Mose.” (Zinta. 13:31–14:4) Vayi kunyunganga batu yidi phila yimboti yi kukindisila bankaka. Tulenda ba lufiatu ti muana Yefeta wubaka khindusulu yiwombo muingi kutatamana mu kiyeku kiandi mu kibila ki bakundi bandi baba kunyunganga. (Minkongu. 11:40) Sara, tube tubila kumbusa wutuba: “Bo tunyunga bankaka, tunkuiza basadisa kuvisa ti Yave wu kuba zolanga ayi badi kibuangu kinkinza mu kimvuka kiandi. Diawu tufueti tombanga luaku muingi kunyunga zikhomba mu ntima woso.
18. Dedi bummonisina Minkunga 15:1, 2, kibila mbi tufueti bika kutubanga luvunu ayi mbi mawu mansundula?
18 Tubanga kiedika. Tulendi kuangidika ko Yave befu kutubanga luvunu, kibila nandi wunlendanga ziphila zioso zi luvunu. (Zinga. 6:16, 17) Kheti batu bawombo bubu bammonanga ti kutuba luvunu disi ko diambu dimbi, befu tufueti tadilanga luvunu dedi bo Yave kantadilanga. (Tanga Minkunga 15:1, 2.) Befu tuisintomba ko to kubika tubanga luvunu, vayi mvandi tufueti bika tubanga mambu malenda bika bankaka mu divuda.
Kubalula disolo dimbi mu disolo dimboti kuntuadisanga lunungu va meso ma Yave (Tala lutangu 19)
19. Diambu mbi dinkaka tufueti bela keba keba?
19 Bika kusekanga buezi. (Zinga. 25:23; 2 Tesa. 3:11) Juliet tube tubila, wutuba buidi kusekanga buezi didi diambu dimbi. Nandi wutuba: “ Kukuwa batu kuseka buezi kukumbikanga mu kiunda ayi kukuphanganga kubika fiatila mu mutu beni, kibila boti nandi wuntubila bubi mutu wunkaka, buna kalenda kuphangila mawu”. Ngie kumona ti disolo dientona kuvekuka buna balula disolo beni.—Kolo. 4:6.
20. Mbi tufueti ba bakubama muingi kuvanga?
20 Bo tukidi zingila mu nza ayiyi bakhambu sadilanga buboti nkhailu wu kukoluka, tufueti vanga beni mangolo muingi mambu tuntuba mayangidika Yave. Tebuka moyo ti kukoluka widi nkhailu wu Yave ayi nandi wumvuanga nkinza phila tunsadila nkhailu beni. Yave wunsakumunanga mangolo moso tumvanga muingi kukoluka mambu mankindisa mu kisalu ki kusamuna, mu zikhutukunu ayi mu masolo mitu ma lumbu ka lumbu. Bo nza ayiyi yimbi yala tuluka, dinkuiza ba diambu diluelu kuzitisa Yave mu mambu tuntuba. (Yuda 15) Vayi bo mawu mamonikiniabu ko, tufueti vanga mamoso muingi kukuangidika Yave mu mambu tuntuba.”—Minku. 19:14.
NKUNGA 121 Tufueti Kukiyala
^ Yave wu tuvana nkhailu wumboti beni—luaku lu kukoluka. Kiadi ayi kiunda kibila bawombo basadilanga ko nkhailu awowo dedi bo Yave kabe tombila. Mbi binkuiza tusadisa kukoluka mambu mankindisa ayi mankuangidika Yave mu nza yiwedi mambi? Buidi tulenda kuangidikila Yave mu mambu tunkoluka bo tuidi mu kisalu ki kusamuna, mu zikhutukunu ayi bo tunkoluka na bankaka? Dilongi adidi dinkuiza vana mimvutu mi biuvu abiobio.
^ Bavingisa mazina mankaka.
^ Muingi wubuela zaba mawu tala Kibanga ki Nsungi ki Ngonda Yitheti mvu 2019, dilongi dintuba “Zitisa Yave mu Kimvuka.
^ MAMBU MADI MU ZIFIKULA: Khomba mueka wunkolukila mu nganzi na mutu beki nzo mu kisalu ki kusamuna; khomba mueka wummanga kukuimbila mu lukutukunu; ayi khomba mueka yinkieto wunseka buezi.
