1. ¿Xiñee randa rininu?

 CUMU nadxii Jehová laanu la? bizaʼbe laanu para ganda guininu ne nácani ti regalu bidiibe laanu. Biquiiñeʼ Adán, primé hombre que, regalu riʼ para guiniʼné Bixhoze ni nuu guibáʼ. Laaca gunda bizaʼbe stale diidxaʼ para iquiiñebe. Ne zacá nga gunda biʼniʼ cumplirbe dxiiñaʼ ni bidii Dios laabe, quíxhebe lá guiráʼ manihuiiniʼ que (Gén. 2:19). ¡Nanna pabiáʼ nayecheʼ biʼniʼ sentirbe primé biaje guníʼnebe xheelabe Eva yaʼ! (Gén. 2:22, 23).

2. ¿Xiñee cadi jneza biquiiñeʼ binni regalu bidii Dios laanu dxiqué, ne ximodo riquiiñeʼ binni ni yanna?

² Peru nin qué nindaa nuu tu maʼ qué niquiiñeʼ regalu riʼ jneza. Bisiguii Binidxabaʼ Eva, ne pur bisiguiibe laa la? guiranu nápanu pecadu ne rucheʼnu (Gén. 3:1-4). Cadi jneza biquiiñeʼ Adán regalu ni bidii Jehová laa purtiʼ guniʼbe Eva napa donda pur bicheebe ne ngueca guniʼbe de Jehová (Gén. 3:12). Bisiguii Caín Jehová despué de biiti Abel, biʼchiʼ (Gén. 4:9). Gudiʼdiʼ si ti tiempu, Lamec tobi de ca ni zá de xiiñiʼ Caín gudixhe ti poesía ni rusihuinni guizáʼ maʼ ridinde binni tiempu stiʼ (Gén. 4:23, 24). ¿Laga ca dxi stinu riʼ yaʼ? Maʼ qué rituí lú ca políticu guiniʼcaʼ diidxaʼ guidxa nezalú binni. Guizáʼ maʼ nagana nga guidxélanu ti película ra qué riníʼcabe diidxaʼ guidxa. Ne zacaca nga riníʼ binni ra scuela ne ra dxiiñaʼ. Rusihuinni ndiʼ guizáʼ maʼ binitilú guidxilayú riʼ.

3. ¿Xi zándaca guizaaca pa qué chuʼnu cuidadu, ne xi zazíʼdinu lu artículo riʼ?

 ³ Zándaca guiráʼ dxi runadiáganu diidxaʼ ni cadi jneza nga runi pa qué chuʼnu cuidadu la? zándaca maʼ guzulú guininu diidxaʼ ni cadi jneza. Laanu, ca xpinni Cristu, rúninu stipa pur gusiéchenu Jehová, nga runi qué rininu diidxaʼ guidxa. Peru laaca rúninu stipa iquiiñenu regalu ni bidii Jehová riʼ laanu jneza ne zacá gusisácanu laa. Lu artículo riʼ, zadúʼyanu ximodo zanda gúninu ni lu predicación, lu reunión ne ora maʼ caninenu sti binni. Peru ante, guidúʼyanu xiñee risaca ca diidxaʼ ni rininu para Jehová.

4. Pur ni ná Malaquías 3:16, ¿xiñee risaca ca diidxaʼ ni rininu para Jehová?

⁴ (Biindaʼ Malaquías 3:16). ¿Xiñee zucaa Jehová lu ti libru lá ca binni ni ridxibi laabe ne rusisaca labe? Purtiʼ ni rininu rusihuinni xi nuu ndaaniʼ ladxidoʼno. Sicaríʼ guníʼ Jesús: «Ni nuu ndaaniʼ ladxidóʼ binni nga riníʼ» (Mat. 12:34). Nga runi pur modo ruinu diidxaʼ rihuinni pabiáʼ nadxiinu Jehová. Ne ca binni ni nadxii laabe nga racaláʼdxibe guibánicaʼ ndaaniʼ ti guidxilayú cubi.

5. a) ¿Xiñee caquiiñeʼ chuʼnu cuidadu ca diidxaʼ ni rininu? b) Pur ni rihuinni lu ca foto ca, ¿xi cadi naquiiñeʼ guiaandaʼ laanu ora guininu para gusiéchenu Jehová?

⁵ Qué ziuulaʼdxiʼ Jehová modo runi adorarnu laa pa qué chuʼnu cuidadu modo rininu (Sant. 1:26). Ca binni ni cadi nadxii Jehová guizáʼ nadúxhucaʼ, nadipaʼ modo riníʼnecaʼ binni ne orgulloso laacaʼ (2 Tim. 3:1-5). Qué lica racaláʼdxinu gácanu casi laacabe. Ni racaláʼdxinu nga guiecheʼ Jehová ora gunadiaga modo rininu. Peru ¿ziechené xa Jehová tuuxa ni rusihuinni naca ti binni nadóʼ ra reunión ne lu predicación, peru ra lidxi naduxhuʼ ne ridindené familia stiʼ? (1 Ped. 3:7).

6. ¿Xi guleendú Kimberly pur modo riníʼ?

⁶ Pa gúninu stipa guininu ni jneza zuuyaʼ binni tuu nga ni «runi ni ná Dios ne  tuu nga ni qué runi ni nabe» (Mal. 3:18). Ni caninu nga, zudii binni cuenta dxandíʼ xpinni Jehová laanu. Guidúʼyanu ni bizaaca ti hermana láʼ Kimberly. * Ora biʼniné Kimberly ti xcompañera de scuela tarea juntu la? bidii xcompañérabe cuenta maʼ gadxé laabe. Qué riniʼbe binni, nacháʼhuibe ne qué riniʼbe diidxaʼ guidxa. Ngue runi gudixhe ique ganna xiñee zaqué laabe, despué bidii Kimberly estudiu laabe. ¡Guizáʼ riecheʼ Jehová ora guʼyaʼ riuulaʼdxiʼ binni guidxiña laa pur modo rininu!

7. ¿Ximodo racaláʼdxiluʼ iquiiñeluʼ regalu ni bidii Dios lii?

⁷ Guiranu racaláʼdxinu gusisácanu Jehová pur modo rininu ne gacaneni laanu gaca xhamígunu ca hermanu. Nga runi, guidúʼyanu chupa chonna cosa ni zacané laanu para gácanu ti ejemplu galán para xcaadxi pur modo rininu.

8. ¿Ximodo zanda chinándanu ejemplu stiʼ Jesús ora maʼ cayuni predicarnu?

⁸ Guca nachaʼhuiʼ ne biʼniʼ respetar binni ora tindené lii. Dxi guyuu Jesús lu Guidxilayú, nuu tu guníʼ nácabe ti binni «nalá ne reʼ xhaataʼ vinu» ne rúnibe xhiiñaʼ Binidxabaʼ, qué runi respetarbe dxi sábadu ne dede riniʼbe contra Dios (Mat. 11:19; 26:65; Luc. 11:15; Juan 9:16). Peru qué lica nicabiruaa Jesús laacabe. Pa chuʼ ora tindené tuuxa laanu la? naquiiñeʼ gácanu casi Jesús, ne cadi guicabiruaanu binni (1 Ped. 2:21-23). Dxandíʼ nuu tiru nagana nga gucueezanu laanu (Sant. 3:2). ¿Xi zanda gúninu para gucueezanu laanu yaʼ?

9. ¿Xi zanda gúninu para cadi guininu xiixa diidxaʼ ni guchiichi binni?

⁹ Pa tindené tuuxa lii ora maʼ ziguni predicarluʼ, biʼniʼ stipa cadi guidxiichiluʼ. Ti hermanu láʼ Sam guníʼ: «Runeʼ stipa guiníʼ iqueʼ caquiiñeʼ guiziidiʼ binni ni dxandíʼ ne zanda guchaa». Zándaca tindené ti binni laanu purtiʼ ora peʼ cadxiichibe yendanu. Pa chindanu ra lidxi ti binni ni cadxiichi, zanda gúninu ni runi ti hermana láʼ Lucía: nagueendaca gúninu ti oración para guinábanu Jehová gacané laanu gaca calmarnu ne cadi guininu xiixa diidxaʼ ni guchiichi binni.

10. Pur ni ná lu 1 Timoteo 4:13, ¿xi caquiiñeʼ gúninu?

¹⁰ Biʼniʼ stipa gusiidiluʼ jneza. Guizáʼ gunna Timoteo guni predicar, peru neca zaqué biyúbibe gusiidibe jma jneza (biindaʼ 1 Timoteo 4:13). ¿Xi zanda gúninu para gusíʼdinu jma jneza yaʼ? Caquiiñeʼ gaca preparar chaahuinu. Para ganda gúninu  nga la? nápanu ni zanda gacané laanu, casi folletu Gusíʼdinu ne guidúʼndanu jma jneza, ne sección ni láʼ «Gusíʼdinu jma jneza» ni zeeda lu Xhiiñaʼ Dios ne modo nabáninu. ¿Ñee riquiiñeluʼ ca publicación riʼ la? Pa gaca preparar chaahuiluʼ la? qué zadxíbiluʼ ora guiníʼneluʼ binni.

11. ¿Xi huayuni caadxi hermanu para gusiidicaʼ jma jneza?

¹¹ Sti cosa ni caquiiñeʼ gúninu para gusíʼdinu jma jneza nga guidúʼyanu modo rusiidiʼ ca hermanu ni nuu ndaaniʼ congregación ne gúninu modo rúnicaʼ. Sam, hermanu ni bizéʼtenu lu párrafo gaʼ que, ruuyaʼ xi runi xcaadxi hermanu para gusiidicaʼ jma jneza. Rucaadiágabe laacaʼ ora maʼ cusiidicaʼ ne rúnibe stipa gusiidibe modo rusiidicaʼ. Ne ti hermana láʼ Talía bizeeteʼ rucaadiaga chaahuiʼ modo rusiidiʼ caadxi hermanu ni nanna gutiidiʼ discursu, racané ni laabe para gánnabe ximodo gusiénebe caadxi cosa ni nabé rinabadiidxaʼ binni laabe lu predicación.

12. ¿Xi raca nagana para caadxi hermanu guni ora maʼ nuucaʼ ra reunión?

¹² Guiranu nga zanda guidúʼndanu ra reunión ne gudiʼnu ti comentariu ni maca biʼniʼ prepararnu (Sal. 22:22). Nuu tu raca nagana para laa guʼndaʼ ne guni comentar ora maʼ cayaca reunión. ¿Ñee rizaacaluʼ nga la? Pa zacá ni, biiyaʼ xi huayacané xcaadxi para maʼ cadi guidxíbicaʼ.

13. ¿Xi zanda gacané lii gúʼndaluʼ né stale gana lu reunión ca?

¹³ Biindaʼ né stale gana. Cadi guiaandaʼ lii ridúʼndanu lu reunión para gusisácanu Jehová. Guidúʼyanu xi runi ti hermana láʼ Sara. Neca para laabe huaxiéʼ galán stídxibe la? riuuláʼdxibe gúʼndabe para gusisácabe Jehová. Nga runi, ora maʼ cayaca prepararbe para reunión, laaca ruundabe canción ni chiguiuundaʼ luni. Runi ensayarbe ne ruuyabe xiñee biaʼsi peʼ ni ná canción ca né tema stiʼ reunión ca. Sicaríʼ guniʼbe: «Ora riníʼ iqueʼ ca diidxaʼ ni riete lu canción ni riuundaʼ lu reunión, qué riuaaʼ piaʼ xizaa pa galán ruundaʼ o pa coʼ».

14. Pa nácaluʼ ti binni natuíʼ, ¿xi zanda gacané lii guni comentarluʼ lu reunión?

¹⁴ Biʼniʼ comentar lu guiráʼ reunión. Dxandíʼ peʼ raca ndiʼ nagana para stale hermanu. Sicaríʼ guníʼ Talía, hermana bizéʼtenu lu párrafo 11 que: «Neca qué rihuinni pa cadxibeʼ ora maʼ canieeʼ nezalú binni, peru guizáʼ riuaaʼ nerviosa nga runi guizáʼ nagana raca para naa guneʼ comentar». Peru qué rucueeza nga laabe de guni comentarbe. Ora maʼ cayaca prepararbe para reunión, qué riaandaʼ laabe primé respuesta gudiibe naquiiñeʼ  gácani nachucu. Ne gácani respuesta stiʼ pregunta ca. Sicaríʼ nabe: «Para naa la? galán nga gudieeʼ respuesta nachucu ne sencíu purtiʼ nga peʼ nga tipu comentariu racalaʼdxiʼ hermanu ni canabadiidxaʼ ca».

15. ¿Xiñee nuu tu qué riná guni comentar peru xii nga ni jma risaca?

¹⁵ Laaca nuu hermanu ni cadi natuíʼ ne qué ridxibi guiníʼ peru qué rinacaʼ guni comentarcaʼ. ¿Xiñee yaʼ? Sicaríʼ guníʼ ti hermana láʼ Juliet: «Nuu biaje raca nagana para naa guneʼ comentar purtiʼ rabeʼ nabé sencíu ca comentariu stinneʼ o cadi biaʼsi ni chiguiniéʼ». ¿Ñee ngaca rizaacaluʼ la? Pa zacá ni la? cadi guiaandaʼ lii ni racalaʼdxiʼ Jehová nga guni prepararnu ti comentariu biaʼ zanda laanu. * Rusisaca Jehová stipa ni rúninu pur gudiʼnu ti comentariu neca nuu tiru ridxíbinu.

16. ¿Xii nga ni cadi naquiiñeʼ guininu?

¹⁶ Cadi guiniʼluʼ «diidxaʼ ni guniná stobi» (Efes. 4:31). Pur ni maʼ bizéʼtenu ca, maʼ bidúʼyanu cadi naquiiñeʼ guiníʼ ti xpinni Cristu diidxaʼ guidxa. Peru naquiiñeʼ chuʼnu cuidadu purtiʼ zándaca guininu diidxaʼ ni guniná sti binni sin gudiʼnu cuenta. Guzéʼtenu ti ejemplu, cadi naquiiñeʼ diʼ guininu mal de ca binni ni napa gadxé costumbre o de gadxé guidxi. Ne laaca cadi naquiiñeʼ guininu xiixa ni gusituí lú tuuxa o ni guniná laa. Sicaríʼ guníʼ ti hermanu: «Nuu biaje huaniéʼ xiixa ni ruchiichi sti binni, peru para naa la? rabeʼ guirutiʼ qué zacaná o zuxidxi xcaadxi binni ni, peru ni dxandíʼ la? nuu biaje binenaʼyaʼ tuuxa. Ra zidiʼdiʼ iza maʼ bichaaʼ purtiʼ rabi xheelaʼ naa, ora maʼ nuudu stúbidu, pa binenaʼyaʼ laa o sti binni pur ni gunieeʼ».

17. Pur ni ná Efesios 4:29, ¿xi zanda gúninu para gacanenu ne uguʼnu gana stobi?

¹⁷ Guníʼ diidxaʼ ni gacané ne uguu gana stobi. Lugar de gácanu ti binni ni maʼ caguicheruaa ne maʼ caníʼ mal, jma galán guininu diidxaʼ ni uguu gana xcaadxi binni (biindaʼ Efesios 4:29). Qué racaláʼdxinu gácanu casi ca israelita. Neca gúpacaʼ stale cosa ni ñacané laacaʼ ñácacaʼ binni rudii xquixe peʼ, peru laga gúcacaʼ binni ni maʼ caguicheruaa ne nánnanu ricá nga stobi. Pur ca cosa ni cadi galán guníʼ chii espía que la? «guiráʼ ca israelita que bizulú gudiche ruaacaʼ pur ni cayuni Moisés» (Núm. 13:31-14:4). Pa guni felicitarnu stobi pur ni cayuni la? guizáʼ zacaneni laa. Guzéʼtenu ejemplu stiʼ xiiñiʼ Jefté. Cumu guluu ca xhamígabe gana laabe ne gúdxicaʼ laabe galán ni cayúnibe la?  ngue nga ni gucané laabe para cadi gusaanabe dxiiñaʼ stibe (Juec. 11:40). Sara, hermana bizéʼtenu lu párrafo 13 que ná: «Ora rábinu sti binni galán ni cayuni, racanenu guni sentirbe nadxii Jehová laabe ne risaca ni rúnibe ndaaniʼ xquidxi». Nga runi, ora gúʼyaluʼ zanda guni felicitarluʼ tuuxa la? biʼniʼ ni.

18. Pur ni ná Salmo 15:1, 2, ¿xiñee caquiiñeʼ guininu ni dxandíʼ ne xi zucaani laanu gúninu?

¹⁸ Guníʼ ni dxandíʼ. Pa qué gúninu ni, qué ziechené Jehová laanu, purtiʼ laa nanalaʼdxiʼ guendarusiguii (Prov. 6:16, 17). Para binni cadi malu nga gusiguii, peru laanu racaláʼdxinu guiníʼ íquenu casi riníʼ ique Jehová (biindaʼ Salmo 15:1, 2). Dxandíʼ, qué ziuu ora guininu ti cosa ni cadi dxandíʼ, peru laaca qué zucáʼchinu xiixa para si guiníʼ ique tuuxa jneza ni cayúninu o jneza modo cayaca xiixa.

19. ¿Xii nga sti cosa ni cadi naquiiñeʼ gúninu?

¹⁹ Cadi gucheecheluʼ chisme (Prov. 25:23; 2 Tes. 3:11). Juliet, hermana bizéʼtenu lu párrafo 15 que guníʼ nabé runiná chisme laa. Sicaríʼ bizeetebe: «Ora gunadiagaʼ caníʼ tuuxa ti chisme, guizáʼ riuaaʼ triste ne maʼ qué rapaʼ confianza binni caniʼni. Nannaʼ xaʼ pa qué zazabe zaniʼbe naa». Pa ra cayuíʼneluʼ binni diidxaʼ gudiiluʼ cuenta maʼ chiguiete chisme, bichaa de diidxaʼ ne guníʼ xiixa ni uguu gana stobi (Col. 4:6).

20. ¿Xi naguixhe íqueluʼ gúniluʼ?

²⁰ Nabáninu ndaaniʼ ti guidxilayú ra nabé maʼ feu ca diidxaʼ ni riníʼ binni. Nga runi caquiiñeʼ gúninu stipa guininu diidxaʼ ni riuulaʼdxiʼ Jehová. Cadi guiaandaʼ laanu randa rininu ne nácani ti regalu ni bidii Jehová laanu ne ruuyabe xi rininu. Zaguu Jehová ndaayaʼ laanu pa gúninu stipa gusisácanu laa né ca diidxaʼ ni rininu ora maʼ ziuunu predicación, ora maʼ cayaca reunión ne ora maʼ caninenu sti binni. Ora maʼ binitilú Jehová guidxilayú malu riʼ, maʼ qué zaca nagana para laanu gusisácanu Jehová né ca diidxaʼ ni rininu (Jud. 15). Peru laga cabézanu gaca nga, quixhe íquenu gúninu ni guníʼ salmista riʼ: «Bidii lugar gusiecheʼ lii pur ni guiniéʼ [...] Jehová» (Sal. 19:14).