1. Kisa ki ka ban nou an chay lakontantman?

 JÉHOVA vlé nou ni lakontantman. Nou sav sa paski lakontantman sé an pa an fwitaj lisentèspwi’y. (Gal. 5:22) Paski tjè nou ka pli kontan lè nou bay pasé lè nou wisivwè, nou kay ni an chay lakontantman lè nou fè tout sa nou pé an minis-la épi pou édé sé fwè èk sé sè nou-an.​—Twav. 20:35.

2-3. (a) Silon Galécha 6:4, ki dé bagay ki kay édé nou ni lakontantman an sèvis Jéhova? (b) Kisa nou kay konsidiwé an atik sala?

² An Galécha 6:4, zapòt Pòl mansyonnen dé bagay ki kay édé nou ni lakontantman. (Li’y.) Pwèmyéman, nou vlé sèvi Jéhova épi tout tjè nou. Si nou sèvi Jéhova épi tout tjè nou, nou kay ni lakontantman. (Maf. 22:36-38) Dézyenman, nou pa sipozé miziwé kò nou épi lézòt. Népòt sa santé nou, èspéyans nou èben abilité nou ka pèwmité nou pou fè, nou sipozé wimèsyé Jéhova paski sé Jéhova ki ka ban nou tout sa nou ni. Konsa, menm si lézòt ni pli siksé an minis-la pasé nou, nou sipozé kontan paski yo ka sèvi abilité yo pou bay Jéhova lonnè épi yo pa ka sèvi’y pou lantéwé yo menm. Konsa, pito nou miziwé kò nou épi yo, nou vlé apwann hòd yo.

³ An atik sala, nou kay wè kisa ki sa édé nou lè nou santi dékouwajé paski nou pa sa fè tout sa nou vlé fè an sèvis Jéhova. Nou osi kay konsidiwé mannyè nou sa sèvi tout sa nou ni, épi mannyè nou sa apwann an ègzanp lézòt.

4. Kisa ki sa dékouwajé nou? Ba yon ègzanp.

⁴ Pou lapéti laj nou èben santé nou, adan di nou pa sa fè sa nou vlé fè an sèvis Jéhova. Sé sa ki té wivé Carol. I té ni pwivilaj-lan pou wann sèvis koté la té ni an labizwen. Diwan tan sala, I té ni twant senk (35) létid Bib. I édé plizyè moun pou fè pwogwé épi batizé. Carol té ni siksé an minis li. Apwé an tan, I tonbé malad épi I té ni pou wèsté an lakay li. Carol di: “Paski mwen malad, mwen sav mwen pa sa fè sa lézòt ka fè. Mé mwen ka santi lézòt pli fidèl pasé mwen. Mwen pa sa fè tout sa mwen vlé fè, èk sa ka dékouwajé mwen.” Carol vlé fè tout sa I pé bay Jéhova. Sa sé an bon bagay! Nou asiwé, Jéhova ka apwésyé tout éfò’y.

5. (a) Si nou dékouwajé paski nou pa sa fè tout sa nou vlé fè an sèvis Jéhova, kisa nou ni pou chonjé? (b) Ki mannyè fwè-a an pòtwé-a ka fè tout sa i pé bay Jéhova?

⁵ Si délè ou dékouwajé paski ou pa sa fè tout sa ou vlé fè bay Jéhova, mandé kò’w, ‘Kisa Jéhova vlé mwen fè?’ Jéhova vlé’w fè sa ou pé silon sitiwasyon’w. Imajiné sa: Yon sè ki katwiven (80) lanné té ka santi kò’y dékouwajé paski i pa sa fè tout sa i té ka fè lè’y té kawant (40) lanné. Menm si I ka fè tout sa i pé, i ka katjilé sa pa asé pou Jéhova. Mé, ès sa sé lavéwité-a? Katjilé asou sa. Si sè-a fè tout sa I pé lè i té kawant (40) lanné épi i kontiné fè tout sa i pé kon i katwiven (80) lanné, sa vlé di i pa janmen doubout bay Jéhova tout sa i pé. Si nou koumansé katjilé sèvis nou pa asé pou plè Jéhova, nou bizwen chonjé sé Jéhova ki ka désidé kisa ki asé pou li. Si nou fè tout sa nou pé, Jéhova kay di nou: “Ou ka fè byen!”​—Gadé Mafyou 25:20-23.

6. Kisa nou sa apwann an ègzanp Maria?

⁶ Nou kay ni lakontantman si nou fiksé asou sa nou sa fè pito nou fiksé asou sa nou pa sa fè. Konsidiwé sè Maria ki ka soufè épi an maladi ki afèkté sa I ka fè an minis-lan. An koumansman-an, I té ka santi kò’y dékonpòté èk akwèdi i pa té ni pyès valè. Mé I fiksé asou yon sè ki té malad, épi sè sala pa té sa kité kouch li. Maria désidé pou édé sè sala. I fè awanjman pou pwéché ansanm ka sèvi téléfòn, épi yo ka ékwi lèt. Maria di: “Chak lè mwen twavay épi sè sala, mwen ka ni tjè kontan paski mwen édé sè mwen.” Menm kon Maria, nou sa ni pli lakontantman si nou fiksé asou sa nou sa fè pito nou fiksé asou sa nou pa sa fè. Mé si ou sa fè pli, èben ou ja ka ni siksé an minis-la, kisa ou sipozé fè?

7. Ki bon konsèy zapòt Pita bay Kwityen?

⁷ An pwèmyé lèt li, zapòt Pita ankouwajé sé fwè-a pou sèvi népòt kado èben abilité yo ni pou ankouwajé yonn a lòt. Pita ékwi: “Kon zòt chak ja wisivwè an kado, sé pou zòt sèvi’y pou édé yonn a lòt, kon moun ki sa mennajé byen sé kado Bondyé-a.” (1 Pita 4:10) Nou sipozé sèvi abilité nou byen an sèvis Jéhova èk pa katjilé lézòt moun pé vini jalou èben dékouwajé. Paski si nou fè sa, sa kay anpéché nou fè tout sa nou pé bay Jéhova.

8. Silon 1 Kòrint 4:6, 7, pouki nou pa sipozé bavadé konsèné sa nou ka akonpli an minis-la?

⁸ Nou bizwen sèvi abilité nou byen. Mé nou ni pou pwan pwokosyon pou nou pa bavadé konsèné sa nou ka fè an minis-la. (Li 1 Kòrint 4:6, 7.) Pou ègzanp, ou pé twouvé’y ézé pou koumansé létid Bib. Sèvi abilité sala. Mé chonjé pou pa bavadé konsèné sa. Annou di ou té ni an bèl èspéyans an minis-la koté ou koumansé an létid Bib. Ou pa sa èspéyé pou di sé fwè-a konsèné èspéyans sala. Mé lè ou wivé, yon sè té la ka ba yon èspéyans koté I té kité yon magazin épi yon moun. Sè-a kité an magazin épi yon moun; ou menm koumansé yon létid Bib. Mé kisa ou kay fè? Ou sav èspéyans ou kay ankouwajé sé fwè-a. Men pitèt, ou désidé pou pa bay èspéyans sala apwézan. Konsa ou pa kay dékouwajé sè-a. Sa sé an bon bagay pou fè. Mé chonjé, pa doubout ofè létid Bib. Ou ni an bèl abilité. Sèvi’y.

9. Ki mannyè nou sipozé sèvi abilité nou èk fòs nou?

⁹ Annou chonjé ki, népòt abilité nou ni sé kado nou wisivwè hòd Bondyé. Nou sipozé sèvi sé kado sala pou ankouwajé sé fwè èk sè-a. Épi pa sèvi sé kado sala pou twapé lonnè pou kò nou. (Filip. 2:3) Lè nou sèvi kouway nou épi abilité nou pou fè divwa Bondyé nou kay ni wézon pou ni lakontantman; pa paski nou ka fè pli mèyè pasé lézòt, mé paski nou ka sèvi abilité nou pou bay Jéhova lonnè.

10. Pouki i pa bon pou miziwé kò nou épi lézòt moun?

¹⁰ Si nou pa pwan pwokosyon, nou sa koumansé kwè nou pli mèyè pasé an lòt moun paski nou ka fè an sèten bagay pli byen. Pou ègzanp, an fwè ki ka bay bèl diskou pé kwè i pli mèyè pasé an fwè ki pa sa fè kon li. Mé pitèt, fwè sala byen donnan, i ka lévé ich li byen èben i zélé an minis-la. I sé an plézi pou ni tout sé fwè èk sè sala ki ka sèvi abilité yo pou sèvi Jéhova épi pou ankouwajé yonn a lòt!

11. Pouki nou sipozé swiv ègzanp Jézi?

¹¹ Magwé nou pa sipozé konpawé kò nou épi lézòt, nou sa apwann hòd sèvant Jéhova ki fidèl. Pli mèyè ègzanp-lan nou ni sé Jézi. Magwé nou pa pawfé nou sa apwann hòd bèl kawaktè’y. (1 Pita 2:21) Lè nou fè kon nou pé pou swiv ègzanp Jézi, nou ka vini an pli mèyè sèvant Jéhova, épi pli éfèktiv an minis-la.

12-13. Kisa nou sa apwann an ègzanp wa David?

¹² An Pawòl Bondyé, la ni ègzanp nonm èk fanm nou sa imité menm si yo pa té pawfé. (Hib. 6:12) Jéhova di Wa David sété yon nonm ki fè tjè’y kontan an chay, magwé I pa té pawfé. (Twav. 13:22) Anfen, I fè lèwè ki té byen sèwyé. Mé magwé sa, i kité an bèl ègzanp nou sa swiv. Paski lè Jéhova té kowijé’y, i pa fè èskiz pou kò’y. I aksèpté konsèy-la, i wépanti épi Jéhova pawdonnen’y.​—Sam 51:3, 4, 10-12.

¹³ Pou apwann hòd ègzanp David, nou sa mandé kò nou: ‘Lè yo ban mwen konsèy, kisa mwen ka fè? Ès mwen ka aksèpté wèskonsabilité pou lèwè mwen èben mwen ka fè èskiz? Ès mwen pwésé pou blanmé lézòt pou aksyon mwen? Ès mwen ka fè kon mwen pè pou pa fè sè lèwè sala ankò?’ Ou sa mandé kò’w kwèsyon kon sa kon ou li konsèné nonm èk fanm ki té fidèl an Bib-la. Ès yo té ni pwòblenm menm kon sa ou ni? Ki bèl kawaktè yo té ni? Épi mandé kò’w: ‘Ki mannyè mwen sa imité moun sala?’

14. Ki bennéfis nou sa twapé lè nou òbzòvé ègzanp sé fwè èk sè nou-an?

¹⁴ Nou sa twapé bennéfis lè nou òbzòvé lézòt fwè épi sè, ni sa ki jenn ni sa ki an laj. Pou ègzanp, ès ou sa katjilé konsèné yon moun an kongwigasyon’w ki ka wèsté fidèl menm si i ka èspéyansé difikilté an lavi’y? Pitèt yo ka èspéyansé bagay tèl kon: chalè kopawans, òpozisyon an fanmi èben maladi. Ki bèl kawaktè moun sala ni ou sa imité? Lè ou òbzòvé bon kawaktè moun sala, ou menm sa apwann mannyè pou andiwé lè ou anba tès. Nou ka wimèsyé Jéhova pou tout sé fwè èk sè sala ki ka ban nou bon ègzanp pou nou imité!​—Hib. 13:7; Jémz 1:2, 3.

15. Ki konsèy zapòt Pòl ban nou ki sa édé nou ni lakontantman an sèvis Jéhova?

¹⁵ Pou nou ni lapé épi lilyon an kongwigasyon-an, nou tout ni pou fè kon nou pé. Konsidiwé sé kwityen-an an pwèmyé syèk-la, yo té ni diféwan abilité épi ansayman. (1 Kòr. 12:4, 7-11) Mé sa pa té ba yo wézon pou ni konpitisyon anpami yo. Pito, Pòl ankouwajé yo pou fè sa ki nésésè pou “vini fò ansanm kon yo sé kò Jézi-a”. An Èfésòs 4:16, Pòl ékwi: “Lè chak manm fè twavay li kon yo sipozé fè, tout légliz-la ka pwofité épi i ka vini pli fò, kon sé manm-la ka moutwé pli lanmityé ba yonn a lòt.” (Èfés. 4:1-3, 11, 12, 16) Lè yo swiv konsèy Pòl, la té ni lapé épi lilyon an kongwigasyon-an. Épi sé sa nou ka wè an kongwigasyon nou jòdi-a.

16. Kisa nou détèminé pou fè? (Hibrou 6:10)

¹⁶ Annou détèminé pou pa konpawé kò nou épi lézòt pito annou apwann hòd Jézi épi imité sé bèl kawaktè’y-lan. Osi, annou apwann hòd ègzanp sèvant Jéhova ki té fidèl an tan pasé épi an tan jòdi. Kon ou kontiné fè kon ou pé ni konfyans-la ki, Jéhova kay toujou fè sa ki dwèt, i pa kay obliyé twavay ou. (Li Hibrou 6:10.) Kontiné ni lakontantman an sèvis Jéhova épi ni asiwans-lan I ka apwésyé lè ou fè kon ou pé pou plè’y.