1. Gin ango ma weko wabedo ki yomcwiny madwong?

 JEHOVAH mito ni wabed ki yomcwiny. Wangeyo man pien yomcwiny tye i kin nyig ma nyak pi cwiny maleng. (Gal. 5:22) Kit macalo miyo mic kelo yomcwiny makato gamo agama, wabedo ki yomcwiny madwong ka watye ka tic matek i ticwa me pwony dok watye ka konyo utmegiwa i yo mapatpat.—Tic 20:35.

2-3. (a) Kit ma kinyuto kwede i Jo Galatia 6:4, jami aryo mene ma bikonyowa me medde ki bedo ki yomcwiny i ticwa pi Jehovah? (b) Gin ango ma wabinyamo i pwony man?

² Kit ma kicoyo kwede i Jo Galatia 6:4, lakwena Paulo otito jami aryo ma bikonyowa me medde ki bedo ki yomcwiny. (Kwan.) Mukwongo, yubwa myero obed me miyo ki Jehovah gin maber loyo ma watwero. Ka watye ka mine gin maber loyo ma watwero, ci omyero wabed ki yomcwiny. (Mat. 22:36-38) Me aryo, omyero wagwokke pe me bedo ka pore ki jo mukene. Labongo paro pi gin ma watwero cobone, yotkomwa, pwonnye ma wanongo, nyo diro ma watye kwede, omyero wabed ki pwoc bot Jehovah. Man lok ada pien jami ducu ma watye kwede wanongo ki bote. Ki tungcel, ka jo mukene gicobo tic mapol pi Jehovah loyowa, omyero cwinywa obed yom ni gitye ka tic ki dirogi me pako Jehovah, ento pe me wakke nyo me cobo mitigi kekengi. Dong me kaka pyem kwedgi, omyero wanong pwony ki botgi.

³ I pwony man, wabineno gin ma watwero timone ka cwinywa otur pien wawinyo ni pe watye ka cobo ticwa pi Jehovah kit ma wamito kwede. Wabipwonyo bene kit ma watwero tic kwede ki diro mo keken ma watye kwede ki  dong pwony ma watwero nongo ki i labol pa jo mukene.

4. Gin ango ma twero weko jo mogo i kinwa cwinygi tur woko? Mi labol.

⁴ Jo mogo i kinwa pe gitwero cobo tic ducu ma gimito pi Jehovah pien dong gitye ka tii woko nyo komgi lit dok man turo cwinygi. Meno aye gin ma otimme i kom laminwa ma nyinge Carol. I kare mukato angec, en obedo ki mot me tic i kabedo ma can lutit kwena onongo tye iye. I kare meno, en okwano Baibul ki dano 35 dok okonyo jo mapol me dongo nio wa i dyero kwogi ki nongo batija. Tic me pwony pa Carol onyako nyige adada! Ci two malit adada omake dok oweko en onongo bedo gang pol kare. Carol owaco ni, “Angeyo ni pi peko me twona-ni, pe atwero cobo tic mapol kit ma jo mukene gitimo, oweko awinyo calo pe abedo Lakricitayo ma lagen calo gin. Pe atwero timo jami ducu ma amito dok man turo cwinya adada.” Carol tye ki miti me timo jami ducu ma etwero pi Jehovah. Ki lok ada, meno gin ma kipwoyo! Watwero bedo ki gen ni Lubangawa ma lakica-ni pwoyo miti ma en tye kwede.

5. (a) Gin ango ma myero wiwa opo iye ka cwinywa otur pien pe watwero timo gin ma wamito? (b) Kit ma waneno kwede i cal-li, i yo ma nining ma omego-ni kare ducu omiyo ki Jehovah gin maber loyo?

⁵ Ka i cawa mukene cwinyi tur pi peko ma gengi cobo tic mapol, pennye kekeni ni, ‘Ngo ma Jehovah mito ki bota?’ Jehovah mito ni itim gin maber loyo ma itwero ma lubbe ki kwo ma itye iye. Tam kong i kom labol man: Lamego mo ma tye ki mwaka 80 cwinye otur pien pe twero cobo ticce kit ma en onongo timo kwede con i kare ma tye ki mwaka 40. En tamo ni kadi bed etye ka timo gin maber loyo, meno pe yomo cwiny Jehovah. Ento meno tika lok ada? Tam kong iye. Ka lamego-ni omiyo ki Jehovah gin maber loyo i kare ma en tye ki mwaka 40, dok pud tye ka miyo gin maber loyo i kare ma en dong tye ki mwaka 80, ci man nyuto ni en pe ojuko miyo ki Jehovah gin maber loyo. Ka wacako winyo ni tic ma watimo pe yomo cwiny Jehovah, ci omyero wiwa opo ni Jehovah aye moko ngo ma romo yomo cwinye, ento pe wan. Ka watimo gin maber loyo ma watwero, ci Jehovah biwacciwa ni: “Itimo ber mada!”—Por ki Matayo 25:20-23.

6. Pwony ango ma watwero nongo ki i labol pa Maria?

⁶ Wabinongo ni yot me gwoko yomcwinywa ka waketo cwinywa i kom gin ma waromo cobone me kaka tam i kom gin ma pe watwero cobone. Tam kong i kom laminwa mo ma nyinge Maria, ma tye ki two mo ma genge nywako i tic me tito kwena i yo mapol. I acakkine, cwinye otur adada dok owinyo calo konye pe. Ento en oneno lamego mukene i kacokke ma kome lit adada ma pe twero a ki i kabuto, ci Maria omoko tamme me konyo lamego meno. Maria owaco ni, “Aketo yub me tito kwena kacel kwede kun wagoyo cim kacel ki coyo waraga. Kare ducu ka atiyo kacel kwede, adwogo cen gang ma nongo cwinya yom pien ni abedo ki kare me konyo lamera.” Wan bene watwero medo yomcwinywa ka watamo i kom gin ma watwero timone ento pe gin ma pe watwero timo. Ento ngo ma omyero watim ka watwero medo ticwa nyo watye ki diro mo ma waromo tic kwede pi Jehovah?

7. Tam maber ango ma lakwena Petero omiyo bot Lukricitayo?

⁷ I waragane mukwongo, lakwena Petero ocuko cwiny utmegine me tic ki diro nyo mot mo keken ma gitye kwede me dongo luye luwotgi. Petero ocoyo ni: ‘Kit macalo ngat acel acel tye ki motte ma kimiye, wuti kwede pi konnye kekenwu, macalo lugwok-jami mabeco, ma gitiyo ki mot me kica ma Lubanga omiyo.’ (1 Pet. 4:10) Omyero watute matek me tic ki dirowa kun pe walworo ni jo mukene nyeko bimakogi nyo cwinygi bitur. Ka pe watiyo matek pien ni waparo kit ma jo mukene giwinyo kwede ci nongo pe watye ka miyo ki Jehovah gin maber loyo ma watwero.

8. Ma lubbe ki 1 Jo Korint 4:6, 7, pingo omyero wagwokke ki wakke ki mot ma watye kwede?

⁸ Kadi bed ni omyero wati ki dirowa i yo maber loyo, omyero bene pe wawakke kwede. (Kwan 1 Jo Korint 4:6, 7.) Me labolle, twero bedo ni, in ladiro adada i cako kwano Baibul ki dano. Pe ilwor tic ki motti meno! Ento pire tek ni igwokke pe me wakke ki motti meno. Ket kong ni ibedo ki kare me cako kwano Baibul ki ngat mo macok cok-ki. Itye ki miti madit adada me tito gin ma otimme man bot jo ma i gurupwu me tito kwena. Ento i cawa ma wucokke kacel ki gurupwu, lamego mo ocako tito kit ma ebedo kwede ki kare me miyo magajin ki ngat mo. En omiyo magajin; in icako kwano Baibul ki dano. Ngo ma dong ibitimo? Ingeyo ni nywako gin ma otimme i komi-ni ki jo ma i gurupwu bicuko cwinygi, ento itwero kuro pi kare mukene ma opore me boko gin ma otimme i komi-ni, wek pe ibal cwiny lamego ma omiyo magajin ki ngat moni. Ka itimo kit meno, ci nongo inyuto kica. Ento pe igik tuteni me cako kwano Baibul ki dano. Meno mot ma itye kwede—ti kwede!

9. Omyero wati ki diro ma watye kwede nining?

⁹ Wiwa myero opo ni diro mo keken ma watye kwede obedo mic ma oa ki bot Lubanga. Omyero wati ki mot magi me dongo kacokke, ento pe me wakke. (Pil. 2:3) Ka watiyo ki kerowa kacel ki dirowa me timo miti pa Lubanga, ci wabibedo ki tyen lok me nongo yomcwiny—pe ni pien watye ka timo maber loyo jo mukene ento ni watye ka tic ki dirowa me kelo pak ki deyo bot Jehovah.

10. Pingo pe nyuto ryeko ka wapore ki jo mukene?

¹⁰ Ka pe wagwokke, watwero poto i owic me poro tekowa ki goro pa ngat mukene.  Me labolle, twero bedo ni omego moni miyo pwony pi lwak mamit adada. Meno aye tekone. Ento twero bedo ni ki i cwinye en cayo omego mukene ma pe miyo pwony mamit tutwal. Gwok nyo omego ma pe miyo pwony mamit tutwal-li tye ki cwiny me jolo wele, ngeyo pwonyo lutinone, nyo obedo latit kwena ma kome mit adada. Pud dong watye ki pwoc madit ya, ni watye ki omege ki lumege mapol adada ma gitiyo ki dirogi pi Jehovah ki konyo jo mukene!

11. Pingo omyero watute me lubo lanen pa Yecu?

¹¹ Kadi bed omyero wagwokke ki pore ki jo mukene, watwero nongo pwony ki i labol pa lutic pa Jehovah mukene. Labol maber loyo ma watwero lubone obedo labol pa Yecu. Kadi bed en onongo pe ki roc, watwero nongo pwony mapol ki i kite mamwonya kacel ki ticce. (1 Pet. 2:21) Ka watute matek me lubo lanenne macok, wadongo watwa ki Jehovah dok wabedo ki kero me cobo ticwa me pwony maber.

12-13. Pwony ango ma watwero nongo ki bot Kabaka Daudi?

¹² I Lok pa Lubanga, wanongo labol mapol pa co ki mon ma lugen ma watwero lubone kadi bed onongo gitye ki roc. (Ibru 6:12) Tam kong i kom Kabaka Daudi, ma Jehovah olwonge ni “laco ma yomo cwinya.” (Tic 13:22) Kadi bed kit meno, Daudi onongo tye ki roc. Ki lok ada, en otimo bal mogo madongo. Ento, en pud tye lanen maber piwa. Pingo? Pien i kare ma kimine tira, en pe otemo gengo ngeye. Me kaka meno, en ojolo tira magwar ma kimine-ni dok ongut pi balle ki cwinye ducu. Macalo adwogine, Jehovah otimme kica.—Jab. 51:3, 4, 10-12.

¹³ Waromo nongo pwony ki bot Daudi ka wapennye kekenwa ni: ‘Ka kimina tira, an adok iye nining? Tika aye balla oyotoyot, nyo mono atemo gengo ngeya? Tika amaro kok i kom jo mukene? An mono atute matek pe me nwoyo balla?’ Itwero pennye kekeni ki lapeny magi bene ka itye ka kwano lok i kom co ki mon mukene ma lugen ma i Baibul. Tika gukato ki i ariya ma in bene itye ka kato ki iye? Kit mogo mabeco ango ma gunyuto? Ka itye ka kwano lok i kom jo magi ki acel acel, pennye kekeni ni: ‘Ngo ma atwero timo wek abed calo latic pa Lubanga ma lagen-ni?’

14. Adwogi maber ango ma watwero nongo ki i neno labol mabeco pa luye luwotwa?

 ¹⁴ Watwero bene nongo adwogi maber ki i lanen pa luye luwotwa kadi bed gubedo jo matino nyo jo madongo. Me labolle, tika itwero tamo i kom ngat mo i kacokkewu ma tye ka kanyo atematema—calo lyeto ma a ki bot luwote, aunauna ki bot wadine, nyo two? Tika ineno kit mogo mabeco ma dano-ni tye ka nyutone ma in bene itwero tute me dongone? Ka iketo cwinyi ka neno labolle maber-ri, ci itwero pwonyo kit me kanyo atematema ma ikato ki iye. Watye ki pwoc madit adada ni omege ki lumegiwa magi giwekiwa lanen maber me niye!—Ibru 13:7; Yak. 1:2, 3.

15. Tira ango ma lakwena Paulo omiyo ma twero konyowa me medde ki bedo ki yomcwiny i ticwa pi Jehovah?

¹⁵ Wek kuc ki note obed tye i kacokke, ngat acel acel i kinwa myero omi ki Jehovah gin maber loyo ma en twero. Tam kong i kom Lukricitayo me cencwari me acel. Onongo gitye ki diro kacel ki mot me tic mapatpat. (1 Kor. 12:4, 7-11) Ento man pe okelo pyem ki apokapoka i kingi. Me ka meno, Paulo ocuko cwiny ngat acel acel me timo gin ma en twero “me dongo kom Kricito.” Paulo ocoyo bot jo Epeco ni: “Ka dul acel acel tye ka tiyo ticce kakare, miyo kom dongo maber i mar.” (Ep. 4:1-3, 11, 12, 16) Jo ma gutimo meno gukonyo me dongo kuc ki note—dok magi aye kit ma waneno i kacokke i kare-ni.

16. Gin ango ma omyero wamok tamwa me timone? (Jo Ibru 6:10)

¹⁶ Mok tammi pe me bedo ka pore ki jo mukene. Me ka meno, nong pwony ki bot Yecu kun itute matek me lubo kite. Nong pwony ki i labol me niye pa jo ma kicoyo lok i komgi i Baibul kacel ki pa jo mogo ma i kare-ni. Ka iwoto ki miyo gin maber loyo ma itwero, bed ki gen ni Jehovah “gire pe ye gin ma pe tye kakare, wiye pe biwil i kom tic ma yam wutiyo.” (Kwan Jo Ibru 6:10.) Medde ki nongo yomcwiny i ticci pi Jehovah, kun ingeyo ni en tye ki pwoc pi tuteni me tic pire ki cwinyi ducu.