1. Бис сӱӱнчини кайдаҥ аладыс?

 ИЕГОВА бистерди ырысту болзын деп кӱӱнзейт. Оныҥ да учун бойыныҥ агару тыны ажыра биске сӱӱнчи берет (Гал. 5:22). Мындый сӱӱнчини бис Иеговага акту кӱӱнистеҥ иштеп турзаас, анайда ок ака-эјелерге болужып турзаас аладыс. Агару Бичикте айдылган: «Алып турганы эмес, берип турганы оноҥ артык ырысту» (Ап. ижи 20:35, ЈТ).

2, 3. а) Галаттарга 6:4-лӧ болзо, Иеговага иштенип, сӱӱнчилӱ артарга биске нени ундыбас керек? б) Бу јӧрмӧлдӧҥ нени билип аларыс?

² Галаттарга 6:4-лӧ (кычырыгар, ЈТ) болзо, Иеговага иштенип, сӱӱнчи аларга биске эки немени ундыбас керек. Баштапкызында, бойыста бар неменеҥ Иеговага эҥ артыгын берер керек. Иеговага бойыстыҥ ийде-кӱчисти берерге албаданзаас, сӱӱнчи аларыс (Матф. 22:36—38). Экинчизинде, биске бойысты улусла тӱҥдештирбес керек. Нениҥ учун дезе бисте бар неме: су-кадык та, ченемел де, јайалталар да болзын — биске оны ӱзе Иегова берген. Ака-эјелер биске кӧрӧ та нени де јакшы эдип турза, биске сӱӱнер керек. Олор јайалталарын бойын мактаарга эмес, је Иегованы мактаарга тузаланат. Андый ака-эјелердеҥ артык болорго албаданганча, олордоҥ тем алактар.

³ Бу јӧрмӧл биске агару иште та нени де эдип болбой турган болзоос, бойысты эш-кереги јок деп сананбаска болужар. Анайда ок бастыра бойысты Иеговага берип иштенерге нени эдерин ле ака-эјелердеҥ кандый тем аларын билип аларыс.

4. Бис кезикте недеҥ улам санааркап јадыс? Тем куучындап беригер.

⁴ Кезик Иегованыҥ Керечилери, су-кадыгы уйадап, јажы јаанаганынаҥ улам Кудайга эрчимдӱ иштеп болбой, тыҥ санааркап јат. Ондый ла сезимдер бистиҥ Кэрол эједе болгон. Ол алдында Керечилер јетпей турган јерге барып иштеген.  Ондо 35 библиялык ӱредӱ ӧткӱрген. Олордыҥ кезиги Кудайга учурланып, сууга чӧҥӱрилген. Бистиҥ эје кандый эрчимдӱ иштенген дезеер! Оноҥ ол су-кадыгынаҥ улам Иегова Кудайга кӧптӧдӧ иштеп болбой барган. Керек дезе айылынаҥ да чыгарга, ого кӱч боло берген. Кэрол эје мынайып айдат: «Ооруумнаҥ улам кӧптӧдӧ иштеп болбозымды оҥдоп јадым. Мен бойымды ӧскӧ ака-эјелерге кӧрӧ уйан, неге де турбас деп сананадым. Мындый санаалар менеҥ чек ырабай јат. Иеговага кӧптӧдӧ иштеерге кӱӱнзеп те турган болзом, је ийде-кӱчим чын ла јетпей јат. Бу тартыжунаҥ чыгарга јеҥил эмес». Је андый да болзо, Кэрол Иеговага бастыра кӱчинеҥ иштеерге албаданат. Кандый јакшы кӱӱн-санаа! Кажы ла кижиниҥ айалгазын сӱреен јакшы оҥдоп турган Кудайыс Кэрол эјеге јаан быйанду.

5. а) Иеговага алдындагызындый ла чылап кӧп иштеп болбой турзаас, нени ундыбас керек? б) Јуруктарды кӧрӱгер. Аканы бастыра јӱрӱмине Иеговага артыгын берип јат деп, нениҥ учун айдарга јараар?

⁵ Слер бойоорды алдындагы ла чылап, Иеговага кӧп ийде-кӱчигерди берип, иштеп болбой турганаар деп сананып турган болзоор, бойыгардаҥ мынайда сурагар: «Иегова эмдиги айалгада мени канча кире иштезин деп турган?» Айалга кандый да болуп калган болзо, Иегова бисти эҥ артыгын берзин деп кӱӱнзеп јат. Темдектезе, 40 јашту эје эҥ артыгын берип иштейт. Је эмди ол 80 јаштаҥ ажа берерде, Иеговага алдындагы чылап, кӧп иштеп болбой турганынаҥ санааркап турган. Эје канча да кире иштеп турган болзо, ас иштеп јадым деп сананып јат. Је ол чын сананып турган ба? Јок. Нениҥ учун дезе ол 40 дӧ јаштуда эҥ артыгын берген, 80 де јашты ажып каларда, эҥ артыгын берет. Айдарда, ол алдындагызындый ла чылап, Иеговага бастыра ийде-кӱчинеҥ иштеп јат. Мындый санаалар слерге де келип турган болзо, ундыбагар, Иегованы не сӱӱндирип турган, не сӱӱндирбей турган — ол бойы кӧрӧт. Слер агару ишке бастыра ийде-кӱчигердеҥ туружып турган болзоор, Иегова слерле оморкоп јат! (Матфей 25:20—23 тӱҥдештиригер.)

6. Бис Марияныҥ теминеҥ неге ӱренедис?

⁶ Сӱӱнчисти јылыйтпаска турган болзоос, эдип болбос немеге эмес, је эдип ийгедий немеге ајару эдер керек. Мария деп эјениҥ учуралын кӧрӱп ийектер. Ол Иеговага кӧп-кӧп иштеерге кӱӱнзеген. Је су-кадыгы уйадай берерде, алдындагызына кӧрӧ, кӧп эдип болбой барала, кунугып баштаган. Оныҥ санаазыла болзо, эје эмди эш-кереги јок болуп калган. Је оноҥ Мария эје бойыныҥ јуунындагы бир эјеге болужарым деп шӱӱп алган. Ол дезе оорузынаҥ улам, тӧжӧктӧҥ туруп болбойтон. Мария эје мынайда куучындайт: «Бис экӱ јарлаар ишке туружарга, самаралар бичиирис, улусла телефон ажыра куучындажарыс деп јӧптӧжип алганыс. Мынайып јарлаганыстаҥ ла эјеге болушканымнаҥ сӱреен тыҥ сӱӱнип туратам». Айдарда, кӱчис јетпегедий немеге ајару эдердиҥ ордына, кӱчис јеткедий немеге ајарзаас, бу эје чылап, бис те ырысту болорыс. Је бис агару иштиҥ кандый да јанын јакшы эдип турган болзоос, ол эмезе агару ишке кӧптӧдӧ туружар аргалу болзоос, канайдарыс?

7. Апостол Пётр христиандарга кандый јӧп берген?

⁷ Апостол Пётр баштапкы самаразында ака-эјелерди бастыра эп-аргазын ла јайалтазын тузаланып, бой-бойына јӧмӧшсин деп сураган. Агару Бичикте мынайып айдылат: «Кажыгарга ла Кудай јакшылыгынаҥ улам канча кире јайалта  берген, оны, башка-башка јайалталарлу башкараачылар чылап, бой-бойоорго болужарга тузаланыгар» (1 Пётр 4:10). Ака-эјелер слердиҥ јайалталараарды кӧрӧлӧ, адааркап, бойлорын уйан деп сананып турган болор дейле, јайалталараарды тузаланбай, јажырып турган болдоор. Бис Иеговага эҥ јакшызын берерге, бастыра аргаларысты тузаланар учурлу.

8. Бис Кудайдыҥ берген сыйыла нениҥ учун мактанбас учурлу? (1 Коринфтегилерге 4:6, 7).

⁸ Је бистерге бойыста бар аргаларысла мактанбас керек. (1 Коринфтегилерге 4:6, 7 кычырыгар, ЈТ.) Темдектезе, сен Агару Бичикле ӱредӱлерди сӱреен јакшы баштап тургаҥ. Сенде Кудайдыҥ сыйы, оны тузаланар керек. Је мындый сыйды улустыҥ кӧзине јакшы кӧрӱнерге эмес, оны чын тузаланарга албаданар керек. Слерде мындый учурал болгон деп сананып ийектер. Сен бир кижиле сӱреен јакшы ӱредӱ баштагаҥ. Эм бу учуралды јарлаар иштиҥ туштажузында тӱрген ле куучындаар кӱӱниҥ келет. Је туштажуга једип келереерде, бир эје озолоп, журналды кижиге канай бергенин куучындай берди. Сен сананып јадыҥ: «Ол јӱк ле журнал берди, а мен де ӱредӱ баштагам!» Сениҥ учуралыҥ ака-эјелерди сӱреен оморкодор эди. Је мында эјениҥ сезимдерине ајару эдер керек. Нениҥ учун дезе бу эје сениҥ учуралыҥды угала, бойыныҥ журнал берген учуралына бир де сӱӱнбес. Оныҥ учун сен Агару Бичикле ӱредӱ баштаганыҥды ӧскӧ дӧ кӱнде куучындап берзеҥ кайдаар. Мынайып этсеҥ, сӱреен јакшы болор. Кудайдаҥ берилген сыйды оноҥ ло ары тузалан.

9. Биске бойыстыҥ јайалталарысла канайып тузаланар керек?

⁹ Бисте бар аргалар — Иегованыҥ сыйы деп, бир де ундыбас керек. Бис аргаларысла бийиркенерге эмес, је јуунды тыҥыдарга тузаланып јадыс (Флп. 2:3). Бойыстыҥ аргаларысла, ийде-кӱчисле Иегованыҥ кӱӱн-табын бӱдӱрерге тузаланып турзаас, јаан сӱӱнчи аладыс. Айдарда, бис улустаҥ артык болгоныстаҥ улам эмес, је бастыра јайалталарысла Иегованы макка чыгарып турганыстаҥ улам сӱӱнедис.

10. Бистерге нениҥ учун бойысты улусла тӱҥдештирбес керек?

¹⁰ Биске база да бир немени чотко алып турар керек. Кажыбыста ла јакшы да, уйан да јандарыс бар. Оныҥ учун бой-бойысты тӱҥдештирери эш-кереги јок неме. Темдектезе, эки аканы кӧрӱп ийектер. Бирӱзи куучын-эрмектерди сӱреен јакшы айдып турган. Ол бойын экинчи аканаҥ артык деп сананып турган. Нениҥ учун дезе  ол акага куучын-эрмектер айдарга јеҥил эмес келижет. Је байагы ака экинчи аканыҥ јакшы јандарын сананбай јат. Ол ака кӱндӱзек, бойыныҥ билезин сӱреен јакшы башкарып турган, анайда ок јарлаар ишке эрчимдӱ туружып турган. Бу эки аканыҥ теминеҥ бой-бойысты тӱҥдештирбес керек деп јарт кӧрӧдис. Бисти айландыра јайалталу ака-эјелер сӱреен кӧп. Олор бойыныҥ јайалталарын Иегова Кудайысты мактаарга ла ака-эјелерге болужарга тузалангылайт. Бис олорго сӱӱнип јадыс.

11. Нениҥ учун бис Иисустаҥ тем аларга албаданып јадыс?

¹¹ Бойысты улусла тӱҥдештирбес те керек болзо, бис олордоҥ кӧп немеге ӱренер аргалу. Эҥ ле јакшы темди Иисус кӧргӱскен. Бис Иисустый толо кемдӱ эмес те болзоос, оныҥ айткан кажы ла сӧзинеҥ, эткен кажы ла керегинеҥ ӱренер аргалу (1 Пётр 2:21). Иисустаҥ тем аларга канча ла кире албаданып турзаас, ончо ло кире ченемелдӱ јарчылар болорыс.

12, 13. Давид кааннаҥ неге ӱренедис?

¹² Агару Бичикте Иеговага чындык иштеген эр ле ӱй улустыҥ темдери кӧп бичилген. Олор бистий ле ок толо кемдӱ эмес улус та болзо, бистерге тем болот (Евр. 6:12). Давидтиҥ темин кӧрӱп ийектер. Иегова оны Апостолдордыҥ ижи 13:22-де «јӱрегиме јараган эр» деп айдат. Ол эмезе бу ӱлгердиҥ сносказында бичилгениле, «Давид Кудайдыҥ ичине кирген» кижи болгон. Је ол уур кинчектер эткен. Андый да болзо, Иегова оныҥ јастыразын тӱзедерде, ол бир де актанбай кинчегин акту кӱӱнинеҥ алынган. Оныҥ учун Иегова оныҥ јаманын таштаган (Сар. 51:3, 4, 10—12).

¹³ Слер, Давид чилеп, Иегованыҥ кӧзине јараган кижи болорго кӱӱнзейдеер бе? Эйе болзо, бойыгардаҥ мынайып сурагар: «Мени кем-кем тӱзедип ийзе, мен ачына бередим бе? Ол эмезе бойымды актап, улустӧӧн јарбып ийедим бе? Эткен јастыраларымды ойто этпеске албаданадым ба?» Анайда ок бойыска бого тӱҥей сурактарды Агару Бичиктеҥ Кудайдыҥ ӧскӧ дӧ ишчилери керегинде кычырып турган тушта берерге јараар. Темдектезе, Кудайдыҥ бу чындык ишчилеринде слердий ошкош кӱчтер болгон бо? Олордыҥ кандый кылык-јаҥынаҥ мен тем алар эдим? Иегованыҥ кажы бир ишчизи керегинде кычырып јатсаар, бойыгардаҥ сурап туругар: «Мен бу кижиге тӱҥей болорго нени эдер эдим?»

14. Ака-эјелеристеҥ тем алганыстаҥ кандый туза бар?

 ¹⁴ Анайда ок јуундагы ака-эјелердеҥ, олор слердеҥ јаан да, кичинек те болзо, тем аларга јараар. Бӱгӱнги ле кӱнде кандый бир ака-эјелер кандый бир ченелтеге табартып турган болор. Темдектезе, та кемди де јажыт балдар базынып турган болор эмезе билезиниҥ улузы Кудайга јайым бажырарга чаптык эдип турган болор, ол эмезе су-кадыгы уйан. Слер бу ака-эјелердиҥ кандый кылык-јаҥына ӱренер эдеер? Олордыҥ темин сананзаар, бойоордыҥ ченелтелереерди канайып ӧдӧрин оҥдоп алараар. Бисти айландыра бӱдӱмјизи сӱреен бек андый кӧп ака-эјелер бар учун Иеговага быйан! (Евр. 13:7; Иак. 1:2, 3).

15. Павелдиҥ кандый сӧстӧри бистерге оноҥ ло ары Иеговага сӱӱнчилӱ иштеерге болужар?

¹⁵ Кажы ла јарчы јуунда амыр ла бирлик болзын деп јӧмӧжӧр аргалу. Баштапкы чактыҥ христиандарында јайалталары да, эдип турган ижи де башка-башка болгон (1 Кор. 12:4, 7—11). Андый да болзо, олор бир де адааркашпай, бой-бойына болужып туратан. Апостол Павел Эфестеги јуунга кандый сӧстӧр айтканын кычырып ийектер: «Оныҥ ончо ӱйелери бой-бойыла бек колбулу, олордыҥ кажызы ла бойыныҥ ижин эдер аргалу кемиле эдет, ончо эт-кан ӧзӱп, сӱӱште тудулат» (Эф. 4:1—3, 11, 12, 16). Павел бу сӧстӧрлӧ христиандарды бой-бойына болужып турзын деп кӱӱнзеткен. Анайып, «Христостыҥ Эди-Каны», ӧскӧртӧ айтса, јуун, тыҥыыр эди. Бу јӧпти јуунныҥ улузы тузаланарда, бой-бойыныҥ ортозында амыр ла бирлик болгон. Бис мындый айалганы бӱгӱнги де јуундардаҥ кӧрӱп јадыс.

16. Слер нени эдерге шӱӱп алдаар? (Еврейлерге 6:10).

¹⁶ Айдарда, бойыгарды улусла тӱҥдештирбегер. Иисустаҥ тем алыгар. Анайда ок алдындагы ла эмдиги ӧйдиҥ ака-эјелеринеҥ тем алыгар. Бир де алаҥзыбагар, Иеговага эҥ артыгын берип турзагар, ол слердиҥ эдип турган ижигерди бир де ундыбас. (Еврейлерге 6:10 кычырыгар, ЈТ.) Оныҥ учун Иеговага оноҥ ло ары сӱӱнчилӱ иштенигер. Анайда ок ол слердиҥ албаданып турганаарды баалап јат деп ундыбай јӱрӱгер.