1. Samaan ko pidemak ita o tataˈangay ko hemek?

 MAFANAˈAY kita, makalimay ci Yihofa lipahak kita, samanen o lipahak o minaroˈan no fangcalay saocor a capeling. (Kalatiya 5:22) Sowal no Fangcalay Cudad: ‘O paladaˈay ikakaay ko hemek to milayapay.’ Mihaenay, misaˈicel kita mirienang to mitosilay a tayal, hanaca tano masakenaay a pakayraan padama to salikaka, tada mamahemek mihaen ko demak.—Dmak 20:35.

2-3. (1) Mikitini Kalatiya 6:4, o manan a tosa lalangian palipahakay kitaanan matayal saki Yihofaan? (2) Onini a lalakaw mamilengo to maanan?

² O tarokos ci Pawlo itini i Kalatiya 6:4 (ˈOsien.) Masowalay ko tosa papadama kitaanan lipahak a lalangian. Sakacecay, o patosokan ita patafangen ko sangaˈayay no niyah ci Yihofaan. Ano patafangen ita ko sangaˈayay no niyah Cingranan i, iraayto ko lalangian ita a mahemek. (Matay 22:36-38) Sakatosa, aka palalinien ko niyah to tao. Tanektekay ko tireng ita alatek, micadaay to pina sapahatatanam anca iraay ko mikiriwiˈay a inaneng, mansa ngaˈay midemak to pina a demak. Ano mahaenay i, o papakayni kita miakoˈid ci Yihofaan, samanen o iraay a kihcod ita sahtoay o sapafeli ni Yihofa kitaanan. Roma pakayraan, ano ikakaay ko ngaˈay no midemakan no tao to mita i, o papatado kita cangranan a mahemek, samanen misaka dademakan nangra ko inaneng no niyah pakahemek ci Yihofaan, cowa ko sapatakarawaw to niyah anca micangacang to sakangaˈay no niyah. Aka malalifet kita cangranan, ao papasayra cangranan a minanam.

³ Onini a lalakaw mamilengo, ano citolasay ko demak no niyah saki Yihofaan saan ko harateng ita, telocto matoled ko falocoˈ, o manan ko papadama kitanan miremo to mahaenay a harateng. Milengoho ko lalakaw sasamaan kita misarocod misaka dademak to inaneng no niyah matayal saki Yihofaan, ato mikitini i tireng no tao ngaˈay mananam ita ko maanan.

4. O roma tamdaw pakayniay i manan a lalangian matoleday ko falocoˈ? Tinakoen mitadtad.

⁴ O roma salikaka samaanen matoˈasayto anca tatiihay ko tireng, cowato ka adihay ko demak no niyah saki Yihofaan saan miharateng, mansa matoled ko falocoˈ. Mahaenay ko fafahiyan salikaka ci Kaloe. Na itiniay cingra i taˈangayay ko saali a kilac a matayal, itiya 35 ko pacekiwan ningra, adihayay ko mapadamaay a pacekiwan micada to paputisem. Itini mitosilay a tayal ngaˈayay ko minaroˈan ningra. Kawra ikor tatiihayto ko tireng ningra, adihayay tatokian itini sanayto i lomaˈ. Sanay cingra: “Mafanaˈay kako samanen tatiihay ko tireng no niyah, cato ka dangar ko madangaray no tao a demak, kawra cowa ka lecad ko niyah to tao a madimadi saan miharateng. O kasasiroma no hatiniay kalim ato soˈlinay mamademak tada patoleday takowanan.” Sapisarocodaw ci Kaloe matayal saki Yihofaan, o hatiniay a kalim no falocoˈ tada o ngaˈayay! Pakasoˈlinay kita o siniˈadaay a Kawas o mamasemer cingranan.

5. (1) Ano pakayniay kita i caka adihay ko midemakan no niyah a matoled, mamiharateng to manan? (2) Itiniay i coka a salikaka samaanay padotoc patafang to sangaˈayay no niyah ci Yihofaan?

⁵ Ano pakayniay kiso i caka adihay ko midemakan no niyah a matoled, ngaˈayay licayen ko niyah: “O manan ko misaalian ni Yihofa hani?” O misaalian Ningra edeng itini i pakayraan iso nohatini, patafang to sangaˈayay no niyah Cingranan. Haratengen hena, cecay fafahiyan salikaka 80 ko mihecaan, o mamadangar ningra i mitosilay cowato ka lecad ko adihay i 40 ko mihecaan a midemakan, tada matoleday ko falocoˈ. Soˈlin misarocodayto ko niyah, cowa ko mamarenec ci Yihofa saan cingra miharateng. Soˈlinay mahaen han? Haratengen, onini fafahiyan salikaka itini 40 ko mihecaan i, pafeliayto ci Yihofaan to sangaˈayay, 80 ko mihecaan kamayanho mihaen ko demak, ano mahaenay i, padotocay cingra patafang to sangaˈayay ci Yihofaan. Ano cowa kangaˈay ko demak no niyah cowa ko mamarenec ci Yihofa saan kita miharateng i, aka mapawan: Hahakowa ko midemakan ita ngaˈ marenec ci Yihofa, o Cingra ko mamisaˈosi. Ano misarocod kita a midemak, o mamahemek ci Yihofa, wa saan ko sowal Ningra: “Ngaˈayay ko midemakan iso!”—Nengnengen ko Matay 25:20-23.

6. Mikitini ci Mariyaan ngaˈay kita minanam to manan hani?

⁶ Ano samacayen ita ko mamadangar a demak no niyah eca ko cowa ko mamadangar, mihaen mamatongal ko lipahak kita. Cecay fafahiyan salikaka ci Mariya, ciadadaay cingra, telocto cowato ka adihay ko mitosilay a tayal. Satapang aca matoleday cingra, tada awaay ko kapo no niyah sanay. Kawra ikor maharatengay ningra o halafinay ko adada a fafahiyan salikaka i kasakopang, misaˈosiay sapadamaaw tonini a salikaka. Sanay ci Mariya: “Milimasmasay kako to toki kalacafay cingranan patingwa ato patikami a misawacay. O kahacecay niyam malacafay mitosil ikor, tada lipahakay a marenec, samanen ngaˈayay kako padama to salikaka ako.” Ano samacayen ita ko mamadangar no niyah a demak eca ko cowa ka dangar a demak, o mamatongal ko lipahak ita. Kawra itini midokoay a demak i roma pakayraan ikakaay ko midemakan ita to tao anca mikiriwiˈay ko kangaˈay, o mamiharateng to maanan hani?

7. Tarokos ci Pitiro palimoˈotay to salikaka samaan ko pidemak hani?

⁷ Itini i sakacecay tikami no tarokos ci Pitiro palimoˈotay to salikaka, sakadademaken ko inaneng no niyah pakalalok to romaroma a salikaka. Sanay ci Pitiro: ‘O Kawas tano masakenaay a pakayraan patalahkal to mikiriwiˈay a sidaˈit Ningra. Malo mihimaway to mikiriwiˈay a sidaˈit, o kahacecay tamdaw mamitoor to malifokay no niyah a inaneng, misarocod matayal saki ˈalomanay.’ (1 Pitiro 4:10) Mihaenay o mamisarocod kita misaka dademak to inaneng, aka pakayni ka calemcem to katoled no salikaka ato kaˈinap kitanan, sawad sato a midemak. Ano eca ka pisarocod kita midemak, o cowato ko patafangay to sangaˈayay no niyah ci Yihofaan.

8. Mikitini 1 Korinto 4:6, 7, hano caka ngaˈay kita malitaˈang to inaneng no niyah hani?

⁸ O mamisarocod kita misaka dademak to inaneng no niyah, kawra aka malitaˈang. (ˈOsien ko 1 Korinto 4:6, 7.) Tinakoen, mafanaˈay kiso patireng to pacekiwan, sarocoden misaka dademak toniya inaneng! Kawra misaka dademak to inaneng no niyah ato malitaˈang to inaneng no niyah o cowa ka lecad. Ano ira ko tamdaw misatapang malacafay tisowanan minanam to Fangcalay Cudad, sapaladaˈaw kiso tonini a ngaˈayay milifetan i kasakapot a salikaka. Kawra malitemoh iso cangra, iraay ko cecay fafahiyan salikaka mahemekay pasowal to ˈalomanay mapalilamay no niyah ko cecay a casi. O casi ko mapalilamay ningra, kiso saan patirengay to pacekiwan, sasamaan ko demak iso hani? Soˈlin mafanaˈay kiso malifetay iso o papakalalok to ˈalomanay, kawra o mamitala kiso to matatodongay a toki paladaˈ to ˈalomanay wa ikaka ko kangaˈay, caay kaciharateng kiso cowa ka lecad tisowanan a ngaˈay ko demak no niyah saan a miharateng koya salikaka. Mihaen ko demak iso tada sidaˈitay cingranan. Aka mapawan, ano mafanaˈay kiso patireng to pacekiwan, sarocoden misaka dademak konini a inaneng.

9. Sasamaan kita misaka dademak to inaneng no niyah?

⁹ Haharatengen ita, o polong a inaneng no niyah sahtoay o sapafeli ni Yihofa kitaanan. O sasaka dademaken ita konini a inaneng pakalalok to salikaka, cowa ko papatakaraw to niyah. (Filipi 2:3) Ano saka dademaken ita ko ˈicel ato inaneng no niyah midemak to kaolahan no Kawas a demak, wa ira ko lalangian a lipahak. Mahemek kita cowa ko pakayniay kaidahi no niyah to tao, ikaka ko ngaˈay no midemakan to tao, ao pakayniay kita i pisaka dademak to inaneng no niyah paˈodingar ci Yihofaan.

10. Palalinien ko niyah to tao hano cowa ko matatodongay hani?

¹⁰ Ano eca pisinanot kita i, o mamiala to kangaˈayan no niyah palalini to dangoc no tao. Tinakoen, o cecay faˈinayan salikaka mafanaˈay mikimad to pakapapotalay a kimad, o kaidahiyan ningra konini. Itini falocoˈ ningra malikafay to cecay cowa kafanaˈ mikimad a salikaka, kawra ora salikaka halipaladaˈay alatek, mafanaˈay pasifanaˈ to wawa, anca fanekfekay i mitosilay a demak. Haharatengen ita o kahacecay salikaka iraay ko kangaˈayan, misaka dademak cangra to inaneng no niyah matayal saki Yihofaan ato roma tamdaw, o papakayni ko saka lipahak no mita.

11. Hano mamisarocod kita mitodong to taˈarawan ni Yis hani?

¹¹ Soˈlin cowa kangaˈay kita palalini to tao, kawra wa ngaˈay kita pasayra i madimadiay midoko to Kawas a tamdaw a minanam. Tinakoen, ngaˈay kita pasayra ci Yisan minanam. Soˈlin cowa ka lecad kita cingranan o malefotay a tamdaw, wa ngaˈayho mitodong to makapahay capeling ato pakayraan ningra a dademak. (1 Pitiro 2:21) Ano misarocod kita mitodong to taˈarawan ningra, itini i midokoay ci Yihofaan a demak mamatongal ko kangaˈay no demak, malo iraay ko epoc a mitosilay.

12-13. Mikitini kita i taˈarawan ni Tafiti mananamay ko maanan hani?

¹² Itini Fangcalay Cudad adihayay ko madimadiay mihodop to Kawas a tamdaw, soˈlin cowa ko malefotay cangra, kawra ngaˈayay todongen no mita. (Hipray 6:12) O cecay tinakoan o Hongti ci Tafiti. Sowal ni Yihofa cingra i ‘o matatodongay i falocoˈ Ako a tamdaw,’ ono Padaka pihongyak tonini a sowal i ‘o kaolahan ako a tamdaw.’ (Dmak 13:22) Kawra, cowa ko malefotay ci Tafiti, midemakay to pakidemay a raraw, kawra kamayan o ngaˈayay a taˈarawan ita cingra. Misamaanay hani? Tiya rikecen cingra i cowa paˈading to niyah. Soˈlin pakidemay ko macadaay ningra a sapalimoˈot, kawra misamimingay ko falocoˈ micada ato mikifalocoˈay pasasiyor. Telocto, milifokay cingra to sasodod ni Yihofa.—ˈOlic 51:3, 4, 10-12.

¹³ Maˈaraw ko taˈarawan ni Tafiti ikor, ngaˈayay licayen ita ko niyah: “Ano micada kako to sapalimoˈot i, wa samaan ko harateng ako hani? Wa tangsol kako mihayi to raraw, anca paˈading to niyah hokira? Wa tangsol kako miloloh to tao han? Wa misaˈicel kako ecato piliyaw midemak to malecaday a raraw han?” Ano maˈaraw iso ko taˈarawan no madimadiay tamdaw i Fangcalay Cudad i, ngaˈayay haratengen ko pina salicay, tinakoen: “Masiˈayaway nangra ko malecaday to mako a pasangaray han? Paihkalay cangra to maanan makapahay a capeling?” Minengneng kiso to nalifetan no kahacecay tamdaw i, ngaˈayay miharateng: “Wa ngaˈay kako samaan mitodong cingranan hani?”

14. Ngaˈay kita mikitini i salikaka minanam to manan?

¹⁴ Itini tatihiay ita ˈalomanay a salikaka, ano kaemangayto anca matoˈasay, adihayay ko nananamen no mita. Haratengen itini kasakopang iso, o cima faˈinayan salikaka anca fafahiyan salikaka mihadidiay to sapalifet, misaˈicelay mitafo to madimadi hani? Misiˈayaw cingra to saroero no cafacafay, pisafelit no paro no lomaˈ anca tatiihay ko tireng alatek. Itini i tireng ningra maˈaraway iso ko ngaˈayay a capeling, onini a capeling makalimay kiso palahad han? Misongilaˈ kiso miharateng to taˈarawan ningra, o mamananam ko ngaˈayay a pakayraan miremo to sapalifet iso alatek. Itini tatihi ita ira ko hatiniay a taˈarawan no pakasoˈlin, tada mamiakoˈid kita ci Yihofaan!—Hipray 13:7; Yakop 1:2, 3.

15. O maanan a sapalimoˈot no tarokos ci Pawlo ngaˈayay padama kitanan padadotoc lipahak a matayal saki Yihofaan?

¹⁵ Kita o kahacecay a tamdaw o mamitoor to pakayraan no niyah misarocod matayal saki Yihofaan. Mihaen mamatongal ko rihaday no kasakopang, matongal ko kakelec a malacecay. Haratengen ko pakayraan no saka 1 hahekalan a Krisciyang, iraay ko inaneng ato saaroˈan no kahececay nangra. (1 Korinto 12:4, 7-11) Onini cowa ko lalangian nangra a malalifet, mikidat to sakaliwasak. Palimoˈotan ni Pawlo cangra o kahacecay tamdaw misarocod ‘patanektek to tireng ni Kristo.’ Sanay cingra: ‘Kahacecacecay a caˈang no tireng i, pakayni i nika sasiolaolah ita ko sakalomahad no tireng a tanektek.’ (Ifiso 4:1-3, 11, 12, 16) O midofdofay tonini a sapalimoˈot a tamdaw wa ngaˈay micowat to rihaday ato kakelec a malacecay ko kasakopang. Anini, mahecaday ko pakayraan no kasakopang no Krisciyang.

16. Mamisetek kita to falocoˈ samaan ko pidemak? (Hipray 6:10)

¹⁶ Seteken ko falocoˈ misaka dademak to kalimlaan nonini a lalakaw, aka palalini to tao. Misaˈicel mitodong ci Yisan, minanam to makapahay a capeling ningra, pasayraho i nolitengan ato aniniay lintad madimadiay midoko to Kawas a tamdaw a minanam. Ngaˈay rihaday ko falocoˈ iso, ‘o moecelay ko Kawas, cowa ko mamapawan to nano demak namo.’ (ˈOsien ko Hipray 6:10.) Ka padadotoc kiso patafang to sangaˈayay ci Yihofaan, lipahak a matayal saki Cingranan, hanaca haratengen tada masemeray Cingra misarocod kiso matayal saki Cingranan.