1. ¿Kun lurasas kusisitätanjja?

 JEHOVÁ DIOSAJJ kusisitäñaswa muni. ¿Kunjamatsa uk yattanjja? Espíritu santon achup taypinkki ukanakat mayajj kusisiñawa (Gál. 5:22). Niyakejjay katoqañat sipansa churañan jukʼamp kusisiñajj utjchejja, jaqenakar predicasa wali ocupatäktan ukat jilat kullakanakar yanaptʼtan ukhajj kusisitätanwa (Hech. 20:35).

2, 3. 1) Gálatas 6:4 textorjamajja, ¿kunas kusisitäskakiñatakejj yanaptʼistani? 2) ¿Kunanakatsa aka yatichäwin yatjjataskañäni?

² Kunas kusisitäskakiñatakejj yanaptʼistaspa uka toqet apóstol Pablojj pä yanaptʼanakwa yatiyäna. Ukanakajj Gálatas 6:4 (liytʼäta) textonkiwa. Maya, kunatï jiwasat jukʼamp sumäki uk Jehová Diosar churañäni ukhajja, kusisitäñäniwa, taqeniw uk lurañasa (Mat. 22:36-38). Paya, janiw mayninakamp igualayasiñasäkiti. Jiwasatï jan usutäkstan, capacitación katoqstan jan ukajj mä kun sum lurañ yatstan ukhajja, Diosaruw ukanakat yuspärañasa, kuna laykutejj taqe kunanakatï utjkistu ukanak jupaw churistu. Mayni jilat kullakanakatï jiwasat sipans jukʼamp sum predicañ yatipjjchi ukhajja, kunanaktï lurañ yatipki ukamp Diosar jachʼañchapjjatapat kusisiñasawa, jupanakajj janiw mayninakat sipans jilankapkaspas ukham amuyasiñatakisa, ni jupanakan askip thaqasakis uk lurapkiti. Jupanakamp atip atipa kun lurañat sipansa jupanakatwa yateqasiñasa.

³ Taqe kunanaktï Jehová Diosar serviñan lurañ munktan ukarjam jan lurañ puedkstan ukhajja, kunas jan desanimasiñatak yanaptʼistaspa ukwa aka yatichäwin yatjjataskañäni. Ukatjja kunanaktï sum lurañ yatktan ukampejj kunjamsa Diosar jukʼamp sum sirvsna, kunanaksa mayninakat yateqassna ukanaksa yatjjataskarakiñäniwa.

4. ¿Kunas desanimat jikjjatasiyistaspa? Uk Carol kullakan experienciapamp qhanañchtʼam.

⁴ Yaqhep jilat kullakanakajja, jilïrëjjasasa jan ukajj usutäjjasas kunanaktï Diosar serviñatak lurañ munapki ukanak janiw lurañ puedipkiti, ukatwa desanimat jikjjatasipjje. Carol sat mä kullakajj ukhamaw jikjjatasïna, jupajj kawkjantï predicañatak yanaptʼajj munaskäna ukanwa mä tiempojj servïna. 35 jaqenakaruw Bibliat yatichäna, Jehová Diosar jakäwip katuyasipjjañapatakisa bautisasipjjañapatakis waljaniruw yanaptʼarakïna. ¡Ukham luratapajj wali sumapunïnwa! Ukampis usuntjjänwa, janiw utatsa mistuñ puedjjarakïnti. Jupajj akham siwa: “Usutätaj laykojj janiw mayninakjam lurañ puedkti, ukatwa janis jupanakjam Jehová Diosar taqe chuyma sirvkirista ukham amuyasta. Kunanaktï lurañ munkta ukanak janiw lurañ puedkti, ukatwa desanimat jikjjatasta” sasa. Carol kullakajj qhawqtï puedki ukwa Diosatak lurañ muni, ukajj wali askipuniwa. Ukham lurañ munatapjja khuyaptʼayasir Diosajj wali valoranitwa uñji.

5. 1) ¿Kunanaktï lurañ munktan ukanak jan lurañ pueditasat desanimat jikjjatastan ukhajj kuns amtañasa? 2) Aka yatichäwin fotonakapan uñjaski uka jilatajja, ¿kunjamsa qhawqtï puedki ukarjam Jehová Diosar serviwayi?

⁵ Taqe kunanaktï lurañ munktan ukanak jan lurañ pueditasat awisajj desanimasiñäni ukhajja, akham sasaw jisktʼasiñasa: “¿Kun lurañajsa Jehová Diosajj muni?” sasa. Kunatï jiwasat jukʼamp sumäki uk churañaswa jupajj muni, mä arunjja, kunjamansa jakastan ukarjam qhawqtï jupatak lurañ puedktan uk lurañaswa muni. Akham amuytʼañäni, 80 marani mä kullakajja, 40 maranïkasajj kunanaktï predicacionan lurirïkäna ukanak jan lurañ puedisajj desanimataw jikjjatasi. Jupajj “qhawqtï Jehová Diosatak lurañ puedkta ukarjamas lurkstjja, Diosajj janiw luratajampejj kusisitäkpachati” sasaw amuyi. ¿Cheqapunit Diosajj kullakan luratapamp jan kusisitäkpacha? Uka kullakajj 40 maranïkasajj qhawqtï lurañ puedkäna ukarjamaw Diosar servïna, 80 maranëjjasas ukhamwa luraskaki, cheqas nayratpachaw qhawqtï lurañ puedki ukarjam Jehová Diosar serviski. Kunanaktï Diosar kusisiyañatak lurktan ukanakajj jukʼakïkaspas ukham amuystan ukhajja, ak amtañasawa: kunas kusisiyi jan kusisiykaraki uk jupaw amti. Qhawqtï puedktan ukarjamatï jupar serviñänejja, “¡walik ukham lurtajja!” sasaw sistani (Mateo 25:20-23 liytʼarakïta).

6. ¿Kunsa María kullakan experienciapajj yatichistu?

⁶ Kusisitäskakiñatakejja kunanaktï jan lurañ puedktan ukar chuym uchañat sipansa, kunanaktï lurañ puedktan ukaruw chuym uchañasa. María kullakat parltʼañäni, usutätap laykojj janiw walja horanak predicañ puedkiti. Qalltanjja llakitaw jikjjatasïna, janis kunatak sirvkaspa ukhamaw amuyasirakïna. Ukampis congregacionapankir mä kullakajj ikiñan jaqontatätapwa amuyäna. Ukhamajj jupar yanaptʼañatakiw chʼamachasïna. María kullakajj akham siwa: “Kullakan utapar sarañwa amtayäta, ukhamat teléfono toqe, carta toqe jupamp predicañataki. Kullakar yanaptʼasajj kusisita, chuymas chuyma ukhamaw utar kuttʼanjjerïta” sasa. Kunanaktï jan lurañ puedktan ukar chuym uchañat sipansa, kunanaktï lurañ puedktan ukar chuym uchañäni ukhajja, jukʼamp kusisitarakïñäniwa. Ukampis jiwasatï jukʼamp lurañ puedstan jan ukajj Diosar serviñan mä kuns sum lurañ yatstan ukhajj ¿kunsa lursna?

7. ¿Kamsasas apóstol Pedrojj cristianonakar ewjjtʼäna?

⁷ Apóstol Pedrojj Diosan amuytʼayatajj qellqkäna uka nayrïr cartapanjja, kunanaktï maynejj  sum lurañ yatki ukamp cristiano masinakapar chʼamañchtʼapjjañapatakiw jilat kullakanakar ewjjtʼäna. Jupajj akham sänwa: “Diosan wali khuyapayasiñap kunaymanit katoqer mayordomonakjamajja, kuntï sapa maynis Diosat katoqapkta ukarjam maynit maynikam yanaptʼasipjjam” sasa (1 Ped. 4:10). Kunanaktï lurañ yatktan ukamp Jehová Diosar serviñatakejj wal chʼamachasiñasawa. Mayninakajj envidiasipjjetaniwa jan ukajj desanimasipjjaniwa sasajj janiw ajjsarañasäkiti. Jiwasatï ajjsarañat jan chʼamachasjjsna ukhajja, janiw Diosarojj qhawqtï lurañ puedktan uk churjjsnati.

8. 1 Corintios 4:6, 7 textorjamajja, ¿kunatsa kunanaktï sum lurañ yatktan ukanakat jachʼa jachʼa jan tukuñasäki?

⁸ Kunanaktï lurañ yatktan ukamp Jehová Diosar serviñatakejj wal chʼamachasiñasawa, ukampis ukanakat jachʼa jachʼa tukuñat wal amuyasiñasawa (1 Corintios 4:6, 7 liytʼäta). Sañäni, inas jumajj Bibliat maynir yatichañ facilak qalltañ yatsta, ukhamächi ukhajj ¡uk luraskakim! Ukampis ukham lurañ yatitamat janiw jachʼa jachʼa tukuñamäkiti. Jichhakis predicacionan mä suma experiencianïkasma ukham amuytʼañäni, jumajj Bibliatwa maynir yatichañ qallttajja. Ukhamajj predicacionankir grupomarojj wal uk cuenttʼañ muntajja, ukampis grupor purjjta ukhajj mä kullakaw kunjamsa mä revista mä jaqer jaytäna uk cuenttʼaski. Kullakajj mä revistwa jaytäna, jumajj mayniruw Bibliat yatichañ qallttajja. Ukhamajj ¿kunsa lurasma? Experienciamajj jilat kullakanakarojj wal chʼamañchtʼaspa, ukampis kullakar jan desanimañatakejj yaqha horasan cuenttʼañwa amtawaytajja. ¡Ukham lurasajj munasirïtamwa uñachtʼaytajja! Ukampis Bibliat maynir yatichañ qalltañatakejj chʼamachasiskakiñamawa, niyakejjay uk lurañ sum yatstajja, ukarjam luraskakim.

9. ¿Kunanaktï lurañ yatktan ukanakampejj kunanaksa lurañasa?

⁹ Kunanaktï sum lurañ yatktan ukanakajj Diosan regalopawa, uk janipun armañäniti. Ukhamajj ukanakampejj congregacionaruw chʼamañchtʼañasa, janiw mayninakamp sum uñjayasiñatakïñapäkiti (Filip. 2:3). Chʼamasampi ukat kunanaktï lurañ yatktan ukanakampi Jehová Diosan munañap lurtan ukhajja, kusisitätanwa, kuna laykutejj kunanaktï lurañ yatktan ukanakampejj Jehová Diosaruw jachʼañchtanjja, janiw mayninakat sipans jukʼamp sums lurksna jan ukajj jupanakat jilanksnas ukham amuyayañatakejj ukham lurktanti.

10. ¿Kunatsa mayninakamp igualayasiñajj jan walïki?

¹⁰ Jiwasatï jan amuyasksna ukhajja, kunanaktï sum lurañ yatktan ukjja kunanaktï mayninakajj jan sum lurañ yatipki ukanakamp igualayañaruw purtʼassna. Akham amuytʼañäni.  Mä jilatajj discursonak arstʼañ sum yatispa, cheqas uk lurañwa jupajj sum yati. Ukhamäkchisa, kawkïr jilatatakitï discursonak arstʼañajj chʼamäki uka jilatat jilankkaspas ukhamwa chuymapan amuyasispa. Ukampis discursonak arstʼañajj jupatak chʼamäki uka jilatajj inas yaqhanak sum lurañ yatchi. Inas katoqtʼasiri, wawanakaps sum uywiri, taqe chuyma predictʼiri ukhamächi. Walja jilat kullakanakajj kunanaktï sum lurañ yatipki ukanakampejj Jehová Diosaruw servisipki, mayninakarus yanaptʼasipkaraki, ukham jilat kullakanakat wal yuspärtanjja.

11. ¿Kunatsa Jesusat yateqasiñatak chʼamachasiñasa?

¹¹ Mayninakamp igualayasiñajj janiw walïkiti, ukampis Jehová Diosan servirinakapat waljanakwa yateqassna. Jesusat amuytʼañäni, jupajj jiwasatak wali yateqaskayawa. Jiwasajj janiw jupjam perfectöktanti, ukampis kunjam chuymanïnsa, kunanaksa luräna ukanakat yateqassnawa (1 Ped. 2:21). Kayup wali amuyump arkañatak wal chʼamachasiñäni ukhajja, Jehová Diosarojj jukʼamp sumwa serviñäni, jukʼamp sumwa predicarakiñäni.

12, 13. ¿Kunsa David reyit yateqtanjja?

¹² Bibliajj walja chachanakata warminakatwa parli, jupanakajj pantjasirïpkchïnsa, jiwasatakejj wali yateqaskayäpjjewa (Heb. 6:12). Jupanakat maynejj David reyiwa. Jupat parlkasajja “chuymajar purtʼkiriwa” sasaw Jehová Diosajj säna (Hech. 13:22). Ukampis Davidajj janiw perfectökänti. Jachʼa juchanakarus purtʼaskchïnjja, jiwasatakejj wali yateqaskayawa. ¿Kunatsa? Cheqañchapkäna ukhajj janiw yaqhanakak parlkänti, antisas cheqañchatajj katoqtʼasïnwa, taqe chuymaw jucha luratanakapat arrepentisirakïna, ukatwa Diosajj jupar perdonäna (Sal. 51:3, 4, 10-12).

¹³ Davidan sarnaqäwipajj jiwasar yanaptʼañapatakejj akham jisktʼasiñasawa: “¿Maynin ewjjtʼatajj kunsa lurtjja? ¿Pantjasiskapuntwa sasat sistjja, jan ukajj janich pantjasitanakaj uñtʼasiñ munktjja? ¿Mayninakaw pantjasiyitu sasat jankʼak sistjja? ¿Jan mayamp pantjasiñatak chʼamachastti?” sasa. Diosat jan jitheqtapkäna ukanakat Biblian yatjjatkasajja, niya ukhamwa jisktʼasiñasaraki. ¿Jiwasjam jan walinti uñjasipjjarakpachäna? ¿Kunjam chuymanïpjjatapsa uñachtʼayapjjäna? Jupanakat yatjjatkasajj akham jisktʼasipjjarakiñäni: “¿Kunjamsa Jehová Diosat jan jitheqtiri uka serviripjamïristjja?” sasa.

14. ¿Jilat kullakanakat yateqasiñajj kunjamsa yanaptʼistu?

¹⁴ Wayn tawaqonakatsa jan ukajj jilïr jilat kullakanakats yateqasiraksnawa. Inas maynejj congregacionan akhamanakan uñjaschi:  yaqha wayn tawaqonakaw jan walinak lurayañ muni, familiapaw Diosar serviñap jan munkiti, jan ukajj usutawa. Ukhamanakan uñjaskasas Diosar confiyasaw serviskaki. ¿Kunsa uka jilatatsa jan ukajj uka kullakatsa yateqassna? Jupat yateqasiñajj kuna jan walinakantï uñjasktan ukanakar saykatañatakiw yanaptʼistani. Diosar jan jitheqtas serviri ukham jilat kullakanakat wal yuspärtanjja, jupanakajj wali yateqaskayäpjjewa (Heb. 13:7; Sant. 1:2, 3).

15. Jehová Diosar kusisit serviskakiñatakejja, ¿apóstol Pablon kawkïr ewjjtʼapas yanaptʼistani?

¹⁵ Qhawqtï puedktan ukarjam luras Jehová Diosar serviñäni ukhajja, congregacionan sumankañaw utjani, mayachtʼatarakïniwa. Nayrïr cristianonakajj ukhamwa lurapjjäna. Jupanakajj kunaymaninak lurañ yatipjjäna, kunayman asignacionanakanïpjjarakïnwa (1 Cor. 12:4, 7-11). Ukampis ukajj janiw atip atipa sarnaqayañ utjayañatakïkänti, ni tʼaqa tʼaqa sarnaqañ utjayañatakïkänsa, jan ukasti apóstol Pablojj Éfeso markankir cristianonakar qellqkäna uka cartapanjja, ‘Criston cuerpopar chʼamañchapjjañamataki’ wal chʼamachasipjjam sasaw jupanakar ewjjtʼäna. Ukatsti akham sarakïnwa: “Kunapachatï cuerpon sapa partenakapajj lurañanakap phoqapki ukhajja, cuerporuw jiltañatak yanaptʼapjje, ukhamatwa taqpach cuerpojj munasiñan suma saytʼatarakejja” sasa (Efes. 4:1-3, 11, 12, 16). Ewjjtʼanakaparjam luririnakajja, congregacionan sumankañ utjañapataki, mayachtʼatäñapatakiw yanaptʼapjjäna, ukwa congregacionanakasan uñjaraktanjja.

16. ¿Kun lurañsa amtañasa? (Hebreos 6:10).

¹⁶ Mayninakamp jan igualayasiñatak chʼamachasiñ amtapjjañäni. Mayninakamp igualayasiskañat sipansa Jesusat yateqasipjjañäni, kunjam chuymanïnsa uk yateqasiñatakis chʼamachasipjjarakiñäni. Nayra tiempon Diosat jan jitheqtas servirinakata, jichha tiempon Diosat jan jitheqtas servirinakat yateqasipjjañäni. Qhawqtï lurañ puedktan ukarjam Jehová Diosar serviskakiñäni, ‘Diosajj cheqapar uñjir Diosawa, jupajj janiw luratanakasat armaskaniti’ (Hebreos 6:10 liytʼäta). Jupar serviñatak chʼamachasitas uñjasajja, Jehová Diosajj wal kusisi, ukhamajj jupar kusisit serviskakiñäni.