1. Бизә бөјүк севинҹ ҝәтирән нәдир?

 ЈЕҺОВА бизим хошбәхт олмағымызы истәјир. Биз буна әминик, чүнки севинҹ мүгәддәс руһун бәһрәсидир (Гал. 5:22). Вермәк алмагдан даһа чох хошбәхтлик ҝәтирдији үчүн биз тәблиғ хидмәтиндә там иштирак едәндә, диндашларымыза мүхтәлиф јолларла көмәк едәндә бөјүк севинҹ дујуруг (Һәв. 20:35).

2, 3. а) Галатијалылара 6:4 ајәсиндә вурғуланан һансы ики амил бизә севинҹимизи горумаға көмәк едәҹәк? б) Бу мәгаләдә нәји арашдыраҹағыг?

² Һәвари Булус Галатијалылара 6:4 ајәсиндә севинҹимизи горумаға көмәк едән ики амили вурғулајыр. (Ајәни охујун.) Биринҹиси, биз өз ҝүҹүмүз дахилиндә Јеһованын јолунда әлимиздән ҝәләни етмәлијик. Әҝәр белә едириксә, онда хидмәтимиздән севинҹ дујмалыјыг (Мәт. 22:36—38). Икинҹиси, өзүмүзү башгалары илә мүгајисә етмәмәлијик. Ола билсин, сәһһәтимиз јахшыдыр, мүәјјән баҹарыгларымыз вар, јахуд һансыса саһәдә тәлим алмышыг. Бүтүн бунлара ҝөрә Јеһоваја миннәтдар олмалыјыг. Ахы нәјимиз варса бизә О вериб. Ејни заманда әҝәр кимләрсә хидмәтин һансыса саһәсиндә биздән даһа сәриштәлидирсә, севинмәлијик. Чүнки онлар баҹарыгларындан өзләрини уҹалтмаг вә ја шәхси мәнфәәтләри үчүн јох, Јеһованы шәрәфләндирмәк үчүн истифадә едирләр. Буна ҝөрә дә онларла рәгабәт апармамалыјыг, онлардан өјрәнмәлијик.

³ Әҝәр үрәјимиз истәјән гәдәр хидмәт едә билмәдијимиз үчүн пис олуругса, нә едә биләрик? Бу мәгаләдән бу суалын ҹавабыны тапаҹағыг, һәмчинин арашдыраҹағыг ки, өз габилијјәтимиздән ән јахшы шәкилдә неҹә истифадә едә биләрик вә башгаларынын нүмунәсиндән нә өјрәнә биләрик.

4. Бәзиләрини нә руһдан салыр? Нүмунә чәкин.

⁴ Јеһованын бәзи хидмәтчиләри јашларына вә сәһһәтләринә ҝөрә әввәлки гәдәр хидмәт едә билмәдикләринә ҝөрә мәјус олурлар. Карол баҹымыз да белә һиссләр кечирирди. О, әввәлләр тәблиғчиләрә тәләбат олан әразидә хидмәт едирди. Бу мүддәт әрзиндә о, 35 нәфәрә Мүгәддәс Китаб дәрси кечмишди вә онлардан бәзиләри руһани ҹәһәтдән инкишаф едиб вәфтиз олунмушду. Онун хидмәти ҝөзәл бәһрәләр ҝәтирирди. Сонра онун сәһһәти писләшди вә демәк олар ки, евдән чөлә чыха билмәди. Карол дејир: «Билирәм ки, сәһһәтимә ҝөрә башгалары гәдәр хидмәт едә билмирәм. Амма јенә дә мәнә елә ҝәлир ки, онлар мәндән даһа сәдагәтлидирләр. Үрәјимдән чох хидмәт етмәк кечир, ди ҝәл, ҹаным әл вермир. Дахилимдәки бу мүбаризә мәни лап үзүр». Карол баҹы Јеһованын ишинә чох ҹан јандырыр, афәрин она! Әмин ола биләрик ки, шәфгәтли Аллаһымыз ондан чох разыдыр.

5. а) Истәдијимиз гәдәр хидмәт едә билмириксә, нәји өзүмүзә хатырлатмалыјыг? б) Шәкилдә гардашын һәмишә Јеһованын јолунда әлиндән ҝәләни етдијини нә ҝөстәрир?

⁵ Әҝәр истәдијиниз гәдәр хидмәт едә билмәдијинизә ҝөрә мәјус олурсунузса, өзүнүзә белә бир суал верин: «Јеһова мәндән нә ҝөзләјир?» О истәјир ки, индики вәзијјәтиниздә әлиниздән ҝәләни едәсиниз. Ҝәлин белә бир вәзијјәти тәсәввүр едәк: сәксән јашында олан баҹы гырх јашында етдији гәдәр хидмәт едә билмәдији үчүн мәјус олур. Она елә ҝәлир ки, әлиндән ҝәләни етсә дә, Јеһова ондан разы дејил. Бәс бу, доғрудан да, беләдир? Әҝәр баҹы гырх јашында да, сәксән јашында да әлиндән ҝәләни едибсә, демәли, Јеһованын јолунда һеч вахт ҝүҹүнү әсирҝәмәјиб. Хидмәтимизин Јеһованы разы салмадығыны дүшүнүрүксә, онда өзүмүзә хатырлатмалыјыг ки, буна Јеһова гәрар верир. Биз Јеһованын јолунда ҝүҹүмүзү әсирҝәмәдән чалышырыгса, Јеһова бизә «афәрин» дејир. (Мәтта 25:20—23 ајәләри илә әлагәләндирин.)

6. Марија баҹыдан нә өјрәнә биләрик?

⁶ Хидмәтдән севинҹ дујмаг үчүн диггәтимизи едә билмәдијимиз јох, едә билдијимиз шејләрә ҹәмләмәлијик. Марија адлы баҹы хәстәлији уҹбатындан чох хидмәт едә билмир. Әввәл-әввәл о, буна ҝөрә чох мәјус олурду вә өзүнү јарарсыз һисс едирди. Амма сонра о, јығынҹагларында јатаг хәстәси олан бир баҹы һагда дүшүндү вә гәрара ҝәлди ки, она көмәк етсин. Марија баҹы дејир: «Онунла бирликдә телефон вә мәктуб васитәсилә тәблиғ едирдим. Һәр дәфә евә гајыданда өзүмү чох хошбәхт һисс едирдим. Севинирдим ки, баҹыма көмәк едә билмишәм». Биз дә диггәтимизи һал-һазырда хидмәтдә баҹардығымыз шејләрә ҹәмләсәк, даһа чох севинҹ дујарыг. Бәс әҝәр хидмәтин һансыса саһәсиндә даһа чох иш ҝөрә биләриксә вә ја һансыса габилијјәтимиз варса, онда неҹә?

7. Һәвари Бутрус мәсиһиләрә һансы ҝөзәл мәсләһәти вермишди?

⁷ Һәвари Бутрус Јеһованын илһамы илә јаздығы илк мәктубунда диндашларыны тәшвиг етмишди ки, саһиб олдуглары әнамлары илә бир-бирини мөһкәмләндирсинләр. О јазмышды: «Һәр кәс алдығы әнама әсасән, Аллаһын мүхтәлиф јолларла ифадә олунан лүтфүнүн нүмунәви нөкәрбашысы кими бир-биринә хидмәт етсин» (1 Бут. 4:10). Нараһат олмамалыјыг ки, биздә олан әнамы вә баҹарығы там шәкилдә истифадә етсәк,  бирдән башгаларында пахыллыг јаранар вә ја руһдан дүшәрләр. Әҝәр белә дүшүнсәк, онда биз Јеһованын јолунда вар ҝүҹүмүзлә хидмәт етмиш олмарыг.

8. 1 Коринфлиләрә 4:6, 7 ајәләринә әсасән, нәјә ҝөрә өз баҹарығымызла ловғаланмамалыјыг?

⁸ Биз саһиб олдуғумуз әнамлардан там шәкилдә истифадә етмәлијик, амма бунларла ловғаланмамалыјыг. (1 Коринфлиләрә 4:6, 7 ајәләрини охујун.) Мәсәлән, ола билсин, сиздә Мүгәддәс Китаб дәрсинә башламаг чох јахшы алыныр. Сиз бу баҹарығыныздан истифадә етмәлисиниз. Амма бири вар, баҹарығыныздан истифадә едәсиниз, бири дә вар, бунунла өјүнәсиниз. Тутаг ки, хидмәтдә чох мараглы бир һадисә баш верир вә нәтиҹәдә, сиз Мүгәддәс Китаб дәрсинә башлајырсыныз. Бу һадисәни тәблиғ групунуза данышмаг үчүн сәбирсизләнирсиниз. Амма групла ҝөрүшәндә ҝөрүрсүнүз ки, һансыса баҹы хидмәтдә бир нәфәрә журнал вердијиндән данышыр. О, журнал вериб, сиз исә дәрсә башламысыныз. Инди нә едәҹәксиниз? Билирсиниз ки, өз һадисәнизи данышсаныз, һамы чох руһланаҹаг. Амма гәрара ҝәлирсиниз ки, баҹынын севинҹинә көлҝә салмамаг үчүн өз һадисәнизи башга вахт данышасыныз. Бу сиз тәрәфдән чох нәзакәтли һәрәкәт олар. Амма ејни заманда Мүгәддәс Китаб дәрсләри тәклиф етмәјә гәтијјән сон гојмајын. Сизин ҝөзәл әнамыныз вар, ону истифадә един.

9. Әнамларымызы һансы мәгсәдлә истифадә етмәлијик?

⁹ Ҝәлин јадда сахлајаг ки, истәнилән истедадымыз Јеһованын бәхшишидир. Әнамымызы өзүмүзү ҝөстәрмәк үчүн јох, јығынҹағы мөһкәмләндирмәк үчүн истифадә етмәлијик (Филип. 2:3). Биз баҹарығымызы вә ҝүҹүмүзү Јеһованын ирадәсини јеринә јетирмәк үчүн истифадә едәндә севинәҹәјик. Ахы биз буну башгаларындан габаға кечмәк вә ја өзүмүзүн кимдәнсә үстүн олдуғуну ҝөстәрмәк үчүн етмирик, Јеһованы шәрәфләндирмәк үчүн едирик.

10. Нәјә ҝөрә өзүмүзү башгалары илә мүгајисә етмәк һикмәтли дејил?

¹⁰ Өзүмүзү бир тәләдән дә ҝөзләмәлијик. Еһтијатлы олмасаг, өзүмүзүн ҝүҹлү тәрәфини башгасынын зәиф тәрәфи илә мүгајисә едәрик. Тутаг ки, бир гардаш чох ҝөзәл нитгләр сөјләјир. Бу онун ҝүҹлү тәрәфидир. Амма о, јахшы натиглик габилијјәти олмајан гардаша үрәјиндә хор бахыр. Һалбуки һәмин гардашын натиглик габилијјәти  јахшы олмаса да, башга үстүн ҹәһәтләри вар, мәсәлән, о, чох гонагпәрвәрдир, ушагларына ҝөзәл тәлим-тәрбијә верир вә ја хидмәтдә чох фәалдыр. Неҹә дә хошбәхтик ки, бизим чохлу истедадлы баҹы-гардашларымыз вар. Онлар өз баҹарыгларындан Јеһоваја хидмәт етмәк вә диндашларына көмәк етмәк үчүн истифадә едирләр.

11. Исанын нүмунәсини изләмәк үчүн нәјә ҝөрә вар ҝүҹүмүзлә чалышмалыјыг?

¹¹ Дүздүр, биз өзүмүзү башгалары илә мүгајисә етмәмәлијик. Амма садиг инсанлардан чох шеј өјрәнә биләрик. Мәсәлән, ҝөтүрәк Иса Мәсиһи. Онун кими камил ола билмәсәк дә, онун хүсусијјәтләриндән, ҝөрдүјү ишләрдән чох шеј өјрәнә биләрик (1 Бут. 2:21). Биз онун нүмунәсини изләмәк үчүн әлимиздән ҝәләни етсәк, һәм Јеһованын јахшы хидмәтчиси олаҹағыг, һәм дә сәриштәли тәблиғчи.

12, 13. Давуд падшаһдан нә өјрәнә биләрик?

¹² Аллаһын Кәламында бир чох садиг киши вә гадынлар һаггында јазылыб. Онлар камил олмаса да, мәсиһиләр үчүн ҝөзәл өрнәкдир (Ибр. 6:12). Мәсәлән, ҝөтүрәк Давуд падшаһы. Јеһова онун һаггында белә демишди: «О, Мәним үрәјимҹәдир». Башга бир тәрҹүмәдә белә јазылыб: «Чох бәјәндијим бир инсандыр» (Һәв. 13:22). Амма Давуд гејри-камил иди. О, чохлу ҝүнаһлар етмишди. Буна бахмајараг, о бизим үчүн ҝөзәл нүмунәдир. Нәјә ҝөрә белә демәк олар? Чүнки мәзәммәт олунанда өзүнә бәраәт газандырмады, әксинә, тәнбеһи гәбул етди вә үрәкдән төвбә етди. Нәтиҹәдә, Јеһова ону бағышлады (Зәб. 51:3, 4, 10—12).

¹³ Давудун нүмунәсини изләмәк үчүн өзүмүзә нөвбәти суаллары верә биләрик: «Мән мәсләһәтә неҹә јанашырам? Сәһвими дәрһал гәбул едирәм, јохса өзүмә бәраәт газандырырам? Дәрһал башгаларыны ҝүнаһландырмырам? Бир дә бу сәһви етмәмәк үчүн әлимдән ҝәләни едирәм?» Бу кими суалларын үзәриндә диҝәр садиг киши вә гадынлар һаггында охујанда да дүшүнә биләрсиниз. Онларын үзләшдији вәзијјәт сизин вәзијјәтинизә охшајыр? Онлар һансы ҝөзәл хүсусијјәтләри тәзаһүр етдирибләр? Охудуғунуз һәр парчада өзүнүздән сорушун: «Јеһованын бу садиг хидмәтчисинә бәнзәмәк үчүн нә едә биләрәм?»

14. Диндашларымыза бахыб нә өјрәнә биләрик?

¹⁴ Һәмчинин биз јашлы вә ҝәнҹ диндашларымызы да мүшаһидә едәрәк онлардан  чох шеј өјрәнә биләрик. Мәсәлән, һәмјашыдларынын тәзјигинә, аиләдәки тәгибләрә, сағламлығы илә бағлы проблемләрә, јахуд һәр һансы башга сынаға сәдагәтлә таб ҝәтирән диндашынызы јадыныза салын. Онун һансы тәрифәлајиг хүсусијјәтини сиз дә өзүнүздә јетишдирмәк истәјәрдиниз? Онун нүмунәсиндән өз сынағыныза дөзмәк үчүн фајдалы шејләр өјрәнә биләрсиниз. Нә хошдур ки, ҝөзүмүзүн габағында нүмунә ҝөтүрүләси белә баҹы-гардашларымыз вар! Бу да севинмәјимиз үчүн даһа бир сәбәбдир (Ибр. 13:7; Јаг. 1:2, 3).

15. Булусун вердији һансы мәсләһәт хидмәтдә севинҹ дујмағымыза көмәк едә биләр?

¹⁵ Һәрә өз баҹарығыны там шәкилдә истифадә етсә, јығынҹагда бирлик вә сүлһ олар. Мәсәлән, биринҹи әсрдәки мәсиһиләрин мүхтәлиф әнамлары вә тәјинатлары вар иди (1 Кор. 12:4, 7—11). Амма бу онлар арасында рәгабәт вә парчаланма јаратмырды. Һәтта Булус тәшвиг етмишди ки, онларын һәр бири «Мәсиһин бәдәнини инша» етмәк үчүн баҹардығыны етсин. О, ефеслиләрә јазмышды: «Һәр бир үзв өз ишини дүзҝүн ҝөрәндә бу, бәдәнин бөјүмәсинә вә мәһәббәтдә мөһкәмләнмәсинә көмәк едир» (Ефес. 4:1—3, 11, 12, 16). Бу мәсләһәтә әмәл едәнләр јығынҹагда бирлијин вә сүлһүн олмасына төһфә верирдиләр. Бу ҝүн дә биз јығынҹагларда бунун шаһидијик.

16. Нәјә гәти гәрарлы олмалыјыг? (Ибраниләрә 6:10).

¹⁶ Гәтијјән өзүнүзү башгалары илә мүгајисә етмәјин. Мәсиһдән өјрәнин вә онун хүсусијјәтләрини тәзаһүр етдирмәјә ҹан атын. Һәмчинин Мүгәддәс Китабда јазылан вә мүасир дөврүмүздәки иман өрнәкләриндән чох шеј өјрәнә биләрсиниз. Даима хидмәтдә әлиниздән ҝәләни едирсинизсә, бир шејдән әмин олун: «Аллаһ әдаләтсиз дејил ки,.. чәкдијиниз зәһмәти унутсун». (Ибраниләрә 6:10 ајәсини охујун.) Бундан сонра да Јеһоваја севинҹлә хидмәт един. Унутмајын ки, Јеһова Онун јолунда вар ҝүҹүнүзлә етдијиниз хидмәти чох дәјәрләндирир.