ICIPANDE CA KUSAMBILILAMO 16
Kuti Mwaba ne Nsansa Nga Mulebombela Yehova Ukulingana na po Mwingapesha
“Umo na umo alange umulimo wakwe.”—GAL. 6:4.
ULWIMBO 37 Ukubombela Yehova no Mweo Onse
IFYO TWALASAMBILILA *
1. Cinshi cilenga tulesekelela sana?
YEHOVA afwaya ukuti tulesekelela. Twalishiba ifi pantu ukusekelela kwaba pa fisabo fya mupashi wakwe uwa mushilo. (Gal. 5:22) Apo mwaliba insansa ishingi mu kupeela ukucila ishaba mu kupokelela, tulasekelela nga nshi nga ca kuti tulebombesha mu mulimo wa kubila imbila nsuma e lyo no kwafwako aba bwananyina abalekabila ubwafwilisho.—Imil. 20:35.
2-3. (a) Ukulingana na Abena Galatia 6:4, fintu nshi fibili ifingatwafwa ukutwalilila ukulasekelela mu mulimo wa kwa Yehova? (b) Finshi twalasambilila muli cino cipande?
2 Pa Abena Galatia 6:4, Paulo alandile pa fintu fibili ifingalenga twatwalilila ukulasekelela. (Belengeni.) Ica kubalilapo ico tufwile ukucita, kulabombela Yehova apo twingapesha. Nga tulemubombela ukufika apo twingapesha, tukaba ne nsansa. (Mat. 22:36-38) Icalenga bubili, tatufwile ukulalinganya ifyo tubomba ku fyo bambi babomba. Temulandu ne fyo twingabomba mu mulimo wa kwa Lesa pa mulandu wa bumi bwesu, ifyo twasambilila, ne fyo twacenjelamo tulingile ukulatasha Yehova. Na kuba, fyonse ifyo twaishiba fyafuma kuli ena. Na kabili, nga ca kuti bamo balabomba bwino mu mulimo wa kubila imbila nsuma ukucila ifyo tubomba, tufwile ukulasekelela ukuti balebomfya ifyo baishiba ku kulumbanya Yehova kabili tabalebomfya ifyo baishiba ku kufwaya ukuti balemoneka kwati bena e babombesha. Kanshi mu cifulo ca kulacimfyanya nabo, tulingile ukulafwaisha ukusambilila kuli bena.
3 Muli cino cipande twalasambilila pa fingatwafwa nga ca kuti twafuupuka pa mulandu wa kuti tatulebomba ukulingana ne fyo tulefwaya mu mulimo wa kwa Lesa. Na kabili twalasambilila pa fyo twingabomfya bwino ifyo twaishiba e lyo ne fyo twingasambililako ku fyo aba bwananyina bambi babomba.
NGA TATULEBOMBA UKULINGANA NE FYO TULEFWAYA
Nga tulebombesha apo twingapesha ukulingana ne fyo ifintu fili tulalenga Yehova ukulasekelela (Moneni amaparagrafu 4-6) *
4. Finshi ifingacitika ifingalenga uwa bwananyina afuupulwa? Landeni pa cacitike.
4 Ababomfi ba kwa Yehova bamo tababomba nge fyo balebomba kale pa mulandu wa kuti nabaya balekula nelyo balalwalilila kabili ici cilalenga balefuupuka. Ifi fine e fyacitikile ba Carol. Inshita imo balibombeeleko uko aba kubila imbila nsuma bacepa. Pali ilya nshita balitungulwile amasambililo ya Baibolo 35 kabili balyafwile abengi pali aba ukuipeela e lyo no kubatishiwa. Ba Carol balebombesha mu mulimo wa kubila imbila nsuma. Lyena batendeke ukulwala kabili inshita iikalamba baleikala fye pa ng’anda. Batile: “Nalishiba ukuti te kuti ndebomba nge fyo aba bwananyina bambi babomba pantu ndalwalilila, na lyo line mona kwati nshili Mwina Kristu umusuma nge fyo aba bwananyina bambi baba. Te kuti mombe fyonse ifyo ningafwaya ukubomba, ne ci cilalenga ndefuupulwa.” Ba Carol balafwaisha ukubombela Yehova apo bengapesha. Balacita bwino sana ifi bafwaisha ukubombesha. Ukwabula no kutwishika, Lesa wesu uwa nkumbu alasekelela nga amona ifyo bafwaisha ukulamubombela.
5. (a) Cinshi tufwile ukulaibukisha nga ca kuti twafuupulwa pa mulandu wa kuti tatulebomba nge fyo twalebomba kale? (b) Nga fintu tulemona pa fikope, bushe munyinefwe atwalilila shani ukubombesha mu mulimo wa kwa Yehova?
5 Nga ca kuti inshita shimo mulafuupulwa pa mulandu ne fyo mufilwa ukubomba bwino, muletontonkanya pali ici cipusho, ‘Cinshi Yehova afwaya ndecita?’ Afwaya ukuti mulebombesha ukulingana ne fyo mwingakumanisha ukubomba pali ino nshita. Tontonkanyeni pali ici. Nkashi uucilile imyaka 80 alafuupulwa pa mulandu wa kuti pali ino nshita tabomba ukulingana ne fyo alebomba ilyo ali ne myaka 40. Atontonkanya ukuti nangu ca kuti alabombesha, Yehova tasekelela pa fyo abombesha. Nomba bushe ca cine Yehova tasekelela pa fyo abombesha? Nga ca kuti uyu nkashi alebombesha ilyo ali ne myaka 40 kabili na pali ino ine nshita ilyo ali ne myaka 80 alebombesha, ninshi kuli Yehova taleka ukubombesha. Nga ca kuti tulemona kwati ifyo tulebomba tafilelenga Yehova alesekelela, tufwile ukwibukisha ukuti Yehova umwine e usala ififwile ukumulenga alesekelela. Nga tulebombesha apo twingapesha, Yehova akalasekelela kabili cikaba kwati aletweba ukuti: “Eya, mwabombeni.”—Linganyeniko Mateo 25:20-23.
6. Finshi twingasambilila ku fyacitikile ba Maria?
6 Tukaba ne nsansa nga ca kuti tulebika amano ku fyo twingakumanisha ukubomba ukucila ukubika amano ku fyo tushingakumanisha ukubomba. Tontonkanyeni pali bankashi Maria, abalwala ubulwele ubulenga belabombesha mu mulimo wa kubila imbila nsuma. Pa kubala, ba Maria baleumfwa sana ububi, balemona kwati tabacindama. Lyena batontonkenye ukula-afwilishako nkashi uwalwele mu cilonganino ica kuti talefuma na pa ng’anda. Ba Maria batile: “Nalitantike ukuti nkalebombako nankwe umulimo wa kubila imbila nsuma ukubomfya foni e lyo na makalata. Lyonse nga nabomba nankwe naleba sana ne nsansa pantu ninshi na-afwako nkashi nandi.” Na ifwe bene kuti twaba ne nsansa nga ca kuti tulebika amano ku fyo twingakumanisha ukubomba ukucila ukubika amano ku fyo tushingakumanisha ukubomba. Nomba finshi twingacita nga ca kuti tulabombesha mu mulimo wa kwa Yehova nangu kwaliba imilimo imo iyo twaishiba bwino?
IFYO TWINGABOMFYA BWINO IFYO TWAISHIBA
7. Finshi ifyo umutumwa Petro akoseleshe Abena Kristu?
7 Muli kalata ya kubalilapo iyo Petro alembele aba bwananyina, abakoseleshe ukuti balebomfya fyonse ifyo baishibe ku kukoselesha Abena Kristu banabo. Alembele ukuti: “Imwe bonse Lesa alimupeela ubupe bwaibela umo umo. Apo muli babomfi abasuma abo Lesa alanga icikuuku . . . mulebomfya ubupe Lesa amupeela ku kubombela abanenu.” (1 Pet. 4:10) Tatufwile ukulaumfwa umwenso ukuti nalimo aba bwananyina kuti balaumfwa ubufuba nelyo bafuupulwa nga tulebomfya fyonse ifyo twaishiba mu mulimo wa kwa Yehova. Nga ca kutila tuletiina ukubombesha pa mulandu ne fyo aba bwananyina bakulatontonkanya, te kuti tulebombela Yehova apapela amaka yesu.
8. Ukulingana na 1 Abena Korinti 4:6, 7, mulandu nshi tushilingile ukuitakisha pa fyo tubombesha?
8 Tulingile ukulabomfya fyonse ifyo twaishiba mu kubombela Lesa. Lelo tufwile ukucenjela ukuti tatuleitakisha pa fyo twaishiba. (Belengeni 1 Abena Korinti 4:6, 7.) Ku ca kumwenako, nalimo mwalishiba sana ukutendeka ukutungulula isambililo lya Baibolo. Kanshi tamufwile ukulashingashinga ukutendeka amasambililo ya Baibolo! Lelo calicindama ukulaibukisha ukuti tamufwile ukulaitakisha pa fyo mubombesha. Tutile ilyo mwalebila imbila nsuma mwalilanshenye no muntu ica kuti mwatendeka ne sambililo lya Baibolo, kabili mulefwaya ukushimikilako abo mwaba na bo mwi bumba lya mulimo. Ilyo mwaya mu kukumana kwi bumba, mwasanga nkashi alelondolola ifyacitike ifyalengele apeele umuntu magazini. Ena apeele fye umuntu magazini, imwe mwatendeke isambililo lya Baibolo. Finshi mwingacita? Nangu ca kutila namwishiba ukuti aba mwi bumba kuti batemwa nga mwabashimikilako ifyacitike, kuti mwaloleela no kwisabashimikilako inshita imbi pa kuti nkashi uwapeele umuntu magazini eumfwa kwati tapali ifyo abombele. Nga mwacita ifi, ninshi mwalangulukilako nkashi. Lelo tamulingile ukuleka ukutungulula amasambililo ya Baibolo. Mulabombesha, kanshi mulingile fye ukutwalilila ukubombesha!
9. Bushe tulingile ukulabomfya shani ifyo twaishiba?
9 Tuleibukisha ukuti fyonse ifyo twaishiba, ni Lesa e watupeela. Tufwile ukubomfya ifyo twaishiba ku kukoselesha aba bwananyina mu cilonganino, te kulafwaya ukuti aba bwananyina baletumona ukuti twalicindama. (Fil. 2:3) Icikalenga tukabe ne nsansa kulabomfya amaka yesu ne fyo twaishiba ku kulumbanya Yehova, te kulabombesha pa kuti tucile bambi nelyo ukuimona kwati twalibacila.
10. Mulandu nshi cishabela bwino ukulailinganya ku fyo bambi babomba?
10 Umuntu nga tacenjele kuti atendeka ukulinganya ifyo abomba bwino ku fyo abanankwe bashibomba bwino. Ku ca kumwenako, munyinefwe nalimo alalanda bwino sana amalyashi ya ku cintubwingi. Lelo nalimo mu mutima kuti alatontonkanya ukutila alicila munyinefwe uushilanda bwino amalyashi. Lelo ulya munyinefwe uushilanda bwino amalyashi nalimo aliba sana ne cileela, alasambilisha bwino abana nelyo alabombesha mu mulimo wa kubila imbila nsuma. Ala twalitemwa sana ifi twakwata aba bwananyina ababomfya ifyo baishiba ifyalekanalekana ukubombela Yehova e lyo no kwafwilishako bambi!
MULESAMBILILAKO KU FYO BAMBI BABOMBA
11. Mulandu nshi tulingile ukupashanishisha ifyo Yesu alecita?
11 Nangu ca kuti tatulingile ukulailinganya kuli bambi, tulingile ukulasambilila ku ba bwananyina ababombela Lesa ne cishinka. Kuti twasambililako kuli Yesu. Nangu ca kuti tatwapwililika nga Yesu, kuti twasambililako imibele iisuma iyo akwete. (1 Pet. 2:21) Nga tulemupashanya, tukaba ababomfi ba kwa Yehova abasuma kabili tukalabomba bwino umulimo wa kubila imbila nsuma.
12-13. Finshi twingasambilila ku Mfumu Davidi?
12 Mu Cebo ca kwa Lesa, mwaliba amalyashi ya baume na banakashi abengi abali ne cishinka abo twingapashanya nangu ca kuti tabali abapwililika. (Heb. 6:12) Tontonkanyeni pa Mfumu Davidi uo Yehova aitile ukuti “umuntu uo umutima wandi watemwa,” nelyo filya Baibolo imo yapilibula aya mashiwi ukuti, “umuntu uwa mibele iisansamusha umutima wandi.” (Imil. 13:22) Na lyo line, Davidi tali uwapwililika. Na kuba, alicitile imembu ishikalamba icine cine. Nangu ca kuti alicitile imembu ishikalamba, kuti twasambililako fimo kuli ena. Mulandu nshi twalandila ifi? Pantu ilyo bamulungike, tatendeke ukuipokolola. Lelo alisumine ilyo bamulungike kabili alilapiile. Ne ci calengele Yehova amweleele.—Amalu. 51:3, 4, 10-12.
13 Kuti twasambilila kuli Davidi nga tuletontonkanya pa fipusho pamo nge fi: ‘Bushe ncita shani nga banungika? Bushe ndasumina icilubo ncitile nelyo ndaipokolola? Bushe nga nalufyanya ndapeela bambi umulandu ukuti e balengele? Bushe ndabombesha ukukanabwekeshapo icilubo nacitile?’ Kuti mwatontonkanya pali ifi fipusho na lintu mulebelenga pa baume na banakashi abalembwa mu Baibolo abali ne cishinka. Bushe amafya mukwete e yo nabo bakwete? Mibele nshi iisuma iyo bakwete? Lyonse ilyo mulesambilila pali aba baume na banakashi muletontonkanya ukuti: ‘Bushe kuti nacita shani pa kuti mbe ngo yu mubomfi wa kwa Yehova uwa cishinka?’
14. Kuti twanonkelamo shani nga tulesambilila ku ba bwananyina?
14 Na kabili, kuti twasambililako na ku ba bwananyina abaice e lyo na bakalamba. Ku ca kumwenako, kuti mwatontonkanyako pa wa bwananyina uwaba mu cilonganino mwaba uuleshipikisha amafya. Nalimo abanankwe balamupatikisha ukucitako fimo ifyabipa, nalimo balupwa balamukaanya ukubombela Lesa, nelyo alilwalilila. Bushe mulamonamo imibele muli uyu uwa bwananyina iyo mwingafwaya ukupashanya? Nga muletontonkanya sana pa mibele iyo uyu uwa bwananyina akwata, cikalenga mukasambilileko fimo ifyo mwingalashipikisha amafya ayo mwingakwata. Twalitemwa sana ifi aba bwananyina bacita ifilanga ukuti baliba sana ne citetekelo pantu filalenga tulefwaisha ukulabapashanya.—Heb. 13:7; Yako. 1:2, 3.
MULESEKELELA ILYO MULEBOMBELA YEHOVA
15. Finshi umutumwa Paulo atufundile ifingalenga twatwalilila ukulasekelela ilyo tulebombela Yehova?
15 Pa kuti mu cilonganino mutwalilile ukuba umutende no kwikatana, umo umo mu cilonganino alingile ukulabombesha apo engapesha. Tontonkanyeni pa Bena Kristu abaliko mu nshiku sha batumwa. Balishibe ifyalekanalekana kabili balebomba imilimo mu cilonganino iyalekanalekana. (1 Kor. 12:4, 7-11) Lelo ifi tafyalengele mu cilonganino mwaba amalekano nelyo ukutendeka ukucimfyanya. Lelo Paulo abakoseleshe ukulacita ifyo balingile ukucita pa kuti ‘bakuule umubili wa kwa Kristu.’ Paulo alembeele abena Efese ukuti: “Cila cilundwa na co cilabomba umulimo wa ciko pa kuti umubili wikatane kabili umubili onse ulakulilako no kukoselako mu kutemwana.” (Efes. 4:1-3, 11, 12, 16) Bonse abalecita ifyo Paulo abakoseleshe balelenga mu cilonganino mwaba umutende e lyo no kwikatana. Ifi fine e ficitika na mu filonganino muno nshiku.
16. Finshi tufwile ukulafwaisha ukucita? (AbaHebere 6:10)
16 Mule-esha na maka ukukanalailinganya ku ba bwananyina. Lelo mulesambilila kuli Yesu kabili mulepashanya imibele yakwe. Mulesambililako na ku baume na banakashi abalembwa mu Baibolo abali ne citetekelo e lyo na ku ba bwananyina muno nshiku ababa ne citetekelo. Ilyo mulebombesha ukufika apo mwingapesha, muleibukisha ukuti Yehova “taba uushalungama, takalabe umulimo wenu.” (Belengeni AbaHebere 6:10.) Twalilileni ukulasekelela ilyo mulebombela Yehova kabili muleibukisha no kuti alatasha sana nga ca kuti mulebomba apapelele amaka yenu.
ULWIMBO 65 Twalilileni!
^ para. 5 Bonse kuti twasambililako ku fyo Abena Kristu banensu babomba mu mulimo wa kwa Lesa. Na lyo line tatufwile ukulalinganya ifyo tubomba ku fyo bambi babomba. Muli cino cipande twalasambilila ifyo twingatwalilila ukuba ne nsansa no kukanaba ne cilumba nelyo ukufuupulwa pa mulandu wa kuti tulalinganya ifyo tubomba ku fyo bambi babomba.
^ para. 49 UBULONDOLOSHI BWA CIKOPE: Munyinefwe ilyo ali umwaice alebombela pa Bethel. Lyena alyupile kabili atendeke bupainiya bwa nshita yonse no mwina mwakwe. Pa numa balikwete abana, alebasambilisha bwino mu mulimo wa kubila imbila nsuma. Pali ino nshita nakota, lelo alitwalilila ukubombesha mu mulimo wa kubila imbila nsuma ukubomfya amakalata.
