1. ?Wanem i givim moa glad long yumi?

 JEHOVA i wantem se yumi glad. Yumi save samting ya from we glad i wan frut blong tabu spirit. (Gal. 5:22) Man i harem gud moa taem hem i givim samting i bitim we hem i kasem samting. Yumi kasem moa glad taem yumi wok had long wok blong prij mo givhan long ol brata sista blong yumi long ol defdefren rod.—Wok 20:35.

2-3. (1) Folem Galesia 6:4, ?wanem tu samting we i save halpem yumi blong stap glad long wok blong Jehova? (2) ?Bambae yumi tokbaot wanem long stadi ya?

² Long Galesia 6:4, aposol Pol i tokbaot tu samting we i save halpem yumi blong gohed blong stap glad. (Ridim.) Faswan, yumi mas givim bes blong yumi long Jehova. Sipos yumi givim bes blong yumi long hem, bambae yumi glad. (Mat. 22:36-38) Nambatu, yumi no mas skelem yumi wetem ol narafala. Nomata wanem samting yumi naf blong mekem folem helt blong yumi, trening, o gudhan we yumi gat, yumi mas talem tangkiu long Jehova. Yes, hem nao i givim evri samting we yumi gat. Mo tu, sipos samfala oli mekem moa long sam haf long wok blong prij i bitim yumi, yumi mas glad from we oli yusum gudhan we oli gat blong presem Jehova, be i no blong leftemap olgeta. Taswe i gud yumi lanem samting from olgeta, i bitim we yumi kompit wetem olgeta.

³ Long stadi ya, bambae yumi luk samting we i save halpem yumi sipos tingting blong yumi i foldaon from yumi no save mekem moa long wok blong Jehova. Mo tu, bambae yumi tokbaot olsem wanem blong yusum gud gudhan we yumi gat blong mekem wok blong Jehova, mo samting we yumi save lanem long eksampol blong ol narafala.

4. ?Wanem i save mekem tingting blong yumi i foldaon? Talem wan eksampol.

⁴ Sam man blong Jehova oli no save mekem moa long wok blong Jehova from we oli kam olfala, o oli sik, mo hemia i mekem tingting blong olgeta i foldaon. Hemia nao samting we i hapen long Carol. Hem i bin stap prij long ples we i gat moa nid. Long ol taem ya, hem i bin mekem 35 Baebol stadi, mo hem i halpem sam long olgeta blong givim laef long Jehova mo tekem baptaes. !Carol i karem gudfala frut long wok blong prij! Be biaen hem i sik bigwan, mo plante taem hem i mas stap nomo long haos. Hem i talem se: “Mi save se from mi sik, mi no naf blong mekem samting olsem ol narafala oli mekem. Be mi harem se mi no wan gudfala Kristin olsem olgeta. Mi no save mekem evri samting we mi wantem mekem, mo hemia i mekem tingting blong mi i foldaon.” Carol i wantem mekem evri samting we hem i naf blong mekem long wok blong Jehova. !Mo blong talem stret, hemia i wan nambawan samting! Mo yumi sua se God blong yumi we i gat sore, i glad tumas long samting we Carol i mekem.

5. (1) ?Yumi mas tingbaot wanem sipos tingting blong yumi i foldaon from we yumi no save mekem moa? (2) Folem pija, ?olsem wanem brata ya i gohed blong givim bes blong hem long wok blong Jehova?

⁵ Sipos samtaem tingting blong yu i foldaon from yu no save mekem moa long wok blong Jehova, askem yu wan se: ‘?Jehova i wantem se mi mekem wanem?’ Jehova i wantem se yu mekem bes blong yu long situesen we yu stap long hem naoia. Traem tingbaot samting ya: Wan sista we i gat 80 yia i harem nogud from we hem i no save mekem moa long wok blong prij olsem we hem i bin mekem taem hem i gat 40 yia. Hem i ting se Jehova i no glad long hem, nating se hem i mekem bes blong hem. ?Be i tru se i olsem? Traem tingbaot, sipos sista ya i givim bes blong hem taem hem i gat 40 yia, mo i gohed blong givim bes blong hem taem i gat 80 yia, hemia i min se hem i neva stop blong givim bes blong hem. Sipos yumi stat blong gat filing ya se samting we yumi mekem i no naf blong mekem Jehova i glad, yumi mas tingbaot se Jehova nao i jusum samting we bambae i naf blong mekem hem i glad. Sipos yumi mekem bes blong yumi, Jehova bambae i talem long yumi se: “!Gudfala wok!”—Skelem wetem Matiu 25:20-23.

6. ?Yumi lanem wanem long eksampol blong Maria?

⁶ Bambae i isi blong yumi stap glad sipos yumi tingbaot samting we yumi naf blong mekem, i bitim samting we yumi no naf blong mekem. Tingbaot wan sista nem blong hem Maria, we hem i gat wan sik we i mekem se hem i no save mekem moa long wok blong prij. Fastaem, tingting blong hem i foldaon mo i harem se hem i nating nomo. Be biaen hem i tingbaot wan sista long kongregesen we i sik mo i stap slip nomo long bed, mo Maria i tekem desisen blong halpem hem. Maria i talem se: “Mi mekem plan blong mitufala i prij long telefon mo raetem leta. Evritaem we mitufala i wok tugeta, mi kambak long haos we mi glad tumas, mo mi haremgud se mi naf blong halpem sista blong mi.” Yumi tu yumi save kasem moa glad sipos yumi tingbaot samting we yumi naf blong mekem i bitim samting we yumi no naf blong mekem. ?Be olsem wanem sipos yumi save mekem moa, o gat gudhan blong mekem sam moa samting long wok blong Jehova?

7. ?Wanem gudfala advaes we aposol Pita i givim long ol Kristin?

⁷ Long faswan leta blong aposol Pita, hem i askem strong long ol brata sista blong oli yusum presen mo gudhan we oli gat blong leftemap tingting blong olgeta. Pita i raetem se: “God i kaen tumas, mo hem i soemaot fasin ya long plante defren rod. Hem i givim  presen long yufala wanwan we i stret long mak blong yufala. Taswe yufala i mas yusum presen ya blong mekem minista wok blong givgivhan long yufala.” (1 Pita 4:10) Yumi mas mekem bes blong yumi blong yusum gud gudhan we yumi gat long wok blong Jehova mo no wari se narafala bambae i jalus. Sipos yumi no yusum gudhan we yumi gat from yumi fraet long ol narafala, bambae yumi no save givim bes blong yumi long Jehova.

8. Folem 1 Korin 4:6, 7, ?from wanem yumi no mas flas from gudhan we yumi gat?

⁸ Yumi wantem yusum gudhan we yumi gat, be yumi mas lukaot se yumi no kam flas from. (Ridim 1 Korin 4:6, 7.) Sipos yu gat gudhan blong statem ol stadi, i gud yu yusum gud presen ya, be yu mas lukaot se yu no kam flas from. Eksampol, maet i no longtaem i pas, yu gat wan gudfala ekspiriens long wok blong prij, mo yu statem wan Baebol stadi. Yu yu wantem tumas blong tokbaot samting ya long evriwan long grup blong prij blong yu. Be taem yu joen wetem grup blong prij blong yu, wan sista i tokbaot ekspiriens blong hem se hem i seremaot wan magasin. Sista ya i seremaot wan magasin, mo yu yu statem wan Baebol stadi. ?Bambae yu mekem wanem? Yu save se sipos yu tokbaot ekspiriens blong yu, bambae evriwan long grup oli glad tumas, be maet i moa gud yu wet long wan narafala taem we i stret blong yu tokbaot ekspiriens blong yu, blong yu no spolem glad blong sista ya we i givim wan magasin. Mo hemia i soemaot se yu gat kaen fasin. Be nating se i olsem, yu no mas stop blong yusum presen we yu gat, hemia blong statem ol Baebol stadi. !Yu yu kasem wan presen, mo i gud yu yusum!

9. ?Yumi mas yusum presen we yumi gat blong mekem wanem?

⁹ I gud blong tingbaot se gudhan we yumi gat blong mekem wan samting, hemia i wan presen we i kam long God. Taswe, yumi mas yusum presen ya blong mekem kongregesen i kam strong, be i no blong leftemap yumi wan. (Fil. 2:3) Taem yumi yusum paoa mo gudhan we yumi gat blong mekem wil blong God, bambae yumi save glad from ol wok we yumi mekem, i no from we yumi gud moa long ol narafala, be from we yumi yusum presen we yumi gat blong leftemap nem blong Jehova.

10. ?From wanem i no stret blong skelem yumi wan wetem ol narafala?

¹⁰ Sipos man i no lukaot gud, hem i save skelem samting we hem i gat gudhan blong mekem wetem samting we narafala i no gat gudhan blong mekem. Eksampol, maet wan brata i stap givim ol naesfala pablik tok. Hemia samting we hem i gat gudhan blong mekem. Maet hem i ting se hem i gud moa long wan narafala brata  we i no gat gudhan blong givim ol tok. Be maet brata ya i gat gudhan blong trenem ol pikinini blong hem, singaot narafala i kam long haos, o i wok strong long wok blong prij. Yumi glad tumas we yumi gat plante brata sista we oli gat gudhan blong mekem wok blong Jehova mo halpem narafala.

11. ?From wanem yumi mas traehad blong folem eksampol blong Jisas?

¹¹ I tru, yumi no mas skelem yumi wetem ol narafala, be yumi save lanem samting from eksampol blong ol narafala man blong Jehova. Beswan eksampol we yumi save folem, hemia Jisas. Nating se yumi sinman, be yumi save lanem plante samting long ol naesfala fasin blong Jisas mo ol gudfala wok we hem i mekem. (1 Pita 2:21) Taem yumi mekem bes blong yumi blong folemgud eksampol blong Jisas, yumi kam gud moa long ol fasin blong yumi mo long wok blong Jehova we yumi mekem.

12-13. ?Yumi lanem wanem long eksampol blong King Deved?

¹² Long Baebol yumi save faenem stori blong plante gudfala man mo woman we yumi save folem eksampol blong olgeta, nating se oli sinman. (Hib. 6:12) Tingbaot King Deved, Jehova i singaot hem se “hem i wan man we i stret long tingting blong mi.” (Wok 13:22) Be Deved i no stret gud olgeta, mo tu hem i mekem sam bigfala mastik. Nating se i olsem, yumi stil save folem eksampol blong hem. ?From wanem? From we taem hem i kasem fasin stretem, hem i no traem mekem eskius. Be hem i akseptem mo i sore from mastik we hem i mekem. From samting ya, Jehova i fogivim hem.—Sam 51:3, 4, 10-12.

¹³ Yumi save lanem samting long eksampol blong Deved taem yumi askem yumi wan se: ‘?Mi mi mekem wanem taem mi kasem advaes? ?Mi mi kwik blong akseptem se mi mekem mastik o mi traem blong mekem eskius? ?Mi mi kwik blong blemem narafala? ?Mi traehad blong no moa mekem mastik ya bakegen?’ Yu save askem ol semfala kwestin ya tu taem yu ridim stori blong ol narafala man mo woman long Baebol. ?Oli fesem ol semfala problem olsem yu? ?Wanem gudfala fasin we oli soemaot? Mo yu askem yu wan se: ‘?Olsem wanem mi save folem eksampol blong gudfala man ya blong Jehova?’

14. ?Olsem wanem blong lanem samting long ol brata sista blong yumi?

¹⁴ Yumi save lanem samting tu long ol brata sista blong yumi nating se oli yangfala o olfala.  Eksampol, ?yu yu tingbaot wan long kongregesen blong yu we i stanap strong long ol traem olsem, ol fren oli pulum hem, famle i agens, o i gat problem blong helt? ?Yu yu makem ol gudfala fasin blong hem we yu wantem folem? Taem yu tingbaot gudfala eksampol blong olgeta, hemia i save halpem yu blong stanap strong long ol traem we yu fesem. !Yes yumi glad tumas long ol brata sista olsem we oli soem gudfala eksampol long fasin blong bilif!—Hib. 13:7; Jem. 1:2, 3.

15. ?Wanem advaes we aposol Pol i givim we i save halpem yumi blong gohed blong stap glad long wok blong Jehova?

¹⁵ Blong leftemap pis mo fasin joen gud long kongregesen, yumi evriwan i mas mekem bes blong yumi long wok blong Jehova. Tingbaot ol Kristin bifo, olgeta oli gat ol defdefren presen mo wok blong mekem. (1 Kor. 12:4, 7-11) Be hemia i no mekem se oli traem blong kompit o mekem oli seraot. Defren olgeta, Pol i askem olgeta blong oli mekem samting we oli naf blong mekem, blong “mekem bodi blong Kraes i kam strong moa.” Pol i talem long ol Kristin long Efesas se: “Taem olgeta evriwan oli mekem gud wok blong olgeta, samting ya i givhan long bodi blong i gru, nao ful bodi ya i kam strong long lav.” (Efes. 4:1-3, 11, 12, 16) Tede olgeta we oli mekem samting we Pol i talem, oli leftemap pis mo fasin joengud long ol kongregesen.

16. ?Yumi mas gat strong tingting blong mekem wanem? (Hibru 6:10)

¹⁶ Yumi mas gohed blong lukaot gud blong no skelem yumi wan wetem ol narafala. Be lanem samting long eksampol blong Jisas, mo traehad blong wokem ol gudfala fasin. Lanem samting long eksampol blong ol man blong Jehova long taem bifo mo tede tu. Taem yu gohed blong mekem bes blong yu long wok blong Jehova, tingbaot se Jehova i “mekem i stret nomo. Hem i no save fogetem ol wok ya.” (Ridim Hibru 6:10.) Gohed blong stap glad blong mekem wok blong Jehova from yu save se hem i glad tumas taem hem i luk we yu mekem bes blong yu blong mekem hem i glad.