1. Aha do na mambahen hita marmalas ni uhur?

 SIHOL do Jahowa ase marmalas ni uhur hita. Buah ni tonduy do malas ni uhur ai. (Gal. 5:22) Bibel mangkatahon martuahan do na mambere ase na manjalo. Halani ai, tontu malas tumang uhurta anggo ringgas hita ibagas pangidangion ampa mangurupi sanina botou.​—Lah. 20:35.

2-3. (a) Domu bani Galatia 6:4, dong dua na porlu idingat hita ase totap marmalas ni uhur ibagas pangidangion, aha ma ai? (b) Aha ma na laho iulas hita bani artikel on?

² Domu bani Galatia 6:4, Apostel Paulus patugahkon dong dua na porlu idingat hita ase boi totap marmalas ni uhur. (Basa.) Na parlobei, maningon ibere hita do na sidearan bani Jahowa. Anggo ibahen hita sonai, gabe martuah ma goluhta. (Mat. 22:36-38) Na paduahon, ulang ma ibandingkon hita dirinta pakon na legan. Ra do bahat na boi ihorjahon hita ibagas pangidangion halani sehat ope hita, mandapot pelatihan, atap adong bakatta. Tapi, halani humbani Jahowa do ganupan ai, maningon martarima kasih do hita hu Bani. Sobali ai, anggo adong hasomanta na pandeinan ibagas pangidangion, maningon dihut do homa hita marmalas ni uhur. Mase? Halani ra sidea manggunahon hapandeianni laho pasangapkon Jahowa, sedo laho pajuntul-juntulhon dirini. Jadi, ulang ma iahap hita sidea songon saingan, tapi marlajar ma humbani sidea.

³ Bani artikel on iulas hita ma sonaha ase hita lang maretek ni uhur halani lang bahat na tarhorjahon domu bani harosuhta. Ulas hita homa sonaha hita boi manggunahon hapandeianta laho mambere na sidearan bani Jahowa, janah sonaha hita boi marlajar humbani halak na legan.

4. Situasi na sonaha do na mambahen sasahalak gabe maretek ni uhur? Bere ma contohni.

⁴ Piga-piga juakjuak ni Jahowa lang boi be mangkorjahon bahat domu bani harosuhni halani domma matua atap borit-boritan. Ai ma na iahapkon si Carol. Hinan mangidangi do ia i ianan na mamorluhon bahat parbarita. Sanggah ai, dong 35 halak studini anjaha dong do sidea na domma mangondoskon diri janah ididi. Tapi i pudian ni ari, gabe borit-boritan ma ia janah maningon bahat ma ia mar-istirahat i rumah. Si Carol mangkatahon, “Hubotoh do halani naboritku on do ase lang boi bahat huhorjahon songon na ibahen halak na legan. Tapi anggo hubandingkon diringku pakon sidea, huahap ma sedo halak Kristen na ringgas be ahu. Gabe maretek ni uhur ma ahu halani lang boi bahat na huhorjahon.” Sihol uhurni si Carol mangkorjahon bahat bani Jahowa. Janah patut do ipuji haringgasonni ai! Pos do uhurta anggo Jahowa, Naibata na paridop ni uhur pasti mangkargai haringgasonni ai.

5. (a) Anggo maretek ni uhur hita halani lang tarhorjahon hita songon na hinan, aha do na porlu idingat hita? (b) Songon na ipatuduh bani gambar, sonaha sanina ai tongtong mambere na sidearan hubani Jahowa?

⁵ Anggo maretek ni uhur ham halani lang boi be ihorjahon ham ibagas pangidangion songon na hinan, rimangi ma sungkun-sungkun on: ‘Aha do na iharosuhkon Jahowa humbangku?’ Sihol do Jahowa ase hita mambere na sidearan domu bani situasinta sonari. Pingkirhon ma contoh on: Dong botou na marumur 80-an na maretek ni uhur halani lang boi be ia gati marbarita songon sanggah ia marumur 40-an. Age pe domma ibere ia na sidearan, tapi pangahapni lape sungkup ai laho pamalaskon uhur ni Jahowa. Ai tongon do ai? Pingkirhon ma on. Anggo domma ibere botou ai na sidearan sanggah ia marumur 40-an janah tong do ibere ia na sidearan sanggah ia marumur 80-an, on artini tongtong do ibere ia na sidearan. Jadi, anggo iahap hita lape sungkup na ihorjahon hita ai laho pamalaskon uhur ni Jahowa, dingat ma Ia do na manontuhon sungkup do ai atap lang. Anggo domma ihorjahon hita na sidearan, hatahonon ni Jahowa do holi, “Dear ma ai!”​—Bandingkon Mateus 25:20-23.

6. Aha do na boi iparlajari hita humbani pangalaman ni si Maria?

⁶ Lambin tambah do malas ni uhurta anggo torus ipingkirhon hita aha na boi ihorjahon hita, sedo aha na lang boi ihorjahon. Pardiateihon ma pangalaman ni Botou Maria. Halani adong naboritni, lang boi be bahat na ihorjahon ia ibagas pangidangion. Mungkahni, lungun uhurni janah pangahapni lang marguna ia. Tapi dobkonsi ai, ipingkirhon ia ma dong sada hasomanni naboru sakuriani na boritan janah maningon peak dassa i podoman. Jadi iputuskon si Maria ma laho mangurupisi. Ia mangkatahon, “Huatur ma panorang ase boi hanami rap marbarita marhitei talepon pakon manulis surat. Anggo domma salosei hanami marbarita, lambin tambah do malas ni uhurhu halani domma boi ahu mangurupi ia. Songon si Maria, lambin tambah do homa malas ni uhurta anggo torus ipingkirhon hita aha na boi ihorjahon hita, sedo na lang tarhorjahon hita. Tapi sonaha anggo bahat nari ope na boi ihorjahon, atap adong hapandeianta na marguna ibagas pangidangion?

7. Podah aha do na ibere Apostel Petrus hubani halak Kristen?

⁷ Bani suratni na parlobei, iojur Apostel Petrus do ase sanina botou manggunahon  hapandeianni laho patoguhkon hasoman sahaporsayaon. Ia manuratkon, “Marsipadear-dearan ma nasiam marhitei sibere-bere idop ni uhur na jinaloni bei songon sijolom anakkunsi na bujur.” (1 Ptr. 4:10) Ulang ma lang igunahon hita hapandeianta ibagas pangidangion halani haru uhurta dong holi na subil atap pe na maretek ni uhur. Anggo ibahen hita sonai, gabe lang ibere hita na sidearan hubani Jahowa.

8. Domu bani 1 Korint 4:6, 7, mase lang boi ipajuntul-juntul hita dirinta?

⁸ Maningon igunahon hita do ganup hapandeianta laho mangidangi Jahowa. Tapi maningon jaga do hita ase ulang pajuntul-juntulhon diri. (Basa 1 Korint 4:6, 7.) Umpamani, ra do urah iahap ham laho mamungkah parlajaran Bibel. Anggo sonai, gunahon ma hapandeianmu ai. Tapi dingat ma ulang ipajuntul-juntulhon ham ai i lobei ni halak. Bayangkon ma situasi on: Baru-baru on dong pangalamanmu na dear sanggah marbarita. Jadi marhasil ma ham mamungkah parlajaran Bibel janah lang sabar ham laho mansaritahon ai bani kalompok dinasmu. Tapi sanggah laho isaritahon ham ai, adong ma sada hasoman na mansaritahon pangalamanni, anggo ia marhasil mambagihon majallah hubani simada rumah. Aha ma na laho bahenonmu? Ibotoh ham do pasti tarojur do sanina botou anggo manangar pangalamanmu nongkan ai. Tapi ra do iputuskon ham lang saud isaritahon ham sanggah ai halani lang ra ham mambahen hasomanmu ai maretek ni uhur, halani pangahapni hurang dear pangalamanni marimbangkon ham. Dear do anggo ibahen ham sonai. Tapi ulang ma marnaloja ham laho mamungkah parlajaran Bibel. Torus ma gunahon hapandeianmu ai!

9. Sonaha ma dearni igunahon hita hapandeianta?

⁹ Anggo adong hapandeianta, dingat ma sibere-bere humbani Naibata do ai. Jadi maningon igunahon hita do ai laho patoguhkon kuria, sedo laho pajuntul-juntulhon diri. (Pil. 2:3) Gabe marmalas ni uhur do hita anggo igunahon hita gogoh ampa hapandeianta laho mangkorjahon harosuh ni Naibata. Marmalas ni uhur hita sedo halani laho patuduhkon lobihan hita marimbangkon halak na legan, tapi halani igunahon hita hapandeianta laho pasangapkon Jahowa.

10. Mase lang masuk akal anggo ibanding-bandingkon hita dirinta pakon halak na legan?

¹⁰ Anggo lang jaga hita, ra do gabe ibanding-bandingkon hita halobihanta pakon  hahurangan ni halak. Umpamani, adong ma sada sanina na jago tumang marambilan janah ai do halobihanni. Ra do nini uhurni pandeinan do ia marimbangkon sanina na lang pandei marambilan. Hape sasintongni, adong do homa halobihan ni sanina ai. Umpamani, bujur do ia marsibere-bere, pandei mangajari niombahni, atap ringgas ibagas pangidangion. Tontu malas tumang uhurta sanggah igunahon sanina botounta hapandeianni laho pasangapkon Jahowa ampa mangurupi halak na legan.

11. Mase maningon marusaha hita maniru Jesus?

¹¹ Tongon, lang boi ibanding-bandingkon hita dirinta pakon na legan. Tapi boi do hita marlajar humbani sitiruan na ibahen juakjuak ni Naibata na setia. Sada contoh na sidearan ai ma Jesus. Age pe lang gokan dear hita songon Jesus, tapi boi do itiru hita sifat-sifat ampa pambahenanni na madear. (1 Ptr. 2:21) Anggo marusaha hita maniru Jesus, lambin pandei ma hita ibagas pangidangion.

12-13. Aha do na boi iparlajari hita humbani Raja Daud?

¹² Bani Bibel bahat do isurat pasal dalahi pakon naboru na gabe sitiruan hassi pe lang gokan dear sidea. (Heb. 6:12) Umpamani songon Raja Daud, isobut Jahowa do ia ‘harosuh ni uhur-Ni’. Atap bani terjemahan Bibel na legan ihatahon, “Halak na mambahen malas uhur-Hu.” (Lah. 13:22) Tapi, lang gokan dear si Daud. Ongga do ia mangkorjahon dousa na banggal. Hassi pe sonai, gabe sitiruan do ia. Mase boi sonai? Halani sanggah ipinsang, lang marusaha ia mambela dirini. Tapi ijalo ia do pinsang-pinsang ai janah isolsoli ia do hasalahanni. Halani ai, isalpuhon Jahowa ma hasalahanni.​—Ps. 51:5, 6, 12-14.

¹³ Sanggah iparlajari ham pasal si Daud, pingkirhon ma sungkun-sungkun on: ‘Aha do na hubahen sanggah ahu ipodahi? Ai mintor huakui do hasalahanku, atap marusaha do ahu mambela diri? Ai husalahkon do halak na legan? Ai marusaha do ahu ase ulang huulaki be hasalahanku ai?’ Boi do homa ipingkirhon ham sungkun-sungkun na sisonai sanggah ibasa ham sitiruan na legan na dong ibagas Bibel. Ai sarupa do tantangan na iahapkon sidea pakon na iahapkon ham? Aha do sifat na dear na ipatuduh sidea? Dob ai sungkun ma dirimu: ‘Aha do na porlu hubahen ase boi setia songon sidea?’

14. Aha do gunani anggo irimangi hita sitiruan humbani sanina botou?

¹⁴ Boi do homa hita marlajar humbani  sanina botou i kuria, age na matua atap na maposo. Umpamani, ai adong do sanina botou i kuria na totap martahan age pe adong tantangan humbani hasoman, kaluarga, atap pe borit-boritan? Ai adong do sifat-sifat na madear na sihol itiru ham humbani sidea? Anggo ipingkirhon ham sitiruan humbani sanina botou, gabe boi ma ham totap martahan sanggah adong parlajouan. Tontu martarima kasih tumang do hita halani adong sanina botou na boi itiru hita haporsayaonni!​—Heb. 13:7; Jak. 1:2, 3.

15. Podah aha do na ibere si Paulus na boi mangurupi hita ase totap marmalas ni uhur mangidangi Jahowa?

¹⁵ Ase kuria boi totap damei janah marsada, ganup do hita maningon mambere na sidearan domu bani kesanggupanta bei. Pardiateihon ma siusihan na ibahen halak Kristen bani abad na parlobei. Marragam do tugas ampa hapandeian ni sidea. (1 Kor. 12:4, 7-11) Hassi pe sonai, lang marsaing atap pe marbolah sidea. Ipodahi si Paulus do sidea ase “pauli-ulihon daging ni Kristus in”. Isurat si Paulus do halak Kristen i Epesus sonon, “Gabe lambin magodang daging in domu hubani horja ni ganup pagori bani bagianni bei, pinauli-uli ibagas holong.” (Ep. 4:1-3, 11, 12, 16) Anggo ra sidea mandalankon podah ni si Paulus ai, gabe boi ma kuria totap damei janah marsada. Ai do homa na iahapkon hita sonari on.

16. Aha do na sihol bahenonmu? (Heber 6:10)

¹⁶ Ulang ma ibanding-bandingkon ham dirimu pakon na legan. Tapi marlajar ma humbani siusihan na ibahen Jesus janah marusaha ma maniru sifat-sifatni. Leganni ai, rimangi ma siusihan na dong ibagas Bibel ampa contoh-contoh na dong sonari on. Anggo tongtong marusaha ham mambahen na sidearan, pos ma uhurmu “sedo na geduk Naibata, gabe lupa Ia bani pambahenan nasiam”. (Basa Heber 6:10.) Jadi, tongtong ma marmalas ni uhur mangidangi Jahowa. Anjaha pos ma uhurmu maharga tumang do Bani pambahenanmu na humbani gok ni uhur laho pamalaskon uhur-Ni.