1. Jé ja ve bia benya meva’a?

 YÉHÔVA a yi na bi bo mevak. Bia yeme de amu meva’a me ne ngabe jia ya ébuma ya nsisim. (Beg. 5:22) Mbôle bia bi abui mevak éyoñ bia ve adañ éyoñ bia nyoñ, ajô te, éyoñ bia bo ésaé nkañete nya mboone a éyoñ bia volô bobejañ mevale meval, bia bi benya meva’a.​—Mam. 20:35.

2-3. (a) Bela’ane Begalate 6:4 asu na ô liti mam mebaé bi ne bo asu na bi ba’ale ava’a dangan nté bia bo Yéhôva ésaé? (b) Jé bia ye yen ayé’é di?

² E kalate Begalate 6:4, nlômane Paul wo liti bia mam mebaé me ne volô bia na bi ba’ale ava’a dangan. (Lañe’ek.) Jam ôsu, nsôñane wongan wo yiane bo na bi bo Yéhôva ésaé a ngule jangan ése. Nge bia bo nye ésaé a ngule jangan ése, bia yiane bo mevak été. (Mt. 22:36-38) Jame baa, bi nji yiane vek ésaé bia bo a ji bôte bevok. To’o ngule bi bili, mam bi nga yé’é, nge ke atyeñe mboone mam dangan da volô bia na bi bo mam méziñ, bia yiane ve Yéhôva akiba amu nnye a nga ve bia mam mese bi bili. Nde fe, nge bia yene na bobejañ béziñ be ne atyeñ adañe bia mfa’a ya taté minlañ nge wulu meyé’é, nge ke mam mefe me tii a ésaé nkañete, bia yiane vak amu ba belane atyeñe mboone mam dap asu na be ve Yéhôva duma sa ke asu mfi wop bebien. Ajô te, a lôte na bi sengane be, bia yiane jeñe na bi vu be.

³ Ayé’é di, bia zu yen avale bi ne bo nge da kui na bi bili atek amu bi nji beta kui na bi bo Yéhôva ésaé avale bia yi. Bia ye fe yen aval avé bi ne belan atyeñe mboone mam ese bi ne bi, a avale bi ne volô bôte bevok.

4. Mam mevé me ne bo na bi bili atek? Va’a éve’an.

⁴ Bobejañ a besita béziñ ba kate kui na be kañe Yéhôva avale ba yi amu be nga yômbô nge ke amu ba kon, a mam mete ma bo na be bili atek. Jam ete e nga kui Carol. A nga bi mvome ya ke su’u ésaé nkañete vôm bekañete mbamba foé ba jemban. Éyoñ a mbe wôé, a nga bo bôte 35 meyé’é, a nga volô fe abui ya été na e ve bebien ngumba be Yéhôva a duban. Ésaé nkañete jé é mbe é wumu’u fo’o abui bibuma! Mvuse ya valé, a nga fame ôkon, a ôkon ôte ô nga toé nye ébô’ô nda été. Carol a jô na: “Ma yeme na mbôle me nto nkôkon, me vo’o beta bo ésaé avale bôte bevo’o ba bo, ve ma wô’ôtan ve ane mbunane wom ô nji beta bo ngul ane mbunane wop. Me nji beta bo ngule ya bo mam mese ma yi, a jam ete da bo na me bili atek.” Ve Carol a kômbô bo Yéhôva ésaé a ngule jé ése, a nalé a ne mbamba jam! Teke bisô na Ésaa wongan a yeme tebe été bôte bevok. A ne mevak éyoñ a yene mbamba été nsisime Carol.

5. (a) Jé bi nji yiane vuan nge bia bili atek amu bia kate kui na bi bo mam méziñ? (b) Avale bi lôô fôtô, aval avé mojañ a ke ôsu a kañe Yéhôva a ngule jé ése?

⁵ Nge ô wô’ô bili atek amu ô nji beta bo ngule ya bo mam méziñ, sili’i womiene na, ‘Jé ja dañe mfi mise me Yéhôva?’ Éyalan é ne na, ô bo nye ésaé a ngule jôé ése, été ése ô tele. Tame fas éve’ane ji, sita éziñ a bili mimbu 80, a bili atek amu a nji beta bo ngule ya kañete aval a mbe a bo’o éyoñ a mbe a bili mimbu 40. A simesane na ngul ése a ve asu na a bo Yéhôva ésaé ja ve ke Nye nlem avak. Ve ye jam ete e ne été éyoñ bia tu’a fas? Éyoñ sita ate a mbe a bili mimbu 40, a mbe a kañe’e Yéhôva a ngule jé ése, a den, éyoñ a mbili mimbu 80, a ke ôsu a kañe Yéhôva a ngule jé ése, nalé a tinane na teke môs éziñ a nga si’ibi. Nge bia taté na bia wô’ôtane môs éziñ na ésaé bia bo Yéhôva é nji yian, bia yiane simesane na sa ke bia bia tyik aval ésaé Yéhôva a yene mvaé. Nge bia bo abim ésaé bi ne ngule ya bo, Yéhôva a ye jô bia na: “Ô boya mvaé!”​—Fombô’ô fe Matthieu 25:20-23.

6. Jé nkañete Maria wo ye’ele bia?

⁶ Da ye bo tyi’ibi na bi ba’ale ava’a dangan nge bia bem ôsimesane wongan mam bi ne bo, sa ke mam bi nji bo ngule ya bo. Bi tame zu kobô ajô Maria. A bili ôkon wo bo na a kate kañete aval a yi. Atata’a, jam ete e mbe e bo’o na a bili atek a na a simesane na a nji beta bo mfi. Ve a nga simesane sita éziñ a ne ébôk akônda dé, ane a nga tyi’i na a ke volô nye. A jô na: “Me nga bo nta’ane mam asu na me ke kañete a sita ate a zene ya téléfôn a bekalate. Éyoñ ése me mbe me saé a nye nsamba, me mbe me bula’ane nda me too mevak, me wô’ô mvaé na ma ke kui na me volô monyañ wom.” Ava’a dangan da ye tu’a nen éyoñ bia bem ôsimesan mam bi ne ngule ya bo, sa ke ma bi vo’o bo. Ve jé bi ne bo nge bi ne ngule ya nene ésaé bia bo Yéhôva a nge bi ne atyeñ mfa’a ya bo bisaé biziñ ékôane Yéhôva?

7. Melebe mevé nlômane Pierre ô nga ve Bekristen?

⁷ Kalate ôsu Pierre a nga tili bobenyañe bé, a nga jô be na be belane fek a atyeñe mboone mam dap asu na be volô bobenyañe bap ya nsisim. A nga jô be na: “Aval  ane môt ase a nyoñeya mvean éziñ, mi vola’ane wô miabebien, aval ane mbamba beba’ale ya mevale me mvam abui ya Zambe.” (1 P. 4:10) Bi nji yiane bo teke belan atyeñe mboone mam dangan amu bia koo woñe na bôte bé bo bia éviele, nge ke na nalé é te’e bôte bevo’o nyul. Nge mam mete ma bo bia na bi si’ibi, bia ye ke kui na bi bo Yéhôva ésaé a ngule jangan ése.

8. Aval avé 1 Becorinthien 4:6, 7 a ne volô bia na bi sa’ale éngelezek éyoñe bi bili atyeñe mboone mam éziñ?

⁸ Bia yiane belan atyeñe mboone mam dangan ése asu Yéhôva, ve bia yiane tabe ntyele ya wumulu biabebien nge ke bo éngelezek. (Lañe’e 1 Becorinthien 4:6, 7.) Éve’an é ne na, nge ô ne atyeñe mfa’a ya taté meyé’é, wo yiane belan atyeñ ete nya mbelane asu ésaé nkañete. Ve te vuane na beta nsela’ane a ne zañ e belan atyeñe mboone mam dangan, a e bo éngelezek a de. Bi tame jô na minlañ ô nga laan a môt éziñe mi nga wulu mvo’é aval é ne na, ô nga taté ayé’é a môt ate. Ô ne ôjeja’a ya kate bôte ya angôse nkañete dôé mbamba foé ate. Éyoñe mia be be mia tôban, éyoñe te sita éziñ a taté na a kañete aval avé a nga kui na a ve môt éziñe kalate mefoé. A nga ve môt kalate mefoé; wo ki ô nga taté ayé’é Kalate Zambe. Nde, wo ye bo aya? Wo yeme fo’o na angôse nkañete dôé dé bi ngule nyul éyoñe wé kañete be jam e nga kui wo. Ve ô ne tyi’i na wé kañete be de éyoñ éfe asu na sita a nga ve môte kalate mefoé a bo teke wô’ô émien éngôngol a simesane na a nji bo atyeñ ésaé nkañete ane wo. Nge ô bo de, wé liti na wo nye’e nye. Ve nalé a nji tinane na, wo ye ke beta ke ôsu a taté meyé’é. Yéhôva a nga ve wo atyeñe mboone mam, bela’ane de!

9. Aval avé bia yiane belan atyeñe mboone mam dangan?

⁹ Te bia ve’ele vuane na nge bi ne atyeñe mfa’a éziñ, a ne mveane Zambe. Bia yiane ñhe belane mvean ôte asu na bi yemete akônda Yéhôva, sa ke na bi wumulu biabebien. (Beph. 2:3) Éyoñe bia belane ngul a atyeñe mboone mam dangan asu na bi bo nkômbane Yéhôva, bia ye bi avak, sa ke amu bia kui na bi bo mam bôte bevo’o ba kate bo, nge amu na bia dañe be, ve amu bia belan mam mese bi bili asu na bi ve Yéhôva duma.

10. Amu jé e nji bo mvo’é na bi ve’e ésaé bia bo a ji bôte bevok?

¹⁰ Nge bi bo teke tabe ntyel, bi ne taté na bia ve’e mam bi ne ngule ya bo a mam  bôte bevo’o ba kate kui na be bo. Éve’an é ne na, mojañ éziñ a ne yeme bo minkañete ya mengana bôt angôndô. A ne fo’o bo atyeñe mfa’a ôte, ve nleme wé été, a ne taté na a biasé mojañ a nji yeme bo minkañete ya mengana bôt ane nye. Ve mojañ a nji yeme bo minkañete le nye a ne angôndô ya anyep, a yeme yañele bone bé, a ne fe ayôñ mfa’a ya ésaé nkañete. Ôwé, nlem ô ne bia njalan a mevak amu bi bili abui bobejañ a besita ba yeme bo mam mevale meval asu na be saane Yéhôva a bôte bevok!

11. Amu jé bia yiane jeñe na bi tôñ éve’ela Yésus?

¹¹ Akusa bo bi nji yiane ve’e ésaé bia bo a ji bebo bisaé be Yéhôva bevok, bi ne bi abui bibotan éyoñ bia jeñe na bi vu be. Ve Yésus nnye a ne mbamba éve’ela bia yiane dañe vu. A nji be a be’e metyi ya abé, ve bi ne vu mbamba mefulu mé a mimboone mié abim éziñ. (1 P. 2:21) Nge bia ve ngule jangan ése na bi tôñ éve’ela jé, bii tu’a yemete élate jangan a Yéhôva, a bii tu’a bo atyeñ ésaé nkañete.

12-13. Jé nkañete Njô bôte David ô ne ye’ele bia?

¹² Kalate Zambe a bili abui minkañete befam a binga be nga bo Yéhôva ésaé akusa bo be mbe be be’e metyi ya abé, a bi ne ngule ya vu be. (Beh. 6:12) Bi ne simesane Njô bôte David, nnye ate Yéhôva émien a nga loone na “môt a funane nleme wom.” Nkôñelane Kalate Zambe ôfe wo loone nye na “môt a ne aval ane nleme wom.” (Mam. 13:22) Ve David a nji be zôsôô ne tiññ. E nga kui na a bo beta minsem. Ve akusa bo nalé, a ne mbamba éve’ela asu dangan. Amu jé? Amu éyoñe be nga ve nye melep, a nji sôô nge jeñe na a ve mboone wé mvaé. A nga kañese melebe be nga ve nye, to’o nalé a nji be tyi’ibi. A nga jôban fe mbia be mam a nga bo nya njôbane, ane Yéhôva a nga jamé nye.​—Bs. 51:3, 4, 10-12.

¹³ Ô ne yeme vu David nge wo sili womiene na: ‘Me wô’ô bo aya éyoñe ba ve ma melep? Ye me ne avôle ya meme bikobe biam, nge na me wô’ô jeñe na me ve jame ma te bo mvaé? Ye me ne avale môte da nye’e e va’a bôte bevo’o bijô? Ye ma ve ngule ya bo teke beta bo bikobe bite?’ Ô ne sili womien avale minsili ete nté wo lañe minkañete bebo bisaé be Yéhôva mi ne Kalate Zambe été. Ye be nga tôban avale minju’u wo tôbane de den? Mbamba mefulu mevé be nga liti? Éyoñ ése  wo mane lañe nkañete mbo ésaé Yéhôva éziñ, sili’i womiene na: ‘Aval avé me ne tu’a vu mbo ésaé Yéhôva nyi?’

14. Aval avé éve’ela bobejañ a besita bangan é ne volô bia?

¹⁴ Bi ne fe yé’é abui mam éyoñe bia fombô bobejañ a besita bevok, ba be ne bisoé a ba be ne minnôm. Ô ne simesane mojañ nge sita éziñe ya akônda dôé a wulu ba’aba’a a Yéhôva akusa bo a tôbane minju’u nda bôte jé, nge sikôlô, nge na a ne ntutuñ. Ye a bili mbamba mefulu méziñ wo kômbô bi? Nge wo tu’a fase mbamba éve’ela a liti, ô ne yene bone be mam be ne volô wo na ô jibi minju’u wo tôbane mie. Bi ne angôndô ya mevak amu bi bili bobejañ a besita ba liti bia mbamba éve’ela mfa’a ya mbunan!​—Beh. 13:7; Jc. 1:2, 3.

15. Melebe me Paul mevé me ne volô bia na bi ke ôsu a ba’ale ava’a dangan ésaé Yéhôva?

¹⁵ Môt ase ya be bia a yiane saé a ngul ése asu ya na mvo’é a élat bi tabe akônda été. Bi tame kobô ajô Bekristene ya ntete mimbu ôsu. Be mbe be bili mimvean a mimbe’e mevale meval. (1 Bec. 12:4, 7-11) Ve jam ete e nji soo nkandane mengam a mesengane zañe jap. Paul a nga lebe be na môt ase a bo mam ma sili asu na a “lôñ nyôle Krist.” Paul a nga tili fe Bekristene ya Éphèse na: “Aval ane ébu’a ése ja bo ésaé abim da yian, ja yale nyô a nlôñan ja lôñ ébien nye’an été.” (Beép. 4:1-3, 11, 12, 16) Bekristene be nga bo nalé be nga soo mvo’é a élat akônda été, avale bi lôô mekônda ya den.

16. Ntyi’an ôvé wo nyoñ? (Behébreu 6:10)

¹⁶ Nyoñe’e ntyi’ane ya bo teke ve’e ésaé wo bo Yéhôva a ji môte mfe. Ajô te, tuka’a fombô mbamba éve’ela Yésus a nga li’i bia, a jeñe’e na ô vu mefulu mé. Jeñe’e fe na ô vu bebo bisaé be Yéhôva ya melu mvus a ba ya melu ma. Nté wo ke ôsu a bo Yéhôva ésaé a ngule jôé ése, tabe’e ndi na a “nji bo ékotekote ya vuan ésaé [jôé].” (Lañe’e Behébreu 6:10.) Kele’ ôsu a yen avak ésaé wo bo Yéhôva, ô too ndi na Yéhôva a wô’ô mvaé éyoñe bia bo nye ésaé a nleme wongan ôse.