1. Weh gi wi lata jai?

 JEHOAVA waahn mek wi bee hapi. Wee noa dat bikaaz jai da wan a di froot weh di hoali spirit bayr eena wi. (Gal. 5:22) Sins wi feel moa hapinis wen wi giv tu adaz dan wen wi geh tingz fahn dehn, wi feel wahn lata jai wen wi werk haad eena di minischri ahn wen wi help wi bradaz ahn sistaz eena eni way wi kud.—Aks 20:35.

2-3. (a) Laik weh Galayshanz 6:4 menshan, wat da too tingz weh ku help wi ga lata jai eena wi servis tu Jehoava? (b) Weh wi wahn diskos eena dis aatikl?

² Eena Galayshanz 6:4, di apasl Paal menshan too tingz weh ku help wi ga lata jai. (Reed.) Fers, wi goal shuda bee fi gi Jehoava wi bes. If wi di giv ahn wi bes, wi shuda bee hapi. (Mach. 22:36-38) Sekant, wi noh fi kompyaa wiself wid adaz. Wi shuda aalwayz gi tanks tu Jehoava fi wateva wi helt, chraynin, er skilz alow wi fi du bikaaz evriting weh wi gat kohn fahn hihn. Pahn di ada han, if adaz di du moa dan wi eena di minischri, wi shuda feel hapi dat dehn di yooz dehn skilz fi prayz Jehoava ahn noh fi mek dehnself luk beta dan adaz er fi ada selfish reezn. Soh insteda kompeet wid dehn, wi shuda laan fahn dehn.

³ Eena dis aatikl, wi wahn si weh ku help wi if wi feel diskorij bikaaz wi kyaahn du az moch az wi wuda waahn du. Wi wahn aalso si how wi ku yooz di skilz weh wi gat ahn how wi ku laan fahn ada peepl egzampl.

4. Weh ku mek sohnbadi feel diskorij? Yooz di egzampl eena di paragraaf.

⁴ Som a wi feel diskorij wen wi kyaahn du az moch az wi wuda waahn du eena Jehoava servis bikaaz wi di geh oalda er wi sik. Dat da weh mi hapm tu Carol. Shee mi ga di privilij fi preech eena wahn ayrya weh mi need lata help. Wail shee mi dehdeh, shee mi kandok 35 Baibl stodiz an ih mi help wahn lata dehn fi dedikayt dehn laif tu Jehoava ahn geh baptaiz. Carol mi ga wahn lata sokses eena di minischri! Bot afta wahn wail, ih mi staat tu ga helt prablemz ahn moas a di taim ih mi haftu stay hoam. Carol seh: “Bikaaz a mi helt prablemz, Ah kyaahn du weh adaz ku du, an Ah feel laik Ai da noh wahn gud Kristyan laik dehn. Ah kyaahn du evriting weh Ah waahn du, ahn dis mek Ah feel diskorij.” Carol waahn du evriting weh shee kud fi Jehoava. Dat da wahn veri gud egzampl! Wi ku bee shoar dat wi lovin Gaad hapi wid Carol bikaaz shee di giv ahn ih bes.

5. (a)Weh wi fi memba wen wi feel diskorij bikaaz wi kyaahn du weh wi wuda waahn du? (b)Laik weh di picha dehn shoa, how di brada kantinyu gi Jehoava ih bes?

⁵ If yoo feel diskorij bikaaz yu kyaahn du evriting weh yu wuda waahn du, aks yuself, ‘Weh Jehoava waahn mek Ai du?ʼ Hihn waahn yu giv ahn yu bes, noh mata wat da yu sichuwayshan. Tink bowt dis: Wahn sista weh deh eena ih 80ʼs feel diskorij bikaaz shee kyaahn du az moch az ih waahn an az moch az ih yoostu du wen ih mi eena ih 40ʼs. Shee feel laik Jehoava noh hapi wid ahn eevn doa shee di giv ahn ih bes. Bot yu tink dat da chroo? Tink bowt it. If di sista mi gi Jehoava ih bes wen ih mi deh eena ih 40ʼs ahn shee stil di giv ahn ih bes now dat shee deh eena ih 80ʼs, dat meenz dat shee neva did stap giv ahn ih bes. If wi staat tu feel laik wi noh di du inof fi pleez Jehoava, wi need fi memba dat da hihn disaid weh pleez hihn, noh wee. If wi du wi bes, Jehoava wahn bee veri hapi wid wi!—Kompyaa Machyu 25:20-23.

6. Weh wi ku laan fahn Sista Maria egzampl?

⁶ Ih wahn bee eeziya fi mek wi ga moa jai if wi foakos pahn weh wi kud du insteda foakos pahn weh wi kyaahn du. Tink bowt Sista Maria. Shee ga wahn helt prablem weh mek shee kyaahn du wahn lat eena di minischri. Fers, shee mi feel dipres ahn yoosles. Bot den shee mi tink bowt wahn sista eena di kangrigayshan weh mi sik ahn weh kudn kom owta ih bed. Soh shee mi disaid fi help ahn. Maria seh: “Ah mi mek araynjments fi du foan witnisin ahn leta raitin wid di sista. Evri taim wi mi werk tugeda, Ah wuda kohn bak hoam di feel hapi bikaaz Ah kuda mi help mi sista.” Wee ku du di sayhn ting ahn ga moa jai wen wi foakos pahn weh wi ku du insteda weh wi kyaahn du. Bot wat if wi ku du moa er if wi ga wahn skil weh wi ku yooz eena Jehoava servis?

7. Weh kongsl di apasl Peeta mi gi Kristyanz?

⁷ Eena di fers leta weh di apasl Peeta mi rait, ih tel ih bradaz fi yooz wateva gif ahn skilz dehn mi ga fi inkorij dehn bradaz ahn sistaz. Dis da weh Peeta mi seh: “Unu da gud servants, ahn bikaaz a Gaad grayt kainis, eech wan a unu mi geh  wahn gif, soh yooz it fi serv wan anada.” (1 Peet. 4:10) Wi noh fi hoal bak fahn yooz wi gif jos bikaaz wi frayd dat adaz mait geh jelos er geh diskorij. If wi du dat, den wi noh wahn di gi Jehoava wi bes.

8. Akaadn tu 1 Korintyanz 4:6, 7, wai wi noh fi boas bowt wi gif dehn?

⁸ Wi need fi mek shoar dat wi mek gud yoos a wi gif dehn, bot wi haftu bee kyaaful dat wi noh boas bowt dehn. (Reed 1 Korintyanz 4:6, 7.) Fi egzampl, yu mait bee reeli gud wen ih kohn tu staat Baibl stodiz. Noh hoal bak fahn yooz da gif! Bot wen yu yooz da gif, ih impoatant fi noh boas bowt it. Sopoaz yu ga wahn nais ekspeeryens bowt wahn Baibl stodi weh yu staat op ahn yu eksaitid fi tel yu servis groop bowt it. Bot wen yu meet op wid di groop, wahn sista di taak bowt how shee mi aybl fi gi wahn magazeen tu sohnbadi. Soh now, shee mi gi wahn magazeen ahn yoo mi staat op wahn Baibl stodi. Weh yu wahn du eena dis kays? Yu noa dat yu ku inkorij di groop if yu tel dehn bowt yu ekspeeryens, bot yu mait disaid fi wayt wahn nada taim fi tel dehn bowt it bikaaz yu noh waahn mek di sista feel laik if shee noh az gud az yoo eena di minischri. Dat wuda bee di kain ting fi du. Bot mek shoar yu noh stap aafa Baibl stodiz. Yoo ga wahn gif, soh yooz it!

9. How wi shuda yooz wi gif dehn?

⁹ Wi waahn memba dat eni skil wi mait ga da wahn gif fahn Gaad. Wi shuda yooz dehndeh gif fi bil op wi bradaz ahn sistaz, noh fi mek wiself luk gud. (Fil. 2:3) Wen wi yooz wi enerji ahn wi skilz fi du Gaad wil, wi wahn ga lata reezn fi bee hapi, noh bikaaz wi du moa dan adaz er bikaaz wi di chrai bee beta dan dehn, bot bikaaz wi di yooz wi gif dehn fi prayz Jehoava.

10. Wai ih noh mek sens fi mek wi kompyaa wiself tu adaz?

¹⁰ If wahn persn noh kyaaful, ih mait kompyaa sohnting weh hihn gud pan wid sohnting els weh wahn nada persn noh gud pan. Fi egzampl, wahn brada mait gi sohn veri gud poblik taak. Dat da weh hihn gud pan. Bot hihn mait tink dat hihn beta dan wahn nada brada weh schrogl fi gi wahn taak. Bot da brada mait bee gud eena ada tingz. Maybi ih jenaros, ih gi gud chraynin tu ih pikni, an ih lov di minischri. Wi soh tankful dat wi ga lata bradaz  ahn sistaz weh yooz dehn gif fi serv Jehoava ahn fi help adaz!

11. Wai wi shuda chrai fala Jeezas egzampl?

¹¹ Eevn doa wi noh fi kompyaa wiself wid adaz, wi ku stil laan wahn lat fahn Jehoava servants weh faytful. Jeezas da di bes egzampl wi ku laan fram. Wee noh perfek laik hihn, bot wi ku stil laan fan ih byootiful kwalitiz ahn di wandaful tingz weh hihn mi du. (1 Peet. 2:21) Wen wi du wi bes fi fala Jeezas egzampl, wi geh fi bee beta servants a Jehoava ahn wi du beta eena di minischri.

12-13. Weh wi ku laan fahn King Dayvid?

¹² Di Baibl gat een sohn gud egzampl a faytful man ahn uman weh wi ku fala eevn doa dehn noh perfek. (Heeb. 6:12) Tink bowt King Dayvid. Jehoava mi kaal ahn ‘wahn man weh pleez ih haat.ʼ (Aks 13:22) Bot stil, Dayvid neva perfek. In fak, hihn mi mek sohn seeryos mistayk. Eevn soh, hihn da stil wahn gud egzampl fi wi. Wai? Bikaaz wen hihn mi geh kongsl, ih neva chrai mek ekskyoos fi weh ih mi du. Insteda dat, ih mi aksep di schrang kongsl weh dehn mi giv ahn, an ih mi reeli sari fi weh ih mi du. Ahn bikaaz a dat, Jehoava mi fergiv ahn.—Ps. 51:3, 4, 10-12.

¹³ Wi ku laan fahn Dayvid if wi aks wiself: ‘How Ai ak wen Ah geh kongsl? Ai admit wen Ah rang, er Ah chrai mek ekskyoos? Ai kwik fi blaym adaz? Ai chrai haad fi noh mek di saym mistayk?ʼ Yu ku aks yuself simila kweschanz wen yu reed bowt di egzampl a sohn faytful man ahn uman eena di Baibl. Yu tink dehn gaahn chroo simila prablemz laik weh yoo di goh chroo? Weh gud kwalitiz dehn mi shoa? Eena eech sichuwayshan, aks yuself: ‘How Ai ku bee moa laik dis faytful servant a Jehoava?ʼ

14. How wi benifit fahn weh wi laan fahn wi bradaz ahn sistaz?

¹⁴ Wi ku benifit wen wi laan fahn wi bradaz ahn sistaz, weda dehn yong er oal. Fi egzampl, yoo ku tink bowt enibadi eena di kangrigayshan weh di bayr op anda wahn chraiyal? Maybi dehn di goh chroo pyaa presha, maybi dehn famili deh gens dehn bikaaz dehn serv Jehoava, er dehn mait ga helt prablemz. Yoo wuda waahn kapi di gud egzampl weh da brada er sista shoa? Wen wi luk pahn fi dehn egzampl,  wi laan how wi ku bayr op anda wi oan chraiyalz. Wi soh tankful dat wi ga bradaz ahn sistaz weh set wahn gud egzampl a how fi ga schrang fayt!—Heeb. 13:7; Jay. 1:2, 3.

15. Weh kongsl di apasl Paal mi gi wi weh ku help wi kantinyu ga jai wen wi di serv Jehoava?

¹⁵ Fi mek wi ku ga pees ahn yooniti eena di kangrigayshan, eech wan a wi haftu du wi bes. Tink bowt di Kristyanz weh mi liv eena di fers senchri. Dehn mi ga lata skilz ahn difrent rispansabiliti. (1 Kor. 12:4, 7-11) Bot dat neva mek dehn kompeet er fait wid wan anada. Insteda dat, Paal mi inkorij eech wan a dehn fi du weh dehn mi need fi du “fi schrentn di badi a di Krais.” Paal mi tel di Kristyanz da Efisos: “Wen eech paat a di badi werk eena di rait way, dat wahn help di badi groa soh dat di hoal badi wahn bee schrang eena lov.” (Ifee. 4:1-3, 11, 12, 16) Dehn wan weh mi du weh Paal seh mi shoa dat dehn waahn ga pees ahn yooniti eena di kangrigayshan. Ahn dehndeh da kwalitiz weh wi bradaz ahn sistaz shoa eena wi kangrigayshan dehn tudeh.

16. Weh wi shuda mek op wi main fi du? (Heebrooz 6:10)

¹⁶ Mek op yu main fi noh kompyaa yuself wid adaz. Insted, laan fahn Jeezas ahn du yu bes fi kapi fi hihn kwalitiz. Laan fahn di gud Baibl egzampl dehn a faytful man ahn uman ahn fahn di gud egzampl a bradaz ahn sistaz eena fi wee taim. Az yu kantinyu du yu bes, yu ku bee shoar dat Jehoava “da wahn raichos Gaad ahn hihn noh wahn ferget di lov weh [yu] shoa fi ih naym.” (Reed Heebrooz 6:10.) Kantinyu ga jai wen yu di serv Jehoava, an aalwayz memba dat hihn hapi wen ih si yu di giv ahn yu veri bes.