1. Ka adügübei lun gunda wamá?

 BUSENTI Heowá lun gunda wamá. Subudi wamuti ítara liña lan ladüga aban lan igaburi lídangiñeti igaburi le líchugubei sífiri ugundani (Gal. 5:22). Ani, kei gúndaatima lan le íchugubei sügǘ lau le eresibirubei, buiti wasandiragun woungua dan le beresegu wamá lidan wani ministeriu luma dan le wíderaguniña wíbirigu (Adü. 20:35 Lererun Bungiu to lánina Iseri Daradu).

2, 3. a) Lau gabaroun wamani le lariñagubei Galasiana 6:4, kaba íderaguawa lun meferidirun wamani wagundan? b) Kaba wakutiha lidan aturiahani le?

² Kaba íderaguawa lun meferidirun wamani wagundan? Ayanuhati apostolu Pábulu luagu biama katei le gayaraabei líderaguniwa ibihei. Darí wamuti lidan Galasiana 6:4 (aliiha huméi). Furumiñe, anihein resun wama lun wagundaarun luagu le wadügübei lidan weseriwidun lun Heowá anhein wíchiga sun le buídutimabei wámagiñegua lun. Ani sun wagía ligía lunbei wadügüni (Mat. 22:36-38). Libiaman, moun lumuti wagoubaguagüdüni le wadügübei luma le hadügübei amu. Anhein ígira wátuadi, le furendei wamaalibei luma iarani le wawagubei lun wadügün aban katei buiti, ru wama seremei lun Heowá, luagu sun katei le, lugundun ligía íchugubalin woun. Ligíati, anhein anihein lubéi somu íbiri funrendeitimati wawéi ani chubaluguti lidan somu dasi lánina ministeriu, gundaarügü wamá luagu layusuruñein lan iarani burí le lun lalawahani Heowá, mama lun lasagarun buiti lungua ni lun lapantahan. Lubaragiñe wasandiragun woungua buídutima wamá hawéi amu, lunti wafurendeirun hámagiñe.

³ Lidan aturiahani le, warihuba kaba lan íderaguawa lun mábürühan lan warüna anhein wariha siñá lan wadügüni sun le wabusenrubei lidan weseriwidun lun Heowá. Wakutihabei giñe ka lan gayaraabei wadügüni lun wayusuruni furumiñeguarügü iarani le  wawagubei buidu luma ka lan gayaraabei wafurendeirun hámagiñe amu.

4. Kaba hamuga adüga lun lábürühan warüna? Ayanuha humá luagu le asuseredubei tun Karol.

⁴ Añahein íbirigu aba lábürüha harüna ladüga harumudiri o luriban hátuadi siñá hadügün saragu kei habusenrun lidan heseriwidun lun Heowá. Ligía asuseredubei tun aban íbiri gíritu Karol, to meha eseriwiduboun luagu aban dan lidan aban fulasu le ñein lubéi mégeiwa hamá apurichihatiña. Rutu aturiahatu houn 35 gürigia ani íderaguatu saragu lun hederegeruni habagari lun Heowá luma lun habadiseirun. Ma meha lubuidun lidin tun! Gama lumoun, ábati tasandirun ani aba lásiñarun táfuridun túbiñegiñe. Ariñagatu: “Ladüga luriban nátuadi siñaali nadügüni libe le hadügübei amu. Íbini ítara, sanditina múaragun nan kei ha híbiri íbirigu. Nageindaguña luma le nabusenrubei nadügün luma le gayara nubéi adüga. Adügati katei le lun lábürühan narüna”. Busentu meha Karol tadügüni sun tiarati luagu Heowá, ani buiti meha katei le. Chouru wamuti gebegi lan lubuidun áfaaguni le tadügübei lun Bungiu, ladüga gudemehabu lan.

5. a) Ka lunbei waritaguni dan le lábürühan warüna ladüga siñá lan wadügüni sun le wabusenrubei lidan weseriwidun lun Bungiu? b) Ida liña líchuguni íbiri le tídanbei iyawaü to lídanboun aturiahani le, sun le buídutimabei lúmagiñegua lun Heowá?

⁵ Anihein dan sanditiwa lábürühan warüna ladüga siñá lan wadügüni sun le wabusenrubei wadügün, álügüdagua wamá woungua: “Ka lagurabubei Heowá númagiñe?”. Agurabati lun wíchuguni le buídutimabei wámagiñegua lun, mini lan le wadügüni sun wayaraati lidan weseriwidun lun según le gaganbadiwa. Samina humá luagu sügǘ le. Aban íbiri to barüharu 80 irumu aba lábürühan tarüna ladüga siñá lan tagunfulirun lau tani ministeriu kei meha tadügüni dan le 40 lubéi meha irumu tau. Saminatu íbini lan tíchuguñein lan sun tíarati lun Heowá laganóun tun magundan lan tau. Inarüni funa san lira? Ariha waméi. Anhein ru tubalin íbiri to le buídutimabei tumagiñegua lun Heowá dan meha le 40 lubéi irumu tau ani anuhamémegua adügei lau 80 hali lan irumu tau, le linarün katei anuhagua íchigei le buídutimabei tumagiñegua lun. Ánhawa agumesera asaminara lougua lan le wadügübei lun wagundaaragüdüni Heowá, haritagua waméi ligía lan anúadirubalin le aubei lagundaara lumoun le aubei magundan lan. Anhein wíchiga le buídutimabei wámagiñegua lun, lariñaguba woun: “Buiti badüga” (Ariha huméi giñe Matéu 25:20-23).

6. Ka larufudahabei tani María hénpulu woun?

⁶ Aban katei le gayaraabei líderaguniwa lun gunda wamá wetenirun lun katei le gayara wabéi adüga lubaragiñe wetenirun lun le siñá wabéi adüga. Ariha waméi le asuseredubei tun María, aban íbiri ladüga sandi siñá tadügün saragu lidan ministeriu. Adügati katei le lun tasandirun aban óunwenbu íruni ani aba tasaminarun mebegi tan ni kata. Gama lumoun, aba tíchugun fe luagu anuhóun lan meha aban íbiri lidan damuriguaü to sánditimaatu tuéi. Ábati tálügün tíderagunu. Ariñagatu María: “Aba nadügün aransehani lun nidin túbiñe lun wapurichihan luéigiñe gágamuru luma abürüha gárada. Súnwandan meha nagiribudun núbiñoun gúndaañu ladüga gayara lan níderagunu níbiri”. Gayaraati giñe gúndaatima wamá dan le wetenirun lun le gayara wabéi adüga lubaragiñe wetenirun lun le siñá wabéi adüga. Kábati asusereda anhein gayara lubéi: waganwoundagüdüni weseriwidun o anihein lan somu iarani wawagun le gayaraabei wayusuruni lidan ministeriu?

7. Ka adundehani buiti líchugubei apostolu Féduru houn kristiánugu?

⁷ Tidan furumiñetu gárada to labürühaboun apostolu Féduru lau ladundehan sífiri sandu,  ruti adundehani houn líbirigu lun hayusuruni furumiñeguarügü iarani o subudi le hawagubei lun híchugun gurasu houn hábirigu. Abürühati: “Keisi óunigirutiña buítiña buidu lan hóuseruni luwuyeri idewesei le heresibirubei lúmagiñe Bungiu. Yusuléi kada aban lun leseriwidun houn amu” (1 Fe. 4:10). Siñati weredehani layusurun iarani le wawagubei buidu ladügarügü wanufude luéi hagimugaruniwa amu o luéi lábürühan harüna. Anhein hamuga wadüga lira, mama hamuga wíchuguñein le buídutimabei wámagiñegua lun Heowá.

8. Kei lariñaguni 1 Korintuna 4:6, 7, ka uagu moun lumuti lubéi wapantahan lau iarani le wawagubei?

⁸ Inarüni lunti lan wayusuruni iarani le wawagubei buidu, gama lumoun, mosu góunigi wamá lun mapantahan wamá lau (aliiha waméi 1 Korintuna 4:6, 7). Kei hénpulu, gayaraati buidu lan lidin hun lun hadarirun gürigia ha busentiña haturiahanu Bíbülia. Anhein ítara liña lubéi ítarameme humá adügei! Lau sun lira, aban katei wayusuruni iarani le wawagubei amu katei wapantahan lau. Samina humá buidu lan Iidin hun lidan hani ministeriu ladüga aba lan hatatirun aban aturiahani tídangiñeti Bíbülia luma somu gürigia. Ani busentün habahüdaguni houn íbirigu ha áfuridubaña apurichiha weyu ligía. Danti le hóundarun hamoun íbirigu, aba haganbun anuha lan aban íbiri abahüdagua ida liña lan lidin tun ani ígira tan aban garüdia tun aban gürigia. Íbiri tuguya ígiratu aban garüdia, ánheinti huguya aba hatatirun aban aturiahani tídangiñeti Bíbülia. Kaba hamuga san hadüga? Subudi humuti anhein lan habahüdagua ida liña lan lidin hun hagundaaruba lan íbirigu, gama lumoun ábanti mabahüdahan humani weyu ligía luéi hagidaruni tugundan íbiri tuguya. Ma lubuidun igaburi le harufudubei! Lau sun lira, sigí huma áluahaña gürigia ha busenbaña haturiahanu Bíbülia. Anihein aban iarani huagu, yusu huméi.

9. Ida luba hamuga wayusuruni iarani le wawagubei?

⁹ Haritagua waméi furumiñeguarügü lan iarani le wawagubei, Bungiu íchugubalin woun. Ligíati yusu waméi iarani le lun wíchugun gurasu houn lílana damuriguaü, mama lun wapantahan (Fili. 2:3). Ruti ugundani woun dan le wayusuruni were luma iarani le wawagubei lun wadügüni lugundan Bungiu. Ka uagu? Ladüga wayusuruñein lan sun le wámabei lun walawahani Heowá, mama lun warufudagun woungua buídutima wamá hawéi ha híbiri ni lun wadügün lun hasandirun iñu wamá hawéi.

10. Ka uagu mabuidun lubéi wagoubaguagüdüni le gayara wabéi adüga lumoun le hadügübei ha híbiri?

¹⁰ Ánhawa móunigi, gayaraati wéiguadun tidoun sádara lau wasaminarun buidu wamá lidan  ítaga katei sügǘ hau amu. Ru wamá aban hénpulu. Másiñati buidu lan aban íbiri lidan lichugún yanu. Ligía iarani luágubei. Gama lumoun gayaraati íñugu lan lasandiragun lungua luéi amu íbiri le güreweibei lun líchugun aban yanu. Lau sun lira, íbiri le güreweibei lun líchugun yanu gayaraati buidu lan lidan amu katei, gayaraati gapurichihadi lan íbiri le lau ubebeni, o geresibiradi lan houn gürigia lúbiñe, ani gayaraati giñe agüriaha lániña lirahüñü buidu. Rútiwa seremei luagu añahein lan saragu íbirigu dandu wügüriña kei würiña ha ayusurubalin iarani le hawagubei lun heseriwiduni Heowá luma lun híderagun amu íbirigu.

11. Ka uagu lunti lubéi wáfaagun lun wáyeihani Hesusu?

¹¹ Íbini wuriba lan wagoubaguagüdüni le gayaraabei adüga lumoun le hadügübei amu, furendeitiwa saragu dan le wetenirun lun hani amu lubúeingu Heowá hénpulu. Samina wamá ka lan lunbei wafurendeirun lídangiñe lubuidun hénpulu le lígirubei Hesusu. Íbini mítaran wamá kei Hesusu, gayaraati wafurendeirun lídangiñe lubuidun ligaburi luma ligaburi lóuserun (1 Fe. 2:21). Anhein wadüga sun wayaraati lun wáfaagun lun wáyeihani lau úaraguni, buídutimabadiwa kei lubúeingu Heowá ani buídubei lidin woun lidan wani ministeriu.

12, 13. Ka wafurendeirubei lúmagiñe urúei Dawidi?

¹² Ayanuhatu Bíbülia hawagu saragu wügüriña hama würiña ha arufudubaña aba buiti hénpulu woun íbini chará hamá (Ebü. 6:12). Urúei Dawidi aban hádangiñe. Ariñagati Heowá luagu: “Darina Dawidi […] aban wügüri le aubei nagundaara” (Adü. 13:22). Aban meha wügüri charati Dawidi. Adügati meha fiu charati wéiriti. Lau sun lira, ígirati aban buiti hénpulu woun. Ka uagu? Ladüga dan le lererehounbei lun, málugunti laricharaguagüdüni lidurun. Lubaragiñe lira, ánhati lun lidurun ani aba lasakürihan tídangiñe sun lanigi luagu charati le ladügübei. Ligíati feruduna lubalin Heowá (Sal. 51:3, 4, 10-12).

¹³ Gayaraati líderaguniwa lani Dawidi hénpulu dan le wadügün álügüdahani kéiburi le: “Ida liña nóunabun dan le lererehóuniwa nun? Ánhatina san lun nichara dan le lererehóuniwa nun o álugatina naricharaguagüdüni nidurun? Ru numuti san duru hawagun amu lau lóufudagun? Áfaaguatina san lun madügün nani ligiaméme charati?”. Adüga wamá álügüdahani libe burí le wóuniwagua dan le waturiahani habagari wügüriña hama würiña úaraguatiña ha lánina tidaani Bíbülia. Gagibuguatiña san luma lénrengunga libe le wásügürübei? Ka lubuidun igaburi harufudubei? Lidan kada kesi, álügüdagua  wamá woungua: “Ida luba ítara nan kei lubúein Heowá úaraguati le?”.

14. Ka buiti wasagarubei dan le wetenirun lun hani amu íbirigu hénpulu?

¹⁴ Gayaraati giñe wafurendeirun saragu katei hámagiñe wábirigu, dandu nibureintiña kei derebuguhaña. Másiñati wasaminarun luagu somu íbiri le lílana damuriguaü le agagibudagubei luma óuchawaguni kéiburi luriban átuadi, hadügüdarun nibureintiña luagu o hadügüdarun liduheñu luagu. Arufudati san íbiri ligía igaburi buiti le hamuga gayaraati wáyeihani? Ánhawa etenira lun lani hénpulu, wafurendeiruba katei le lunbei líderaguniwa agagibudagua luma waturobulin. Ma wéiriti lebegi lubuidun burí hénpulu le lánina afiñeni le woun? Chóuruti adüga lan hénpulu burí le, lun wagundaarun (Ebü. 13:7; Sant. 1:2, 3).

15. Ka adundehani lúmagiñeti apostolu Pábulu lunbei líderaguniwa lun wasigirun eseriwida lun Heowá lau ugundani?

¹⁵ Ánhawa áfaagua sun wagía lun wíchuguni le buídutimabei wámagiñegua lun Heowá, lídehaba lun ñein lan darangilaü luma úarani lidan damuriguaü. Ligía hadügübei kristiánugu ha lánina furumiñeti sígulu. Ámuñegueinarügüti meha iarani le hawagubei luma buligasion le íchugubei houn (1 Ko. 12:4, 7-11). Gama lumoun mama lun hasandiragun houngua buidu hamá hawéi ha híbiri ni lun hadügün lun ñein lan fánreinguaü. Lanwoun lira, ariñagati Pábulu houn Éfesuna tidan gárada to lóunahaboun houn lun lan houchun kada aban lun hadügüni sun hayaraati “lun hederebudagüdüni lúgubu Kristu”. Ani ariñagayati: “Ítara luba gayara lan wawanserun súngubei lidan wéibugun luma Kristu, awanse wagíame lidan ínsiñeni” (Efe. 4:1-3, 11, 12, 16). Lau hadügüni le ídehatiña lun ñein lan darangilaü luma úarani, igaburi le warihubei lidan damuriguaü uguñe weyu.

16. Ka aranseñu hubéi lun wadügüni? (Ebüréu 6:10).

¹⁶ Áfaagua humá lun magoubaguagüdün humani le gayaraabei hadügüni lumoun le hadügübei amu. Lubaragiñe lira, teni humá lun ligaburi Hesusu ani áfaagua humá lun háyeihani. Furendei humá lídangiñe afiñeni le harufudubei lubúeingu Bungiu ha lánina binadu dan luma le harufudubei ha lánina wadaani. Ítarameme humá íchigei le buídutimabei lun Heowá, lugundun ariñagati “richaguati Bungiu ani mabulieidun lubéi le adüga humaalibei” luagu (aliiha huméi Ebüréu 6:10). Ítarameme humá eseriwida lun Heowá lau ugundani, lau hasubudiruni gunda lan lau áfaaguni le hadügübei lun hagundaaragüdüni.