1. Cosa kanaton ta hace bien alegre?

 QUIERRE si Jehova que queda kita alegre. Sabe se kita cay el alegria amo un aspeto del fruta del sagrao espiritu. (Gal. 5:22) Ciendo tiene mas grande alegria na dalida contra na ricibida, ta queda gayot kita alegre si ta hace kita el todo na diaton ministerio y si ta ayuda con el diaton maga hermano na diferente manera.​—Act. 20:35.

2-3. (a) Como cosa ya habla na Galacia 6:4, cosa el dos cosas que puede ayuda kanaton para esta alegre na servicio con Jehova? (b) Cosa kita considera na este articulo?

² Como cosa ya habla na Galacia 6:4, si apostol Pablo ya menciona dos cosas que puede ayuda kanaton para esta alegre. (Le.) Una, debe kita dale con Jehova el diaton de con todo bueno. Si ta dale kita con ele el diaton de con todo bueno, debe kita queda alegre. (Mat. 22:36-38) Ika-dos, debe kita evita compara con el diaton mismo cuerpo con otro. Maskin cosa man kita ta puede cumpli por causa na diaton salud, training o talento, debe kita rindi gracias con Jehova. Cay siempre, estaba con ele el todo cosa kita tiene. Pero si mas efectivo el otro na cuanto aspeto del ministerio contra kanaton, debe kita queda alegre cay ta usa sila con el diila talento para alaba con Jehova y gendeh para dale mira que mas bueno sila o para na diila mismo interes. Poreso en vez de man competencia kanila, debe kita aprende na diila ejemplo.

³ Na este articulo, mira kita si cosa puede ayuda kanaton si ta sinti kita limitao na cosa kita ta puede hace na diaton servicio. Hay considera tambien kita si paquemodo kita puede usa na de con todo buen manera con el maskin cosa regalo que tiene kita y si cosa kita puede aprende na ejemplo del otro.

4. Cosa situacion el posible causa kanaton para man luya? Dale un ejemplo.

⁴ El cuanto del maga siervo de Jehova tan dificil man adjust na diila maga limitacion como resulta del diila enfermedad o cay de edad ya sila. Ese el cosa ya sucede con Carol. Del antes, tiene le el privilegio que sirvi onde tiene grande necesidad. Durante aquel tiempo, ya conduci ele 35 Bible study y ya ayuda con el manada para progresa na dedicacion y bautismo. Tiene productivo ministerio si Carol! Despues, ya enferma le y mas mucho del de suyu tiempo necesita le esta na casa. “Sabe yo que por causa del de mio maga fisical limitacion, gendeh yo ta puede hace con el cosa ta puede hace el otro,” ya habla si Carol, “pero ta sinti yo que gendeh yo igual kanila de fiel. Gendeh yo ta puede hace el todo cosa yo quierre y ta hace este conmigo luya.” Quierre hace si Carol el todo cosa le puede para con Jehova. Debe gayot con ele dale comendacion! Puede kita asigura que ta aprecia el diaton lastimoso Dios con el de suyu buen ejemplo.

5. (a) Cosa kita debe acorda si tan luya kita por causa na diaton maga limitacion? (b) Como cosa puede mira na maga letrato, paquemodo el hermano ya continua dale el de suyu de con todo bueno na servicio con Jehova?

⁵ Si tan luya tu tiene vez por causa na un limitacion, pregunta na de tuyu mismo cuerpo, ‘Cosa conmigo ta pidi si Jehova?’ El de tuyu de con todo bueno​—maskin cosa pa man se ahora. Considera con este ecsena: El un hermana que 80 año ya tan luya cay gendeh mas le ta puede hace na ministerio con el cosa le ta puede hace cuando 40 año le. Ta pensa le que maskin pa ta dale ele el de suyu de con todo bueno, gendeh ese ta hace alegre con Jehova. Pero, deverasan ba se? Pensa con este. Si este hermana ya dale el de suyu de con todo bueno cuando 40 le y ta dale siempre el de suyu de con todo bueno ahora que 80 año ya le, nuay le descanza dale el de suyu de con todo bueno. Si ta principia kita sinti que dol gendeh mas bastante el diaton servicio para hace alegre con Jehova, necesita kita hace acorda con el diaton mismo cuerpo que si Jehova amo el ta determina si cosa ta hace alegre con ele. Si hace kita el diaton de con todo bueno, dol aquel ta habla kanaton si Jehova: “Bueno el cosa tu ta hace!”​—Compara na Mateo 25:20-23.

6. Cosa kita puede aprende na ejemplo de Maria?

⁶ Mas facil kita queda alegre si man focus kita na cosa kita puede hace en vez na cosa kita gendeh puede hace. Considera con el un hermana que si Maria, quien tiene un enfermedad que ta menora con el cosa le ta puede hace na ministerio. Del primero, ya sinti le depress y nuay sirvi. Pero, ya puede le nota con el un hermana na congregacion quien na cama ya lang y ya decidi si Maria que ayuda con este. “Ya hace yo manera para puede predica junto con ele por medio na telefono y na carta,” ya habla si Maria. “Cada vez tan junto kame, ta bolbe yo na casa que alegre y satisfechao cay sabe yo que ya puede yo ayuda con el de mio hermana.” Puede tambien kita omenta con el diaton alegria si man focus kita na cosa kita puede hace en vez na cosa kita gendeh puede hace. Pero, paquemodo si ta puede kita hace mas o bueno kita na cuanto aspeto na servicio con Jehova?

7. Cosa el practical consejo que ya dale si apostol Pedro con el maga Cristiano?

⁷ Na de suyu primer carta, ya anima si apostol Pedro con el de suyu maga hermano que usa con el maskin cosa regalo y talento que tiene sila para anima con el diila maga hermano y hermana. Si Pedro ya escribi: “Igual un buen administrador del maga gracia de Dios, usa ustedes para el provecho de los demas el especial  gracia que cada y cual ya recibi.” (1 Ped. 4:10) Gendeh kita debe man alang-alang usa con el diaton maga regalo na de con todo buen manera por causa lang cay ta tiene kita miedo que baka man celos o man luya el otro. Si hace kita se, gendeh kita ta dale con Jehova el diaton de con todo bueno.

8. Asegun na 1 Corinto 4:6, 7, porque kita debe evita man hambug acerca con el diaton maga regalo?

⁸ Necesita kita usa con el diaton maga regalo na de con todo buen manera pero debe kita queda con cuidao que gendeh hace hambug con ese. (Le con el 1 Corinto 4:6, 7.) Por ejemplo, posible bueno tu principia maga Bible study. Gendeh tu debe man alang-alang usa con ese regalo! Pero si ta usa tu con ese regalo, gendeh se quierre decir que man hambug tu acerca con ese. Pone kita que nuevo lang tu ya tiene un bonito experiencia na ministerio y ya puede tu principia un Bible study. Quierre tu se habla na de tuyu service group. Pero cuando yan mirajan el de ustedes grupo, ta relata el un hermana con el de suyu experiencia donde ya puede le dale magasin. Ya puede le dale magasin; etu ya principia un Bible study. Cosa tu hace? Sabe tu que el de tuyu experiencia puede anima con el de ustedes grupo pero posible decidi tu que espera ya lang otro tiempo para relata con ese para gendeh sangga con el alegria del de tuyu hermana quien ya puede dale magasin. Un amable cosa se para hace. Pero, gendeh se quierre decir que descanza tu ofrece Bible study. Tiene tu regalo​—usa con ese!

9. Paquemodo kita debe usa con el diaton maga regalo?

⁹ Acorda que regalo estaba con Dios el maskin cosa talento que tiene kita. Debe kita usa con ese maga regalo para anima con el congregacion y gendeh para dale mira que bien bueno kita. (Fil. 2:3) Si ta usa kita con el diaton fuerza y maga abilidad para hace el voluntad del Dios, tiene kita razon para queda alegre​—gendeh por causa cay mas pa el cosa kita ta puede hace contra con otro o ta pricura dale mira que mas bueno kita, sino cay ta usa kita con el diaton maga regalo para alaba con Jehova.

10. Porque gendeh bueno que compara con el diaton mismo cuerpo con otro?

¹⁰ Si gendeh con cuidao, el un persona posible principia compara con el cosa le bueno ta puede hace na cosa gendeh bueno ta puede hace el otro. Por ejemplo, posible bueno dale public talk el un hermano. Bueno le na ese aspeto. Pero na de suyu corazon, posible ta sinti le que mas bueno le que con el hermano quien tan dificil dale talk. Pero ese hermano posible hospitable, bueno man train con el de suyu  maga anak o activo na ministerio. Ta rindi kita gracias cay tiene kita bien manada maga hermano y hermana quien ta usa con el diila maga regalo para sirvi con Jehova y ayuda con otro!

11. Porque kita debe pricura sigui con el ejemplo de Jesus?

¹¹ Maskin pa debe kita evita compara con el diaton mismo cuerpo con otro, puede kita beneficia si aprende kita na maga ejemplo del maga fiel siervo de Jehova. Para ilustra, considera kita con Jesus. Maskin pa gendeh kita perfecto igual con ele, tiene kita cosa puede aprende na de suyu maga bonito calidad y maga buen cosas que ya hace le. (1 Ped. 2:21) Si hace kita el diaton de con todo bueno para sigui enbuenamente con el de suyu ejemplo, hay queda kita mas buen siervo de Jehova y mas efectivo na ministerio.

12-13. Cosa kita puede aprende con Rey David?

¹² Na Palabra del Dios, puede kita incuntra manada ejemplo del maga fiel hombre y mujer con quien kita puede imita maskin pa imperfecto sila. (Heb. 6:12) Pensa con Rey David, con quien ya habla si Jehova “ya gusta gayot yo con ele.” (Act. 13:22) Pero, gendeh perfecto si David. Gane, ya puede le hace maga serioso kamali. Maskin pa ansina, buen ejemplo le para kanaton. Porque? Cay cuando ya corecta con ele, nuay le pricura man razon. En vez, ya acepta le con el pesao consejo que ya dale con ele y deverasan ya arripinti na cosa le ya hace. Como resulta, ya perdona con ele si Jehova.​—Sal. 51:3, 4, 10-12.

¹³ Puede kita aprende na ejemplo de David y pregunta na diaton mismo cuerpo: ‘Cosa el de mio reaccion si ta conseja conmigo? Ta admiti ba dayun yo con el de mio maga kamali o ta pricura pa yo man razon? Ta disculpa ba yo con otro? Ta hace ba yo esfuerzo para gendeh repiti con el de mio maga kamali?’ Puede tu hace maga semejante pregunta mientras ta le tu acerca con el otro maga fiel hombre y mujer na Biblia. Ya experiencia ba sila maga dificultad que semejante na cosa tu ta enfrenta ahora? Cosa el maga buen calidad que ya demonstra sila? Na cada ejemplo, pregunta na de tuyu mismo cuerpo: ‘Cosa yo hace para queda igual con este leal siervo del Dios?’

14. Paquemodo kita beneficia si observa kita con el diaton maga hermano y hermana?

¹⁴ Puede tambien kita beneficia si observa kita con el diaton maga hermano y hermana, joven man sila o de edad. Por ejemplo, puede ba tu pensa un persona na de ustedes congregacion quien fiel ta aguanta con el un probanza ​—posible pressure estaba na maga uban, oposicion na familia o enfermedad? Ta puede ba tu mira maga calidad de ese persona que quierre tu imita? Si considera tu con el de suyu ejemplo, posible aprende tu maga practical manera si paquemodo aguanta con el de tuyu mismo maga probanza. Ta rindi gayot kita gracias cay este maga hermano y hermana ta dale kanaton buen ejemplo de fe​—un razon gayot para queda alegre!​—Heb. 13:7; Sant. 1:2, 3.

15. Cosa el consejo de apostol Pablo que puede ayuda kanaton para continua queda alegre na diaton servicio con Jehova?

¹⁵ Para tene paz y unidad na congregacion, el cada uno kanaton necesita dale el diaton de con todo bueno. Considera con el maga Cristiano del primer siglo. Tiene sila diferente regalo y assignment. (1 Cor. 12:4, 7-11) Pero, nuay este causa kanila para tene competicion y division. Sino, ya anima si Pablo con el cada uno que hace si cosa necesita ‘para hace fuerte con el cuerpo de Jesucristo.’ Ya escribi si Pablo con el maga de Efeso: “Ansina cada parte del cuerpo ta trabaja enbuenamente como sedebe, y ta engranda y ta ayuda hace completo el entero cuerpo por medio del amor que tiene kita para con uno y otro.” (Ef. 4:1-3, 11, 12, 16, El Nuevo Testamento) Aquellos quien ya hace con ese ya contribui para tene paz y unidad​—maga calidad que ta puede kita mira na diaton maga congregacion ahora.

16. Cosa kita debe determinao hace? (Maga Hebreo 6:10)

¹⁶ Queda determinao que evita compara con el de tuyu mismo cuerpo con otro. Sino, aprende na ejemplo de Jesus y pricura imita con el de suyu maga calidad. Beneficia na maga ejemplo de fe na Biblia y na diaton tiempo ahora. Mientras ta continua tu hace el de tuyu de con todo bueno, puede tu asigura que si Jehova ‘gendeh gayot hay ulvida el de tuyu maga trabajo.’ (Le con el Maga Hebreo 6:10.) Continua queda alegre na servicio con Jehova y realiza que ta aprecia le con el de tuyu maga con todo alma esfuerzo para hace alegre con ele.