1. Unsay makahatag natog dakong kalipay?

 GUSTO ni Jehova nga malipay ta. Nahibalo ta ana kay ang kalipay apil sa bunga sa iyang balaang espiritu. (Gal. 5:22) Ang paghatag mas makapalipay kay sa pagdawat, maong malipay gyod ta kon magkugi ta pag-ayo sa ministeryo ug sa pagtabang sa mga igsoon sa lainlaing paagi.​—Buh. 20:35.

2-3. (a) Base sa Galacia 6:4, unsang duha ka butang ang makatabang nga padayon tang magmalipayon sa pag-alagad kang Jehova? (b) Unsay atong hisgotan niining artikuloha?

² Sa Galacia 6:4, gihisgotan ni apostol Pablo ang duha ka butang nga makatabang aron padayon tang magmalipayon. (Basaha.) Una, angay natong ihatag kang Jehova ang atong pinakamaayo. Kon ginahatag nato kang Jehova ang atong pinakamaayo, angay tang malipay. (Mat. 22:36-38) Ikaduha, likayan nato nga ikompara ang atong kaugalingon sa uban. Bisag unsa pay atong mahimo tungod sa atong kahimtang sa panglawas, training, o abilidad, angay tang magpasalamat kang Jehova. Kay kon buot hunahunaon, ang tanan natong nabatonan naggikan kaniya. Sa laing bahin, kon ang uban mas maayo sa ubang bahin sa ministeryo kay kanato, angay tang malipay kay gigamit nila ang ilang mga abilidad sa pagdayeg kang Jehova imbes maningkamot nga mailado o unahon ang ilang kaugalingong kaayohan. Busa imbes makigkompetensiya nila, angay tang mokat-on gikan nila.

³ Niining artikuloha, atong hisgotan kon unsay makatabang nato dihang mobati ta nga limitado ra tag mahimo sa pag-alagad. Hisgotan pod nato kon sa unsang paagi magamit nato ang atong mga abilidad sa pinakamaayong paagi ug  kon unsay atong makat-onan sa ehemplo sa uban.

4. Unsa tingali ang makapaluya nato? Paghatag ug pananglitan.

⁴ Naay mga alagad ni Jehova nga limitado na lag mahimo sa pag-alagad kay nagkaedaran na sila o nasakit, mao nga naluya sila. Mao nay gibati ni Carol. Sa una, nag-alagad siya sa lugar nga dakog panginahanglan. Niadtong panahona, 35 ang iyang Bible study ug daghan siyag natabangan nga mabawtismohan. Mabungahon kaayo ang ministeryo ni Carol! Pero nasakit siya ug pirme na lang magpondo sa balay. Si Carol miingon, “Kabalo ko nga tungod sa akong sakit, dili na nako mahimo ang mahimo sa uban. Galing lang, mobati ko nga dili ko parehas nila ka dasig. Gusto pa kong mohimog dugang, pero di na gyod nako kaya, maong maluya ko.” Gusto ni Carol nga himoon ang tanan niyang maarangan para kang Jehova. Dalayegon kaayo nâ! Segurado nga nalipay pag-ayo ang atong maluluy-ong Diyos kay gihimo ni Carol ang iyang pinakamaayo.

5. (a) Unsay angay natong hinumdoman kon maluya ta tungod sa atong mga limitasyon? (b) Base sa mga hulagway, giunsa pagpakita sa brader nga wala siya moundang sa paghimo sa iyang pinakamaayo sa pag-alagad kang Jehova?

⁵ Kon usahay maluya ka tungod sa imong limitasyon, pangutan-a ang imong kaugalingon, ‘Unsa may gipangayo ni Jehova kanako?’ Gusto ni Jehova nga himoon nimo ang imong pinakamaayo​—kon unsay imong kaya sa imong presenteng kahimtang. Hunahunaa ni: Ang 80 anyos nga sister naluya kay dili na niya mahimo ang iyang nahimo sa ministeryo niadtong 40 anyos pa siya. Naghunahuna siya nga bisag ginahimo niya ang iyang pinakamaayo, wala malipay si Jehova. Pero tinuod ba nâ? Hunahunaa ra. Kon gihimo sa sister ang iyang pinakamaayo niadtong 40 pa siya, ug gihimo gihapon niya ang iyang pinakamaayo sa 80 na siya, wala siya moundang sa paghimo sa iyang pinakamaayo. Kon mobati ta nga wala malipay si Jehova kay morag kulang ang atong ginahimo, kinahanglang hinumdoman nato nga si Jehova ang magdesisyon kon unsay makapalipay niya. Kon ginahimo nato ang atong pinakamaayo, mora pod tag ginaingnan ni Jehova: “Dalayegon ang imong gihimo!”​—Itandi ang Mateo 25:20-23.

6. Unsay atong makat-onan kang Maria?

⁶ Malipay ta kon magpokus ta sa kon unsay kaya natong himoon, dili sa kon unsay dili nato kaya. Konsideraha ang sister nga si Maria, nga limitado rag mahimo sa ministeryo tungod sa iyang sakit. Sa primero, na-depress siya ug mibating way pulos. Pero nahunahunaan niya ang sister sa ilang kongregasyon nga naglubog na lang sa banig, ug nakadesisyon siya nga tabangan ang sister. Si Maria miingon, “Gieskedyul nako nga magpartner mi sa telephone witnessing ug letter writing. Dihang mag-uban mi, mouli ko nga malipayon ug tagbaw kay natabangan nako siya.” Sa atong bahin, madugangan pod ang atong kalipay kon magpokus ta sa kon unsay atong mahimo, dili sa kon unsay dili nato mahimo. Pero komosta man kon kaya natong mohimog dugang o kaha maayo kaayo ta sa ubang bahin sa pag-alagad?

7. Unsang praktikal nga tambag ang gihatag ni apostol Pedro sa mga Kristohanon?

⁷ Sa unang sulat ni apostol Pedro, iyang gidasig ang mga Kristohanon nga gamiton ang ilang mga gasa ug abilidad aron palig-onon ang mga igsoon. Si Pedro misulat: “Sumala sa nadawat nga gasa sa matag usa, gamita kini sa pag-alagad sa usag usa ingong maayong mga piniyalan sa dili hitupngang pagkamaayo  sa Diyos.” (1 Ped. 4:10) Dili ta angayng magduhaduha nga gamiton sa pinakamaayong paagi ang atong mga gasa o abilidad tungod lang kay mahadlok ta nga masina o maluya ang uban. Kay kon ingon ana ang kahimtang, dili nato mahatag kang Jehova ang atong pinakamaayo.

8. Base sa 1 Corinto 4:6, 7, nganong dili nato angayng ipanghambog ang atong mga gasa?

⁸ Kinahanglang gamiton natog maayo ang atong mga gasa, pero mag-amping ta nga dili ni ipanghambog. (Basaha ang 1 Corinto 4:6, 7.) Pananglitan, dali tingali kang makasugod ug Bible study. Gamita gyod nâ nga gasa! Pero ayaw nag ipanghambog. Pananglitan, di pa dugay naa kay nindot nga eksperyensiya sa pagsangyaw ug nakasugod kag Bible study. Eksayted kaayo kang mosulti ani sa inyong field service group. Pero dihang nagkaestorya mo sa imong mga kagrupo, naay sister nga nag-estorya nga naka-place siyag magasin. Naka-place siyag magasin; ikaw nakasugod ug Bible study. Unsay imong himoon? Kabalo ka nga madasig ang inyong grupo sa imong eksperyensiya, pero tingali modesisyon ka nga isulti ni sa lain na lang nga higayon aron dili mawala ang kalipay sa sister nga naka-place ug magasin. Kon imo nang himoon, mapakita nimo nga buotan ka. Pero ayaw gyod ug hunong sa pagtanyag ug Bible study. Naa kay gasa—gamita nâ!

9. Unsaon nato paggamit ang atong mga gasa?

⁹ Hinumdoman nato nga ang atong mga abilidad gasa gikan sa Diyos. Angay natong gamiton ang maong mga gasa aron palig-onon ang kongregasyon, dili aron magpasikat. (Filip. 2:3) Kon gamiton nato ang atong kusog ug mga abilidad sa paghimo sa kabubut-on sa Diyos, malipay gyod ta pag-ayo—dili tungod kay nalabwan nato ang uban kondili tungod kay gigamit nato ang atong mga gasa sa pagdayeg kang Jehova.

10. Nganong dili maayo nga ikompara nato ang atong kaugalingon sa uban?

¹⁰ Kon ang usa ka Kristohanon naay abilidad, basig ikompara niya ang iyang kaugalingon sa igsoon nga wala ana nga abilidad. Pananglitan, maayo siyang mopakigpulong. Mao nay iyang abilidad. Pero basin sa iyang kasingkasing, pakamenoson niya ang brader nga dili maayong mopakigpulong. Pero ang maong brader basig maabiabihon kaayo, maayo kaayong mobansay ug mga anak, o dasig kaayo sa ministeryo. Mapasalamaton gyod ta nga daghang igsoon ang naggamit sa ilang mga abilidad sa pag-alagad kang Jehova ug sa pagtabang sa uban!

11. Nganong angay tang maningkamot nga sundogon si Jesus?

¹¹ Dili gyod nato angayng ikompara ang atong kaugalingon sa uban, pero makabenepisyo ta kon mokat-on ta sa ehemplo sa ubang alagad ni Jehova. Pananglitan, atong konsiderahon ang ehemplo ni Jesus. Dili ta parehas niya nga perpekto, pero makakat-on ta sa iyang nindot nga mga hiyas ug buhat. (1 Ped. 2:21) Kon maningkamot ta nga sundogon siya kutob sa atong maarangan, mahimo tang mas maayong alagad ni Jehova ug mas epektibo sa ministeryo.

12-13. Unsay atong makat-onan kang Haring David?

¹² Sa Bibliya, makabasa ta bahin sa daghang matinumanong lalaki ug babaye nga angayang sundogon bisag dili sila perpekto. (Heb. 6:12) Konsideraha si Haring David, kinsa gitawag ni Jehova nga “tawo nga gikahimut-an sa akong kasingkasing,” o sumala sa ubang bersiyon sa Bibliya, “ang klase sa tawo nga nakapalipay pag-ayo nako.” (Buh. 13:22) Pero si David dili perpekto. Ang tinuod, nakahimo siyag grabeng mga sala. Pero maayo gihapon siyang ehemplo para nato. Ngano? Kay dihang gibadlong siya, wala siya mangrason. Hinuon, iyang gidawat ang bug-at nga tambag ug kinasingkasing siyang nagbasol sa iyang gihimo. Ingong resulta, gipasaylo siya ni Jehova.​—Sal. 51:3, 4, 10-12.

¹³ Makakat-on ta kang David pinaagi sa pagpangutana sa atong kaugalingon: ‘Unsay akong reaksiyon kon tambagan ko? Dawaton ba dayon nako ang akong sayop, o mangrason ko? Basolon ba nako ang uban? Naningkamot ba ko nga dili na otrohon ang akong sayop?’ Puwede kang mangutanag parehas ana dihang magbasa ka bahin sa ubang matinumanong mga lalaki ug babaye diha sa Bibliya. Ang ila bang mga kalisdanan parehas sa imong mga kalisdanan? Unsang maayong mga hiyas ang ilang gipakita? Sa matag karakter nga imong mabasa, pangutan-a ang imong kaugalingon: ‘Unsaon nako pagsundog kining maunongong alagad ni Jehova?’

14. Sa unsang paagi ta makabenepisyo kon mokat-on ta sa atong mga igsoon?

¹⁴ Makabenepisyo pod ta kon mokat-on ta sa atong mga igsoon—batan-on man o tigulang. Pananglitan, naa ba kay mahunahunaan nga igsoon sa inyong kongregasyon nga matinumanong nag-alagad bisan pa sa mga kalisdanan​—tingali gipresyur siya sa uban, gisupak sa iyang pamilya, o naa siyay sakit? Unsay maayo niyang hiyas nga gusto nimong sundogon? Kon pamalandongon nimo ang iyang maayong  ehemplo, posibleng makakat-on kag mga paagi kon unsaon nimo paglahutay ang imong mga kalisdanan. Mapasalamaton gyod ta ug malipay sa maayong ehemplo niini nga mga igsoon.​—Heb. 13:7; Sant. 1:2, 3.

15. Unsang tambag ni apostol Pablo ang makatabang nato nga padayong magmalipayon sa atong pag-alagad kang Jehova?

¹⁵ Aron makaamot ta sa kalinaw ug panaghiusa sa kongregasyon, ang matag usa nato kinahanglang mohimo sa iyang pinakamaayo. Konsideraha ang mga Kristohanon sa unang siglo. Lainlain silag gasa ug asaynment. (1 Cor. 12:4, 7-11) Pero wala nila tugoti nga tungod ani magkompetensiyahay sila ug magkabahinbahin. Hinuon, gidasig ni Pablo ang matag usa nga himoon kon unsay gikinahanglan aron ‘mapalig-on ang lawas sa Kristo.’ Iyang gisulatan ang mga taga-Efeso: “Kon ang matag parte sa lawas molihok sa hustong paagi, makatabang kini sa pagtubo sa lawas, mao nga kini molig-on diha sa gugma.” (Efe. 4:1-3, 11, 12, 16) Kadtong nagpadapat ana nakaamot sa kalinaw ug panaghiusa​—nga makita pod nato sa mga kongregasyon karon.

16. Unsay atong paningkamotan? (Hebreohanon 6:10)

¹⁶ Paningkamoti nga dili nimo ikompara ang imong kaugalingon sa uban. Hinuon, pagkat-on gikan kang Jesus ug paningkamoti nga masundog ang iyang mga hiyas. Sundoga ang maayong mga ehemplo sa Bibliya ug sa mga igsoon karon. Kon padayon nimong himoon ang imong pinakamaayo, makasalig ka nga si Jehova ‘matarong, ug dili niya kalimtan ang imong buhat.’ (Basaha ang Hebreohanon 6:10.) Padayong magmalipayon sa pag-alagad kang Jehova, kay nahibalo ka nga nalipay siya sa imong kinasingkasing nga pag-alagad kaniya.