1. Txini ennidhelana wagalala webaribari?

 YEHOVA onfuna wi nagalale. Iyo ninoziwa ejuwene sabwani ottaba onokosa mpaddi wa dhobala dha muya wokoddela. (Gal. 5:22) Iyo vina ninoziwa wi ovaha onottabiha opitta ovahiwa, nona ninokana wagalala nigakosa guru eli yotene mmabasani a olaleya vina nigakamihedhaga abalihu ali Akristu.—Mer. 20:35.

2-3. (a) Ninga munlogela Galásia 6:4, dhilobo gani bili dhinanikamihedhe okanavi wagalala mmabasani a Yehova? (b)  Txini dhinasekeserhihu mwari mwa nsunzo ntti?

² Murumiwi Paulo ologa dhilobo bili dhinwodha onikamihedha okalagavi owagalalene. (Kengesa Galásia 6:4.) Elobo yoroma, okana yogana wi ninvahege Yehova mpaka apale vanwodhelihu. Nigavilibihedha onvaha Yehova mpaka apale vanwodhelihu ninele okanavi wagalala. (Mt. 22:36-38) Yanawili, kaninfwanyela oviladdanihaga na attu ena. Japama omutamalelaga Yehova sabwa ya ejile enwodhihu okosa, kintanala akala egumi yehu kili pama, kanakelile maswagihu obe kanina ttotto ya okosa dhilobo. Sabwani dhilobo dhotene dhinihu nvaho wa Yehova. Muttu mwina agakana ttotto yapama mmabasani a olaleya nubuwele wi iyene onlabihedha wi amuttittimihena Yehova, ottiya ovisibana. Nigobuwela dhawene kaninatamele ovurhana na iyene ottiya ejo ninele ovilibihedha osunza na yotagiha yaye.

³ Mwari mwa nsunzo ntti, ninele wona enanikamihedhe nigojeya sabwa yawubuwela wi kaninkosa venjene ninga mwakoselihu. Ninele wona mukalelo wolabihedha ttotto ennivaha Yehova mmabasani mwaye vina nikamihedho ninakanehu na dhotagiha dha attu ena.

4. Makattamiho gani anakukumula attu ena? Kavaha yotagiha.

⁴ Enjene wa iyo ninorutxiwa orumela wi kaninwodha omukosela Yehova venjene sabwa ya oredda obe vyaka dhowunuwelavo. Jijuwene epadduwile na Carol. Mwa vyaka dhinjene iyene wahikana gari ya okamihedha murudda wajombeliwa anamalaleya. Mudhidhene obo, iyene wanwodha weddiha masunzo a Bibilia owakwana 35 vina wanakamihedha attu enjene ofiyedha ttarho ya obatiziwa. Mbwenye sabwa ya obulela venjene ovano Carol kanwodhetxa obudduwa vatakulu! Iyene ohiloga: “Miyo ddinoziwa wi sabwa ya makattamiho aga a egumi, kaddinwodha onvaha venjene Yehova ninga munkosela attu ena. Aba makattamiho anwanana miyo sabwa ya ejile yafuna miyo okosa na eji enkosemi ovanene. Enorutxa orumela ejuwene.” Carol onofuna onvaha Yehova ejile eli yamakamaka vina ejo jotamaleleya! Kanina waganyedha wi Mulugu onovaha ttima esile dhinwodhiye.

5. (a) Nigojeya sabwa ya ohiwodha okosa mpaka apale vafunelihu txini enfwanyelihu wubuwela? (b) Ninga munlagihedha mafoto, mbali odhile dhavi anvahaga Yehova mpaka apale vanwodhiye mwigumini mwaye motene?

⁵ Akala weyo vina onowojeya sabwa yawi kunkosa venjene ninga mwafuneliwe, kavivuze: ‘Txini enjedhela Yehova wi ddikose?’ Yehova onfuna wi onvahe eli—yamakamaka mpaka apale vawodhela weyo. Karoma otanalela: Murogora wa vyaka 80 dhobaliwa, onowojeya sabwani kanwodha olaba venjene mmabasani a olaleya ninga mwakoseliye bana vyaka 40. Masiki anvahaga Yehova mpaka apale vanwodheliye iyene onubuwela wi Yehova kanagalala na ejile eninvahiye. Weyo onona ninga ejo ebaribari? Karoma otanalela, akala murogora oddu bana vyaka 40 wanimulabela Yehova venjene vina apa vaniye vyaka 80 onodhowavi amulabelaga mpaka apale vanwodheliye, eji enoniha wi iyene txipo kattiyile onvaha Yehova ejile eli yamakamaka. Akala ninoroma wubuwela wi eninvahihu Yehova kinakwana, ninofwanyela wubuwela wi ddi Yehova onsakula akala enimukoselihu jamakamaka obe nne. Nikane ebaribari wi nigamulabela Yehova mpaka vangomela guru dhehu, Iyene txibarene onele onaddela wi ekosilihu: “Ekala!”—Kaladdaniha na Mateu 25:20-23.

6. Txini ensunzihu na yotagiha ya Maria?

⁶ Enele okala yovevuwa okana wagalala nigazuzumela dhinwodhihu okosa ehili ozuzumela dhilobo dhihinwodhihu. Katanalela nipadduwo na murogora onkuweliwa Maria, iyene ohipattiwa oredda ohinimuwodhiha olaba venjene mmabasani olaleya. Vamaromo wahidhugudheya venjene ofiyedha ovyonaga wi kali elobwene. Venevo omubuwela murogora wa mmulogoni mwaye wali muredda wafwanyeya vafubani, Maria wahigana omukamihedha. Iyene ohiloga dhahi: “Ddahikosa masasanyedho a olaleya na iyene na telefoni vina makarta. Mudhidhi wetene walaleyimi na iyene dheyelela vatakulu wowagalalene sabwa ya owodha omukamihedha murogora oddule.” Iyo vina ninele okana wagalala nigazuzumela esile dhinwodhihu okosa ehili esile dhihinwodhihu okosa. Ki akala weyo onowodha okosa venjene, obe akala ohikana ttotto enawukamihedhe omulabelana Yehova venjene?

7. Malago gani avahile murumiwi Pedro Akristu?

⁷ Karta yoroma elebile murumiwi Pedro wahakokomeza abali wi alabihedhe mivaho dhawa obe ttotto yawa wi alibihena Akristu  akwawa. Iyene ohileba dhahi: “Muziwe olabana pama mivaho dhothiyana-thiyana dha Mulugu: muthu-muthu àkamyedhegena akwaye mahalayá akelileye.” (1 Ped. 4:10) Iyo kanittiye olabihedha mivaho dhehu, ewodhelo yehu ya okosa dhilobo nubuwelaga wi eji enele wawobaniha attu ena obe anale onikanela nrima. Kopadduwaga dhawene iyo kanawodhege onvaha Yehova ejile eli yamakamaka.

8. Mowiwanana na 1 Korinto 4:6, 7, sabwaya jani kaninfwanyela ovigwarulana ttotto enihu?

⁸ Ebaribari wi ninofwanyela olabihedha pama mivaho dhehu wi nimulabelena Yehova mbwenye kili yofuneya ovisibana. (Kengesa 1 Korinto 4:6, 7.) Motagiha, txino weyo ohikana ttotto ya wita masunzo a Bibilia. Ebaribari wi onofwanyela olabihedha ttotto ejo! Mbwenye kulabihedhe nvaho obu wi ovigwarulena. Karoma otanalela, weyo wita nsunzo mmabasani a olaleya. Venevo okana efunelo ya wawaddela abali ena a nikuru nawo. Ogagumanana na awene oninfwanya murogora bali oziveliwene alogaga wi ohiwodha omuttiyedha mwanamurala revista nimodha. Iyene ottiyile revista nimodha; weyo witile nsunzo. Onakose dhavi? Weyo onoziwa wi abali anele olibiheya ogawaddela ekosiliwe, mbwenye egahikala yamalago wawaddela nipadduwo ntto labo nina, sabwani ogaloga venevo onele onyonga wagalala wa murogora oddule ottiyile revista nimodha. Okosa ejo egali olagiha oderetu. Mbwenye kunattiye wita masunzo a Bibilia sabwa ya ejuwene. Vowi ohikana nvaho obo—onofwanyela olabihedha!

9. Ninfwanyela olabihedha dhavi ttotto yehu?

⁹ Kanidduwale wi ttotto enihu ya okosa dhilobo nvaho wa Mulugu. Nona ninofwanyela olabihedha wi nalibihena abali a mmulogoni, ottiya ovisibana. (Fil. 2:3) Nigalabihedha guru yehu vina ewodhelo yehu wi nimuttittimihena Mulugu ninele okana mwaha wa wagalala—kahiye wi nintamela okala amakamaka opitta attu ena mbwenye ninlabidha ttotto yehu wi nimuttittimehena Yehova.

10. Sabwaya jani kahiye elobo yapama oviladdaniha na attu ena?

¹⁰ Nigahikale txenjewa, ttotto yehu ya okosa dhilobo pama enele onigwihedha vamuregani ya oladdaniha ejile enwodhihu okosa na ehinwodha muttu mwina okosa. Motagiha, txino mbali ohikana ttotto ya okosa pama madiskursu a vattaddo. Venevo, mbali oddo oroma omuttonga mbali mwina ona makattamiho a okosa madiskursu. Masiki akala mbali oddu kanwodha okosa pama madiskursu iyene onowasunziha deretu anaye, ohikana elemelelo  ya wawakela aleddo vina onovingela mabasa olaleya. Ninotamalela venjene okana abali na arogora anlabihedha ttotto enani wi amulabelena Yehova vina akamihedhena ena!

11. Ninfwanyelela nni osunza yotagiha ya Yezu?

¹¹ Ebaribari wi kahiye yapama oviladdaniha na attu ena, mbwenye enowodheya osunza na dhotagiha dhawa. Yotagiha yapama enfwanyelihu osunza ja Yezu. Iyo kaninawodhe oviladdaniha na Yezu sabwani iyene wali muttu woligana, mbwenye ninowodha osunza mikalelo dhaye dhapama vina dhilobo dhapama dhikosiliye. (1 Ped. 2:21) Nigavilibihedha ofwara yotagiha ya Yezu, ninele okala Akristu apama vina ninele wunuwiha ttotto ya osunziha pama mmabasani olaleya.

12-13. Txini ensunzehu na yotagiha ya Mwene Davidi?

¹² Mbibiliani ninofwanyamo dhotagiha dhinjene dha alobwana na ayana ororomeleya dhinfwanyelihu osanza. (Aheb. 6:12) Karoma omutanalela Mwene Davidi, omulogiwe Yehova dhahi “muthu wa murima waga” obe, ninga munlogela tradução yina ya Bibilia, “mukalelo wa muttu oninfunemi.” (Mer. 13:22) Mbwenye Davidi kali muttu woligana. Iyene ohikosa dhottega dhowopiya, masiki dhawene ohinikalela yotagiha yapama. Sabwaya? Sabwani vasaddeyiwiye katamelile ovibarela. Ottiya ejo, wahirumela osaddeyiwa vina wahitxinuwa txibarene mwa esile dhakoseliye nona Yehova wamulevelela.—Masal. 51:3, 4, 10-12.

¹³ Ogasunzaga yotagiha ya Davidi kavikose mavuzo aba: ‘Ddinakulela dhavi ddigavahiwa malago? Ddinononelamo dhovonya dhaga obe ddikana elemelelo yotamelaga ovibarela? Ddinorumela muladdu ototilimi obe ddinotamela wapwatteliha attu ena? Ddinovilibihedha wi ddinakose wili yovonyaya?’ Kavikose mavuzo akene ogasunzaga na dhotagiha dha emeleli ena ororomeleya. Vowi awene agumanana makattamiho oladdana na aga, mikalelo gani dhapama dhilagihilani dhinfwanyelimi otagiha? ‘Ddinawodhe dhavi okala oladdana na mwimeleli oddu wororomeleya wa Yehova?’

14. Txini enasunzehu na abalihu a mmulogoni?

¹⁴ Iyo vina ninele osunza venjene na dhotagiha dha abalihu a mmulogoni, oromana aima vina anddimuwa. Motagiha, kamubuwele mbali wa mmulogoni mwawo ongumanana yoweha—txino onofwara-fwariwa na amudhaye, anamasunza ena oskola obe egumi yaye kili pama! Mikalelo gani dhapama  dhinlagiha mbali oddo dhigafuniliwe otagiha? Txibarene dhotagiha dhapama dha abali na arogora ehu dhinowodha onikamihedha ovilela makattamiho. Iyo ninowagalala sabwa ya okana abali na arogora ali yotagiha ya nroromelo—enfwanyelihu ofwara!—Aheb. 13:7; Tia. 1:2, 3.

15. Nlago gani nivahile murumiwi Paulo ninanikamihedhe omulabelagavi Yehova nowagalala?

¹⁵ Muttu-muttu wa iyo onofwanyela okosa muli mwetemwene wi atamele murenddele vina wiwanana mmulogoni. Ndoweni nirome wawubuwela Akristu oroma. Awene ahakela mivaho dhottiyana-ttiyana vina ahikana dhittomo dhottiyana. (1 Kor. 12:4, 7-11) Mbwenye kalivo muttu wavurhana na mukwaye atotelagana ogawana. Masiki dhawene, Paulo wahimukokomeza mbali mmodha-mmodha wa mmulogoni wi akose muli mwetemwene wi alibihe “mwili wa Kristu.” Alebelaga akadda Éfeso Paulo ologile dhahi: ‘Yano modha-modha egalabaga pama, enokamihedha wunuwa wa mwili wetene mukwelani.’ (Ef. 4:1-3, 11, 12, 16) Akristu alabihedhile nlago ntti ahikamihedha mmulogoni okalamo murenddele na wiwanana—vina Akristu a ebaribari masaka abano ankosa yakene.

16. Txini enfwanyelihu okosa? (Ahebreu 6:10)

¹⁶ Kuviladdanihege na attu ena. Ottiya ejo ovilibihedhe ofwara yotagiha ya Yezu vina dhotagiha dha emeleli ena ororomeleya a Yehova a masaka awale vina a masaka abano. Ovilibihedhe mpaka apale vanwodheliwe vina okane nikuluvelo na wi Yehova ‘ddoligana kandduwala mabasa animukoseliwe.’ (Kengesa Ahebreu 6:10.) Odhowegevi omulabelagavi Yehova nowagalala, vina kudduwale wi ninowagalaliha murima waye niganvaha egile eli yamakamaka mpaka vanwodhelihu.