1. Zeinihdah lunglawmhnak tampi a kan hmuhter?

 JEHOVAH nih i lawm hna seh ti a kan duh. Cutin kan hngalh khawhnak a ruang cu lawmhnak cu thiang thlarau theitlai pakhat a si caah a si. (Gal. 5:22) Peklei ah hin hmuhlei nakin lunglawmhnak a um deuh caah phungchimnak ah tling tein kan i tel tik le unau pawl kha lam tampi in kan bawmh hna tikah kan i lawm tuk.—Lam. 20:35.

2-3. (a) Galati 6:4 ningin zei a kong pahnih nih dah Jehovah rian ah i lawmh peng dingin a kan bawmh khawh? (b) Hi capar ah zei kong dah kan i ruah lai?

² Galati 6:4 ah lamkaltu Paul nih kan i lawmh peng khawh nakhnga a kan bawmmi a kong pahnih a langhter. (Rel.) Pakhatnak ah, Jehovah kha a ṭha bikmi pek dingin hmuitinh kan chiah awk a si. A ṭha bikmi kan pek ahcun kan i lawm lai. (Matt. 22:36-38) Pahnihnak ah, midang he i tahchunh kha kan hrial awk a si. Kan ngandam ruang, cawnpiak kan si ruang asiloah kan thiamnak ruangah thil pakhatkhat kan tuah khawh ahcun Jehovah kha kan thangṭhat awk a si. Kan ngeihmi zeizong vialte cu amah sinin kan hmuhmi a si. Phundang in, midang nih phungchimnak ah kanmah nakin hmualngei deuh in an ṭuan khawh tikah an thiamnak kha anmah minṭhatnak ca asiloah anmah pumpak ṭhatnak caah si loin Jehovah thangṭhatnak caah an hman ruangah kan i lawmh awk a si. Cucaah anmah va zuam canah an sin tu in kan cawn awk a si.

³ Kan duh tlukin kan ṭuan khawh lo ruangah kan lung a dongh ahcun zeinihdah a kan bawmh khawh ti kha hi capar ah kan hmuh hna lai. Cun kan ngeihmi zei bantuk laksawng paoh kha a ṭha bik in hman khawh ning le midang sinin kan cawn khawhmi kong zong kan i ruah lai.

4. Zei thil sining nih dah lung a donghter khawh? Tahchunhnak pe.

⁴ Mi cheukhat cu kan kum a upat ruang asiloah kan damlo ruangah Jehovah rian kha kan duh ningin kan ṭuan kho lo i mah nih kan lung a donghter. Carol zong cutin a rak si. Phungchimtu a herh deuhnak hmun ah phung a rak chim. Mah lioah Baibal cawnpiaknak 35 a ngei i mi tampi kha i pumpek awk le tipil in awkah ṭhancho dingin a rak bawmh hna. Carol cu phungchim rian ah a hlawh a rak tling! Asinain fakpi in a hun zaw i caan tam deuh cu innchung lawngte ah a um. Hitin a ti: “Ka zawtnak ruangah midang tuah khawhmi thil kha ka tuah kho ti lo, cucaah anmah tlukin a zumhnak a fek lomi bantukin kaa ruat. Tuah ka duhmi thil vialte kha ka tuah kho ti lo i mah nih ka lung a ka donghter.” Carol nih Jehovah caah a tuah khawhmi zei paoh tuah a duh. Mah cu thangṭhat awk taktak a si! Zaangfahnak a ngeimi Pathian cu Carol nih a ṭha bik in a rian a ṭuanmi cungah aa lawm tuk lai ti kha kan zumh khawh.

5. (a) Ri kan ngeihmi nih kan lung a kan donghter ahcun zeidah kan i cinken awk a si? (b) Hmanthlak ah kan hmuh bantukin unaupa nih Jehovah rian kha a ṭha bik in zeitindah a ṭuan zungzal?

⁵ Ri na ngeihmi ruangah a caan ah na lung a dongh ahcun hitin i hal: ‘Jehovah nih zeidah a ka hal?’ Jehovah nih atu na sining ah a ṭha bik in tuahter aan duh. Mah kong hi ruathmanh: Kum 80 a simi unaunu pakhat cu phungchim rian ah kum 40 a si lio tlukin a ṭuan khawh ti lo caah a lung a dong. A ṭha bik in a ṭuan ko nain mah nih Jehovah lung a lawmhter lo tiah a ruah. Asinain mah cu a hmaan maw? Mah hi ruathmanh. Mah unaunu nih kum 40 a si lioah a ṭha bik in a rak pek i kum 80 a si tik zongah a ṭha bik in a pek rih ahcun a ṭha bik in a pek zungzal tinak a si. Jehovah lunglawmhter ding tiangin a rian kan ṭuan lo tiah kan ruah ahcun zeinihdah a lung a lawmhter timi biakhiahnak a tuahtu cu Jehovah lawng a si ti kha kan i cinken a herh. Cutin a ṭha bik in kan ṭuan ahcun Jehovah cu aa lawm tuk lai i “salṭha” tiah a kan ti lai.—Matthai 25:20-23 he tahchunh.

6. Maria sinin zeidah kan cawn khawh?

⁶ Kan tuah khawh lomi cungah si loin kan tuah khawhmi cung tu ah lungthin kan pek ahcun i lawmh awkah kan i fawih deuh lai. A dam lo ruangah phungchimnak ah ri a ngeimi unaunu Maria kong hi ruathmanh. A hmasa ahcun a lung a dong i man ka ngei ti lo tiah a ruah. Asinain Maria nih an Khrihfabu i a ngormi unaunu pakhat kong kha a ruat i bawmh dingin bia a khiah. Hitin a ti: “Mah unaunu he phone le cakuat in phungchim kalṭi awkah ka timhtuah. Cutin phungchim rian ah kan i telṭi fatin mah unaunu kha ka bawmh khawh caah kaa lawm tuk i kaa lungsi tuk.” Kannih zong kan tuah khawh lomi cungah si loin kan tuah khawhmi cungah lungthin kan pek ahcun kan i lawm chinchin lai. Jehovah rian ah tam deuh in kan ṭuan khawhmi asiloah ṭha deuh in kan ṭuan khawhmi a um ahcun tah zeitin?

7. Lamkaltu Peter nih Khrihfa pawl kha zei ruahnak cheuhnak dah a pek hna?

⁷ Lamkaltu Peter nih a hmasa a cakuat ah unau pawl kha zumtukhat an unau pawl thapek awkah an ngeihmi laksawng le thiamnak hna hman dingin a rak forh hna. Hitin a ti: “Pathian laksawng kengtu ṭha bantukin Pathian sinin nan hmuhmi laksawng kha midang ca ṭhatnak ah hmang cio u.” (1 Pet. 4:10) Midang an nah a chuak sual lai asiloah an lung a dong sual lai ti phan ruangah kan ngeihmi laksawng kha a ṭha bik in hman loin kan um awk  a si lo. Cutin kan tuah ahcun Jehovah kha a ṭha bik in kan pe kho lai lo.

8. Kuatkhat Korin 4:6, 7 ningin kan laksawng he aa tlaiin porhlawtnak kha zeicah kan hrial awk a si?

⁸ Kan laksawng kha tling tein kan hman a hau, asinain porhlawtnak ah kan hman nakhnga lo kan i ralrin a hau. (1 Korin 4:6, 7 rel.) Tahchunhnak ah, Baibal cawnpiaknak thawknak ah hlawhtlinnak a hmumi na si men lai. Mah laksawng hman dingin naa cungcang awk a si lo! Asinain mah kong he aa tlaiin i porhlawt lo dingin i ralrin cu a biapi tukmi a si. Nai ah phungchim rian ah lungthawh awk ngai a simi hmuhtonnak pakhat na ngei i Baibal cawnpiaknak na thawk khawh hei ti u sih. Mah kong kha phungchim nan kalṭimi hna sin chim lai kha naa ngaih tuk. Asinain nan phu he nan i ton tikah unaunu pakhat nih mekazin a rak peknak kong kha a chimh hna. Anih nih mekazin a pek i nangmah nih Baibal cawnpiaknak na thawk. Mah tikah zeidah na tuah lai? Na hmuhtonnak nih nan phu chung i unau pawl thazaang a pek hna lai ti kha na hngalh ko nain mah kong chim awkah aa tlakmi a dang caan kha hngah dingin bia na khiah men lai. A ruang cu mekazin a rak pemi unaunu i aa lawmhnak kha tlauter na duh lo caah a si. Mah cu zaangfahnak langhternak a si. Asinain mah ruangah Baibal cawnpiaknak tuah loin na um lai lo. Na hmuhmi laksawng kha hmang!

9. Kan laksawng kha zeitindah kan hman awk a si?

⁹ Kan ngeihmi zei bantuk thiamnak paoh hi Pathian sinin kan hmuhmi laksawng a si ti kha i cinken hna u sih. Mah laksawng hna kha mahle mah i hlorhnak caah si loin Khrihfabu bawmhnak ca tu ah kan hman awk a si. (Fil. 2:3) Kan thazaang le kan thiamnak kha Pathian duhnak tuahnak ca i kan hman tikah i lawmh ding a ruang kan ngei lai. Mah cu midang nakin tam deuh kan tuah khawh caah le anmah nakin a ṭha deuhmi si kan i zuam caah si loin kan laksawng kha Jehovah thangṭhatnak ah kan hman caah a si.

10. Midang he i tahchunh cu zeicah aa tlak lomi a si?

¹⁰ Mi pakhat nih aa ralrin lo ahcun midang derthawmnak le amah thilti khawhnak tahchunhnak rap ah aa fawih kho. Tahchunhnak ah, unaupa pakhat nih zapi ca phungchimnak kha ṭha taktak in a chim men lai. Mah cu amah a thiam caah a si. Phungchim a thiam theng lomi unaupa pakhat kha a lung chungin a nautat men lai. Asinain mah unaupa cu a siangmi, fale cawnpiak a thiammi le phungchim rian ah lungtho tein aa telmi a si men lai. Jehovah rianṭuannak le midang bawmhnak  caah an laksawng a hmangmi unau tampi kan ngeihmi hna cu zeitluk in dah lunglawmh awk a si!

11. Jesuh i zohchunh awkah zeicah kan i zuam awk a si?

¹¹ Midang he i tahchunh kha kan hrial awk a si nain zumhfekmi unau pawl sinin cawnnak thawngin ṭhatnak kan hmu lai. Tahchunhnak ah, Jesuh kong kha ruathmanh. Jesuh bantukin mitling kan si lo nain a ṭha tukmi a sining le a tuahmi thilṭha hna in tampi kan cawn khawh. (1 Pet. 2:21) Kan si khawh chungin Jesuh kan i zohchunh tikah Jehovah salṭha kan hung si kho deuh lai i phungchim rian ah hmualngei deuh in kan i tel kho lai.

12-13. Siangpahrang David sinin zeidah kan cawn khawh?

¹² Mitlinglo an si nain zohchunh awk tlak a simi, zumhfekmi hna kong tampi kha Baibal ah kan hmuh khawh. (Heb. 6:12) Jehovah nih “ka duhmi phun a si” tiah a timi Siangpahrang David kong kha ruathmanh. (Lam. 13:22) David cu mitlinglo a si. A tak ti ahcun sualnak ngan cheukhat a rak tuah. Cutin a tuah ko nain anih cu kan caah zohchunh awk ṭha a si. Zeicah? Chimhhrinh a si tikah silhnalhnak bia zeihmanh a chim lo caah a si. Mah canah a fakmi chimhhrinhnak kha a cohlan i palhnak a tuahmi kha lungtak tein aa ngaichih. Cucaah Jehovah nih a ngaihthiam.—Salm 51:3, 4, 10-12.

¹³ Hitin kan i halnak thawngin David sinin kan cawn khawh: ‘Chimhhrinhnak kha zeitindah ka lehrulh? Ka palhnak kha ka cohlang colh maw asiloah ka palh lo ti langhter awkah kaa zuam maw? Midang kha sual ka phaw colh hna maw? Ka palhnak kha tuah ṭhan ti lo awkah kaa harh maw?’ Baibal chung i a dang zumhfekmi hna kong na rel tikah hi bantuk biahalnak hna hi naa hal kho. An tonmi le ka tonmi buaibainak cu aa khat maw? Zei bantuk sining ṭha hna dah an langhter? Thil sining pakhat cio ah hitin i hal: ‘Zumhfekmi mah Jehovah salle bantuk si awkah zeitindah ka tuah khawh?’

14. Zumtukhat unau pawl kan i zohchunh hnanak thawngin zeitindah ṭhatnak kan hmuh khawh?

¹⁴ Mino le kum upa unau pawl kan i zohchunh hnanak thawng zongin ṭhatnak kan hmu kho. Tahchunhnak ah, nan Khrihfabu chungah ṭhirual hneknak, chungkhar ralchanhnak asiloah damlonak ti bantuk harnak hna a tong nain zumhfek tein a ummi pakhatkhat kong kha na ruat kho lai maw? Ngeih na duh tukmi sining ṭha hna kha mah unaupa nih  a ngei maw? Zohchunh awk ṭha a simi mah unaupa kong na ruahnak thawngin na tonmi hneksaknak hna inkhawh awkah hman awk a tlakmi lam hna na cawn khawh men lai. Mah unau hna nih zumhnak kong ah zohchunh awk ṭha an kan chiahpiak caah kan i lawm tuk!—Heb. 13:7; Jeim 1:2, 3.

15. Jehovah rian ah kan i nuamh peng khawh nakhnga Paul nih zei bantuk ruahnak cheuhnak dah a kan pek?

¹⁵ Khrihfabu ah daihnak le lungrualnak a um nakhnga pakhat cio nih a ṭha bik in kan i zuam a hau. Kumzabu pakhatnak i Khrihfa hna kong kha ruathmanh. Annih nih aa khat lomi laksawng le rian hna an ngei. (1 Kor. 12:4, 7-11) Asinain mah ruangah pakhat le pakhat i zuamnak le i ṭhennak a chuak lo. Mah canah Paul nih “Khrih pum kha ṭhanter awkah” a herhmi thil tuah dingin Khrihfa pakhat cio kha tha a pek hna. Paul nih Efesa Khrihfa hna sinah hitin a ti: “Pum chung i a ummi nge hna nih anmah le an tuah awk cio an rak tuahnak thawng khan pum cu a ningpi in dawtnak in a ṭhang.” (Efe. 4:1-3, 11, 12, 16) Daihnak le lungrualnak karhter awkah Paul chimmi ningin a tuahmi unau pawl kha tuchan Khirhfabu zongah kan hmuh hna.

16. Zei tuah awkah dah bia kan khiah awk a si? (Hebru 6:10)

¹⁶ Midang he i tahchunh lo awkah biakhiak. Mah canah Jesuh sinin cawng law a sining hna kha i zohchunh awkah fakpi in i zuam. Cun zumhnak langhternak ah zohchunh awk ṭha a simi Baibal chan le tuchan mi hna sinin ṭhathnemhnak hmu. A ṭha bik in naa zuam peng ahcun Jehovah cu “miding lo a si lo. Rian nan rak ṭuanmi . . . kha a philh lai lo” timi bia kha na zumh khawh lai. (Hebru 6:10 rel.) A lunglawmhter awkah lungthin dihlak in naa zuammi kha Jehovah nih a sunsak timi hngalhnak nih lunglawm tein a rian ṭuan peng awkah aan bawmh lai.