1. ¿Kʼãrẽba sobiabiseabʉ dayirãra?

 SOBIARA neta jauredebema. Naʉ̃ba ũdubibʉ Jeowabara kãgabʉta dayirãra sobiapanamarẽã (Gál. 5:22). Daizeze Bedʼeaba jarabʉ: «Audre sobiabʉ daya diabʉde dayaʼa diapanʉira». Maʉ̃ba audre sobiapanʉ dayirãba Daizeze Bedʼea jaradia wãbʉrʉde akʉza mebẽrã kʼarebabʉrʉde (Hech. 20:35).

2, 3. (1) Gálatas 6:4ba jarabʉdebara, ¿kʼãrẽ nekʼãrẽ ũmeba kʼarebaseabʉ dayirã sobia bʼaita? (2) ¿Kʼãrẽta kʼawuadai naʉ̃ artikulodera?

² (Akʉra Gálatas 6:4). Naʉ̃ testode Pabloba jarabʉ bʉta nekʼãrẽ ũme dayirã kʼarebaita sobia bʼaita. Nããra, dayirãba jõma diaseabʉta diaibara Jeowaʼa, mawũã opanʉbʉrʉ sobia panañi (Mat. 22:36-38). Yi ũmeta, krĩcha ẽ baibara wuabemaraba obʉra audre yibiata daya obʉira, maʉ̃nebʉrʉ daya obʉra audre yibiata wuabemaba odaira. Ẽbẽra jõmaʉ̃ba daucha obe ẽ jõmaʉ̃ta awuarapanʉ baera, mawũãsidu Jeowa biga diaibara dayirãba nekʼãrẽ wiña obʉ kʼarea, mawũã ẽ bʉrʉ dayirãba nekʼãrẽ awuara diaseapanʉbʉrʉ, maʉ̃ kʼarea biga diaibara. Dayirãba jõma obʉra Jeowaba kʼarebadeba obʉ baera, maʉ̃ kʼarea mebẽã abaʉba bia obʉbʉrʉ nekʼãrẽ Jeowade oita, maʉ̃ba sobiabaibara iya obʉ kʼarea. Iya kʼawuabʉrʉta zokʼabʉ baera Jeowa ʉ̃rʉ ibia bedʼeaita, ãya mawũã bia obʉ kʼarea dayirã ãyiʉ̃me kĩrʉi kaʉde, awuarabʉrʉ kʼawuaibara ãya sãwũã obʉdeba.

³ Naʉ̃ artikulode kʼawuadayi, kʼãrẽba kʼarebaita krĩcha oẽ baita dayirãba nekʼãrẽ jõma okĩrãbʉta obeda ẽãne Jeowade oita, adewara kʼawuadayi dayirãba okʼawuabʉta sãwũã bia zokʼa kʼawuaita akʉza kʼãrẽta kʼawuaseapanʉta wuabemaraba opanʉneba.

4. ¿Kʼãrẽba sopʉabiseabʉ dayirãra? Yizata aba jara ũrĩbira.

⁴ Ʉ̃kʉrʉ mebẽrãba jõma ãya okĩrãbʉra obeda ẽ Jeowade oita, ʉ̃kʉrʉra zõnabasi baera mawũã ẽ bʉrʉ kayabʉ baera, naʉ̃ba ãyira sopʉa sentibibʉ. Mebẽã Carolʼta mawũã berabarisi, iyira ewari aba wãsi Daizeze Bedʼea jaradiaita nesidabʉmae, mawũã iya erbasi 35 estudio, maʉ̃ daucha kʼarebasi ẽbẽra mejãchaʉta buru kʼoedamarẽã. Maʉ̃ tẽã iyira mejãcha kayasi, maʉ̃ba iyira iyi deda piki besi. Carolʼba jarabʉ: «Mʉ̃a kʼawuabʉ mʉ̃ra kaya baera nemejãcha obe ẽãta wuabemaraira, mawũãsidu mʉ̃a sentibʉ mʉ̃ra kristiana bia ẽãta ãya obʉta obe ẽ baera, mʉ̃a nekʼãrẽ mejãcha okĩrãbʉmina obe ẽ, naʉ̃ta mʉ̃itara jipa zare». Carolʼbara iya nekʼãrẽ jõma diaseabʉta diakĩrãbʉ Jeowade oita akʉza dayirãbara kʼawuapanʉ Daizezebara so borekea akʉbʉta, maʉ̃ba iyira sobiabʉ naʉ̃ mebẽãba iya diaseabʉta diabʉde iyita.

5. (1) Krĩchapanʉbʉrʉ dayirãba Jeowa diabʉra iyitara zeri ẽãta, ¿kʼãrẽta kĩrãbedaibara? (2) Poto oũdubibʉdera, ¿mebẽãbara sãwũã iya diaseabʉta diasi Jeowaʼa?

⁵ Bʉta krĩcha obʉbʉrʉ bʉa nekʼãrẽ mejãcha obe ẽ kʼarea Jeowaita, bʉyikʉza naʉ̃ta widiseabʉ: «¿Kʼãrẽta kãgabʉ Jeowaba mʉ̃a omarẽã?». Jeowabara kãgabʉ, bʉa oseabʉta jõma oũdubimarẽã. Bari jaraita, mebẽã aba 80 poagabʉta krĩcha obʉ iyi 40 poagabada kĩrãkʼa obe ẽ baera Jeowadeta. Jeowa iya diaseabʉta diabʉmina, iyara krĩchabʉ Jeowabara akʉ ẽãta iya obʉra, mamina, ¿maʉ̃ra wãrĩnuka? Naʉ̃ panʉita krĩchara naʉ̃ta, iyi 40 poagabaside Jeowaʼa diabasi iya diaseabʉta, idibida iyi 80 poagabʉmina iya diaseabʉta diabʉ Jeowaʼa. Naʉ̃ba ũdubibʉ iyara ewari jõmaʉ̃nẽ dia zebʉrʉta iya diaseabʉta Jeowaʼa. Dayirãba krĩchapanʉbʉrʉ dayirãba Jeowa diabʉra iyitara zeri ẽãta, kĩrãbedaibara Jeowara dayirã kĩrãkʼa krĩchabʉ ẽãta, iyabʉrʉ kʼawua jidaseabʉ saʉ̃ta bigabʉta akʉza saʉ̃ta zeri ẽãta iyita. Maʉ̃ba dayirãba diaseabʉta diadara Jeowa iyira sobiabayi dayirã ʉ̃rʉ (Mateo 25:20-23).

6. ¿Kʼãrẽta kʼawuaseapanʉ María yizadeba?

⁶ Audre bigabai dayirãba akʉita kʼãrẽta oseapanʉta, mawũã akʉ ẽã kʼãrẽta oibara ẽ. Akʉdaya kʼãrẽta berabarisita mebẽã aba iyi trʉ̃ra Maríaʼta, iyira kayabʉ baera Daizeze Bedʼeara mejãcha jaradiabe ẽ, maʉ̃ba iyira sopʉabasi akʉza krĩchabasi iyira zeri ẽãta. Maʉ̃ne iya ũdusi iyi kongregasione bʉta mebẽã aba kamane ewari jõmaʉ̃nẽ baibarabasita, aramaʉ̃ta iya krĩchasi naʉ̃ mebẽã kʼarebaita. Maríaba jarabʉ: «Mʉ̃ra iyi deidʉ jʉ̃ẽsi iyiʉ̃meba kartadeba akʉza telepononeba jaradiaita, maʉ̃ tẽã mʉ̃ deidʉ̃ jʉ̃ẽbʉrʉdera mejãcha sobiabasi, iyita kʼarebasi baera». Dayirãsida audre sobia baseapanʉ krĩchadara kʼãrẽta oseapanʉta, mawũã krĩcha ẽ kʼãrẽta obeda ẽ. Dayirãba kʼawuadara Jeowaita obʉra audre biʼia oseapanʉta, mawũã ẽ bʉrʉ dayirãba obʉra audre yibiata, ¿kʼãrẽta oseapanʉ?

7. ¿Kʼãrẽ ũrãgʼa biata diasi Pedrobara mebẽrã?

⁷ Pedroba iyi kartade bʉdade jarasi mebẽrã, Daizezeba ãya nebia diadata zokʼadamarẽã wuabemara mebẽrã kʼarebadaita. Pedroba bʉsi: «Daizezebara mara aba abaka nebiata diasi, naʉ̃ta zokʼara mayirainʉ yi kʼarebaita  nezokʼara bia kĩrãkʼa. Daizezeba iyi biaba so zʉbʉria akʉbʉra dayirãʼa kĩrã awuara ũdubibʉ baera» (1 Ped. 4:10). Edaʉde ʉ̃kʉrʉra krĩcha zroma obʉ mawũã ẽ bʉrʉ kĩrʉbʉ ãya obe ẽ baera dayide kĩrãkʼa, mamina maʉ̃ kʼarea dayirãba okʼawuabʉta idubʉ ẽ baibara, naʉ̃ta idʉbʉra dayirãba Jeowa diaseabʉta jõma diada ẽ.

8. 1 Corintios 4:6, 7de jarabʉdebara, ¿kʼãrẽa ʉ̃tabʉta krĩcha ẽ baibara akʉza kʼãrẽa wuabemara jarakanʉma ẽ baibara bʉa kʼãrẽ okʼawuabʉta?

⁸ Dayirãba okʼawuapanʉra biʼia oibara, mamina jʉra kʼawuapanaibara ʉ̃tabʉta krĩcha ẽ baita (akʉra 1 Corintios 4:6, 7). Bari jaraita, bʉa Daizeze Bedʼea jaradia kʼawua baera mesera ũduseabʉ kʼaia jaradia jʉ̃drʉita, mamina jʉra kʼawuabaibara maʉ̃ta wuabema ẽbẽrarã jarakʼa ẽ baita. Krĩchara naʉ̃ta, bʉa Daizeze Bedʼea jaradiabʉde ũdusi ẽbẽra abaʉba ũrĩsita bʉ bedʼeata, aramaʉ̃ta bʉa iya jaradia jʉ̃drʉsi. Bʉ grupo ãba yi jʉrebʉrʉde bʉa ãya jara ũrĩbikĩrãbʉ bʉ sãwũã berabaridata, mamina bʉ mainʉ jʉ̃ẽbʉrʉde bʉa ũduyi mebẽã abaʉba jara ũrĩbibʉta iya ẽbẽra karta aba dia amaenata, iyira maʉ̃ kʼarea sobiabʉ. Bʉara ẽbẽra abaʉʼa Daizeze ʉ̃rʉ jaradia jʉ̃drʉsi mamina iyara bari kartara dia amaesi, bʉa kʼawuabʉ bʉ berabaridata mebẽrã jara ũrĩbira ãyira sobiaita bʉ berabarida kʼarea, mamina mebẽã karta diadata sopʉa sentiseabʉ. Mamina bʉara krĩchabʉ jara ẽ baita, awuarabʉrʉ tẽãne jaraita, mawũã ora, mebẽãta sobiabiyi akʉza kãgata ũdubiyi. Mawuẽrã, bʉita zare ẽ bʉrʉ Daizeze Bedʼea jaradia jʉ̃drʉita naʉ̃ obʉta idubʉrãra.

9. ¿Sãwũã zokʼaseapanʉ dayirãba nekʼãrẽ okʼawuapanʉra?

⁹ Kĩrãbedaibara dayirãba idi nekʼãrẽ okʼawuabʉra Daizezedeba zebʉta, maʉ̃ba maʉ̃ nebiara kongregasion biaita, mawũã dayi biaita ẽ (Filip. 2:3). Dayirãba okʼawuabʉta bia zokʼapanʉbʉrʉ Jeowade oita sobia panañi, mamina sobiapana ẽ bayi wuabemarane audre bia opanaira, awuarabʉrʉ sobia panañi dayirãba okʼawuabʉta zokʼapanʉra Jeowa ʉ̃rʉ ibia bedʼeaita.

10. ¿Kʼãrẽa krĩcha ẽ baibara wuabemarabara dayi biaba oda ẽãta?

¹⁰ Mamina jʉra kʼawuabaibara krĩcha ẽ baita wuabemarabara dayideaba bia oẽãta, mawũã krĩchaita biga ẽã baera. Bari jaraita, mebẽã abaʉba diskurso biʼia dia kʼawuabʉ, mamina iya krĩchaseabʉ iya diskurso biʼia dia kʼawuabʉ baera audre  yibiata wuabema mebẽrã yi diskurso bia diabe ẽãraira. Mamina naʉ̃ra mebẽrã yi diskurso bia diabe ẽãrabara awuru nebiata okʼawuapanʉ bari jaraita, awururata bia eda kʼawuabʉ Daizeze Bedʼea jaradia kʼawuabʉ akʉza warrara nejaradia kʼawuabʉ. Dayirãra sobiapanʉ dayirã organizasione erpanʉ baera mebẽrã nekʼãrẽ okʼawua opanʉrata akʉza ãya naʉ̃ta zokʼapanʉ baera mebẽrã kʼarebaita.

11. ¿Kʼãrẽa zarea odaibara Jesude kĩrãkʼa oita?

¹¹ Dayirãbara akʉ ẽ baibara wuabemaraba kʼãrẽaba okʼawuabʉta dayirãneira, mawũã ẽ bʉrʉ dayirãba kʼãrẽaba okʼawuabʉta wuabemaraneira, awuarabʉrʉ akʉibara ãya kʼãrẽ nebia okʼawuabʉta mawũã ãyideba kʼawuaita. Bari jaraita, dayirãbara nemejãcha kʼawuaseapanʉ Jesu yizadeba iya kʼãrẽ nebia erbadadeba akʉza kʼãrẽ nebia odadeba (1 Pedro 2:21). Dayirãba zarea opanʉbʉrʉ Jesude kĩrãkʼa odaita, Jeowaba zokʼabʉta biʼia odayi akʉza nejaradiabari bia bayi.

12, 13. ¿Kʼãrẽta kʼawuaseapanʉ nokʼo Davidʼdeba?

¹² Daizeze Bedʼeade ũdubibʉ yiza bia ẽbẽrarã dayirã kĩrãkʼa kayirua omiarabadaraba sãwũã nebiata osidata, maʉ̃ba dayirãbida ãyideba kʼawuaseapanʉ (Heb. 6:12). Krĩchadadrʉ nokʼo David ʉ̃rʉ, Daizeze Bedʼeaba jarabʉ Jeowaba jarasita iyi ʉ̃rʉ: «Yumakẽrã mʉ̃ so sobiabibʉta» (Hech. 13:22). Davidʼbara jõma daucha oẽ basi, edaʉde ʉ̃kʉrʉ kayirua zromata osi, Mawũãsidu dayirãitara iyira yiza bia ¿Kʼãrẽa? Jeowaba iya kayirua odata jarasidera, aramaʉ̃ta iyira soiduba jẽda krĩchasi baera, maʉ̃ba Jeowaba kĩrãduasi iya kayirua odara (Sal. 51:3, 4, 10-12).

¹³ Dayirãba Davidʼde kĩrãkʼa okĩrãpanʉbʉrʉ dayikʉza widiseabʉ: «¿Mʉ̃ra sãwũã opanʉ mʉ̃a maʉ̃ ũrãgʼa diabʉdadera? ¿Mʉ̃a nemitia obʉrʉdera, ĩjãbʉka wãrĩnu maʉ̃ nemitiara mʉ̃a osita? ¿Zarea obʉka mʉ̃a nãã nemitia oda jẽda oẽ baita?». Bʉa Daizeze Bedʼea lebʉde akʉseabʉ yiza ẽbẽrarã kʼẽrẽpapanʉrarã ʉ̃rʉ akʉza bʉyikʉza widiseabʉ: «¿Ãyi bedʼea zromara mʉ̃re kĩrãkʼa bʉka? ¿Kʼãrẽ nebiata ũdubisida ãyara? Akʉza ¿Mʉ̃ra sãwũã ãyi kĩrãkʼa baseabʉ?».

14. ¿Kʼãrẽne kʼarebabʉ mebẽrã kʼẽrẽpapanʉra yiza akʉiba?

¹⁴ Adewara idi ewadebida ũduseapanʉ yiza biata, bari jaraita bʉ kongregasione bʉbaibara mebẽrã warrarata mawũã ẽ bʉrʉ zõrãrãta kaya ũdubʉta akʉza yi  mebẽrãba Daizeze ode bai kãga ẽãta, ¿bʉa naʉ̃ mebẽrãne ũdʉbʉka nebia bʉa oita waebʉta? Bʉa maʉ̃ne ũdura ãya nebia erbʉta zarea ora bʉabida maʉ̃ nebia erbaita, mawũã bedʼea zroma zebʉrʉde awuantaita. Sobiapanʉ dayirã kongregasione bʉ baera mebẽrã dayirã yiza bia diapanʉta (Heb. 13:7; Sant. 1:2, 3).

15. ¿Kʼãrẽ ũrãgʼata diasi Pablobara dayirã sobia bʼaita Daizezeba zokʼabʉ obʉde?

¹⁵ Kongregasion aduʼa bʼaita, dayirã jõmaʉ̃ba diaibara dayirãba jõma diaseabʉta. Krĩchara kristianora siglo nããradebemata, ãyara nemejãcha okʼawuapanasi akʉza nemejãcha oibarabasi kongregasionebida (1 Cor. 12:4, 7-11). Mawũãsidu ãyira yõna ẽ basi, adewara Pablobara jarasi ãya oseabʉdeba kʼarebadamarẽã kongregasionta. Pabloba efesiora bʉ diabʉesi: «Aba abakaʉba opanʉ ãya oseabʉta yiya kʼarebaita akʉza mawũã ãba panaita, mãwũã wari wãita kãgade» (Efe. 4:1-3, 11, 12, 16). Pabloba jaradaba kʼarebasi kongregasion aduʼa bʼaita akʉza ãba bʼaita, idi ewadebida maʉ̃ta ũdupanʉ dayirã kongregasione.

16. Hebreos 6:10ba jarabʉdebara, ¿naʉ̃neba ʉ̃tara kʼãrẽta oita krĩchapanʉ?

¹⁶ Jipa krĩcha ẽ baibara wuabemaraba bia obʉta dayirãneira, mawũã ẽ bʉrʉ dayirãba bia obʉta wuabemaraneira. Awuarabʉrʉ kʼawuara Jesudeba, zarea ora iya nebia erbʉta bʉabida oũdʉbita, bia akʉra yiza bia nããbemadebemata akʉza idi ewadebemata. Zarea ora bʉa diaseabʉta jõma diaita Jeowaʼa akʉza ĩjãra Jeowaba kĩrãdua ẽ baita bʉa nebia obʉra (akʉra Hebreos 6:10). Zarea oibara Jeowaba zokʼabʉta obʉde sobia bʼaita, kĩrãbera Jeowabara ũdubʉta bʉa kʼãrẽ nebia obʉra.