1. Nso isinam esịt enen̄ede enem nnyịn?

 JEHOVAH oyom esịt enem nnyịn. Se inamde idiọn̄ọ oro edi ke idatesịt esịne ke otu mme edu emi edisana spirit esie esinamde owo enyene. (Gal. 5:22) Esịt esinen̄ede enem nnyịn ke ini isịnde idem ikwọrọ ikọ inyụn̄ inamde nsio nsio n̄kpọ in̄wam nditọete nnyịn. Se inamde etie ntre edi ke esịt esinen̄ede enem nnyịn ke ini inọde mme owo n̄kpọ akan ke ini itiede-tie yak mme owo ẹdinọ nnyịn.​—Utom 20:35.

2-3. (a) Galatia 6:4 owụt ke nso n̄kpọ iba ẹdin̄wam nnyịn ika iso ikop idatesịt ke se inamde inọ Jehovah? (b) Nso ke idineme ke ibuotikọ emi?

² Ke Galatia 6:​4, apostle Paul ama asiak n̄kpọ iba emi ẹdin̄wamde nnyịn ika iso ikop idatesịt. (Kot.) Akpa, akpana ida ofụri ukeme nnyịn inam n̄kpọ Jehovah. Ekpedi se inamde edi ofụri ukeme nnyịn, akpana inem esịt. (Matt. 22:​36-38) Ọyọhọ iba, ikpanaha imen idem nnyịn idomo ye mbon en̄wen. Ekpedi enyene n̄kpọ emi inen̄erede idiọn̄ọ ndinam, inen̄ede ikop idem, mîdịghe inyene ndammana ukeme, akpana ikọm Jehovah sia enye ọnọ nnyịn kpukpru se inyenede. Edi edieke enyenede usụn̄ ukwọrọikọ emi nditọete nnyịn ẹdiọn̄ọde ẹkan nnyịn, akpana inem esịt ke mmọ ẹda se mmọ ẹdiọn̄ọde ẹtoro Jehovah, idaha inam n̄kpọ man ẹwọrọ etop. Ke ntre, utu ke ndidomo idem ye mmọ, ikpakam ikpekpebe mmọ.

³ Ke ibuotikọ emi, iyekpep nte ikemede ndika iso n̄kop idatesịt edieke se nnyịn mîkemeke ndinam anamde esịt etịmede nnyịn. Ekpedi enyene se idiọn̄ọde ndinam, iyekpep nnennen se ikpadade se idiọn̄ọde oro inam. Iyokụt n̄ko se ikemede ndikpep nto mbon en̄wen.

4. Nso ikeme ndinam idem emem nnyịn? Nọ uwụtn̄kpọ.

⁴ Idem emem ndusụk ikọt Jehovah ke ntak emi udọn̄ọ m̀mê usọn̄ mîyakke mmọ ẹnam se mmọ ẹkpemade ndinam nnọ enye. Se ikọwọrọde Sista Carol edi oro. Enyene ini emi enye akakade ọkọkwọrọ ikọ ke itie emi ẹyomde-yom mme ọkwọrọikọ. Ini oro, enye ama ekpep owo 35 Bible onyụn̄ an̄wam ndusụk mmọ ẹyak idem ẹnọ Jehovah ẹnyụn̄ ẹna baptism. Ukwọrọikọ ama enem enye ata etieti! Edi ekem idem ama edibiak enye, ndien oro ama anam enye esidu ke ufọk ata ediwak ini. Enye ọdọhọ ete: “Mmọdiọn̄ọ ke idem mi idiyakke nnam se nditọete eken ẹnamde. Edi esitie mi nte mmọ ẹfọn ẹkan mi. Idem esimem mi sia mmen̄kemeke ndinam se n̄kpamade ndinam nnọ Jehovah.” Ọdọn̄ Carol ndinam ofụri se enye ekemede nnọ Jehovah. Ata eti n̄kpọ edi oro! Imenịm n̄ko ke oro anam esịt enem Abasi nnyịn emi esikopde owo mbọm.

5. (a) Nso ke ikpeti edieke idem ememde nnyịn sia nnyịn mîkemeke ndinam se ikpamade ndinam? (b) Ke ndise page 12 ye 13, didie ke brọda oro aka iso ndinam ofụri se enye ekemede nnọ Jehovah?

⁵ Ekpedi idem esimem fi ndusụk ini sia mûkemeke ndinam se akpamade ndinam nnọ Jehovah, bụp idemfo ete, ‘Nso ke Jehovah oyom mi nnam?’ Jehovah oyom fi anam ofụri ukeme fo etiene nte n̄kpọ etiede ye afo idahaemi. Yak inọ fi uwụtn̄kpọ: Idem emem eyenete an̄wan emi edide isua 80 ke imọ ikemeke ndinam se imọ ikesinamde ini imọ ikedide isua 40. Enye ekere ke kpa ye emi imọ inamde ofụri ukeme imọ, ke esịt inemke Jehovah. Edi ndi akpanikọ edi oro? Kere ise: Edieke enye akanamde ofụri ukeme esie ini enye edide isua 40, ndien tutu esịm ini enye edide isua 80 mi ke ananam ofụri ukeme esie, ọwọrọ idụhe ini emi enye etrede ndisinam ofụri ukeme esie nnọ Jehovah. Edieke itọn̄ọde ndikere ke se inamde inọ Jehovah inemke enye, akpana iti ke Jehovah esibiere se imọ imade ye se imọ mîmaha. Ke ntre edieke inamde ofụri ukeme nnyịn inọ Jehovah, enye ọyọdọhọ nnyịn: “Emetịm anam!”​—Men Matthew 25:​20-23 domo.

6. Nso ke ikpep ito Sista Maria?

⁶ Edieke isisịnde ekikere ke se ikemede ndinam utu ke se nnyịn mîkemeke ndinam, idisọn̄ke nnyịn ndikop idatesịt. Ekedi ntre ye Sista Maria emi udọn̄ọ mîyakke enye ọkwọrọ ikọ nte akpamade ndikwọrọ. Ke nsonso oro, n̄kpọ oro ama anam esịt etịmede enye, enye onyụn̄ ekere ke imọ inyeneke ufọn. Edi ekem ko enye ama editie ekere aban̄a sista kiet ke esop mmọ emi udọn̄ọ mîyakke ọwọrọ ke ufọk, onyụn̄ ebiere ndin̄wam sista oro. Enye ọdọhọ ete: “Mma nnam ndutịm ndikesitie ye enye nda fon n̄kwọrọ ikọ nnyụn̄ n̄wet leta nda n̄kwọrọ. Kpukpru ini emi n̄kade nnyọn̄ ndi, esịt ama esinem mi tutu ke mmekeme ndin̄wam eyeneka mi oro.” Esịt ekeme ndinen̄ede nnem nnyịn n̄ko edieke isisịnde ekikere ke se ikemede ndinam utu ke se nnyịn mîkemeke ndinam. Edi edieke mîsọn̄ke nnyịn ndinam se iyomde ndinam nnọ Jehovah, mîdịghe enyene ikpehe utom Abasi emi inen̄erede idiọn̄ọ ndinam, nso ke ikpanam?

7. Nso eti item ke apostle Peter ọkọnọ mme Christian?

⁷ Ke akpa leta emi apostle Peter ekewetde ọnọ mme Christian, enye ama ekpe mmọ ubọk ete ẹda se ededi emi mmọ ẹdiọn̄ọde ndinam ẹsọn̄ọ kiet eken idem. Enye ekewet ete: “Adan̄a nte mbufo owo kiet kiet ẹbọde enọ, ẹda emi ẹnam n̄kpọ ẹnọ kiet eken nte nti mme akama-ukpọhọde mfọnido Abasi eke  owo mîdotke.” (1 Pet. 4:10) Nnyịn ikpetreke ndisịn idem nnam se ededi emi idiọn̄ọde ndinam ke ntak emi ikerede ke mbon en̄wen ẹmọn̄ ẹfịbe nnyịn m̀mê ke oro ọmọn̄ anam idem emem mmọ. Edieke inamde utọ n̄kpọ oro, ọwọrọ nnyịn inamke kpukpru se ikemede ndinam nnọ Jehovah.

8. Akpa Corinth 4:​6, 7 owụt ke nso ikpanam nnyịn ikûnam inua uban̄a se ikemede ndinam?

⁸ Ana isịn idem inam se idiọn̄ọde ndinam, edi ana inen̄ede ikpeme mbak nnyịn idida mmọ inam inua. (Kot 1 Corinth 4:​6, 7.) Ke uwụtn̄kpọ, yak idọhọ ke emenen̄ede ọdiọn̄ọ nditọn̄ọ ukpepn̄kpọ Bible, kûtre ndinam se ọdiọn̄ọde oro. Edi ndinam se idiọn̄ọde enen̄ede okpụhọde ye ndida se idiọn̄ọde nnam inua. Yak idọhọ ke enyene nte ọkọtọn̄ọde nneme enye enem owo tutu owo oro enyịme ndikpep Bible. Ọdọn̄ fi ndinam mbon otu an̄wautom mbufo ẹkop. Edi ini akade ekesịm mmọ, eyenete an̄wan kiet ke etịn̄ nte imọ ikọkwọrọde ikọ inọ owo tutu owo oro ọbọ Enyọn̄-Ukpeme. Esiemmọ enye ọkọnọ owo Enyọn̄-Ukpeme, edi okwo ọkọtọn̄ọ ukpepn̄kpọ Bible. Nso ke afo edinam idahaoro? Ọmọdiọn̄ọ ke mbụk oro eyenen̄ede ọsọn̄ọ mbon otu an̄wautom mbufo idem, edi emekeme ndibiere ndimụm okwo n̄kama tutu ini en̄wen mbak oro idinam eyenete emi ọkọnọde owo Enyọn̄-Ukpeme do okûkop inemesịt aba. Edi kûtre ndibụp mme owo m̀mê ẹkpema ndikpep Bible. Kûtre ndinam se ọdiọn̄ọde oro!

9. Nso ke ikpada se idiọn̄ọde inam?

⁹ Ẹyak isiti ke ndammana ukeme ekededi emi inyenede edi enọ Abasi. Yak ida enọ oro isọn̄ọ nditọete idem utu ke ndida nnam n̄kpọ nsio idem nnyịn etop. (Phil. 2:3) Edieke idade odudu nnyịn ye ndammana ukeme nnyịn inam uduak Abasi, esịt eyenem nnyịn ke ntak emi inọde Jehovah ubọn̄, idịghe ke ntak emi idiọn̄ọde ndinam n̄kpọ n̄kan nditọete nnyịn m̀mê ke ntak emi ikerede ke imọfọn n̄kpọ ikan mmọ.

10. Ntak emi mîfọnke isimen idem nnyịn idomo ye mbon en̄wen?

¹⁰ Edieke nnyịn mîkpemeke, imekeme ndidue mmen se idiọn̄ọde ndomo ye se eyenete en̄wen mîdiọn̄ọke. Ke uwụtn̄kpọ, yak idọhọ ke eyenete enen̄ede ọdiọn̄ọ ndinọ utịn̄ikọ. Ke esịt esie, enye ekeme ndikere ke imọfọn ikan eyenete emi mînen̄ekede idiọn̄ọ ndinọ utịn̄ikọ. Edi eyenete emi mînen̄ekede idiọn̄ọ ndinọ utịn̄ikọ do ekeme ndisinọ owo n̄kpọ etieti, enen̄ede ọdiọn̄ọ ndibọk nditọ esie, mîdịghe enen̄ede esịn idem ke ukwọrọikọ. Enem nnyịn etieti ndinyene nditọete iban ye iren emi  ẹdade se mmọ ẹdiọn̄ọde ẹnam n̄kpọ Jehovah ẹnyụn̄ ẹn̄wam nditọete!

11. Nso ikpanam idomo ukeme ndikpebe Jesus?

¹¹ Kpa ye emi mîkpanaha imen idem nnyịn idomo ye mbon en̄wen, imekeme ndikpep ediwak n̄kpọ nto nti ikọt Jehovah. Da Jesus ke uwụtn̄kpọ. Kpa ye emi nnyịn mîfọnke ima nte enye ọkọfọnde ama, imekeme ndikpep ekese nto nti edu esie ye nte enye ekesinamde n̄kpọ. (1 Pet. 2:21) Edieke idomode ofụri ukeme nnyịn ndikpebe Jesus, iyenen̄ede inam n̄kpọ Jehovah yak ọfọn inyụn̄ inen̄ede idiọn̄ọ ndikwọrọ ikọ.

12-13. Nso ke ikeme ndikpep nto Edidem David?

¹² Ikpese N̄wed Abasi, iyokụt ediwak nti iren ye iban emi ikpekpebede kpa ye emi mmọ mîkọfọnke ima. (Heb. 6:12) Owo kiet ntre edi Edidem David emi Jehovah okokotde “owo emi ekemde esịt ye ami.” Bible en̄wen akabade itie Bible oro nte “utọ owo emi nsimade n̄kan.” (Utom 13:22) Edi David ikọfọnke ima, enye ama akam anam ikpọ idiọkn̄kpọ. Kpa ye oro, enye edi se ikpekpebede. Nso inam edi? Ntak edi ke ini ẹkenen̄erede enye, enye ikoyomke se etịn̄de anyan̄a idem, edi ama enyịme ọkpọsọn̄ item oro ẹkenọde enye onyụn̄ enen̄ede atua n̄kpọfiọk. Oro ama anam Jehovah efen ọnọ enye.​—Ps. 51:​3, 4, 10-12.

¹³ Usụn̄ kiet emi ikemede ndikpebe David edi ndibụp idem nnyịn: ‘Nsinam n̄kpọ didie ke ini ẹnọde mi item? Ndi mmesisọp nnyịme ndudue mi m̀mê mmesiyom se ntịn̄de nnyan̄a idem? Ndi mmesisọp ndọhọ ke mbon en̄wen ẹkedue? Ndi mmesidomo ofụri ukeme mi mbak ndifiak nnam ndudue oro?’ Emekeme ndibụp idemfo utọ mme mbụme ntem ke ini okotde aban̄a nti iren ye iban eken ke Bible. Ndi mmọ ẹma ẹnyene ukem mfịna emi afo enyenede? Nso nti edu ke mmọ ẹkenyene? Ke ini okotde aban̄a owo mmọ kiet kiet, bụp idemfo: ‘Didie ke n̄keme nditie nte eti asan̄autom Jehovah emi?’

14. Nso ufọn ke idibọ edieke ikpebede ikọt Jehovah mfịn?

¹⁴ Imekeme ndibọ ufọn n̄ko edieke ikpebede mme asan̄autom Jehovah mfịn, edide ikpọ owo m̀mê nditọwọn̄. Ke uwụtn̄kpọ, ndi enyene owo ke esop mbufo emi ọsọn̄ọde ada ọyọ idomo utọ nte idiọk udọn̄ọ, ubọkn̄ka esie ndiyom enye anam se Jehovah mîmaha, m̀mê ubon esie ndikọbọ enye? Ndi enye enyene nti edu emi akpamade ndikpebe? Edieke etịmde ese uwem utọ mme owo oro, emekeme  ndikpebe ata nti edu emi ẹdin̄wamde fi ọyọ idomo n̄ko. Enem nnyịn ndinyene mme owo emi ẹsọn̄ọde ẹda ye Jehovah ntre emi ikemede ndikpebe!​—Heb. 13:7; Jas. 1:​2, 3.

15. Nso item ke apostle Paul ọkọnọ emi ekemede ndin̄wam nnyịn ika iso ikop idatesịt ke se inamde inọ Jehovah?

¹⁵ Ana nnyịn owo kiet kiet idomo ofụri ukeme nnyịn man inam emem odu ke esop inyụn̄ idiana kiet. Mme Christian ke eyo mme apostle ẹkenyene nsio nsio enọ ye nsio nsio utom. (1 Cor. 12:​4, 7-11) Edi oro ikanamke mmọ ẹmia mbuba ẹkûnyụn̄ udiana kiet. Paul ọkọdọhọ owo mmọ kiet kiet yak ẹnam se idin̄wamde mmọ ẹka iso ẹdiana kiet. Enye ekewet ọnọ mme Christian ke Ephesus ete ke edieke owo kiet kiet adade enọ esie anam se akpanade enye anam, ke oro ayanam mmọ ẹdiana kiet, ima onyụn̄ odu ke otu mmọ. (Eph. 4:​1-3, 11, 12, 16) Mbon emi ẹkenamde item esie oro ẹma ẹnam emem odu ke esop, mmọ ẹnyụn̄ ẹdiana kiet. Se ikụtde ke esop Abasi edi oro mfịn n̄ko.

16. Nso ke ikpebiere ndinam? (Mme Hebrew 6:10)

¹⁶ Biere ke imọ idimenke idem imọ idomo ye mbon en̄wen. Kam kpep n̄kpọ ban̄a Jesus nyụn̄ ndomo ndikpebe nti edu esie. Kpep n̄kpọ n̄ko to nti ikọt Abasi ke Bible ye mme asan̄autom esie mfịn. Nte akade iso ndinam ofụri ukeme fo, nịm ke Jehovah ‘ikwan̄ake eke ekpesịnde enye efre utom fo.’ (Kot Mme Hebrew 6:10.) Ka iso nem esịt ke se anamde ọnọ Jehovah nyụn̄ diọn̄ọ ke esịt eyenem enye edieke anamde ofụri ukeme fo.