1. Étɛ́ ka nɔ ná mǐ awǎjijɛ e gɔ́ngɔ́n é?

 JEHOVAH ba ɖɔ mǐ ní ɖó awǎjijɛ. Mǐ tuun mɔ̌, ɖó awǎjijɛ ɔ, akpáxwé nǔ e gbigbɔ mímɛ́ nɔ ná mɛ é tɔn ɖé wɛ. (Ga. 5:22) Ðó nǔnámɛ nɔ d’awǎjijɛ nú mɛ hú nǔyíɖomɛsí wútu ɔ, ényí mǐ nɔ wa azɔ̌ syɛ́nsyɛ́n ɖo sinsɛnzɔ́ ɔ mɛ, bó nɔ lɛ́ d’alɔ nɔví mǐtɔn lɛ́ ɖo ali vovo lɛ́ nu ɔ, mǐ nɔ ɖó awǎjijɛ e gɔ́ngɔ́n é.—Mɛ. 20:35.

2-3. (a) Sɔgbe xá Galátinu lɛ́ 6:4 ɔ, nǔ we tɛ́ lɛ́ ka ná d’alɔ mǐ bɔ mǐ ná kpo ɖo awǎjijɛ ɖó wɛ ɖo sinsɛnzɔ́ Jehovah tɔn mɛ? (b) Étɛ́ lɛ́ mǐ ka ná gbéjé kpɔ́n ɖo xóta élɔ́ mɛ?

² Sɔgbe xá Galátinu lɛ́ 6:4 ɔ, mɛsɛ́dó Pɔ́lu ɖɔ xó dó nǔ e ná d’alɔ mǐ bɔ mǐ ná kpo ɖo awǎjijɛ ɖó wɛ é we jí. (Xa.) Nukɔntɔn, mǐ ɖó ná nɔ ná nǔ ɖagbe hú gǎn e mǐ ɖó é Jehovah. Ényí mǐ nɔ ná ɛ nǔ ɖagbe hú gǎn e mǐ ɖó é ɔ, mǐ ná ɖó awǎjijɛ. (Mat. 22:36-38) Wegɔ́, mǐ ɖó ná nyi alɔ nú mǐɖée sísɔ́ jlɛ́ dó mɛ ɖěvo lɛ́ wú. Ényí mǐ ná bó tlɛ kpé wú bó nɔ wa nǔ ɖěbǔ, ɖó lanmɛ mǐtɔn e ɖo ganjí é, azɔ̌ e mǐ kplɔ́n é, alǒ nǔwúkpíkpé e mǐ ɖó lɛ́ é wútu ɔ, Jehovah wɛ mǐ ɖó ná dókú ná. È ná ɖɔ ɔ, nǔ e mǐ ɖó lɛ́ é bǐ ɔ, é wɛ ná mǐ. Ðo alɔ ɖěvo mɛ ɔ, ényí sinsɛnzɔ́ ɔ sín akpáxwé ɖé lɛ́ nɔ kpa mɛ ɖěvo lɛ́ hú mǐ ɔ, xomɛ ɖó ná hun mǐ ɖɔ, yě ɖo nǔwúkpíkpé e yě ɖó lɛ́ é zán dó kpa susu nú Jehovah wɛ, é nyí bó ná dó sɔ́ yěɖée su, alǒ, ɖó hwɛjijɔ cejɛ́nnábí tɔn lɛ́ wú ǎ. Énɛ́ wú ɔ, mǐ ɖó ná hwlɛ́n agba xá yě ǎ, é nyɔ́ wa ɔ, mǐ ɖó ná kplɔ́n nǔ ɖo yě gɔ́n.

³ Ényí mǐ nɔ mɔ ɖɔ mǐ kún sɔ́ sixú wa nǔ káká ɖé ɖo sinsɛnzɔ́ e wa nú Jehovah wɛ mǐ ɖe é mɛ ó ɔ, xóta élɔ́ ná d’alɔ mǐ bɔ mǐ ná ɖí xwi xá linlin mɔ̌hun. Mǐ ná lɛ́ gbéjé lěe mǐ sixú zán nǔníná ɖěbǔ e mǐ ɖó é ganjí gbɔn é kpɔ́n, lobo ná wá kpɔ́n nǔ e kpɔ́ndéwú mɛ ɖěvo lɛ́ tɔn sixú kplɔ́n mǐ é.

4. Ninɔmɛ tɛ́ ka sixú zɔ́n bɔ awakanmɛ kú mɛ? Nǎ kpɔ́ndéwú ɖé.

⁴ Mɛsɛntɔ́ Jehovah tɔn ɖé lɛ́ tíin bɔ é byɔ́ ɖɔ yě ní bló hǔzúhúzú tawun tawun ɖé lɛ́, ɖó dogbó e mɛxóxwe, alǒ lanmɛ yětɔn e ma ɖo ganjí ǎ é ɖó nú yě lɛ́ é wú, bɔ énɛ́ nɔ vɛ́ wǔ nú yě tawun. Ninɔmɛ mɔ̌hun mɛ wɛ Carol ɖe. È jɔ wǔ i, b’ɛ ko wa sinsɛnzɔ́ ɖo fí e hudó sukpɔ́ ɖe é ɖé kpɔ́n. Hwenɛ́nu ɔ, Biblu kplɔ́nkplɔ́n 35 wú wɛ é nɔ kpé nukún dó, bó d’alɔ yě mɛ gěgé bɔ yě yi nukɔn, bó zé yěɖée jó nú Jehovah bó bló batɛ́mu. Sinsɛnzɔ́ ɔ kpa Carol. Énɛ́ gúdo ɔ, lanmɛ tɔn gblé, bɔ ɖibla nyí xwégbe jɛ́n é nɔ nɔ hwebǐnu. Carol ɖɔ: “Un tuun ɖɔ ɖó dogbó e lanmɛ ce ɖó nú mì lɛ́ é wútu ɔ, un kún sɔ́ sixú kpé wú, bó wa nǔ e mɛ ɖěvo lɛ́ sixú wa é ó, bɔ énɛ́ nɔ zɔ́n bɔ un nɔ mɔ ɖɔ un kún sɔ́ nyí Klisánwun ɖagbe yě ɖɔhun ó. Un sɔ́ nɔ kpé wú bó nɔ wa nǔ e nɔ jló mì ɖɔ má wa lɛ́ é bǐ ǎ, bɔ énɛ́ nɔ zɔ́n bɔ awakanmɛ nɔ kú mì.” Carol ba ná wa nǔ e wú é kpé é bǐ nú Jehovah, b’ɛ jɛxá ɖɔ è ní kpa ɛ tawun ɖó énɛ́ wú. Mǐ sixú kú d’é jí ɖɔ Mawu wǔvɛ́sexámɛtɔ́ mǐtɔn nɔ gó ɖó wǔ tɔn, ɖó é ɖo nǔ e wú é kpé lɛ́ é bǐ wa wɛ.

5. (a) Ényí awakanmɛ kú mǐ ɖó mǐ ma sɔ́ sixú wa nǔ e mǐ ba ná wa lɛ́ é bǐ ǎ wútu ɔ, étɛ́ mǐ ka ɖó ná flín? (b) Lěe mɔ gbɔn wɛ mǐ ɖe ɖo ɖiɖe ɔ mɛ é ɔ, nɛ̌ nɔví súnnu ɔ ka nɔ wa nǔ e wú é kpé é bǐ hwebǐnu ɖo sinsɛnzɔ́ Jehovah tɔn mɛ gbɔn?

⁵ Ényí hweɖélɛ́nu ɔ awakanmɛ nɔ kú we, ɖó dogbó e nǔɖé ɖó nú we é wútu hǔn, nɔ kanbyɔ́ hwiɖée ɖɔ: ‘Étɛ́ ba wɛ Jehovah ka ɖe ɖo así ce?’ Jehovah ba ɖɔ a ní wa nǔ e wú a kpé é bǐ ɖo ninɔmɛ towe din tɔn ɔ mɛ. Lin tamɛ dó nǔ élɔ́ jí: Awakanmɛ kú nɔví nyɔ̌nu e ɖó xwe 80 é ɖé, ɖó é sɔ́ sixú kpé wú bó wa nǔ káká ɖé ɖo sinsɛnzɔ́ ɔ mɛ lěe é nɔ ko wa gbɔn hwenu e é ɖó xwe 40 é ǎ wútu. É nɔ lin ɖɔ ényí émí ná bó tlɛ ɖo nǔ e wú émí kpé é bǐ xwíí wa wɛ ɔ, é kún nɔ dó xomɛhunhun nú Jehovah ó. Amɔ̌, nǔgbó jɛ́n ka wɛ a? Lin tamɛ kpɔ́n kpɛɖé. Ényí nɔví nyɔ̌nu énɛ́ ko ná nǔ ɖagbe hú gǎn e é ɖó é Jehovah hwenu e é ɖo xwe 40 ɖó wɛ é, bó ka lɛ́ kpo ɖo mɔ̌ wa wɛ din e é ɖó xwe 80 é hǔn, é gɔn nǔ ɖagbe hú gǎn e é ɖó é ná ɛ gbeɖé ǎ nɛ́. Ényí mǐ jɛ mimɔ jí ɖɔ mǐ kún sɔ́ ɖo nǔ káká ɖe wa wɛ, b’ɛ ná dó xomɛhunhun nú Jehovah ó hǔn, é byɔ́ ɖɔ mǐ ní flín mǐɖée ɖɔ Jehovah wɛ nyí mɛ e nɔ ɖɔ nǔ e nɔ nyɔ́ nukún tɔn mɛ é. Ényí mǐ nɔ wa nǔ e wú mǐ kpé é bǐ ɔ, Jehovah ná ɖɔ nú mǐ ɖɔ: “A wa nǔ ɖó ganjí!”—Sɔ́ jlɛ́ dó Matíe 25:20-23 wú.

6. Étɛ́ kpɔ́ndéwú Maria tɔn ka sixú kplɔ́n mǐ?

⁶ Ényí mǐ nɔ zé ayi ɖó nǔ e mǐ sixú wa é jí, b’ɛ ma nɔ nyí dó nǔ e mǐ ma sixú wa ǎ é jí ǎ ɔ, é ná bɔ wǔ nú mǐ bɔ mǐ ná ɖó awǎjijɛ. Ð’ayi kpɔ́ndéwú nɔví nyɔ̌nu e nɔ nyí Maria é tɔn wú; é ɖo azɔn jɛ wɛ, bɔ énɛ́ zɔ́n bɔ é sɔ́ nɔ sixú wa nǔ káká ɖé ɖo sinsɛnzɔ́ ɔ mɛ ǎ. Ðo bǐbɛ́mɛ ɔ, é flú tawun, bó mɔ ɖɔ émí kún sɔ́ nyɔ́ zán ó. Énɛ́ gúdo ɔ, Maria lin tamɛ dó nɔví nyɔ̌nu e ɖo agun tɔn mɛ bó ɖo azɔn syɛ́nsyɛ́n ɖé jɛ wɛ, bó ma sɔ́ sixú nɔ sí te sín zan jí ǎ é ɖé jí, bó wá gbeta ɔ kɔn bó ná d’alɔ ɛ. Maria ɖɔ: “Un bló tuto bó nɔ ɖɔ Mawuxó xá ɛ gbɔn alǒkan jí, bɔ mǐ nɔ lɛ́ jlá wɛn ɔ mɛ lɛ́ gbɔn wěmasɛ́dómɛ gblamɛ. Hweɖébǔnu e mǐ w’azɔ̌ ɖó kpɔ́ é ɔ, un nɔ lɛ́ kɔ wá xwégbe kpó awǎjijɛ kpó, b’ɛ nɔ su nukún ce mɛ ɖɔ un kpé wú bó d’alɔ nɔví nyɔ̌nu ce.” Ényí mǐ nɔ zé ayi ɖó nǔ e mǐ sixú wa é jí, b’ɛ ma nɔ nyí dó nǔ e mǐ ma sixú nɔ wa ǎ é jí ǎ ɔ, mǐ lɔ ná gɔ́ so nú awǎjijɛ mǐtɔn. Amɔ̌, ényí mǐ sixú wa nǔ gěgé, alǒ wa nǔɖé lɛ́ ganjí ɖo sinsɛnzɔ́ Jehovah tɔn mɛ ɔ ka ló?

7. Wě tají tɛ́ mɛsɛ́dó Piyɛ́ɛ ka ɖe xá Klisánwun lɛ́?

⁷ Ðo wěma nukɔntɔn e Mawu sɔ́ d’ayi mɛ nú mɛsɛ́dó Piyɛ́ɛ b’ɛ wlán é mɛ ɔ, é byɔ́ nɔví tɔn lɛ́ ɖɔ yě ní zán nǔníná ɖěbǔ e yě ɖó é dó dó wǔsyɛ́n lanmɛ nú nǔɖitɔ́ hǎtɔ́ yětɔn lɛ́. Piyɛ́ɛ wlán ɖɔ: “Nǔníná tɛnmɛ tɛnmɛ wɛ Mawu ná mi. Mɛ ɖokpó ɖokpó ɖó ná nyí nǔjíkpɔ́ntɔ́ ɖagbe nǔníná e Mawu ná ɛ tɔn, bó  ɖó ná zán nú ɖagbe mɛ bǐ tɔn.” (1 Pi. 4:10) Mǐ ɖó ná wa nǔ e wú mǐ kpé é bǐ bó zán nǔwúkpíkpé e mǐ ɖó lɛ́ é, mǐ ka ɖó ná xo nǔ kpɔ́n ɖɔ mɛ ɖěvo lɛ́ sixú hwan wǔ mǐ, alǒ awakanmɛ ná kú yě ǎ. Ényí mǐ ma wa nǔ e wú mǐ kpé é bǐ ǎ, bɔ lěe nǔ ná cí nú mɛ ɖěvo lɛ́ é wɛ nɔ ɖu ayi mɛ nú mǐ ɔ, mǐ ná ná nǔ ɖagbe hú gǎn e mǐ ɖó é Jehovah ǎ.

8. Sɔgbe xá 1 Kɔlɛ́ntinu lɛ́ 4:6, 7 ɔ, étɛ́wú mǐ ma ka ɖó ná yí go ɖó nǔníná e mǐ ɖó lɛ́ é wú ǎ?

⁸ Mǐ ɖó ná zán nǔníná e mǐ ɖó lɛ́ é bǐ mlɛ́mlɛ́, amɔ̌, mǐ ɖó ná cɔ́ mǐɖée bó ma wá jɛ go yí jí ɖó nǔníná e mǐ ɖó lɛ́ é wú ó. (Xa 1 Kɔlɛ́ntinu lɛ́ 4:6, 7.) Ði kpɔ́ndéwú ɔ, é sixú nyí Biblu kplɔ́nkplɔ́n ɖé bíbɛ́ xá mɛ lɛ́ mɛ wɛ alɔ bí nú we ɖe. A ɖó ná xo nǔ kpɔ́n dó nǔníná énɛ́ zínzán wú ǎ. Amɔ̌, é ɖo tají ɖɔ a ní flín ɖɔ émí kún ɖó ná yí go ɖó nǔníná énɛ́ wú ó. Mǐ ní ɖɔ ɖɔ agaɖanu din ɔ, a xo go mɛɖé ɖo sinsɛnzɔ́ ɔ mɛ bɔ é ɖó jlǒ tawun, bɔ a jɛ Biblu kplɔ́n xá ɛ jí. Akpakpa ɖo sísɔ́ we wɛ bɔ a ná ɖɔ nǔ e kúnkplá ɛ lɛ́ é bǐ nú gbɛ̌ta kúnnuɖegbé tɔn towe. Amɔ̌, ée a wá xo go mɛ e ɖo gbɛ̌ta ɔ mɛ lɛ́ é ɔ, nɔví nyɔ̌nu ɖé ɖo lěe nǔ lɛ́ yi gbɔn nú éyɛ́ ɖo sinsɛnzɔ́ ɔ mɛ é xó ɖɔ wɛ, bó ɖɔ ɖɔ émí xwlé alɔnuwéma ɖokpó mɛɖé. É xwlé alɔnuwéma ɖokpó mɛɖé, bɔ hwɛ bɛ́ Biblu kplɔ́nkplɔ́n ɖé. Étɛ́ a ka ná wa? A tuun ɖɔ lěe nǔ lɛ́ yi gbɔn é ɖiɖɔ nú gbɛ̌ta ɔ ná dó wǔsyɛ́n lanmɛ nú gbɛ̌ta ɔ, amɔ̌, a sixú wá gbeta ɔ kɔn bó ná nɔ te káká jɛ hweɖévonu e ali tɔn ná hun nú we dó é, ɖó a ba bó ná xlɛ́ nɔví nyɔ̌nu e xwlé alɔnuwéma ɖé mɛ é ɖɔ é kún kpé nǔ wú sɔ émí ó ǎ. Nǔ wa gbɔn mɔ̌ ná ɖe xomɛnyínyɔ́ xlɛ́. Amɔ̌, ma kpɔ́n dó mɔ̌ wú bó gɔn Biblu kplɔ́nkplɔ́n xwlé mɛ ó. A ɖó nǔníná tɔn; zǎn!

9. Nɛ̌ mǐ ka ɖó ná nɔ zán nǔníná mǐtɔn lɛ́ gbɔn?

⁹ Mǐ ɖó ná flín ɖɔ Mawu wɛ nyí tɔn bɔ mǐ ɖó nǔwúkpíkpé jɔwámɔ tɔn ɖěbǔ e mǐ ɖó é. Mǐ ɖó ná zán nǔníná énɛ́ lɛ́ dó dó wǔsyɛ́n lanmɛ nú agun ɔ, é nyí bó ná dó jlá ajɔ̌ nú mǐɖée ǎ. (Filí. 2:3) Ényí mǐ nɔ zán hlɔ̌nhlɔ́n mǐtɔn kpó nǔwúkpíkpé mǐtɔn lɛ́ kpó dó wa jlǒ Mawu tɔn ɔ, mǐ ná ɖó hwɛjijɔ e wú mǐ sixú j’awǎ é, ɖó mǐ nɔ xlɛ́ ɖɔ mǐ nɔ wa nǔ hú mɛ ɖěvo lɛ́, alǒ mǐ hú gǎn yě ǎ, é nyɔ́ wa ɔ, nǔníná mǐtɔn lɛ́ wɛ mǐ nɔ zán dó kpa susu nú Jehovah.

10. Étɛ́wú é ma ka sɔgbe ɖɔ mǐ ní nɔ jlɛ́ mǐɖée dó mɛ ɖěvo lɛ́ wú ǎ?

¹⁰ Ényí mɛɖé ma ɖo acéjí ǎ ɔ, é sixú jɛ nǔwúkpíkpé e é ɖó é jlɛ́ dó nǔwúmakpé mɛ ɖěvo tɔn wú jí. Ði kpɔ́ndéwú ɔ, nɔví súnnu ɖé sixú nɔ xwlé xóɖiɖɔ nú mɛ bǐ mɛ ganjí. É kpé nǔ wú ɖo ali énɛ́ nu. Énɛ́ wú ɔ, é sixú nɔ lin d’ayi mɛ ɖɔ émí kpɔ́n te hú nɔví súnnu e ma kpé nǔ wú sɔmɔ̌ ɖo ali énɛ́ nu ǎ é. Amɔ̌, nɔví súnnu e ma kpé xóɖiɖɔ nú mɛ bǐ wú sɔmɔ̌ ǎ é sixú nɔ hun alɔ dó ná nǔ mɛ tawun, nɔ kplɔ́n vǐ tɔn lɛ́ ganjí, alǒ nɔ ɖó kan dó sinsɛnzɔ́ ɔ wú titewungbe tɔn. Mǐ ɖó nɔví  súnnu kpó nɔví nyɔ̌nu kpó gěgé, bɔ yě nɔ zán nǔwúkpíkpé e yě ɖó lɛ́ é dó sɛn Jehovah, lobo nɔ lɛ́ dó d’alɔ mɛ ɖěvo lɛ́ ná, bɔ énɛ́ nɔ su nukún mǐtɔn mɛ tawun.

11. Étɛ́wú mǐ ka ɖó ná tɛ́n kpɔ́n bó xwedó kpɔ́ndéwú Jezu tɔn?

¹¹ Nǔgbó wɛ ɖɔ mǐ ɖó ná nyi alɔ nú mǐɖée sísɔ́ jlɛ́ dó mɛ ɖěvo lɛ́ wú, amɔ̌, kpɔ́ndéwú e mɛsɛntɔ́ Jehovah tɔn gbejínɔtɔ́ ɖěvo lɛ́ sɔ́ ɖ’ayǐ é sixú kplɔ́n nǔ gěgé mǐ. Kpɔ́ndéwú ɖagbe hú gǎn e mǐ sixú xwedó é wɛ nyí Jezu tɔn. Mɛ maɖóblɔ̌ wɛ é nyí có, mǐ sixú kplɔ́n nǔ gěgé dó jijɔ tɔn ɖaaɖagbe lɛ́, kpó lěe é wa nǔ gbɔn é kpó wú. (1 Pi. 2:21) Ényí mǐ wa nǔ e wú mǐ kpé é bǐ bó xwedó kpɔ́ndéwú tɔn télélé lěe mǐ kpé wú gbɔn é ɔ, mǐ ná húzú mɛsɛntɔ́ Jehovah tɔn ɖagbe lɛ́, bɔ alɔ ná lɛ́ bí nú mǐ hú gǎn ɖo sinsɛnzɔ́ ɔ mɛ.

12-13. Étɛ́ kpɔ́ndéwú axɔ́sú Davídi tɔn ka sixú kplɔ́n mǐ?

¹² Ðo Xó Mawu tɔn mɛ ɔ, mǐ mɔ kpɔ́ndéwú súnnu kpó nyɔ̌nu kpó gbejínɔtɔ́ gěgé tɔn; yě nyí hwɛhutɔ́ có, é jɛxá ɖɔ è ní xwedó kpɔ́ndéwú yětɔn. (Ebl. 6:12) Lin tamɛ dó axɔ́sú Davídi e wú Jehovah ɖɔ dó ɖɔ “mɛɖé wɛ é nyí, bɔ jijɔ tɔn nyɔ́ nukún ce mɛ” é jí. (Mɛ. 13:22) É ɖo mɔ̌ có, Davídi ka nyí mɛ maɖóblɔ̌ ǎ. Nǔgbó ɔ, é hu hwɛ syɛ́nsyɛ́n gěgé. Amɔ̌, kpɔ́ndéwú ɖagbe wɛ é nyí bɔ mǐ sixú xwedó. Étɛ́wú? Ðó hwenu e è gbɛ́ nǔ n’i é ɔ, é tɛ́n kpɔ́n bó ná ba hwɛjijɔ nú éɖée ǎ. É nyɔ́ wa ɔ, é yí gbe nú wě syɛ́nsyɛ́n e è ɖe xá ɛ é, bɔ nǔ e é wa nyi do é vɛ́ n’i tawun. Wǎgbɔ tɔn ɔ, Jehovah sɔ́ hwɛ kɛ ɛ.—Ðɛh. 51:5, 6, 12-14.

¹³ Bó ná dó ɖu le kpɔ́ndéwú e Davídi sɔ́ ɖ’ayǐ nú mǐ é tɔn ɔ, mǐ sixú nɔ kanbyɔ́ mǐɖée ɖɔ: ‘È ɖe wě xá mì ɔ, nɛ̌ un ka nɔ wa nǔ gbɔn? Un ka nɔ yá wǔ yí gbe nú nǔwanyido ce lɛ́ a, alǒ un nɔ tɛ́n kpɔ́n bó nɔ ba hwɛjijɔ nú nyiɖée? Un nɔ yá wǔ dó hwɛ mɛ ɖěvo lɛ́ wɛ a? Un ka nɔ dó gǎn syɛ́nsyɛ́n, bó sɔ́ ná nɔ wa nǔ ɖokpó ɔ lɛ́ nyi do ǎ a?’ Ényí a ɖo nǔ xa dó súnnu kpó nyɔ̌nu kpó gbejínɔtɔ́ ɖěvo e xó è ɖɔ ɖo Biblu mɛ lɛ́ é wú wɛ ɔ, a sixú nɔ kan nǔ mɔ̌hun lɛ́ byɔ́ hwiɖée. Yě ka ɖí xwi xá wǔvɛ́ e ɖí xwi xá wɛ a ɖe din lɛ́ é ɖɔhun wɛ a? Jijɔ ɖaaɖagbe tɛ́ lɛ́ yě ka ɖe xlɛ́? Ðo ninɔmɛ ɖokpó ɖokpó mɛ hǔn, nɔ kanbyɔ́ hwiɖée ɖɔ: ‘Nɛ̌ un ka sixú bló gbɔn bó ná cí mɛsɛntɔ́ Jehovah tɔn gbejínɔtɔ́ élɔ́ ɖɔhun hú gǎn?’

14. Ényí mǐ nɔ kpɔ́n nǔ dó nǔɖitɔ́ hǎtɔ́ ɖěvo lɛ́ wú ɔ, le tɛ́ énɛ́ ka sixú hɛn wá nú mǐ?

¹⁴ Ényí mǐ nɔ kpɔ́n nǔ dó nǔɖitɔ́ hǎtɔ́ mǐtɔn lɛ́ wú, yě ná bó tlɛ nyí mɛ wǐnnyáwínnyá, alǒ, mɛxómɔ ɔ, énɛ́ lɔ sixú wa ɖagbe nú mǐ. Ði kpɔ́ndéwú ɔ, a ka sixú lin tamɛ dó mɛ e ɖo agun towe mɛ, bó ɖo didɛ wɛ ɖo tagba  ɖé nu kpó gbejíninɔ kpó é ɖé jí a? Bóyá, é ɖo didɛ wɛ ɖo kɔgbídínúmɛ hǎgbɛ́ lɛ́ tɔn, gbeklánxámɛ xwédo tɔn, alǒ, lanmɛzɔn ɖé nu. A ka mɔ jijɔ ɖagbe ɖé lɛ́ ɖo mɛ ɔ sí, bó ba ná sɔ́ nǔ ná ganjí d’é jí a? Tamɛ linlin dó kpɔ́ndéwú ɖagbe e é sɔ́ ɖ’ayǐ é jí sixú d’alɔ we bɔ a ná mɔ ali tawun tawun e nu a ná ɖí xwi xá tagba e mɛ gbɔn wɛ a ɖe lɛ́ é ɖe é. É su nukún mǐtɔn mɛ tawun ɖɔ mǐ ɖó kpɔ́ndéwú gbɛɖe nǔɖiɖi tɔn énɛ́ lɛ́ bó sixú xwedó!—Ebl. 13:7; Ja. 1:2, 3.

15. Wě tɛ́ mɛsɛ́dó Pɔ́lu ka ɖe xá mɛ bɔ é sixú d’alɔ mǐ, bɔ mǐ ná kpo ɖo awǎ jɛ wɛ ɖo sinsɛnzɔ́ e wa nú Jehovah wɛ mǐ ɖe é mɛ?

¹⁵ Bó ná dó gɔ́ so nú fífá kpó bǔninɔ kpó ɖo agun ɔ mɛ ɔ, é byɔ́ ɖɔ mǐ mɛ ɖokpó ɖokpó ní wa nǔ e wú mǐ kpé é bǐ. Ð’ayi kpɔ́ndéwú Klisánwun xwe kanweko nukɔntɔn ɔ tɔn lɛ́ tɔn wú. Nǔníná vovo wɛ yě ɖó, bó lɛ́ ɖó azɔ̌ vovo lɛ́. (1 Kɔ. 12:4, 7-11) Amɔ̌, énɛ́ ka zɔ́n bónú agbahwlɛnhwlɛ́n kpó kínklán kpó byɔ́ tɛ́ntin yětɔn ǎ. É nyɔ́ wa ɔ, Pɔ́lu ɖɔ ɖɔ yě mɛ ɖokpó ɖokpó ní wa nǔ e é byɔ́ é bónú “agbaza Klísu tɔn ɔ ná yi nukɔn ɖo nǔɖiɖi mɛ.” Pɔ́lu wlán nǔ élɔ́ sɛ́dó Efɛ́zinu lɛ́: “Ényí wǔjɔnú lɛ́ ɖokpó ɖokpó ɖo azɔ̌ tɔn wa wɛ ɔ, agbaza ɔ bǐ nɔ su, bó nɔ ɖo nukɔn yi wɛ gbɔn wǎnyíyí mɛ.” (Efɛ́. 4:1-3, 11, 12, 16) Mɛ ɖěɖěe wa mɔ̌ lɛ́ é gɔ́ so nú fífá kpó bǔninɔ kpó; jijɔ ɖé lɛ́ wɛ bɔ è nɔ mɔ ɖo agun lɛ́ mɛ ɖo égbé.

16. Étɛ́ mǐ ka ɖó ná kán ɖ’é jí bá wa? (Eblée lɛ́ 6:10)

¹⁶ Kán ɖ’é jí bó ná nyi alɔ nú hwiɖée sísɔ́ jlɛ́ dó mɛ ɖěvo lɛ́ wú. Amɔ̌, kplɔ́n nǔ dó Jezu wú, bó dó gǎn bó sɔ́ nǔ nú jijɔ tɔn lɛ́. Kpɔ́ndéwú nǔɖiɖi tɔn e xó è ɖɔ ɖo Biblu mɛ lɛ́ é kpó hwe mǐtɔn nu tɔn lɛ́ kpó ní kplɔ́n nǔ we. Ényí a kpo ɖo nǔ e wú a kpé é bǐ wa wɛ ɔ, a sixú ɖeji ɖɔ Jehovah kún “nɔ dó hwɛ agɔ” ó; ‘é ná wɔn azɔ̌ e a wa é ǎ.’ (Xa Eblée lɛ́ 6:10.) Jehovah sinsɛn ní kpo ɖo awǎjijɛ dó nú we wɛ. Gɔ́ ná ɔ, tuun ɖɔ é nɔ mɔ gǎn e dó wɛ a ɖe bó ná dó xomɛhunhun n’i é, b’ɛ nɔ víví n’i.