1. Mɛni kɛ́ wɔfee lɛ, ehãa wɔnáa miishɛɛ waa?

 YEHOWA miisumɔ ni wɔ fɛɛ wɔná miishɛɛ. Nɔ hewɔ ni wɔkɛɔ nakai ji akɛ, miishɛɛ fata yibii ni emumɔ lɛ hãa wɔwoɔ ahe. (Gal. 5:22) Akɛni nɔhãmɔ hãa mɔ náa miishɛɛ fe hemɔ hewɔ lɛ, kɛ́ wɔtsu shiɛmɔ nitsumɔ lɛ jogbaŋŋ ni wɔye wɔbua wɔnyɛmimɛi lɛ yɛ gbɛi srɔtoi anɔ lɛ, wɔnáa miishɛɛ waa.​—Bɔf. 20:35.

2-3. (a) Tamɔ bɔ ni wɔnaa yɛ Galatiabii 6:4 lɛ, mɛɛ nibii enyɔ baaye abua wɔ ni wɔsɔmɔ Yehowa kɛ miishɛɛ be fɛɛ be? (b) Mɛni he wɔbaasusu yɛ nikasemɔ nɛɛ mli?

² Yɛ Galatiabii 6:4 lɛ, bɔfo Paulo tsĩ nibii enyɔ ni baaye abua wɔ ni wɔná miishɛɛ be fɛɛ be lɛ atã. (Kanemɔ.) Klɛŋklɛŋ nɔ lɛ ji, ni wɔbaapɛi wɔnifeemɔi amli wɔkwɛ akɛ, ani nɔ fɛɛ nɔ ni wɔbaanyɛ wɔtsu wɔhã Yehowa lɛ diɛŋtsɛ wɔtsuɔ lɛ. Kɛ́ wɔna akɛ nɔ fɛɛ nɔ ni wɔbaanyɛ wɔtsu lɛ wɔtsuɔ lɛ, belɛ esa akɛ wɔná miishɛɛ. (Mat. 22:36-38) Nɔ ni ji enyɔ lɛ ji, esaaa akɛ wɔkɛ wɔhe toɔ mɛi krokomɛi ahe. Nɔ fɛɛ nɔ ni wɔnyɛɔ wɔtsuɔ yɛ Yehowa sɔɔmɔ lɛ mli yɛ bɔ ni wɔgbɔmɔtsoŋ hewalɛ ji, nibii ni wɔkase, loo nyɛmɔi ni wɔyɔɔ lɛ naa lɛ, esa akɛ wɔda Yehowa shi yɛ he, ejaakɛ lɛ edro wɔ nibii kpakpai fɛɛ ni wɔyɔɔ lɛ. Nakai nɔŋŋ kɛ́ mɛi komɛi bɔɔ mɔdɛŋ yɛ sɔɔmɔ nitsumɔ lɛ fã ko mli fe wɔ lɛ, esa akɛ wɔná miishɛɛ akɛ amɛkɛ nyɛmɔi ni amɛyɔɔ lɛ tsuuu nii bɔ ni amɛ pɛ amɛbaaná he sɛɛ loo bɔ ni baahã ana akɛ amɛhi fe mɛi krokomɛi, shi moŋ amɛkɛmiitsu nii kɛmiiwo Yehowa hiɛ nyam. No hewɔ lɛ, nɔ najiaŋ ni wɔbaaye amɛhe awuŋa lɛ, esa akɛ wɔkase amɛ.

³ Yɛ nikasemɔ nɛɛ mli lɛ, wɔbaakwɛ nɔ ni wɔbaanyɛ wɔfee kɛ́ wɔnu he akɛ wɔnyɛɛɛ wɔtsu babaoo yɛ Yehowa sɔɔmɔ lɛ mli tamɔ bɔ ni wɔtsui shweɔ lɛ. Agbɛnɛ hu, wɔbaakwɛ bɔ ni wɔbaafee  wɔkɛ nyɛmɔi ni wɔyɔɔ lɛ atsu nii jogbaŋŋ, kɛ nɔ ni wɔbaanyɛ wɔkase yɛ mɛi krokomɛi adɛŋ.

4. Mɛni baanyɛ ahã Yehowa tsuji komɛi anijiaŋ aje wui? Gbaa niiashikpamɔ ko ni tsɔɔ nakai.

⁴ Yehowa tsuji komɛi nyɛɛɛ atsu babaoo yɛ esɔɔmɔ lɛ mli yɛ gbɔlɛ loo hela ko hewɔ, ni enɛ ehã amɛnijiaŋ eje wui. Nyɛmi yoo ko ni atsɛɔ lɛ Carol lɛ kɛ shihilɛ ni tamɔ nɛkɛ kpe. No mli lɛ, eesɔmɔ yɛ he ko ni hiamɔ lɛ da yɛ. Be ni eyɔɔ jɛmɛ lɛ, ená Biblia mli nikaselɔi 35 sɔŋŋ, ni eye ebua amɛteŋ mɛi pii ni amɛjɔɔ amɛhe nɔ amɛhã Yehowa ni abaptisi amɛ. Anɔkwa, ená miishɛɛ waa yɛ shiɛmɔ nitsumɔ lɛ mli. Nɔŋŋ ni hela ko bamɔ lɛ, ni enyɛɛɛ efɔ maŋ lɛ mli yaa tamɔ bɔ ni efeɔ tsutsu ko. Carol wie akɛ: “Mile akɛ mihela lɛ hewɔ lɛ, minyɛɛɛ matsu pii tamɔ bɔ ni mɛi krokomɛi tsuɔ lɛ, ni bei komɛi lɛ enɛ hãa minuɔ he akɛ mijáaa Yehowa jogbaŋŋ tamɔ amɛ. Miishwe ni matsu babaoo, shi mile faŋŋ akɛ minyɛŋ, ni kɛ́ misusu enɛ he lɛ, ehãa mimiishɛɛ fɛɛ tãa.” Carol miisumɔ ni efee babaoo ehã Yehowa, ni enɛ hi waa diɛŋtsɛ. Shi Yehowa nuɔ lɛ shishi ni ehiɛ sɔɔ nɔ ni enyɛɔ etsuɔ ehãa lɛ bianɛ lɛ.

5. (a) Kɛ́ wɔnijiaŋ je wui akɛni wɔnyɛɛɛ wɔtsu babaoo tamɔ bɔ ni wɔshweɔ lɛ, mɛni esa akɛ wɔkai? (b) Tamɔ bɔ ni wɔnaa yɛ mfonirii lɛ amli lɛ, mɛɛ gbɛ nɔ nyɛmi nuu lɛ etee nɔ ekɛ enyɛmɔ fɛɛ esɔmɔ Yehowa kɛjɛ eblahiiaŋ kɛbashi egbɔlɛ beiaŋ?

⁵ Kɛ́ bei komɛi lɛ, onijiaŋ jeɔ wui akɛni onyɛɛɛ otsu bɔ ni otsui shweɔ lɛ, bi ohe akɛ, ‘Mɛni Yehowa kpaa gbɛ yɛ midɛŋ?’ Yehowa miikpa gbɛ akɛ, obaajɛ otsuiŋ otsu nɔ fɛɛ nɔ ni oshihilɛ baaŋmɛ bo gbɛ bianɛ ni otsu ohã lɛ lɛ. Akɛ nɔkwɛmɔnɔ lɛ, ŋɔɔ lɛ akɛ nyɛmi yoo ko ni eye afii 80 lɛ nijiaŋ jeɔ wui akɛni enyɛɛɛ etsu babaoo yɛ sɔɔmɔ nitsumɔ lɛ mli tamɔ bɔ ni efeɔ be ni eye afii 40 lɛ. Eyɛ mli akɛ enyɛmɔ fɛɛ ekɛsɔmɔɔ Yehowa lɛ, shi loloolo lɛ enuɔ he akɛ Yehowa bɛ ehe miishɛɛ. Shi ani nakai eji lɛɛlɛŋ? Dabi. Kɛ́ nyɛmi yoo nɛɛ kɛ enyɛmɔ fɛɛ sɔmɔ Yehowa be ni eye afii 40 ni ekã he ekɛ enyɛmɔ fɛɛ miisɔmɔ Yehowa be ni eye afii 80 lɛ, belɛ enyɛmɔ fɛɛ ekɛsɔmɔɔ Yehowa lolo lɛ, aloo jeee nakai? Be fɛɛ be ni wɔbaanu he akɛ wɔnyɛɛɛ wɔtsu babaoo yɛ Yehowa sɔɔmɔ lɛ mli ni no hewɔ lɛ ebɛ wɔhe miishɛɛ lɛ, esa akɛ wɔkai akɛ Yehowa ni tsɔɔ nɔ ni kɛ́ wɔtsu lɛ enáa wɔhe miishɛɛ, shi jeee wɔ. Kɛ́ wɔtsu nɔ fɛɛ nɔ ni wɔhewalɛ kɛ wɔshihilɛ baaŋmɛ wɔ gbɛ ni wɔtsu wɔhã Yehowa lɛ, Yehowa baaná wɔhe miishɛɛ ni ebaahã wɔ “aekoo!”​—Okɛto Mateo 25:20-23 lɛ he.

6. Mɛni wɔkaseɔ yɛ Maria niiashikpamɔ lɛ mli?

⁶ Kɛ́ wɔkɛ wɔjwɛŋmɔ ma nɔ ni wɔbaanyɛ wɔtsu yɛ Yehowa sɔɔmɔ lɛ mli lɛ nɔ moŋ fe nɔ ni wɔnyɛŋ wɔtsu lɛ, wɔbaaná miishɛɛ. Naa nyɛmi yoo ko ni atsɛɔ lɛ Maria lɛ niiashikpamɔ. No mli lɛ, eeye hela ko ni hãaa enyɛ etsu babaoo yɛ shiɛmɔ nitsumɔ lɛ mli. Enɛ hã emiishɛɛ fɛɛ tã ni enu he akɛ ehe bɛ sɛɛnamɔ. Shi sɛɛ mli lɛ, esusu nyɛmi yoo ko ni eka saa mli lɛ he ni ekpɛ eyiŋ akɛ ebaaye ebua lɛ. Maria wie akɛ: “Mikɛ lɛ to gbɛjianɔ ni wɔtsɔɔ tɛlifoŋ kɛ lɛta nɔ wɔshiɛɔ. Be fɛɛ be ni mikɛ lɛ baaya shiɛmɔ lɛ, kɛ́ mikpa ni mibashɛ shĩa lɛ, mináa miishɛɛ ni mitsui nyɔɔ mimli akɛ minyɛ miye mibua minyɛmi yoo lɛ.” Kɛ́ wɔ hu wɔkɛ wɔjwɛŋmɔ ma nɔ ni wɔbaanyɛ wɔtsu yɛ Yehowa sɔɔmɔ lɛ mli lɛ nɔ moŋ fe nɔ ni wɔnyɛŋ wɔtsu lɛ, wɔbaaná miishɛɛ waa. Agbɛnɛ, nyɛhãa wɔsusua mɛi ni baanyɛ atsu babaoo yɛ Yehowa sɔɔmɔ lɛ mli loo amɛyɔɔ hesai krɛdɛi komɛi lɛ ahe.

7. Mɛɛ ŋaa kpakpa bɔfo Petro wo Kristofoi?

⁷ Yɛ klɛŋklɛŋ wolo ni bɔfo Petro ŋma lɛ mli lɛ, ewo enyɛmimɛi Kristofoi lɛ hewalɛ ni amɛkɛ nikeenii kɛ hesai ni amɛyɔɔ lɛ asɔmɔ amɛnyɛmimɛi Kristofoi lɛ. Eŋma akɛ: “Bɔ ni mɔ fɛɛ mɔ  ená nikeenii ko lɛ, nyɛkɛsɔmɔa nyɛhe akɛ Nyɔŋmɔ dromɔ lɛ ni jeɔ kpo yɛ gbɛi srɔtoi anɔ lɛ anɔkwɛlɔi kpakpai.” (1 Pet. 4:10) No hewɔ lɛ, esa akɛ wɔkɛ nikeenii kɛ hesai ni wɔyɔɔ lɛ atsu nii jogbaŋŋ kɛmɔ shi, ni esaaa akɛ wɔnuɔ he akɛ kɛ́ wɔfee nakai lɛ, no baahã wɔnyɛmimɛi lɛ aye wɔhe awuŋa loo amɛnijiaŋ aje wui. Kɛ́ wɔye wɔtsui yɛ bɔ ni mɛi baanu he amɛhã lɛ he lɛ, wɔnyɛŋ wɔkɛ wɔnyɛmɔ fɛɛ asɔmɔ Yehowa.

8. Yɛ nɔ ni awie yɛ 1 Korintobii 4:6, 7 lɛ naa lɛ, mɛni hewɔ esaaa akɛ wɔkɛ wɔnikeenii lɛ shwãa?

⁸ Esa akɛ wɔkɛ wɔnikeenii lɛ atsu nii jogbaŋŋ kɛmɔ shi. Shi esa akɛ wɔkwɛ jogbaŋŋ ni wɔkɛkashwã. (Kanemɔ 1 Korintobii 4:6, 7.) Akɛ nɔkwɛmɔnɔ lɛ, wɔteŋ mɛi komɛi yɛ ni ewaaa kwraa kɛhãaa wɔ akɛ wɔbaaje Biblia mli nikasemɔi ashishi, ni esa akɛ wɔkɛ nikeenii nɛɛ atsu nii jogbaŋŋ kɛmɔ shi. Shi esa akɛ wɔhã ehi wɔjwɛŋmɔ mli akɛ, kɛ́ akɛɛ wɔkɛ nikeenii nɛɛ atsu nii lɛ, no etsɔɔɔ akɛ wɔkɛshwã. Mɛni nɛkɛ kɛ́ wɔfee lɛ, no baatsɔɔ akɛ wɔkɛ nikeenii nɛɛ miishwã? Ŋɔɔ lɛ akɛ, nyɛsɛɛ nɛɛ onyɛ okɛ mɔ ko gba sane ni okɛ lɛ je Biblia mli nikasemɔ shishi ni enɛ ehã oná miishɛɛ waa. Ooshwe ni ogba mɛi ni yɔɔ oshiɛmɔyaa kuu lɛ mli lɛ niiashikpamɔ nɛɛ koni okɛwo amɛ hewalɛ. Shi be ni nyɛkpe lɛ, nyɛmi yoo ko gba niiashikpamɔ ko ni kɔɔ bɔ ni fee ni enyɛ ehã mɔ ko magazin lɛ he. Lɛ lɛ, ehã magazin, shi bo lɛ, onyɛ oje Biblia mli nikasemɔ shishi. No hewɔ lɛ, mɛni obaafee? Eyɛ mli akɛ oniiashikpamɔ lɛ baanyɛ awo kuu lɛ mli bii lɛ hewalɛ moŋ, shi ekolɛ obaanyɛ ogba nakai niiashikpamɔ lɛ be kroko bɔ ni afee ni okafite nyɛmi yoo lɛ ni hã magazin lɛ miishɛɛ. Kɛ́ ofee nakai lɛ, ehi waa ni ebaatsɔɔ akɛ osusuɔ onyɛmi lɛ he. Shi yaa nɔ okɛ mɛi aje Biblia mli nikasemɔ shishi, ejaakɛ bo hu onikeenii ji no, ni esa akɛ okɛtsu nii!

9. Te esa akɛ wɔkɛ wɔnikeenii lɛ atsu nii wɔhã tɛŋŋ?

⁹ Esaaa akɛ wɔhiɛ kpaa nɔ kɔkɔɔkɔ akɛ, dromɔ keenii fɛɛ ni wɔyɔɔ lɛ jɛ Nyɔŋmɔ ŋɔɔ. No hewɔ lɛ, esaaa akɛ wɔkɛ nikeenii nɛɛ wóɔ wɔhe nɔ. Moŋ lɛ, esa akɛ wɔkɛsɔmɔ wɔnyɛmimɛi lɛ. (Fip. 2:3) Kɛ́ wɔkɛ wɔhewalɛ kɛ wɔnyɛmɔ fɛɛ sɔmɔ Yehowa moŋ fe ni wɔkɛbaawó wɔhe nɔ ni wɔhã wɔnyɛmimɛi lɛ anu he akɛ wɔhi fe amɛ lɛ, no baahã wɔná miishɛɛ ejaakɛ wɔkɛ wɔnyɛmɔ lɛ miiwo Yehowa hiɛ nyam.

10. Mɛni hewɔ nilee bɛ mli akɛ wɔkɛ wɔhe baato mɛi krokomɛi ahe lɛ?

¹⁰ Mɛi komɛi kɛ amɛhe toɔ mɛi krokomɛi ahe yɛ nɔ ko ni amɛbɔɔ mɔdɛŋ yɛ mli fe amɛ lɛ mli. Shi esa akɛ wɔkwɛ jogbaŋŋ ni wɔkafee nakai. Akɛ nɔkwɛmɔnɔ lɛ, ekolɛ nyɛmi nuu ko bɔɔ mɔdɛŋ waa yɛ wiemɔhãmɔ mli. Ni no hewɔ lɛ yɛ etsui mli lɛ, enuɔ he akɛ nyɛmi nuu ko ni  leee wiemɔhãmɔ tamɔ lɛ lɛ ebɔɔɔ mɔdɛŋ. Shi ekolɛ nakai nyɛmi nuu lɛ ni ekɛɛ ebɔɔɔ mɔdɛŋ lɛ bɔɔ mɔdɛŋ waa yɛ gbɔfeemɔ, bii atsɔsemɔ, kɛ shiɛmɔ nitsumɔ lɛ mli. No hewɔ lɛ, lɛ hu ebɔɔ mɔdɛŋ yɛ nɔ ko mli kɛ̃. Eŋɔɔ wɔnaa waa akɛ, wɔyɛ nyɛmimɛi pii ni yɛ dromɔ keenii ni amɛkɛmiisɔmɔ Yehowa ni amɛkɛmiiye amɛmiibua amɛnyɛmimɛi lɛ.

11. Mɛni hewɔ esa akɛ wɔkase Yesu?

¹¹ Eyɛ mli akɛ esaaa akɛ wɔkɛ wɔhe toɔ mɛi krokomɛi ahe moŋ, shi wɔbaanyɛ wɔkase nii kɛjɛ Yehowa tsuji krokomɛi adɛŋ. Akɛ nɔkwɛmɔnɔ lɛ, eyɛ mli akɛ Yesu eye emuu ni wɔ lɛ wɔyeee emuu moŋ, shi wɔbaanyɛ wɔkase esui kpakpai lɛ kɛ bɔ ni ehi shi ehã lɛ. (1 Pet. 2:21) Kɛ́ wɔbɔ mɔdɛŋ wɔkase Yesu jogbaŋŋ lɛ, no baaye abua wɔ ni wɔsɔmɔ Yehowa jogbaŋŋ ni wɔtsu shiɛmɔ nitsumɔ lɛ hu jogbaŋŋ.

12-13. Mɛni wɔbaanyɛ wɔkase kɛjɛ Maŋtsɛ David dɛŋ?

¹² Awie hii kɛ yei anɔkwafoi pii ahe yɛ Biblia lɛ mli. Anɔkwafoi nɛɛ yeee emuu tamɔ wɔ nɔŋŋ, ni kɛ̃lɛ wɔbaanyɛ wɔkase amɛ. (Heb. 6:12) Amɛteŋ mɔ kome ji Maŋtsɛ David, mɔ ni Yehowa tsɛ lɛ akɛ ‘etsuinaa nuu’ lɛ. (Bɔf. 13:22) David yeee emuu. Anɔkwa, etɔ̃ tɔmɔi komɛi ni yɔɔ hiɛdɔɔ waa. Fɛɛ sɛɛ lɛ, wɔbaanyɛ wɔkase nibii babaoo kɛjɛ edɛŋ. Akɛ nɔkwɛmɔnɔ lɛ, be ni Yehowa jaje lɛ lɛ, ekɛ nibii ejieee enaa. Moŋ lɛ, ekpɛlɛ etɔmɔ lɛ nɔ ni ejɛ etsuiŋ ekpa Yehowa fai yɛ nɔ ni efee lɛ he. Enɛ hewɔ lɛ, Yehowa kɛ ehe esha lɛ ke lɛ.​—Lala 51:3, 4, 10-12.

¹³ Mɛni wɔbaanyɛ wɔkase yɛ David sane lɛ mli? Wɔbaanyɛ wɔbi wɔhe akɛ, ‘Kɛ́ awo mi ŋaa lɛ, te mifeɔ minii mihãa tɛŋŋ? Kɛ́ mitɔ̃ lɛ, ani mikpɛlɛɔ mitɔmɔ lɛ nɔ oya, aloo mikɛ saji jieɔ minaa ni mishwaa mɛi krokomɛi? Ani mimiaa mihiɛ waa koni mikatɔ̃ nakai tɔmɔ lɛ dɔŋŋ?’ Wɔbaanyɛ wɔbi wɔhe saji ni tamɔ nɛkɛ yɛ anɔkwafoi krokomɛi ni wɔkaneɔ amɛhe sane yɛ Biblia lɛ mli lɛ ahe. Akɛ nɔkwɛmɔnɔ lɛ, wɔbaanyɛ wɔbi wɔhe akɛ, ‘Ani naagbai ni amɛkɛkpe lɛ tamɔ wɔnɔ lɛ? Mɛɛ sui kpakpai amɛjie lɛ kpo?’ Ni be fɛɛ be lɛ, esa akɛ wɔbi wɔhe akɛ, ‘Te mafee tɛŋŋ makase Yehowa tsulɔ anɔkwafo nɛɛ jogbaŋŋ fe bɔ ni mifeɔ momo lɛ?’

14. Kɛ́ wɔkase wɔnyɛmimɛi Kristofoi lɛ, mɛɛ gbɛ nɔ wɔbaaná he sɛɛ?

¹⁴ Agbɛnɛ hu, wɔbaanyɛ wɔkase nii kɛjɛ wɔnyɛmimɛi Kristofoi lɛ adɛŋ ekɔɔɔ he eko afii abɔ ni amɛye. Akɛ nɔkwɛmɔnɔ lɛ, ani ole mɔ ko yɛ osafo lɛ mli ni etipɛŋfoi miinyɛ enɔ ni efee nɔ ko ni esaaa, ewekumɛi miite ashi amɛmiiwo lɛ, ebɛ hewalɛ, loo ekɛ naagba kroko ni tamɔ nakai miikpe shi eeya nɔ eesɔmɔ Yehowa? Mɛɛ  sui kpakpai nyɛmi nɛɛ jieɔ lɛ kpo ni obaasumɔ ni okase? Kɛ́ okase nyɛmi nɛɛ sui kpakpai lɛ, ekolɛ no baaye abua bo ni onyɛ odamɔ naagbai ni okɛkpeɔ lɛ anaa. Wɔmiida Yehowa shi waa akɛ wɔyɛ nyɛmimɛi ni feɔ nɔkwɛmɔnɔ kpakpa ni wɔbaanyɛ wɔkase amɛ. Amɛhãa wɔnáa miishɛɛ waa!​—Heb. 13:7; Yak. 1:2, 3.

15. Mɛɛ ŋaa bɔfo Paulo wo ni baanyɛ aye abua wɔ ni wɔya nɔ wɔsɔmɔ Yehowa kɛ miishɛɛ?

¹⁵ Kɛ́ wɔteŋ mɔ fɛɛ mɔ tsu nɔ ni eshihilɛ baaŋmɛ lɛ gbɛ ni etsu ehã Yehowa lɛ, ebaahã toiŋjɔlɛ kɛ ekomefeemɔ ahi asafo lɛ mli. Nakai blema Kristofoi lɛ fee. No mli lɛ, amɛyɛ nikeenii srɔtoi kɛ nitsumɔi srɔtoi. (1 Kor. 12:4, 7-11) Shi no hãaa amɛkɛ amɛhe ashi akaŋ loo amɛkɛ amɛhe abé. Paulo wo amɛhewalɛ ni amɛteŋ mɔ fɛɛ mɔ atsu egbɛfaŋnɔ koni “akɛtswa Kristo lɛ gbɔmɔtso lɛ ama shi.” Ekɛɛ amɛ akɛ: “Kɛ́ gbɔmɔtso lɛ henii lɛ eko fɛɛ eko miitsu nii jogbaŋŋ lɛ, ehãa gbɔmɔtso lɛ daa, be mli ni gbɔmɔtso lɛ tswaa ehe emaa shi yɛ suɔmɔ mli lɛ.” (Efe. 4:1-3, 11, 12, 16) Mɛi ni bo ŋaawoo nɛɛ toi lɛ ye amɛbua ni toiŋjɔlɛ kɛ ekomefeemɔ hi asafo lɛ mli tamɔ bɔ ni wɔnaa yɛ wɔsafoi lɛ amli ŋmɛnɛ lɛ.

16. Mɛni esa akɛ wɔtswa wɔfai shi akɛ wɔbaafee? (Hebribii 6:10)

¹⁶ Tswaa ofai shi akɛ okɛ ohe etoŋ mɛi krokomɛi ahe. Moŋ lɛ, kasemɔ Yesu ni obɔ mɔdɛŋ akɛ obaajie sui ni ejie lɛ kpo lɛ akpo. Agbɛnɛ hu, kasemɔ nii kɛjɛ anɔkwafoi ni awie amɛhe yɛ Biblia lɛ mli kɛ anɔkwafoi ni yɔɔ ŋmɛnɛ lɛ adɛŋ. Ná nɔmimaa akɛ, kɛ́ otee nɔ ojɛ otsuiŋ otsu nɔ fɛɛ nɔ ni oshihilɛ kɛ ohewalɛ baaŋmɛ bo gbɛ ni otsu ohã Yehowa lɛ, ‘Yehowa jeee mɔ ni ejaaa ni ehiɛ baakpa onitsumɔ lɛ nɔ.’ (Kanemɔ Hebribii 6:10.) No hewɔ lɛ, yaa nɔ osɔmɔ Yehowa kɛ miishɛɛ, ni kaahã ohiɛ kpa nɔ kɔkɔɔkɔ akɛ, ehiɛ sɔɔ nɔ fɛɛ nɔ ni ojɛɔ otsuiŋ otsuɔ ohãa lɛ lɛ.