1. Tera ae kona ni karekea iroura te kukurei ae bati?

 E TANGIRIRA Iehova bwa ti na kukurei. Ti ataa aei ibukina bwa te kimwareirei bon uaan te taamnei ae raoiroi. (IKar. 5:22) Ibukina bwa e kakukurei riki te anga nakon te anganaki, ti namakina te kukurei ngkana ti mwakuri korakora n te mwakuri ni minita ao ni buokiia tarira n te onimaki n aanga aika kakaokoro.—Mwa. 20:35.

2-3. (a) Ni kaineti ma I-Karatia 6:4, baikara bwaai aika uoua aika a na kateimatoa kukureira n ara beku ibukin Iehova? (b)Tera ae ti na rinanona n te kaongora aei?

² N I-Karatia 6:4, e taekini iai Bauro baika uoua aika kona ni kateimatoa kukureira. (Warekia.) Te moan, tiara bwa ti na angan Iehova ara kabanea ni konaa. Ti na boni kukurei ngkana ti angan Iehova ara kabanea ni konaa. (Mat. 22:36-38) Te kauoua, ti riai n aki kabotauira ma tabemwaang. N aki ongeia bwa tera aroni marurungira, kataneiaakira ke ara konabwai ni katiai tabera, ma ti bon riai ni kakaitau nakon Iehova. A bon reke bwaai ni kabane mairouna. Ma ngkana a a taraa n uaana riki aia mwakuri tabemwaang nakoira, ti riai ni kukurei ngkai a kamanenai aia konabwai n neboa iai Iehova, ao tiaki i bon ibukia. Ti riai n aki kaiangatoa ma ngaiia, ma ti riai ni karekea reireiara mairouia.

³ N te kaongora aei, ti na noria bwa ti na kangaa n nanomwaaka ngkana ti a noria bwa iai tian ara konabwai n ara beku. Ti na rinanoi naba arora ni kamanenai bwaintituaraoi ake iroura ao reireiara ake a reke man aia katoto tabemwaang.

4. Tera ae kona ni kairiri nakon te bwarannano? Aanga te katoto.

⁴ E kangaanga irouia tabeman ana toro Iehova, bwa a na kaangaraoa aroia ma kangaanga ake a reke man te kara ao te aoraki. E riki aei nakon Carol. E beku ngkoa n te tabo are a kainnanoaki riki iai taan uarongorongo. N te tai anne, e kairi reirei n te Baibara aika 35 ao ni buokia tabeman nakon te katabu ao te bwabetito. E rangi n uaana ana uarongorongo neiei! Ma imwina riki, e a korakora aorakina ao e aikoa kona ni kitana mwengana. E taku neiei, “Ibukin aorakiu, I a aikoa kona ni karaoi baike a kona ni karaoi tabemwaang, ao I namakinna iai bwa ai tiaki ngai te Kristian ae kakaonimaki. E boni bwara nanou ngkai I a aikoa kona ni karaoi baike I kani karaoi.” E tangiria Carol bwa e na anga ana kabanea ni konaa nakon Iehova. Ao e riai ni kamoamoaaki n anne! Ti kakoauaa ae e kakaitau naba Atuara ae nananoanga ibukin nanon neiei ae raoiroi.

5. (a) Tera ae ti riai n ururingnga ngkana e a bwara nanora ibukin tianakin ara konabwai? (b)N aron ae kaotaki n te taamnei, e kangaa te tari te mwaane anne n teimatoa n anga ana kabanea ni konaa n ana beku ibukin Iehova?

⁵ Ngkana ko bwarannano n tabetai ibukin tianakin am konabwai, titirakiniko ni kangai, ‘Tera ae tangiria Iehova mairou?’ E tangiria Iehova bwa ko na karaoa am kabanea ni konaa. Iangoa aei: E bwara nanon te tari te aine ae ai 80 ana ririki, ibukina bwa e aikoa kona ni karaoa ae bati n te mwakuri ni minita n aron are e kakaraoia ngke 40 ana ririki. E iangoia naba bwa e ngae ngke e anga ana kabanea ni konaa, ma e bon aki tau naba ibukini kakukureian Iehova. Ma e koaua anne? Karaua iangoia. E anga ana kabanea ni konaa neiei ngke 40 ana ririki, ao e teimatoa ni karaoa anne ngkai ai 80 ana ririki. Ngkana ti a moanna n iangoia ae e aikoa tau ara beku ibukini kakukureian Iehova, ti riai ngkanne n uringnga ae bon tii Iehova ae na baireia bwa tera ae na kukurei iai. Ngkana ti anga ara kabanea ni konaa, e na boni kangai Iehova nakoira: “E tamaroa am mwakuri!”—Kabotaua ma Mataio 25:20-23.

6. Tera reireiara man ana katoto Maria?

⁶ Ti kukurei riki ngkana ti kaatuui ara iango ni baike ti kona ni karaoi, ao tiaki i aoni baike ti aki kona ni karaoi. Iangoa te tari ae Maria ae rinanon te aoraki are e a tiatianaki iai korakorana n uarongorongo. N te moantai, e rawawata ao n namakinna ae ai akea uaana. Ma imwina, e a iangoa te tari te aine temanna n ana ekaretia ae e aikoa kona n teirake man ana kainiwene, ao e baireia Maria bwa e na buokia. E taku, “I iangoia bwa N na kaai n uarongorongo ma ngaia n te tareboon ao n te reta. Ao ni katoatai are e tia iai ara mwakuri, I okira mwengau ma te kukurei ma te raunnano ibukina bwa I ataia ae I a tia ni buoka tariu.” Ti kona naba ni karekea te kukurei anne ngkana ti kaatuua ara iango ni baike ti kona ni karaoi, ao tiaki ni baike ti aki kona ni karaoi. Ma tera arora ngkana e bati riki ae ti kona ni karaoia ke e nakoraoi ara beku ibukin Iehova n itera tabeua?

7. Tera ana reirei ni kairiri te abotoro Betero ae manena nakoia Kristian?

⁷ N ana moan reta te abotoro Betero ae kairaki koreana, e kaumakiia iai taari bwa a na kabonganai bwaintituaraoi ake irouia ke aia konabwai ibukini kateimatoaia raoia n te onimaki. E kangai: “Kam na kabongana te aeka ni bwaintituaraoi are tibwaaki nakoimi n tatabemaningkami nako n ami beku i marenami  ngkai tooro aika raoiroi ngkami aika kam a tia n anganaki ana akoi ae rianako te Atua.” (1Bet. 4:10) Ti riai ni kabonganai raoi ara konabwai ao n aki raraomaeakina tao bakantangia ke bwaran nanoia tabemwaang. Ngkana ti karaoa anne, ti na bon aki ngkanne kona n angan Iehova ara kabanea ni konaa.

8. Ni kaineti ma 1 I-Korinto 4:6, 7, e aera ngkai ti riai n aki kamoamoaira ibukin ara konabwai?

⁸ Ti riai ni kabongana raoi ara konabwai, ma ti riai naba n taratara raoi bwa ti na aki kamoamoaira iai. (Wareka 1 I-Korinto 4:6, 7.) N te katoto, ko mwaatai ni moana te reirei n te Baibara n taian auti. Kabongana raoi am konabwai anne! Ma e kakawaki bwa ko na uringnga ae ko na aki kamoamoako iai. Iangoia bwa aongkoa iai te bwai ae riki n am tai n uarongorongo ae kakaongora are e a kairiri nakoni moanakin te reirei n te Baibara. Ao ko ingainga ni kani karakina aei nakoia raom n uarongorongo. Ngke e a boo te kurubu, e a karaki temanna te tari te aine ae katuka te maekatin. E katuka te maekatin ao ngkoe ko moana te reirei n te Baibara. Tera ae ko na karaoia? Ko ataia ae a na kaungaaki taari n te baere ko rinanona, ma ko riai n taningaa te tai ae e angaraoi ibukin taekinana, bwa ko aonga n aki kabuaa kimwareirein tarim are e anganako te maekatin. Anne boni kaotan te akoi. Ma ae moamoa riki, tai katoka arom ni karekeia aomata aika na kan reirei n te Baibara. Anne bon am konabwai, kabongana raoi!

9. Tera arora ni kaineti ma te bwai n tituaraoi are ti anganaki?

⁹ Ti riai n ururingnga ae ara konabwai ni kabane boni bwaintituaraoi mairoun te Atua. Ti riai ni kamanenai ibukini kateimatoaia kaain te ekaretia, tiaki ibukini kanakoraoan arora. (IBir. 2:3) Ngkana ti kamanena korakorara ao ara konabwai ni karaoa iai nanon te Atua, e na bon reke iroura bukini kimwareireira. Ti na kimwareirei tiaki ibukina bwa a bati riki baike ti karaoi nakoia tabemwaang ke e tamaroa riki ara konabwai nakoia, ma ibukina bwa ti kabongana ara konabwai n neboa iai Iehova.

10. E aera ngkai e aki raoiroi bwa ti na kabotauira ma tabemwaang?

¹⁰ Ngkana e aki taratara raoi te aomata, e kona ni mwane n te bwai ni kamwane ae kabotauan ana konabwai ma mamaaran temanna. N te katoto, e kona te tari temanna n anga kabwarabwara aika tamaroa n taai ni bobotaki. Anne bon ana konabwai. Ma n ana iango, e kona ni kamangora te tari temanna ae tuai taneiai n anga te kabwarabwara. Ma ni koauana, te tari ae tuai taneiai anne, e kona tao  n nakoraoi riki arona ni kaotiota te akoi, n reirei ni kataneiaia natina ke e kaokaota riki te ingaingannano n te uarongorongo. Ai kakaitaura ngaira ngkai a bati taari aika kabonganai bwaintituaraoi ake irouia ni beku iai ibukin Iehova ao ni buokia tabemwaang!

11. E aera ngkai ti riai ni kakairi n ana katoto Iesu?

¹¹ E ngae ngke ti aki riai ni kabotauira ma tabemwaang, ma ti kona ni kakabwaiaaki ngkana ti karekea reireiara man aia katoto naake a kakaonimaki. Ibukini kamatataana, iangoa aron Iesu. E ngae ngke ti aki kororaoi n ai arona, ma a bati baike ti kona n reiakin man aroarona ao ana mwakuri aika raraoi. (1Bet. 2:21) Ngkana ti kabanea ara konaa ni kakairi n ana katoto, ti na riki iai bwa ana toro Iehova aika raoiroi ao n uaana riki n te mwakuri ni minita.

12-13. Tera reireiara iroun te Uea are Tawita?

¹² N te Baibara, ti nori iai aia katoto aomata aika kakaonimaki e ngae ngke aki kororaoi, aika ti kona ni kakairi irouia. (Ebera 6:12) Iangoa te Uea are Tawita are taekinna Iehova ni kangai, “te mwaane ae kakukureia nanou,” ke n rairana riki n te Baibara teuana, “te aeka n aomata ae I tatangiria.” (Mwa. 13:22, BK) E aki kororaoi Tawita. E a tia ni karaoi buure aika kakaiaki. Ma e rangi n raoiroi ana katoto ibukira. Bukin tera? Ibukina bwa ngke e kaetaki, e aki kataia ni karekea aonana. Ma e butimwaea te reirei ni kairiri ae matoatoa are e anganaki ao e nanorinano ni kabwaraa ana bure n te baere e a tia ni karaoia. Ngaia are e a kabwaraaki ana bure iroun Iehova.—TaiAre. 51:3, 4, 10-12.

¹³ Ti karekea reireiara iroun Tawita ngkana ti titirakinira ni kangai: ‘Tera arou ni kaineti ma te reirei ni kairiri? I waekoa ni kakoauaa kairuau ke I kataia ni karekea aonau? I waekoa ni bukinia tabemwaang? I kataia n aki manga karaoi kairuau ake I a tia ni karaoi?’ Ko kona naba n iangoi titiraki aikai ngkana ko wareki taekaia naake a kakaonimaki n te Baibara. A kaaitara ma kangaanga ake ko rinanoi? Baikara aroaroia aika a riai ni kamoamoaaki iai? N am tai n rinanon aanga akanne, titirakiniko ni kangai: ‘N na kangaa ni kakairi iroun ana toro Iehova ae kakaonimaki aei?’

14. Ti na kangaa ni kakabwaiaaki man arora ni kakairi irouia raora n te onimaki?

¹⁴ Ti kakabwaiaaki n arora ni kakairi irouia raora n te onimaki aika ataei ao aika kara. N te katoto, iangoa temanna n am ekaretia  ae kakaonimaki n nanomwaaka i aani kataakina, tao e kaririaki irouia tabonrorona, e kaitaraaki irouia ana utu ke e kerikaaki marurungina? Ko nora aroarona ae riai ni kamoamoaaki iai ae ko kani katotongnga? Ngkana ko iaiangoi ana katoto te aomata ae raoiroi anne, ko na bae n reiakin aanga ake ko kona iai n nanomwaaka i aani kataakim. Ai kakaitaura ngaira n aia katoto tabemwaang ibukin te onimaki ake ti kona ni kakairi iai! Anne boni bukini kimwareireira.—Ebera 13:7;Iak. 1:2, 3.

15. Tera ana reirei ni kairiri te abotoro Bauro ae kona ni buokira ni kateimatoa kimwareireira n ara beku ibukin Iehova?

¹⁵ Ibukini karikirakean te rau ao te katiteuanaaki n te ekaretia, ti riai n tatabemanira nako n anga ara kabanea ni konaa. Iangoa aroia Kristian n te moan tienture. E kakaokoro bwaintituaraoi ake irouia ao mwiokoaia. (1Kor. 12:4, 7-11) Ma a aki kairaki n aei bwa a na kaiangatoa ao n iraraure i marenaia. E kaungaia Bauro n tatabemania nako bwa a na karekei baike a kainnanoaki “ibukini kateimatoaan rabwatan te Kristo.” E korea aei Bauro nakoia kaain Ebeto: “Ngkana a bane bwain te rabwata n tatabeua nako ni mwamwakuri raoi, e buokaki te rabwata iai bwa e na rikirake i nanon te tangira.” (IEbe. 4:1-3, 11, 12, 16) Naake a karaoa aei, a karikirakea te rau ao te katiteuanaaki, aika aroaro aika ti nori n ara ekaretia ngkai.

16. Tera ae ti riai ni motinnanoia bwa ti na karaoia? (Ebera 6:10)

¹⁶ Motinnanoia bwa ko na rarawa ni kabotauko ma tabemwaang. Karekea reireiam iroun Iesu ao kataia ni kakairi n aroarona. Karekea kakabwaiaam mani katoto n te Baibara ao katoto n taai aikai ibukin te onimaki. Ngkai ko teimatoa n anga am kabanea ni konaa, kakoauaa ae Iehova “e aki ribuaka . . . ni mwanuokin ami mwakuri.” (Wareka Ebera 6:10.) Teimatoa ni kukurei n am beku ibukin Iehova ao kakoauaa ae e kukurei Iehova ngkana e noriko n anga am kabanea ni konaa ibukina.