1. ¿Kasa talataka atuma waaʼin?

 WANEE akuwaʼipaa eeka sutuma nüpülain Jehová shia tü talataakalü aaʼin. Müsüjeseʼe watüjaain saaʼu keeʼireein naaʼin Jehová talatüinjatüin waaʼin (Gal. 5:22). Talatüsü maʼin naaʼin chi wayuu aapakai nuulia chi aapünakai amüin, talatüsüjeseʼe waaʼin wanaa sümaa waküjain maʼin pütchi jee wakaalinjain na wawalayuukana (Aluw. 20:35).

2, 3. (1) ¿Kasa waaʼinrajatka süpüla ayatüin talatüin waaʼin saashin Galacia 6:4? (2) ¿Kasa wekirajaajeetka anain sünain ekirajaayakat tüü?

² ¿Kasa waaʼinrajatka süpüla ayatüin talatüin waaʼin? Naashin chi aluwataaushikai Pablo, piamasü kasa waaʼinrajatka (paashajeʼera Galacia 6:4). Tü palajatkat shia waʼyataainjanain nümüin Jehová süka süpüshuaʼa waaʼin. Waaʼinrüinjatü tia wapüshuaʼa (Mat. 22:36-38). Tü wane shia nnojoluinjatüin wayoujireʼerüin wakuwaʼipa namaa na waneinnua. Eereje süpüla waaʼinrüin wanee kasa sutuma anain waya, sutuma wekirajünüin jee shiale sutuma watüjain süpüleerua tia, waapa analuʼut nümüin Jehová, jama niain kaapajalain tü atüjaakat wamüin. Eere wanee wawala eekai nütüjain maʼin süpüleerua tü niʼyataainkat nümüin Jehová, talata waaʼin nümaa süka naaʼinrüin tia süpüla nuʼwaajüin Jehová, nnojotsü süpülajatüin nuʼwaataain suluʼu nukuwaʼipa. Watüja nanainjee na wawalayuukana suulia wayoujireʼerüin wakuwaʼipa namaa.

³ Sünain ekirajaayakat tüü, wekirajaajeerü anain tü waaʼinrajatkat süpüla nnojoluin sümalajaain waaʼin isale wachiki waaʼinrüin tü waaʼinreekalü amüin sünain aʼyatawaa nümüin Jehová. Otta müsia wekirajaajeerü anain tü waaʼinrajatkat süpüla waʼyataain nümüin Jehová sükajee tü kasa watüjakalü apüleerua jee tü kasa eekat süpüla watüjain nanainjee na waneinnua.

4. (1) ¿Kasa eeka süpüla sümalajaain atuma waaʼin? (2) Püküja tü alatakat sümüin Carol.

⁴ Eeshii wawalayuu laülaainnakana jee ayuuikana mojukana aaʼin sutuma nnojoluin süpüla naʼyataain nümüin Jehová maʼaka keeʼireein shia naaʼin. Tia shia tü alatakat sümüin wanee wawala kanüliasü Carol. Aʼyataapuʼusü shia sünain aküjaa pütchi suluʼu wanee mma eere choʼujaain Aküjalii pütchi. Eetaairü maʼaka 35 wayuu shikirajaka sünain tü Bibliakat jee sükaalinjain noʼutku nayakana süpüla woutiisain naya. ¡Anakatche maʼin tia! Ayuuijaakalaka shia mapa, isasü süchiki sujuʼitüin shipialuʼujee maʼakaapuʼu paala. Anuu sünüiki: «Tatüjaa aaʼu nnojoluin süpüla taaʼinrüin tü naaʼinrakat na waneinnua sutuma ayuulin taya, jülüjapejeʼe taaʼin nnojoluin anain takuwaʼipa noʼuluʼu Jehová maʼaka naaʼin nayakana. Mojuwaisü taaʼin sutuma nnojoluin süpüla taaʼinrüin tü taaʼinreekalü amüin». Süka shiʼyataweein maʼin Carol nümüin Jehová süka süpüshuaʼa saaʼin, anasü maʼin tü saaʼinrakat. Kojutusü tia nümüin Maleiwa süka nümüliajülin wayuu.

5. (1) ¿Kasa sotuinjatka waaʼin nnojoliire süpüla waaʼinrüin süpüshuaʼa tü waaʼinreekalü amüin? (2) Maʼaka weʼrüin suluʼu tü ayaakuaakalüirua, ¿kasa naaʼinraka chi wawalakai süpüla niʼyataain nümüin Jehová süka süpüshuaʼa naaʼin?

⁵ Mojule waaʼin sutuma nnojoluin waaʼinrüin tü waaʼinreekalü amüin, wasakira waaʼin sünain tüü: «¿Kasache keeʼireeka naaʼin Jehová taaʼinrüin?». Keeʼireesü naaʼin waʼyataainjanain nümüin süka süpüshuaʼa waaʼin wanaapünaa sümaa tü eekat süpüla wountuin. Jülüjataa waaʼin sukuwaʼipa wanee wawala laülaa, 80 suuyase. Mojusü saaʼin sutuma nnojoluin süküjain maʼin pütchi maʼakaapuʼu paala wanaa sümaa 40 suuyase. Mayaainjeʼe shiʼyataain nümüin Jehová süka süpüshuaʼa saaʼin, jülüjasü saaʼin nnojoluin talatüin naaʼin Jehová sümaa tü saaʼinrakat. ¿Pansaasüche tü jülüjakat saaʼin? Nnojo. Ayatüsia aʼyataain shia nümüin Jehová süka süpüshuaʼa saaʼin maʼakaapuʼu paala wanaa sümaa 40 suuyase. Jülüjale waaʼin nnojoluin talatüin Jehová wamaa sutuma palirüin waʼyataain nümüin, soto waaʼin niain neʼe Jehová aküjakai tü anakat nümüin jee tü nnojotkalü anain nümüin. Meerü nünüiki Jehová wamüin waʼyataale nümüin süka süpüshuaʼa waaʼin: «Anasü maʼin tü paaʼinrakat» (anasü paashajeʼerüle Mateo 25:20-23).

6. ¿Kasa watüjaka sünainjee sukuwaʼipa María?

⁶ Talateerü waaʼin jülüjale waaʼin tü eekat süpüla waaʼinrüin suulia jülüjain waaʼin tü nnojotkat süpüla waaʼinrüin. Jülüjataa waaʼin sukuwaʼipa wanee wawala kanüliasü María, nnojotsü süpüla süküjain maʼin pütchi sutuma ayuulin maʼin shia. Mojupuʼusü saaʼin jee jülüjapuʼusü saaʼin nnojoluin kasain anain apüla shia. Jülüjalaa sümaka saaʼin eein wanee wawala juʼletaka waneepia sutuma ayuulin shia. Süchajaaka sukuwaʼipa süpüla sükaalinjain shia. Anuu sünüiki María: «Oʼunawaipuʼusü taya shipialuʼumüin, aküjapuʼusü taya pütchi sümaa suluʼupünaa teleepono jee carta. Talatüsü maʼin taaʼin taleʼejapa tepialuʼumüin süchikijee takaalinjain tü tawalakat». Müshiʼiya wayakana, talatüsü waaʼin jülüjale waaʼin tü eekat süpüla waaʼinrüin suulia tü nnojotkat süpüla waaʼinrüin. ¿Jama wayale wainmain aʼyataain nümüin Jehová jee watüjale süpüleerua waneirua kasa? ¿Kasa waaʼinrajatka?

7. ¿Kasa pütchi anasü nüküjaka Pedro namüin na nuwalayuukana?

⁷ Tü palajatkat karaloʼuta nüshajaka Pedro, nüküjain namüin na nuwalayuukana nakaalinjainjanain na waneinnua sükajee tü kasa natüjakalü apüleerua. Müshi nia: «Naataʼawaisü tü atüjaa aapünakat jümüin nütüma Maleiwa.  Anakaja müleka jükaaliijiraale süka tü atüjaa aapünakat jümüin waneʼewaʼire jukua, maa aka wane aʼyataai eekai naaʼinrüin waneepia tü nüchekakat Maleiwa nüpüleerua» (1 Ped. 4:10). «Nnojoleerü taaʼinrüin wanee kasa tatüjaka apüleerua suulia mojuin naaʼin na waneinnua otta suulia suchunjain naaʼin», müle wanüiki mayaa, nnojoishiijaʼamata aʼyataain waya nümüin Jehová süka süpüshuaʼa waaʼin.

8. Saashin 1 Corinto 4:6, 7, ¿jamüshii nnojoliinjanaka waʼwaataain suluʼu tü kasa watüjakalü apüleerua?

⁸ Anashii wakaalinjale na waneinnua sükajee tü kasa watüjakalü apüleerua. Eejüinjatpejeʼe waaʼin suulia waʼwaataain suluʼu watüjain (paashajeʼera 1 Corinto 4:6, 7). Eesüjaʼa mapüleere pümüin puʼttuin sünain pikirajüin wayuu sünain tü Bibliakat. ¡Maaʼaya pia waneepia! Eejüinjatpejeʼe waaʼin suulia waʼwaataain suluʼu watüjain. Müleka anale pukuwaʼipa sünain aküjaa pütchi soʼu wanee kaʼi jee puʼttule sünain pikirajüin wanee wayuu sünain tü Bibliakat, eesüjaʼa keeʼireere paaʼin püküjain tia namüin na wawalayuu aküjakana pütchi pümaa soʼu tia. Shiasaʼa püküjainjatpa maʼin shia namüin, süküjalaa sümaka wanee wawala suuntuin saapüin wanee rewiisüta sümüin wanee wayuu. ¿Kasaje paaʼinraka sülatüle tia pümüin? Mayaainjeʼe eein süpüla sütütülaain naaʼin na wawalayuukana sutuma puʼttuin sünain pikirajüin wanee wayuu sünain tü Bibliakat, nnojoleerü püküjain tia suulia mojuin saaʼin tü wawalakat. Kamaneeshaatashi pia paaʼinrüle tia. Anapejeʼe ayatüle piʼyataain süchiirua pikirajüin wayuu sünain tü Bibliakat, jama mapüleein tia pümüin.

9. ¿Kasa waaʼinrajatka sükajee tü kasa watüjakalü apüleerua?

⁹ Soto waaʼin nümaʼanajeejatüin Jehová süpüshuaʼa tü kasa watüjakalü apüleerua. Müshiijeseʼe nnojoliinjanain waʼwaataain suluʼu watüjain, shia anaka aluʼu watütüleʼerüle naaʼin na wawalayuukana sükajee tia (Filip. 2:3). Waʼyataale nümüin Jehová süka süpüshuaʼa watchin jee tü kasa watüjakalü apüleerua, talateerü waaʼin süka waaʼinrüin tü keeʼireekat naaʼin. Nnojotsü shiain saaʼujee waaʼinrüin wainma kasa noulia na waneinnua jee shiale watüjain noulia.

10. ¿Jamüsü nnojotka anain wayoujireʼerüle wakuwaʼipa namaa na waneinnua?

¹⁰ Nnojorüle eejüin naaʼin wanee wawala, eesü süpüla niyoujireʼerüin tü kasa nuuntakat sümaa tü nnojotkat nountuin na waneinnua. Eeshi nütüjale maʼin ekirajaa sünain tü outkajawaakat jee jülüjale naaʼin niain atüjakai nuulia chi wawala isakai achiki ekirajaa sünain tü outkajawaakat. Wawalakai chii, eesüjaʼa nnojorüle niyaawatüin saaʼu tü kasa anasü naaʼinrakat chi wawala isakai achiki ekirajaa, maʼaka saaʼin kamaneein nia, anain nepijia nüchonnii nutuma  jee yalayalain naaʼin sünain aküjaa pütchi. Kojutusü maʼin wamüin eein wawalayuu aʼyataakana nümüin Jehová sükajee tü kasa natüjakalü apüleerua sümaa nakaalinjain na waneinnua.

11. ¿Jamüshii waʼyataainjanaka süchiirua washatüin nukuwaʼipa Jesús?

¹¹ Nnojotsü anain wayoujireʼerüle wakuwaʼipa namaa na waneinnua, eepejeʼe tü kasa watüjakat nanainjee jülüjale waaʼin tü kasa anasü naaʼinrakat. Jülüja waaʼin nukuwaʼipa Jesús chi anakai maʼin süpüla washatüin akuwaʼipa. Mayaainjeʼe nnojoluin lotuin maʼin wakuwaʼipa maʼaka naaʼin, eesü tü kasa watüjakat sünainjee nukuwaʼipa jee tü naaʼinrakat (1 Ped. 2:21). Waʼyataale maʼin süchiirua süpüla washatüin nukuwaʼipa, aneerü maʼin wakuwaʼipa noʼuluʼu Jehová jee tüteena waya sünain ekirajaa wayuu.

12, 13. ¿Kasa watüjaka nünainjee David?

¹² Süküjain tü Bibliakat nachiki wainma wayuu tooloyuu otta jieyuu eekana süpüla watüjain nanainjee mayaainjeʼe nnojoluin lotuin maʼin nakuwaʼipa (Heb. 6:12). Noʼutku naya wayuukana, nia David. Anuu nünüiki Jehová nüchiki: «Wayuu nia anashi tamüin otta naaʼinreerüin süpüshuaʼa tü kasa tachekakat nüpüleerua» (Aluw. 13:22). Mayaainjeʼe eein tü kasa mojukat nutuma David, eesü tü kasa anasü watüjakat nünainjee. Jamüshijaʼa nüchiaanapa, naapaain amaa shia otta nnojoishi asoutuin naaʼu. Süka shiimain niyaawajaain suulia naainjala, motusü naaʼin Jehová naainjala (Sal. 51:3, 4, 10-12).

¹³ Atüjeena waya sünainjee nukuwaʼipa David wasakirüle waaʼin sünain tüü: «¿Jashichishiche taya tachiaanapa? ¿Tayaawatüinche saaʼu mojuin tü taaʼinrakat? ¿Asoutushiche taya taaʼu? ¿Teʼitaamaatüinche naaʼu na waneinnua nayain kasirüin tü alatakat? ¿Tanouteʼerüinche takuwaʼipa süpüla nnojoluin taaʼinrüin shia piantua?». Anasü wasakirüle waaʼin sünain pütchi makat aka saaʼin tia wekirajaapa nachiki na wayuu waneepiakana nümaa Jehová saashajaaka achiki tü Bibliakat. ¿Alatüsüche namüin tü alatakat wamüin? ¿Kasa anasü naaʼinraka? Waashajeʼerapa nachiki waneʼewai nakua, wasakira waaʼin sünain tüü: «¿Kasa taaʼinrajatka süpüla tashatüin nukuwaʼipa?».

14. ¿Jamüsü aneetka wakuwaʼipa jülüjale waaʼin tü kasa anasü naaʼinrakat na wawalayuukana?

¹⁴ Eesia tü kasa watüjakat nanainjee na wawalayuukana, jaʼitainna jimaʼalin, majayülüin jee laülaayuuin naya. Eeshijaʼa eere wanee jimaʼai outkajaaka wamaa apüleeruaanakai aaʼin natuma waneinnua jimaʼalii. Otta eeshijaʼa eere wane wawala apüleeruaanakai aaʼin sutuma nüpüshi jee niale wanee wawala mojukai aaʼin sutuma ayuulin nia. ¿Eesüche süpüla washatüin tü kasa anasü naaʼinrakat naya wawalayuukana?  Jülüjale waaʼin nakuwaʼipa, atüjeena waya achecheraa waaʼin soʼunnaa weʼrüin müliaa. ¿Aashin kojutuin maʼin wamüin nakuwaʼipa naya wawalayuukana? Wainma kasa naaʼinraka talataka atuma waaʼin (Heb. 13:7; Sant. 1:2, 3).

15. ¿Kasa nüküjaka Pablo süpüla ayatüinjanain waʼyataain nümüin Jehová sümaa talatüin waaʼin?

¹⁵ Waʼyataale wapüshuaʼa nümüin Jehová süka süpüshuaʼa waaʼin, anajiraajeena jee paaʼinwajiraajeena waya namaa na wawalayuukana. Shiaʼaya naaʼinraka tia na anoujashii namaiwajanakana. Naatawaisü tü atüjaa aapünakat namüin jee tü aʼyatawaa naaʼinrakat (1 Cor. 12:4, 7-11). Nnojoluinjatü nayoujireʼerüin nakuwaʼipa süpüla paaʼinwain naya. Tü nümakat Pablo namüin na anoujashii chajanakana Éfeso shia nakaalinjiraainjanain sünain aʼyatawaa nümüin chi Señotkai. Anuu sooʼomüin nünüiki Pablo: «Akooʼomüinraajeena waya müleka aijiraale waya sünain aʼyatawaa maʼaka anain nukuwaʼipa wanee wayuu sutuma kottiraain tü nüʼüliakat sünain aaʼinraa wanee kasa» (Éf. 4:1-3, 11, 12; 4:16, TNM). Na wayuu aaʼinrakana tü nümakat Pablo, anajiraashii jee paaʼinwajiraashii naya, müsia nakuwaʼipa na wawalayuukana maaʼulu.

16. ¿Kasa ayatüinjatka waaʼinrüin? (Hebreokana 6:10).

¹⁶ Nnojo wayoujireʼerüin wakuwaʼipa namaa na waneinnua. Shia anaka aluʼu waʼyataale süchiirua süpüla washatüin nukuwaʼipa Jesús. Watüja nanainjee na wayuu namaiwajanakana jee na wawalayuu eekana maaʼulu. Ayata piʼyataain nümüin Jehová süka süpüshuaʼa paaʼin sümaa jülüjain paaʼin nnojoleerüin motuin naaʼin tü kasa anasü paaʼinrakat (paashajeʼera Hebreokana 6:10). Ayata piʼyataain nümüin Jehová sümaa talatüin paaʼin otta nnojo motuin paaʼin kojutuin nümüin tü paaʼinrakat süpüla talatüin nia putuma.