1. Etẹwẹ nọ na mí ayajẹ sisosiso?

 JEHOVAH nọ jlo dọ mí ni do ayajẹ. Mí yọ́n ehe, na ayajẹ yin adà sinsẹ́n gbigbọ wiwe etọn tọn de wutu. (Gal. 5:22) To whenuena e yindọ ayajẹ nọ sù to nunamẹ mẹ hú to mimọyi mẹ, mí nọ do ayajẹ sisosiso eyin mí do mahẹ gigọ́ to lizọnyizọn Klistiani tọn mẹ, bosọ gọalọna mẹmẹsunnu mítọn lẹ to aliho voovo lẹ mẹ.—Owalọ 20:35.

2, 3. (a) Dile Galatianu lẹ 6:4 dọ do, onú awe tẹlẹ wẹ na gọalọna mí nado hẹn ayajẹ mítọn go to sinsẹ̀nzọn mítọn na Jehovah mẹ? (b) Etẹwẹ mí na gbadopọnna to hosọ ehe mẹ?

² Dile Galatianu lẹ 6:4 dọ do, apọsteli Paulu donù onú awe delẹ go he na gọalọna mí nado hẹn ayajẹ mítọn go. (Hia.) Tintan, yanwle mítọn dona yin nado na Jehovah dagbe hugan mítọn. Eyin mí to dagbe hugan mítọn na Jehovah nugbonugbo, mí dona do ayajẹ. (Mat. 22:36-38) Awetọ, mí ma dona nọ yí míde jlẹdo mẹdevo lẹ go. Mahopọnna nuhe agbasalilo, azọ́nplọnmẹ, kavi nugopipe jọwamọ tọn mítọn lẹ na mí dotẹnmẹ nado wà, mí dona nọ dopẹ́ etọn na Jehovah. To popolẹpo mẹ, ewọ wẹ na mí nuhe mí tindo lẹpo. To alọ devo mẹ, eyin mẹdevo lẹ nọ do kọdetọn dagbe to adà lizọnyizọn lọ tọn de mẹ hugan mí, mí dona nọ jaya dọ yé to nunina yetọn lẹ yizan nado pagigona Jehovah, e ma yin nado ze yede daga kavi nado doafọna ojlo yedetiti tọn lẹ. Enẹwutu, kakati mí ni nọ whlẹnagbà hẹ yé, mí dona nọ plọnnu sọn yé dè.

³ To hosọ ehe mẹ, mí na mọ nuhe gán gọalọna mí eyin mí gbọjọ, na nuhe mí gán wà to sinsẹ̀nzọn mítọn mẹ lẹ do dogbó wutu. Mí nasọ dọhodo lehe mí gán yí nugopipe depope he mí tindo zan to aliho dagbe hugan mẹ do, podọ do nuhe mí gán plọn sọn apajlẹ mẹdevo lẹ tọn mẹ ji.

4. Ninọmẹ tẹwẹ gán hẹn gbigbọjọ wá? Na apajlẹ.

⁴ E nọ vẹawuna devizọnwatọ Jehovah tọn delẹ nado diọada sọgbe hẹ dogbó he mẹhowhe kavi agbasamalo hẹnwa na yé lẹ. Nuhe jọ do Carol go niyẹn. To ojlẹ de mẹ wayi, e do lẹblanulọkẹyi lọ nado sẹ̀n to fihe nuhudo sù te. To ojlẹ lọ mẹ, e nọ deanana plọnmẹ Biblu 35, podọ e gọalọna mẹsusu nado klan yede do wiwe bo yí baptẹm. Lizọnyizọn Carol tọn do kọdetọn dagbe taun! Enẹgodo e bẹ awutu sinsinyẹn de, podọ diblayin dọ whelẹponu wẹ e dona gbọṣi whégbè. Carol dọmọ: “N’yọnẹn dọ agbasamalo ṣie wẹ zọ́n bọ n’ma gán penugo nado wà nuhe mẹdevo lẹ gán nọ wà, ṣogan e nọ taidi na mi dọ n’ma yin nugbonọ sọ yé. Ninọmẹ ṣie ma na mi dotẹnmẹ nado wà nuhe nọ jlo mi, podọ e nọ veawuna mi taun nado doakọnna.” Carol nọ jlo na wà nuhe go e pé lẹpo na Jehovah. Na nugbo tọn, enẹ jẹna pipà taun! Mí gán kudeji dọ Jiwheyẹwhe awuvẹmẹtọ mítọn nọ yọ́n pinpẹn gbigbọ dagbe he Carol nọ dohia tọn.

5. (a) Etẹwẹ mí dona nọ flin eyin dogbó mítọn lẹ nọ hẹn mí gbọjọ? (b) Dile mí mọ do to yẹdide lọ lẹ mẹ, nawẹ mẹmẹsunnu lọ zindonukọn nado to dagbe hugan etọn na to sinsẹ̀nzọn Jehovah tọn mẹ gbọn?

⁵ Eyin a nọ gbọjọ to whedelẹnu na nuhe a ma gán wà de wutu, nọ kanse dewe dọ, ‘Etẹwẹ Jehovah biọ to asi e?’ Nuhe e biọ wẹ yindọ, a ni na dagbe hugan towe, mahopọnna nudepope he e gán yin to alọnu. Lẹnnupọndo apajlẹ ehe ji: Mẹmẹyọnnu de he ko do owhe 80 gbọjọ, na e ma sọgan sọ wà nususu to lizọnyizọn lọ mẹ dile e nọ wà do whenue e do owhe 40. E lẹndọ dile etlẹ yindọ emi to dagbe hugan emitọn na Jehovah, homẹ etọn ma hùn do emi go. Amọ́, be nugbo wẹ ya? Mì gbọ mí ni lẹnnupọndeji pẹẹde. Eyin mẹmẹyọnnu ehe na dagbe hugan etọn to whenue e do owhe 40, bosọ gbẹ́ to dagbe hugan etọn na whenue e do owhe 80, be e ma gọ̀n ma na dagbe hugan etọn gbede niyẹn. Eyin mí jẹ linlẹn ji dọ nuhe wà mí te ma pé nado hẹn homẹ Jehovah tọn hùn, mí dona nọ flindọ, Jehovah wẹ mẹlọ he nọ ze nujinọtedo nuhe nọ hẹn homẹ etọn hùn lẹ tọn dai. Eyin mí nọ wà nuhe go mí pé lẹpo, na nugbo tọn, Jehovah na dọna mí dọ: “A basi do ganji!”—Yijlẹdo Matiu 25:20-23 go.

6. Etẹwẹ mí gán plọn sọn apajlẹ Maria tọn mẹ?

⁶ Mí na mọdọ e nọ bọawu dogọ nado do ayajẹ, eyin mí nọ ze ayiha do nuhe mí gán wà ji kakati ni yin do nuhe mí ma gán wà ji. Lẹnnupọndo apajlẹ mẹmẹyọnnu de he nọ yin Maria tọn ji, mẹhe nọ jẹ awutu de he zọ́n bọ e ma gán wà nususu to lizọnyizọn lọ mẹ. To tintan whenu, e jẹflumẹ bosọ mọdọ emi ma yọ́n-na-yizan. Amọ́ to enẹgodo, e doayi mẹmẹyọnnu de go to agun lọ mẹ he to azọ̀n sinsinyẹn jẹ bo ma gán nọ ṣite sọn adọzan etọn ji, podọ Maria basi dide nado gọalọ. Maria dọmọ: “N’basi tito nado nọ dekunnu dopọ hẹ ẹ gbọn alokan ji podọ gbọn wekanhlanmẹ lẹ gblamẹ. Whedepopenu he mí wazọ́n dopọ, n’nọ lẹkọwa whé po ayajẹ po bosọ nọ do pekọ, na n’ko penugo nado gọalọna mẹmẹyọnnu ṣie wutu.” Mílọsu gán hẹn ayajẹ mítọn jideji eyin mí nọ ze ayiha do nuhe mí gán wà ji kakati ni yin do nuhe mí ma gán wà ji. Amọ́, etẹwẹ lo eyin mí gán wà humọ, kavi eyin mí nọ tindo kọdetọn dagbe taun to adà sinsẹ̀nzọn Jehovah tọn delẹ mẹ?

7. Ayinamẹ yọ́n-na-yizan tẹwẹ apọsteli Pita na Klistiani lẹ?

⁷ To wekanhlanmẹ gbọdo apọsteli Pita tọn tintan mẹ, e na tuli mẹmẹsunnu etọn lẹ nado nọ yí nunina po nugopipe depope he yé tindo po zan nado nọ hẹn yisenọ hatọ yetọn lẹ lodo. Pita wlan dọmọ: “Kẹdẹdile mẹdopodopo ko mọ nunina de yí do, mì nọ yí i zan nado yilizọn na ode awetọ taidi họ̀nkọnsi dagbe  nukundagbe majẹhẹ Jiwheyẹwhe tọn.” (1 Pita 4:10) Mí ma dona nọ whleawu nado nọ yí nunina mítọn lẹ zan to gigọ́ mẹ, na obu lọ dọ mẹdevo lẹ gán whànwu mí kavi gbọjọ wutu gba. Eyin mí wàmọ, be mí ma to dagbe hugan mítọn na Jehovah niyẹn.

8. Sọgbe hẹ 1 Kọlintinu lẹ 4:6, 7, naegbọn mí ma dona nọ yí nùgo gando nunina mítọn lẹ go?

⁸ Mí dona nọ yí nunina mítọn lẹ zan to gigọ́ mẹ, amọ́ mí dona nọ payi ma nado nọ yí nùgo gando yé go. (Hia 1 Kọlintinu lẹ 4:6, 7.) Di apajlẹ, e gán nọ bọawuna we taun nado bẹ plọnmẹ Biblu lẹ jẹeji. A ma dona nọ whleawu nado yí nunina enẹ zan! Amọ́, vogbingbọn daho de tin to nunina de yiyizan po nùgo yíyí gandego po ṣẹnṣẹn. Mí ni dọ dọ to agọe, a tindo numimọ ojlofọndotenamẹ tọn de to lizọnyizọn lọ mẹ, enẹ wẹ yindọ a penugo bo bẹ plọnmẹ Biblu de jẹeji. A to jejeji nado má numimọ lọ hẹ mẹhe to pipli Kunnudegbe tọn towe mẹ lẹ. Amọ́, whenue mì pli, mẹmẹyọnnu de jẹ hodọ ji gando numimọ he e do de go, enẹ wẹ yindọ e penugo bo do linlinwe de gbonù. Ewọ do owe gbonù, bọ hiẹ bẹ plọnmẹ Biblu de jẹeji. Etẹwẹ a na wà? A yọnẹn dọ numimọ emitọn na na tuli pipli lọ, amọ́ a gán de nado dọho gandego to dotẹnmẹ hundote dagbe devo whenu, na enẹ nikaa de ayajẹ mẹmẹyọnnu he do linlinwe de gbonù lọ tọn pò. Nuyiwa homẹdagbe tọn de wẹ enẹ na yin. Amọ́, depope he whẹho lọ yin, ma doalọtena plọnmẹ Biblu zizedonukọnna mẹlẹ blo. A tindo nunina de—nọ yí i zan!

9. Nawẹ mí dona nọ yí nunina mítọn lẹ zan gbọn?

⁹ Mì gbọ mí ni nọ flindọ Jiwheyẹwhe wẹ na mí nugopipe jọwamọ tọn depope he mí tindo. Mí dona nọ yí nunina enẹlẹ zan nado hẹn agun lọ lodo, e ma yin nado nọ ze míde daga. (Flp. 2:3) Eyin mí nọ yí huhlọn po nugopipe mítọn po do wà ojlo Jiwheyẹwhe tọn, mí na tindo whẹwhinwhẹ́n nado jaya—e ma yin na mí nọ wà hú mẹdevo lẹ wutu kavi to didohia dọ mí yiaga hugan yé wẹ gba, amọ́ na mí to nunina mítọn lẹ yizan nado hẹn pipà wá na Jehovah wutu.

10. Naegbọn e ma do sọgbe hẹ lẹnpọn dagbe nado nọ yí míde jlẹdo mẹdevo lẹ go?

¹⁰ Eyin mẹde ma to aṣeji, e gán jai jẹ omọ̀ lọ mẹ nado nọ yí nuhe ewọ nọ wà po awubibọ po lẹ jlẹdo nuhe nọ vẹawuna mẹdevo lẹ nado wà lẹ go. Di apajlẹ, mẹmẹsunnu de gán nọ na hodidọ dagbedagbe lẹ. Nuhe nọ bọawuna ewọ nado wà niyẹn. Amọ́ to ahun etọn mẹ, e gán nọ yí nukunpẹvi do pọ́n mẹmẹsunnu de he e nọ vẹawuna taun nado na hodidọ lẹ. To alọ devo mẹ, e gán nọ bọawuna mẹmẹsunnu enẹ  taun nado nọ hẹjomẹ, nado nọ plọnazọ́n ovi etọn lẹ, kavi nado yin zohunhunnọ to lizọnyizọn lọ mẹ. Lehe mí yọ́n pinpẹn etọn do sọ dọ mí tindo mẹmẹsunnu po mẹmẹyọnnu po susu he do nugopipe bosọ nọ yí nunina yetọn lẹ do sẹ̀n Jehovah, podọ nado gọalọna mẹdevo lẹ!

11. Naegbọn mí dona nọ dovivẹnu nado hodo apajlẹ Jesu tọn?

¹¹ Dile etlẹ yindọ mí ma dona nọ yí míde jlẹdo mẹdevo lẹ go, mí gán mọaleyi eyin mí nọ plọnnu sọn apajlẹ nugbonọ lẹ tọn mẹ. Di dohia, mì gbọ mí ni lẹnnupọndo apajlẹ Jesu tọn ji. Dile etlẹ yindọ ewọ yin mẹpipe, mí gán plọnnu sọn jẹhẹnu po aliho nuyiwa tọn dagbedagbe etọn lẹ po mẹ. (1 Pita 2:21) Eyin mí wà nuhe go mí pé lẹpo nado hodo apajlẹ etọn pẹkipẹki dile mí penugo do, mí na yin devizọnwatọ Jehovah tọn dagbe lẹ bo nasọ tindo kọdetọn dagbe dogọ to lizọnyizọn lọ mẹ.

12, 13. Etẹwẹ mí gán plọn sọn apajlẹ Ahọlu Davidi tọn mẹ?

¹² To Ohó Jiwheyẹwhe tọn mẹ, mí nọ mọ apajlẹ sunnu po yọnnu nugbonọ susu po tọn he mí gán hodo, mahopọnna dọ yé yin mapenọ. (Heb. 6:12) Lẹnnupọndo Ahọlu Davidi ji, mẹhe Jehovah ylọdọ “sunnu de he ahun ṣie kẹalọyi,” kavi sọgbe hẹ lẹdogbedevomẹ devo, “omẹ ayiha ṣie tọn.” (Owalọ 13:22) Etomọṣo, Davidi ma yin mẹpipe. Na nugbo tọn, e ṣì nudelẹ wà he ylan taun. Mahopọnna enẹ, apajlẹ dagbe de wẹ e yin na mí. Etẹwutu? Na to whenue e mọ mẹplọnlọ yí, e ma tẹnpọn nado suwhẹna nuṣiwa etọn. Kakatimọ, e kẹalọyi ayinamẹ sinsinyẹn he yin nina ẹn, podọ nuhe e wà lọ vẹna ẹn yì ahun mẹ. Enẹ zọ́n bọ Jehovah jona ẹn.—Salm. 51:3, 4, 10-12.

¹³ Mí gán plọnnu sọn Davidi dè bo nọ kanse míde dọ: ‘Nawẹ n’nọ yinuwa gbọn eyin mẹde na mi ayinamẹ? Be n’nọ yawu kẹalọyi nuṣiwa ṣie lẹ ya kavi n’nọ tẹnpọn nado suwhẹna dee? Be n’nọ yawu dowhẹ mẹdevo lẹ wẹ ya? Be n’nọ dovivẹnu sinsinyẹn ma nado vọ́ jai jẹ nuṣiwa dopolọ lẹ mẹ ya?’ A gán nọ kàn kanbiọ mọnkọ lẹ sè dewe whenue a to apajlẹ sunnu po yọnnu nugbonọ devo lẹ po tọn hia to Biblu mẹ. Be yé pehẹ avùnnukundiọsọmẹnu he nkọ a to pipehẹ lẹ wẹ ya? Jẹhẹnu dagbe tẹlẹ wẹ yé dohia? To ninọmẹ dopodopo mẹ, nọ kanse dewe dọ: ‘Nawẹ n’gán hodo apajlẹ devizọnwatọ nugbonọ Jehovah tọn ehe tọn dogọ gbọn?’

14. Nawẹ mí gán mọaleyi gbọn eyin mí nọ lẹnnupọndo apajlẹ yisenọ hatọ mítọn lẹ tọn ji?

¹⁴ Mí gán sọ mọaleyi eyin mí nọ lẹnnupọndo apajlẹ yisenọ hatọ mítọn lẹ tọn ji, yèdọ pẹvi  po daho po. Di apajlẹ, be a gán lẹnnupọndo mẹde ji to agun towe mẹ he to akọndona whlepọn de po nugbonọ-yinyin po, vlavo kọgbidinamẹ hagbẹ tọn, nukundiọsọmẹ whẹndo tọn kavi agbasamalo ya? Be a doayi jẹhẹnu dagbe mẹlọ tọn delẹ go he e na jlo we nado wleawuna dogọ ya? Dile a to nulẹnpọndo apajlẹ dagbe etọn ji, a gán mọ aliho yọ́n-na-yizan susu lẹ he mẹ a gán doakọnna whlepọn towe titi lẹ te. Lehe mí yọ́n pinpẹn etọn do sọ dọ mí tindo apajlẹ yise tọn jọnun enẹlẹ he mí gán hodo, ehe nọ hẹn ayajẹ nujọnu tọn wá na mí!—Heb. 13:7; Jak. 1:2, 3.

15. Ayinamẹ tẹwẹ apọsteli Paulu na he gán gọalọna mí nado hẹn ayajẹ mítọn go to sinsẹ̀nzọn Jehovah tọn mẹ?

¹⁵ Eyin mí na yidogọna jijọho po pọninọ po to agun mẹ, dopodopo mítọn dona nọ na dagbe hugan mítọn. Lẹnnupọndo apajlẹ Klistiani owhe kanweko tintan whenu tọn lẹ tọn ji. Nunina po azọ́ndenamẹ voovo lẹ po wẹ yé tindo. (1 Kọl. 12:4, 7-11) Amọ́, ehe ma hẹn agbàwhinwhlẹn po kinklan po wá ṣẹnṣẹn yetọn. Kakatimọ, Paulu dotuhomẹna dopodopo yetọn nado wà nuhe e biọ “nado do agbasa Klisti tọn daga.” Paulu kàn hlan Efesunu lẹ dọmọ: “Eyin awutugonu dopodopo wazọ́n ganji, ehe nọ yidogọna whinwhẹ́n agbasa lọ tọn dile e to ede do daga to owanyi mẹ.” (Efe. 4:1-3, 11, 12, 16) Mẹhe wàmọ lẹ yidogọna jijọho po pọninọ po, yèdọ jẹhẹnu delẹ he mí nọ mọ to agun lẹ mẹ to egbehe.

16. Etẹwẹ mí dona magbe nado wà? (Heblu lẹ 6:10)

¹⁶ Magbe ma nado nọ yí dewe jlẹdo mẹdevo lẹ go. Kakatimọ, nọ plọnnu sọn apajlẹ Jesu tọn mẹ bo nọ tẹnpọn nado wleawuna jẹhẹnu etọn lẹ. Nọ plọnnu sọn apajlẹ yise tọn he go Biblu donù po egbezangbe tọn lẹ po mẹ. Dile a zindonukọn nado to dagbe hugan towe na, kudeji dọ Jehovah ‘ma yin mawadodonọ nado wọn azọ́n towe.’ (Hia Heblu lẹ 6:10.) Zindonukọn nado nọ to Jehovah sẹ̀n po ayajẹ po, bo yọnẹn dọ e nọ yọ́n pinpẹn vivẹnu he do a te po ahun lẹpo po nado hẹn homẹ etọn hùn lẹ tọn.