1. Bichi binarhulerhera mwishingo gunene?

 YEHOVA alonzeze rhugwarhe obusime. Rhumenyere ntyo bulala omwishingo chili chigabi ch’etunda ly’eroho. (Gal. 5:22) Bulala hali obusime bunene omu kuhaana kulusha obuli omu kuhaabwa, rhunayunva mwishingo gunene amango rhwamachihaana loshi omu kasi k’okuhubiri n’okurhabala bene-berhu mu byoshi bakaba balagirire.​—Mdo. 20:35.

2-3. a) Nk’oku Wagalatia 6:4 ederhere, bintu bihe bibiri byarhurhabala rhugenderere n’omwishingo omu kasi ka Yehova? b) Bichi rhwaganira ko mu gunola mwazi?

² Nk’oku bishamberwe mu Wagalatia 6:4, entumwa Paulo aliderhere bintu bibiri byakarhurhabala rhugenderere kugwarha omwishingo. (Osome.) Ech’oburhanzi, omuhigo gwerhu gukwanene kuba g’okuha Yehova echinja ok’obuhashe bwerhu bunali. Rhwagwarha obusime akaba rhuli rhwamuha echinja kulusha rhwakaba rhuherhe. (Mt. 22:36-38) Echa kabiri, rhurhakwanene kuchihuzanya n’abandi chiro. Byoshi-byoshi amagala merhu makarhuyemerera kukola, amazowezi rhwapatire, changwa empano zerhu, rhukwanene kugwarha eshukrani embere za Yehova. Byoshi rhuherhe yewarhuhaga byo. Oku bwindi, akaba hali eby’abandi bayinji kukola bwinja omu kasi ka Mungu kurhulusha, rhukwanene kuchishinga bulala yibakolesa empano zabo omu kusingiza Yehova, barhali balonza mpu bachisise changwa kulonza enyungu zabo bonyine. Bobuno, ahali h’okuhigana nabo, rhwakabalolerako.

³ Mu gunola mwazi, rhwabona gurhe rhwakagenderera kulwisa amango rhwamabona nka hali ebi rhurhakagala omu kasi kerhu. Rhwashuba kubona nka gurhe rhwakakolesa bwinja buli  mpano rhwakaba rhuherhe, na bichi rhwakayiga kugerera emifano y’abandi.

4. Bichi byakarhuma rhwavunika omurhima? lerha omufano?

⁴ Hali ebi bakozi baguma ba Yehova barhakachigala kujira eju y’obushaja changwa amagala mabihire, n’echola chanabavuna omurhima. Bi byahikiraga mwene-werhu Carol. Aligwerhe olukengo l’okukolera omu eneo ekeneere oburhabale. Mw’agola mango, aliri aongoza mafunzo 35 me Biblia anarhabala banene mu bo bajire amaja-mbere bahikire obubatizo. Carol alipatire amalehe menja omu mahubiri! Buzinda amagala mage mabiha, arhaliri achigala kurhenga ahambuga. Carol aderhere mpu, “imenyere oku eju y’obulwala bwani ntakachigala kujira nk’eby’abandi bali bajira, aliko nanchiyunva nk’antachili mwimana kuguma nabo. Ntachigala kujira byoshi nsimire njire, n’ebyola binarhuma nayunva nvunikire omurhima.” Carol alonzeze akolere Yehova okwage koshi akanagala. N’echola chili chintu chinja bwenene! Rhuchizerere oku Mungu werhu w’olukogo asimisizwe n’ogola murhima gwa Carol.

5. a) Gurhe rhukwanene kujira akaba ebi rhurhali rhwagala kujira bili byarhuvuna omurhima? b) Nk’oku efoto eyerekene, gurhe mwene-werhu ali agenderera kukolera Yehova nk’oku obuhashe bwage bunali?

⁵ Akaba hanagera amango wayunva ovunikire omurhima eju y’ebintu orhakagala kujira, ochibaze, ‘Bichi Yehova ampemere njirage?’ Alonzeze omukolere byoshi byoshi wakagala omu hali olimo zene. Rhurhole omufano: Mwali-werhu okal’ogwerhe myaka 80 anayunva avunikire omurhima bulala arhakachigala kujira binene omu kasi k’okuhubiri nk’oku aliri ajira amango aligwerhe myaka 40. Anawaza oku chiro akaba ali akola nk’okw’anagalire, arhali asimisa Yehova. Ku binali ntyo si? Wazaga lero. Akaba oyola mwali-werhu aliri akola nk’oku agalire amango aliherhe myaka 40 ntya, y’anachikola nk’oku agalire bunola akola agwerhe myaka 80 ntya; k’okuderha arhasaga leka kukola nk’oku anagalire kuhika zene. Rhukahwanzi waza okw’ebi rhuli rhwakolera Yehova zene birhachimusimisize, rhukwanene rhuyibuke oku yenyine yenachishoga eby’amusimisa. Rhukamukolera nk’oku obuhashe bwerhu bunali, kweri nj’arhubwira mpu: “Wajirire bwinja!”​—Huzanya na Matayo 25:20-23.

6. Bichi omufano gwa Maria gwakarhuyigiriza?

⁶ Rhwabona oku rhwakagwarha omwishingo rhukachiseza oku bi rhwakagala kukola zene ahali h’okuchiseza oku bi rhurhakachigala. Waza oku mufano gwa mwali-werhu oyirikirwe Maria, oli walibuzwa n’obulwala bwarhumire arhachili akola binene omu kasi k’amahubiri nk’oku aliri ajira. Burhanzi, alivunikire omurhima n’okubona nka ntacho achimalire. Aliko awaza oku windi mwali-werhu w’omu chibaga orhachirhenga omu nchingo, anahigirira kumurhabala. Maria aderhere ntya: “Nampanga kuyinja nahubiri naye oku telephone n’omu kuyandika amaruba. Buli mango nali naja hubiri haguma naye, nali nagaluka eka eyi ngwerhe obusime n’okuyunva ntoshekere bulala narhabere mwali-werhu.” Nerhu rhwakayongera omwishingo gwerhu amango rhuli rhwachiseza kukola ebi rhwakagala kujira s’arhali oku bi rhurhakachigala. Gurhe si akaba rhwakagala kujira binene changwa kujira ebi rhwakwiza omu kasi ka Yehova?

7. Hano lihe linja entumwa Petro ahere Abakristu?

⁷ Omu maruba mage marhanzi mafuherwaga, entumwa Petro alihanwire bene-babo oku bakolese empano zoshi bakaba bagwerhe omu kuhira ababo Bakristu omurhima. Ayandika ntya: “Nk’oku buli muguma ahabirwe  oluhembo, mulukolese omu kukolerana buli muguma n’owindi nka bemangizi benja b’olukogo lwa Mungu lurhakwanenwe.” (1 Pe. 4:10) Rhurhafundwaga kukolesa empano zoshi rhwakaba rhugwerhe omu kuyubaha mpw’abandi barhuyunvira obongwa changwa bavunike omurhima; bulala rhukajira ntyo, rhurhaha Yehova echinja kulusha rhugwerhe nk’oku obuhashe bwerhu bunali.

8. Nk’oku olwandiko lwa 1 Wakorinto 4:6, 7 luderhere, bulagurhe rhurhakwanene kuyinja rhwachivuga-vugira empano rhugwere?

⁸ Rhukwanene rhukolese empano zerhu bwinja, aliko bihemere rhuchilange rhurhagendaga rhwachivuga-vugirazo. (Osome 1 Wakorinto 4:6, 7.) Omufano, hali oku wakaba oyinji kurhonderesa bwinja amafunzo me Biblia. Okwanene okolese eyola mpano yawe! Aliko orhakwanene kuyinja wachivuga-vugirayo. Rhuderhe oku hali omuntu ochizindire ganira naye omu mahubiri wabona asimisizwe naho warhonderesa efunzo lye Biblia. Ogwerhe enyorha nene y’okubwira ab’omu chigusho chawe oku bilolere oyola muntu. Oku wanahikamo, wanayunva hali mwali-werhu oli washambalirabo oku naye nj’alihaanire egazeti omu mahubirri. Obwene; yewe nj’alihanire egazeti, aliko woyo nji walirhondereseze efunzo lye Biblia. Gurhe wajira? Omenyere oku ab’omuchigusho chawe bahirhwa omurhima n’ebiwahikireko omu mahubiri. Aliko wakabona ok’orhange osire wanalinga akandi kasanzi nji wakabiderhako, omu kujirantyo orhavuna oyo mwali-werhu omurhima wahaanaga egazeti. Okujira ntyo kuli kwinja bwenene. Aliko arhali k’okuderha oku orhachihwanzisa amandi mafunzo me Biblia. Oherhe eyola mpano, oyikolese!

9. Gurhe rhukwanene kukolesa empano zerhu?

⁹ Rhuyibuke oku empano zoshi rhwakaba rhugwerhe luli luhembo lurhengere emwa Mungu. Rhukwanene rhuzikolese omu kukomeza echibaga, s’arhali mpu rhuchiyerekane. (Flp. 2:3) Amango rhwamakolesa emisi yerhu n’empano rhugwerhe omu kujira obulonza bwa Mungu, rhwabona empanvu y’okuchishinga, arhali mpu bula rhulonzeze kuvuna abandi omurhima changwa kuchibona mpu rhubalushire, si bulala rhuli rhwakolesa ezola mpano zerhu omu kulerhera Yehova erenge.

10. Bulagurhe kurhali kwinja okuchihuzanya n’abandi?

¹⁰ Nk’omuntu arhahunukire, akagwa omu murhego g’okuhwanza kuhuzanya obuhashe agwerhe n’obuzamba bw’abandi. Omufano, hali oku mwene-werhu akageza ejambo bwinja. Buhashe bwage obo. Omu murhima gwage, anahwanza alola owindi mwene-werhu onayinj’alwisa  amango ali ageza ejambo. Aliko oyola mwene-werhu aba murhanzi omu kukaribisanya, anayigiriza abana bage bwinja, anajira bushiru bunene omu mahubiri. Rhugwerhe busime bunene okubona rhuli na bene-berhu na bali-berhu bagwerhe empano zinene banali bazikolesa omu kukolera Yehova n’okurhabala abandi!

11. Bulagurhe rhukwanene rhuchihangane kukulikira omufano gwa Yesu?

¹¹ Chiro akaba oku kurhali kwinja kuchihuzanya n’abandi, rhwakayunguka omu kuyiganya balala bali bakolera Yehova oku bwimana. Yesu g’omufano gwinja rhwakayiganya. Chiro akaba oku rhurhali bashinganyanya kuguma naye, aliko rhwakayiga engeso zage zinja n’ebintu bikwirire akolaga. (1 Pe. 2:21) Amango rhwamajira okwerhu koshi omu kukulikira omufano gwa Yesu bwinja-bwinja nk’oku rhwakanagala, rhwanaba bakozi benja ba Yehova rhwanakola na binene omu kasi kage.

12-13. Bichi omufano gwa Mwami Daudi gwakarhuyigiriza?

¹² Omu Chinwa cha Mungu muli mifano minene y’abalume n’abakazi bimana, bali lwiganyo lwinja l’okuyiga chiro akaba oku nabo barhali bashinganyanya. (Ebr. 6:12) Waza ku Mwami Daudi, eyi Yehova ayirikaga “muntu ongwire bwinja oku murhima” changwa, nk’oku ezindi tafsiri ziderhere ahola mpu, “muntu onsimisize bwenene.” (Mdo. 13:22) Daudi naye arhaliri mushinganyanya, hali amagosa makomere alijirire. Aliko chiro akaba ntyo, ali mufano gwinja rhwakayiga. Bulagurhe? Bulala amango aliri ahabwa ehano, arhaliri achiteteya chiro. S’ahubwe ayemera ehano likomere ahabwaga, anayunva ababezwe n’eby’ajiraga. Byaba gurhe? Yehova amubabalira.​—Zb. 51:3, 4, 10-12.

¹³ Rhwakayiganya Daudi omu kuchibaza: ‘Nkagurhe nambona ehano nahabirwe? Ka nanyemera amagosa mani juba-juba, changwa nandonza kuchi teteya? Inankomera abandi oku magosa najirire? Nanchihangana kurhagalukira amagosa mani?’ Wakashuba kuchibaza ebibazo bili nk’ebi amango oli wasoma engani z’abandi balume n’abakazi b’obwemere bashamberwe omu Biblia. Nabo balwisize ebibazo nk’eby’oli wageramo si? Ngeso zihe zinja baliyerekene? Omu ngani yoshi-yoshi yiwasoma, ochibaze: ‘Nkagurhe nakajira y’imba kuguma n’oyu mukozi mwimana wa Yehova?’

14. Bichi rhwakayunguka omu kulolera oku berhu bemezi?

¹⁴ Rhwashuba kugwarha enyungu omu kulolera oku berhu bemezi, babe bachili misole  changwa bakulire. Omufano, ka hali omuntu w’omu chibaga chawe omenyere oli walembera echigereregezo oku bwimana? Nkabaga abera yibamuhidika, abantu b’omulala gwage yibamupinga, changwa nkabaga amagala mage mabihire. Hali engeso nyinja obwene k’oyola muntu nawe wakayiganya si? Omu kulolereza omufano gwage, wakayiga enjira zinja zakakurhabala olembere ebigeregezo oli wahurana. Rhugwerhe eshukrani nene okubona abo bene-berhu na bali-berhu barhulekere omufano gwinja g’obwemere rhwakayiganya—gwarhuma rhwagwarha omwishingo!​—Ebr. 13:7; Yak. 1:2, 3.

15. Hano lihe Paulo ahaanaga lyakarhurhabala rhugenderere kuchishingira ebi rhuli rhwakola omu kasi ka Yehova?

¹⁵ Yirhugendereza obuguma n’omurhula omu chibaga, bihemere buli muguma werhu ahaane nk’oku obuhashe bwage bunali. Waza oku Bakristu b’omu myaka egana ya burhanzi. Baligwerhe empano n’engabane zirhali kuguma. (1 Ko. 12:4, 7-11) Aliko echola chirhabalerhaga m’omurhima g’okuhigizana n’akavulindi. S’aliko, Paulo ahanulabo oku buli muguma akole “omu kuyumbaka omubiri gwa Kristu.” Ayandikira abanya efeso ntya: “Amango buli chirumbu chili chakola bwinja echola chinarhuma omubiri gwakula, n’okuchiyumbaka omu buzigire.” (Efe. 4:1-3, 11, 12, 16) Balala banajira ntyo banalerha omurhula n’obuguma; birhunali rhwabona omu bibaga byerhu zene.

16. Bichi rhukwanene rhuhigirire kujira? (Waebrania 6:10)

¹⁶ Ohigirire kurhayinja wachihuzanya n’abandi. S’ahubwe, ololere ku Yesu, onachihangane oyiganye engeso zage. Oyiganye omufano gw’abalume n’abakazi b’obwemere bashamberwe omu Biblia n’ogwa bene-berhu na bali-berhu ba mu zinola siku. Ok’oli wagenderera kukola nk’oku obuhashe bwawe bunali, ochizere ku “Yehova arhaba ndyalya mpu ayibirire abijiro byawe.” (Osome Waebrania 6:10.) Ogenderere kugwarha omwishingo omu kasi ka Yehova, ey’onamenyere okw’asimisizwe n’okuntu oli wakola okwawe koshi y’ojira obulonza bwage.