1. Otjikeṋa tji tji tu pa ondjoroka yatjiri?

 JEHOVA u vanga kutja tu kare nondjoroka. Eṱe matu tjiwa otjiṋa hi, mena rokutja ondjoroka otjikaṋena tjovihape vyombepo ye ondjapuke. (Gal. 5:22) Tjinga amatu tjiwa kutja mokuyandja mu nenyando tjinene pokupewa, eṱe tu muna ondjoroka yatjiri mokukara norupa okuura motjiungura tjokuzuvarisa, nokuvatera ovakambure ovakwetu momiano pekepeke.—Oviung. 20:35.

2-3. (a) Otja komambo nge ri mOvagalate 6:4, ovikeṋa vivari mbi mavi tu vatere okukara nondjoroka motjiungura tja Jehova? (b) Matu katara ku ye morupa ndwi?

² Otja komambo nge ri mOvagalate 6:4, omuapostele Paulus wa tamuna oviṋa vivari mbi mavi tu vatere kutja tu kare nondjoroka. (Lesa.) Otjitenga, eṱe matu sokukondja okuungurira Jehova otja pu matu yenene. Indu tji twa ungura pu matu yenene, eṱe matu sokukara nondjoroka. (Mat. 22:36-38) Otjitjavari, eṱe katu sokurisasaneka na varwe. Kainatja kutja tu yenena okuungura tjike mena rouveruke wetu, omahongero wetu, poo ondjiviro ndji tu na yo, eṱe matu sokuraisa ondangi ku Jehova. Avihe mbi tu yenena okutjita tu pewa i ye. Nungwari, varwe tji ve ungura nawa motjiungura tjokuzuvarisa okukapita eṱe, eṱe matu sokukara nondjoroka kutja owo ve ungurisa oviyandjewa vyawo okutanga Jehova, nu kaku rietera oveni ouwa poo okuvanga okumunika nawa povakwao. Ku nao, eṱe matu sokurihongera ku wo, moruveze rwokuvanga okuriraisa kutja eṱe wina tu ungura nawa pu wo.

³ Morupa ndwi matu katara kutja otjikeṋa tji matji yenene okutuvatera, indu tji twa u momuinyo mena rokuhinokuyenena okuungura ovingi motjiungura tja Jehova. Wina matu katara kutja oviyandjewa vyetu mbi tu na vyo, matu yenene vi okuviungurisa momuano omusembasemba, nokutja matu yenene okurihongera tjike kovihorera vyovakwetu.

4. Otjikeṋa tji matji yenene okutjita kutja tu we momuinyo? Yandja otjihorera.

⁴ Tjiva vetu katu yenene okuungura avihe mbi matu vanga okuungura motjiungura tja Jehova, mena roukurundu poo omitjise. Nu imbi vi tjita kutja tu we momuinyo. Omukazendu omukambure wena Carol wa ri mongaro otjingeyo. Eye aa zuvarisa koṋa ku kwa ri ouhepe wovazuvarise. Oruveze ndwo, eye ee rihongo Ombeibela ku novandu 35, nu wa vatera tjiva okuriyandja oveni ku Jehova nokupapitisiwa. Carol wa ri nondoṋeno motjiungura tjokuzuvarisa. Kombunda eye wa verere tjinene, nu povikando ovingi aa hepa okukara ponganda. Carol wa tja: “Ami mbi tjiwa kutja mena rouvere wandje, hi yenene okuungura ovakwetu mbi ve yenena okuungura. Posi yokutja mbi rimuna kutja kawami Omukriste omusemba otja wo. Ami hi yenene okuungura oviṋa avihe mbye tje vanga okutjita, nu iho tjiri tji tjita kutja mbi we momuinyo.” Carol u vanga okuungurira Jehova otja pu ma yenene. Tjiri iho otjiṋa otjiwa. Eṱe matu yenene okukara nongamburiro kutja Mukuru wetu wotjari u tjaterwa mena rokutja Carol u kondja nomasa okuungura otja pu ma yenene.

5. (a) Otjikeṋa tji matu sokuzemburuka indu tji twa u momuinyo, mena rokuhinokuyenena okuungura oviṋa avihe mbi matu vanga okuungura? (b) Otja tji twa munu moviperendero, omurumendu omukambure wa kondja vi okuungurira Jehova otja pu ma yenene?

⁵ Ndoovazu povikando tjiva u wa momuinyo mena rokuhinokuyenena okuungura imbi mbyoo ungura rukuru, ripura omuini kutja, ‘Hapo Jehova u undjira ko tjike ku ami?’ Jehova u vanga kutja u ungure otja omasa nozongaro zoye nai pu maze ku yandjere. Ripura na ihi: Omukazendu omukambure wozombura 80 u rimuna okuwa momuinyo, mena rokutja eye ka yenene okuungura motjiungura tjokuzuvarisa, otja tjaa ungura indu tja ri nozombura 40. Eye u muna kutja Jehova ke nonyuṋe mu imbi mbye ungura, nandarire kutja eye u ungura otja pu ma yenene. Posi yokutja, hapo imbwo ouatjiri? Ripurira ku imbi. Ndoovazu omukazendu omukambure ngo aa ungura otja paa yenene tja ri nozombura 40, nu ngamba u ungura otja pu ma yenene nai tje nozombura 80, okutja ke na pa isa okuungurira Jehova otja omasa nozongaro ze pu ze mu yandjera. Indu tji twa utu okurimuna kutja oviungura vyetu kavi tjata ku Jehova, eṱe matu hepa okurizemburukisa oveni kutja Jehova ongu tya kutja ovikeṋa mbi tjata ku ye. Indu tji matu ungura otja omasa nozongaro zetu pu maze tu yandjere, okutja Jehova ma kara nohange na eṱe.—Sasaneka na Mateus 25:20-23.

6. Matu yenene okurihongera tjike kotjihorera tja Maria?

⁶ Ma rire oupupu okukara nondjoroka indu tji twa yandja ombango ku imbi mbi matu yenene okutjita, moruveze rwokuyandja ombango ku imbi mbi tu hi nokuyenena okutjita. Tara kotjihorera tjomukazendu omukambure wena Maria, ngwa ri nomutjise mbwa tjita kutja a ha yenene okuungura ovingi motjiungura tjokuzuvarisa. Eye rutenga wa ri nombameno, nu ee rimunu kutja otjiporoporo. Kombunda eye we ripura ohunga nomukazendu omukambure mombongo ngwa verere nu ngwaa kara mombete, nu Maria wa tya okumuvatera. Maria wa tja: “Ami mba tya okukazuvarisa pu na ye mokutona ozongoze nokutjanga otutuu. Otjikando atjihe tji mba kaungura pu na ye, ee kotoka ponganda ambi nondjoroka nohange momuinyo, mena rokutja mba vatere omukambure omukwetu.” Eṱe wina matu yenene okuharera ko ondjoroka, indu tji matu yandja ombango ku imbi mbi matu yenene okuungura, moruveze rwokuyandja ombango ku imbi mbi tu hi nokuyenena okuungura. Posi yokutja, matu sokutjita vi indu tji matu yenene okuungura ovingi, poo tji tu yenena okuungura nawa moviungura tjiva vya Jehova?

7. Erakiza riṋe omuapostele Petrus nda yandja kOvakriste?

⁷ Morutuu rwe orutenga, omuapostele Petrus we riyarikaṋa kovakambure ovakwao  okuungurisa oviyandjewa vyawo, nondjiviro ndji ve na yo, okuyanḓiparisa ovakambure ovakwao. Petrus wa tja: “Auhe nga ungurise otjiyandjewa tja pewa i Ndjambi kouwa wovakwao. Komuhingo mbwi eye ma rire omutye omuwa woviyandjewa pekepeke vyaNdjambi.” (1 Petr. 4:10) Eṱe matu sokukondja nomasa okuungurisa oviyandjewa vyetu otja pu matu yenene, nokuhinokurikenda kutja varwe mape ya ave ṱeruru na eṱe, poo ave u momuinyo. Indu tji matu tjiti nao, mena rokutira kutja ovakwetu mave munu ko vi, okutja kamaatu ungurire Jehova otja pu matu sokumuungurira.

8. Otja ko 1 Ovakorinte 4:6, 7, ongwaye tji tu ha sokuritongamisa mena roviyandjewa mbi tu na vyo?

⁸ Eṱe matu sokuungurisa oviyandjewa vyetu nawa, posi yokutja matu sokukengeza kutja atu he ritongamisire vyo. (Lesa 1 Ovakorinte 4:6, 7.) Otjotjihorera, ove mape ya o rire omundu ngu yenena okuuta okurihonga Ombeibela oupupu ku novandu. Ungurisa otjiyandjewa ho. Posi yokutja, ounanḓengu okuzemburuka kutja ko sokuritongamisira tjo. Ngatu tje ove wa ri notjihorera otjiwa motjiungura tjokuzuvarisa, nu o utu okurihonga Ombeibela ku nomundu. Nove u nonḓero tjinene okuraera okambumba keṋu kokuzuvarisa ohunga notjihorera ho. Posi yokutja, indu tji mwa hakaene na wo, o vaza omukazendu omukambure ngu ma serekarere ohunga nomuano ma yandja okambo motjiungura tjokuzuvarisa. Eye wa yandja okambo, nove wa utu okurihonga Ombeibela ku nomundu. Mo tjiti vi? Ove mo tjiwa kutja okambumba kokuzuvarisa make yenene okuyanḓiparisiwa i yotjihorera tjoye. Posi yokutja ove mape ya o tye okuundja otjikando tjarwe pu mo yenene okuveserekarera otjihorera tjoye ho, mena rokutja ko nokuvanga kutja omukazendu omukambure ngwa yandja okambo me rimune kutja eye kaungura nawa otja ove. Okutjita nao, maku raisa ouwa. Posi yokutja, ove o isa okuuta okurihonga Ombeibela ku novandu. Ungurisa otjiyandjewa tjoye ho.

9. Matu sokuungurisa vi oviyandjewa vyetu?

⁹ Ngatu tjiwe kutja ounongo nondjiviro ngamwa aihe ndji tu na yo, oviyandjewa okuza ku Mukuru. Eṱe matu sokuungurisa oviyandjewa mbyo okutunga ombongo, nu katu sokuviungurisa kouwa wetu oveni uriri. (Fil. 2:3) Indu tji matu ungurisa omasa nondjiviro yetu okutjita ombango ya Mukuru, eṱe tu nepu ewa rokukara nondjoroka. Nu kamena rokutja tu ungura ovingi povakwetu, poo okukondja okuungura nawa pu wo, nungwari omena rokutja tu vanga okuungurisa oviyandjewa vyetu kutja vi ete ohiviro ku Jehova.

10. Ongwaye tje ri otjiṋa otjivi okurisasaneka ku na varwe?

¹⁰ Tji tu hi nokukengeza, mape ya atu utu okusasaneka oviṋa mbi tu ungura nawa, ku na imbi  omundu warwe mbye ha ungura nawa. Otjotjihorera, omurumendu omukambure mape ya u yandja omahungi omawa. Iho otjiṋa ke tjiukirwa. Nungwari momutima we, eye mape ya e ripura kutja omusemba pomurumendu omukambure ngu ha yandja omahungi nawa. Posi yokutja omurumendu omukambure ngu ha yandja omahungi omawa ngo, mape ya a rire omusekirise omuwa, omuhonge omuwa wovanatje ve, poo a rire omundu omupyuke motjiungura tjokuzuvarisa. Tjiri otjiṋa otjiwa okukara novakambure ovengi mbe noviyandjewa oviwa nao, nu mbe ungurisa oviyandjewa mbyo okukarera Jehova nokuvatera varwe.

11. Ongwaye tji matu sokukondja okuhorera ku Jesus?

¹¹ Otjiperi kutja katu sokurisasaneka ku na varwe, posi yokutja eṱe matu yenene okurihonga ovingi okuza kovihorera vyovakarere va Jehova ovaṱakame. Otjihorera otjisembasemba ku matu yenene okurihongera ko otja Jesus. Nandarire kutja eye wa ri ohomonena, eṱe matu yenene okurihongera kovikaṋena vye oviwa noviṋa oviwa eye mbya tjita. (1 Petr. 2:21) Indu tji matu kondjo okuhorera kotjihorera tje otja pu matu yenene, eṱe matu rire ovakarere va Jehova ovawa, nu wina matu rire ovapyuke motjiungura tjetu tjokuzuvarisa.

12-13. Otjikeṋa tji matu yenene okurihongera kOmbara David?

¹² MEmbo ra Mukuru matu vaza mo ovihorera ovingi vyovarumendu novakazendu ovaṱakame mbi matu yenene okuhorera ko, nandarire kutja kava ri ohomonena. (Hebr. 6:12) Ripura nomambo wa Jehova nga hungira ohunga nOmbara David, indu tja tja: Eye “omurumendu ngwi ngu ma tjata ku Ami.” Ombeibela yarwe ya toroka omambo ngo otja: “Eye omundu Ami mu mbi nonyuṋe mo tjinene.” (Oviung. 13:22) Posi yokutja David kaa ri ohomonena. Eye wina wa tjita ozondataiziro ozonene. Nakombanda yanao, eye otjihorera otjiwa ku eṱe. Omena raye? Mena rokutja indu tja vyurwa, eye ke na pa paha ombitira po. Nungwari eye wa yakura omaronga omakukutu nga pewa, nu wa ri nomuhihamwatima koviṋa mbya tjita mbyo. Mena ranao, Jehova we mu isira.—Eps. 51:3, 4, 10-12.

¹³ Eṱe matu yenene okurihongera ku David mokuripura oveni kutja, ‘Mbi raisa ongaro iṋe tji mba pewa omaronga? Hapo mbi hakahana okuyakura ozondataiziro zandje, poo mbi kondja okupaha ombitira po? Mbi hakahana okuyandja ondjo ku varwe? Mbi kondja oukukutu kutja e ha yarukire po ozondataiziro zandje?’ Ove mo yenene okuripura omapuriro otjingewo otja tji mo lese ohunga novarumendu novakazendu varwe ovaṱakame mOmbeibela. Hapo owo va tjinda omauzeu otjingewo ove ngu u na wo nai? Ovikaṋena viṋe  oviwa owo mbi va raisa? Otjikando atjihe, ripura omuini kutja, ‘Hapo ami me yenene vi okukara otja ovakarere va Jehova ovaṱakame mbo?’

14. Matu yenene vi okumuna ouwa mokutara kovihorera vyovakambure ovakwetu?

¹⁴ Eṱe wina matu yenene okumuna ouwa indu tji twa tara kovakambure ovakwetu ovanene novaṱiṱi. Otjotjihorera, hapo pe nomundu mombongo yeṋu ngu tjinda omarorero nouṱakame, ngahino oṋiṋikizire okuza komapanga, omapirukiro okuza koveṱunḓu re, poo ngwa vera? Hapo u muna mo ovikaṋena oviwa mbi mo vanga okuhorera ko? Mokutara kotjihorera tje otjiwa, ove mape ya o rihongo omiano vyokutjinda omarorero woye omuini. Eṱe tjiri tu nondangi tjinene kutja ovakambure mba ve yenena okutupa ovihorera oviwa vyongamburiro.—Hebr. 13:7; Jak. 1:2, 3.

15. Omaronga yeṋe omuapostele Paulus nga yandja, ngu maye yenene okutuvatera kutja tu kare nondjoroka motjiungura tjetu ku Jehova?

¹⁵ Kutja tu kurise ohange nombwaneno mombongo, auhe wetu ma hepa okuungura otja omasa nozongaro ze omuini pu maze mu yandjere. Tara kOvakriste veserewondo etenga. Owo va ri noviyandjewa nomerizirira pekepeke. (1 Kor. 12:4, 7-11) Posi yokutja, kaatji tjiti kutja tjiva ve rimune kutja ovasemba povakwao poo ve kare nohaṋi mokati kawo. Nungwari Paulus wa tunduuza auhe wawo okutjita atjihe tji matji heperwa po “kokutja ve tunge orutu rwaKristus.” Paulus wa tjanga kOvaefese na tja: “Ouṋepo auhe worutu u yenenasana, nu auhe pamwe au rire otjiṋa tjimwe; norutu otji ru ritunga oruini morusuvero.” (Ef. 4:1-3, 11, 12, 16) Imba mbaave tjiti imbi Paulus mbya hungira, aave kurisa ohange nombwaneno. Nu imbyo ovikaṋena mbi tu muna mozombongo zetu ndino.

16. Otjikeṋa tji matu sokukondja okutjita? (Ovaheberi 6:10)

¹⁶ Kondja okunakaura okurisasaneka ku na varwe. Nungwari rihongera ku Jesus nu u kondje okuhorera kovikaṋena vye. Muna ouwa movihorera oviwa vyongamburiro mbya tjangwa mOmbeibela, novihorera oviwa vyovakambure ovakwetu ndino. Otja tji mo kondjo okuungurira Jehova nomutima woye auhe, kara nongamburiro kutja Jehova “Eye omunausemba. Eye ke nokuzemba otjiungura tjeṋu.” (Lesa Ovaheberi 6:10.) Kayende komurungu okukara nondjoroka motjiungura tjoye ku Jehova, nu tjiwa kutja eye u nondjoroka indu tji me ku munu amo mu ungurire nomutima woye auhe.