1. Ɔdi gē je eeye lɛ alɔ fiyɛ duu a?

 UJEHOFA dɔka ku alɔ gweeye. Alɔ jé ɛnyā ohigbu ku eeye wɛ aya éyi ipu ikpo ku Alelekwu Ihɔ a. (Ugal. 5:22) Abɔ alɔ gē lɛ eeye fiyɛ eko duuma nɛ alɔ gē je fiyɛ eko nɛ alɔ gē miyɛ a, ɔtu ku alɔ gē mu mla eeye eko duuma nɛ alɔ yuklɔ lɔfu lɔfu ipu uklɔ ku ɔna ō ta, klla je otabɔ lɛ ayinɛ alɔ ɔwɛ ɛyɛɛyɛyi.—Ācot. 20:35.

2-3. (a) Ɛgɛ néē ma ɔ fu ipu ɔkpá ku Ācɛ Ugalésīya 6:4 a, ɔdi mla ɔdi gáā ta alɔ abɔ cɛɛ ku alɔ yɔ i lɛ eeye ipu ɛ̄gbā ō gba ku alɔ lɛ Ujehofa a? (b) Ɔdi nɛ alɔ kē gáā leyi yɛ ɔ ipu ikpɛyi ɛlā nyā a?

² Ɛgɛ néē ta ɔ ipu ɔkpá ku Ācɛ Ugalésīya 6:4 a, ɔyikpo Upɔlu kɛla lɛyikwu aɔdā ɛpa nōo géē ta alɔ abɔ cɛɛ ku alɔ yɔ i lɛ eeye a. (Jé.) Aflɛyi, alɔ cika ō je ofiyɛ duu ku alɔ lɛ Ujehofa. Ɔdaŋ ku alɔ yɔ i je ofiyɛ duu ku alɔ lɛ Ujehofa, alɔ cika ō lɛ eeye. (Umát. 22:36-38) Ɔmpa, alɔ i cika ō miya iyi alɔ mla ācɛ ɔhá ŋ. Ɔdā duuma nōo kóō tɔɔtɛ lɛ alɔ ō ya naana ohigbu ɛgɛ nɛ alɔ lɔfu iyē, nwu aɔdā alɛwa ɛ, amāŋ nōó kóō lɛ ɛdɔ ɛhi éyi nɛ alɔ lɛ, alɔ cika ō ta Ujehofa ahinya ku nu. Ɛjɛɛji ɔdā nɛ alɔ lɛ a ŋma ɛgiyi nu. Abɔ ɔhá ku nu, ɔdaŋ ku ācɛ ɔhá yɔ i ya lɔhi fiyɛ aya ōhī ipu uklɔ ku ɔna ō ta a fiyɛ ɛgɛ nɛ alɔ yɔ i ya a, alɔ cika ō gweeye kē yɔ i bi ɔdā néē jé a le je owoofu lɛ Ujehofa, kē bi ɔ le yuklɔ o ya ɛɛ kéē mafu kē lɔhi fiyɛ ācɛ ɔhá, amāŋ ohigbu kē wɛ ācɛ ō gbɛla iyi uwa foofunu ŋ. Ohigbu ɛnya, ikɔkɔ nɛ alɔ géē gbɔɔ ō kweyi mla uwa a, alɔ cika ō nwu ɛlā ŋma ɛgiyi uwa.

³ Ipu ikpɛyi ɛlā nyā, alɔ géē má ɔdā nōo lɔfu ta alɔ abɔ eko duuma nɛ ɔtu le gbenyi lɛ alɔ, ohigbu ka ó tɔɔtɛ lɛ alɔ ō ya ɛjɛɛji ɔdā nɛ alɔ dɔka ō ya ipu ɛ̄gbā ō gba ku Ujehofa ŋ. Alɔ klla géē leyi yɛ ɛgɛ nɛ alɔ lɔfi bi ɛhi duuma nɛ alɔ lɛ a le yuklɔ ɔwɛ olɔhi  fiyɛ duu, mla ɔdā nɛ alɔ lɔfu nwu ŋma ocabɔ ku ācɛ ɔhá a.

4. Ɔdi lɔfu ya ku ɔtu kóō gbenyi lɛ ōhī ku alɔ a? Je ocabɔ mafu éyi.

⁴ Ōhī ku alɔ i lɔfu ya ɛjɛɛji ɔdā nɛ alɔ bi ɔtu ku alɔ géē ya ipu ɛ̄gbā ō gba ku alɔ lɛ Ujehofa ŋ, ohigbu ku alɔ yɔ i je hilokplicii amāŋ yɔ i doōcē, ɛnyā kē i cɛ lɛ ɔtu gbenyi lɛ alɔ. Ɔɔma wɛ āhɔ̄ ku Carol a. Ó tɛtɛ gē tɔɔna ɛga nɛ ɛgbá yɔ a. Ɛpleeko ɔɔma, ó ya oklɔcɛ ku Ubáyíbu mla ācɛ ofu ce igwo ɛhɔ (35), klla je otabɔ lɛ ācɛ alɛwa kéē cika jɛ ō lɛ iyi uwa gwɛɛya lɛ Ujehofa mla ō lɛ ubatisim ya. Carol yɔ i ya lɔhi ipu uklɔ ku ɔna ō ta a! Amáŋ ó gáā gbɔɔ ō doōcē nɛhi, klla géē cɛgbá ō kla ɔlɛ mla ɛyinɛhi ku eko ku nu. Carol kahinii: “N jé ka ohigbu ōcē nōo yɔ i da um a, ó tɔɔtɛ gā um ō ya ɔdā nɛ ācɛ ɔhá lɔfu ya a ŋ. Ɛnyā kē i cɛ lɛ ɔtu ya um bɛɛka ń wɛ Ɔcɛ Yɛce Ukraist olɔhi bɛɛka uwa ŋ ma. Ó tɔɔtɛ gā um ō ya ɛjɛɛji ɔdā nɛ um dɔka ō ya a ŋ, ɛnyā kē i cɛ lɛ ɔtu gbenyi gā um.” Carol dɔka ō ya ɛjɛɛji ɔdā nōó ya gla a lɛ Ujehofa. Ku ɛlā ɔkwɛyi a ba, ɔɔma wɛ ɔdā ō jeyi nɛhi! Alɔ kē jé kpɔcii ka Ɔwɔico ku alɔ nōo i meyinyinyi ɔcɛ a gē gweeye nɛhi, ohigbu ka ó yɔ i ya ɔdā nōó ya gla a.

5. (a) Ɔdi nɛ alɔ cika ō blakwu ɔ ɔdaŋ ku ɔtu le gbenyi lɛ alɔ ohigbu ka ó tɔɔtɛ lɛ alɔ ō ya ɛjɛɛji ɔdā nɛ alɔ dɔka ō ya a ŋ ma? (b) Ɛgɛ néē ma ɔ fu ipu aifoto a, ɛgɛnyá nɛ ayinɛ alɔ nɔnyilɔ a gɔbu yɔ i je ofiyɛ duu ku uwa lɛ Ujehofa a?

⁵ Ɔdaŋ ku ɔtu gē gbenyi gā uwɔ ohigbu ka ó lɛ odee nōo yɔ i ci uwɔ ŋma ō ya ɔdā nɛ a dɔka ō ya a, da iyi uwɔ ɔka nyā: ‘Ɔdi nɛ Ujehofa cɛgbá ŋma ɛgiyi um a?’ Ujehofa dɔka ku a ya ɔdā nɛ a ya gla ipu āhɔ̄ nɛ a ya anu ɔɔma. Leyi má ocabɔ nyā ɛ: Ɔtu gē gbenyi lɛ ɔyinɛ alɔ nɔnya éyi nōo yɔ ihayi ofu ɛnɛ, ohigbu ka ó tɔɔtɛ lɛ ɔ ō ya ɛgɛ nōó tɔɔtɛ gē ya ipu uklɔ ku ɔna ō ta bɛɛka eko nōó yɔ ihayi ofu ɛpa ku nu a ŋ. Ó gbɛla ka naana nōó yɔ i je ofiyɛ duu ku nu a, ɔɔma i yɔ i cɛ lɛ Ujehofa gweeye ŋ. Amáŋ ɛlá ō gbo ɔɔma wɛ ɔkwɛyi nɛɛ? Gbɛla tu ɔ ɛ. Ɔdaŋ ku ɔyinɛ nɔnya a yɔ i je ofiyɛ duu ku nu eko nōó yɔ ihayi ofu ɛpa, klla yɔ i je ofiyɛ duu ku nu kpɔ eko nōó yɔ ihayi ofu ɛnɛ a, ó lɛ abɔ ci ō yɔ i je ofiyɛ duu ku nu ɛ ŋ. Ɔdaŋ ku ɔtu gbɔɔ ō ya alɔ ku alɔ i yɔ i yuklɔ jɛ nōo géē ya ku ɔtu kóō he Ujehofa ŋ, alɔ cika ō tu iyi alɔ ɛlá kwu ɔ ka Ujehofa gē miya ɔdā nōo jɛ ɔ nōo géē ya ku ɔtu kóō he ɔ a. Ɔdaŋ ku alɔ ya ɔdā nɛ alɔ ya gla a, Ujehofa géē gweeye mla alɔ nɛhi!—Má Umátiyu 25:20-23.

6. Ɔdi nɛ alɔ lɔfu nwu ŋma ocabɔ ku Maria a?

⁶ Ó géē tɔɔtɛ lɛ alɔ fiyɛ ō lɛ eeye, ɔdaŋ ku alɔ lɛ ɔtu ku alɔ kwu ɔdā nɛ alɔ ya gla, ikɔkɔ ɔdā nɛ alɔ i ya gla ŋ ma. Leyi yɛ ocabɔ ku ɔyinɛ alɔ nɔnya éyi nōo le ku Maria nōo lɛ ōcē nōo gē ci ɔ ŋma ō ya nwune ipu uklɔ ku ɔna ō ta a. Eko aflɛyi a, ɔtu biya lɛ ɔ nɛhi klla ya ɔ bɛɛka ó tiile ŋ ma. Amáŋ ó gáā blakwu ɔyinɛ nɔnya éyi ipu ujɔ nōo gē gwuta ɛyi agodo eko doodu ohigbu ōcē, Maria kē le miya ō gáā ta ɔ abɔ. Maria kahinii: “N lɛ ōmiya ya ō tɔɔna mla ɔ o bu ipu ɔdā ō le gwo uwaya mla ɔkpá ō ta fu ācɛ. Eko duuma nɛ alɔ yuklɔ tɔha, n gē piyɛyi wa ɔlɛ mla eeye, ɔtu ogbonɛnɛ, ohigbu ka ó le tɔɔtɛ gā um ō je otabɔ lɛ ɔyinɛ um nɔnya.” Alɔ abɔyi alɔ lɔfu ya ku alɔ lɛ eeye fiyɛ ɔdaŋ ku alɔ lɛ ɔtu ku alɔ kwu ɔdā nɛ alɔ lɔfu ya gla, ikɔkɔ ɔdā nɛ alɔ i lɔfu ya gla ŋ ma. Amáŋ ɔdaŋ ku alɔ lɔfu ya fiyɛ, amāŋ ya lɔhi aya ōhī ipu ɛ̄gbā ō gba ku alɔ lɛ Ujehofa bɛɛ?

7. Ukɔ́ ocɛgbá nyá nɛ ɔyikpo Upita tu Ācɛ O Yɛce Ukraist a?

⁷ Ipu ɔkpá aflɛyi ku nu nɛ ó ta a, ɔyikpo Upita ta ayinɛ nu ɔtu kwu ɔtu kéē bi ɛhi duuma néē lɛ a le ta ayinɛ uwa ɔmpa abɔ. Upita ta ɔkpá kahinii: “Ɔwɔicō lɛ ɛhi ɛyɛ́ɛyɛ́yí kɔ̄ lɛ ɔnyɔɔnyɛ  kú aá, ohígbū ɔ́ɔmā aá leyīkwu ɔ́ lɔɔlɔhi cɛ́ɛ́ kú aá bī ɛhi ā le tá ɔ́mpa aá abɔ̄.” (1 Upít. 4:10) Alɔ cika ō ya ɔdā nɛ alɔ ya gla ō bi ɛhi duuma nɛ alɔ lɛ a le yuklɔ, cɛɛ ku alɔ i lɛ ɛlá wu ɔ ku ācɛ ɔhá géē gbɔɔ ō mimanyi alɔ, amāŋ ku ɔtu géē gbenyi lɛ uwa ŋ. Ɔdaŋ ku alɔ i ya lɛ ŋ ohigbu ku alɔ yɔ i lɛ ɔtooplico ɛgɛ nɛ ɔtu géē ya ācɛ ɔhá lɛ a, alɔ i gáā yɔ i je ofiyɛ duu ku alɔ lɛ Ujehofa ŋ yɔ abɔɔ a.

8. Oŋma ɛlā nōo yɔ ipu ɔkpá ku 1 Ācɛ Ukɔ́rīnti 4:6, 7 a, ɔdiya nɛ alɔ cika ō lɛ abɔ ci ō yɔ i gwo lɛyikwu ɛhi duuma nɛ alɔ lɛ a?

⁸ Alɔ cika ō bi ɛhi duuma nɛ alɔ lɛ a le yuklɔ gā ajaajɛ, amáŋ alɔ cika ō leyi kwɛɛcɛ ku alɔ hii bi uwa le gwo ŋ. (Jé 1 Ācɛ Ukɔ́rīnti 4:6, 7.) Ocabɔ mafu, ó lɔfu tɔɔtɛ gā uwɔ ō gbɔɔ oklɔcɛ ku Ubáyíbu mla ɔcɛ. A cika ō bi ɛhi ɔɔma le yuklɔ lɔɔlɔhi! Amáŋ ó cɛgbá ku a bla, ku á cika ō bi ɔ le yɔbɔɔcɛ ŋ. Alɔ je ɔ ka ó lɛ ɔdā olɔhi éyi nɛ a má ipu uklɔ ku ɔna ō ta, a kē gā gbɔɔ oklɔcɛ ku Ubáyíbu. Ó kē yɔ i ŋmo uwɔ unwu ō da ɛjɛɛji ācɛ nōo yɔ ipu ígwu nɛ aa gē yuklɔ ku ɔna ō ta tɔha a lɛyikwu ɔ. Eko nɛ a gáā le jila tɔha mla ācɛ ohile ipu ígwu a, anu ɔyinɛ nɔnya éyi gáā gbɔɔ ō da uwa ka ó lɛ umagajine éyi je lɛ ɔcɛ. Ó lɛ umagajine éyi je lɛ ɔcɛ; awɔ a kē gbɔɔ oklɔcɛ ku Ubáyíbu. Ɔdi nɛ a gáā ya a? A jé ku ígwu ku aa a géē lɛ ɔtu ō tu kwu ɔtu ŋma ɔ̄kā ku uwɔ a, amáŋ a lɔfu miya ō gbeyi cɛɛ ku a da uwa lɛyikwu ɔ igbo ɔhá, ohigbu ku á dɔka ō ya ku ɔtu kóō ya ɔyinɛ nɔnya a bɛɛka umagajine nōó je a ka ó ya lɔhi bɛɛka awɔ a ŋ ma. Ɔɔma wɛ ɔdā ogbonɛnɛ nɛ a cika ō ya a. Amáŋ a hii lɛ abɔ ci ō ya ku a klɔcɛ ku Ubáyíbu mla ācɛ ŋ. A lɛ ɛhi ɔɔma, bi ɔ le yuklɔ!

9. Ɛgɛnyá nɛ alɔ cika ō bi aɛhi nɛ alɔ lɛ a le yuklɔ a?

⁹ Alɔ bla ku ɛhi duuma nɛ alɔ lɔfu lɛ a wɛ ɛhi ŋma ɛgiyi Ɔwɔico. Alɔ lɔfu bi aɛhi nyā le yuklɔ cɛɛ ku ujɔ a kóō yɔ i jɛ gɔbu, ó wɛ ō bi ɔ le mafu ku alɔ lɔhi fiyɛ duu a ŋ. (Ufíl. 2:3) Ɔdaŋ ku alɔ bi ɔfu mla ɛhi ku alɔ le ya ɔdā nōo wɛ ococɛ ku Ɔwɔico, alɔ géē lɛ ɔda nōo cika ō cɛ lɛ alɔ gweeye, ó wɛ ohigbu ku alɔ yɔ i ya lɔhi fiyɛ ācɛ ɔhá, amāŋ ō yɔ i ceyitikwu ku alɔ lɔhi fiyɛ uwa ŋ, amáŋ ohigbu ku alɔ yɔ i bi aɛhi a yuklɔ o ya ɛɛ ku alɔ bi owoofu gē lɛ Ujehofa.

10. Ɔdiya nōó wɛ ɔdā ijeeyi ō miya iyi alɔ mla ācɛ ɔhá ŋ ma?

¹⁰ Ɔdaŋ ku ɔcɛ i leyi kwɛɛcɛ ŋ, ɔcɛ ɔɔma lɔfu gbɔɔ ō bi ɔdā nōó jé ō ya lɔhi fiyɛ duu a le miya mla ɔdā nɛ ɔcɛ ɔhá i jé ō ya lɔhi ŋ ma. Ocabɔ mafu, ɔyinɛ nɔnyilɔ éyi lɔfu jé ō ya ɛlā ō ka tɛɛcɛ lɔɔlɔhi. Ɔdā nōó jé ō ya lɔhi a yɔ abɔɔ a. Amáŋ ó lɔfu gbɛla ku anuɔ lɔhi fiyɛ ɔyinɛ nɔnyilɔ ɔhá nōó jé ō ya ɛlā ō ka tɛɛcɛ lɔhi ŋ ma. Amáŋ ɔyinɛ nɔnyilɔ ɔhá ɔɔma kē lɔfu jé  ō mafu uce ogbonɛnɛ lɛ ɔcɛ, jé ō nwu ayipɛ ɔlɛ nu ɛlā, amāŋ lɛ ɔtu caca ō yuklɔ ku ɔna ō ta a. Ó wɛ ɔdā ō jeyi nɛhi ku alɔ lɛ alɛwa ku ayinɛ alɔ nɔnyilɔ mla ayinɛ alɔ nɔnya nōo jé odee nɛhi, nōo gē bi ɛhi néē lɛ a le gba Ujehofa ɛ̄gbā, klla gē bi ɔ le ta ācɛ ɔhá abɔ!

11. Ɔdiya nɛ alɔ cika ō ceyitikwu yɛce ocabɔ ku Ujisɔsi a?

¹¹ Naana nɛ alɔ cika ō lɛ abɔ ci ō yɔ i miya iyi alɔ mla ācɛ ɔhá a, alɔ lɔfu nwu ɛlā nɛhi ŋma ɛgiyi ācɛ ɔhá nōo hayi kpaakpa ipu ɛ̄gbā ō gba ku Ujehofa a. Ocabɔ olɔhi fiyɛ duu ku ɔcɛ nɛ alɔ lɔfu nwu ɛlā ŋma ɛgiyi nu a wɛ Ujisɔsi. Ujisɔsi wɛ ɔcɛ nōo jila iyē mɛɛlɛ amáŋ alɔ a i kē jila iyē ŋ, naana a, alɔ lɔfu nwu ɛlā alɛwa ŋma ɛnɛɛnɛ uce ō ya ku nu, mla aɔdā ohidaago alɛwa nɛ ó ya a. (1 Upít. 4:10) Ɔdaŋ ku alɔ ya ɔdā nɛ alɔ ya gla ō yɛce ocabɔ ku nu lɔɔlɔhi ɛgɛ nōó tɔɔtɛ lɛ alɔ a, alɔ géē je piya ɛnɛɛnɛ ācɛ ō gba Ujehofa ɛ̄gbā, klla géē ya lɔhi fiyɛ ipu uklɔ ku ɔna ō ta ku alɔ.

12-13. Ɔdi nɛ alɔ lɔfu nwu ŋma ɛgiyi Udefidi nōo wɛ ɔcɛ́ a?

¹² Ipu ɛlā ku Ɔwɔico, alɔ lɛ ocabɔ alɛwa ku acɛnyilɔ mla acɛnya nɛ alɔ lɔfu ya ɛgbla ku uwa, naana néē wɛ ācɛ nōó jila iyē ŋ ma. (Uhíb. 6:12) Gbɛla lɛyikwu Udefidi ɔcɛ́, nɛ Ujehofa hi ka “ɛdɔ ɔ̄cɛ nōo he um ɔtū” a. (Ācot. 13:22) Amáŋ, Udefidi wɛ ɔcɛ nōó jila iyē ŋ. Ku ɛlā ɔkwɛyi a ba, ó ya inyileyi bɔbi bɔbi ōhī. Naana kpɔ a, ó wɛ ɛnɛɛnɛ ocabɔ lɛ alɔ. Ɔdiya a? Ohigbu ku eko néē lɛ ɔ na tu ɔwɛ a, ó ceyitikwu kóō dɔka ɔdā ō lɛ abɔ ba ɔ ŋ. Ikɔkɔ ɔɔma, ó miyɛ ahɔ̄ olɔfu néē pi ɔ a, klla mafu ku ɔdā nɛ ó ya kwu ɔ iyē nɛhi. Ohigbu ɛnyā, Ujehofa kwu je ya ɔ ɛhi.—Aíjē 51:3, 4, 10-12.

¹³ Alɔ lɔfu nwu ɛlā ŋma ɛgiyi Udefidi ŋma lɛ ō da iyi alɔ ɔka kahinii: ‘Ɔdi nɛ um gē ya eko duuma néē lɛ um ahɔ̄ pi a? Ó gē tɔɔtɛ gā um ō má ɛga nɛ um ya bɔbi a, kɛɛ ku um gē dɔka ɔdā ō lɛ abɔ ba ɔ? N gē je inyileyi ce ācɛ ɔhá ɛyi fiyaa? N gē ceyitikwu cɛɛ ku um hii ya inyileyi ɔɔma gɛ ŋ?’ A lɔfu da iyi uwɔ aɔka ekponu ɛgɛnyā abɔ a gē jé ɔ̄kā lɛyikwu acɛnyilɔ mla acɛnya nōo hayi kpaakpa ipu Ubáyíbu a. Unwalu ɛyɛɛyɛyi néē má a wɛ ekponu bɛɛka unwalu ku uwɔ? Ɛnɛɛnɛ uce ō ya nyá néē mafu a? Ipu āhɔ̄ duuma, da iyi uwɔ ɔka kahinii: ‘Ɛgɛnyá nɛ um gáā lɛbɛɛka ācɛ nōo hayi kpaakpa ipu ɛ̄gbā ō gba ku Ujehofa nyā a?’

14. Ɛgɛnyá nɛ alɔ gáā lɛ itene ŋma lɛ ō leyi taajɛ cɛɛ ku alɔ má uce ō ya olɔhi ku ayinɛ alɔ ɔmpa a?

¹⁴ Alɔ lɔfu lɛ itene ŋma lɛ ō leyi taajɛ cɛɛ ku alɔ má uce ō ya olɔhi ku ayinɛ alɔ ɔmpa, kwu  ayipɛ oklobiya mla ācɛ nōo le hilokplici ɛ ma. Ocabɔ mafu, a lɔfu gbɛla lɛyikwu ɔcɛ duuma ipu ujɔ ku uwɔ nɛ a jé ŋ, nōo hayi kpaakpa yɔ i lɔtu ojama ŋma ɛgiyi aɛgɔ ku nu nōo yɔ i kwu ɔ abɔfu kóō ya ɔdā nōó he Ujehofa ɔtu ŋ, nōo yɔ i má o ya ŋmo ŋma ɛgiyi ācɛ apɔlɛ ku nu, amāŋ nōo lɛ unwalu ku ōcē? A má uce ō ya olɔhi duuma ɛgiyi ɔcɛ ɔɔma nōo géē he uwɔ ɔtu ō ya ɛgbla ku nu? Ŋma lɛ ō leyi yɛ ɛnɛɛnɛ ocabɔ ku ɔcɛ ɔɔma, a lɔfu nwu ɛlā ocɛgbá lɛyikwu ɔwɛ ɛyɛɛyɛyi nɛ a géē bi lé ɔtu unwalu nɛ a lɛ a. Ó wɛ ɔdā nōo jɛ alɔ eyī nɛhi ku ayinɛ alɔ nyā lɛ ɛnɛɛnɛ ocabɔ ku ɔtu okpoce taajɛ lɛ alɔ!—Uhíb. 13:7; Ujɛ́m. 1:2, 3.

15. Ɛnɛɛnɛ ukɔ́ nyá nɛ ɔyipko Upɔlu tu nōo géē ta alɔ abɔ gɔbu yɔ i lɛ eeye ipu ɛ̄gbā ō gba ku alɔ lɛ Ujehofa a?

¹⁵ O ya ɛɛ ku alɔ ya ku ɛbɔ mla opiyatɔha kóō jɛ gɔbu ipu ujɔ, ɔnyɔɔnyɛ ku alɔ cika ō ya ɔdā nōó ya gla a. Leyi yɛ ocabɔ ku Ācɛ O Yɛce Ukraist aflɛyi a ɛ. É lɛ ɛhi mla uklɔ ō ya ɛyɛɛyɛyi. (1 Ukɔ́r. 12:4, 7-11) Amáŋ ɛnyā i ya kéē kweyi amāŋ nuunu mla iyi uwa ŋ. Ikɔkɔ ɔɔma, Upɔlu ta ɔnyɔɔnyɛ ku uwa ɔtu kwu ɔtu kéē ya ɔdā nōo cɛgbá nōo ‘géē ya ku ācɛ nōo yɔ ipu ujɔ nēe wɛ ɔkpíyē kú Ohɔ́nyɛtá ā kéē jɛ̄ ipú ɛlā Ɔwɔicō.’ Upɔlu ta ɔkpá fu Ācɛ Ɛfesɔsi kahinii: “Anú ā gē leyīkwu ɛjɛ̄ɛ̄jī āyā kú ɔkpíyē ā, cɛ́ɛ́ kéē kwɔhá lɔɔlɔhi ŋmá opīyatɔ̄há kú āyā kú ɔkpíyē ɛyɛ́ɛyɛ́yí. Ó klla gē tábɔ̄ kú āyā kú ɔkpíyē dóódu kéē yúklɔ́ ɛ́gɛ́nɛ̄ ó cíkā ō yá ā.” (Āfi. 4:1-3, 11, 12, 16) Ācɛ nōo gē ya ɔdā nɛ Upɔlu ka nyā gē ya ku ɛbɔ mla opiyatɔha kóō yɔ, ɛnyā kē wɛ uce ō ya nɛ alɔ gē má ipu ujɔ ku alɔ icɛ a.

16. Ɔdi nɛ alɔ cika ō lɛ ɔtu ku alɔ ya ekponu ku alɔ géē ya a? (Ācɛ Uhíbru 6:10)

¹⁶ Lɛ ɔtu ku uwɔ ya ekponu ō lɛ abɔ ci ō yɔ i miya uwɔ mla ācɛ ɔhá. Ikɔkɔ ɔɔma, nwu ɛlā ŋma ɛgiyi Ujisɔsi, cɛɛ ku a ceyitikwu ya ɛgbla ku ɛnɛɛnɛ auce o ya ku nu. Lɛ itene ŋma ocabɔ nōo yɔ ipu Ubáyíbu, mla ocabɔ ku ācɛ nōo hayi kpaakpa icɛ a. Abɔ a yɔ i gɔbu yɔ i je ofiyɛ duu ku uwɔ a, le jé kpɔcii ka Ujehofa “gē yá ɔdā okpaakpa piyóó. Ó gáā mlanyī úklɔ́ nɛ̄ aá yá lɛ ɔ́ ā ŋ́.” (Jé Ācɛ Uhíbru 6:10.) Gɔbu ku a yɔ i gweeye ō gba Ujehofa ɛ̄gbā, ku a kē jé ka ó gē gweeye eko duuma nɛ ó má uwɔ yɔ i je ofiyɛ duu ku uwɔ lɛ ɔ, o ya ɛɛ ku a ya ɔdā nōo he ɔ ɔtu a.