1. Ịyẹ à tị́ kaa ya ọkẹkẹnị ọtụka-ọtụka hahị?

 IJIHOVA tịtọ kahị ka chị ọkẹkẹnị. Ahị jẹ́ ịnyị chajị ọkẹkẹnị ji ẹpwụ nya ugbe nya olegu ịgọgọ nyamwụ. (Gal. 5:22) Ahị kaa ye ọkẹkẹnị ọtụka-ọtụka ụka kahị kpa ẹrụ ọnyịịla pyẹ la ọngịrị nyahị wuu bala ọ-da aanahị ụbwọ a-agbẹyị ịdatị-datị, chajị ọkẹkẹnị ji ẹpwụ nya o-hu ha gụ o-yeye.​—Ụkụr. 20:35.

2-3. (a) Jaabwọ ká ụpwụ nya Ala ịGaletiya 6:4 mẹjẹ, ang imiiye iyina à tị́ ka dahị ụbwọ kịnyaa la ọ-chị ọkẹkẹnị ị-ịgba ọgbagba nya iJihova? (b) Ẹlịyẹ ahị tị́ ka kụ ẹhị yẹ a-ang ọjẹ́jẹ ọlẹ?

² Ụ-ụpwụ nya Ala ịGaletiya 6:4, ọlẹrụ ịPọlụ gu ẹnyị nya ang imiiye ịlẹ kị ka dahị ụbwọ kịnyaa la ọ-chị ọkẹkẹnị. (Wọọ.) Ọhọhẹ, ahị ka họ ụkụrwọ ha iJihova la ọngịrị nyahị wuu. Kori kahị ja họ ụkụrwọ ha iJihova la ọngịrị ọlẹ kahị la wuu aalẹ, ahị chịla kahị ka chị ọkẹkẹnị. (Mat. 22:36-38) Oheeye, áhị ka chụ ịlọhị ka pwoku angịkịla ka. Ang myị́ ang ọlẹ kahị jụ́ họ myị́ ọọlajị nya ịnyịrọ ọ-la gogo nyahị, ẹla ọjẹ́jẹ lee āhị ọlẹ kahị la, ọ chịla kahị ka ji iJihova obe. Ẹga nyamwụ ahị yé ang ịlẹ wuu kahị la bwu lẹ. Ọ́ tị ri ká angịkịla-á jẹ́ họ gụ́ụhị ụpa nya ẹrụ ọnyịịla ọ-kpa pyẹ ọhẹ, ahị ka chị ọkẹkẹnị nyori ị wẹẹ kpa āhị nyaa gwogbo ha iJihova. Ị́ họ ịnyị nyọka mẹjẹ nyori ị há gụ angịkịla lee ọ-chajị nya apyobwuna nyịlaa ka. Lẹ ọkọkọ kahị ka maga nyọka chaa ọnụ, ahị ka jẹ́ ang bwu ẹga nyaa.

³ Ẹ-ẹpwụ nya ang ọjẹ́jẹ ọlẹ, ahị ka yẹ ang ọlẹ kọ ka dahị ụbwọ ụka ká ọkịlẹtụ-ụ́ kpụhị enyi chajị nyori áhị jẹ́ họ jaabwọ kahị tịtọ ẹ-ẹpwụ nya ịgba ọgbagba nya iJihova ka. Ahị ka myịmyị-ị̀ kụ ẹhị yẹ abwọlẹ kahị ka kpa āhị ọnyị myị́ ọnyị kahị la họ ụkụrwọ ụ-ụgbẹyị ọlẹ kọ ka há gụ wuu bala ang ọlẹ kahị ka jẹ́ bwu ọgụ-ẹpẹtẹ nya angịkịla.

4. Ịyẹ tị́ du ká ọkịlẹtụ kaa kpụ angịhyẹ enyi? Ya ọ-chụ pwokwita ọhẹ wẹẹ.

⁴ Angịhyẹ nyahị á ka jẹ́-ẹ họ jaabwọ kahị tịtọ ẹ-ẹpwụ nya ịgba ọgbagba nya iJihova ka ọọlajị nya okwirichi ọchịchị lee ẹdụrụ, ọọwa tị kaa kpụhị ọkịlẹtụ enyi. Ịnyị ọ la ẹ-ẹga nya Carol lẹ. Ọ kaa kpa ẹrụ ọnyịịla pyẹ ẹ-ẹga ká ọbaba ji gụ ene-ene. Ụka ọọwa, ọ kaa mẹ ịBayịbụụ jẹ angịnyị angị 35 bala ọ-da iru nyaa ụbwọ hu ịlaa ju iJihova ụ-ụbwọ bala o-hu enyi Ohe. Ẹrụ ọnyịịla ọ-kpa pyẹ nya Carol nwụ egbe yẹẹyẹẹ! Ọọwa ẹdụrụ a jwọọ nyịlẹhị-ịlẹhị lẹ, ọ dọmwụ nyọka hụhụ ẹ-ẹpwa gụ́ lẹlẹ. Carol yẹkẹẹ: “M̀ jẹ́ nyori ọọlajị nya ẹdụrụ nyam à du kam jẹ́ họ ang ịlẹ ká angịkịla kaa họ ka lẹ. Ọ tị kaa lam lala o-ri ḿ la ọmyịmyị lala ịwa ka. Ḿ ka jẹ́-ẹ họ ang ịlẹ wuu kam tịtọ ka, ọọwa tị kaa kpụm ọkịlẹtụ enyi.” Carol tịtọ kọ ka kpa ọngịrị nyamwụ wuu họ ụkụrwọ ha iJihova. Ọọwa tị myẹhị nyịlẹhị-ịlẹhị! Ahị tị jẹ́ myị̀myị̀ nyori ọ-kpụ Ohe nyahị ọ-yẹ ahyẹẹrwẹrwa ịpyọ nyọlẹ ká ọọnahị ọwẹ wẹẹ kpa ọngịrị nyamwụ wuu họ ụkụrwọ.

5. (a) Ẹlịyẹ ahị tị́ ka kpịtịya kori ká ọkịlẹtụ-ụ́ kpụhị enyi chajị nya ang ọlẹ kahị jụ́ họ ka? (b) Jaabwọ kahị wẹẹ yẹ i-ifoto ịwẹ, ányị ọọnahị ọlẹng ọwẹ à tị́ kịnyaa la ọ-kpa ọngịrị nyamwụ wuu họ ụkụrwọ ha iJihova?

⁵ Kori ká ọkịlẹtụ-ụ́ kaa kpụng enyi ụka ọhẹ ọọlajị nya ịngịhyẹ ọlẹ ka jụ́ họ ka, tịlọng wo nyori, ‘Ịyẹ iJihova à tị́ tịtọ bwu ẹga nyam?’ IJihova tịtọ á ka họ jaabwọ ká ọngịrị nyang wuu la ka ba ẹ-ẹpwụ nya iwe-ahụrụ nyang ọla lẹẹlẹẹ. Kụ ẹhị yẹ ẹla ọlẹ wẹẹ: Ọkịlẹtụ kpụ ọọnahị ọnyang ọhẹ kọ gu ẹka 80 enyi chajị nyọlẹ kọ jẹ́ jụ́ họ ẹ-ẹrụ ọnyịịla ọ-kpa pyẹ jaabwọ kọ kaa họ ụka kọ gu 40 ka. Ọ me nyori ọlẹ kọ wẹẹ họ la ọngịrị nyamwụ wuu lẹẹlẹẹ á myị iJihova lẹhị ka. Ma ẹlẹwẹ ri ẹlịlẹhị? Kụ irya jwoo wẹẹ. Kori ká ọọnahị ọwẹ á họ ụkụrwọ la ọngịrị nyamwụ wuu ụka kọ gu ẹka 40 kọ tị wẹẹ kịnyaa la ọ-họ ịnyị ụka kọ gu ẹka 80 aalẹ, ọ́ hwabwọ la ọ-kpa ọngịrị nyamwụ wuu họ ụkụrwọ ẹnẹnẹhẹ lẹka. Kori kọ dọmwụ nyọka lahị lala o-ri áhị họ ụkụrwọ gbuu kpụ ọ ka myị iJihova lẹhị ka aalẹ, ahị baba nyọka kpịlọhị ịtịya nyori iJihova à kaa chụ ang ọlẹ kọ ka myọọ lẹhị lẹ. Kori kahị kpa ọngịrị nyahị wuu họ jaabwọ kahị ka jụ́ họ myị́ aalẹ, iJihova ka byihi ịnyịnyị yẹkẹẹ: “A họ hiigu!”​—Kụ ẹhị yẹ ịMatiyu 25:20-23.

6. Ẹlịyẹ ahị tị́ ka jẹ́ bwu ọgụ-ẹpẹtẹ nya Maria?

⁶ Ọ ka chịhị kpẹẹ la ọ-ka chị ọkẹkẹnị kori kahị ya irya nyahị nọ u-uhye nya ang ọlẹ kahị ka jụ́ họ ọkọkọ nyọlẹ kahị ka họ myị́ ka. Kụ ẹhị yẹ ẹla nya ọọnahị ọhẹ kọ ri Maria wẹẹ. Ọ́ jẹ́ họ ụkụrwọ gbuu ẹ-ẹrụ ọnyịịla ọ-kpa pyẹ ka ọọlajị nya ẹdụrụ ọhẹ kọ la. Ụka nya ọgbanyẹ, ọkịlẹtụ kpọọ enyi. Ọ lọọ lala o-ri ọ́ ju apyobwuna ka. Ma ọ kụ irya u-uhye nya ọọnahị ọnyang ọhẹ ọọjịra-jịra nyamwụ kọ jẹ́-ẹ wuleji bwu ị-ịBẹdị myị́ ka, lẹ ọ cheje nyọka dọọ ụbwọ ẹẹ. Maria yẹkẹẹ: “M̀ nwụlanọ nyọka kpa ẹrụ ọnyịịla pyẹ balọọ la ifon bala ụpwụ ọdada. Ụka myị́ ụka kahị họ ụkụrwọ lawụlẹ, m̀ kaa nyà wẹ ẹpwa la ọkẹkẹnị, ọ tị kaa myịm lẹhị nyọlẹ kam jẹ́ da ọọnam ụbwọ myị́.” Ahị ịnyịnyị ka jẹ́-ẹ họ ká ọkẹkẹnị nyahị ka lụmẹ gụ ọọwa kori kahị ya irya nọ u-uhye nya ang ọlẹ kahị ka jụ́ họ ọkọkọ nyọlẹ kahị ka jẹ́-ẹ họ ka. Kori kahị tị ka jẹ́-ẹ họ gụ ọọwa lee ọ-jẹ́ họ yẹẹyẹẹ ụpa ịhyẹ nya ịgba ọgbagba nya iJihova tị bẹẹ?

7. Ẹla o-ju apyobwuna oyina ọlẹrụ iPita à tị́ mẹjẹ angịnyị nya ịKịrayịsị?

⁷ Ụ-ụpwụ ọhọhẹ ọlẹ ká ọlẹrụ iPita da, ọ byi aanamwụ nyori nyị kpa āhị ọnyị myị́ ọnyị ọlẹ kị la ju angịnyị nya Ohe ịkịla ọhụ. IPita da ụpwụ yẹkẹẹ: “Ọng myị́ ọng lẹpwarịrị nyanụ a juwa kpa ọhaha ọnyị myị ọnyị ọlẹ ká Ohe Oluhye hu họọ, họ ụkụrwọ ọnyịịla ha  angịkịla nyanụ wuu mẹ.” (1 Pit. 4:10) Ahị ka kpa āhị ọlẹ kahị la họ ụkụrwọ nyịlẹhị-ịlẹhị, áhị ka chuko nyori angịkịla ka yẹ ijiiji myị́ lee ọkịlẹtụ ka kpaa enyi ka. Kori kahị kpa ọngịrị nyahị wuu họ ụkụrwọ ka chajị ahị ja chuko u-uhye nya abwọlẹ kọ ka la angịkịla, aalẹ áhị họ ụkụrwọ ha iJihova jaabwọ kahị ka jụ́ họ myị́ ka.

8. Jaabwọ ká ụpwụ nya 1 Ala ịKọrịntị 4:6, 7 ya, ịyẹ tị́ du kahị ka hi ọbọọchẹ ju āhị nyahị ka?

⁸ Ahị baba nyọka kpa āhị nyahị họ ụkụrwọ nyịlẹhị-ịlẹhị, ma ahị ka dụmwọ-dụmwọ pyii kahị ka hi ọbọọchẹ ju āhị ọọwa ka. (Wa 1 Ala ịKọrịntị 4:6, 7.) Ọ-chụ pwokwita, ọhẹka à jẹ́-ẹ dọmwụ nya ịBayịbụụ ọjẹ́jẹ bala angịnyị yẹẹyẹẹ. A hwabwọ la ọ-kpa āhị ọọwa họ ụkụrwọ ka! Ma ọ baba á ka kpịtịya nyọka hi ọbọọchẹ jwoo ka. Ọhẹka a la oja ọkpịpyọ-kpịpyọ ọhẹ ẹ-ẹrụ ọnyịịla ọ-kpa pyẹ u-uhye nya abwọlẹ ka bwu dọmwụ nya ịBayịbụụ ọjẹ́jẹ bala ọngịnyị. À já charịnya nyọka joja ọwẹ ju angịkịla. Ụka ọlẹ kanụ tị tụguru lawụlẹ, ọọnahị ọnyang ọkịla wẹẹ joja u-uhye nya abwọlẹ kọ bwu ya ụpwụ ha ọngịnyị. Ọwa ya ụpwụ ha ọngịnyị; ahụ tị dọmwụ nya ịBayịbụụ ọjẹ́jẹ bala ọngịnyị. Ányị a tị́ ka họ? À jẹ́ nyori oja nyang ka jẹ́-ẹ ju angịkịla ọhụ, ma à tị ka cheje nyọka joja ọwẹ ụka ọkịla myị́ chajị á tịtọ kọ ka la ọngọlẹ kọ ya ụpwụ ha ọngịnyị lala o-ri ọwa á jụ́ họ lala ahụ ka lẹ ka. Ọọwa ka ri ang ọnyịịla ka họ. Ma à tị hwabwọ la ọ-dọmwụ nya ịBayịbụụ ọjẹ́jẹ bala angịnyị ka. Āhị a la wẹ lẹ, kpa họ ụkụrwọ!

9. Ányị ahị tị́ ka kpa āhị nyahị họ ụkụrwọ?

⁹ Ahị kpịtịya nyori āhị ọnyị myị́ ọnyị ọlẹ kahị la bwu ẹga nya Ohe ịnyị. Ahị kpa āhị ịịwa họ ụkụrwọ nyọka kpa ọjịra-jịra nwà kịlahị, ọkọkọ nyọka kpa mẹ ịlọhị jẹ. (Filip. 2:3) Ụka kahị kpa ọngịrị bala āhị nyahị họ irya nya iJihova, ahị ka la ang odudu kahị ka chị ọkẹkẹnị, ọọlajị nyori ahị wẹẹ họ gụ́ angịkịla lee ọ-maga nyọka há gwaa ka, ma chajị nyori ahị wẹẹ kpa āhị nyahị yogbo ha iJihova.

10. Ịyẹ tị́ du kọ chịla kahị ka chụ ịlọhị ka pwoku angịkịla ka?

¹⁰ Kori ká ọngịnyị-ị́ dụmwọ-dụmwọ ka, ọ ka dọmwụ nyọka chụ ang ọlẹ kọ jẹ́-ẹ jụ́ họ lụmẹ ka pwoku ọlẹ ká ọngọkịla jẹ́-ẹ họ gbuu ka myị́. Ọ-chụ pwokwita, ọọnahị ọlẹng ọhẹ jẹ́-ẹ ya ẹla dodehe ha alụma yẹẹyẹẹ myị́. Āhị nyamwụ à wẹ lẹ. Ọ tị ka kụ irya myị́ nyori ọ há gụ ọọnahị ọkịla ọlẹ kọ jẹ́-ẹ họ ụpa ọwẹ gbuu ka. Ma ọọnahị ọkịla ọọwa tị jẹ́-ẹ họ ụga yẹẹyẹẹ, mẹ ang jẹ anyị nyamwụ hiigu-hiigu lee ọ-kpa ẹrụ ọnyịịla pyẹ la ila ọchịchị myị́. Ọ kpụhị ịpyọ lụmẹ nyori ahị la iru nya aanịna alẹng  bala anyang ịlẹ kị la āhị ịdatị-ịdatị, kị tị wẹẹ kpa gbịgba ha iJihova bala ọ-kpa da angịkịla ụbwọ!

11. Ịyẹ tị́ du kahị ka maga nyọka ba ọgụ-ẹpẹtẹ nya iJisọsị jẹ?

¹¹ Ịlẹhị ḷe áhị ka chụ ịlọhị ka pwoku angịkịla ka, ahị tị ka jẹ́-ẹ jẹ́ ang yẹẹyẹẹ bwu ẹga nya anchẹ nya iJihova ịkịla. Ọngọlẹ kọ há gụ wuu kahị ka jẹ́ ang bwu ẹga nyamwụ à ri iJisọsị ẹẹ. Nanana nyori áhị la kpẹẹkpẹẹ lala iJisọsị ka, ahị la ang lụmẹ-lụmẹ ka jẹ́ bwu abwẹla ịnyịịla-ịnyịịla nyamwụ bala ang ịlẹbyẹbyị ịlẹ kọ họ. (1 Pit. 2:21) Ụka kahị maga nyịlẹhị-ịlẹhị nyọka ba ọgụ-ẹpẹtẹ nyamwụ jẹ rige-rige jaabwọ kahị ka jụ́ họ myị́ kaka ba, ahị ka ri anchẹ nya iJihova ịnyịịla bala ọ-jẹ́ kpa ẹrụ ọnyịịla pyẹ yẹẹyẹẹ.

12-13. Ẹlịyẹ ahị tị́ ka jẹ́ bwu ẹga nya Adịrahụ iDevidi?

¹² Ẹ-ẹpwụ nya Omyi Ẹla nya Ohe, ahị yẹ ọgụ-ẹpẹtẹ nya iru nya alẹng bala anyang ị-la ọmyịmyị ịlẹ kahị ka jẹ́-ẹ gbịla nanana nyori ị́ la kpẹẹkpẹẹ ka. (Hib. 6:12) Kụ irya u-uhye nya Adịrahụ iDevidi wẹẹ. IJihova wụrọọ nya ‘ọngọlẹ kọ kaa họ ẹla wu Ohe Oluhye ẹpwụ hiigu lụmẹ.’ (Ụkụr. 13:22) Ma, iDevidi á tị la kpẹẹkpẹẹ ka. Ọ dọmwụ họ ịhọbịrị ịhyẹ ụka ọhẹ lẹ. Ọ lịnyị odu lẹ, o ri ọgụ-ẹpẹtẹ ọnyịịla hahị. Ịyẹ tị́ du? Chajị ụka ọlẹ kị yalibyi lọọ lẹ, ọ́ maga nyọka ye ọnụ ya u-uhye nya ẹla ọlẹ kọ họ ka. Ọkọkọ nyọọwa, ọ ye ọ-nwụ rịrị ọnyọọngịrị ọọwa myị bala ọ-mẹjẹ nyori ẹla ọlẹ kọ họ tọọ olujwo ka ẹpwụ ọkịlẹtụ. Chajị nyọọwa, iJihova hịnyọhi họọ.​—Eje. 51:3, 4, 10-12.

¹³ Ahị ka jẹ́-ẹ jẹ́ ang bwu ẹga nya iDevidi bwula ọ-tịlọhị wo yẹkẹẹ: ‘Ányị m tị́ kaa họ ẹ-ẹga nya ọ-nwụ rịrị? M̀ kaa ye abyị nyam myị ahyaahị, lee m̀ tị́ kaa maga nya o-ye ọnụ ya? M̀ kaa kpụ angịkịla abyị hyaa gụ? M̀ kaa maga nyịlẹhị-ịlẹhị nyọka mẹ ẹla ọtịpyọ ọọwa họ kaka?’ À ka jẹ́-ẹ tịlọng ịtọ ẹla ụma ịlịịwẹ ụka ka ja wa oja u-uhye nya alẹng bala anyang ịkịla ịlẹ kị la ọmyịmyị ẹ-ẹpwụ nya ịBayịbụụ. Ị la akama ụma ịlẹ ká juwa chịpwụrụ bwu? Abwẹla ọnyịịla oyina ị tị la? Iiwe-ahụrụ ọnyọnyọọnyị, tịlọng wo: ‘Ányị m tị́ ka họ kam ka lala ọnchẹ nya iJihova o-godayị giri-giri ọwẹ?’

14. Ányị ahị tị́ ka bwu yé apyobwuna bwula ọ-kụ ẹhị yẹ aanahị ịkịla?

¹⁴ Ahị ka jẹ́-ẹ yé apyobwuna ịnyịnyị bwula ọ-kụ ẹhị yẹ aanahị ịkịla, tụ́ anjwo bala angịgbahị. Ọ-chụ pwokwita, à ka jẹ́-ẹ kụ irya u-uhye nya ọngọhẹ ọọjịra-jịra nyang ọlẹ kọ juwa bọhụ ẹ-ẹpwụ nya akama la ọmyịmyị? Ọ ka ri akama nya aliko nyamwụ ọ-kpa ẹla tụ́  rịrọọ, ọ-tụ pyịpyị bwu ugbiyegu lee ịnyịrọ ọ-la gogo nwà ka myị́. À yẹ abwẹla ịnyịịla ịhyẹ ịlẹ ká ọngọọwa mẹjẹ kị tị háng á ka gbịla ịnyịnyị? Bwula ọ-kụ ẹhị yẹ ọgụ-ẹpẹtẹ ọnyịịla nya ọngọọwa, à ka yẹ ang ịhyẹ ịlẹ kị ka dang ụbwọ bọhụ ẹ-ẹpwụ nya ịmayẹ nyang ịnyịnyị. Ọ myịhị lẹhị lụmẹ nyọlẹ ká aanahị ịwẹ yẹ ọgụ-ẹpẹtẹ ọnyịịla nya ọmyịmyị ọlala deeji hahị!​—Hib. 13:7; Jem. 1:2, 3.

15. Ẹlịyẹ ọlẹrụ ịPọlụ à tị́ mẹjẹ́ẹhị kọ ka jẹ́-ẹ dahị ụbwọ juwa chị ọkẹkẹnị ẹ-ẹpwụ nya ịgba ọgbagba nyahị ha iJihova?

¹⁵ Nyọka họ ká okpunyi bala ọ-yẹjula awụlẹ ka nwà ọọjịra-jịra, ọngọngọọng nyahị baba nyọka họ ụkụrwọ la ọngịrị nyamwụ wuu. Kụ ẹhị yẹ angịnyị nya ịKịrayịsị ịla oyi ọhọhẹ wẹẹ. Ị la āhị bala akụrwọ ịdatị-ịdatị. (1 Kọr. 12:4, 7-11) Ọọwa à tị́ du kị chị awụlẹ ọnụ lee ọ-mwẹla ta awụlẹ ka. Ọkọkọ nyọọwa, ịPọlụ ju ọngọngọọng nyaa ọhụ nyị họ ang ọlẹ kọ baba “chajị ká [ọjịra-jịra] ọlẹ kọ ri ugbinyịrọ nya ịKịrayịsị ka jẹ́-ẹ la gogo bwula ọọwa myị́.” ỊPọlụ da ụpwụ du kịla ala Efesọsị yẹkẹẹ: “Ụka ká ọng myị́ ọng nyahị á juwa họ ebwo nya ụkụrwọ nyamwụ yẹẹyẹẹ lẹ, ọọwa lẹ, ugbinyịrọ nya ịKịrayịsị . . . a ka juwa nwa ẹ-ẹpwụ nya ọháha ọlala nya ịlẹhị ọọwa lẹlẹ.” (Efe. 4:1-3, 11, 12, 16) Angịlẹ kị kpa ẹla nya ịPọlụ ọwẹ họ ụkụrwọ kaa kpa okpunyi bala ọ-yẹjula awụlẹ nwà kịlahị. Ịnyị ahị tị yẹ ká ọjịra-jịra nyahị wuu la alẹ lẹ.

16. Ẹlịyẹ ahị tị́ ka cheje nyọka họ? (Ala iHiburu 6:10)

¹⁶ Cheje nyọka cheji ba hi ọ-chụ ịlọng ka pwoku angịkịla. Ọkọkọ nyọọwa, jẹ́ ang bwu ẹga nya iJisọsị, ká maga nyọka gbịla abwẹla nyamwụ. Yé apyobwuna bwu ọgụ-ẹpẹtẹ nya angị la ọmyịmyị ịlẹpwụ nya ịBayịbụụ bala ịla oyi nyahị ọlẹ. Jaabwọ ka wẹẹ kịnyaa la ọ-kpa ọngịrị nyang wuu họ ụkụrwọ, jẹ́ myị̀myị̀ nyori iJihova ‘á ri ọlabwẹla onyobyi kpong-kpong ka. Lẹ, ụkụrwọ ọlẹ ka wẹẹ họ wuu, ọ́ ka jẹ́-ẹ deeri nyaa kpong-kpong kaka.’ (Wa Ala iHiburu 6:10.) Kịnyaa la ọ-chị ọkẹkẹnị ẹ-ẹpwụ nya ịgba ọgbagba nya iJihova, ká jẹ́ nyori ọ kaa myọọ lẹhị ụka ká maga la ọngịrị nyang wuu nyọka họ ẹla kpọọ ịpyọ.