1. Ania ti aramidentayo tapno naragragsaktayo?

 KAYAT ni Jehova a naragsaktayo. Ammotayo dayta. Ngamin, ti rag-o ket maysa nga aspeto ti bunga ti nasantuan nga espirituna. (Gal. 5:22) Naragragsak ti mangted ngem ti umawat. Isu a naragragsaktayo no naregtatayo iti ministerio ken tumulongtayo kadagiti kakabsat iti nadumaduma a pamay-an.—Ara. 20:35.

2-3. (a) Sigun iti Galacia 6:4, ania ti dua a makatulong kadatayo nga agtalinaed a naragsak iti panagserbi ken Jehova? (b) Ania ti usigentayo iti daytoy nga artikulo?

² Kas mabasa iti Galacia 6:4, dinakamat ni apostol Pablo ti dua a makatulong kadatayo nga agtalinaed a naragsak. (Basaen.) Umuna, masapul nga ipaaytayo ken Jehova ti kasayaatantayo. Naragsaktayo no ipapaaytayo kenkuana ti kasayaatantayo. (Mat. 22:36-38) Maikadua, ditay ikompara ti bagitayo iti sabsabali. Masapul nga agyamantayo ken Jehova iti aniaman a maar-aramidantayo gapu iti salun-at, pannakasanay, wenno abilidadtayo. Ngamin, naggapu kenkuana ti amin nga adda kadatayo. Ngem no mas epektibo ti dadduma iti ministerioda ngem datayo, masapul a naragsaktayo ta us-usarenda ti talentoda a mangidaydayaw ken Jehova, saan a tapno agpannakkel wenno tapno magunggonaanda. Isu nga imbes a makikompetensiatayo, agsursurotayo ketdi kadakuada.

³ Iti daytoy nga artikulo, kitaentayo dagiti makatulong no mariknatayo a limitado ti maar-aramidantayo nga agserbi. Kitaentayo met no kasanotayo a mausar iti kasayaatan ti aniaman a saguttayo ken no ania ti masursurotayo iti ulidan ti sabsabali.

4. Ania a situasion ti mabalin a mangupay kadatayo? Mangted iti pagarigan.

⁴ Saanen a maaramidan ti dadduma a kakabsat ti kayatda a panagserbi ken Jehova. Ngamin, tumataengan wenno adda sakitda, isu a maupayda. Kasta ti situasion ni Carol. Agserserbi idi iti lugar a dakkel ti panagkasapulanna. Bayat iti dayta a tiempo, 35 ti iyad-adalanna iti Biblia ken sumagmamano ti natulonganna nga agdedikar ken agpabautisar. Nabunga ti ministerio ni Carol! Ngem nagsakit iti nakaro isu a kaaduanna nga adda laengen iti balayna. “Ammok a gapu iti sakitko, diak maaramidan ti kaya nga aramiden ti dadduma,” kuna ni Carol. “Panagriknak, saanen a kas kadakuada ti kinamatalekko. Diak maaramid ti amin a kayatko isu a maup-upayak.” Kayat ni Carol nga aramiden ti amin a kabaelanna para ken Jehova. Talaga a maapresiar unay dayta! Masiguradotayo a maragragsakan ti mannakipagrikna a Diostayo ta ar-aramiden ni Carol ti amin a kabaelanna.

5. (a) Ania ti masapul a laglagipentayo no maup-upaytayo gapu kadagiti limitasiontayo? (b) Kas makita kadagiti ladawan, kasano nga agtultuloy nga ipapaay ti kabsat ti kasayaatanna iti panagserbi ken Jehova?

⁵ No adda dagiti tiempo a maupayka gapu kadagiti limitasionmo, isaludsodmo iti bagim, ‘Ania ti kayat ni Jehova nga aramidek?’ Aramidem ti kasayaatam—aniaman ti situasionmo ita. Usigentayo daytoy a pagarigan: Maup-upay ti maysa a sister nga 80 ti tawenna gapu ta basbassiten ti maar-aramidanna iti ministerio no ikompara idi 40 ti tawenna. Pampanunotenna a saan a maragsakan ni Jehova uray no ipapaayna ti kasayaatanna. Ngem talaga kadi a kasta? Panunotem daytoy. No impaay ti sister ti kasayaatanna idi 40 ti tawenna ken ipapaayna latta ti kasayaatanna uray no 80 ti tawennan, saan ngarud a simmardeng a mangipapaay iti kasayaatanna. No mangrugi a mariknatayo a kasla kurang ti maar-aramidantayo a mangparagsak ken Jehova, masapul nga ipalagiptayo iti bagitayo a ni Jehova ti mangikedkeddeng no umdas ti maar-aramidantayo a mangparagsak kenkuana. No ar-aramidentayo ti kasayaatantayo, kas man la ibaganto ni Jehova kadatayo: “Nasayaat ti inaramidmo!”—Idilig ti Mateo 25:20-23.

6. Ania ti masursurotayo iti ulidan ni Maria?

⁶ Nalaklakatayo nga agbalin a naragsak no agpokustayo iti kayatayo nga aramiden imbes nga iti saantayo a kaya. Kitaentayo ti kapadasan ti sister a ni Maria. Adda sakitna isu a limitado ti maar-aramidanna iti ministerio. Idi damo, nadepres ken nariknana nga awan serserbina. Ngem nalagip ni Maria ti kakongregasionna a nakaidda lattan gapu iti sakitna isu a nagdesision a tulonganna. “Inyeskediulko nga agkaduakami a mangasaba babaen ti telepono ken surat,” imbaga ni Maria. “Kada agkaduakami a mangasaba, nakaragragsakak ken nagmayat ti riknak nga agawid ta natulongak ti maysa a kakongregasionko.” Naragragsaktayo met no agpokustayo iti kayatayo nga aramiden imbes nga iti saantayo a kaya. Ngem kasano no ad-adu ti maaramidam wenno nalaingka iti dadduma a pamay-an iti panagserbi ken Jehova?

7. Ania ti imbalakad ni apostol Pedro kadagiti Kristiano?

⁷ Iti umuna a surat ni apostol Pedro, pinaregtana dagiti kakabsat nga usarenda ti aniaman a sagut ken talentoda tapno pabilgenda dagiti kapammatianda. Insurat ni Pedro: “Sigun iti sagut nga inawat ti tunggal maysa, usarenyo dayta nga agserbi iti maysa ken maysa kas nasayaat nga adipen ti nagpaiduma a kinaimbag ti Dios.” (1 Ped. 4:10) Ditay  koma agkedked a mangusar a naan-anay kadagiti sagut wenno abilidadtayo gapu laeng ta maamaktayo a baka adda dagiti umapal wenno maupay. No kasta ti aramidentayo, saantayo a maipaay ti kasayaatantayo ken Jehova.

8. Sigun iti 1 Corinto 4:6, 7, apay a masapul a saantayo nga ipagpannakkel dagiti saguttayo?

⁸ Masapul nga usarentayo a naan-anay dagiti saguttayo, ngem masapul nga agannadtayo a ditay ipagpannakkel dagita. (Basaen ti 1 Corinto 4:6, 7.) Kas pagarigan, mabalin a nalaingka a mangirugi iti panagadal iti Biblia. Masapul nga usarem dayta a sagutmo! Ngem laglagipem a saan a masapul nga ipagpannakkelmo dayta. Ipapantayon nga adda nagsayaat a kapadasam iti ministerio ket nakairugika iti panagadal iti Biblia. Magagaranka a mangibaga iti dayta iti grupoyo iti panangasaba. Ngem idi agkikitakayon nga agkakagrupo, madama nga ages-estoria ti maysa a sister a nakaipaima kano iti magasin. Nakaipaima isuna iti magasin ngem nakairugika iti panagadal iti Biblia. Ania ti aramidem? Ammom a maparegta dagiti kagrupom no iyestoriam ti kapadasam. Ngem nagdesisionka nga ibagamto lattan dayta iti sabali a gundaway ta dimo kayat a marikna ti sister a nakaipaima iti magasin a saan nga epektibo isuna kas kenka. Kinaimbag dayta. Ngem dimo pulos koma isardeng ti mangirugi iti panagadal iti Biblia. Sagutmo dayta isu nga usarem!

9. Kasano koma ti panangusartayo kadagiti saguttayo?

⁹ Laglagipentayo nga aniaman nga abilidadtayo ket sagut ti Dios. Masapul nga usarentayo dagita a sagut tapno pabilgentayo ti kongregasion, saan a tapno agpannakkel. (Fil. 2:3) No usarentayo ti pigsa ken abilidadtayo a mangaramid iti pagayatan ti Dios, adda panggapuantayo nga agrag-o—saan a gapu ta adu ti maar-aramidantayo ngem iti dadduma wenno ipakpakitatayo a nalalaingtayo kadakuada, no di ket gapu ta us-usarentayo dagita a sagut a mangidaydayaw ken Jehova.

10. Apay a saan a nasayaat nga ikomparatayo ti bagitayo iti dadduma?

¹⁰ No saan nga agannad ti maysa, mabalin a matnag isuna iti silo ti panangikompara iti paglainganna iti pagkapuyan ti sabali a tao. Kas pagarigan, mabalin a nalaing nga agpalawag ti maysa a brother. Gapu ta nalaing, iti un-unegna, baka tagtagibassitenna ti maysa a brother a saan a nalaing nga agpalawag. Ngem dayta a brother ket mabalin a managpadagus, nalaing a mangsanay kadagiti annakna, wenno nakaregregta iti ministerio. Agyamyamantayo ta us-usaren ti nakaad-adu a nalalaing a kakabsat  dagiti sagutda nga agserbi ken Jehova ken tumulong iti dadduma!

11. Apay a masapul nga ikagumaantayo a suroten ti ulidan ni Jesus?

¹¹ Masapul a ditay ikompara ti bagitayo iti dadduma. Ngem magunggonaantayo no agsursurotayo iti ulidan dagiti matalek nga adipen ni Jehova. Ni Jesus ti kasayaatan nga ulidan. Uray no perpekto, makasursurotayo kadagiti nagsayaat a kualidad ken inaramidna. (1 Ped. 2:21) No aramidentayo ti amin a kabaelantayo a mangsurot a naimbag iti ulidan ni Jesus, agbalintayo a nasaysayaat nga adipen ni Jehova ken mas epektibo iti ministerio.

12-13. Ania ti masursurotayo ken Ari David?

¹² Iti Biblia, mabasatayo ti adu a matalek a lallaki ken babbai. Imperpektoda ngem maikarida a tuladen. (Heb. 6:12) Panunotem ni Ari David, nga inawagan ni Jehova iti “makaay-ayo iti pusok.” (Ara. 13:22) Ngem saan a perpekto ni David. Kinapudnona, nakaaramid kadagiti nadagsen a basol. Iti laksid dagita, nagsayaat latta isuna nga ulidan para kadatayo. Apay? Ngamin, idi nakorehir, dina inkalintegan ti bagina. Imbes ketdi, inawatna ti nadagsen a balakad kenkuana, ken naimpusuan a nagbabawyanna dagiti inaramidna isu a pinakawan ni Jehova.—Sal. 51:3, 4, 10-12.

¹³ Makasursurotayo ken David no isaludsodtayo iti bagitayo: ‘Ania ti reaksionko no mabalakadanak? Dagus kadi nga aminek dagiti kamalik, wenno padasek nga ikalintegan ti bagik? Pabpabasolek kadi a dagus ti dadduma? Ikagkagumaak kadi a saanen a maulit dagiti kamalik?’ Mangpanunotka kadagiti umasping a saludsod bayat a basbasaem ti maipapan kadagiti matalek a lallaki ken babbai iti Biblia. Naipasangoda met kadi kadagiti problema a kas kadagiti problemam? Ania dagiti nagsayaat a kualidad nga impakitada? Iti tunggal maysa kadagita a karakter, isaludsodmo iti bagim: ‘Kasano a lallalo a matuladko daytoy a matalek nga adipen ni Jehova?’

14. Ania ti magunggonatayo no panunotentayo ti ulidan dagiti kapammatiantayo?

¹⁴ Magunggonaantayo met no panunotentayo ti ulidan dagiti kapammatiantayo, agtutubo man wenno nataengan. Kas pagarigan, adda kadi mapanunotmo a kakongregasionmo a simamatalek nga agib-ibtur iti maysa a pakasuotan—kas iti dakes nga impluensia, ibubusor ti pamilia, wenno nakapuy a salun-at? Makitkitam kadi kenkuana dagiti nagsayaat a kualidad a kayatmo a tuladen? No panunotem ti  ulidanna, mabalin a makasursuroka kadagiti praktikal a pamay-an tapno maibturam ti problemam. Talaga a makaparagsak ken anian a yamantayo ta adda dagiti kasta a kakabsat a mapagulidanan ti pammatida!—Heb. 13:7; Sant. 1:2, 3.

15. Ania ti imbalakad ni apostol Pablo a makatulong tapno maitultuloytayo ti naragsak a panagserbitayo ken Jehova?

¹⁵ Tapno agtalinaed ti talna ken panagkaykaysa iti kongregasion, masapul nga ipaay ti tunggal maysa kadatayo ti kasayaatanna. Usigentayo dagiti Kristiano idi umuna a siglo. Agduduma ti sagut ken pribilehioda. (1 Cor. 12:4, 7-11) Ngem saan a dayta ti rason tapno agkokompetensia ken agsisinada. Imbes ketdi, imparegta ni Pablo iti tunggal maysa nga aramidenda ti kasapulan “tapno mapabileg ti bagi ti Kristo.” Insurat ni Pablo kadagiti taga-Efeso: “No aramiden a naimbag ti tunggal paset ti akemna, dumakkel ti intero a bagi ket tumibker babaen ti ayat.” (Efe. 4:1-3, 11, 12, 16) Dagiti nangyaplikar iti dayta ket nakatulong tapno agtalinaed ti talna ken panagkaykaysa—dagiti kualidad a makitkitatayo ita kadagiti kongregasion.

16. Ania koma ti determinasiontayo? (Hebreo 6:10)

¹⁶ Determinadoka koma a saan a mangikompara iti bagim iti sabsabali. Imbes ketdi, agsursuroka ken Jesus, ken ikagumaam a tuladen dagiti kualidadna. Agsursuroka kadagiti ulidan iti Biblia ken kadagiti kakabsat a mapagwadan ti pammatida. Bayat nga itultuloymo nga aramiden ti kasayaatam, masiguradom a ‘saan a nakillo ni Jehova a Dios tapno lipatenna ti aramidmo.’ (Basaen ti Hebreo 6:10.) Itultuloymo ti siraragsak nga agserbi ken Jehova, ta ammom nga ap-apresiarenna ti panangipaaymo iti kasayaatam a mangparagsak kenkuana.