ATUAQQISSAAGASSAQ 16
Sapinngisannik Jehovamut kiffartornerit nuannaarutigiuaruk
‘Kialuunniit iliuutsini allat iliuusiinut sanilliunnagit misissussavai.’ – GAL 6:4.
ERINARSUUT 37 Jehova uummatiga tamakkerlugu kiffartorfigaara
QILANAARTUUT a
1. Suna pillualissutigisarparput?
JEHOVAP pilluarnissarput kissaatigaa. Nuannaarneq anersaap inerititaanut ilaammat tamanna qularutiginngilarput. (Gal 5:22) Aamma tunisineq tigusinermit pilluarnarnerummat oqaluussinermi uppeqatitsinnillu ikiuinermi aallussilluaraangatta pilluartarpugut. – ApS 20:35.
2-3. (a) Nuannaartuarnissatsinnut iluaqutissagut suut marluk Galaatiamiut 6:4-mi allassimappat? (b) Allaaserisami matumani suut sammissavagut?
2 Apustilip Paulusip nuannaartuarnissatsinnut iluaqutissagut marluk Galaatiamiut 6:4-mi eqqaavai. (Atuaruk). Siulleq tassaavoq uagut sapinngisatsinnik Jehova kiffartorfigissagipput. Taamaaliorutta nuannaassaagut. (Mat 22:36-38) Aappaa tassaavoq uppeqatitsinnut sanilliunnaveersaartarnissarput. Peqqissuunerput, ilinniartinneqarnerput piginnaasarpulluunniit pissutigalugu qanorluunniit naammassisinnaasaqaraluarutta Jehovamut qujamasuttariaqarpugut. Pisinnaasagummi tamarmik Jehovamit pipput. Uppeqaterput kiffartornermi arlaatigut uagutsinnit pikkorinnerusoq namminissarsiorani piginnaasani pillugit malugeqqusaarani Jehovamik unnersiutiginnittoq nuannaarutigissavarput. Unammillerniarsarinagu ilinniarfiginiassavarput.
3 Kiffartornitsinni iliuusererusutatsitut iliuuseqarsinnaannginnerput pissutigalugu nikallussagutta suna iluaqutigisinnaagipput allaaserisami matumani sammissavarput. Aamma piginnaasagut qanoq atorluarnerpaasinnaagigut allallu qanoq ilinniarfigisinnaagigut sammissavagut.
ILIUUSERERUSUTATSITUT ILIORSINNAANNGIKKAANGATTA
4. Sooq uppeqatitta ilaat nikallortarpat? Assersuuteqarit.
4 Jehovap kiffaasa ilaasa utoqqaliartornertik peqqiilliornertilluunniit pissutigalugu pisinnaasaat killeqarput, tamannalu nikallussutigisinnaavaat. Carolip tamanna misigaa. Pisariaqartitsiffiunerusumi kiffartornikuuvoq. Taamani 35-inik Biibilimik ilinniartitaqarpoq arlallillu Nalunaajaasunngornissaannut ikiorsimallugit. Iliuuseqangaarsimavoq! Kingusinnerusukkulli peqqiilliulerami piffissap annersaani angerlarsimaannartariaqalerpoq. Ima oqarpoq: “Nalunngilara peqqiilliornera uppeqatittulli iliuuseqartigisinnaannginninnut pissutaasoq, misigivungali taakkunatulli aalajaatsiginanga. Iliuusererusutattut iliuuseqarsinnaannginnera nikallussutigaara.” Carol sapinngisaminik Jehovamut kiffartorusuppoq, tamannalu pillugu nersualaagassaavoq! Qularinngilluinnarsinnaavarput Guutitta misiginneqatiginnittartuusup Carolip sapinngisaminik iliuuseqartarnera nuannaarutigingaaraa.
5. (a) Iliuusererusutatsitut iliuuseqarsinnaannginnerput nikallussutigigutsigu suna eqqaamassavarput? (b) Assini takutinneqartutut qatanngut angut sapinngisaminik Jehovamut qanoq kiffartortuarsimava?
5 Pisinnaasavit killeqarnerat nikallussutigisarukku apeqqut una eqqarsaatigiuk: ‘Jehovap qanoq piumasaqarfigaanga?’ Piumasaraa maanna sapinngisannik iliuuseqartarnissat. Una takorlooruk: Qatanngut arnaq 80-inik ukiulik 40-nik ukioqarnermisulli maanna iliuuseqartigisinnaannginnami nikallorpoq. Misigivoq sapinngisaminik iliuuseqartaraluarluni Jehovamit iluarineqarnani. Ilumulli taamaappa? Una eqqarsaatigiuk: 40-nik ukioqarluni sapinngisaminik kiffartortoq maanna 80-inik ukioqalereerluni suli sapinngisaminik kiffartoruni sapinngisaminik kiffartortuarpoq. Misigilerutta kiffartornerput Jehovamit iluarineqanngitsoq eqqaamasariaqarparput Jehovap suna iluarineraa uagut aalajangersinnaanngikkipput. Sapinngisatsinnik iliuuseqartarutta Jehovap ima oqarfigissavaatigullusooq: “Pikkoreqaatit!” – Naleqqiuguk Matiusi 25:20-23.
6. Maria qanoq ilinniarfigaarput?
6 Iliuuserisinnaanngisagut pinnagit iliuuserisinnaasagut pingaartikkutsigit nuannaarnerussaagut. Qatanngut Mariamik atilik nappaateqarami oqaluussinermi kissaatigisamisut iliuuseqartigisinnaanngilaq. Aallaqqaammut tamanna nikallussutigigaluarpaa atorneqarsinnaanngitsutullu misigaluni. Qatanngulli arnaq siniffimmiiginnartariaqartoq eqqarsaatigileramiuk ikiorniarlugu aalajangerpoq. Ima oqarpoq: “Oqarasuaatikkut allakkatigullu oqaluusseqatigisalerniarlugu isumaqatigaara. Oqaluusseqatigereernerit tamaasa angerlaraangama qatanngutiga ikiorsinnaasimagakku nuannaarlungalu nalerisimaartarpunga.” Uaguttaaq iliuuserisinnaanngisagut pinnagit iliuuserisinnaasagut eqqarsaatiginerusarutsigit nuannaarnerussaagut. Taavami iliuuseqarnerusinnaagutta Jehovamulluunniit kiffartornermi aalajangersimasumik pikkoriffeqarutta?
PIGINNAASATIT ATORTAKKIT!
7. Apustilip Petrusip kristumiut qanoq kajumissaarpai?
7 Apustilip Petrusip allakkamini siullerni kristumiut kajumissaarpai uppeqatiminnik qiimmassaanissamut piginnaasatik atussagaat. Ima allappoq: “Tamassi piginnaasassinnut naapertuuttumik Guutip ajunngisaangaarneranut assigiinngitsutigut takutinneqartartumut nakkutilliisuutitatut ajunngitsutut kiffartuuteqatigiigitsi.” (Pet 1. 4:10, q.a.i.) Piginnaasagut sapinngisatsinnik atussavagut allat tamanna pillugu sinnganissaat nikallornissaalluunniit isumakuluutiginagu. Isumakuluutigigutsigumi Jehovamut kiffartornitsinni sapinngisatsinnik iliuuseqarsinnaanavianngilagut.
8. Korintimiunut allakkat siulliit 4:6, 7-ilu naapertorlugit sooq piginnaasagut takoqqusaarutiginaveersaartariaqarpagut?
8 Piginnaasagut sapinngisatsinnik atortariaqarpagut, takoqqusaarutiginaveersaartariaqarpagulli. (Korintimiunut 1. 4:6, 7 atuakkit). Assersuutigalugu immaqa Biibilimik misissueqateqartalernissaq pikkoriffigaat. Tamanna pikkoriffigigakku atorluartassavat! Takoqqusaarutiginaveersaartariaqarpalli. Takorlooruk oqaluussinermi nuannersumik misigisaqarsimallutit Biibilimillu misissueqateqartalersimallutit. Misigisimasat oqaluusseqatigiinnut oqaluttuarerusungaarpat. Ornikkakkilli qatanngut atuagassiamik tunniussisimanerminik oqaluttuarpoq. Qatanngut taanna atuagassiamik tunniussisimavoq, illilli Biibilimik misissueqateqartalersimavutit. Sussavit? Nalunngilat oqaluusseqatigiit misigisat qiimmaallaatigissagaat, qatanngulli atuagassiamik tunniussisimasoq nikallortikkumanagu aalajangersinnaavutit misigisat kingusinnerusukkut oqaluttuariniarlugu. Taamaalioruit ajunngitsuliussaatit. Biibilimilli misissueqateqarnissamik neqeroortarunnaaqinak, tamannami pikkoriffigaat.
9. Piginnaasagut qanoq atortassavagut?
9 Piginnaasatta Guutimit tunissutaanerat eqqaamajuartigu. Piginnaasagut imminut malugeqqusaarnata ilagiinnulli ineriartuutaasumik atussavagut. (Flp 2:3) Nukigut piginnaasagullu Guutip piumasaatut atortarutsigit nuannaassaagut – imaanngitsoq allanit pikkorinnerugatta piginnaasagulli Jehovap unnersiutiginissaanut atortaratsigit.
10. Sooq allanut sanilliuttassanngilagut?
10 Mianersunngikkutta pikkoriffipput inuup allap pikkoriffiginngisaanut sanilliuttoorsinnaavarput. Assersuutigalugu qatanngut angut immaqa tamanut oqalugiallaqqissuuvoq. Qatanngummilli allamit oqalugiallaqqinngitsumit pingaarnerusorisinnaavoq. Qatanngutilli oqalugiallaqqinngitsup immaqa inoroorsaarneq, meeqqaminik ilinniartitsineq oqaluussinermiluunniit aallussilluarneq pikkoriffigaa. Qatannguterpassuit pikkorissut piginnaasatik Jehovamut kiffartornermi allanillu ikiuinermi atortarmatigit qujamasuutigingaarpagut.
MALIGASSAALLUARTUT ILINNIARFIGIKKIT
11. Sooq Jiisusi ilaarniartussaavarput?
11 Allanut sanilliunnaveersaaraluarluta Jehovamut kiffartortut aalajaatsut ilinniarfigisinnaavagut. Assersuutigalugu Jiisusi ilinniarfigisinnaavarput. Maanna Jiisusitut naammalluinnartuusinnaanngikkaluarluta pissusii iliuusiilu nuannersut ilinniarfigingaarsinnaavagut. (Pet 1. 2:21) Sapinngisatsinnik ilaarniaraangatsigu Jehovamut kiffaalluarnerulertarpugut ilinniartitsinitsinnilu angusaqarluarnerusarluta.
12-13. Kunngi Daavi qanoq ilinniarfigaarput?
12 Biibilimi angutit arnallu aalajaatsorpassuit naammalluinnanngitsuugaluartut ilaarsinnaasagut oqaluttuarineqarput. (Hebr 6:12) Kunngi Daavi assersuutigeriartigu. Daavi pillugu Jehova ima oqarpoq: “Angutaavoq uummatima iluarisaa.” (ApS 13:22) Daavili naammalluinnartuunngilaq. Ingasattumik ajortuliorsimagaluartoq ilinniarfigisinnaavarput. Qanoq? Naqqinneqarami utoqqatsissutissarsiornani oqaaqqissaarneqarnini akueralugu iliuutsini peqqissimissutigai. Taamaattumik Jehovamit isumakkeerfigineqarpoq. – Tuss 51:5, 6, 12-14.
13 Apeqqutit ukua eqqarsaatiginerisigut Daavi ilinniarfigisinnaavarput: ‘Oqaaqqissaarneqaraangama qanoq qisuariartarpunga? Kukkussutigisimasakka nassuerutigipallattarpakka, imaluunniit utoqqatsissutissarsiortarpunga? Allat pisuutipallattarpakka? Kukkoqqikkumananga ilungersortarpunga?’ Apeqqutit taamaattut eqqarsaatiginerisigut aamma angutit arnallu aalajaatsut Biibilimi oqaluttuarineqartut ilinniarfigisinnaavatit. Illit ajornartorsiutigisannut assingusunik nalaataqarsimappat? Pissusii sorliit nuannarivigit? Imminut ima aperisarit: ‘Jehovap kiffaa aalajaatsoq taanna qanoq ilaarsinnaavara?’
14. Uppeqatigut qanoq ilinniarfigisinnaavagut?
14 Aamma uppeqatitta qassinilluunniit ukioqaraluartut maligassaalluarnerat iluaqutigisinnaavarput. Assersuutigalugu uppeqativit ilaat misilinneqarnermi – immaqa inuusuttoqatinit ajortumik sunnerneqarnermi, ilaquttanit akerlilersorneqarnermi peqqiilliornermiluunniit – pinertusaarpa? Pinertusaartoq taanna ilaarusutannik nuannersumik pissuseqarpa? Maligassaalluarnerata eqqarsaatigineratigut misilinneqarninni qanoq pinertusaarsinnaanerlutit paasisinnaavat. Uppernikkut maligassaalluartut qujamasuutigingaarlugillu nuannaarutigaagut. – Hebr 13:7; Jaak 1:2, 3.
JEHOVAMUT KIFFARTORNINNI NUANNAARTUARIT
15. Jehovamut kiffartornermi nuannaartuarsinnaaqqulluta Paulusi qanoq siunnersuuteqarpa?
15 Ilagiit eqqisseqatigiillutik ataasioqatigiissappata tamatta sapinngisatsinnik iliuuseqartariaqarpugut. Kristumiut siulliit assigiinngitsunik piginnaasaqarlutillu suliassaqarput. (Kor 1. 12:4, 7-11) Tamannali unammilleqatigiissitsinanilu avissaartuutaanngilaq. Paulusip kajumissaarpai ‘Kristusip timaa ineriartortikkumallugu’ pisariaqartumik iliuuseqaqqullugit. Paulusi Efesossimiunut ima allappoq: “Avatit tamarmik pisinnaasamittut iliuuseqaraangata timi alliartortarlunilu asanninnermi ineriartortarpoq.” (Ef 4:1-3, 11, 12, 16) Paulusip kajumissaarutaatut iliortut eqqisseqatigiissitsillutillu ataasioqatigiissitsisarput – tamanna aamma nalitsinni uagut misigaarput.
16. Sunissarput aalajangiusimavarput? (Hebræerit 6:10)
16 Allanut sanilliunnaveersaartarit. Jiisusi ilinniarfigalugulu ilaarniartaruk. Uppernikkut maligassaalluartut Biibilimi oqaluttuarineqartut nalitsinnilu inuusut ilinniarfigisakkit. Sapinngisannik iliuuseqarninni eqqaamajuk Jehovap ‘naapertuilluartuugami puiornavianngikkai iliuutsitit’. (Hebræerit 6:10 atuaruk). Jehovamut kiffartorninni nuannaartuarit, eqqaamajullu sapinngisannik iliuuseqaraangavit Jehova nuannaartartoq.
ERINARSUUT 61 Sapiillusi oqaluussiuaritsi!
a Tamatta uppeqatitta maligassaalluarnerat iluaqutigisinnaavarput. Mianersorfissaqarpugulli. Nuannaartuarnissatsinnut allallu iliuuserisinnaasaat eqqarsaatigigaangatsigit makitasuunngunnginnissatsinnut nikallunnginnissatsinnullu allaaserisaq manna iluaqutigissavarput.
b ASSIMI MALUGISASSAT: Qatanngut angut inuusuttuulluni Betelimi kiffartorpoq. Aappartaarami nuliani pioneritut kiffartoqatigaa. Meeqqani oqaluussinermik ilinniartippai. Maanna utoqqalereerluni suli sapinngisaminik kiffartorpoq allakkatigut oqaluussisarnermigut.