1. Чь мәрʹа шабуна мәзьн тинә?

 ЙАҺОԜА дьхԝазә кӧ әм бәхтәԝар бьн. Әм заньн ԝәки шабун әԝ һәйә бәре рʹӧһʹе пироз (Галати 5:22). Гава әм хьзмәт дькьн йан жи щурʹә-щурʹә алийава аликʹарийе дьдьнә хушк-бьра, әм ша дьбьн, чьмки Кʹьтеба Пироз дьбежә кӧ «хԝәзи ль дайийа, нә кӧ ль стандийа» (Кʹаред Шандийа 20:35).

2-3. (а) Ль гора Галати 6:4, чь ԝе али мә бькә шабуна хԝә ӧнда нәкьн? (б) Ве готареда, әме дәрһәԛа чь хәбәр дьн?

² Галати 6:4-да, Паԝлосе шанди бәʹса дӧ тьшта кьрьбу, йед кӧ али мә дькьн ԝәки әм шабуна хԝә ӧнда нәкьн (бьхунә). Йа йәке, гәрәке нета мә әв бә кӧ әм бона Йаһоԝа чь жь дәсте мә те бькьн. Һәгәр әм ӧса бькьн, әме бәхтәԝар бьн (Мәтта 22:36-38). Йа дӧда, гәрәке әм хԝә бәрамбәри кәсед дьн нәкьн. Сьһʹәт-ԛәԝат, һинкьрьн йан фәрәсәтед мә чьԛас изьне дьдьн, гәрәке әм һаԛас Йаһоԝарʹа хьзмәт кьн у жь ԝи рʹази бьн, чьмки һәр тьшт мә жь ԝи стандийә. Жь алийе дьнва жи, һәгәр кәсед дьн хьзмәтеда һьнә алийада жь мә четьр ьн, гәрәке әм ша бьн кӧ әԝана фәрәсәтед хԝә нә кӧ бона кʹара хԝә, ле бона рʹумәта Йаһоԝа дьдьнә хәбате. Ләма жи дәԝса кӧ әм ԝанрʹа бькʹәвьн һʹӧщәте, ԝе баш бә кӧ әм жь ԝана һин бьн.

³ Һәгәр ԛәԝата мә нагьһиже кӧ чаԝа дьле мә дьхԝазә Йаһоԝарʹа хьзмәт бькьн, әм ча дькарьн шабуна хԝә ӧнда нәкьн? Ӧса жи, әм чаԝа дькарьн фәрәсәт у һʹӧнӧред хԝә бь щурʹе һәри баш бьдьнә хәбате у жь мәсәла кәсед дьн һин бьн? Ве готареда әме щабед ван пьрса бьстиньн.

4. Һьнә хушк у бьра чьрʹа хәмгин дьбьн?

⁴ Һәгәр әм ида кал у пир бунә йан жи сьһʹәт-ԛәԝата мә нә баш ә, дьбәкә әм ида нькарьн һаԛас хьзмәт кьн чьԛас дьле мә дьхԝазә. Хушкәкә бь наве Карол рʹасти чәтьнайикә ӧса һат. Бәре, әԝе щийед ӧса хьзмәт дькьр, кʹидәре кӧ мьзгинван һьндьк бун. Ԝи чахи, Кароле тʹәви 35 мәрьва һинбуна Кʹьтеба Пироз дәрбаз дькьр у али чәнд кәса кьрьбу кӧ әԝана бьбьнә хьзмәткʹаред Йаһоԝа. Кароле жь хьзмәта хԝә шабунәкә мәзьн дьстанд. Ле паше сьһʹәт-ԛәԝата ԝе хьраб бу, у лазьм бу кӧ әԝ һʹәчʹи зәʹф малда бьминә. Карол дьбежә: «Рʹуйе нәхԝәшийа хԝәда, әз нькарьм мина кәсед дьн хьзмәт бькьм, ләма жи әз хԝә бекер тʹәхмин дькьм. Гава ԛәԝата мьн нагьһиже кӧ әз һәр тьшти ль гора дьле хԝә бькьм, әз хәмгин дьбьм». Карол дьхԝазә бь дьл у щан Йаһоԝарʹа хьзмәт кә, у нета ԝе гәләк баш ә. Әм дькарьн баԝәр бьн кӧ Хԝәдайе мәйи дьлован хирәта ԝе ԛимәт дькә.

5. (а) Һәгәр әм сәва синоред хԝә хәмгин ьн, гәрәке әм чь биньн бира хԝә? (б) Бьрайе сәр шькьл ча ԛаси ԛәԝата хԝә һәртʹьм Йаһоԝарʹа хьзмәт кьрийә?

⁵ Һәгәр тӧ щарна сәва синоред хԝә дьлтәнг дьби, жь хԝә бьпьрсә: «Гәло хԝәстьна Йаһоԝа һьндава мьнда чь йә?» Әԝ тʹәне дьхԝазә кӧ тӧ чь жь дәсте тә те бьки. Ве мәсәле бьдә бәр чʹәʹве хԝә: Хушкәкә 80 сали хәмгин ә, чьмки әԝ нькарә мина бәре хьзмәт бькә. Әԝ чь жь дәсте ԝе те дькә, ле әԝ дьфькьрә кӧ әв йәк бона Йаһоԝа бәс нинә. Гәло бь рʹасти ӧса йә? Һәла бьфькьрә: Гава әԝ 40 сали бу, әԝе чьԛас дькарьбу һаԛас хьзмәт дькьр, у ньһа жи, әԝ чьԛас дькарә һаԛас хьзмәт дькә. Һәгәр әм дӧдьли дьбьн кӧ әм епʹещә хьзмәт накьн сәва кӧ Йаһоԝа хԝәш бен, гәрәке әм биньн бира хԝә ԝәки Йаһоԝа дәрһәԛа ве йәке чь дьфькьрә у ча сәр ве йәке дьньһерʹә. Һәгәр әм чь жь дәсте мә те бькьн, Йаһоԝа ԝе мәрʹа бежә: «Әʹфәрьм!» (Бәрамбәр кә Мәтта 25:20-23).

6. Әм дькарьн жь мәсәла Мариайе чь һин бьн?

⁶ Дәԝса кӧ әм хәмгин бьн сәва тьштед кӧ ԛәԝата мә нагьһиже бькьн, гәрәке әм дина хԝә бьдьн ԝан тьшта, чь әм дькарьн бькьн. Әв йәк ԝе али мә бькә шабуна хԝә ӧнда нәкьн. Хушкәкә бь наве Мариа, рʹуйе нәхԝәшийеда нькарә һаԛас хьзмәт кә чьԛас дьле ԝе дьхԝазә. Серида әԝ гәләк хәмгин дьбу у хԝә бекер тʹәхмин дькьр. Ле паше әԝе сафи кьр ԝәки аликʹарийе бьдә хушкәке, йа кӧ кʹәтьбу щи-ньвина. Мариа дьбежә: «Мьн дәстпекьр тʹәви ԝе пе тʹеле у бь сайа нәʹма хьзмәт кьм. Һәр щар чахе мә тʹәвайи хьзмәт дькьр, әз гәләк ша дьбум, чьмки мьн али хушка хԝә дькьр». Сәва кӧ әм шабуна хԝә һе зедә кьн, ԝе баш бә ԝәки әм жи дина хԝә бьдьн тьштед кӧ жь дәсте мә тен. Ле һәгәр мәщала мә һәйә кӧ әм хьзмәта хԝә зедә кьн, йан жи хьзмәтеда әм һьнә алийада щерʹьбанди нә, гәрәке әм чь бькьн?

7. Пәтрусе шанди чь ширәт да Мәсиһийа?

⁷ Нәʹма хԝәйә пешьнда, Пәтрусе шанди Мәсиһийарʹа готьбу ԝәки әԝана пʹешкʹеш у фәрәсәтед хԝә бона һеланкьрьна һәвдӧ бьдьнә хәбате: «Жь ԝә кʹе чь пʹешкʹеш стандийә, бь ԝе жи  һәврʹа хьзмәткʹарийе бькьн, чаԝа ԝәкʹилед ԛәнщә ԝан кʹәрәмед Хԝәде» (1 Пәтрус 4:10). Һьнә кәс дьтьрсьн кӧ һәгәр әԝана «пʹешкʹеша» хԝә, демәк фәрәсәтед хԝә бь тʹәмами хьзмәтеда бьдьнә хәбате, кәсед дьн ԝе чʹәʹвнәбарийа ԝан бькьн йан жи дьлтәнг бьн. Һәгәр кәсәк сәва ве йәке хԝә паш хә, әԝе нькарьбә бь тʹәмами тьштед һәри баш бьдә Йаһоԝа.

8. Ль гора 1 Корьнтʹи 4:6, 7, чьма лазьм ә ԝәки әм хԝә сәва фәрәсәтед хԝә ԛӧрʹә нәкьн?

⁸ Лазьм ә кӧ әм фәрәсәтед хԝә бь щурʹе һәри баш бьдьнә хәбате, ле гәрәке әм фәсал бьн ԝәки хԝә ԛӧрʹә нәкьн (1 Корьнтʹи 4:6, 7 бьхунә). Мәсәлә, дьбәкә тәрʹа һеса йә тʹәви мәрьва һинбуна Кʹьтеба Пироз дәстпеки. Тӧ гәрәке хԝә паш нәгьри кӧ ве фәрәсәте бьди хәбате, ле жь алийе дьнва жи гәрәке тӧ сәва ве йәке хԝә ԛӧрʹә нәки. Мәсәлә, бьдә бәр чʹәʹве хԝә ԝәки тә һинбуна Кʹьтеба Пироз дәстпекьрийә у тӧ дьхԝази ԝәʹде хьзмәта кʹоме бәʹса ве йәке бьки. Ле гава кʹом ль һәв тʹоп дьбә, хушкәк бь шабуне гьли дькә ԝәки әԝе мәрьвәкирʹа журнал һиштийә. Әԝе журналәк дайә, тә жи һинбуна Кʹьтеба Пироз дәстпекьрийә, ньһа тӧйе чь бьки? Тӧ зани кӧ ԛәԝьмандьна тә ԝе кʹоме хԝәш бе, ле тӧ сафи дьки ԝәки рʹожәкә дьн бәʹса ве йәке бьки, сәва шабуна ве хушке кӧ журналәк дайә, нәтәмьрини. Әв йәк сафикьрьнәкә баш ә. Ле хԝә паш нәгьрә ԝәки һинбунед Кʹьтеба Пироз дәстпеки. Әва пʹешкʹеша тә йә, у ве йәке бьдә хәбате!

9. Гәрәке әм фәрәсәтед хԝә ча бьдьнә хәбате?

⁹ Гәрәке әм бир нәкьн кӧ фәрәсәтед мә пʹешкʹешед жь Хԝәде нә. Лазьм ә кӧ әм ван пʹешкʹеша бона кʹара щьвате бьдьнә хәбате, нә кӧ наве хԝә дәрхьн у хԝә бьльнд кьн (Филипи 2:3). Һәгәр әм ԛәԝат у фәрәсәтед хԝә ль гора хԝәстьна Хԝәде бьдьнә хәбате, әме ша бьн, нә кӧ чьмки әм жь кәсед дьн четьр ьн, ле чьмки әм ван пʹешкʹеша бона рʹумәта Йаһоԝа дьдьнә хәбате.

10. Гәрәке әм чь нәкьн, у чьрʹа?

¹⁰ Щарна, мәрьв фәрәсәтед хԝәйә баш бәрамбәри кемасийед кәсед дьн дькьн. Мәсәлә, дьбәкә бьрак готара гәләк рʹьнд дьхунә. Әв йәк пʹешкʹеша ԝи йә. Ле әԝ дьбәкә хԝә сәр ԝи бьрайирʹа дьгьрә, йе кӧ нькарә готара  ӧса рʹьнд бьхунә. Ле дьԛәԝьмә әԝ бьра хьзмәтеда, меванһʹьзийеда йан һинкьрьна зарʹада жь ԝи четьр ә. Гәло әм рʹази ниньн кӧ һаԛас хушк-бьред мә пе фәрәсәтед хԝә, демәк пе пʹешкʹешед хԝә, Йаһоԝарʹа хьзмәт дькьн у али кәсед дьн дькьн?

11. Ԝе чьма баш бә кӧ әм чʹәʹв бьдьн Иса?

¹¹ Рʹаст ә гәрәке әм хԝә бәрамбәри кәсед дьн нәкьн, ле әм һьлбәт дькарьн жь мәсәла кәсед амьн һин бьн. Бәʹса хәбәре, әм дькарьн жь мәсәла Иса һин бьн. Әм беԛьсур ниньн, ле әм дькарьн жь һʹӧнӧред ԝийә баш у кьред ԝи дәрса һин бьн (1 Пәтрус 2:21). Һәгәр әм чь жь дәсте мә те бькьн кӧ чʹәʹв бьдьнә ԝи, әме бькарьбьн бь щурʹәки дьһа баш Йаһоԝарʹа хьзмәт бькьн у мьзгине бәла кьн.

12-13. Әм жь Даԝьд Пʹадша чь дькарьн һин бьн?

¹² Кʹьтеба Пироз бәʹса гәләк кәсед амьн дькә, йед кӧ рʹаст ә гӧнәкʹар бун, ле мәрʹа бунә мәсәлед баш (Ибрани 6:12). Мәсәлә, Йаһоԝа Даԝьд ԝәк «мәрик дьле хԝәрʹа дит» (Кʹаред Шандийа 13:22). Рʹаст ә Даԝьд һьнә гӧнед гьран кьрьбу, ле диса жи әԝ гәләк алийава мәрʹа мәсәләки баш ә. Гәло чьрʹа? Чьмки әԝ һазьр бу ширәта ԛәбул кә, у сәва гӧнед хԝә жь дьл пʹошман дьбу, ләма жи Йаһоԝа дьбахшандә ԝи (Зәбур 51:3, 4, 10-12).

¹³ Сәва кӧ жь сәрһатийа Даԝьд дәрса һин би, жь хԝә бьпьрсә: «Гәло әз мина Даԝьд ширәта ԛәбул дькьм? Гәло әз һазьр ьм кӧ шашийед хԝә биньм сәр хԝә? Йан әз тʹьме хԝә һәԛ дәрдьхьм? Гәло әз шашийед хԝә давежьм сәр кәсед дьн? Гәло әз сәр хԝә дьхәбьтьм, ԝәки диса ван шашийа нәкьм?» Тӧ дькари пьрсед ԝи щурʹәйи бьди хԝә, гава тӧ Кʹьтеба Пирозда дәрһәԛа сәрһатийед хьзмәткʹаред амьн дьхуни. Гәло тәнгасийед ԝан мина тәнгасийед мьн ьн? Ԝана кʹижан һʹӧнӧред баш әʹйан дькьр? У һәр щар ве пьрсе бьдә хԝә: «Әз чаԝа дькарьм чʹәʹв бьдьмә ван мәсәлед хьзмәткʹаред амьн?»

14. Ԝе чьма баш бә кӧ әм чʹәʹв бьдьн хушк-бьра?

¹⁴ Иро жи хушк-бьред мәйә щаһьл у әʹмьрда мәзьн мәрʹа мәсәлә нә. Бәʹса хәбәре бьфькьрә кӧ хушк-бьред щьвата тәда чаԝа бәр һʹӧкӧме мәрьвед дәр-дор, мьԛабьлибуна малбәтеда йан  нәхԝәшийе, бь амьни Йаһоԝарʹа хьзмәт дькьн? Тӧ дьхԝази чʹәʹв бьди кʹижан һʹӧнӧред ԝанә баш? Әв йәк дькарә али тә бькә ԝәки тӧ жи нава тәнгасийед хԝәда Йаһоԝарʹа амьн бьмини. Гәло әв йәк кӧ хушк-бьред мәйә ӧса дәлал һәнә, дьле мә ша накә? (Ибрани 13:7; Аԛуб 1:2, 3).

15. Кʹижан тʹәмийа Паԝлосе шанди дькарә али мә бькә кӧ әм бь шабуне Йаһоԝарʹа хьзмәт бькьн?

¹⁵ Сәва кӧ әм щьватеда әʹдьлайи у йәктийе пешда бьвьн, гәрәке һәр кәс жь мә бона ве йәке чь жь дәсте мә те бькә. Ԛьрʹна йәкеда, щурʹә-щурʹә пʹешкʹеш у щабдарийед Мәсиһийа һәбун (1 Корьнтʹи 12:4, 7-11). Диса жи, әԝана һәвдӧрʹа нәдькʹәтьнә һʹӧщәте, у йәктийа нав хԝәда хьраб нәдькьрьн. Паԝлос ԝанрʹа гот кӧ бьра һәр кәс, «бона авабуна бәдәна Мәсиһ» хирәт бькә. Әԝи Әфәсийарʹа жи ньвиси кӧ «гава һәр пʹарәкә бәдәне шьхӧле хԝә дькә, һʹьзкьрьнеда хԝәха дьгьһижә у мәзьн дьбә» (Әфәси 4:1-3, 11, 12, 16). Әԝ Мәсиһийед кӧ тʹәмийа Паԝлосе шанди анинә сери, йәкти у тʹьфаԛи нав хԝәда хԝәй дькьрьн, у иро әм ве йәке щьватед хԝәда жи дьвиньн.

16. Гәрәке әм чь бькьн? (Ибрани 6:10)

¹⁶ Хԝә бәрамбәри кәсед дьн нәкә. Жь Иса Мәсиһ һин бә у чʹәʹв бьдә хәйсәт-һʹӧнӧред ԝи. Чʹәʹв бьдә кәсед кӧ Кʹьтеба Пироз бәʹса ԝан дькә у хушк-бьред амьн. Чь жь дәсте тә те бькә, у баԝәр бә кӧ Йаһоԝа «сәр нәһәԛийе нинә» ԝәки кьред тә бир кә (Ибрани 6:10 бьхунә). Бь шабуне Йаһоԝарʹа хьзмәт кә, у бир нәкә кӧ әԝ хирәта тә гәләк ԛимәт дькә.