1. I biny bidy mwa kwiitwaakish musangal muvul?

 YEHOW i mukat bwa twiikal ni musangal. Tudy bamanyik nook, bwaal musangal i cyumw cya ku biikadil bya diimum dya spirit indiy mujilang. (Kal. 5:22) Teng mudyok kwiikal musangal muvul kudy muut waakaakishangan biit kuhitok waakaakishobw, tumvumvw musangal muvul weeh hatwiitweetweej bikasakan mu mudimw a bukajaady ni hatwambambulwiish biin-kweet mu mishind yishiil-shilangan.​—Yil. 20:35.

2-3. a) Teng mudyeby bileej mu mukand Kalatih 6:4, i myand kaay yibidy yidy mwa kwiitwambulwiish bwa kwiikal ni musangal mu mudimw a Yehow? b) I biny bitwiiyiiy kukontonon mu ciin bwaal eecy?

² Teng mudyeby bileej mu mukand a Kalatih 6:4, mupostol Pool uleeleej myand yibidy yiikal mwa kwiitwambulwiish bwa kwiikal ni musangal (Bal.) Cya kuuhal-a-hal, kiihacil kiitut i ka kwaakish Yehow cidy cilengel bwiitut. Hatumwaamwaakish cidy cilengel menmen bwiitut, twiikakal ni musangal. (Mat. 22:36-38) Ciibiidy, bikaam tulek kwiifwanyikij ni baat bakwaabw. Ning tut biikal ni makand ma nyeet ma bicy, bahet diimany kaahand, eecy biikal ni biheel bitwambambulwiish bwa kukumbaj myand kahand, biikaam twiikal tufwiijok Yehow. Kuunyim, twiiyil kutal neey: biit byoos bitudy naaby i byaalukil kudyey. Cikwaabw, iikal bakwaabw bakal bilengel mudimw kahand mu midimw yitukaakadil Mawej, bikaam twiikal tusangal ni biheel bidyobw bakal naaby mudimw bwa kutumbish naay Yehow, kabiy bwa kwiitalobw neey: i bahitok bakwaabw eecy bwa tubingil twa mudyobw biikat kaayaabw. Nook hamut a kwiitemb naabw, biikaam tulongel kudyobw

³ Mu ciin bwaal eecy, twiiyiiy kutal mutudy mwa kutaatameen tut tutal neey: katwiin bakumban bwa kukal mudimw udyobw biitwaakish mu mushind ukaakaameby. Twiiyiiy kukontonon cikwaabw mutudy mwa kukal bilengel mudimw ni biheel byoos bitudy mwa kwiikal naaby ni myand yitudy mwa kulongel ku bileejel bya bakwaabw.

4. I bwaal kaay budy mwa kwiitukooyesh mu mabok? Twaal cileejel.

⁴ Biin mudimw ba Yehow bakwaabw i bikashishomw bikasakan bwa kushintulul yimw midimw yaakadyobw bakal hadyobw batal neey kabaciin bakumban bwa kwiiyilong bu mukadyobw baat bakuluuh eecy bwa mabenj makaadyobw naam. Ki mwaakadyeby bwa Carol. Uhetel musang umw dyaakatook dya kukadil mudimw ha cyaab cyaakadyobw bakaam menmen bakajaady. Ciisang aacy, waakady ulombol malong ma Bibl 35 ni wambulwiishil baat bavul bwa kuyobw kuuhal mu myand ya mu spirit ni bafikil ku kwiilambulobw kudy Yehow ni kuhetobw baatiisumw. Carol waakady uhatul bihet bilengel mu mudimw a bukajaady! Hahicil mafuk, kacyaakadyoh bend ni makand ma nyeet makumban, ni civul waakady teng kwindiy. Carol uleeleeb neey: “Nady mumanyik neey: bwa mabenj manady naam, ciin ni mushind a kulong mudimw mudy bakwaabw balong,” “ki nady mwiiyumvw neey: ciin ni lulamat bu lwaabab. Bwaal oobw i diivit hakacy ha kwaalakan ni myand ya biin-biin, ni i bikasakan menmen bwa kutaatameen.” Carol ukaakaam kulong cyoos cidyey mukumban bwa kulong bwa Yehow. Cya biin, i mukumbanyin kumweel bikasakan kalumbandy! Bikaam twiikal batwiishibw neey: Mawej udy ni lus ni wanyanyish kwiikashishomw kwindiy.

5. a) Bikaam tuvuluk biny hatwiiyumvumvw neey: tudy bakooyel mu mabok ni katwiin mwa kukal midimw yoos? b) Teng mutudy biibital mu bifwaatul, i mushind kaay udy mwiin-kweet mwaan-mulum utungunuk ni kutwaal cidy cilengel mu mudimw a Yehow?

⁵ Misang yikwaabw uw mutal neey: kwiin ni mushind a kukal midimw kahand, iyihanguj neey: ‘I biny bidy Yehow uulomb?’ Ciit cilengel menmen bwiibuh​—Ciwudy mwa kulong kaabaak. Langil ha bwaal oobw: Mwiin-kweet mwaan-mukaj udy ni mivw 80 wiiyumvumvw mukooyel mu mabok bwaal kiin ni mushind a kulong bikasakan mudimw a bukajaady bu ha cyaakadyey ni mivw 40. Ulaalang neey: ning mudyey utwaal nook cidy cilengel bwindiy, kabiin bisangeej Yehow. Ki mudyeby eeny? Langiloh ket ha bwaal oobw. Iikaleby neey: mwiin-kweet mwaan mukaj oow, i mutwaal cidy cilengel bwindiy hacyaakadyey ni mivw 40 ni ucituutungunuk ni kutwaal cikwaabw cidy cilengel bwindiy ciisang cikaadyey mukumbaj mivw 80, kiinoh bend mulek bwa kutungunuk ni kutwaal cidy cilengel menmen bwindiy. Tut tutwaadij kumvw neey: mudimw iitut kiin usangeej misang yikwaabw Yehow, bikaam tuvuluk neey: Yehow i yiy wangangat dihangadik bwa kutal neey: bwaal kahand bumusaasangeej. Tut twiikashishomw bwa kulong cidy cilengel bwiitut, Yehow wiiyiiy kwiitwambil byeet neey: “Nwaafwaayook!”​—Fwanyikij ni Matewus 25:20-23.

6. I biny bitudy mwa kulongel ku cileejel cya Maria?

⁶ Biiyiiy kwiikal biheehel bwiitut kwiikal ni musangal hatutuutum meej miitut ku citudy bakumban bwa kulong ni kiin ku citudy katuy bakumban mwa kulong. Tutalaay bwaal bwaakady bufikil mwiin-kweet mwaan-mukaj Maria, udy ni lubeel lumukaakakeesh bwa kukal mudimw a bukajaady mu mushind waakadyey mukat. Cya kuuhal, uhetel kaakunying ni wiitadil kaay ni buseeb. Ki umanyikil lutat lwaakady naalw mwiin-kweet mu cisumbw waakady teng mulaal mu bulaal bwa mabenj, ni Maria wangacil dihangadik dya kumwambulwiish. Maria uleeleeb neey: “Nady mulong program bwa kudiil baat musah haakaabumw nend ku telefon ni ha kufundilangan mikand.” “Twaakady tukal nend mudimw haakaabumw diib dyoos, naakady nahingomw ku cibel mwiikal ni musangal ni mumvw bilengel bwa munaakady mumwambulwiish.” Twiiyil kuhet byeet musangal muvul hatwaakady tulong citwaakady mwa kulong hamut a kulong citwaakady katuy ni mushind a kulong. Ki i myand kaay yikwaabw yitudy mwa kulong eecy i mishind kaay yikwaabw yitudy mwa kukadil naay Yehow mudimw bilengel?

7. I mubel kaay wa meej waakady mupostol Pyeel mwaakish biin Krist?

⁷ Mu mukand indiy a kuuhal, mupostol Pyeel wambiil baan baabw bwa kukal mudimw ni biheel byoos bidyobw naaby ni mamany mahetelobw bwa kukashish baan baabw biin Krist. Pyeel ufundil neey: “Bu mudy Mawej mwiinwaakish biheel bivul byaabuluk, muut ni muut wa mukacy mwiinun along mudimw ni ciheel cimuheel Mawej bwa musangal a bakwaabw, bu mwiin mudimw a biin-biin.” (1 Py. 4:10) Kabiin bikaam tulek kukal mudimw ni biheel bitudy naaby mu  mushind mulengel menmen hakuciin neey: bakwaabw bady mwa kwiitumvwiil mukaw eecy bady mwa kukooyel mu mabok. Tut katuy biikashishomw bwa kulong nook, katwaakwaakishoh bend Yehow cidy cilengel bwiitut.

8. Bilondeshil mukand a 1 Biin Korent 4:6, 7, bwabiny bikaam tulek kwiiyumbw mwiiwul bwa biheel bitudy naaby?

⁸ Bikaam tukal mudimw menmen ni biheel bitudy naaby, ki bikaam twiikal badimuk hakumanyik neey: katwiin mwa kwiiyumb mwiiwul ni biheel eeby. (Bal 1 Biin Korent 4:6, 7.) Cileejel, udy mwa kutwaadij kumvw musangal hawutwaatwaadij kulombol malong ma Bibl. Kulekoh bend kukal mudimw ni ciheel ciwudy naacy! Ki i bya buseeb bwiibuh kuvuluk neey: kwiin mwa kwiiyumb naacy mwiiwul. Lang ket neey: mafuk mashaal aam uhetel musangal mu mudimw a bukajaady ni uhatwiil cihet cilengel hawutwaadijil kulombol dilong dya Bibl. Udy ni musangal muvul bwa kwambil baat bawudy naab mu kasumbw bwaal oobw. Nook, hawuheehetangan ni biin mu kasumbw, mwiin-kweet mwaan-mukaj uloolond bwaal buheteley haakadyey mutwaal cibij-bij kahand. Waakishil muut cibij-bij; nudy batwaadij kulong Bibl ni muut. I biny Binwiikal mwa kulong? Nudy bamanyik neey biin mu cisumbw biiyiiy kukasakan ku micim bwa bwaal bunudy balond, ki uw mwa kwangat dihangadik dya kukaam ciisang cikwaabw bwa kwiibulond, nook bwa kulek kukooyesh mwiin-kweet mwaan-mukaj waakady mutwaal cibij-bij mu mabok. Bwiin oobw i bwaal bulengel buwiikal mwa kulong. Ki ku dyambulwiish dya mishind yoos yitudy naay, kulekoh bend bwa kukaam baat bawudy mwa kulong naab Bibl. Udy ni ciheel​—long naacy mudimw!

9. I mushind kaay utudy mwa kukal mudimw ni biheel biitut?

⁹ Bikaam tuvuluk neey: mamany ni biheel bitudy naaby byaalalukil kudy Mawej. Bikaam tukal mudimw ni biheel eeby bwa kukashish naaby biin-kweet mu cisumbw, kabiy bwa bilengel biitut kayeet. (Fili. 2:3) Hatukaakaal mudimw ni diikand diitut ni biheel bitudy naaby bwa kulong lukat lwa Mawej, twiiyiiy kwiikal ni musangal​—kiin bwa neey: tuloolong myand ni twiileej mutudy bahitok bakwaabw, ki tukaakal mudimw ni biheel biitut bwa kutumbish naaby Yehow.

10. Bwabiny kabiishow bend bya meej bwa kwiifwanyikij ni bakwaabw?

¹⁰ Muut yiy kay mudimuk, udy mwa kuhon mu butey hakutwaadij kufwanyikij ciheel cidyey ukal naacy mudimw bilengel ni mukwaabw ukiish ulong bu yiy. Cileejel, mwiin-kweet mwaan-mulum udy mwa kwiikal ulong bilengel menmen miisamb ya hatook. Ciin eecy i ciheel cindiy. Nook, mu micim indiy, udy mwa kulang neey: i muhitok mwiin-kweet udy kay ulong miisamb bilengel. Ki, mwiin-kweet oow udy mwa kwiikal ni ciheel cilengel cya kwaak beeny, cya kulongweesh baan bindiy, eecy mwiikal ni cisumy mu mudimw a bukajaady. I musangal kaay muvul utudy nend bwa biin-kweet bavul  baan-balum ni baan-bakaj bakaakal mudimw ni biheel byaababw bwa kukadil Yehow mudimw ni bwa kwambulwiish naaby baat bakwaabw!

11. Bwabiny bikaakaam tulond cileejel cya Yeez?

¹¹ Nook, bikaam tulek kwiifwanyikij ni bakwaabw, tudy mwa kumanyik myand yivul hakulongel ku bileejel bya baat ba lulamat. Yeez i cileejel cilengel bwiitut. Ning mwaakadyey muut muwaakan, tudy mwa kulongel ku biikadil bilengel bindiy ni myand yilengel yaakadyey ulong. (1 Py. 2:21) Hatwiikaakashishomw bwa kulond menmen cileejel cya Yeez, twiiyiiy kushaal biin mudimw ba Yehow balengel ni twiiyiiy kushaal bashimat menmen mu mudimw a bukajaady.

12-13. I biny bitudy mwa kulongel ku cileejel cya Mukaleng Davih?

¹² Mu Diiy dya Mawej, mudy bileejel bivul bya baat ba lulamat baan-balum ni baan-bakaj batudy mwa kwiidikij ning mwaakadyobw baat bakiish bawaakan. (Ebr. 6:12) Langil ha cileejel cya Mukaleng Davih, waakady Yehow ubiikan neey: “muut wa ha micim yaam” eecy, mu kwaalabul kwa Bibl mukwaabw i baalabul cyambil eecy neey: “muut usaasangeej bikasakan.” (Yil. 13:22) Ing, Davih kaakadyoh bend muwaakan. Citudy mwa kumanyik cidy neey: waakady ulong byend myand yikwaabw yitam yibiih. Ning naak, i cileejel cilengel bwiitut. Bwabiny tuleeleeb naak? Bwaal haakadyobw bamubel, kakaminoh bend kwiibingish naay. Ki hamut a kulongey nook, wiitabil mubel mulengel umwaakishilobw ni waakady mwiifwiij naay ni mucim aakaabumw bwa bibiih bilongeley. Bu cihet, Yehow waakady mu mufwiil lus.​—Mus. 51:3, 4, 10-12, NWT.

¹³ Tudy mwa kulongel ku cileejel cya Davih hakwiiyihanguj neey: ‘Nadyaakal nalong biny hadyobw baabel? Nadyaakalok ni kalwaak ka kumanyik bibiih binady mulong, eecy nadyaakal nakaam kwiibingish naay? Nadyok habwiih bwa kunyok bakwaabw eeny? Nikaakashishomw bwa kulek kulong cikwaabw myand yibiih yinady mulong eeny?’ Udy mwa kwiiyihanguj majooj maakaabumw aam hawendend ni kubal mu Bibl bileejel bya biin lulamat bakwaabw baan-balum ni baan-bakaj. Baakady bataatameen byaabw makab ma mushind aakaabumw ni mawendend ni kutaatameen eeny? I bwa biikadil kaay bileejelobw byaakadyobw biifwiijok naaby? Hawudy kuuhal kwa bwaal kaay boos, iyihanguj neey: ‘I mushind kaay unady mwa kulong myand bu mwiin mudimw a lulamat wa Yehow oow?’

14. I myand kaay yilengel yitudy mwa kuhetel kudy biin Krist neet?

¹⁴ Tudy mwa kumanyik myand yikwaabw yilengel hakutal myand yiloolong biin Krist neet, baasand ni bakuluuh. Cileejel, udy mwa kulangilok ha muut kahand wa mu cisumbw ciwudy, utaataatameen ni lulamat lutat kahand​—misang yikwaabw udyobw balwiish kudy balund nend, biin mu cisak, eecy bwa lubeel kahand eeny?  Muut oow udyok ni biikadil bidy mwa kulong bwa umufwiijok ni bwiibuh kukat bwa kumwiidikij eeny? Hakukontonon cileejel cilengel cya mwiin-kweet mwaan-mulum eecy mwaan-mukaj, udy mwa kulongelok mishind ya meej yidy mwa kukwambulwiish bwa kutaatameen makab mawudy naam. Tudy ni dyanyish divul bwa kwiikal ni bileejel bya baat ba lulamat batudy mwa kwiidikij​—cya biin, i bwaal bwa musangal!​—Ebr. 13:7; Jak 1:2, 3.

15. I mubel kaay waakady mupostol Pool mutwaal udy mwa kwiitwambulwiish byeet bwa kutungunuk ni kwiikal ni musangal mu mudimw utukaakadil Yehow?

¹⁵ Bwa kukaam diitalal ni kaacyumw mu cisumbw, bikaam muut woos iikashishomw bwa kulong myand yilengel. Tukontonon cileejel cya biin Krist ba mu siyekel a kuuhal. Baakady ni biheel ni midimw ya kulong yishil-shilangan. (1 Kor. 12:4, 7-11) Ki bwaal oobw kabwaakady bulong bwa biikal batembangan eecy babulukangan. Hamut a kulong nook, Pool wambiil muut woos bwa kulong cyaakadyobw bamulomb bwa “Ekeleziy udy nyeet ya Krist ay kuuhal,” i bwiin kuleeb neey: kwiibak nyeet ya Krist. Pool utumiin biin Efez mukand uleeb neey: “hady cidyeemw cyoos cikal cikal mudimw a cicy bu mukaakaameby, nyeet yoos yendend yikasakan, yend yikuluuhil mu lukat.” (Ef. 4:1-3, 11, 12, 16) Baat balongel nook, bakaamin diitalal ni kaacyumw​—biikadil bitutaatal mu bisumbw leeloow.

16. Bikaam twiikal biswiik bwa kulong biny? (Ebreh 6:10)

¹⁶ Iikal mwiiswiik bwa kulek kwiifwanyikij ni bakwaabw. Hamut a kulong nook, longel ku cileejel cya Yeez, ni long mwiibuh moos bwa kwiidikij bikadil bindiy. Longel ku bileejel bya baat ba lulamat badyobw bateel mu Bibl ni ba leeloow. Uw mutungunuk ni kulong mwiibuh moos, iikal mujaadik neey: Yehow “kiishoh bend ni kabow. Kiish uvulamin midimw yiinun.” (Bal Ebreh 6:10.) Tungunuk ni kwiikal ni musangal mu mudimw uwukaakadil Yehow, ni iikal mumanyik neey: wanyanyish kwiikashishomw kwiibuh kuwuloolong ni mucim aakaabumw bwa kumusangeej.