1. Ñanyi bintu byakonsha kwitulengela kwikala na lusekelo?

 YEHOBA ukeba’mba twikalenga na lusekelo. Twayuka bino mambo lusekelo ke kipangwa kyanji kya mupashi wazhila. (Nga. 5:22) Byo twayuka kuba’mba mu kupana muji lusekelo lukatampe kukila mu kutambula, inge ke twingile papelela bulume bwetu mu mwingilo wa kusapwila ne kukwasha balongo mu mashinda apusana pusana, tukekala bingi na lusekelo.—Byu. 20:35.

2-3. (a) Kwesakana na byaamba Ngalatiya 6:4, ñanyi bintu bibiji biketukwasha kutwajijila kwikala na lusekelo mu mwingilo wa Yehoba? (b) Ñanyi bintu byo tusakufunda mu uno mutwe?

² Byonka byaamba Ngalatiya 6:4, mutumwa Paulo waambile pa bintu bibiji biketukwasha kutwajijila kwikala na lusekelo. (Tangai.) Kitanshi, twafwainwa kwingijilanga Yehoba papelela bulume bwetu. Tukekala bingi na lusekelo inge ke twingijile Yehoba papelela bulume bwetu. (Mat. 22:36-38) Kya bubiji, kechi twafwainwa kwiesakanyanga na bakwetu ne. Na mambo a kuba’mba butuntulu bwetu bwa mubiji bwakonsha kupusanako na bwa bakwetu, nangwa kampe twayukapo mingilo imo nangwa tujipo na bya bupe bimo, atweba bonse twafwainwa kusanchilanga Yehoba mambo twayuka kuba’mba byonse byo tuji nabyo byafuma kwi aye. Kabiji inge bakwetu bengila bulongo mu mwingilo kwitukila, twafwainwa kusekela mambo twayuka’mba babena kwingijisha bya bupe byabo kutotelamo Yehoba, kechi kukeba kwimwesha’mba bakila bakwabo ne. Onkao mambo, kechi twafwainwa kwiesakanyanga nabo ne, bino twafwainwa kufunjilangako kwi abo.

³ Mu uno mutwe, tusakufunda pa bintu byakonsha kwitukwasha inge twalefulwa na mambo a kukankalwa kwingila papelela bulume bwetu. Kabiji tusakufunda ne pa byo twafwainwa kwingijishanga bya bupe byetu ne bintu byo twakonsha kufunjilako ku bakwetu.

4. Ñanyi bintu bimo byakonsha kwitulefula? Shimikizhai kyamwekele.

⁴ Atweba bamo tubena kukankalwa kwingijila Yehoba byonka byo tukeba na mambo a kukoma nangwa kukolwa kabiji kino kitulefula bingi. Abino byo byo kyajinga ne kwi ba Carol. Byo bayile na kwingijila ku mpunzha kwakepa basapwishi, bajinga na bantu 35 bo bafunjishanga Baibolo kabiji bakwashishe bavula kwipana ne kubatizhiwa. Kinetu ba Carol bajinga na lusekelo mu mwingilo wa kusapwila. Pano bino palutwe kacheche, bakolelwe kabiji batendekele kwikalatu pa nzubo. Ba Carol baambile’mba: “Na mambo a kukolwa, mbena kukankalwa kwingila byonka bingila bakwetu. Kabiji ndanguluka’mba kechi ne mwina Kilishitu wafikilamo ne. Kino kindefula bingi mambo nkankalwa kwingila byonka byo naingilanga kala.” Ba Carol bakeba kwingijila Yehoba papelela bulume bwabo. Kino kyawama bingi. Twashiinwa kuba’mba Lesa wetu wa lusa wibasanchila bingi pa byo bebikako kumwingijila papelela bulume bwabo.

5. (a) Ñanyi kintu kyo twafwainwa kuvulukanga inge twalefulwa na mambo a kuba’mba kechi tubena kwingila byonka byo twaingilanga kala ne? (b) Byonka byo tubena kumona pa bipikichala, mulongo wamwesha byepi kuba’mba watwajijila kwingijila Yehoba papelela bulume bwanji?

⁵ Umvwe kimye kimo mulefulwa na mambo a kukolwa, mwafwainwa kwiipuzha amba, ‘Ñanyi kintu Yehoba kyo akeba kwi amiwa?’ Ke kumwingijila papelela bulume bwetu kwesakana na bintu byo biji pa kyokyo kimye. Akilangulukai pa kino: Nyenga uji na myaka 80 walefulwa mambo kechi ubena kwingila mu mwingilo wa kusapwila byonka byo aingilanga saka aji na myaka 40 ne. Ulanguluka’mba kechi ubena kutookesha Yehoba ku muchima ne, nangwa kyakuba ubena kwingila papelela bulume bwanji. Pano nanchi byobyo kiji nyi? Ine. Mambo inge uno nyenga waingilanga papelela bulume bwanji byo ajinga na myaka 40 kabiji watwajijila kwingijila Yehoba papelela bulume bwanji byo aji na myaka 80, ko kuba’mba ubena kwingijila Yehoba papelela bulume bwanji. Inge twatendeka kulanguluka’mba kechi tubena kutookesha Yehoba ku muchima na mambo a kuba’mba kechi tubena kwingila byonka byo twaingilanga kala ne, twafwainwa kuvulukanga kuba’mba Yehoba ye wafwainwa kwitubuula bintu byafwainwa kumutookesha ku muchima. Onkao mambo, inge ke twingijile Yehoba papelela bulume bwetu, Yehoba uketwambila’mba ‘mwaingilai!’—Esakanyaiko Mateo 25:20-23.

6. Ñanyi bintu byo twakonsha kufunjilako ku byaubile ba Maria?

⁶ Pa kuba’mba twikale na lusekelo, twafwainwa kuta muchima pa byo tubena kwingila luno, kechi kuta muchima pa byo twaingilanga kala ne. Akilangulukai pa ba Maria baji na kikola kibalengela kukankalwa kwingila mu mwingilo byonka byo bakeba. Patanshitu balefwilwe kabiji belengulwile bingi. Pano bino balangulukile pa nyenga mu kipwilo wakolwanga wabulanga kwenda. Ba Maria bafuukwilepo kukwasha uno nyenga. Baambile amba: “Nanengezhezhe kwingila nabo mu mwingilo kwingijisha foni ne kunemba makalata. Jonse inge naingila nabo naikalanga bingi na lusekelo mambo nakwashanga uno nyenga kwingilako mwingilo wa kusapwila.” Ne atweba twakonsha kwikala na lusekelo inge ke tutetu muchima pa bintu byo twakonsha kuba. Pano ñanyi bintu bikwabo byo twafwainwa kuba inge twingila papelela bulume mu mwingilo wa Yehoba?

7. Mutumwa Petelo watundaikile bena Kilishitu kuba ka?

⁷ Mu nkalata yanji itanshi yo anembele, mutumwa Petelo watundaikile balongo bonse kwingijisha bya bupe ne busendwe bwabo kutundaikilamo bena Kilishitu bakwabo. Wanembele amba: “Monka muntu yense mo atambwijile kya bupe, ekingijishenga kukwashishamo bakwabo byo aji kalama wa lusa lukatampe lwa Lesa.” (1 Pe.  4:10) Twafwainwa kwibikangako kwingijisha bya bupe byetu kabiji kechi twafwainwa kuchiinanga’mba bakwetu basakwitumvwina kichima nangwa’mba tusakwibalefula ne. Kulanguluka bino kwakonsha kwitulengela kubula kwingijila Yehoba papelela bulume bwetu.

8. Kwesakana na byaamba 1 Kolinda 4:6, 7, mambo ka o twafwainwa kubujila kwilundumikanga na bya bupe byo tuji nabyo?

⁸ Twafwainwa kwingijishanga bya bupe byetu ponka papelela bulume bwetu. Pano bino kechi twafwainwa kwilundumikanga ne. (Tangai 1 Kolinda 4:6, 7.) Kampe mwayuka bingi bya kutendeka kufunjisha bantu Baibolo. Mwafwainwa kwingijishanga buno bupe bwenu. Pano bino kechi mwafwainwa kwimonanga’mba mwakila bakwenu ne. Twambe’mba mwayile mu mwingilo kabiji mwatendekele kufunjisha muntu Baibolo. Mwakonsha kukeba kubuulako ba mu jibumba jenu ja mwingilo pa kino kyawama kyamwekele mu mwingilo. Byo mwaya na kusambakana ku jibumba jenu kuba’mba muye mu mwingilo, nyenga watendeka kushimikizha pa byawama byamwekele mu mwingilo kuba’mba washiile Kyamba kya Usopa. Uno nyenga washiile Kyamba kya Usopa mu mwingilo. Anweba mwatendekele kufunjisha muntu Baibolo. Pano mwakonsha kuba byepi? Mwayuka kuba’mba jibumba jenu jisakutundaikwa bingi inge mwijibuuleko pa kyawama kyamwekele kuba’mba mwatendekele kufunjisha muntu Baibolo. Pano bino mwakonsha kupembela kimye kikwabo kya kubuulako jibumba jenu pa kyawama kyamwekele byo mwajinga mu mwingilo pa kuba’mba mubule kutuntwisha nyenga washiiletu Kyamba kya Usopa mu mwingilo. Kyakonsha kuwama bingi inge mwauba bino. Pano bino kechi kibena kulumbulula’mba mwafwainwa kuleka kukeba bantu ba kufunjisha Baibolo ne, mambo muji na kya bupe kabiji mwafwainwa kwingijishanga.

9. Twafwainwa kwingijishanga byepi bya bupe byetu?

⁹ Twafwainwa kuvulukanga kuba’mba bya bupe byonse byo tuji nabyo byafuma kwi Lesa. Twafwainwa kwingijishanga bino bya bupe kutundaikilamo balongo ne banyenga mu kipwilo, kechi kwitota ne. (Fili. 2:3) Inge ke twingijishe bulume ne bya bupe byetu kuba kyaswa muchima wa Lesa, tukekala bingi na lusekelo. Kechi na mambo a kuba’mba twakila bakwetu ne, bino ke na mambo a kuba’mba tubena kwingijisha bya bupe byetu kutumbijikilamo Yehoba.

10. Mambo ka o twafwainwa kubujila kwiesakanyanga na bakwetu?

¹⁰ Inge twabula kujimuka, twakosha kutendeka kwesakanya bya bupe byo tuji na nabyo na bya bupe bya bakwetu. Twambe kuba’mba mulongo umo wamba bingi bulongo majashi a mvula bantu. Akino kyo kya bupe kyanji. Pano bino wakonsha kutendeka kulanguluka kuba’mba wakila  mulongo mukwabo ubula kwamba bulongo majashi. Bino kampe uno mulongo ye abena kwiesakanya nanji uba bulongo mu bintu bikwabo nabiji kutambwila benyi, kufunjisha baana nangwa kwingila na mukoyo mu mwingilo wa kusapwila. Tuji bingi na lusekelo mambo tuji na balongo ne banyenga bengijisha bya bupe byabo pa kwingijila Yehoba ne kukwasha bakwabo.

11. Mambo ka o twafwainwa kulondela byajinga Yesu?

¹¹ Nangwa kyakuba twafwainwa kuchinuzhukanga kwiesakanya na bakwetu, bino twakonsha kufunjilako byavula bingi ku bakalume ba Yehoba. Twayai twisambe pe Yesu Kilishitu. Nangwa kyakuba wajinga walumbuluka, bino twakonsha kufunjilako ku byubilo byawama byo ajinga nabyo ne bintu byo aubile. (1 Pe. 2:21) Inge ke twibikeko kulondela byajinga Yesu, tukengijilanga bulongo Yehoba ne kwingila bulongo mwingilo wa kusapwila.

12-13. Ñanyi bintu byo tufunjilako ku Mfumu Davida?

¹² Mu Baibolo, muji banabalume ne banabakazhi bakishinka bo twakonsha kufunjilako byavula nangwa kyakuba bajinga bambulwakulumbuluka. (Hebe. 6:12) Akilangulukai pa Mfumu Davida. Yehoba wamutelele’mba “muntu wantokela ku muchima.” (Byu. 13:22) Nangwa byonkabyo, Davida wajinga mbulwakulumbuluka kabiji walengele mambo akatampe bingi. Pano bino twakonsha kufunjilako bintu byavula bingi kwi aye. Mambo ka? Mambo byo bamolweleko kechi wikangaizhe ne kukeba kwibingisha ne. Pakuba watambwijile lujimuno ne kulapila pa bintu byatama byo aubile. Kino kyalengejile Yehoba kumulekelako mambo.—Sala. 51:3, 4, 10-12.

¹³ Pa kuba’mba tufunjileko ku byaubile Davida, twafwainwa kwishikishanga amba: ‘Nguba byepi umvwe bamfundako? Nanchi nswa kuba’mba nalenga mambo nyi, inyi nekangaizha? Nanchi mpamo bakwetu mambo nyi? Nanchi nebikako kubula kubwezhapo bintu byatama byo naubile nyi? Kabiji mwafwainwa kwiipuzhanga ne mepuzho akwabo inge mubena kutanga pa banabalume ne banabakazhi bakishinka bo baambapo mu Baibolo. Nanchi bapichile mu makatazho epasha na o mubena kupitamo nyi? Ñanyi byubilo byawama byo bajinga nabyo? Mwafwainwa kwiipuzhanga pa bano bakalume amba: ‘Nakonsha kulondela byepi bano bakalume bakishinka?’

14. Twakonsha kumwenamo byepi inge ke tulondele byuba bena Kilishitu bakwetu?

¹⁴ Kabiji twakonsha kufunjila ne ku bena Kilishitu bakwetu, bakulumpe ne banyike. Nanchi mu kipwilo kyenu mujipo mulongo nangwa nyenga ubena kuchinchika meseko mu bukishinka nabiji kumukanjikizha kuba byatama ku bakwabo, kumukanya kupopwela Lesa ku ba mu kisemi  nangwa ubena kukolwa nyi? Nanchi mwamona byubilo byawama mu uno mulongo nangwa nyenga byo mwakonsha kutemwa kulondela nyi? Kulanguluka pa byo atwajijila kuchinchika meseko o abena kupitamo kukemukwasha ne anweba kuchinchika meseko o mwakonsha kupitamo. Tusanta bingi pa kwikala na bano balongo ne banyenga bakishinka bo twafwainwa kulondela, kabiji kino kituletela bingi lusekelo!—Hebe. 13:7; Yako. 1:2, 3.

15. Ñanyi lujimuno lwapaine mutumwa Paulo lwakonsha kwitukwasha kutwajijila kwingijila Yehoba na lusekelo?

¹⁵ Pa kuba’mba tutundaikenga mutende ne kukwatankana mu kipwilo, atweba bonse twafwainwa kwingijilanga Yehoba papelela bulume bwetu. Akilangulukai pa bena Kilishitu ba mu myaka kitota kitanshi. Bajinga na bya bupe ne mingilo yapusana pusana. (1 Ko. 12:4, 7-11) Nangwa byonkabyo, abino kechi bibalengejile kutendeka kwikyombesha ne. Paulo watundaikile bena Kilishitu bonse kwibikako “kukomesha mubiji wa Kilishitu.” Wanembejile bena Efisesa amba: “Umvwe kinungwa kyonse kibena kwingila bulongo, kilengela mubiji kukoma ne kubaya mu butemwe.” (Efi. 4:1-3, 11, 12, 16) Bena Kilishitu baubile bino batundaikile mutende ne kukwatankana. Kabiji abino byo byubilo biji ne mu kipwilo lelo jino.

16. Twafwainwa kufuukulapo kutwajijila kuba ka? (Bahebelu 6:10)

¹⁶ Onkao mambo, twayai atweba bonse tuchinuzhukenga kwiesakanya na bakwetu. Pakuba funjilainga kwi Yesu ne kwibikako kulondela byubilo byanji. Funjilaingako ku bantu bajinga na lwitabilo bo baambapo mu Baibolo ne ba mu ano moba. Vulukainga kuba’mba inge mwatwajijila kwingijila Yehoba papelela bulume bwenu, Yehoba kechi ‘ukavulama mingilo yenu ne.’ (Tangai Bahebelu 6:10.) Twajijilai kwingijila Yehoba na lusekelo byo mwayuka kuba’mba usanta bingi pa byo mubena kwibikako kumwingijila na muchima yense.