တၢ်မၤလိ ၁၆
ပမ့ၢ်ဟ့ၣ်ယဟိဝၤယွၤ တၢ်လၢအဂ့ၤကတၢၢ်န့ၣ် ပကအိၣ်ဒီးတၢ်သးခု
“ပှၤတဂၤဘၣ်တဂၤ မ်အသမံသမိးလီၤက့ၤ အနီၢ်ကစၢ် အတၢ်မၤတက့ၢ်.” —ကလၤတံ ၆:၄.
တၢ်သးဝံၣ် ၃၇ ဘူၣ်ထီၣ်ဘါထီၣ် ယဟိဝၤယွၤလၢ သးဒီဖျၢၣ်
တၢ်မၤလိအံၤ အတၢ်တိာ်ပာ် a
၁. ပဒိးန့ၢ်ဘၣ် တၢ်သးခုနီၢ်နီၢ် ကသ့ဒ်လဲၣ်.
တၢ်သူၣ်ခုသးခုန့ၣ် ဟဲကဲထီၣ်အသး ခီဖျိလၢ ကစၢ်ယွၤအသးစီဆှံအဃိ ပသ့ၣ်ညါလၢ ယဟိဝၤယွၤ အဲၣ်ဒိးလၢပကအိၣ်ဒီး တၢ်သးခု. (ကလၤတံ ၅:၂၂) ပမ့ၢ်ဟ့ၣ်တၢ်န့ၣ် ပကဒိးန့ၢ်ဘၣ် တၢ်သးခုအါန့ၢ်ဒံး ပဒိးန့ၢ်ဘၣ်တၢ်ဒံး. အဃိ ပမ့ၢ်ပၣ်ဃုာ်လၢ တၢ်စံၣ်တဲၤတဲလီၤတၢ်မၤပူၤ လၢအဂ့ၤကတၢၢ် ဒီးမၤစၢၤ ပဒီပုၢ်ဝဲၢ်မုၣ်ခွါလၢ ကျဲအါဘိန့ၣ် ပကဒိးန့ၢ်ဘၣ် တၢ်သးခုသပှၢ်ကတၢၢ်.—မၤတၢ် ၂၀:၃၅.
၂-၃. (က) ဒ် ကလၤတံ ၆:၄ ပာ်ဖျါထီၣ်ဝဲအသိး တၢ်ဂ့ၢ်ခံမံၤလၢ ကမၤစၢၤပှၤဒ်သိး ပကဆဲးအိၣ်ဒီးတၢ်သးခု လၢကစၢ်ယွၤ အတၢ်မၤအပူၤန့ၣ် မ့ၢ်မနုၤလဲၣ်. (ခ) လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
၂ လၢ ကလၤတံ ၆:၄ အပူၤန့ၣ် တၢ်မၢဖိပီလူး ပာ်ဖျါထီၣ်ဝဲ တၢ်ဂ့ၢ်ခံမံၤလၢ ကမၤစၢၤပှၤဒ်သိး ပကဆဲးအိၣ်ဒီး တၢ်သးခု. (ဖး.) တၢ, ပတၢ်တိာ်ပာ်န့ၣ် မ့ၢ်ဝဲပကဘၣ်ဟ့ၣ် ယဟိဝၤယွၤ တၢ်လၢအအိၣ်ဒီးပှၤ လၢအဂ့ၤကတၢၢ်. ပမ့ၢ်ဟ့ၣ်ယဟိဝၤယွၤ တၢ်လၢအအိၣ်ဒီးပှၤလၢ အဂ့ၤကတၢၢ်န့ၣ် ပကအိၣ်ဒီး တၢ်သးခု. (မးသဲ ၂၂:၃၆-၃၈) ခံ, ပတဘၣ်ထိၣ်သတြီၤပသးဒီး ပှၤဂၤဘၣ်. ခီဖျိလၢ ပတၢ်အိၣ်ဆူၣ်အိၣ်ချ့, ပဒိးန့ၢ်ဘၣ်တၢ်သိၣ်လိ မ့တမ့ၢ် ပတၢ်သ့တၢ်ဘၣ်အဃိ ပမၤတၢ် မ့ၢ်န့ၢ်ထဲလဲၣ်ဂ့ၤထဲလဲၣ်ဂ့ၤန့ၣ် ပကြၢးစံးဘျုး ယဟိဝၤယွၤ, မ့ၢ်လၢတၢ်လၢအအိၣ်ဒီးပှၤ ခဲလၢာ်န့ၣ် ဟဲလၢယဟိဝၤယွၤအအိၣ်အဃိ. ဒီးအဂၤတခါန့ၣ် လၢတၢ်စံၣ်တဲၤတဲလီၤတၢ်မၤအပူၤ ပှၤဂၤအတၢ်သ့တၢ်ဘၣ် မ့ၢ်အါန့ၢ်ဒံးပှၤတမံၤမံၤန့ၣ် ပကသးခုစၢၤအဝဲသ့ၣ်, မ့ၢ်လၢအဝဲသ့ၣ် သူအတၢ်သ့တၢ်ဘၣ်လၢ ကစံးထီၣ်ပတြၢၤ ယဟိဝၤယွၤ ဒီးတမ့ၢ်လၢ အနီၢ်ကစၢ်အဂီၢ်ဘၣ် ဒီးတမ့ၢ်လၢ ပှၤကဆိကမိၣ်ဒိၣ်အီၤအဂီၢ်ဘၣ်. လၢပကထိၣ်သတြီၤပသးဒီးပှၤဂၤအလီၢ် ပကြၢးမၤလိန့ၢ်တၢ်လၢ အဝဲသ့ၣ်အအိၣ်ဟီ.
၃ ပမ့ၢ်သးဟးဂီၤ ခီဖျိလၢ ပမၤကစၢ်ယွၤအတၢ်မၤ တန့ၢ်ထဲသိးဒီး ပအဲၣ်ဒိးမၤန့ၣ် တၢ်မနုၤကမၤစၢၤပှၤလဲၣ်. တၢ်သ့တၢ်ဘၣ်လၢအအိၣ်ဒီးပှၤန့ၣ် ပသူအီၤလၢ အဂ့ၤကတၢၢ်ကသ့ဒ်လဲၣ်. ပမၤလိန့ၢ်တၢ်လၢပှၤဂၤအအိၣ် ကသ့ဒ်လဲၣ်. လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
ဖဲပမၤတၢ် မ့ၢ်တန့ၢ်ထဲသိးဒီး ပအဲၣ်ဒိးမၤအီၤဘၣ်အခါ
လၢပတၢ်အိၣ်မူ တကတီၢ်ဂ့ၤ တကတီၢ်ဂ့ၤအပူၤ ပမ့ၢ်ဆဲးမၤယဟိဝၤယွၤ အတၢ်မၤ လၢအဂ့ၤကတၢၢ်န့ၣ် ယဟိဝၤယွၤ ဘၣ်သူၣ်ဘၣ်သးဝဲ (ကွၢ်လံာ်အဆၢ ၄-၆) b
၄. ဘၣ်သ့ၣ်သ့ၣ် ပဝဲတနီၤန့ၣ် ပသးကဟးဂီၤ လၢတၢ်ဂ့ၢ်မနုၤအဃိလဲၣ်, ဟ့ၣ်တၢ်အဒိတက့ၢ်.
၄ ယဟိဝၤယွၤအခ့အပှၤအါဂၤန့ၣ် ခီဖျိလၢ အသးပှၢ်ထီၣ် ဒီးအတၢ်အိၣ်ဆူၣ်အိၣ်ချ့ တဂ့ၤဘၣ်အဃိ အမၤကစၢ်ယွၤအတၢ်မၤ ထဲသိးဒီး အအဲၣ်ဒိးမၤဝဲ တန့ၢ်ဘၣ်အဃိ အသးဟးဂီၤ. တၢ်ကဲထီၣ်အသးဒီး ဒီပုၢ်ဝဲၢ်မုၣ်ခရိဒ်န့ၣ်. လၢညါန့ၣ် အဝဲလဲၤမၤစၢၤတၢ်လၢ တၢ်လီၢ်လၢ ပှၤလိၣ်ဘၣ်တၢ်မၤစၢၤ. ဖဲန့ၣ်အဆၢကတီၢ် အပှၤမၤလိလံာ်စီဆှံဖိ အိၣ်ဝဲ ၃၅ ခါ ဒီးအမၤစၢၤဘၣ် ပှၤတနီၤလၢ ကဟ့ၣ်လုၢ်ထီၣ်အသး ဒီးဒိးဘျၢထံအဂီၢ်. ဒီပုၢ်ဝဲၢ်မုၣ်ခရိ မၤဝဲတၢ်စံၣ်တဲၤတဲလီၤတၢ်မၤ ကဲထီၣ်လိၣ်ထီၣ်ဂ့ၤမး. ဘၣ်ဆၣ် လၢခံန့ၣ် အအိၣ်တဆူၣ်ဘၣ်နးမးအဃိ ဘၣ်အိၣ်ဝဲလၢဟံၣ်. ဒီပုၢ်ဝဲၢ်မုၣ်ခရိ တဲဝဲလၢ “ခီဖျိလၢ ယတၢ်အိၣ်ဆူၣ်အိၣ်ချ့တဂ့ၤဘၣ် အဃိ တမ့ၢ်လၢ ယမၤတၢ်ကကဲထဲသိးဒီး ယအဲၣ်ဒိးမၤဘၣ်န့ၣ် ယသ့ၣ်ညါ. ဘၣ်ဆၣ် ယတူၢ်ဘၣ်လၢ ယမၤယဟိဝၤယွၤ အတၢ်မၤန့ၣ် တဂ့ၤထဲသိးဒီး ပှၤဂၤဘၣ်. ယမၤကစၢ်ယွၤ အတၢ်မၤ တန့ၢ်ဒ်သိး ယဘၣ်သးမၤအီၤအဃိ ယသးဟးဂီၤဒိၣ်မး.” ဒီပုၢ်ဝဲၢ်မုၣ်ခရိ အဲၣ်ဒိးမၤ ကစၢ်ယွၤအတၢ်မၤ လၢအဂ့ၤကတၢၢ်အဃိ လီၤပတြၢၤဒိၣ်မး. မ့ၢ်လၢ ဒီပုၢ်ဝဲၢ်မုၣ်ခရိ မၤဝဲလၢအဂ့ၤကတၢၢ် အဃိ ပနာ်သပှၢ်ကတၢၢ်လၢ ယဟိဝၤယွၤ ကဘၣ်သူၣ်ဘၣ်သးအီၤ.
၅. (က) ပမၤတၢ် မ့ၢ်တန့ၢ်ထဲသိးဒီး ပအဲၣ်ဒိးမၤအီၤဘၣ်န့ၣ် ပကြၢးသ့ၣ်နီၣ်ထီၣ် တၢ်မနုၤလဲၣ်. (ခ) ဒ်တၢ်ဂီၤ ပာ်ဖျါထီၣ်ဝဲအသိး ဒီပုၢ်ဝဲၢ်တဂၤ ဆဲးဟ့ၣ်ယဟိဝၤယွၤ တၢ်လၢအဂ့ၤကတၢၢ်ဒ်လဲၣ်.
၅ နမၤတၢ်တန့ၢ်ထဲသိးဒီး နအဲၣ်ဒိးမၤအီၤဘၣ်အဃိ တဘျီတခီၣ် နသးမ့ၢ်ဟးဂီၤန့ၣ် သံကွၢ်လီၤနသးလၢ ‘ယဟိဝၤယွၤ အဲၣ်ဒိးလၢ ယကမၤမနုၤလဲၣ်.’ ယဟိဝၤယွၤ အဲၣ်ဒိးလၢ နကမၤတၢ်လၢ နမၤအီၤသ့ခဲအံၤတဖၣ် လၢအဂ့ၤကတၢၢ်. ပကဆိကမိၣ်ကွၢ် တၢ်ဂ့ၢ်တခါ. ဒီပုၢ်ဝဲၢ်မုၣ်လၢ အနံၣ်အိၣ် ၈၀ တဂၤ အတူၢ်ဘၣ်ဝဲလၢ အပၣ်ဃုာ်လၢ တၢ်စံၣ်တဲၤတဲလီၤတၢ်မၤအပူၤ တန့ၢ်ထဲသိးဒီး လၢအနံၣ်အိၣ် ၄၀ အခါဘၣ်အဃိ အသးဟးဂီၤ. အဆိကမိၣ်ဝဲလၢ အမၤဝဲလၢအဂ့ၤကတၢၢ်ဘၣ်ဆၣ် ယဟိဝၤယွၤ တဘၣ်သူၣ်ဘၣ်သးဝဲဘၣ်. ဘၣ်ဆၣ် အတၢ်ဆိကမိၣ်န့ၣ် ဘၣ်ဧါ. ပကဆိကမိၣ်ကွၢ် ဖဲအနံၣ်အိၣ် ၄၀ အခါ အမၤဝဲလၢအဂ့ၤကတၢၢ် ဒီးတုၤလၢအနံၣ်အိၣ် ၈၀ န့ၣ်အမၤဝဲလၢ အဂ့ၤကတၢၢ်ဒံးအဃိ လီၤဂာ်ဒ် အမၤဝဲလၢ အဂ့ၤကတၢၢ်ထီဘိလီၤ. ပမ့ၢ်တူၢ်ဘၣ်လၢ ပတမၤကစၢ်ယွၤ အတၢ်မၤ လၢအဂ့ၤကတၢၢ်ဘၣ် ဒီးယဟိဝၤယွၤ တဘၣ်သးပှၤဘၣ်န့ၣ် ပကဘၣ်သ့ၣ်နီၣ်ထီၣ်လၢ တၢ်လၢအကမၤသးခု ယဟိဝၤယွၤ မ့ၢ်မနုၤလဲၣ်န့ၣ် ယဟိဝၤယွၤ ဆၢတဲာ်ဝဲလၢ အနီၢ်ကစၢ်လီၤ, ပဆၢတဲာ်န့ၢ်အီၤတသ့ဘၣ်. ပမ့ၢ်မၤ ယဟိဝၤယွၤ အတၢ်မၤလၢ အဂ့ၤကတၢၢ်န့ၣ် ကစၢ်ယွၤ ကတဲပှၤလၢ “နမၤတၢ်ဂ့ၤဒိၣ်မး.”—ထိၣ်သတြီၤဒီး မးသဲ ၂၅:၂၀-၂၃.
၆. ပမၤလိန့ၢ်တၢ်မနုၤလၢ ဒီပုၢ်ဝဲၢ်မုၣ် မရံယၤ အအိၣ်လဲၣ်.
၆ လၢပကသးစၢၢ်ဆၢ တၢ်လၢပမၤအီၤတသ့ဘၣ်အလီၢ် ပမ့ၢ်သးစၢၢ်ဆၢ တၢ်လၢပမၤအီၤသ့တဖၣ်န့ၣ် ပကအိၣ်ဒီးတၢ်သးခုအါထီၣ်. ပကဆိကမိၣ်ကွၢ် ဒီပုၢ်ဝဲၢ်မုၣ် မရံယၤအဂ့ၢ်. ခီဖျိလၢ အတၢ်အိၣ်ဆူၣ်အိၣ်ချ့ တဂ့ၤဘၣ်အဃိ အပၣ်ဃုာ်လၢ တၢ်စံၣ်တဲၤတဲလီၤ တၢ်မၤအပူၤ တန့ၢ်အါအါဘၣ်. အဃိ ခီၣ်ထံးခါန့ၣ် အသးဟးဂီၤ ဒီးအတူၢ်ဘၣ်ဝဲလၢ ပှၤသူအီၣ်အီၤတသ့ဘၣ်. ဘၣ်ဆၣ် အဝဲဆိကမိၣ်ထီၣ်ဝဲ ဒီပုၢ်ဝဲၢ်မုၣ်လၢ အဘၣ်အိၣ်လၢ လီၢ်မံခိၣ်တဂၤအဂ့ၢ် ဒီးပာ်လီၤအသးလၢ ကမၤစၢၤဝဲ ဒီပုၢ်ဝဲၢ်မုၣ်တဂၤန့ၣ်. မရံယၤ တဲဝဲလၢ “ယရဲၣ်ကျဲၤလၢ ယကစံၣ်တဲၤတဲလီၤတၢ်ဒီး ဒီပုၢ်ဝဲၢ်မုၣ်တဂၤန့ၣ်လၢ လီတဲစိ ဒီးကွဲးလံာ်ပရၢ. ဖဲပစံၣ်တဲၤတဲလီၤတၢ် ဒ်သိးသိးဝံၤ ဒီးယဟဲက့ၤလၢဟံၣ် တဘျီဂ့ၤတဘျီဂ့ၤန့ၣ် ယတူၢ်ဘၣ်လၢ ယမၤစၢၤဘၣ် ယဒီပုၢ်ဝဲၢ်မုၣ်အဃိ ယသးခု ဒီးယသးမုာ်ဒိၣ်မး.” ပဝဲသ့ၣ်တဖၣ်နာ်က့ ပမ့ၢ်တသးစၢၢ်ဆၢ တၢ်လၢပမၤအီၤတသ့ဘၣ် ဒီးပမ့ၢ်သးစၢၢ်ဆၢ တၢ်လၢပမၤအီၤ သ့တဖၣ်န့ၣ် ပကဒိးန့ၢ်ဘၣ် တၢ်သးခုအါထီၣ်ဝဲ. ဘၣ်ဆၣ် ပမၤကစၢ်ယွၤအတၢ်မၤ မ့ၢ်န့ၢ်အါအါ မ့တမ့ၢ် ပတၢ်သ့တၢ်ဘၣ် မ့ၢ်အိၣ်လီၤလီၤဆီဆီ တမံၤမံၤ လၢယဟိဝၤယွၤ အတၢ်မၤအပူၤဟီမီၤ, ပကဘၣ်မၤဒ်လဲၣ်.
“သူတၢ်ဟ့ၣ်” လၢအအိၣ်ဒီးနၤ
၇. တၢ်မၢဖိပ့းတရူး ဟ့ၣ်ကူၣ်ဝဲ ခရံာ်ဖိတဖၣ်ဒ်လဲၣ်.
၇ ဖဲတၢ်မၢဖိ ပ့းတရူး ကွဲးလံာ်အဆိကတၢၢ်တဘ့ၣ်အခါ အဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်တဖၣ်လၢ ကသူဝဲ တၢ်ဟ့ၣ်ဒီး တၢ်သ့တၢ်ဘၣ် တမံၤဂ့ၤတမံၤဂ့ၤ လၢအအိၣ်ဒီးအဝဲသ့ၣ် လၢကဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါတဖၣ်အဂီၢ်. စီၤပ့းတရူး ကွဲးဝဲလၢ “ပဝဲသ့ၣ်တဖၣ် ပဒိးန့ၢ်ဘၣ်တၢ်ဟ့ၣ် တဂၤတမံၤအဃိ ဒ်ပှၤပၢၤတၢ်ဖိလၢအဂ့ၤ လၢအဒိးန့ၢ်ဘၣ် ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ် . . . အသိး သူတၢ်ဟ့ၣ်အံၤ ဒ်သိးကမၤစၢၤလိာ်သး တဂၤဒီးတဂၤ အဂီၢ်တက့ၢ်.” (၁ ပ့းတရူး ၄:၁၀) တၢ်သ့တၢ်ဘၣ်လၢ အအိၣ်ဒီးပှၤန့ၣ် ပကဘၣ်သူအီၤလၢအဂ့ၤကတၢၢ် ဒီးပတလိၣ်ဘၣ်ယိၣ်လၢ ပှၤဂၤကသးက့ၣ်ပှၤ မ့တမ့ၢ် ကသးဟးဂီၤ လၢပဃိန့ၣ်ဘၣ်. ခီဖျိ ပဘၣ်ယိၣ်လၢ ပှၤဂၤကထံၣ်ပှၤ ဒ်လဲၣ်ဒ်လဲၣ်အဃိ ပမ့ၢ်တမၤ ယဟိဝၤယွၤအတၢ်မၤ လၢအဂ့ၤကတၢၢ်ဘၣ်န့ၣ် လီၤဂာ်ဒ် ပတဟ့ၣ်အီၤ တၢ်လၢအဂ့ၤကတၢၢ်ဘၣ်လီၤ.
၈. ဒ် ၁ ကရံၣ်သူး ၄:၆, ၇ ပာ်ဖျါထီၣ်ဝဲအသိး ဘၣ်မနုၤအဃိ ပတကြၢး ပာ်ကဖၢလၢပသးလၢ တၢ်သ့တၢ်ဘၣ်လၢ အအိၣ်ဒီးပှၤ အဃိဘၣ်လဲၣ်.
၈ ပကဘၣ်သူ ပတၢ်သ့တၢ်ဘၣ် လၢအဂ့ၤကတၢၢ် ဘၣ်ဆၣ် ပကဘၣ်ပလီၢ်ပသး ဒ်သိး ပသုတပာ်ကဖၢလၢသး တဂ့ၤအဂီၢ်လီၤ. (ဖး ၁ ကရံၣ်သူး ၄:၆, ၇.) အဒိ, ဘၣ်သ့ၣ်သ့ၣ် နစးထီၣ် တၢ်မၤလိလံာ်စီဆှံ ကသ့ဂ့ၤဂ့ၤလီၤ. နတၢ်သ့တၢ်ဘၣ်တခါအံၤန့ၣ် ဆဲးသူအီၤလၢအဂ့ၤကတၢၢ်. ဘၣ်ဆၣ် နကဘၣ်ပလီၢ်နသးဒ်သိး နတပာ်ကဖၢလၢဘၣ်နသးလၢ နတၢ်သ့တၢ်ဘၣ်တခါအံၤ တဂ့ၤအဂီၢ်. အဒိ, တယံာ်ဒံးဘၣ်န့ၣ် နပၣ်ဃုာ်လၢ တၢ်စံၣ်တဲၤတဲလီၤတၢ်မၤအပူၤ ဒီးနစးထီၣ် တၢ်မၤလိလံာ်စီဆှံအသီတခါ အဃိ နကအဲၣ်ဒိးတဲဘၣ် ပှၤလၢအအိၣ်လၢ နတၢ်စံၣ်တဲၤတဲလီၤတၢ် ကရူၢ်အပူၤ. ဒီးဖဲနလဲၤထံၣ်ဖှိၣ်လိာ်သးဒီး ဒီပုၢ်ဝဲၢ်မုၣ်ခွါလၢ တၢ်စံၣ်တဲၤတဲလီၤတၢ်ကရူၢ်အခါ ဒီပုၢ်ဝဲၢ်မုၣ်တဂၤ ဟ့ၣ်လီၤဝဲ မဲးကစံတဘ့ၣ်. ဒီပုၢ်ဝဲၢ်မုၣ်တဂၤအံၤ တဲဝဲလၢ အဟ့ၣ်လီၤမဲးကစံတဘ့ၣ်, မ့မ့ၢ်နၤန့ၣ် နစးထီၣ် တၢ်မၤလိလံာ်စီဆှံတခါလံ. အဃိ ဖဲန့ၣ်အဆၢကတီၢ် နကမၤဒ်လဲၣ်. နမ့ၢ်တဲဖျါထီၣ် နတၢ်လဲၤခီဖျိန့ၣ် နသ့ၣ်ညါလၢ ဒီပုၢ်ဝဲၢ်မုၣ်ခွါလၢ ကရူၢ်ပူၤတဖၣ် ကဒိးန့ၢ်ဘၣ် တၢ်ဂံၢ်တၢ်ဘါ. ဘၣ်ဆၣ် နတအဲၣ်ဒိးလၢ ဒီပုၢ်ဝဲၢ်မုၣ်တဂၤန့ၣ် အသးကဘၣ်ဒိဘၣ်အဃိ ဘၣ်သ့ၣ်သ့ၣ် နကအိၣ်ခိးလၢ နကတဲဖျါထီၣ် နတၢ်လဲၤခီဖျိလၢ တၢ်ဆၢကတီၢ် အဂၤတဘျီ. နမ့ၢ်မၤဒ်န့ၣ်န့ၣ် လီၤဂာ်ဒ် နပာ်ဖျါထီၣ် တၢ်သူၣ်ဂ့ၤသးဝါလၢ ပှၤဂၤအဖီခိၣ်. ဘၣ်ဆၣ်နတလိၣ် သးဘၣ်တံာ်တာ်လၢ နကဆဲး စးထီၣ်တၢ်မၤလိလံာ်စီဆှံဒီးပှၤဂၤ အဂီၢ်ဘၣ်. တၢ်သ့တၢ်ဘၣ်လၢ အအိၣ်ဒီးနၤအံၤန့ၣ် ဆဲးသူအီၤလၢ အဂ့ၤကတၢၢ်.
၉. ပကြၢးသူ ပတၢ်သ့တၢ်ဘၣ်ဒ်လဲၣ်.
၉ ပကဘၣ်နီၣ်ဘၣ်က့ၤလၢ ပတၢ်သ့တၢ်ဘၣ် လၢအအိၣ်ဒီးပှၤ လၢပအိၣ်ဖျဲၣ်ထီၣ်လံၤလံၤန့ၣ် မ့ၢ်ဝဲတၢ်ဟ့ၣ်လၢ အဟဲလၢ ကစၢ်ယွၤအအိၣ်. ဒီးပကြၢးသူ တၢ်သ့တၢ်ဘၣ်တဖၣ်အံၤလၢ ပကဟ့ၣ်ဂံၢ်ဟ့ၣ်ဘါ ပှၤလၢတၢ်အိၣ်ဖှိၣ်အပူၤ ဒီးတမ့ၢ်လၢ ပှၤကထံၣ်ဒိၣ်ပှၤအဂီၢ်ဘၣ်. (ဖံလံးပံၤ ၂:၃) ပမ့ၢ်သူပတၢ်ဂံၢ်တၢ်ဘါဒီး ပတၢ်သ့တၢ်ဘၣ်လၢ ကစၢ်ယွၤအဂီၢ်န့ၣ် ကကဲထီၣ်တၢ်စံးထီၣ်ပတြၢၤ ယဟိဝၤယွၤအဃိ ပကဒိးန့ၢ်ဘၣ်တၢ်သးခု. ဘၣ်ဆၣ် ပမ့ၢ်ဂုာ်ကျဲးစၢး ဒ်သိး ပမၤကစၢ်ယွၤအတၢ်မၤ ကန့ၢ်အါန့ၢ်ဒံးပှၤဂၤ မ့တမ့ၢ် ပကဂ့ၤဒိၣ်န့ၢ်ဒံးပှၤဂၤန့ၣ် တမ့ၢ်လၢ ပကဒိးန့ၢ်ဘၣ် တၢ်သးခုဘၣ်.
၁၀. ဘၣ်မနုၤအဃိ ပတဘၣ်ထိၣ်သတြီၤပသးဒီး ပှၤဂၤဘၣ်လဲၣ်.
၁၀ ပမ့ၢ်တပလီၢ်ပသးဘၣ်န့ၣ် ပကထိၣ်သတြီၤဘၣ် ပတၢ်သ့တၢ်ဘၣ်ဒီး ပှၤဂၤအတၢ်ဂံၢ်စၢ်ဘါစၢ်. အဒိ, ဒီပုၢ်ဝဲၢ်ခွါတဂၤ အအိၣ်ဒီးတၢ်သ့တၢ်ဘၣ်လၢ အဟ့ၣ်လီၤ ကမျၢၢ်တၢ်စံၣ်တဲၤတဲလီၤတၢ် သ့ဒိၣ်မး. အဃိ ဘၣ်သ့ၣ်သ့ၣ် အကဆိကမိၣ်ဆံးဘၣ်ဝဲ ဒီပုၢ်ဝဲၢ်ခွါတဂၤလၢ အဟ့ၣ်လီၤကမျၢၢ် တၢ်စံၣ်တဲၤတဲလီၤ တသ့ဂ့ၤဂ့ၤဘၣ် တဂၤန့ၣ်သ့. ဘၣ်ဆၣ် ဒီပုၢ်ဝဲၢ်ခွါလၢ အစံၣ်တဲၤတဲလီၤတၢ် တသ့ဂ့ၤဂ့ၤဘၣ်တဂၤအံၤ ဘၣ်သ့ၣ်သ့ၣ် အတူၢ်လိာ်တမှံၤသ့, ဒီးအသိၣ်လိသီလိအဖိသ့မး မ့တမ့ၢ် အသးဆူၣ်လၢ တၢ်စံၣ်တဲၤတဲလီၤတၢ်မၤအပူၤ. ပအိၣ်ဒီး ဒီပုၢ်ဝဲၢ်မုၣ်ခွါအါမးလၢ အအိၣ်ဒီး တၢ်သ့တၢ်ဘၣ်တဖၣ်လၢ ကမၤယဟိဝၤယွၤ အတၢ်မၤ ဒီးကမၤစၢၤပှၤဂၤအဃိ အလီၤပတြၢၤဒိၣ်မး.
မၤလိန့ၢ်တၢ်လၢ ပှၤဂၤအအိၣ်
၁၁. ဘၣ်မနုၤအဃိ ပကဘၣ်ဂုာ်ကျဲးစၢး ကွၢ်လိမၤဒိး ယ့ၣ်ၡူးလဲၣ်.
၁၁ ပတဘၣ် ထိၣ်သတြီၤပသးဒီးပှၤဂၤဘၣ်. ဘၣ်ဆၣ် ပမၤလိန့ၢ်တၢ်လၢ ပဒီပုၢ်ဝဲၢ်မုၣ်ခွါတဖၣ် အအိၣ်သ့. အဒိ, ပကဆိကမိၣ်ကွၢ် ဘၣ်ဃး ယ့ၣ်ၡူးအဂ့ၢ်. ပတကဲ ပှၤလၢပှၤပှဲၤ ဒ်သိးဒီး ယ့ၣ်ၡူးဘၣ် ဘၣ်ဆၣ် ပမၤလိန့ၢ်တၢ်လၢ ယ့ၣ်ၡူးအတၢ်ဂ့ၤတၢ်ဝါဒီး တၢ်လၢအမၤဝဲတဖၣ် အအိၣ်သ့အါမး. (၁ ပ့းတရူး ၂:၂၁) တသ့ဖဲအသ့ ပမ့ၢ်ကွၢ်လိမၤဒိးယ့ၣ်ၡူး အဒိအတဲာ် ဘူးဘူးတံၢ်တံၢ်န့ၣ် ပကကဲထီၣ် ယဟိဝၤယွၤ အခ့အပှၤလၢ အဂ့ၤထီၣ် ဒီးပကလဲၤထီၣ်လဲၤထီလၢ တၢ်စံၣ်တဲၤတဲလီၤ တၢ်မၤအပူၤလီၤ.
၁၂-၁၃ ပမၤလိန့ၢ်ဘၣ် တၢ်မနုၤလၢ စီၤပၤဒၤဝံးအအိၣ်လဲၣ်.
၁၂ လံာ်စီဆှံပာ်ဖျါထီၣ်ဝဲ ပိာ်မုၣ်ဒီးပိာ်ခွါလၢညါ လၢအတလၢတပှဲၤဘၣ်တဖၣ် လၢအလီၤကွၢ်လိန့ၣ် အိၣ်ဝဲအါမး. (ဧ့ၤဘြံၤ ၆:၁၂) ပကဆိကမိၣ်ကွၢ် စီၤဒၤဝံးအဂ့ၢ်. ယဟိဝၤယွၤ တဲဝဲလၢ စီၤဒၤဝံး “မ့ၢ်ပှၤလၢ အဘၣ်ယသး.” (မၤတၢ် ၁၃:၂၂) စီၤဒၤဝံးန့ၣ် အမ့ၢ်ပှၤတလၢတပှဲၤအဃိ အဝဲမၤဘၣ် တၢ်ကမၣ်ဖးဒိၣ် ဘၣ်ဆၣ် အမ့ၢ်ပှၤဒိဂ့ၤတဲာ်ဘၣ်လၢ ပဂီၢ်. ဘၣ်မနုၤအဃိလဲၣ်န့ၣ် ဖဲအဝဲဘၣ်တၢ်ဘှီဘၣ်ထီၣ်က့ၤအီၤအခါ အတတဲပူၤဖျဲးအသးဘၣ်. အဝဲဘၣ်တၢ်သိၣ်ဃီၣ်အီၤဆူၣ်ဆူၣ် ဘၣ်ဆၣ် အတူၢ်လိာ် တၢ်သိၣ်ဃီၣ် ဒီးအပီၢ်ယၢ်လီၤအသးနီၢ်ကီၢ်. အဃိ ယဟိဝၤယွၤ ပျၢ်ကွံာ်အတၢ်ကမၣ်.—စံးထီၣ်ပတြၢၤ ၅၁:၃, ၄, ၁၀-၁၂.
၁၃ ပမၤလိန့ၢ်တၢ်လၢ စီၤဒၤဝံးအအိၣ်သ့ခီဖျိ ပသံကွၢ်လီၤပသးလၢ ‘ဖဲပှၤဟ့ၣ်ကူၣ်ယၤအခါ ယမၤဆၢက့ၤဒ်လဲၣ်. မ့ၢ်ယအၢၣ်လီၤယတၢ်ကမၣ် မ့တမ့ၢ် တဲပူၤဖျဲး ယသးဧါ. မ့တမ့ၢ် ယပာ်တၢ်ကမၣ်လၢ ပှၤဂၤအလိၤဧါ. မ့ၢ်ယဂုာ်ကျဲးစၢးဒ်သိး ယတမၤကမၣ်ကဒါက့ၤတၢ် ဒ်အလီၢ်လီၢ်အသိးဧါ.’ ဖဲနဖးပှၤဂၤအဂ့ၢ် လၢအအိၣ်ဒီးတၢ်သးတီ လၢလံာ်စီဆှံပူၤအခါစ့ၢ်ကီး နသံကွၢ်လီၤနသး တၢ်သံကွၢ်ဒ်န့ၣ်တဖၣ်သ့. မ့ၢ်အဝဲသ့ၣ် ထံၣ်ဘၣ်ဒီး တၢ်ကီတၢ်ခဲ လၢနထံၣ်ဘၣ်အီၤတဖၣ်ဧါ, ဒီးအဝဲသ့ၣ်ပာ်ဖျါထီၣ်ဝဲ တၢ်ဂ့ၤတၢ်ဝါဒ်လဲၣ်. ဒီးနသံကွၢ်လီၤနသးလၢ ‘မ့ၢ်ယဂုာ်ကျဲးစၢးအါထီၣ်လၢ ယကလီၤဂာ်ထီၣ်ဒီး ယဟိဝၤယွၤအခ့အပှၤ လၢအအိၣ်ဒီး တၢ်သးတီတဖၣ်ကသ့ဒ်လဲၣ်.’
၁၄. ပမ့ၢ်ဆိကမိၣ်ထံ ပဒီပုၢ်ဝဲၢ်မုၣ်ခွါတဖၣ် အဒိအတဲာ်န့ၣ် ပကဒိးန့ၢ်ဘၣ်အဘျုးဒ်လဲၣ်.
၁၄ ပမ့ၢ်ဆိကမိၣ်ကွၢ် ပဒီပုၢ်ဝဲၢ်မုၣ်ခွါလၢ အသးပှၢ်မ့ၢ်ဂ့ၤ, အသးစၢ်မ့ၢ်ဂ့ၤ အဒိအတဲာ်န့ၣ် မၤစၢၤပှၤသ့. အဒိ, ဆိကမိၣ်ကွၢ် ပဒီပုၢ်ဝဲၢ်မုၣ်ခွါလၢ အအိၣ်ဒီးတၢ်သးတီလၢ အထံၣ်ဘၣ်တၢ်မၤကွၢ် ဒ်သိးဒီး တံၤသကိးတဖၣ် အတၢ်ဆီၣ်သနံး, ဟံၣ်ဖိဃီဖိ အတၢ်ထီဒုၣ်ထီဒါ ဒီးတၢ်အိၣ်ဆူၣ်အိၣ်ချ့တဂ့ၤဘၣ်တဖၣ်သ့. ဖဲနဆိကမိၣ် ဒ်န့ၣ်အခါ မ့ၢ်နထံၣ်အဝဲသ့ၣ် အတၢ်ဂ့ၤတၢ်ဝါလၢ နအဲၣ်ဒိးကွၢ်လိမၤဒိးအီၤတဖၣ်ဧါ. နမ့ၢ်ဆိကမိၣ်ထံ အဝဲသ့ၣ် အဒိဂ့ၤတဲာ်ဘၣ်န့ၣ် နကဘၣ်လဲၤခီဖျိ တၢ်မၤကွၢ်လၢ နထံၣ်ဘၣ်အီၤတဖၣ် ဒ်လဲၣ်န့ၣ် နကသ့ၣ်ညါထီၣ်. မ့ၢ်လၢ ပအိၣ်ဒီး ဒီပုၢ်ဝဲၢ်မုၣ်ခွါလၢ အလီၤကွၢ်လိတဖၣ်အဃိ ပသးခုဒိၣ်မး.—ဧ့ၤဘြံၤ ၁၃:၇; ယၤကိာ် ၁:၂, ၃.
အိၣ်ဒီးတၢ်သးခု လၢယဟိဝၤယွၤ အတၢ်မၤပူၤ
၁၅. ဒ်သိး ပကဆဲးအိၣ်ဒီး တၢ်သးခုလၢ ယဟိဝၤယွၤ အတၢ်မၤပူၤအဂီၢ် စီၤပီလူး ဟ့ၣ်ကူၣ်ပှၤဒ်လဲၣ်.
၁၅ ဒ်သိးတၢ်ဃူတၢ်ဖိး ဒီးတၢ်မုာ်တၢ်ခုၣ် ကအိၣ်လၢ တၢ်အိၣ်ဖှိၣ်အပူၤအဂီၢ် ပဝဲတဂၤဘၣ်တဂၤ တၢ်သ့တၢ်ဘၣ်လၢ အအိၣ်ဒီးပှၤန့ၣ် ပကဘၣ်သူအီၤလၢ အဂ့ၤကတၢၢ်. ပကကွၢ်သကိး ခရံာ်ဖိလၢ တၢ်မၢဖိတဖၣ်အစိၤ အဒိအတဲာ်. အဝဲသ့ၣ် အိၣ်ဒီးတၢ်ဟ့ၣ် ဒီးမူဒါ အကလုာ်ကလုာ်. (၁ ကရံၣ်သူး ၁၂:၄, ၇-၁၁) ဘၣ်ဆၣ် တၢ်သ့ၣ်တဖၣ်အံၤန့ၣ် တဒုးအိၣ်ထီၣ်ဝဲ တၢ်ပြၢလိာ်သးဒီး တၢ်လီၤမုၢ်လီၤဖးဘၣ်. စီၤပီလူးဟ့ၣ်ဂံၢ်ဟ့ၣ်ဘါ ပှၤကိးဂၤဒဲးလၢ “ကမၤဆူၣ်ထီၣ် ခရံာ်အနီၢ်ခိအဂီၢ်.” စီၤပီလူးကွဲးန့ၢ် ပှၤအ့းဖ့းစူးဖိလၢ “ဖဲက့ၢ်ဂီၤတခါစုာ်စုာ် မၤတၢ်ဂ့ၤဂ့ၤအခါ အကဲထီၣ်တၢ်မၤစၢၤ ဒ်သိးနီၢ်ခိအံၤ ကဒိၣ်ထီၣ်ထီထီၣ်ဝဲအဂီၢ် ဒီးအကမၤဒိၣ်ထီၣ် အနီၢ်ကစၢ်လၢ တၢ်အဲၣ်တၢ်ကွံအပူၤလီၤ.” (အ့းဖ့းစူး ၄:၁-၃, ၁၁, ၁၂, ၁၆) ဆၢကတီၢ်ခဲအံၤ ပှၤလၢအမၤထွဲ ဒ်စီၤပီလူးအတၢ်ဟ့ၣ်ကူၣ် တခါအံၤန့ၣ် အဒုးအိၣ်ထီၣ်ဝဲဒၣ် တၢ်မုာ်တၢ်ခုၣ် ဒီးတၢ်ဃူတၢ်ဖိးလၢ တၢ်အိၣ်ဖှိၣ်အပူၤလီၤ.
၁၆. ပပာ်လီၤသးလၢ ပကမၤတၢ်မနုၤလဲၣ်. (ဧ့ၤဘြံၤ ၆:၁၀)
၁၆ ပာ်လီၤနသးလၢ နတထိၣ်သတြီၤနသးဒီးပှၤဂၤဘၣ်. လၢတၢ်န့ၣ်အလီၢ် မၤလိန့ၢ်တၢ်လၢ ယ့ၣ်ၡူးအအိၣ်ဒီး ဂုာ်ကျဲးစၢး ကွၢ်လိမၤဒိး အတၢ်ဂ့ၤတၢ်ဝါတဖၣ်တက့ၢ်. ဟံးန့ၢ်တၢ်မၤလိလၢ ပှၤဒိဂ့ၤတဲာ်ဘၣ်လၢ လံာ်စီဆှံပူၤ ဒီးပှၤလၢပစိၤခဲအံၤတဖၣ်အအိၣ်. ဆဲးဟ့ၣ်ယဟိဝၤယွၤ တၢ်လၢအဂ့ၤကတၢၢ် ဒီးနာ်လၢ ယဟိဝၤယွၤ “တမ့ၢ်ပှၤလၢ အတတီတလိၤဘၣ်. လၢတၢ်န့ၣ်အဃိ အဝဲတသးပ့ၤနီၣ် သုတၢ်မၤ” ဘၣ်. (ဖး ဧ့ၤဘြံၤ ၆:၁၀.) ဆဲးမၤယဟိဝၤယွၤအတၢ်မၤ လၢတၢ်သးခုအပူၤ ဒီးသ့ၣ်နီၣ်ထီၣ်လၢ သုဂုာ်ကျဲးစၢး မၤအတၢ်ဘၣ်သးလၢ သုသးဒီဖျၢၣ်န့ၣ် အဝဲပာ်လုၢ်ပာ်ပှ့ၤဝဲ သပှၢ်ကတၢၢ်လီၤ.
တၢ်သးဝံၣ် ၆၅ လဲၤဆူညါ
a လၢယဟိဝၤယွၤ အတၢ်မၤပူၤန့ၣ် ပဟံးန့ၢ်တၢ်မၤလိလၢ ပှၤဂၤအအိၣ်သ့. ဘၣ်ဆၣ် ပတဘၣ် ထိၣ်သတြီၤပသးဒီးပှၤဂၤဘၣ်. တၢ်မၤလိတခါအံၤ ကမၤစၢၤပှၤဒ်သိး ပကဆဲးအိၣ်ဒီးတၢ်သးခု ဒီးကမၤစၢၤပှၤဒ်သိး ပသုတပာ်ထီၣ်ထီပသး မ့တမ့ၢ် သးဟးဂီၤခီဖျိ ပထိၣ်သတြီၤပသးဒီးပှၤဂၤအဃိ တဂ့ၤအဂီၢ်.
b တၢ်တဲဖျါထီၣ်တၢ်ဂီၤ အခီပညီ– ဒီပုၢ်ဝဲၢ်ခွါတဂၤအံၤန့ၣ် ဖဲအသးစၢ်အခါ အမၤတၢ်လၢ ဘ့ၤသ့လး. လၢခံအဝဲ ဆီဟံၣ်ဆီဃီ ဒီးမၤပှၤလဲၤလၢညါဒီးအမါ. ဖဲအဖိအိၣ်အခါ အသိၣ်လိအဖိလၢ တၢ်စံၣ်တဲၤတဲလီၤတၢ်မၤအပူၤ. ဒီးဖဲအသးပှၢ်ထီၣ်အခါ အဝဲဆဲးမၤဝဲလၢ အဂ့ၤကတၢၢ်ဒံး အစံၣ်တဲၤတဲလီၤတၢ် ခီဖျိကွဲးလံာ်ပရၢ.
