1. Nki kikututwasilanga e kiese?

 YAVE ozolele vo twakala ye kiese. Tuzeye wo kadi e kiese i kimosi muna fu ya mbongo a mwand’avelela a Nzambi. (Ngal. 5:22) Wau vo o vana kusundidi e kiese ke mu tambula ko, kiese kiayingi tumonanga vava tukukivananga emvimba muna salu kia Yave yo sadisa mpangi zeto mu mpila zayingi.—Mav. 20:35.

2-3. (a) Landila e sono kia Ngalatia 6:4, nkia mambu mole malenda kutusadisa mu kwamanana kala ye kiese muna salu kia Yave? (b) Nkia mambu tulongoka mu longi diadi?

² Nze una wasonama muna Ngalatia 6:4, Paulu wa ntumwa mambu mole kayika malenda kutusadisa mu kwamanana kala ye kiese. (Tanga.) Diambu diantete, tufwete kala ye kani dia vanga mawonso tulenda muna salu kia Yave. Avo tuvanganga mawonso tulenda muna salu kia Yave, tukala ye kiese. (Mat. 22:36-38) Diambu diazole, tufwete venganga e fu kia kuyitezanesa ye akaka. Kiakala nkia mambu tulendanga ovanga mu kuma kia vimpi weto, ngangu yovo ndekwa za vangila o mambu, tufwete vutulanga matondo kwa Yave. Kadi yawonso tuna yau kwa Yave yatuka. Kuna diak’e sambu, avo akaka bena ye ndekwa muna salu kia umbangi zina yeto ke tuna zau ko, tufwete mona e kiese kadi oyau besadilanga ngangu zau muna yangidika Yave, ke mu sia e zolela yau va fulu kiantete ko. Muna kuma kiaki, vana fulu kia kuyitezanesa yo yau, tufwete tanginina mbandu au.

³ Mu longi diadi, tulongoka una tulenda sundila e ngindu zalembi songa avo ke tulendanga diaka vanga mayingi ko muna salu kia Yave nze una tuzolele. Tulongoka mpe una tulenda sadila konso ndekwa tuna zau ye una mbandu ya akaka ilenda kutusadisila.

4. Nkia mambu mefilanga akaka mu kendalala? Yika e nona.

⁴ Mu kuma kia kinunu yovo kimbevo, mpangi zankaka ke belendanga diaka vanga mayingi ko muna salu kia Yave nze una bazolele. Ediadi dikubakendelekanga. I diau diabwila mpangi ankento una ye nkumbu Carol. Wakala ye lau dia kwenda sadila kuna kuvuidi ateleki ayingi o mfunu. Muna kolo kiokio, wakala ye 35 ma alongoki a Bibila yo sadisa ayingi muna yau mu yekola e zingu kiau kwa Yave yo vubwa. Mpangi Carol nluta miayingi kavuanga muna salu kia umbangi. Kuna kwalanda, wabakama kimbevo ye kalendanga diaka vaika mu nzo ko mu kolo kiandá. Mpangi Carol wavova vo: “Nzeye wo vo mu kuma kia kimbevo kiame, kilendi vanga ko mana akaka balenda vanga, kansi imonanga vo kina ye lukwikilu ko nze yau. Kilendanga diaka vanga mayingi ko nze una nzolele, ediadi dikunkendelekanga.” Mpangi Carol ovanganga mawonso kalenda muna salu kia Yave. Kieleka, ediadi dialusanisinu kikilu! Tuna ye ziku vo Nzambi eto ankenda oyangalelanga e ngolo mpangi Carol kevanganga.

5. (a) Adieyi tufwete sungamenanga vava tukendalalanga mu kuma kia mana ke tulendi vanga ko? (b) Nze una tumwene muna foto, aweyi mpangi ayakala kekwamanenanga vangila mana kalenda muna salu kia Yave?

⁵ Ezak’e ntangwa, avo okendalalanga mu kuma kia mana kulendi vanga ko, ukiyuvula: ‘Adieyi Yave kevingilanga kwa mono?’ Yave ozolele vo wavanga mana olenda mun’owu wa tezo kiaku. Badika e nona eki: mpangi ankento una ye kimbuta kia mvu 80 okendalalanga kadi ke lendanga diaka vanga mayingi ko muna salu kia umbangi nze una kavanganga vava kakala ye kimbuta kia mvu 40. Oyindulanga vo kana una vo ovanganga mana kalenda, ke yangidikanga Yave ko. Kansi nga ediadi dialudi? Yindula e diambu edi: Avo mpangi ndioyo wavanganga mana kalenda vava kakala ye kimbuta kia mvu 40 ye ovanganga mana kalenda kana una vo kimbuta kia mvu 80 se kena kiau, tulenda vova vo o mpangi ndioyo kayambula vanga ko mana kalenda muna salu kia Yave. Avo tuyatikidi mona vo mana tuvanganga ke mafwana ko muna yangidika Yave, tufwete sungamena vo Yave, yandi osikidisanga mana mekunyangidika. Avo tuvangidi mana tulenda, Yave otoma yangalala yo kutuvovesa vo: “Otomene sala!”—Tezanesa ye Matai 25:20-23.

6. Nkia diambu tulenda longoka muna mbandu a mpangi Maria?

⁶ Dilenda kala diasazu mu kala ye kiese avo tusidi e sungididi muna mana tulenda vanga vana fulu kia sia e sungididi muna mana ke tulendi vanga ko. Tala e nona kia mpangi ankento Maria, ona onuananga ye kimbevo kikumfilanga mu lembi vanga mayingi muna salu kia umbangi. Kuna lubantiku, watoma kendalalanga yo kuyibadikila vo kena mfunu ko. I bosi, mpangi Maria wasungamena mpangi mosi muna nkutakani ona kakatukanga va mfulu ko mu kuma kia kimbevo yo yantika kunsadisa. Mpangi Maria wavova vo: “Yavanga e nkubika za yantika sala yandi kumosi muna salu kia umbangi muna sadila telefone yo soneka nkanda. Konso ntangwa yavutukanga ku nzo, kiese ye luyangalalu yamonanga kadi ndendele sadisa mpangi ame.” Yeto mpe tulenda wokesa kiese kieto muna sianga e sungididi muna mana tulenda vanga kansi ke mu mana ke tulendi vanga ko. Kansi, adieyi tuvova avo tulenda vanga mayingi mu sungula avo tuna ye umbangu una ulenda toma sadilwa muna salu kia Yave?

7. Nkia longi diamfunu Petelo wa ntumwa kavana kwa Akristu?

⁷ Muna nkand’andi antete, Petelo wa ntumwa wavovesa mpangi zandi vo basadila konso lukau  bakala lwau yovo umbangu muna kasakesa muntu yo nkwandi. Petelo wasoneka vo: “Konso muntu vovo nuina muna tezo kina katambulwila o lukau, yambula kasadila lo muna wete dia muntu yo nkwandi nze selo yambote ya nsambu za Nzambi.” (1 Pet. 4:10) Tufwete vanganga mawonso tulenda muna sadila lukau tuna lwau yo lembi mona wonga vo akaka balenda kutumwena kimpala yovo kendalala. Avo ke tusadidi lukau tuna lwau ko mu kuma kia wonga wa akaka, ke tuvanga mawonso ko tulenda muna salu kia kwa Yave.

8. Landila e sono kia 1 Korinto 4:6, 7, ekuma tufwete vengela e fu kia kuyisana mu kuma kia lukau tuna lwau?

⁸ Dialudi vo tufwete sadilanga lukau tuna lwau mu mpila yambote, kansi tufwete kebanga kimana twalembi kuyisana. (Tanga 1 Korinto 4:6, 7.) Kasikil’owu, dilenda kala vo ovuidi ndekwa za lenda nlongoki a Bibila mu sazu. Kufwete mona wonga ko muna sadila e ndekwa zazi. Eyayi i mpila yambote olenda sadila lukau lwalu, kansi ke difwete kufila ko mu kuyisana. Wau, yindula vo ekolo okele muna salu kia umbangi, oyantikidi longoka Bibila yo muntu ye ozolele mokenena e diambu diadi muna buka kieno kia salu kia umbangi. Vava olwaka muna buka, omwene vo mpangi ankaka ankento ye kiese kiawonso ovovele vo olendele kaya nkanda mosi ekolo kakele muna salu kia umbangi. Oyandi okayidi e nkanda, ongeye olendele nlongoki a Bibila. Adieyi ovanga? Ozeye wo vo avo ovovele e diambu diadi dikasakesa ampangi muna buka kieno. Kansi, vana fulu kiavova muna ola yayina, ovingidi lumbu kiankaka kimana walembi kendeleka o mpangi ona ovovele vo nkanda kaka kakayidi. Diambu diambote kikilu ovangidi. Kansi, ediadi ke difwete kukakidila ko mu vava diaka alongoki ampa. Kadi lwalu i lukau una lwau, ofwete lo sadila.

9. Ekuma tufwete sadilanga lukau tuna lwau?

⁹ Tufwete sungamenanga vo konso ngangu tuvuidi za vangila o mambu, i lukau twavewa kwa Nzambi. Tufwete sadilanga lukau lwalu yovo ngangu ye kani dia kasakesanga ampangi muna nkutakani, kansi ke mu kuyitundidika ko. (Fili. 2:3) Vava tusadilanga o nkuma ye ngangu zeto muna vanga luzolo lwa Nzambi, tukala ye kuma kia yangalala, ke mu vava sunda akaka ko kansi mu kuma kia sia vo Yave tuzolele kembelela muna sadila lukau katuvana.

10. Ekuma ke tufwete kuyitezanesanga ko ye akaka?

¹⁰ Avo ke tuyikebele ko, tulenda bwa muna ntambu wa yantika tezanesa mana tulendanga vanga ye mana akaka ke belendanga vanga ko. Kasikil’owu, dilenda kala vo mpangi mosi mpovi ambote kadi ozeye toma fila e longi dia  nkangu. Kansi muna ntim’andi olenda yantika veza mpangi ankaka yovo kuyibadikila vo osundidi mpangi ndioyo una vo ke mpovi ambote ko. Kansi, nanga e mpangi ndioyo nzodi a nzenza, otoma longanga wan’andi yovo nkwa vema muna salu kia umbangi. Ekwe kiese tuna kiau wau tuvuidi mpangi zayingi ana besadilanga e ngangu yovo lukau lwau muna sadila Yave yo sadisa akaka!

11. Ekuma tufwete tangininanga mbandu a Yesu?

¹¹ Kana una vo ke tufwete kuyitezanesanga ko ye akaka, tulenda longoka mayingi muna mbandu ya selo yakwikizi ya Yave. Muna bong’e nona, yambula twabadika mbandu a Yesu. Dialudi vo nze Yesu, ke tu wantu alunga ko, kansi tulenda longoka mayingi muna fu ye mambu mambote kavanga. (1 Pet. 2:21) Avo tuvangidi mawonso tulenda muna kuntanginina una ufwene, tukituka selo yambote ya Yave yo kituka alongi ambote muna salu kia umbangi.

12-13. Nkia diambu tulenda longoka muna mbandu a Davidi wa Ntinu?

¹² Muna Bibila, muvuidi nona yayingi ya selo ya Yave, akala ye akento ana tulenda tanginina kana una vo wantu alembi lunga bakala. (Ayib. 6:12) Kasikil’owu, yindula Davidi wa Ntinu ona Yave kayikila vo, “oyangidikidi ntim’ame.” E nsekola yankaka ivovanga vo, “i mpil’a muntu otomene kungiangidika.” (Mav. 13:22) Dialudi vo, Davidi kakala muntu alunga ko. I kuma kavangila vilwa wayingi. Kana una vo i wau, Davidi una se mbandu ambote ina tulenda tanginina. Ekuma? Kadi vava katumbwa mu kuma kia sumu kavola, Davidi kavava vakuba ko. Kansi, watambulwila e tumbu yo kendalala kikilu mu kuma kia dina kavanga. Muna kuma kiaki, Yave wanloloka.—Nku. 51:3, 4, 10-12.

¹³ Mayingi tulenda longoka muna mbandu a Davidi muna kukiyuvulanga vo: ‘Adieyi ivanganga avo longi mpeno? Nga itambulwilanga vana vau vo vilwa kikilu mpangidi yovo vakuba ivavanga? Nga itumbanga akaka mu nzaki? Nga ivanganga mawonso mu lembi vutukila o vilwa wame?’ Olenda kukiyuvula yuvu nze yayi vava otanganga lusansu lwa selo yakwikizi beyikwanga muna Bibila. Nga yau mpe mambu mampasi bawanana mau nze mana onuananga mau? Nkia fu yambote basonga? Muna konso diambu, olenda kukiyuvula: ‘Aweyi ndenda tanginina e selo yayi yakwikizi ya Yave?’

14. Nkia nluta tulenda vua muna tangininanga mpangi zeto?

¹⁴ Tulenda mpe vua nluta miayingi muna tangininanga mpangi zeto, diakala vo aleke yovo ambuta. Kasikil’owu, nga olenda yindula mpangi mosi muna nkutakani eno ona ozizidilanga  e mpasi ye kwikizi kiawonso, nanga ozizidilanga e ntonta za akwandi a sikola, a salu, kitantu kia yitu yandi yovo mayela? Nga omonanga e fu yambote kesonganga mpangi ndioyo ina ozolele tanginina? O badika e mbandu andi ambote dilenda kusadisa mu zizidila e mambu mampasi onuananga mau. Kieleka, tutoma vutulanga matondo yo yangalala wau tuna ye ampangi besonganga mbandu akwikizi ina tulenda tanginina muna kala ye kiese!—Ayib. 13:7; Yak. 1:2, 3.

15. Nkia longi Paulu wa ntumwa kavana dilenda kutusadisa mu kwamanana kala ye kiese muna salu kieto kwa Yave?

¹⁵ Muna siamisa luvuvamu yo ungudi muna nkutakani, konso muntu mu yeto kafwete toma lungisanga e mbebe andi. Badika e mbandu ya Akristu a tandu kiantete. Bakala ye tukau yovo ngangu zaswaswana ye iyekwa yaswaswana. (1 Kor. 12:4, 7-11) Kansi, ekiaki ke kiakala kuma ko muna kuyitezanesa yovo vava sunda akaka. I dianu Paulu kakasakesela konso muntu muna yau vo kavanga mawonso kalenda “muna vangamesa e nitu a Kristu.” Paulu wasonekena esi Efeso vo: “Vava konso kîkwa kisalanga una ufwene, disadisanga e nitu yanungunuka yo kumikwa muna zola.” (Efe. 4:1-3, 11, 12, 16) Wau vo Akristu balemvokela dina Paulu kavova, basiamisa luvuvamu yo ungudi muna nkutakani. I diau mpe divangamanga mu nkutakani zeto o unu.

16. Nkia kani tufwete kala diau? (Ayibere 6:10)

¹⁶ Kala ye kani dia venga e fu kia kuyitezanesa ye akaka. Kansi, longoka muna mbandu a Yesu yo vanga mawonso muna tanginina e fu yandi. Vua e nluta muna tangininanga e mbandu ya selo ya Yave beyikwanga muna Bibila ye ampangi ana besonganga kwikizi mu lumbu yeto. Ekolo okwamanananga vanga mawonso olenda, kala ye ziku vo Yave ‘kakondelo unsongi ko kavilakana e salu kiaku.’ (Tanga Ayibere 6:10.) Muna kuma kiaki, kwamanana kala ye kiese ekolo osadilanga Yave yo kala ye ziku vo otoma yangalelanga e ngolo ovanganga muna kunyangidika.