1. Ngaˬ hui ha lehˬ jaˇ tuˬ te laˇ ve aˬ htoꞈ ma cawˬ ve le?

 Ha lehˬ ve lehˬ awˬ ha hpu ve awˬ shiˍ nawꞈ ve teˇ ceuˬ hpehꞈ ve pa taw, Yaˬhoˉvaˬ lehˬ ngaˬ hui htaꞈ ha lehˬ tcuh gaˇ ve yoˬ. (Gaˍlaˍtiˆ 5:22) Piˇ ve lehˬ gʼa ve aꞈ kehˉ awˬ bon uiˍ ve yoˬ. Hkʼe te leh, Gʼuiˬ sha ve kanˉ te htaˇ leh awˬ viˉ awˬ nyi htaꞈ ga piˇ ve, ngaˬ hui ha lehˬ ve yoˬ.—Tcuh yaˇ 20:35.

2-3. (a) Ngaˬ hui Yaˬhoˉvaˬ ve kanˉ te htaˇ ha lehˬ tuˬ te laˇ gʼa ve Gaˍlaˍtiˆ liꞈ 6:4 hkʼaw awˬ hkʼaˇ 2 hkʼaˇ htaꞈ hkʼaˬ hkʼe kʼoˆ taˍ ve le? (b) Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Ngaˬ hui ha lehˬ tuˬ te laˇ ve Gaˍlaˍtiˆ liꞈ 6:4 hkʼaw tcuh yaˇ Pawˇluꞈ awˬ hkʼaˇ 2 hkʼaˇ htaꞈ kʼoˆ taˍ ve yoˬ. (Gʼaw sheˍ.) Awˉ lawˉ teˇ hkʼaˇ lehˬ, ngaˬ hui cawˬ taˍ ve daꞈ jaˇ ve awˬ ceuˬ Yaˬhoˉvaˬ htaꞈ gʼa piˇ ve yoˬ. Ngaˬ hui te gʼa ve hkʼe yawˇ ve kanˉ hkʼa dehꞈ te ve kʼo, ngaˬ hui ha lehˬ ve yoˬ. (Maꞈhtehˍ 22:36-38) 2 hkʼaˇ teˇ hkʼaˇ lehˬ, ngaˬ hui awˬ to shu htaꞈ maˇ tehˆ daꞈ cawˇ. Ngaˬ hui Gʼuiˬ sha ve kanˉ hkʼa dehꞈ te ve lehˬ, chehˇ sha cawˬ sha ve, hkʼa dehꞈ gʼa henˇ˗oˬ ve, maˇ heˆ leh te puiˉ te hpehꞈ ve htaꞈ pa taw yoˬ. Hkʼe te leh, ngaˬ hui cawˬ taˍ ve teˇ ceuˬ le le kaꞈ Yaˬhoˉvaˬ geh gʼa taˍ ve pa taw yawˇ htaꞈ awˬ bon uiˍ jaˇ tehꞈ kʼoˆ piˇgaˇ ve yoˬ. Awˬ nu ve chaw Gʼuiˬ sha ve kanˉ te ve teˇ ceuˬ ceuˬ ngaˬ hui aꞈ kehˉ cheuˬ ve kʼo, yawˇ te puiˉ te hpehꞈ ve awˬ ceuˬ Yaˬhoˉvaˬ chiˇ uiˍ chiˇ mvuhˇ ve htaꞈ gʼa tuˬ te ve pa taw, ngaˬ hui yawˇ geh ha lehˬ piˇ cawˇ ve yoˬ. Yawˇ te puiˉ te hpehꞈ ve awˬ ceuˬ yawˇ awˬ pon awˬ bon cawˬ tuˬ leh yawˇ chiˇ uiˍ chiˇ mvuh ve htaꞈ gʼa tuˬ htaꞈ maˇ te. Chi htaꞈ pa taw, ngaˬ hui awˬ viˉ awˬ nyi geh maˇ enˍ daꞈ cawˇ leh yawˇ hui htaꞈ henˇ yuˬ cawˇ ve yoˬ.

³ Ngaˬ hui oˇ htaˇ hkʼe leˇ Gʼuiˬ sha ve kanˉ hkʼa dehꞈ te maˇ gʼa tehꞈ dawˇ ve kʼo, ngaˬ hui haꞈ yuˬ gʼa tuˬ hkʼaˬ hkʼe ga laˇ gʼa ve, ngaˬ hui puiˉ ve hpehꞈ ve htaꞈ hkʼaˬ hkʼe te hkʼa dehꞈ yehˇ gʼa tuˬ, leh shu ve awˬ lawn htaꞈ ngaˬ hui hkʼaˬ hkʼe henˇ yuˬ gʼa tuˬ kaꞈ teˇ geh henˇ tuˬ yoˬ.

4. Ngaˬ hui awˬ gʼaˇ nuˇ tuˬ te laˇ gʼa ve aˬ htoꞈ ma le? Tawˇ pa haˉ kʼoˆ maˍ laˇ sheˍ.

⁴ Ngaˬ hui a shaꞈ maˇ leh maˇ chehˇ sha ve pa taw, oˇ htaˇ hkʼe leˇ Gʼuiˬ sha ve kanˉ hkʼa dehꞈ te maˇ gʼa ve kʼo, ngaˬ hui haꞈ yuˬ gʼa tuˬ haˍ ve yoˬ. Hkeh˗law kaꞈ chi hkʼe dawˇ ve yoˬ. Hto toˇ ve loˍ jaˇ kuiˬ lo yawˇ Gʼuiˬ sha ve kanˉ te jaw ve yoˬ. Oˇ ve teˇ yanˇ ngaˬ geh Liꞈ hpu henˇ ve chaw 35 gʼaˇ cawˬ leh laiˉ gʼaˇ awˬ to chiˇ aꞈ leh Baˆtiˆsaˬ haꞈ yuˬ tuˬ ga piˇ ve yoˬ. Hkeh˗law Gʼuiˬ sha ve kanˉ te gʼa maˇ jaˇ. Peuˬ hkʼawꞈ nawˉ, yawˇ maˇ chehˇ sha ve yoˬ. Yawˇ teˇ kaˬ kaꞈ kʼai maˇ gʼa leh aˉ hkʼaw tiˉ gʼa chehˇ ve yoˬ. Hkeh˗law kʼoˆ ve, “ngaˬ maˇ chehˇ sha ve pa taw, awˬ viˉ awˬ nyi hkʼe leˇ Gʼuiˬ sha ve kanˉ hkʼa dehꞈ te maˇ gʼa. Hkʼe te leh, ngaˬ dawˇ taˍ ve hkʼe te maˇ gʼa ve pa taw, yawˇ hui hkʼe leˇ daꞈ ve Hkriꞈ yaˇ maˇ hpehꞈ ve tehꞈ dawˇ ve yoˬ. Ngaˬ te gaˇ ve hkʼe te maˇ gʼa ve pa taw, ngaˬ awˬ gʼaˇ nuˇ jaˇ leh yeunˇ hkanˍ maˇ gʼaˇ˗oˬ tehꞈ dawˇ ve yoˬ.” Hkeh˗law Yaˬhoˉvaˬ ve kanˉ hkʼa dehꞈ te gaˇ ve pa taw, chi lehˬ chiˇ mvuh kuiˬ cawˬ jaˇ. Yaˬhoˉvaˬ yawˇ htaꞈ ha kʼaˉ leh yawˇ coˇ caˇ ve htaꞈ Yaˬhoˉvaˬ awˬ hpfuhˇ shiˍ ve tehꞈ ngaˬ hui yonˍ gʼa ve yoˬ.

5. (a) Ngaˬ hui oˇ htaˇ hkʼe leˇ Yaˬhoˉvaˬ ve kanˉ hkʼa dehꞈ te maˇ gʼa ve kʼo, aˬ htoꞈ ma htaꞈ tawnˇ taˍ cawˇ ve le? (b) Awˬ lawn chi ve awˬ han hkʼaw awˬ viˉ awˬ nyi hawˉ hkʼaˆ hkʼaˬ hkʼe te hkʼa dehꞈ te gʼa ve le?

⁵ Nawˬ oˇ htaˇ hkʼe leˇ Yaˬhoˉvaˬ ve kanˉ hkʼa dehꞈ te maˇ gʼa leh awˬ gʼaˇ nuˇ ve kʼo, a shu yawˇ awˬ to htaꞈ na nyi cawˇ ve, “Yaˬhoˉvaˬ ngaˬ htaꞈ aˬ htoꞈ ma te tcuh gaˇ ve le?” Yawˇ lehˬ chi teˇ hkui nawˬ te gʼa ve awˬ ceuˬ htaꞈ hkʼa dehꞈ te tcuh gaˇ ve yoˬ. Awˬ lawn chi htaꞈ dawˇ nyi sheˍ. Awˬ viˉ awˬ nyi yaˇ miˇ a shaꞈ 80 hkʼawꞈ gaˬ˗oˬ leh a shaꞈ 40 hkʼawꞈ htaˇ hkʼe taw Yaˬhoˉvaˬ ve kanˉ hkʼa dehꞈ te maˇ gʼa ve pa taw, awˬ gʼaˇ nuˇ ve yoˬ. Yaˬhoˉvaˬ ve kanˉ hkʼaˬ hkʼe taw te ve htawˇ yawˇ nyi hkʼaˇ nyi suh tuˬ te piˇ maˇ gʼa tehꞈ dawˇ ve yoˬ. Awˬ tehˬ awˬ na chi hkʼe hpehꞈ˗aw laˇ? Dawˇ nyi sheˍ. Yawˇ 40 hkʼawꞈ htaˇ Gʼuiˬ sha ve kanˉ hkʼa dehꞈ te gʼa ve yoˬ. 80 hkʼawꞈ gaˬ˗oˬ ve htawˇ kaꞈ yawˇ Gʼuiˬ sha ve kanˉ hkʼa dehꞈ te sheˍ ve yoˬ. A shaꞈ hkʼaˬ hkʼe ma gaˬ˗oˬ ve htawˇ, yawˇ Yaˬhoˉvaˬ ve kanˉ te gʼa ve hkʼe hkʼa dehꞈ te sheˍ ve yoˬ. Ngaˬ hui Gʼuiˬ sha ve kanˉ te chehˇ ve lehˬ yawˇ nyi hkʼaˇ suh tuˬ te piˇ maˇ lawꞈ sheˍ tehꞈ tanˬ dawˇ la ve kʼo, yawˇ nyi hkʼaˇ suh tuˬ te piˇ gʼa ve yawˇ teˇ gʼaˇ ceh tiˉ awˬ liˇ teh gʼa ve tehꞈ ngaˬ hui shaˍ tiꞈ te cawˇ ve yoˬ. Ngaˬ hui te gʼa ve hkʼe hkʼa dehꞈ te ve kʼo, Yaˬhoˉvaˬ ngaˬ hui htaꞈ daꞈ jaˇ tehꞈ kʼoˆ laˇ tuˬ yoˬ.—Maꞈhtehˍ 25:20-23 htaꞈ tehˆ daꞈ sheˍ.

6. Maˍriˆ ve awˬ lawn htaꞈ ngaˬ hui aˬ htoꞈ ma henˇ yuˬ gʼa ve le?

⁶ Ngaˬ hui te gʼa ve awˬ ceuˬ htaꞈ a yeˇ yuˬ ve kʼo, ngaˬ hui Gʼuiˬ sha ve kanˉ te ve htaꞈ ha lehˬ tuˬ yoˬ. Maˍriˆ ve awˬ lawn htaꞈ teˇ geh nyi sheˍ. Yawˇ naˬ leh Gʼuiˬ sha ve kanˉ hkʼa dehꞈ te maˇ gʼa ve yoˬ. Awˉ lawˉ htaˇ yawˇ nyi ma luˬ jaˇ leh awˬ hpfuhˇ maˇ cawˬ tehꞈ dawˇ ve yoˬ. Hkriꞈ yaˇ awˬ moˍ hkʼaw ve awˬ viˉ awˬ nyi yaˇ miˇ teˇ gʼaˇ naˬ jaˇ leh teˇ kaˬ kaꞈ kʼai maˇ gaˬ ve htaꞈ yawˇ dawˇ nyi ve yoˬ. Leh yawˇ awˬ viˉ awˬ nyi chi teˇ gʼaˇ htaꞈ ga piˇ gaˇ ve yoˬ. Maˍriˆ kʼoˆ ve, “yawˇ tawˇ yaw tuˬ awˬ hkʼeun hkʼaw hto toˇ leh liꞈ teˇ geh bvuhꞈ tuˬ awˬ yanˇ tinˍ daꞈ ve yoˬ. Ngaˬ hui Gʼuiˬ sha ve kanˉ teˇ geh gʼa te htaˇ ngaˬ ha lehˬ jaˇ.” Ngaˬ hui kaꞈ hkʼa shuˍ shuˍ ngaˬ hui te gʼa ve awˬ ceuˬ htaꞈ a yeˇ yuˬ ve kʼo, ngaˬ hui Yaˬhoˉvaˬ ve kanˉ te ve ha lehˬ jaˇ tuˬ yoˬ. Ngaˬ hui te ve teˇ ceuˬ ceuˬ maˇ daꞈ tehꞈ dawˇ ve kʼo, ngaˬ hui hkʼaˬ hkʼe te cawˇ ve le?

7. Pawˇluꞈ Hkriꞈ yaˇ htaꞈ daꞈ ve aˬ htoꞈ ma beˆ maˍ piˇ ve le?

⁷ Pawˇluꞈ liꞈ bvuhꞈ ve awˉ lawˉ teˇ kʼoˆ hkʼaw awˬ viˉ awˬ nyi puiˉ ve hpehꞈ ve hkʼe, teˇ gʼaˇ leh teˇ gʼaˇ awˬ gʼaˇ piˇ daꞈ˗oꞈ tehꞈ kʼoˆ ve yoˬ. Yawˇ kʼoˆ ve, “nawˬ hui teˇ gʼaˇ peuˬ teˇ gʼaˇ awˬ bon gʼa taˍ ve hkʼe, teˇ gʼaˇ leh teˇ gʼaˇ awˬ pon yehˇ˗oˆ. Nawˬ hui chi hkʼe te ve kʼo, Gʼuiˬ sha ve awˬ bon laiˉ ceuˬ htaꞈ nawˬ hui hkʼa dehꞈ haꞈ shaˉ leh yehˇ ve chaw hpehꞈ ve yoˬ.” (1 Peˍtruˆ 4:10) Ngaˬ hui teˇ ceuˬ ceuˬ te puiˉ ve kʼo, ngaˬ hui hkʼe leˇ te maˇ gʼa ve awˬ viˉ awˬ nyi hkawehˉ leh awˬ gʼaˇ nuˇ la ve tehꞈ dawˇ ve kʼo, ngaˬ  hui puiˉ ve hpehꞈ ve htaꞈ hkʼa dehꞈ maˇ te tawˆ haˆ ve yoˬ. Ngaˬ hui puiˉ ve hpehꞈ ve hkʼe Yaˬhoˉvaˬ ve kanˉ hkʼa dehꞈ maˇ te la ve yoˬ.

8. 1 Kawˇrenˍhtuˆ liꞈ 4:6, 7 hkʼaw kʼoˆ taˍ ve hkʼe, ngaˬ hui puiˉ ve hpehꞈ ve htaꞈ cheuˬ ve hkʼe leˇ aˬ htoꞈ ma te maˇ te cawˇ ve le?

⁸ Ngaˬ hui puiˉ ve hpehꞈ ve htaꞈ hkʼa dehꞈ yehˇ cawˇ ve yoˬ. Yaꞈ hkʼaˇ, ngaˬ hui puiˉ ve hpehꞈ ve htaꞈ cheuˬ ve hkʼe leˇ maˇ gʼa te tuˬ shaˍ tiꞈ gʼa te ve yoˬ. (1 Kawˇrenˍhtuˆ 4:6, 7 gʼaw sheˍ.) Tawˇ pa haˉ te kʼo, nawˬ Liꞈ hpu maˍ cheuˬ ve chaw hpehꞈ ve kʼo, chi ve nawˬ caˉ leh te kʼai sheˍ. Yaꞈ hkʼaˇ, puiˉ ve hpehꞈ ve leh cheuˬ ve hkʼe te ve maˇ shuˍ daꞈ. Tawˇ pa haˉ te kʼo, nawˬ hto toˇ˗e leh Liꞈ hpu henˇ ve chaw awˬ suhˉ ca gʼa ve kʼo, teˇ geh hto toˇ˗e ve chaw htaꞈ nawˬ kʼoˆ maˍ piˇ gaˇ jaˇ ve yoˬ hehˉ. Yaꞈ hkʼaˇ, nawˬ yawˇ hui htaꞈ mawˬ daꞈ htaˇ, awˬ viˉ awˬ nyi teˇ gʼaˇ liꞈ kʼoˆ teˇ kʼoˆ piˇ gʼa ve htaꞈ kʼoˆ chehˇ ve htaꞈ nawˬ gʼa mawˬ ve yoˬ. Nawˬ Liꞈ hpu henˇ ve chaw awˬ suhˉ cawˬ ve htaꞈ dawˇ nyi sheˍ. Yaꞈ hkʼaˇ, awˬ viˉ awˬ nyi oˇ ve teˇ gʼaˇ liꞈ kʼoˆ teˇ kʼoˆ piˇ gʼa ve yoˬ. Nawˬ hkʼaˬ hkʼe te tuˬ le? Nawˬ ve awˬ lawn awˬ viˉ awˬ nyi teˇ geh hto toˇ˗e ve chaw htaꞈ kʼoˆ maˍ piˇ ve kʼo, yawˇ hui awˬ gʼaˇ gʼa jaˇ ve yoˬ hehˉ. Yaꞈ hkʼaˇ, nawˬ awˬ viˉ awˬ nyi oˇ ve teˇ gʼaˇ htaꞈ dawˇ nyi piˇ ve pa taw, oˇ ve teˇ hkui nawˬ maˇ kʼoˆ maˍ piˇ sheˍ ve yoˬ hehˉ. Yawˇ liꞈ kʼoˆ teˇ kʼoˆ piˇ gʼa ve htaꞈ ha lehˬ ve yoˬ. Yaꞈ hkʼaˇ, nawˬ caˉ leh Liꞈ hpu henˇ ve chaw cawˬ tuˬ ca sheˍ. Nawˬ chi hkʼe hpawˇ cheuˬ ve htaꞈ pa taw hkʼa dehꞈ te kʼai loˬ!

9. Ngaˬ hui puiˉ ve hpehꞈ ve htaꞈ hkʼaˬ hkʼe hpawˇ yehˇ cawˇ ve le?

⁹ Ngaˬ hui puiˉ ve hpehꞈ ve teˇ ceuˬ le le Yaˬhoˉvaˬ geh gʼa ve laꞈ shawnˍ hpehꞈ ve tehꞈ tawnˇ taˍ cawˇ ve yoˬ. Puiˉ ve hpehꞈ ve chi htaꞈ yehˇ leh awˬ viˉ awˬ nyi htaꞈ awˬ gʼaˇ piˇ leh Hkriꞈ yaˇ awˬ moˍ hkʼaw uiˍ la mvuh la tuˬ ga piˇ sheˍ. Ngaˬ hui shu aꞈ kehˉ cheuˬ ve taˇ te. (Hpiˇliˇpiˆ 2:3) Ngaˬ hui Yaˬhoˉvaˬ ve kanˉ te tuˬ, awˬ gʼaˇ leh puiˉ ve hpehꞈ ve htaꞈ yehˇ ve kʼo, puiˉ ve hpehꞈ ve chi ngaˬ hui Yaˬhoˉvaˬ chiˇ uiˍ chiˇ mvuh ve htaꞈ gʼa tuˬ te ve pa taw, ngaˬ hui ha lehˬ jaˇ tuˬ yoˬ. Ngaˬ hui shu aꞈ kehˉ cheuˬ ve maˇ heˆ leh shu aꞈ kehˉ te gʼa ve tehꞈ maˇ te cawˇ ve yoˬ.

10. Ngaˬ hui awˬ to shu htaꞈ tehˆ daꞈ ve aˬ htoꞈ ma te awˬ bon maˇ cawˬ ve le?

¹⁰ Ngaˬ hui shaˍ tiꞈ maˇ te ve kʼo, ngaˬ hui awˬ to shu htaꞈ tehˆ daꞈ puiˉ ve chaw kaꞈ hpehꞈ la gʼa ve yoˬ. Leh ngaˬ hui yawˇ aꞈ kehˉ cheuˬ ve kaꞈ dawˇ la ve yoˬ. Tawˇ pa haˉ te kʼo, awˬ viˉ awˬ nyi bon maˍ cheuˬ ve chaw lehˬ, aˬ htoꞈ ma te awˬ nu ve awˬ viˉ awˬ nyi teˇ gʼaˇ bon maˍ maˇ cheuˬ tehꞈ dawˇ la puiˉ ve yoˬ. Awˬ tehˬ kʼo, awˬ viˉ awˬ nyi oˇ ve teˇ gʼaˇ yaˇ htaꞈ maˍ cheuˬ ve, hkehˉ chaw htaꞈ haꞈ yuˬ puiˉ ve, leh hto toˇ ve kaiˬ ve chaw hpehꞈ ve yoˬ hehˉ. Chi beuꞈ teˇ co˗e awˬ viˉ awˬ nyi hawˉ hkʼaˆ leh yaˇ miˇ Gʼuiˬ sha ve kanˉ hkʼaˇ hkʼaw yawˇ hui puiˉ ve hpehꞈ ve htaꞈ yehˇ leh Gʼuiˬ sha ve kanˉ te  leh awˬ viˉ awˬ nyi htaꞈ ga piˇ ve ngaˬ hui shiˍ htaˇ ha lehˬ jaˇ.

11. Aˬ htoꞈ ma te ngaˬ hui Yeˍsuˆ ve awˬ lawn htaꞈ coˇ caˇ leh henˇ yuˬ cawˇ ve le?

¹¹ Ngaˬ hui ve awˬ to shu htaꞈ maˇ tehˆ daꞈ ve htawˇ, Yaˬhoˉvaˬ ve kanˉ te ve ka tiꞈ ve chaw htaꞈ ngaˬ hui nyi htaˇ awˬ bon gʼa ve yoˬ. Yeˍsuˆ lehˬ ngaˬ hui awˬ pon henˇ yuˬ tuˬ daꞈ jaˇ ve yoˬ. Yeˍsuˆ biˇ ve chaw hpehꞈ ve htawˇ, yawˇ aˬ htoꞈ ma te ve leh yawˇ ve daꞈ ve te hkʼaˇ dawˇ hkʼaˇ htaꞈ ngaˬ hui henˇ yuˬ gʼa ve yoˬ. (1 Peˍtruˆ 2:21) Yeˍsuˆ ve awˬ lawn htaꞈ ngaˬ hui hkʼa dehꞈ henˇ yuˬ htaˇ, ngaˬ hui Yaˬhoˉvaˬ ve kanˉ hkʼa dehꞈ te gʼa tuˬ yoˬ.

12-13. Jawˇ mawˇ Daˍviˆ htaꞈ ngaˬ hui aˬ htoꞈ ma henˇ yuˬ gʼa ve le?

¹² Liꞈ hpu hkʼaw Gʼuiˬ sha ve kanˉ te ve ka tiꞈ yeˬ ve chaw hawˉ hkʼaˆ leh yaˇ miˇ laiˉ gʼaˇ cawˬ ve yoˬ. Yawˇ hui maˇ biˇ ve chaw hpehꞈ ve htawˇ, ngaˬ hui yawˇ hui htaꞈ henˇ yuˬ gʼa ve yoˬ. (Heˍbrehˇ 6:12) Tawˇ pa haˉ te kʼo, Yaˬhoˉvaˬ lehˬ Daˍviˆ htaꞈ “ngaˬ nyi ma cawˇ ve chaw” tehꞈ kuˬ ve htaꞈ dawˇ nyi sheˍ. Maˇ heˆ leh awˬ nu ve Liꞈ hpu teˇ kʼoˆ hkʼaw kʼoˆ ve, “ngaˬ nyi hkʼaˇ suh ve chaw hpehꞈ ve yoˬ.” (Tcuh yaˇ 13:22) Daˍviˆ maˇ biˇ ve chaw hpehꞈ leh uiˍ jaˇ ve venˇ baˆ htaꞈ te yaꞈ jaw ve chaw hpehꞈ ve htawˇ, yawˇ ngaˬ hui awˬ pon daꞈ ve henˇ yuˬ tuˬ hpehꞈ ve yoˬ. Aˬ htoꞈ ma pa taw le? Yawˇ uiˍ jaˇ ve venˇ baˆ htaꞈ te yaꞈ ve tehꞈ awˬ nu ve chaw shaˍ tiꞈ piˇ htaˇ, yawˇ te yaꞈ ve htaꞈ haꞈ yuˬ ve yoˬ. Yaꞈ hkʼaˇ, beˆ maˍ piˇ ve chi hehnˇ ve awˬ ceuˬ hpehꞈ ve htawˇ, yawˇ haꞈ yuˬ ve yoˬ. Leh Daˍviˆ kaꞈ yawˇ te ve awˬ ceuˬ htaꞈ nyi ma luˬ jaˇ ve yoˬ. Chi htaꞈ pa taw, Yaˬhoˉvaˬ yawˇ htaꞈ venˇ baˆ hpehˇ piˇ ve yoˬ.—Chiˇ mvuh ve 51:3, 4, 10-12.

¹³ Ngaˬ hui Daˍviˆ htaꞈ henˇ yuˬ gʼa ve yoˬ. Hkʼe te leh, ngaˬ hui a shu yawˇ awˬ to htaꞈ na nyi cawˇ ve, ‘shu ngaˬ htaꞈ beˆ maˍ laˇ htaˇ hkʼaˬ hkʼe te tuˬ le? Ngaˬ te yaꞈ ve htaꞈ haꞈ yuˬ tuˬ laˇ, maˇ heˆ leh maˇ gʼa te tehꞈ kʼoˆ tuˬ ve laˇ? Ngaˬ shu htaꞈ she pfuhˍ piˇ˗aw laˇ? Maˇ heˆ leh ngaˬ kʼawꞈ te yaꞈ tuˬ ve laˇ?’ Liꞈ hpu hkʼaw Gʼuiˬ sha ve kanˉ te ve ka tiꞈ yeˬ ve awˬ nu ve chaw ve awˬ lawn nawˬ gʼaw htaˇ, nawˬ awˬ to htaꞈ chi hkʼe na nyi cawˇ ve yoˬ. Yawˇ hui nawˬ hkʼa shuˍ shoꞈ shaꞈ ve gʼa hpuˇ˗aw laˇ tehꞈ dawˇ nyi sheˍ. Leh yawˇ hui daꞈ ve te hkʼaˇ dawˇ hkʼaˇ henˇ yuˬ tuˬ aˬ htoꞈ ma cawˬ ve le? Nawˬ yawˇ hui ve awˬ lawn gʼaw ve teˇ pawˆ le le a shu yawˇ awˬ to htaꞈ na nyi cawˇ ve, ‘ngaˬ chi ve teˇ gʼaˇ hkʼa shuˍ hkʼaˬ hkʼe te hpehꞈ gʼa tuˬ ve le?’

14. Awˬ viˉ awˬ nyi ve awˬ lawn htaꞈ ngaˬ hui nyi htaˇ, aˬ htoꞈ ma awˬ bon gʼa tuˬ le?

¹⁴ Chi hkʼoˆ kaꞈ, awˬ viˉ awˬ nyi a shaꞈ maˇ ve maˇ heˆ leh a shaꞈ i ve htawˇ, nawˬ yawˇ hui ve awˬ lawn htaꞈ henˇ yuˬ gʼa ve yoˬ. Tawˇ pa haˉ te kʼo, nawˬ chehˇ ve Hkriꞈ yaˇ awˬ moˍ hkʼaw shoꞈ shaꞈ ve htaꞈ ka tiꞈ yeˬ ve hkʼaw yeunˇ hkanˍ chehˇ ve a shu cawˬ ve le? Nawˬ a shu htaꞈ dawˇ mawˬ ve le? Teˇ pawˆ  pawˆ yawˇ hui htaꞈ awˬ chawˇ nyiˉ piˇ ve, yehˬ kʼa hkʼaw ve chaw tawˍ piˇ ve, maˇ heˆ leh yawˇ hui hkʼa dehꞈ maˇ chehˇ sha ve yoˬ hehˉ. Yawˇ hui ve te hkʼaˇ dawˇ hkʼaˇ nawˬ henˇ yuˬ gaˇ ve aˬ htoꞈ ma cawˬ ve mawˬ˗aw laˇ? Yawˇ hui ve daꞈ ve awˬ lawn htaꞈ nawˬ hkʼa dehꞈ dawˇ nyi htaˇ, chi nawˬ shoꞈ shaꞈ ve awˬ lawn cawˬ htaˇ haꞈ yuˬ gʼa tuˬ ga laˇ ve yoˬ hehˉ. Awˬ viˉ awˬ nyi chi ve teˇ hpaˍ daꞈ ve henˇ yuˬ tuˬ cawˬ ve ngaˬ hui ha lehˬ jaˇ. Ngaˬ hui yawˇ hui htaꞈ nyi hkʼaˇ suh jaˇ!—Heˍbrehˇ 13:7; Yaˍkoˆ 1:2, 3.

15. Ngaˬ hui Yaˬhoˉvaˬ ve kanˉ caˉ leh ha lehˬ ha kʼa te gʼa tuˬ, Pawˇluꞈ beˆ maˍ laˇ ve ngaˬ hui htaꞈ ga laˇ gʼa ve aˬ htoꞈ ma cawˬ ve le?

¹⁵ Hkriꞈ yaˇ awˬ moˍ hkʼaw dawˇ sha gawˬ lehˍ cawˬ leh teˇ moˍ tiˉ hpehꞈ tuˬ, ngaˬ hui teˇ gʼaˇ le le te gʼa ve hkʼe gʼa te cawˇ ve yoˬ. Awˉ lawˉ peuˇ ve Hkriꞈ yaˇ htaꞈ dawˇ nyi sheˍ. Yawˇ hui puiˉ ve hpehꞈ ve leh awˬ vuiˬ gʼa ve maˇ shuˍ daꞈ ve htawˇ, yawˇ hui maˇ gʼa enˍ daꞈ leh hpaˆ daꞈ ve kaꞈ maˇ cawˬ. (1 Kawˇrenˍhtuˆ 12:4, 7-11) Pawˇluꞈ lehˬ yawˇ hui puiˉ ve hpehꞈ ve htaꞈ yehˇ leh “Hkriꞈ ve awˬ to uiˍ la yeˬ la tuˬ awˬ pon” ga daꞈ˗oꞈ tehꞈ kʼoˆ piˇ ve yoˬ. Pawˇluꞈ Eˇfeˇsuꞈ Hkriꞈ yaˇ htaꞈ liꞈ bvuhꞈ piˇ ve, “awˬ hkʼeun teˇ maˬ peuˬ teˇ maˬ a shu yawˇ ve kanˉ cawˬ ve hkʼe te ve pa taw, awˬ to oˇ ve uiˍ la ve yoˬ.” (Eˇfeˇsuꞈ 4:1-3, 11, 12, 16) Awˬ viˉ awˬ nyi chi ve teˇ hpaˍ lehˬ, Hkriꞈ yaˇ awˬ moˍ hkʼaw dawˇ sha gawˬ lehˍ ve leh teˇ moˍ tiˉ hpehꞈ tuˬ te ve yoˬ. Leh chi ve hkʼa shuˍ chi beuꞈ teˇ co˗e ve Hkriꞈ yaˇ awˬ moˍ hkʼaw kaꞈ chi hkʼe te chehˇ ve yoˬ.

16. Ngaˬ hui coˇ caˇ leh aˬ htoꞈ ma te cawˇ ve le? (Heˍbrehˇ 6:10)

¹⁶ Ngaˬ hui awˬ to shu htaꞈ maˇ tehˆ daꞈ cawˇ ve yoˬ. Yaꞈ hkʼaˇ, Yeˍsuˆ ve te hkʼaˇ dawˇ hkʼaˇ htaꞈ henˇ yuˬ sheˍ. Liꞈ hpu hkʼaw ve chaw leh chi beuꞈ teˇ co˗e ve awˬ viˉ awˬ nyi ve awˬ lawn htaꞈ henˇ yuˬ sheˍ. Nawˬ puiˉ ve hpehꞈ ve hkʼe te gʼa ve hkʼe te˗oˬ htaˇ, ‘Gʼuiˬ sha lehˬ maˇ hteˇ maˇ cawˇ ve Gʼuiˬ sha hpehꞈ ve maˇ heˆ. Nawˬ te taˍ ve kanˉ htaꞈ yawˇ leunˇ tuˬ ve maˇ heˆ.’ (Heˍbrehˇ 6:10 gʼaw sheˍ.) Nawˬ Yaˬhoˉvaˬ ve kanˉ caˉ leh ha lehˬ ha kʼa ve hkʼaw te sheˍ. Nawˬ puiˉ ve hpehꞈ ve htaꞈ yehˇ leh Yaˬhoˉvaˬ nyi hkʼaˇ suh tuˬ te piˇ ve htaꞈ yawˇ awˬ hpfuhˇ shiˍ ve tehꞈ nawˬ yonˍ gʼa ve yoˬ.