1. Ki lika mañi zelutahisezanga tabo yetuna?

 JEHOVA ubata kuli lube babatabile. Luziba cwalo bakeñisa kuli tabo ki kalulo ya muselo wa moya. (Magal. 5:22) Bakeñisa kuli kunani tabo yetuna mwakufana yefita ye mwakufiwa, lubanga ni tabo yetuna halueza musebezi wa kukutaza ka kutukufalelwa ni kutusa mizwale ni likaizeli baluna mwa linzila zeshutana-shutana.—Lik. 20:35.

2-3. (a) Sina mokuboniselizwe kwa Magalata 6:4, ki lika mañi zepeli zekona kulutusa kuzwelapili kuba ni tabo halunze lusebeleza Jehova? (b) Lukanyakisisañi mwa taba ye?

² Kwa Magalata 6:4, muapositola Paulusi naatalusize lika zepeli zekona kulutusa kuzwelapili kuba ni tabo. (Mubale.) Sapili, luswanela kusebeleza Jehova ka molukonela kaufela. Haiba lusweli kumusebeleza ka molukonela kaufela, luswanela kuba ni tabo. (Mat. 22:36-38) Sabubeli, luswanela kuambuka moya wa kuibapanya ku babañwi. Kusina taba ni zelukona kueza bakeñisa kuli lunani buikangulo bobunde, luitutile kamba lunani buikoneli, luswanela kuitumela ku Jehova. Kakuli mane Jehova ki yena yalufile lika kaufela zelunani zona. Kono haiba batu babañwi baeza hande mwa likalulo zeñwi za bukombwa kulufita, luswanela kuba ni tabo kakuli baitusisa buikoneli bwabona kulumbeka Jehova isiñi kuipatela libubo kamba kueza lika zetusa feela bona. Kacwalo, haluswaneli kukangisana ni bona, kono luswanela kuituta ku bona.

³ Mwa taba ye, lukanyakisisa zekona kulutusa kuzwelapili kusebeleza Jehova ka tabo halukopana ni miinelo yelupaleliswa kumusebeleza hande. Hape lukanyakisisa molukona kuitusiseza hande buikoneli bufi kamba bufi bolunani bona, ni zelukona kuituta kwa mutala wa babañwi.

4. Ki muinelo mañi okona kuluzwafisa? Mufe mutala.

⁴ Batanga ba Jehova babañwi kubabelanga taata kueza zeñata mwa sebelezo yabona ku yena kabakala busupali kamba kuba ni mapongo. Kaizeli yabizwa Carol naaipumani mwa muinelo ocwalo. Kaizeli yo naasebelezanga kwa sibaka kone kutokwahala hahulu bakutazi. Ka nako yeo, naazamaisanga lituto za Bibele ze 35 mi naatusize babañwi ku bona kuineela ni kukolobezwa. Bo Carol nebapetile zeñata mwa bukombwa bwabona! Kono bakala kuba ni mapongo, nako kaufela nebainanga feela fa ndu. Bo Carol batalusa kuli: “Naziba kuli hanikoni kueza lika zebakona kueza babañwi bakeñisa kuli hanina buikangulo bobunde kono niikutwa kuli hani Mukreste yomunde sina bona. Nipalelwanga kueza lika kaufela zenibata kueza mi taba yeo yanizwafisanga.” Bo Carol batabela kusebeleza Jehova mobakonela kaufela. Kaniti, bo Carol babonisa moya omunde luli! Kusina kukakanya, Mulimu waluna yanani mukekecima waitebuha buikatazo bwabona.

5. (a) Ki lika mañi zeluswanela kuhupula haiba luzwafa kabakala mapalelwi amañwi? (b) Sina mokuboniselizwe mwa maswaniso, ki lika mañi zebonisa kuli muzwale uzwezipili kusebeleza Jehova ka mwakonela kaufela?

⁵ Haiba fokuñwi mwazwafanga bakeñisa mapalelwi amañwi, muipuze kuli: ‘Ki sika mañi satokwa Jehova ku na?’ Ubata kuli mumusebeleze ka momukonela kaufela ka kuya ka miinelo yamina. Halunyakisiseñi mutala wo: Kaizeli yali mwa lilimo za ma 80 uzwafile bakeñisa kuli hasakona kueza zeñata mwa bukombwa sina mwanaaezezanga hanaali mwa lilimo za ma 40. Uikutwa kuli hatabisi Jehova kusina taba kuli ueza mwakonela kaufela kumusebeleza. Kono kana taba yeo ki ya niti luli? Munahanisise taba ye. Haiba kaizeli yo naasebelelize Jehova ka mwanaakonela kaufela hanaali mwa lilimo za ma 40, mi usazwelapili kueza nto yeswana haali mwa lilimo za ma 80, uzibe hasika tuhela kusebeleza Jehova ka mwakonela kaufela. Haiba luikutwa kuli halupeti zeñata mwa sebelezo yaluna ku Jehova, luswanela kuhupula kuli Jehova ki yena yaziba haiba lueza molukonela kaufela kuli lumutabise kamba kutokwa. Haiba lueza molukonela kaufela kumusebeleza, Jehova ukali ku luna: “Uezize hande!”—Mubapanye Mateu 25:20-23.

6. Luitutañi kwa mutala wa bo Maria?

⁶ Haiba luisa pilu kwa lika zelukona kueza isiñi kwa lika zelusa koni kueza, lukaba ni tabo. Halunyakisiseñi mutala wa kaizeli yabizwa Maria yakula butuku bobuñwi bobu mupaleliswa kueza zeñata mwa bukombwa. Kwa makalelo, bo Maria nebalembwalile hahulu ni kuikutwa kuli nebasina tuso. Kono cwale banahana za kaizeli yomuñwi mwa puteho yanaakula, ili yanaasa koni kuzwa fa mumbeta. Bo Maria baikatulela kumutusa. Batalusa kuli: “Nalukisa kukutaza ni kaizeli yo ka foni ni kuñola mañolo. Nako kaufela hane nisebezanga ni yena, nenikutanga kwa ndu inze nitabile ni kuikutwa hande kakuli nenitusize kaizelaaka.” Ni luna lwakona kuba ni tabo haiba luisa pilu kwa lika zelukona kueza isiñi kwa lika zelusa koni kueza. Kono kucwañi haiba lwakona kueza zeñata mwa sebelezo yaluna ku Jehova, kamba kueza musebezi omuñwi hande?

7. Ki kelezo mañi yende yanaafile muapositola Pitrosi kwa Bakreste?

⁷ Mwa liñolo lahae lapili lanaañozi ka kususumezwa ki moya wa Mulimu, muapositola Pitrosi naasusuelize mizwale bahae kuitusisa limpo kamba buikoneli kaufela bone banani bona kuli batiise balumeli babañwi. Pitrosi naañozi kuli: “Kulikana ni momufezwi mpo yomuñwi ni yomuñwi, muitusise yona kusebelezana sina likombwa za sishemo sa Mulimu.”  (1 Pit. 4:10) Haluswaneli kupalelwa kuitusisa buikoneli bwaluna ka kutala ka kusaba kuli haiba lueza cwalo, babañwi mwendi bakasuhana balushwela muna kamba kuzwafa. Haiba lupalelwa kuitusisa buikoneli bwaluna, uzibe halusebelezi Jehova ka kutala.

8. Sina mokuboniselizwe kwa 1 Makorinte 4:6, 7, ki kabakalañi halusa swaneli kuikuhumusa kabakala buikoneli bolunani bona?

⁸ Niha lutokwa kuitusisa buikoneli bwaluna ka kutala, luswanela kutokomela kuli haluikuhumusi kabakala buikoneli bo. (Mubale 1 Makorinte 4:6, 7.) Ka mutala, mukana mwaba ni buikoneli bwa kukalisa lituto za Bibele. Muswanela kuzwelapili kuitusisa buikoneli bo. Kono hamuswaneli kuikuhumusa kabakala kuba ni buikoneli bo. Luungeñi kuli cwanoñu fa nemuikozi hahulu bukombwa bwamina mi nemukalisize tuto ya Bibele. Munyolelwa kutaluseza babañwi mwa sikwata sa sebelezo ya mwa simu semuswalisana ni sona. Kono hase muli ni mizwale ni likaizeli bamina mwa sikwata seo, mufumana kuli kunani kaizeli yasweli kukandeka ka za mwanaafezi magazini. Yena naakonile feela kufa magazini kono mina nemukalisize tuto ya Bibele. Mukaeza cwañi? Mwaziba kuli mizwale ni likaizeli mwa sikwata samina bakasusuezwa hamuka bataluseza zene mupetile, kono mukona kuketa kusa bataluseza ka nako yeo ni kulukisa kuli mubataluseze ka za teñi kwapili ilikuli musike mwazwafisa kaizeli yo yanaakonile feela kufa magazini. Nemuka eza hande kueza cwalo. Kono musike mwatuhela kukalisa lituto za Bibele. Munani mpo, muitusise yona!

9. Luswanela kuitusisa cwañi buikoneli bwaluna?

⁹ Luhupuleñi kuli Mulimu ki yena yalufile buikoneli bufi kamba bufi bolunani bona. Luswanela kuitusisa buikoneli bo kuli lutiise puteho isiñi kuipatela libubo. (Mafil. 2:3) Haiba luitusisa maata aluna ni buikoneli bwaluna kuli lueze tato ya Mulimu, lukaba ni libaka la kunyakalala, isiñi kabakala kuli lufita babañwi kono kabakala kuli luitusisa buikoneli bolunani bona kuli lulumbeke Jehova.

10. Ki kabakalañi halusa swaneli kuibapanya ku babañwi?

¹⁰ Kono haiba lusatokomeli, lwakona kukala kuibapanya ku babañwi kabakala kuli lueza hande musebezi omuñwi kono babañwi bona mwendi habaezi hande. Ka mutala, mwendi muzwale ufanga lingambolo za nyangela zende. Bo ki bona buikoneli bwanani bona. Kono mwendi mwa pilu yahae ukona kunyaziseza muzwale yomuñwi yafumana taata kufa lingambolo. Nihakulicwalo, mwendi muzwale yo unani moya wa kuamuhela baenyi, ueza hande musebezi wa kuluta bana bahae, mi unani  tukufalelo mwa bukombwa. Luitumela hahulu kuli kunani mizwale ni likaizeli babañata babaitusisa buikoneli bwabona kuli basebeleze Jehova ni kutusa babañwi!

11. Ki kabakalañi haluswanela kulikanyisa mutala wa Jesu?

¹¹ Nihaike kuli haluswaneli kuibapanya ku babañwi, lwakona kuituta kwa mutala wa batanga ba Jehova babasepahala. Ka mutala, halunyakisiseñi mutala wa Jesu. Nihaike kuli naapetahalile, lwakona kumulikanyisa ka kubonisa tulemeno totunde twanaanani tona ni mwanaaezezanga lika. (1 Pit. 2:21) Haiba lueza molukonela kaufela kulikanyisa mutala wa Jesu, lukaba batanga ba Jehova babande mi lukapeta zeñata mwa bukombwa.

12-13. Luitutañi kwa mutala wa Mulena Davida?

¹² Mwa Bibele, kunani mitala ya baana ni basali babañata bane basepahala bolukona kulikanyisa kusina taba kuli nebasika petahala. (Maheb. 6:12) Ka mutala, Bibele ibulela za Mulena Davida ili yo Jehova naabizize kuli ki “muuna yatabisa pilu yaka” kamba “mutu yanitabisa hahulu,” ka kuya ka toloko ya Bibele yeñwi. (Lik. 13:22) Nihakulicwalo, Davida naasika petahala. Naaezize mafosisa amatuna. Niteñi, ulutomezi mutala omunde. Ka mukwa ufi? Kakuli hanaafilwe kalimelo, naasika lika kuikemela. Kono naaamuhezi kalimelo yeo mi naabakezi lika zemaswe zanaaezize. Kabakaleo, Jehova naamuswalezi.—Samu 51:3, 4, 10-12.

¹³ Lukona kuituta kwa mutala wa Davida ka kuipuza kuli: ‘Niezanga cwañi hanifiwa kalimelo? Kana naitumelelanga mafosisa aka kapili, kamba kana naikemelanga? Kana nifanga mulatu babañwi? Kana nalikanga ka taata kusaeza mafosisa aswana?’ Mwakona kuipuza lipuzo zeswana hamubala taba yeñwi ya mwa Bibele yebulela za baana ni basali babasepahala. Kana nebakopani ni miinelo yetaata yeswana ni yemukopana ni yona? Ki tulemeno tufi totunde tone babonisize? Hamunze mubala litaba zebulela za batu bao, muipuze kuli: ‘Nikona kulikanyisa cwañi mutala wa mutangaa Jehova yasepahala yo?’

14. Lukona kutusiwa cwañi haiba lulikanyisa mutala wa Bakreste babañwi?

¹⁴ Hape lwakona kuituta kwa mutala wa Bakreste babañwi, ibe kuli ki banana kamba ki babahulu. Ka mutala, kana mwa puteho yamina kunani Mukreste yomuñwi yakopana ni muliko omuñwi, inge cwalo kukukuezwa ki litaka zahae, kulwaniswa ki lubasi lwahae, kamba mwendi unani mapongo kono usweli watiyela  muliko wo? Kana Mukreste yo unani tulemeno totunde tone mukatabela kulikanyisa? Haiba mulikanyisa mutala wahae, mukaituta momukona kutiyela miinelo yetaata yemukopana ni yona. Luitumela hahulu kuli kunani mizwale ni likaizeli babacwalo babanani tumelo, ili bolukona kulikanyisa, mi taba yeo yalutabisa luli!—Maheb. 13:7; Jak. 1:2, 3.

15. Ki kelezo mañi yanaafile muapositola Paulusi yekona kulutusa kuzwelapili kusebeleza Jehova inze lutabile?

¹⁵ Kaufelaa luna lutokwa kueza molukonela kaufela kuli lutuse kuli kube ni kozo ni swalisano mwa puteho. Halunyakisiseñi mutala wa Bakreste ba mwa linako za baapositola. Nebanani limpo ni buikalabelo bobushutana-shutana. (1 Makor. 12:4, 7-11) Kono taba yeo neisika tahisa kuli bakale kukangisana mwahalaa bona ni kukauhana. Niteñi, Paulusi naasusuelize mañi ni mañi wabona kueza mwakonela kaufela ‘kuli atiise mubili wa Kreste.’ Paulusi naañolezi Bakreste ba kwa Efese kuli: “Silama ni silama hasinze sisebeza ka mokuswanelehela, mubili wahula haunze uicaha mwa lilato.” (Maef. 4:1-3, 11, 12, 16) Bakreste bane baezize cwalo nebatusize kuli kube ni kozo ni swalisano mwa puteho, ili nto yeluiponela mwa puteho ni kacenu.

16. Luswanela kuikatulela kuezañi? (Maheberu 6:10)

¹⁶ Muikatulele kuli hamuna kuibapanyanga ku babañwi. Kono muitute kwa mutala wa Jesu, mi mueze momukonela kaufela kulikanyisa tulemeno twahae. Mulikanyise mutala wa batanga ba Jehova bababulezwi mwa Bibele ni mizwale ni likaizeli ba mwa linako zaluna bababonisize tumelo. Hamunze musebeleza Jehova ka momukonela kaufela, mukolwe kuli Jehova “haki yasika luka kuli alibale musebezi wamina.” (Mubale Maheberu 6:10.) Muzwelepili kusebeleza Jehova inze mutabile mi muhupule kuli waitebuha buikatazo bomueza bwa kumusebeleza ka pilu yamina kaufela.