1. Vyuma muka vyeji kutulingisanga tuwahilile?

 YEHOVA asaka tupwenga vakuwahilila. Twatachikiza ngocho, mwomwo kuwahilila wapwa muhako washipilitu yajila. (Ngale. 5:22) Hakuwana nge kuhana cheji kunehanga kuwahilila chikuma kuhambakana kutambula, ngocho tweji kuwahililanga chikuma nge natwazana mumulimo wakwambulula nakukafwa vandumbwetu mujijila jakulisezaseza.—Vili. 20:35.

2-3. (a) Kweseka namazu ahali Wavaka-Ngalesha 6:4, vyuma muka vivali navitukafwa tutwaleho lika kupwa vakuwahilila hakuzachila Yehova? (b) Vyuma muka natushimutwila muchihande chino?

² Ngana muze vasoneka hali Wavaka-Ngalesha 6:4 kaposetolo Paulu avulukile vyuma vivali, vize navitukafwa tupwenga lika vakuwahilila. (Tangenu.) Chatete, twafwila kuzachila Yehova noho hakumina ngolo jetu. Kachi nge natumuzachila noho hakumina ngolo jetu, kaha natupwa vakuwahilila. (Mateu 22:36-38) Chamuchivali, katwatela kulyesekesanga kuli vakwetuko. Chamokomoko navyuma natutesamo kweseka nangolo jetu, nachinyingi chetu chipwe nauhashi wetu, twatela kusakwilila Yehova. Mwomwo vyuma vyosena twatwama navyo vyafuma kuli ikiye. Kachi nge vakwetu vali naushi uze katweshi nawoko kutalisa kumulimo wakwambulula, kaha twatela kuwahilila hakutachikiza ngwetu vali nakuzachisa uhashi kana mangana valise Yehova, keshi mangana valitohwese vavene chipwe kulinganyalisako. Shikaho muchishishisa chakulipecha navo, twatela kulinangula kuli vakiko.

³ Muchihande chino natushimutwila ovyo navitukafwa tutwaleho lika kupwa vakuwahilila, nge natwivwa ngwetu katweshi nakuzachila Yehova noho hakumina ngolo jetuko. Natushimutwila nawa omwo tunahase kuzachisa kala uhashi twatwama nawo navyuma natulinangula kuli vandumbwetu.

4. Vyuma muka vinahase kulingisa mutu ahombe? Hanenu chakutalilaho.

⁴ Vinjiho jaYehova vamwe kaveshi nakuhasa kuzata milimo yize vazachililenga Yehovako, mwomwo yaushinakaji chipwe misongo. Omu mukiko chapwile nakuli ndumbwetu Carol. Lwola lumwe azachililenga kuze kwapwile nakusakiwa kukafwa chikuma. Halwola kana apwile nakutetekela vilongesa vyaMbimbiliya 35, kaha vavavulu havatu vaze anangwile, valihanyine kuli Yehova nakuvambapachisa. Ndumbwetu Carol afukililenga mumulimo wenyi wakwambulula. Kutwala muze avijile ngocho kahashilenga kufuma hemboko. Carol ambile ngwenyi: “Mwomwo yamisongo yami, kangweshi kuhasa kuzata nganomu vali nakuzata vandumbwamiko. Oloze ngunatachikiza ngwami nge kuviza chiku, kachi nayami nanguzata nganomu vali nakuzata vakiko. Hakuwana nge kangweshi nakuhasa kuzata ngana muze ngwazachilenga hakavangako, ngocho ngweji kuhombanga.” Ndumbwetu Carol asaka kuzachila Yehova noho hakumina ngolo jenyi, kupwa namuchima kana chamwaza. Twatachikiza ngwetu Kalunga ketu uze apwa wakutetela eji kwivwanga kuwaha chikuma hakumona kukilikita chenyi.

5. (a) Chuma muka twatela kwanuka kachi nge tweji kuhombanga mwomwo yakuhona kuzata noho hakumina ngolo jetu? (b) Ngana muze tunamono hamuvwimbimbi, uno ou ndumbwetu walunga anakutwalaho ngachilihi kuzachila Yehova noho hakumina ngolo jenyi?

⁵ Kachi nge shimbu jimwe mweji kuhombanga mwomwo yavyuma vimwe, lihulisenu ngwenu, ‘Vyuma muka asaka Yehova ngulinge?’ Yehova asaka mumuzachile kweseka nomwo chili chiyoyelo chenu oholyapwa. Tutalenu hachakutalilaho chino, ndumbwetu wapwevo uze ali namyaka yakusemuka 80 eji kuhombanga mwomwo keshi nakuzata mulimo wakwambulula ngana muze azachilenga omu apwile namyaka yakusemuka 40. Eji kushinganyekanga ngwenyi, numba tuhu ali nakuzata noho hakumina ngolo jenyi, oloze keshi nakwivwisa Yehova kuwahako. Uno omu mukiko vene tahi? Tachikizenu ngwenu, kachi nge ou ndumbwetu azachilenga kweseka noho hakumina ngolo jenyi omu apwile namyaka 40, kaha nawa ali nakulinga mwomumwe nomu ali namyaka 80, echi chili nakulumbununa nge ali nakuzachila Yehova noho hakumina ngolo jenyi. Nge tunaputuka kushinganyeka ngwetu Yehova keshi nakuwahililako mwomwo milimo tuli nakuzata yayindende, kaha twatela kwanuka ngwetu Yehova ikiye atachikiza milimo yize mwazata mutu kweseka noho hakumina ngolo jenyi, mangana amwivwise kuwaha. Nge natuzata noho hakumina ngolo jetu, kaha Yehova mwevwa kuwaha.—Esekesenuko Mateu 25:20-23.

6. Vyuma muka natulinangula kuli ndumbwetu Maria?

⁶ Tunahase kupwa vakuwahilila kachi nge natushishika havyuma tunahase kutesamo keshi vize natuhona kutesamoko. Tutalenu hachakutalilaho, chandumbwetu Maria, uze aviza musongo uze weji kumuhonesanga kuzata chikuma mulimo wakwambulula. Hakavanga ahombele nakulivwa kupwa wamokomoko. Oloze ashinganyekele kuya nakukafwa ndumbwenyi wapwevo wamuchikungulwilo chavo uze atwama muluuta. Maria ambile ngwenyi, “Twalivwasanyine kuzata hamwe muwande kuzachisa shinga nakusoneka mikanda. Lwola lwosena twazachilenga hamwe, ngwejilenga kuzuvo ngunawahilila hakutachikiza ngwami ngunakafwe ndumbwami.” Nayetu nawa tunahase kutwalaho lika kupwa vakuwahilila hakushinganyeka havyuma vize tunahase kulinga keshi vize katweshi kuhasako. Nyi ngachilihi nge tweji kuzatanga chikuma milimo yaYehova?

7. Chuma muka kaposetolo Petulu ahuhumwine vakwavo vaka-Kulishitu?

⁷ Mumukanda watete uze vahwiminyine kaposetolo Petulu asoneke, akolezezele vandumbwenyi vazachise kala wana nauhashi vapwile nawo mangana vakolezeze vandumbwavo. Petulu  asonekele ngwenyi: “Kweseka nomu natambula mutu himutu wana, uzachisenu hakuzachila vakwenu hakupwa mutuselwa vamwenemwene vaze vasolwela likoji lyalinene lyaKalunga.” (Petu. 1, 4:10) Katwatela kulitwamina kuzata noho hakumina ngolo jetu mwomwo yakushinganyeka ngwetu vakwetu navahomba chipwe navatwivwila lwisoko. Nge katweshi kuzata noho hakumina ngolo jetu, kaha katweshi kwivwisa Yehova kuwahako.

8. Kweseka namazu ahali Wavaka-Kolinde 1, 4:6, 7, mwomwo ika katwatela kulivwimba hawana twatwama nawoko?

⁸ Twatela kuzachisa wana wetu noho hakumina ngolo jetu, oloze katwatela kulivwimbako. (Tangenu Wavaka-Kolinde 1, 4:6, 7.) Chakutalilaho, munahase kupwa nauhashi wakuputuka vilongesa vyaMbimbiliya. Ngocho mwatela kutwalaho kuzachisa uhashi wenu, oloze echi kachatela kumilingisa mulivwimbeko. Chakutalilaho, achishinganyekenu munambulila mutu nakuputuka chilongesa chaMbimbiliya. Kaha muli nakufwila kulwezako vandumbwenu vamulizavu lyamulimo wamuwande. Kufumaho, omu namuliwana navakwenu ndumbwenu weka mwahanjika omu ambulilanga mutu nakumuhana mangazini. Ndumbwenu ahananga mangazini, oloze yenu mwaputukanga chilongesa. Jino munahase kulinga ngachilihi? Pamo munatachikiza vene ngwenu vakwenu mulizavu vanahase kwivwa kuwaha kwivwilila kuvyuma namuvalweza. Oloze nachiwaha nge namukavalweza vyuma kana likumbi lyeka, kuchina namulingisa ndumbwenu uze nahane mangazini amone nge vyuma nalingi vyamokomoko. Kulinga ngocho nachisolola nge mwazanga ndumbwenu. Oloze mwatela kutwalaho kuzachisa uhashi mwatwama nawo nakuhona kulitwamina kuputuka vilongesa vyaMbimbiliya.

9. Uno twatela kuzachisa ngachilihi wana wetu?

⁹ Twatela kwanuka ngwetu kala uhashi twatwama nawo wapwa wana wakufuma kuli Kalunga. Twatela kuzachisa wana kana mangana tukolezeze vandumbwetu muchikungulwilo, keshi mangana tuli tohwese etu vaveneko. (Fwili. 2:3) Nge natuzachisa ngolo jetu nauhashi wetu hakulinga mwaya muchima wakalunga, kaha natupwa vakuwahilila keshi mwomwo tuli nakuzata kuhambakana vakwetu chipwe mwomwo yakusaka kulitohwesa chamokomokoko oloze mwomwo tulinakuzachisa wana kana twalise Yehova.

10. Mwomwo ika chapwila chakuhenga kulyesekesa kuli vakwetu?

¹⁰ Nge katwazangamineko, tunahase kufwa mumuheto wakwesekesa vyuma vize natutesamo kuli vize mwahona mukwetu kutesamo. Chakutalilaho, ndumbwetu apwa muka-kuhanjika kanawa vihande. Echi chasolola nge akwechi uhashi. Mumuchima wenyi nahase kulelesa ndumbwetu uze kahasa kuhanjika kanawa  vihandeko. Oloze ndumbwetu kanou mwalelesa pamo atwama nachisambo, eji kunangulanga kanawa vana venyi, kaha nawa eji kuzatanga natwima mumulimo wakwambulula kuhambakana ikiye. Twatokwa chikuma kupwa navandumbwetu vavavulu vaze veji kuzachisanga wana wavo hakuzachila Yehova nakukafwa vandumbwavo.

11. Mwomwo ika twatela kufwila kulondezeza Yesu?

¹¹ Numba tuhu twatela kulihenda kukulyesekesa kuli vandumbwetu, oloze tunahase kunganyala kulinangula kuli vakiko. Tutalenu chakutalilaho chaYesu, numba tuhu apwile wakukupuka oloze tunahase kulinangula kuvilinga vyenyi nakuvyuma alingilenga. (Petu. 1, 2:21) Nge natuzata noho hakumina ngolo jetu mangana tumulondezeze kaha natupwa vangamba jaYehova vamwenemwene nakufukila mumulimo wetu wakwambulula.

12-13. Vyuma muka natulinangula kuli Mwangana Ndavichi?

¹² MuMbimbiliya vavulukamo vangamba jaYehova vakushishika vavavulu vaze twatela kulondezeza numba tuhu kavapwile vakukupukako. (Hepe. 6:12) Achishinganyekenu hali Mwangana Ndavichi uze Yehova avulukile ngwenyi: “Lunga ngunevwila kuwaha kumuchima,” chipwe kweseka naMbimbiliya yeka ngwayo: “Mutu uze eji kungwivwisanga kuwaha chikuma.” (Vili. 13:22) Chipwe ngocho Ndavichi kapwile wakukupukako. Kaha nawa alimbenjelenga chikuma. Numba tuhu alimbenjelenga oloze atuhana chakutalilaho chamwaza. Mwomwo ika? Mwomwo omu vamwolwele, kalihakwililileko oloze etavilile vyuma vamuhuhumwine nakupihilila nakwalumuka. Shikaho Yehova amukonekelele.—Samu 51:3, 4, 10-12.

¹³ Tunahase kulinangula kuli Ndavichi hakulihulisa ngwetu: ‘Ngweji kwakulako ngachilihi nge vananguhuhumuna? Uno ngweji kwitavilanga vyuma ngunalimbenje tahi nyi ngweji kulihakwilanga? Kutala ngweji kuhananga vakwetu milonga tahi? Uno ngweji kuzatanga nangolo nguhone kulimbenja cheka tahi?’ Munahase kulinga mwomumwe omu namutanga mijimbu yamuMbimbiliya yize yahanjika hali malunga namapwevo vakushishika. Kutala valitalasanyinenga naukalu ngana uze muli nakumona tahi? Vilinga muka vyamwaza vasolwelenga? Omu namukekesa mijimbu kana, lihulisenu ngwenu, ‘ngunahase kupwa ngachilihi wakushishika ngana mwavava vangamba jaYehova?’

14. Tunahase kunganyala ngachilihi hakulondezeza vandumbwetu?

¹⁴ Tunahase nawa kunganyala hakulondezeza vangamba jaYehova vavanyike nava vavakulwane. Chakutalilaho, kutala kuliko ndumbwenu muchikungulwilo uze ali nakutwalaho lika  kumika muvyeseko vyakufwana nge kumushinyinyika kuli vakwavo, nakumufumbukila kuli vausoko chipwe kumika mumisongo tahi? Kutala kuliko vilinga vyamwaza muli nakumona mulyou ndumbwenu vize muli nakufwila kulondezeza tahi? Hakushinganyeka hachakutalilaho chenyi chamwaza nachimikafwa nayenu nawa mumike mukala vyeseko namulitalasana navyo. Twawahilila chikuma hakupwa nava vandumbwetu vanakutuhana chakutalilaho chamwaza chakupwa nalufwelelo lwakukola.—Hepe. 13:7; Yako. 1:2, 3.

15. Mazu muka ahanjikile kaposetolo Paulu aze nawatukafwa tutwaleho lika kupwa vakuwahilila hakuzachila Yehova?

¹⁵ Hakusaka muchikungulwilo mupwenga kuunda nakulinunga, tuvosena twatela kuzata noho hakumina ngolo jetu. Tutalenu havyuma vyasolokele kuli vaka-Kulishitu vamulikulukaji lyamyaka lyakulivanga. Vapwile nawana wakulisezaseza namilimo yakulisezaseza. (Koli. 1, 12:4, 7-11) Oloze echi kachavalingishile vaputuke kupwa namuchima wakulipecha nakuneha vihandwa mukachi kavoko. Ngocho Paulu avakolezezele valinge vyuma vize vyasakiwile mangana ‘vatunge mujimba waKulishitu.’ Paulu asonekelele vaka-Efwesu ngwenyi: “Kachi nge chilyo hichilyo nachizata kanawa, kahechi cheji kukafwanga mujimba ukole omu uli nakulitunga uvene muzangi.” (Efwe. 4:1-3, 11, 12, 16) Shikaho vaze valingile vyuma avalwezele Paulu vanehele kuunda nakulinunga, vilinga vize tuli nakumona muvikungulwilo makumbi ano.

16. Vyuma muka twatela kufwila kulinga? (WavaHepeleu 6:10)

¹⁶ Kanda kulyesekesanga kuli vakwenuko, oloze linangulenu kuli Yesu nakufwila kulondezeza vilinga vyenyi. Linangulenu kuli vangamba jaKalunga vaze vavuluka muMbimbiliya vapwile nalufwelelo, nakuli vamakumbi ano. Omu namutwalaho kuzata nahakumina ngolo jenu, fwelelenu ngwenu Yehova “kapwa wakuhengako numba avulyame milimo yenu.” (Tangenu WavaHepeleu 6:10.) Twalenuho lika kupwa vakuwahilila hakuzachila Yehova. Kaha nawa tachikizenu ngwenu kumuzachila namuchima wenu wosena cheji kumwivwisanga kuwaha.