1. Ang’o ma medonwaga mor?

 JEHOVA dwaro ni wabed mamor. Wang’eyo mano nikech mor en achiel kuom olembe ma rohone nyago. (Gal. 5:22) To nikech chiwo kelo mor mang’eny moloyo kawo, wabedoga mamor ahinya sama watimo kinda e tij Nyasaye, kod sama wakonyo owetewa gi nyiminewa e yore mopogore opogore.​—Tich 20:35.

2-3. (a) Ka luwore gi Jo-Galatia 6:4, gin weche mage ariyo ma biro konyowa siko ka wamor e tij Jehova? (b) Ang’o ma wabiro nono e sulani?

² E Jo-Galatia 6:4, jaote Paulo nowacho gik moko ariyo ma biro konyowa siko ka wamor. (Som.) Mokwongo, dwarowa maduong’ onego bed miyo Jehova gima berie moloyo. Sama wamiyo Jehova gima berie moloyo, wabiro bedo mamor. (Mat. 22:36-38) Mar ariyo, ok onego wapimre gi jomamoko. Ka po ni ngimawa, tiegruokwa, kod nyalo ma nonyuolwago omiyowa thuolo mar timo momedore e tij Jehova, onego wagone erokamano. Gik moko duto ma wan-go oa kuom Jehova. To komachielo, ka po ni nitie yore moko ma jowetewa oloyowago, onego wabed mamor ni gitiyo gi nyalogi e pako Jehova, to ok gin giwegi. Omiyo, kar pimruok kodgi, onego wapuonjre kuom ranyisigi.

³ E sulani, wabiro nono gima wanyalo timo sama chunywa ochako nyosore nikech waparo ni ok watim mathoth e tij Jehova. Bende, wabiro nono kaka wanyalo tiyo maber gi mich moro amora ma Nyasaye omiyowa, kod gik mwanyalo puonjore kuom ranyisi mag jomamoko.

4. Gin weche kaka mage ma nyalo miyo chuny ng’ato onyosre? Chiw ane ranyisi.

⁴ Nitie jotich Jehova moko ma tinde ok nyal timo mathoth  kaka ne gitimo chon, nikech hikgi oseniang’ kata gituore, kendo mano osenyoso chunygi ahinya. Mano e gima notimore ne nyaminwa Carol. Nitie kinde ma nosedhi lendo e alwora ma jolendo ne dwaroree moloyo. E kindego, ne en gi jopuonjre 35 mag Muma, kendo nokonyo thothgi motimo dongruok mochopo e batiso. Ne en gi nyak ahinya e tij lendo! Kae to nochako tuore, kendo koro thothne ne ok onyal wuok e ot. Carol wacho kama: “Ang’eyo ni nikech atuora, ok anyal timo mathoth kaka jomamoko. Kata kamano, pod anenoga anena ni yie margi otegno ahinya moloyo yiena. Ok anyal timo mathoth kaka daher, kendo wachno nyosoga chunya ahinya.” Carol gomboga timo mathoth e tij Jehova. Mano en gima ber ahinya! Wanyalo bedo gadier ni Nyasachwa mang’won mor ahinya gi chuny ma Carol nigono.

5. (a) En ang’o monego waket e paro ka chunywa onyosore nikech ok watim mathoth e tij Jehova? (b) Mana kaka onyis e picha, ere kaka owadwano osebedo ka miyo Jehova gima berie moloyo?

⁵ Ka po ni seche moko chunyi nyosorega nikech ok inyal timo mathoth e tij Jehova, penjri ane penjoni: ‘En ang’o ma Jehova dwaro ni atim?’ Jehova dwaro ni itim mana gima inyalo gi chunyi duto. Par ane ranyisini: Chuny nyaminwa moro ma jahigni 80 gi wiye onyosore nikech ok onyal timo mathoth e tij lendo kaka ne ojatimo ka ne ojahigni 40 gi wiye. Oneno ni kata obedo ni otimo duto monyalo, pod Jehova ok mor kode. To be mano en adier? Wapar ane wachno matut. Ka po ni nyaminwano ne jakinda e tij Jehova ka nojahigni 40 gi wiye, kendo sani ka en jahigni 80 gi wiye to pod ojakinda, donge mano nyiso ni pok oweyo timo duto monyalo? Ka wachako neno ni Jehova ok mor gi kinda ma watimo e tije, nyalo bedo maber ka waketo e paro ni Jehova e ma ong’eyo okang’ ma ka watiyonego to obedo mamor kodwa. Ka watimo duto mwanyalo e tij Jehova en owuon obiro nyisowa ng’ato ka ng’ato niya: “Itimo maber!”​—Pim gi Mathayo 25:20-23.

6. En ang’o ma wanyalo puonjore kuom nyaminwa Maria?

⁶ Wabiro yudo ka yotnwa bedo mamor ka waketo pachwa kuom gik ma wanyalo timo, kar keto pachwa kuom gik ma ok wanyal timo. Ne ane ranyisi mar nyaminwa Maria, ma nigi tuo moro ma osemone timo mathoth e tij lendo. Mokwongo okwongo, chunye nonyosore kendo nonenore ka ng’at manono. Kata kamano, nochako paro ranyisi mar nyaminwa moro ma ne gin-go e kanyakla, ma ne ok nyal wuok e otanda nikech notuore. Maria wacho kama: “Natimo chenro mondo alend kode e yor simu kod barua. Sa asaya ma nalendo gi nyaminwano, ne adokga ot ka amor nikech nang’eyo ni asekonyo Jakristo wadwa.” Wan bende wanyalo medo bedo mamor ka waketo pachwa kuom gik ma wanyalo timo kar keto pachwa kuom gik ma ok wanyal timo. To nade ka po ni wanyalo timo mathoth e tij Jehova, kata nitie kuonde moko ma watimoe maber ahinya e tij Jehova?

7. En wach mane ma jaote Petro nojiwo ne Jokristo wetene?

⁷ E barua mokwongo ma jaote Petro nondiko, nonyiso Jokristo wetene ni giti gi mich kod nyalo moro amora ma ne gin-go e jiwo Jokristo wetegi. Petro nondiko kama: “Ng’ato ka ng’ato mondo oti gi mich moro amora mosemiye e konyo jomoko, nikech  un jorit mabeyo mar ng’wono mogundho mar Nyasaye monyiso e yore mopogore opogore.” (1 Pet. 4:10) Ok onego wadikre tiyo gi nyalo kata mich moro amora ma wan-go e yo maber moloyo, mana nikech waluor ni jomoko biro bedo gi nyiego kata chunygi nyalo nyosore. Ka po ni wanyalo dikore, ok wabi miyo Jehova gima berie moloyo.

8. Ka luwore gi 1 Jo-Korintho 4:6, 7, ang’o momiyo ok onego wasungre nikech mich ma wan-go?

⁸ Dwarore ni wati gi mich ma wan-go e yo maber moloyo, kata kamano, onego watang’ mondo kik wasungre. (Som 1 Jo-Korintho 4:6, 7.) Kuom ranyisi, nyalo bedo ni ilony e chako puonjruok mar Muma gi ji. Ok onego iluor tiyo gi michno! Kata kamano, nitie pogruok e kind tiyo gi mich ma in-go kod sungruok nikech mich ma in-go. Wawach ni nyocha ilendo ne ng’ato ma ichako puonjori Muma kode, kendo igombo ahinya nyiso jo grubu mar lendo wachno. Kata kamano, sama iromo gi jo grubu, nyaminwa moro bende chako wacho kaka nyocha olendo ne ng’ato momiye gaset. En nochiwo gaset, in to nichako puonjruok gi ng’ato Muma. En ang’o ma ibiro timo? Ing’eyo maber ni wach ma in-gono biro jiwo jo grubu ahinya. Kata kamano, inyalo ng’ado ni ibiro nyisogi wachno e kinde machielo mowinjore mondo kik inyos chuny nyaminwa ma nochiwo gaset, mochak paro ni en to notimo gima nono. Mano biro nyiso ni ikecho nyaminwano. Kata kamano, kik iwe chako puonjruok mar Muma gi ji nikech mano en mich ma in-go, ti kode!

9. Wanyalo tiyo nade gi mich ma wan-go?

⁹ Ber ka waketo e paro ni nyalo moro amora ma wan-go en mich moa kuom Nyasaye. Onego wati gi michgo e jiwo jo kanyakla, to ok miyore duong’. (Fil. 2:3) Sama watiyo gi tekowa kod nyalowa e timo dwach Nyasaye, wabiro bedo mamor​—ok nikech wabeyo moloyo jomoko, to nikech watiyo gi michgo e pako Jehova.

10. Ang’o momiyo ok en gima nyiso rieko pimruok gi ng’at machielo?

¹⁰ Ka ok watang’, wanyalo chako pimo nyalowa gi nyawo mar ng’at machielo. Kuom ranyisi, owadwa moro nyaloga golo twege mabeyo ahinya, mano mich ma en-go. Kata kamano, e chunye onyalo chako chayo owadwa moro ma ok olony e golo twege. To samoro owadwa ma ok lony e golo twegeno en jarwak welo, osetiego nyithinde  e yo maber, kendo en jakinda e tij lendo. To mano kaka wamor ni wan gi owete gi nyimine mang’eny ma nigi mich mopogore opogore, ma tiyo gi michgo e pako Jehova, kendo e konyo Jokristo wetegi!

11. Ang’o momiyo onego watem mondo waluw ranyisi mar Yesu?

¹¹ Kata obedo ni ok onego wapimre gi jomamoko, wanyalo yudo ber ka wanono ranyisi mag jotich Jehova momakore kode. Watiuru ane gi ranyisi mar Yesu e lero wachno. Kata obedo ni ne en ng’at makare chuth, pod wanyalo puonjore gik mang’eny kuom nono kite kod ngimane. (1 Pet. 2:21) Ka watimo duto ma wanyalo mondo waluw ondamoge machiegni kaka nyalore, wabiro medo moro Jehova kendo wabiro yudo nyak e tijwa mar lendo.

12-13. Ang’o ma wanyalo puonjore kuom ranyisi mar Ruoth Daudi?

¹² Muma nigi ranyisi mang’eny mag chwo gi mon ma nomakore motegno gi Jehova, kendo ma noketonwa ranyisi maber kata obedo ni ne girem. (Hib. 6:12) Achiel kuomgi en Ruoth Daudi ma Jehova noluongo ni “jal ma chunya ohero.” (Tich 13:22) Jehova nowuoyo kuome kamano, to ne ok en ng’at makare chuth. Notimo richo moko madongo ahinya. Kata kamano, pod ne oketonwa ranyisi maber ahinya. E yo mane? Ka norieye ne ok otemo rendore. Kar mano, norwako siem ma nomiye kendo noloko chunye gadier. Mano nomiyo Jehova ong’wonone.​—Zab. 51:3, 4, 10-12.

¹³ Wanyalo puonjore kuom ranyisi mar Daudi ka wapenjore penjogi: ‘Arwakoga nade siem momiya? Be anenoga mapiyo kethona koso atemoga rendora? Dibed ni aketoga ketho kuom jomamoko? Be atemoga duto ma anyalo mondo kik anwo kethona kendo?’ Inyalo penjori penjo kaka mago sama isomo ranyisi mag jotich Jehova mamoko ma Muma wuoyo kuomgi. Dibed ni ne ginyagore gi pek ma chalo gi ma sani iromogo? Gin kido mage mabeyo ma ne ginyiso? Sama itimo kamano, penjri bende niya: ‘Ere kaka anyalo luwo ranyisi mar ng’atno?’

14. Ber mage ma wayudo sama wanono ranyisi mag Jokristo wetewa?

¹⁴ Wanyalo yudo ber bende ka wanono ranyisi mag Jokristo wetewa, bed ni gin joma tindo kata joma dongo. Kuom ranyisi, be nitie ng’ato e kanyaklau ma nano e tem moro?  Dibed ni mbesene thung’e ni otim gimoro marach, oromo gi akwede mag joodgi, kata otuore? Be ineno kido mabeyo ma en-go ma diher bedogo? Ka inono ranyisi maber ma oseketo, ibiro puonjori yore minyalo nyagorigo gi tembe ma iromogo. To mano kaka wamor bedo gi joma kamago, ma oseketonwa ranyisi maber, kendo ma wanyalo luwo yiegi! Ranyisi kaka mago miyo wabedo mamor!​—Hib. 13:7; Jak. 1:2, 3.

15. En siem mane ma jaote Paulo nochiwo ma nyalo konyowa siko ka wamor e tij Jehova?

¹⁵ Mondo kue kod winjruok obed e kanyakla, dwarore ni ng’ato ka ng’ato otim duto monyalo e tij Jehova. Par ane ranyisi mar Jokristo mokwongo. Ne gin-gi mich mopogore opogore kod migepe mopogore opogore. (1 Kor. 12:4, 7-11) Kata kamano, mano ne ok omiyo gibedo gi piem kod pogruok e kindgi. Kar mano, Paulo nojiwo ng’ato ka ng’ato kuomgi mondo otim duto monyalo “mondo giger ringruok mar Kristo.” Paulo nondiko ne Jo-Efeso niya: “Ka fuoni ka fuoni tiyo kare, mano konyo ringruok dongo, nimar ogerore owuon kuom hera.” (Efe. 4:1-3, 11, 12, 16) Joma notimo gima Paulo nonyisogino nojiwo kuwe kod winjruok e kanyakla, kendo mago e kido ma waneno e kanyakla e kindegi.

16. En ang’o ma onego wang’ad e chunywa ni wabiro timo? (Jo-Hibrania 6:10)

¹⁶ Ng’ad e chunyi ni ok ibi pimori gi jomamoko. Kar mano, puonjri kuom ranyisi mar Yesu kendo tem matek mondo ibed gi kido kaka mage. Puonjri kuom ranyisi mag jotich Jehova machon, kod ma kindegi. Sama idhi nyime miyo Jehova gima ber moloyo, bed gadier ni ‘Nyasaye ok en ng’at ma ok kare ma wiye diwil gi gik ma isetimo.’ (Som Jo-Hibrania 6:10.) Dhi nyime tiyo ne Jehova kimor ka iketo e paro ni omor ahinya gi kinda duto mitimo mondo imore.