1. Engin nge hlimna dik tak min neihtîr?

 JEHOVA chuan hlim tûrin min duh a. Chumi kan hriat chhan chu hlimna hi a thlarau rah pêngte zînga pakhat a nih vâng a ni. (Gal. 5:22) Lâk aia pêkin lukhâwng a neih avângin, Kristian rawngbâwlnaa a kima kan tel hunah leh kawng hrang hranga unaute kan ṭanpui hunah chutiang hlimna chu kan nei a ni.—Tirh. 20:35.

2-3. (a) Galatia 6:4-a sawi angin, Jehova rawngbâwlnaa hlimna nei reng tûra min ṭanpuitu thil pahnih chu eng nge ni? (b) He thuziakah hian eng nge kan sawiho vang?

² Tirhkoh Paula chuan Galatia 6:4-ah hlimna nei reng tûra min ṭanpuitu thil pahnih a sawi a. (Chhiar rawh.) Pakhatna, kan thiltum chu Jehova hnêna kan neih ṭhat ber pêk hi a ni. Kan neih ṭhat ber kan pe a nih chuan kan hlim ngei ang. (Mt. 22:36-38) Pahnihna, mi dangte nêna inkhaikhin chu kan pumpelh tûr a ni. Kan hrilsêlna te, zirtîrna dawn te, leh pianpui theihnate avânga kan thil hlen chhuahte chu eng pawh ni se, Jehova chungah kan lâwm tûr a ni. Dik tak chuan, kan thil neih zawng zawng hi a hnên aṭanga kan dawn a ni a. Kawng leh lamah chuan, unaute chu rawngbâwlna pêng ṭhenkhatah kan aia an hlawhtling zâwk a nih pawhin, an theihnate chu mahni inchawimawi nân leh hamṭhatna atâna hmang lo va, Jehova chawimawi nâna an hman avângin kan lâwmpui tûr a ni a. Chutiang chuan anmahni el ahnêkin an hnên aṭangin kan inzîr zâwk tûr a ni.

³ He thuziakah hian rawngbâwlnaa kan duh anga tama kan tel theih loh avânga lunghnualna kan neih huna min ṭanpui theitu thilte kan hmu ang. Chu bâkah, kan neih mai theih thilpêk eng pawh a ṭha thei ang bera kan hman theih dân leh mi dangte entawn tûr siam aṭanga kan zir theihte pawh sawiho a ni bawk ang.

4. Eng dinhmunin nge lunghnualna min thlen thei? Entîrna pe rawh.

⁴ Jehova chhiahhlawh ṭhenkhat chuan kum upatna leh hrisêl lohna avânga tûn hma anga an thawh tam theih tawh loh avângin lunghnualna an nei a. Unaunu Carol-i chu chutiang dinhmunah chuan a awm a ni. Tûn hma chuan, mamawh zualna hmunah rawngbâwl theihna chanvo hlu a nei a. Chutih hun lai chuan, Bible zirpui 35 lai a neih bâkah, mi eng emaw zât chu inpumpêka baptisma chang tûrin a ṭanpui thei a ni. A rawngbâwlna chu a hlawhtling hle! A hnua a hrisêlnate a lo tlâk hniam tâkah chuan, a hun tam zâwk chu ina a awm a ngai ta a. Unaunu Carol-i chuan, “Ka hrisêl lohna avângin unau dangte thawh ang chu ka thawk ve thei tawh lo va; chuvângin, anmahni tlukin ka rinawm lo ni hian ka inhria. Ka duh anga tama rawngbâwlnaa ka tel theih lohna chuan lunghnualna min thlen a ni,” tiin a sawi. Unaunu Carol-i chuan Jehova tâna theih tâwp chhuah chu a duh a. Chu chu a fakawm hle! Hmangaihna nei tak kan Pathian chuan unaunu rilru put hmang ṭha chu a ngaihlu ang tih kan chiang thei a ni.

5. (a) Tih theih chin tâwk kan neihnain min tilunghnual a nih chuan eng nge kan hriat reng ang? (b) Milema kan hmuh angin, engtin nge unaupa chuan Jehova rawngbâwlnaah theih tâwp a chhuah zawm zêl?

⁵ Tih theih chin tâwk i neihnain a tilunghnual che a nih chuan, heti hian inzâwt ang che, ‘Jehova’n ka lakah eng nge a beisei?’ tiin. Tûna i dinhmuna theih tâwp chhuah tûrin a duh che a ni. Hei hi han ngaihtuah teh: Kum 80 chuang tawh unaunu chu kum 40 chho bâwr vêl a nih lai anga rawngbâwlnaa a tel theih tawh loh avângin a lunghnual a. Theih tâwp a chhuah chung pawhin, chu chuan Jehova a tilâwm lo niin a ngai a ni. Mahse, chutiang chu a ni tak tak em? Hei hi han ngaihtuah leh teh. Chu unaunu chuan kum 40 chho bâwr vêl a nih lai ang bawkin, kum 80 a chuan hnuah pawh theih tâwp a la chhuah zawm zêl a, englai mahin a inthlahdah ngai lo. Kan rawngbâwlnain Jehova a tilâwm tâwk lo nia inhriatna kan nei ṭan a nih chuan, Jehova chu amah tilâwmtu tûr tehna siamtu a ni tih mahni kan inhriat nawntîr a ngai a ni. Theih tâwp kan chhuah phawt chuan, Jehova’n: “I ti ṭha e!” tiin min hrilh ngei ang.—Matthaia 25:20-23 nên khaikhin rawh.

6. Unaunu Maria-i entawn tûr siam aṭangin eng nge kan zir theih?

⁶ Kan tih theih lohte ni lovin, kan tih theihte kan ngaihven tlat a nih chuan hlimna neih a awlsam lehzual tih kan hria ang. Natna avânga rawngbâwlnaa duh anga tama thawk thei tawh lo unaunu Maria-i hi han ngaihtuah teh. A tîr chuan, rilru hahna nasa tak a neiin, ṭangkaina nei lo ni hian a inhria a. Mahse, a hnuah, kohhrana unaute zîngah khum beta dam lo unaunu pakhat a awm tih a hriat chuan, ṭanpui a tum ta a. “Phone leh lehkhathawn hmanga rawngbâwlnaa kan thawh dun theih nân ruahmanna ka siam a. Chutianga kan thawh dun apiangin, ka unaunu ka ṭanpui thei tih inhriatna neiin hlim leh lâwm takin ka haw ṭhîn,” tiin a sawi. Keini pawhin kan tih theih lohte ni lovin, kan tih theihte chauh ngaihven tlatin kan hlimna kan tipung thei a ni. A nih leh, Jehova rawngbâwlnaah tam lehzualin kan thawk thei emaw, rawngbâwlna pêng ṭhenkhatah kan thawk ṭha hle emaw a nih chuan engtin nge ni ang?

7. Tirhkoh Petera’n Kristiante hnênah eng thurâwn ṭangkai tak nge a pêk?

⁷ Thlarauva thâwk khum a lehkhathawn pakhatnaah, tirhkoh Petera chuan a unaute chu  thilpêk leh thiamna an dawn eng pawh chu an unaute tihchak nâna hmang tûrin a fuih a. Ani chuan: “Pathian khawngaihna thilpêk tam tak enkawltu ṭhate angin thlarau lam thilpêk in dawn apiang chu rawng inbâwlsak tawn nân hmang rawh u,” tiin a ziak a ni. (1 Pet. 4:10, C.L. Re-edited.) Mi dangin min thîk emaw, an lunghnual emaw kan hlauh avâng maiin kan thilpêk dawnte chu a ṭha thei ang bera hman kan hreh tûr a ni lo. Kan hreh a nih chuan, Jehova hnênah kan neih ṭhat ber kan pe thei lo vang.

8. Korinth thawn khat 4:6, 7-a sawi angin, engvângin nge kan thilpêk dawn avânga kan chapo loh vang?

⁸ Kan thilpêk dawnte chu a ṭha thei ang bera kan hman a ngai a; mahse, chûngte avânga chapo lo tûrin kan fîmkhur tûr a ni. (1 Korinth 4:6, 7 chhiar rawh.) Entîr nân, in lama Bible zirpuina kawngah i hlawhtling hle pawh a ni thei. Chu i thilpêk dawn chu hmang hreh suh! Kan thilpêk dawn hman leh chumi chapopui chu thil hrang daih a ni. Tûn hnai maia rawngbâwlnaah thiltawn ṭha tak i neiin, Bible zirpui i nei ṭan hial angah han inchan teh. Chumi chungchâng chu i rawngbâwlna group-a unaute hnêna hrilh i châk hle a. Mahse, group-a unaute nêna in inhmuh chuan, unaunu pakhatin magazine a sem chhuahnaa a thiltawn chu a lo hrilh mêk a. Ani chuan magazine a sem a; nang chuan Bible zirpuina i ṭan a ni. Eng nge i tih tâk ang? I thiltawn chuan unaute chu a tichak dâwn tih hre mah la, magazine sem chhuaktu unaunu hlimna tihkiam i duh loh avângin, ṭum danga sawi chu i tum ta a ni. Chu chu ngilneihna thiltih a ni ngei ang. Mahse, mite hnêna Bible zirpui an duh leh duh loh zawh chu bânsan rêng rêng suh. Chu chu i thilpêk dawn a ni a—hmang ṭangkai ang che!

9. Engtin nge kan thilpêk dawnte chu kan hman ang?

⁹ Theihna kan neih eng pawh hi Pathian hnên aṭanga kan dawn thilpêk a ni tih i hre reng ang u. Chûng thilpêkte chu mahni inchawimawi nân ni lovin, unaute tihchak nân kan hmang tûr a ni. (Phil. 2:3) Pathian duh zâwng tih nâna kan chakna leh theihnate kan hman hian mi dangte aia kan thawh tam vâng emaw, anmahni aia chungnun kan tum vâng emaw ni lovin, Jehova chawimawi nâna kan thilpêk dawnte hmang kan nih avângin hlimna tûr chhan kan nei a ni.

10. Engvângin nge mi dangte nêna kan inkhaikhin loh vang?

¹⁰ Kan fîmkhur loh chuan, kan chakna leh mi dangte chak lohna khaikhin duhna thangah kan âwk palh thei a. Entîr nân, unaupa pakhat chuan vântlâng thusawi ṭha tak a pe a. Chu  chu a chakna a ni. Mahse, a thinlungah thusawi harsat tak unau tu emaw chu a ngainêp palh thei a. Amaherawhchu, thusawi harsat tak unaupa chu khualchhâwn thiam, fate zirtîr taima, leh rawngbâwlnaa ṭhahnemngai tak pawh a ni thei. Jehova rawngbâwl nân leh mi dangte ṭanpui nâna an thilpêk dawnte hmangtu thiamna nei unau tam tak kan neih avângin kan va lâwm tak êm!

11. Engvângin nge Isua entawn tûr siam chu zui kan tum tlat ang?

¹¹ Mi dangte nêna inkhaikhin chu kan pumpelh a ngaih rualin, unau rinawmte entawn tûr siam aṭanga inzir chu kan hlâwkpui thei a ni. Entîr nân, Isua chungchâng hi han ngaihtuah teh. Amah anga ṭha famkim ni lo mah ila, a mize duhawm takte leh a thiltih dânte aṭangin kan inzir thei a. (1 Pet. 2:21) Theih tâwp chhuaha a entawn tûr siam kan zui tlat hian Jehova chhiahhlawh ṭha lehzual kan niin, rawngbâwlnaah kan hlawhtling lehzual a ni.

12-13. Lal Davida hnên aṭangin eng nge kan zir theih?

¹² Bible-ah hian ṭha famkim lo an ni chung pawha, mi rinawm a hmei a pate entawn tûr siam ṭha tak tak kan hmu a. (Heb. 6:12) Jehova’n “ka thinlung ang pu mi,” a nih loh leh Bible lehlin danga “ka mi duh zâwng tak,” tia a sawi Lal Davida hi han ngaihtuah teh. (Tirh. 13:22) Davida chu ṭha famkim a ni bîk lo. Dik tak chuan, thil sual lian takte a ti a. Chuti chung pawhin, ani chu kan tâna entawn tûr ṭha tak a ni. Engvângin nge? Zilh a nih khân, mahni thiam thu sawi a tum lo. Chu aiin, zilhna khauh tak a dawn chu pawmin, a thil sual tih avângin inchhîrna dik tak a lantîr zâwk a. Chuvângin, Jehova’n a ngaidam a ni.—Sâm 51:3, 4, 10-12.

¹³ ‘Engtin nge zilhna chu ka chhân lêt? Ka thil tihsualte chu ka pawm nghâl vat nge ni a, chhuanlam siam ka tum ṭhîn zâwk? Mi dangte mawhpuh ka chîng em? Ka thil tihsualte chu tihnawn tawh loh ka tum tlat em?’ tia inzâwtin Davida hnên aṭangin kan inzir thei a ni. Bible-a mi rinawm a hmei a pate chanchin i chhiar hunah chutiang zawhnate chu i inzâwt thei a. An hmachhawn harsatnate chu i hmachhawn harsatnate nên a inang em? Entawn tlâk eng miziate nge an lantîr? Dinhmun tinah chuan: ‘Engtin nge he Jehova chhiahhlawh rinawm ang hi ka nih lehzual theih?’ tiin inzâwt ang che.

14. Engtin nge kan Kristian unaute hnên aṭanga kan inzir theih?

¹⁴ Kan Kristian unau a pui a pangte hnên  aṭang pawhin kan inzir thei a. Entîr nân, rualpuite nêksâwrna te, chhûngte dodâlna te, leh hrisêl lohnate ang chi fiahnate rinawm tak leh chhel taka tuartu kohhrana unau tu emaw hriat i nei em? Nasa lehzuala lantîr i duh mize duhawm tak a lo nei reng tih i hmu em? A entawn tûr siam chhût ngunna hmangin, fiahna i tawhte chhel taka tawrh chhuah dân kawngte i hre mai thei a ni. Rinna kawnga chutianga entawn tûr ṭha siamtu unaute kan nei chu kan va lâwm tak êm!—Heb. 13:7; Jak. 1:2, 3.

15. Jehova rawng kan bâwlnaa hlimna nei zawm zêl tûra min ṭanpuitu eng fuihna nge Paula’n min pêk?

¹⁵ Kohhranah remna leh inpumkhatna awm tûr chuan, mi tin hian theih tâwp kan chhuah ṭheuh a ngai a. Kum zabi khatnaa Kristiante kha han ngaihtuah teh. Thilpêk dawn leh chanvo hrang hrang an nei hlawm a. (1 Kor. 12:4, 7-11) Mahse, chûngte chuan inelna leh inṭhen darhna a awmtîr lo. Chu aiin, Paula chuan ‘Krista taksa siam ṭha tûra’ inṭanpui tawn tûrin a fuih ṭheuh a ni. Ephesi khuaa mite hnênah, “Pêng tin thawhzia ang ṭheuhvin hmangaihnaa insiam ṭha tûrin taksa chu a lo tipung ṭhîn,” tiin a ziak a ni. (Eph. 4:1-3, 11-13, 16) A fuihna zâwmtute chuan tûn laia unaute zînga kan hmuh ang hian kohhranah remna leh inpumkhatna an awmtîr a ni.

16. Eng tih nge kan tum tlat ang? (Hebrai 6:10)

¹⁶ Mi dangte nêna inkhaikhin chu pumpelh tum tlat rawh. Chu aiin, Isua hnên aṭangin inzir la, a miziate chu entawn tum zâwk ang che. Rinna lantîrna kawnga Bible-a entîrnate leh tûn laia entîrnate chu hlâwkpui rawh. Theih tâwp i chhuah zawm zêl rualin, Jehova chu ‘i rawngbâwlna theihnghilh tûrin mi fel lo a ni lo,’ tih hre reng ang che. (Hebrai 6:10 chhiar rawh.) Jehova’n amah tilâwm tûra thinlung zawng zawnga i thawhrimnate chu a ngaihlu tih hriain, a rawngbâwlnaah hlimna nei zawm zêl ang che.