1. Jméni xi tsjoa báya tokoán.

 ʼYAÑÁ nga kui xi mele Jeobá nga tsjoa sa̱tío tokoán, nga̱ je kjoatsjoa yaa tíjnajin je kjoanda xi tsjoá nganʼiotsje (Gál. 5:22). Ngisaa tsjoa satío tokoán kʼianga bʼé jme xi tjínná, kuinga tsjoa satíoni tokoán kʼianga ʼmiyaa Énle Niná kʼoa nga binyakoaa je ndsʼee (Hech. 20:35).

2, 3. 1) Tojo tso Gálatas 6:4, jméni xi koasenkaoná nga tosi tonda tsjoa sa̱tío tokoán. 2) Jmé xi chótʼayajiaan i̱ kjoaʼmiya jebi.

² Jméni xi koasenkaoná nga tosi tonda tsjoa sa̱tío tokoán. Je pastro Pablo jao koya tjínni xi kisikʼaxki̱ xi koasenkaoná. Kui jmeni xi faʼaitʼa Gálatas 6:4 b (tʼexkiai). Xi títjon, tsjoa sa̱tío tokoán josʼin tinixálee Niná kʼiatsa kʼoénelee yaoná jokji tjen kʼoakoa̱nná. Kʼoa kui xi machjén nga sʼiaan ngatsʼiaa (Mat. 22:36-38). Xi majaoni, nga tsín xíngiaa si̱ngósonkoaa yaoná. Tsa kuinga tsín jme chʼin tjínná nga nda nixáñá, tsakui nga nda tsakʼinyaná jngo xá kʼoa tsakuije̱ nga ngotjo maniná tsa jmeni, je Jeobá kʼoailee kjoanda, nga̱ tʼatsʼe tínroani ngayeje jmeni xi maná nʼia. Tsa tjíokʼa ndsʼee xi ngisa nda male tsoyason tikʼoajinni ñá, tsjoa kʼoé tokoán nga̱ kʼoasʼin tjíobʼasjengʼani Jeobá kao jmeni xi male sʼín. Ali tsakuijin kʼoasʼínni nga to yaole kʼoasjengʼa kʼoa tsa tokuije̱ nga nda kʼoaxki̱. ʼNdele nga je si̱ngósonkoaa yaoná, tosa chjénngiaa jmeni xi sʼín.

³ I̱ kjoaʼmiya jebi kui jchaa jméni xi koasenkaoná nga tsín si̱kʼajenlee tokoán ninga tsín kʼoakji bichó nganʼioná jokji mená nga si̱xálee je Jeobá. Kʼoati jchaa jósʼiaan nga nda si̱chjén jmeni xi maná nʼia kʼoa jósʼin koa̱n chjénngiaa jmeni xi sʼín xi kjaʼaí.

4. Jméni xi sikʼajen tokoán. Tʼeyanajmí xi tʼatsʼe Carol.

⁴ Tjínkʼa ndsʼee xi jejchínga kʼoa xi chʼin tjínle xi síkinroajen kon nga tsín ma kʼoakji síxále je Jeobá josʼin mele tsakai. Kʼoakoan jngo tichjaa xi Carol ʼmi, xi ya kitsjoanganʼio ngasʼa jñani ngisa machjén xi tsoyason, kʼoa 35 koanni chjota xi Biblia kitsoyale. Nkjín chjota tsakasenkao nga kitsjoatʼale yaole je Jeobá kʼoa nga kisʼenngindá. Tichjaa jebi nʼio nda kisixále je Jeobá, tonga chʼin kiskatʼale kʼoa alikui tinanda koan kitjoni ndʼiale. Itso tichjaa jebi: “Nga chʼin tjínna ʼbeña nga tsín koa̱n kʼoakjitse sixále Niná josʼín ndsʼee xi kjaʼaí, ninga kʼoalani sakʼoa kʼoasʼin sikjaʼaitsjen nga tsín kʼoasʼin kixi tífitʼale Niná josʼín je ndsʼee. Mena nga tsesa sixále je Jeobá tonga tsín timani. Kʼoa kui jebi xi síkinroajen tokoan”. Je Carol kui xi mele nga kʼoakji sixále Jeobá jokji tjen kʼoakoa̱nle, kʼoa nʼio ndatjín nga kʼoasʼin síkjaʼaitsjen. Je Niná tjínle kjoamatokon kʼoa tsín jao tjín tokoán nga chjí be jmeni xi sʼín je Carol.

5. 1) Jméni xi kuenta sʼiaan tsa nikʼajenlee tokoán nga tsín kʼoakji nixálee Jeobá josʼin mená tsakai. 2) Tojosʼin matsen je sén xi faʼaitʼa kjoaʼmiya jebi, jméni xi tísʼín je ndsʼee nga nda tísíxále ngantsjai je Jeobá.

⁵ Tsa nikʼajenlee tokoán nga tsín tikʼoakji tse nixánilee Niná jokji mená, si̱kjaʼaitsjenjiaan jebi: “Jméni xi mele je Jeobá nga sʼian”. Je Jeobá kui xi mele nga nda si̱xálee jokji tjen kʼoakoa̱nná. Jngola choa̱ kʼoéjnaa. Jngo tichjaa xi 80 nóle xi síkʼajenle kon nga tsín tikʼoakji tse síxánile Jeobá tojo kisʼin nga sʼa 40 nóle. Kʼoasʼin síkjaʼaitsjen nga tsín tsjoa tjín kon Jeobá xi tʼatsʼe ninga tíbʼénele yaole jokji tísíxále. Tonga a kʼoatjín josʼin síkjaʼaitsjen. Kataʼyala. Tsa nda kisixále Jeobá tichjaa jebi kʼianga 40 nóle kʼoa nga tojo kʼoatísʼín ndʼaibi nga jeñokan nóle, kui xi tsonile nga tojo nda tísíxále je Niná. Tsa kʼoasʼin nikjaʼaitsjeen nga tsín tisasénnile Jeobá jokji tinixálee, kuenta sʼiaan nga je xi tsoni jméni xi sasénle kʼoa jméni xi mai. Je Jeobá sa̱sénle kʼiatsa kʼoénelee yaoná nga si̱xálee jokji tjen kʼoakoa̱nná (tingósonkoai Mateo 25:20-23).

6. Jméni xi bakóyaná je choa̱le tichjaa María.

⁶ Je xi koasenkaoná nga tosi tonda tsjoa sa̱tío tokoán kuinga kui kuenta sʼiaan jmeni xi koa̱nná kʼoasʼiaan, ʼndele nga tokui kuenta sʼiaan jmeni xi tsín kuichotjenngiaa. Kataʼyala choa̱le María, nga chʼin tjínle tichjaa jebi alikui titse tsoyasonni. Nga títjon nʼio ba kisʼe kon kʼoa kʼoasʼin kisikjaʼaitsjen nga tsín tijme chjínile. Tonga tichjaa jebi kisʼejinle nga jngo tichjaa tíjna ya jinjtín xi to nachansa kijnason. Kʼoa koanmele tsakasenkao. Itso je tichjaa María: “Kikonle ya ndʼiale kʼoa ñatjen tsakʼinyasonníjin nga kinokjoalaijin je chjota kao teléfono kʼoa nga kichjijin carta. Kʼianga bichoña ndʼiana ñaki tsjoa tjín tokoan nga kʼoasʼin basenkoa je tichjaa”. Kʼoati tsjoa sa̱tío tokoán tsanda ñá kʼiatsa kui kuenta sʼiaan jmeni xi koa̱nná kʼoasʼiaan. Kʼoa jósʼiaan kʼiatsa koa̱n nga tsesa si̱xálee je Niná kʼoa tsa tjíokʼa xále Niná xi nʼio nda maná nitjosoán.

7. Jmé kjoafaʼaitsjen kitsjoale pastro Pedro je chjotatjenngile Cristo.

⁷ Kʼianga kiski je carta xi títjon, je Pedro kʼoakitsole je ndsʼe̱ nga katasíchjén jmeni xi male sʼín nga sinʼiojin xínkjín. Itso xi kiski: “Josʼin kjoanda tsakʼaile, nga jngójngó katasíchjén tʼatsʼe xi kjaʼaí. Katasíchjén josʼin xi nda síchjén xi kjaʼaíngá kjoandale Niná” (1 Ped. 4:10). Alikui koa̱n nga tokui  tsín kʼoasʼianñá jmeni xi maná nʼia tsa kʼoasʼin si̱kjaʼaitsjeen nga koa̱nxinkonkená xi kjaʼaí kʼoa tsa kjoaʼajen kon. Tsa kʼoasʼiaan alikuijinni kui tibʼailee je Jeobá xi ngisasa nda.

8. Tojo tso 1 Corintios 4:6, 7, ánni nga tsín tokui ngʼa chʼa̱sjeñá yaoná jmeni xi maná nʼia.

⁸ Ndatjín nga kʼoasʼiaan jmeni xi maná nʼia, tonga alikui koa̱n nga tokui ngʼa chʼa̱sjeñá yaoná (tʼexkiai 1 Corintios 4:6, 7). c Tobʼelañá, tsa choa ñʼai maná nga Biblia ʼmiyalee chjota, ndatjín nga tosi tonda kʼoasʼiaan. Alikui chʼaotjín nga maná nichjén jmeni xi maná nʼia, je xi chʼaotjín kʼiaa tsa tokui ngʼa chʼa̱sjeñá yaoná. Si̱kjaʼaitsjenla tsa ndasʼin kichomani nga tiʼmiyasoán kʼoa tsa jngo chjota kiskajiaan xi Biblia tsakʼinyalee. Mejinná kʼoéyanajmílee je ndsʼee xi ngikʼa jokoanni nga kiskajiaan jngo chjota xi Biblia tiʼmiyalee. Tonga kʼianga jeya tiyoaa kao je ndsʼee, tsa jngo tichjaa kuinóʼyalee nga kʼoatítso nga jngo revista kisikájnale chjota. Jósʼiaan, a tojo kʼoéyanajmíñá. Ningalani ʼyaa nga koasenkao je ndsʼee nga kʼoakʼuínlee nga jngo estudio tsakʼetsʼiakoaa. Tsakui nichxin tongisa nda nga skan kʼoéyanajmiá, ánni nga tsín chʼao sʼe̱ni kon je tichjaa. Kʼoasʼin koakoñá kjoanda tsa kʼoasʼiaan. Tonga machjén nga tosi tonda kjoásjee chjota xi Biblia kʼuínyalee kʼiatsa choa ñʼai maná nga kʼoanʼia.

9. Jósʼin tjínnele si̱chjén jmeni xi maná nʼia.

⁹ Kuenta sʼiaan nga tʼatsʼe Niná tínroani tsa jmeni xi maná nʼia. Kʼoasʼin si̱chjén kjoanda jebi nga kʼoainganʼiolee je ndsʼee ʼndele nga to yaoná chʼa̱sjengʼaa (Filip. 2:3). Tsjoa báya tokoán kʼianga kʼoasʼin nichjén nganʼioná kao jmeni xi maná nʼia nga nixálee Niná. Nga̱ jé Jeobá chʼasjengʼaa, ali tsakuijin nga ñá ngisa ngʼa chʼasjee yaoná tikʼoajinni xi ngikʼa, kʼoa tsín mená nga kʼoasʼin sikjaʼaitsjen xíngiaa nga ngisa ngʼa tiyolee.

10. Ánni nga tsín ndatjínni nga xíngiaa ningósonkoaa yaoná.

¹⁰ Alikui ndatjín tsa je si̱ngósonkoaa yaoná xi ngikʼa jmeni xi maná nʼia ñá kʼoa jmeni xi sʼín je. Jngola choa̱ si̱kʼéjna. Tobʼelañá, tsa jngo ndsʼee xi nʼio nda male tsjoá kjoanokjoaya, tsakui nichxin kʼoasʼin síkjaʼaitsjen nga ngisa male je tikʼoajinni jngo ndsʼee xi ñʼai male. Ningalani ñʼai male  ndsʼee jebi nga tsjoá kjoanokjoaya, tonga tjín jmeni xi nda male sʼín. Tobʼelañá, tsa nda chjota, tsa nda tísíjchá je ʼndíxtile kʼoa tsa kao kjoatsjoa tsoyason. Nʼio tsjoa maná nga tjío je ndsʼee kao tichjaa xi nda tjíosíchjén jmeni xi male sʼín nga nda tjíosíxále je Jeobá kʼoa nga binyakao xi kjaʼaí.

11. Ánni ndatjínsíni nga chjénngilee jokisʼin je Jesús.

¹¹ Ningalani tsín ndatjín nga xíngiaa ningósonkoaa yaoná, tsee jmeni xi maná kʼianga mangíntjenngiaa je choa̱ xi batío choʼndale Niná. Tobʼelañá, jé Jesús xi ngisa nda choa̱ tsakʼéjna xi koa̱n chjénngilee. Ningalani tsín chjotatsje maa joni je, koaan chjénngilee jokoankjoan kʼoa jokisʼin (1 Ped. 2:21). Kʼiatsa kʼoénelee yaoná nga chjénngilee je Jesús, ngisa nda si̱xálee je Jeobá kʼoa ngisaa nda kuichomani kʼianga kʼuínyasoán.

12, 13. Jmé xi bakóyaná jokisʼin je rey David.

¹² Ya Biblia nchjani xi tʼatsʼe xi xʼin kao xi yánchjín xi kʼoati koa̱n chjénngilee ningalani chjotajée koan (Heb. 6:12). Tobʼelañá, je Jeobá i kitso xi tʼatsʼe rey David: Jekisokona “jngo chjotaxʼin xi tjínjngolekon ni̱ma̱na” (Hech. 13:22). Je David ali tsa chjotatsjejin koan. Sakʼoa tse jée tsakajngi. Ninga kʼoalani, nda choa̱ tsakʼéjnaná jokisʼin kʼianga tsakichakjáyale kʼoa ali tsa yaolejin tsakasenngi. Tsakʼaʼén nga tsakʼaile kjoafaʼaitsjen kʼoa kʼoakoannile je jée xi tsakajngi, kuinga kisichatʼanile je Jeobá (Sal. 51:3, 4, 10-12).

¹³ Je choa̱le David koasenkaoná kʼiatsa si̱kjaʼaitsjenjiaan jebi: “Jósʼian kʼianga ʼya xi kjoafaʼaitsjen tsjoána. A majinna nga kʼoatjín jmeni xi tíʼmina axo totjín totjen xi base̱nngiña yaona. A kjaʼaí xi fane jée. A bʼenele yaona nga tsín tikui jée koanjngiña”. Kʼianga chótʼayajiaan xi tʼatsʼe choʼndale Niná xi kixi kitʼale, xi xʼin kao xi yánchjín, si̱kjaʼaitsjenjiaan jebi: “A kʼoati kui kjoa jaʼatojin joni tsa an. Jókisʼin ningalani kui kjoa jaʼatojin. Jósʼin koa̱n skenngile choʼndale Niná jebi”.

14. Jósʼin binyakaoná kʼianga kuenta nʼia je choa̱ xi batío je ndsʼee.

¹⁴ Kʼoati tse xi bakóyaná je ndsʼee xi sʼa xti kao xi jekoanjchínga. Tsakui nichxin tjíokʼa je ndsʼee ya jinjtínná xi kixi tjíofitʼale je Jeobá ninga kjoa tjíofaʼatojin. Tobʼelañá, tsa totaon be xtixínkjín, tsa familiale fitjenngike kʼoa tsakuije̱ nga táo chʼin tjínle. A koaan chjénngilee jotísʼín ndsʼee jebi. Tsa kuenta sʼiaan je choa̱ xi tjíobatío kui xi  koasenkaoná nga chókjoajinná je kjoa xi kuitjátojiaan. Nʼio chjí ʼyatokoán je ndsʼee xi kixi tjíofitʼale je Niná, nga̱ nkjín koya tjínni jmeni xi sʼín xi tsjoa báya tokoán (Heb. 13:7; Sant. 1:2, 3).

15. Jmé kjoafaʼaitsjen xi kitsjoa pastro Pablo xi koasenkaoná nga tosi tonda kao kjoatsjoa si̱xálee je Jeobá.

¹⁵ Tsa kʼoénelee yaoná jokji tjen kʼoakoa̱nná nga si̱xálee je Jeobá, nda kjuinkoaa xíngiaa kʼoa jtín sʼin kuiyoaa ya jinjtín. Kʼoakisʼin je ndsʼee xi kʼia tsakatio nga siglo 1. Kjaʼaí kjaʼaí xá xi kisʼenele kʼoa kjaʼaí kjaʼaí jmeni xi koanle kisʼin (1 Cor. 12:4, 7-11). Alikui xínkjín kisingósonkao kʼoa tsín xkoa̱ya tsakatio. Je Pablo kʼoakitsole je chjotale Cristo xi Éfeso tsʼe nga tjínnele jtín sʼin sixá ánni nga kuinngʼani “je yaole Cristo”. Kʼoa i kitsosa: “Xi totʼatsʼe Cristo ngayije yaole kʼoasʼin mayʼai mangʼa kao kjoatjaocha [...]. Kʼoasʼin tjínle nganʼio josʼin nga nda síxá jngójngó kʼa xi tsʼe yaole” (Efes. 4:1-3, 11, 12, 16). Nga kisitjoson kjoafaʼaitsjen xi kitsjoale Pablo, ndasʼin tsakatio kʼoa jtín sʼin tsakatio. Kʼoa kʼoasʼin tiyoaa ndʼaibi jinnaxinandále Niná.

16. Jméni xi machjén nga sʼiaan (Hebreos 6:10).

¹⁶ Alikui xíngiaa si̱ngósonkoaa, tosa je Jesús chjénngilee jokisʼin kʼoa jokoankjoan. Chjénngiaa choa̱le je choʼndale Niná xi tsakatio nichxin kjoatse kao xi tjío ndʼaibi. Tosi tonda si̱xálee je Jeobá jokji tjen kʼoakoa̱nná kʼoa kuenta sʼiaan nga je Jeobá alikui chajinle josʼin nga tinixálee (tʼexkiai Hebreos 6:10). d Tosi tonda kao kjoatsjoa si̱xálee je Jeobá nga̱ chjí be jokji bʼenelee yaoná nga nixálee.