1. Ki kitsoz donn nou boukou lazwa?

 ZEOVA anvi ki nou ere. Nou konn sa parski lazwa form parti frwi lespri sin Bondie. (Gal. 5:22) ‘Ena plis lazwa kan done ki kan resevwar,’ alor nou gagn boukou lazwa kan nou fer nou best dan nou minister ek kan nou ed nou bann frer ek ser.​—Zist. 20:35.

2-3. (a) Dapre Galat 6:4, sit de kitsoz ki pou ed nou pou res zwaye dan nou servis pou Zeova. (b) Ki nou pou examine dan sa lartik-la?

² Dan Galat 6:4, lapot Pol koz lor de kitsoz ki pou ed nou pou res zwaye. (Lir.) Premierman, nou bizin fer nou best pou Zeova. Si nou fer nou best pou Li, sa pou rann nou ere. (Mat. 22:36-38) Deziemman, fode pa nou konpar nou ar lezot. Mem si nou pena enn bon lasante, nou pa finn gagn boukou formasion, ouswa nou pena bann gran kapasite, nou bizin rekonesan anver Zeova pou tou seki nou pe kapav fer pou Li. Kifer? Parski se Li ki’nn donn nou tou seki nou ena. Si lezot pli efikas ki nou dan zot minister, nou bizin kontan pou zot parski zot pe servi zot bann talan pou donn loner Zeova. Zot pa pe rod zot prop laglwar ouswa zot prop lintere. Alor, olie ki nou fer konpetision avek lezot, nou bizin aprann ar zot lexanp.

³ Dan sa lartik-la, nou pou gete ki kitsoz kapav ed nou si nou santi nou dekouraze akoz bann limit ki nou ena. Nou pou gete osi kouma nou kapav servi bien bann don ki nou ena, ek kouma nou kapav aprann ar lexanp lezot.

4. Ki kitsoz kapav dekouraz nou? Donn enn lexanp.

⁴ Akoz zot laz ouswa zot lasante, sertin serviter Zeova nepli kapav fer parey kouma zot ti pe fer avan dan zot servis pou Zeova. Akoz sa, zot kapav dekouraze. Se seki ti ariv enn ser ki apel Carol. Avan, li ti pe al servi kot ti bizin plis proklamater. Sa lepok-la, li ti ena 35 letid Labib, ek li ti ed boukou dimounn pou pran batem. Carol ti bien efikas dan so minister! Me apre, li’nn tom bien malad, ek laplipar ditan, li bizin res lakaz. Carol dir: “Akoz mo lasante, mo kone ki mo nepli kapav fer parey kouma lezot, ek akoz sa, mo ti koumans panse ki zot ti pli fidel ki mwa. Mo pa kapav fer bann kitsoz ki mo anvi fer, ek sa bien dekouraz mwa.” Carol anvi fer so best pou servi Zeova, ek nou felisit li pou sa! Nou kapav sir ki Zeova, nou Bondie ki ena konpasion, bien apresie seki li pe fer, parski li pe fer so best!

5. (a) Ki nou bizin rapel si nou dekouraze akoz nou bann limit? (b) Dapre bann zimaz sa lartik-la, kouma sa frer-la inn fer so best pou Zeova toutlong so lavi?

⁵ Si parfwa to dekouraze akoz to bann limit, demann tomem, ‘Ki Zeova demann mwa pou fer?’ Li demann twa pou fer to best, dapre to sitiasion. Anou pran enn lexanp. Enn ser ki ena 80 an bien dekouraze, parski li nepli kapav fer parey kouma li ti pe fer avan kan li ti ena 40 an. Li panse ki, mem si li pe fer so best dan so servis pou Zeova, sa pa pe fer Zeova plezir. Me eski sa li vre? Reflesi lor la. Si sa ser-la ti pe fer so best kan li ti ena 40 an, ek ki li ankor pe fer so best kan li ena 80 an, savedir ki zame li pa’nn aret fer so best. Si nou panse ki, seki nou pe fer pou servi Zeova, li tro tigit pou fer Li plezir, nou bizin rapel ki se Zeova ki deside ki kitsoz fer Li plezir. Si nou pe fer nou best pou servi Zeova, nou kapav sir ki Li pou dir nou: “To finn bien fer.”​—Konpar ar Matie 25:20-23.

6. Ki nou kapav aprann ar lexanp Maria?

⁶ Nou pou zwaye si nou konsantre nou lor seki nou kapav fer, olie ki nou konsantre nou lor seki nou pa kapav fer. Anou pran lexanp enn ser ki apel Maria. Akoz so maladi, li pa kapav fer boukou dan so minister. O-koumansman, li ti bien dekouraze ek li ti santi li initil. Me apre, li ti mazinn enn ser dan so lasanble ki pa kapav sorti lor so lili, ek Maria ti desid pou ed li. Maria dir: “Mo ti organiz mwa pou pres ansam avek li par telefonn ek par let. Sak fwa ki mo ti pres avek li, kan mo ti rant lakaz, mo ti extra kontan parski mo ti reisi ed mo ser.” Nou osi, nou kapav ogmant nou lazwa si nou konsantre nou lor seki nou kapav fer, olie ki nou konsantre nou lor seki nou pa kapav fer. Asterla, anou gete seki nou kapav fer si nou ena inpe plis kapasite dan sertin domenn, ouswa si nou kapav fer plis dan nou servis pou Zeova.

7. Ki konsey lapot Pier ti donn bann Kretien?

⁷ Dan premie let ki li ti ekrir, lapot Pier ti ankouraz so bann frer ek ser pou servi bann don ek bann talan ki zot ena pou ankouraz lezot. Li ti dir: “Parey kouma sakenn inn gagn enn don, servi sa pou ed sakenn so kamarad kouma bann bon administrater faver Bondie.” (1 Pier 4:10, NW) Nou bizin servi bien bann kapasite ki nou ena. Fode pa nou trakase  tansion lezot zalou nou ouswa zot dekouraze akoz nou. Si, akoz seki lezot panse, nou ezite pou servi bann kapasite ki nou ena, nou pa pou fer nou best pou Zeova.

8. Dapre 1 Korintien 4:6, 7, kifer fode pa nou fer vantar si nou ena bann kapasite?

⁸ Nou bizin servi bien bann don ki nou ena, me nou bizin fer bien atansion ki nou pa fer gran-nwar. (Lir 1 Korintien 4:6, 7.) Anou pran enn lexanp. Kitfwa to ena kapasite pou koumans bann letid Labib fasilman. To bizin servi sa don-la! Selman, li bien inportan ki to pa fer vantar akoz bann kapasite ki to ena. Fer koumadir to dan predikasion ek to’nn reisi koumans enn letid Labib. Sirman to pou bien kontan pou rakont sa to bann frer ek ser, pa vre! Selman, kan to zwenn avek zot, enn ser pe rakonte kouma li’nn reisi donn enn kikenn enn piblikasion. Li’nn donn enn piblikasion; twa to’nn koumans enn letid Labib. Ki to pou fer? To kone ki to bann frer ek ser pou bien ankouraze si to rakont zot kouma to’nn koumans enn letid Labib. Me kitfwa to pou desid pou rakont zot sa dan enn lot moman, pou ki sa ser ki’nn donn enn piblikasion-la pa perdi so lazwa. Si to fer sa, to pou montre twa bon anver li. Selman, fode pa ki to aret koumans bann letid Labib. To ena enn don, alor servi li!

9. Kouma nou bizin servi bann don ki nou ena?

⁹ Fode pa nou bliye ki, ninport ki kapasite nou ena, se bann don ki Zeova inn donn nou. Alor, nou bizin servi sa bann don-la pou ankouraz nou bann frer ek ser, pa pou atir latansion lor noumem. (Fil. 2:3) Kan nou servi nou lafors ek nou bann kapasite pou fer volonte Zeova, sa pou rann nou zwaye. Nou pou zwaye, pa parski nou pe fer pli bien ki lezot, me parski nou pe servi nou bann kapasite pou donn laglwar Zeova.

10. Kifer li pa bon ki nou konpar noumem ar lezot?

¹⁰ Si nou pa fer atansion, kitfwa nou kapav koumans konpar seki nou kapav fer, ar seki lezot pa kapav fer. Anou pran enn lexanp. Enn frer kitfwa fer bann zoli diskour piblik. Se enn don ki li ena! Me dan so leker, kitfwa li panse ki li pli bon ki enn lot frer ki pa fer bien bann diskour piblik. Me sa lot frer-la, kitfwa li bien zenere, li form bien so bann zanfan, ouswa li bien aktif dan predikasion. Nou bien rekonesan ki nou ena bann frer ek ser ki  ena diferan kapasite, ek ki zot pe servi zot bann kapasite pou donn Zeova laglwar ek pou servi lezot!

11. Kifer nou bizin fer zefor pou swiv lexanp Zezi?

¹¹ Mem si fode pa nou konpar nou avek lezot, nou kapav aprann boukou ar lexanp bann lezot serviter Zeova. Meyer lexanp ki nou kapav imite se Zezi. Mem si nou pa parfe kouma Zezi, nou kapav aprann boukou kitsoz ar fason ki li ti azir ek ar bann zoli kalite ki li ti ena. (1 Pier 2:21) Si nou fer nou maximum pou swiv bien so lexanp, nou pou vinn bann pli bon serviter Zeova ek nou pou vinn pli efikas dan nou minister.

12-13. Ki nou kapav aprann ar lexanp Lerwa David?

¹² Dan Labib, ena lexanp boukou fidel serviter Zeova ki nou kapav imite, mem si zot ti inparfe. (Ebre 6:12) Anou pran lexanp Lerwa David. Zeova ti dir ki David ti enn “kikenn ki [so] leker bien kontan.” (Zist. 13:22) Selman, David pa ti enn zom parfe. An realite, li ti mem fer bann pese bien grav. Kanmem sa, David enn bon lexanp pou nou. Kifer? Parski kan Zeova ti disiplinn li, li pa ti tir bann pretext. Okontrer, li ti aksepte konsey bien ferm ki li ti gagne, ek li ti repanti pou seki li ti fer. Lerla, Zeova ti pardonn li.​—Ps. 51:3, 4, 10-12.

¹³ Nou kapav tir bann leson ar lexanp David, kan nou demann noumem: ‘Kouma mo reazir kan mo gagn bann konsey? Eski mo aksepte mo bann erer deswit, ouswa eski mo tir bann pretext? Eski mo abitie met tor lor lezot? Eski mo fer zefor pou pa refer mem erer?’ Kan nou lir lor lexanp bann lezot fidel serviter Zeova, nou kapav poz noumem bann kestion koumsa. ‘Eski zot ti gagn mem difikilte ki mwa? Ki bann zoli kalite zot inn manifeste?’ Ek pou sak lexanp, nou kapav demann noumem: ‘Kouma mo kapav vinn parey kouma sa fidel serviter Zeova la?’

14. Kouma nou kapav aprann ar lexanp nou bann frer ek ser dan lasanble?

¹⁴ Nou kapav osi aprann ar lexanp nou bann frer ek ser dan lasanble, ninport ki laz zot ena. Par exanp, eski to mazinn enn kikenn dan to lasanble ki pe andir bann difikilte avek fidelite? Kitfwa li pe tini ferm kont presion so bann kamarad ouswa so bann fami, ouswa kitfwa li pe kontign fer so best mem si li ena enn  move lasante. Eski sa dimounn-la ena bann zoli kalite ki to anvi imite? Kan to reflesi lor so lexanp, kitfwa to pou aprann kouma to kapav andir to bann difikilte. Nou bien rekonesan ki nou ena bann frer ek ser fidel koumsa dan nou lasanble, ek nou anvi “imit zot lafwa”!​—Ebre 13:7; Zak 1:2, 3.

15. Ki konsey lapot Pol kapav ed nou pou res zwaye dan nou servis pou Zeova?

¹⁵ Pou ki ena lape ek linite dan lasanble, sakenn parmi nou bizin fer so best. Anou get lexanp bann Kretien dan premie siek. Zot ti ena diferan don ek diferan responsabilite. (1 Kor. 12:4, 7-11) Me zot pa ti konpar zot ar zot kamarad ek zot pa ti lager ant zot. Okontrer, Pol ti ankouraz zot pou fer seki bizin pou zot “konstrir lekor Lekris.” Li ti dir bann Kretien dan Efez: “Kan sak manb fonksionn kouma bizin, sa permet lekor-la grandi pou ki li fortifie limem dan lamour.” (Efe. 4:1-3, 11, 12, 16, NW) Bann Kretien ki azir koumsa, zot ede pou ki ena lape ek linite, bann kalite ki nou trouve dan nou bann lasanble azordi.

16. Ki kitsoz nou bien deside pou fer? (Ebre 6:10)

¹⁶ Anou bien deside pou swiv lexanp Zezi, pou imit so bann zoli kalite, ek pou pa konpar nou ar lezot. Anou kontign aprann ar lexanp bann fidel serviter Zeova dan lepase ek dan nou lepok. Kan to kontign fer to best pou Zeova, to kapav sir ki Li “pa inzis pou bliye seki [to’nn] fer.” (Lir Ebre 6:10, NW. b) Zeova bien kontan kan Li trouv twa pe fer to best pou servi Li. Alor, kontign res zwaye dan to servis pou Zeova.