1. Ta eo ej kõm̦m̦an bwe jen lo el̦ap lañlõñ?

 JEOVA ekõn̦aan bwe jen m̦õn̦õn̦õ. Jejel̦ã men in kõnke lañlõñ ej m̦õttan leen jetõb kwõjarjar eo an. (Gal. 5:22) Kõnke el̦apl̦o̦k lañlõñ ilo lel̦o̦k jãn bõk, jej lo el̦ap lañlõñ ñe jej lukkuun bõk kun̦aad ilo jerbalin kwal̦o̦k naan im ñe jej jipañ ro jeid im jatid ilo elõñ wãween ko.​—Jrb. 20:35.

2-3. (1) Ãinwõt an Galetia 6:4 kwal̦o̦k, ta men ko ruo me renaaj jipañ kõj ñan dãpij wõt ad lañlõñ ilo jerbal eo ad ñan Jeova? (2) Ta ko jenaaj etali ilo katak in?

² Ãinwõt an Galetia 6:4 kwal̦o̦k, rijjilõk Paul ear kaalikkar ruo men ko me renaaj jipañ kõj ñan dãpij wõt ad lañlõñ. (Riit.) Kein kajuon, jej aikuj kate kõj joñan wõt ad maroñ ñan jerbal ñan Jeova. El̦aññe jej kate kõj joñan wõt ad maroñ, jenaaj m̦õn̦õn̦õ. (Matu 22:36-38) Kein karuo, jej aikuj kõjparok jãn ad keidi kõj make ñan ro jet. Jekdo̦o̦n ta wãween ko jemaroñ katõpraki kõn wõt ãjmour eo ad, kamminene ko jaar bũki, ak kapeel ko ippãd, jej aikuj kam̦m̦oolol Jeova. El̦aptata ke aolep men ko ippãd rej itok jãne. Ijoke, el̦aññe ro jet el̦apl̦o̦k aer lo tõprak ilo jet wãween ko ilo jerbalin kwal̦o̦k naan jãn kõj, jej aikuj m̦õn̦õn̦õ bwe rej kõjerbal kapeel ko aer ñan nõbar Jeova, im jab ñan lelõñl̦o̦k er make ak kõm̦m̦ani kõn̦aan ko aer. Kõn men in, ijello̦kun ad jiãiiki er, jej aikuj katak jãn er.

³ Ilo katak in, jenaaj lale ewi wãween jemaroñ kijenmej wõt ñe jejjab maroñ kõm̦m̦ane elõñ men ko ilo ad jerbal ñan Jeova. Jenaaj bareinwõt lale ewi wãween jemaroñ kõjerbal jabdewõt menin letok ko ewõr ippãd im ta ko jemaroñ katak jãn joñak ko an ro jet.

4. Ta eo emaroñ kõm̦m̦an bwe jet iaad jen ebbweer? Kwal̦o̦k juon waanjoñak.

⁴ Jet iaan ri-karejar ro an Jeova ear pen aer kõm̦m̦an ukoktak  ko ekkar ñan joñan maroñ ko aer kõn wõt aer rũttol̦o̦k ak nañinmej. Eñin wãween eo ear wal̦o̦k ippãn Carol. Kar m̦okta ekõn jipañ ilo juon jikin me el̦ap aikuj ri-kwal̦o̦k naan ro ie. Ilo kar tõre kein, ekõn katak ippãn 35 rũkkatak Baibõl̦ ro im ear jipañ jet iaaer ñan ajel̦o̦k mour ko aer im peptaij. Ear l̦ap an Carol lo tõprak ilo jerbalin kwal̦o̦k naan. Tokãlik ear lukkuun nañinmej, im enañin aolep iien ear aikuj in pãdwõt ilo m̦weo im̦õn. Carol ej ba: “Ijel̦ã bwe kõn aõ nañinmej, ijjab maroñ kõm̦m̦ani men ko me ro jet remaroñ kõm̦m̦ani, bõtab men in ekõm̦m̦an aõ bõk eñjake eo bwe ijjab tiljek ãinwõt er. Men in ej ãinwõt juon tarin̦ae ikõtaan men ko ikõn̦aan kõm̦m̦ani im men ko imaroñ kõm̦m̦ani, im elukkuun pen ñan kijenmej.” Carol ekõn̦aan kõmaat an maroñ ñan Jeova. Im men in ej juon menin nõbar! Jemaroñ lõke bwe Anij eo ad me el̦ap tũriam̦o ippãn ej buñbũruon kõn an kate e joñan wõt an maroñ.

5. (1) El̦aññe jej ebbweer kõnke jejjab maroñ kõm̦m̦ani elõñ men ko, ta eo jej aikuj keememej? (2) Ãinwõt an wal̦o̦k ilo pija ko, ewi wãween an em̦m̦aan eo jeid im jatid kwal̦o̦k an wõnm̦aanl̦o̦k wõt im kate joñan wõt an maroñ ilo an jerbal ñan Jeova?

⁵ El̦aññe jet iien kwõj ebbweer kõnke kwõjjab maroñ kõm̦m̦ani elõñ men ko, kwõmaroñ kajjitõk ippam̦ make, ‘Ta eo Jeova ekõn̦aan bwe in kõm̦m̦ane?’ Jeova ekõn̦aan bwe kwõn kate eok joñan wõt am̦ maroñ ekkar ñan wãween ko ippam̦. L̦õmn̦ak kõn men in: Juon jeid im jatid lel̦l̦ap me 80 jim̦a an iiõ ej ebbweer kõnke ejjab maroñ kõm̦m̦ane joñan ko ekõn kõm̦m̦ani ilo jerbalin kwal̦o̦k naan ke ear 40 jim̦a an iiõ. Ej l̦õmn̦ak bwe meñe ej kate e joñan wõt an maroñ, ak Jeova ejjab buñbũruon ippãn. Bõtab m̦ool ke men in? L̦õmn̦ak m̦õk, el̦aññe lel̦l̦ap in jeid im jatid ear kate e joñan wõt an maroñ ke ear 40 jim̦a an iiõ im ej kate wõt e kiiõ ke 80 jim̦a an iiõ, mel̦el̦ein bwe ejjañin bõjrak jãn an kate e joñan wõt an maroñ. El̦aññe jej jino bõk eñjake eo bwe men ko jej kõm̦m̦ani rejabwe ñan kabuñbũruon Jeova, jej aikuj kakeememej kõj make bwe Jeova eo ej peek ta ko rej kabuñbũruon. El̦aññe jenãj kate kõj joñan wõt ad maroñ, Jeova enaaj lukkuun m̦õn̦õn̦õ ippãd!​—Keidi Matu 25:20-23.

6. Ta eo jemaroñ katak jãn joñak eo an Maria?

⁶ Enaaj pidodol̦o̦k ad lo lañlõñ ñe jenaaj l̦õmn̦ak wõt kõn ta ko jemaroñ katõpraki ijello̦kun ad l̦õmn̦ak kõn ta ko jejjab maroñ kõm̦m̦ani. L̦õmn̦ak kõn juon jeid im jatid kõrã etan Maria me ewõr juon an nañinmej im ekõm̦m̦an an jab maroñ kõm̦m̦an elõñ men ko ilo jerbalin kwal̦o̦k naan. Ilo jinoin, ear lukkuun bũrom̦õj im ear bõk eñjake eo bwe ejjel̦o̦k tokjãn. Ijoke ear l̦õmn̦ak kõn juon jeid im jatid kõrã ilo eklejia eo me ej aikuj babu wõt ilo peet, im ear pepe ñan jipañe. Maria ej ba: “Iar kõm̦m̦an karõk ñan am̦ro kwal̦o̦k naan ippãn doon ilo am̦ro kõjerbal talboon im jeje lõta. Aolep iien ãlikin am̦ro jerbal ippãn doon, ij jepl̦aaktok ñan m̦weo im̦õ ak ilukkuun m̦õn̦õn̦õ im jubũruõ bwe iar maroñ jipañ kõrã eo jeiũ im jatũ ilo tõmak.” Kõj bareinwõt jemaroñ kal̦apl̦o̦k ad lañlõñ ñe jej l̦õmn̦ak wõt kõn ta ko jemaroñ kõm̦m̦ani ijello̦kun ad l̦õmn̦ak kõn ta ko jejjab maroñ kõm̦m̦ani. Ak ta el̦aññe ewõr ad maroñ ñan kal̦apl̦o̦k ijo kun̦aad ak ewõr wãween ko jet ilo jerbal eo an Jeova me elukkuun em̦m̦an ad kõm̦m̦ani?

7. Ta naanin kakapilõklõk eo el̦ap tokjãn me rijjilõk Piter ear lel̦o̦k ñan Kũrjin ro?

⁷ Ilo lõta eo an kein kajuon, rijjilõk Piter ear rõjañ ro jein im jatin ilo tõmak ñan kõjerbal menin lel̦o̦k ak kapeel ko ippãer ñan kõkajoor rũttõmak ro jeier im jatier. Ear ba: “Anij ear lewaj menin lewaj ñan kom̦ kajjojo. Kõn men in, kom̦win kõjerbale ñan jipañ doon, ãinwõt  ke kom̦ij ri-karejar ro rar bõk jouj eo el̦ap jãn Anij.” (1 Pit. 4:10) Jejjab aikuj mijak in kõjerbal menin letok ko ewõr ippãd kõn wõt ad ekkõl ñe ekõm̦m̦an an ro jet ebbanban ak ebbweer. El̦aññe jenaaj ãindein, innem jejjab kate kõj joñan wõt ad maroñ ilo ad jerbal ñan Jeova.

8. Ekkar ñan 1 Korint 4:6, 7, etke jej aikuj kõjparok ñan jab kõmjãje kõn menin letok ko ewõr ippãd?

⁸ Jej aikuj kate kõj ñan kõjerbal menin letok ko ewõr ippãd, bõtab jej aikuj kõjparok bwe jen jab kõmjãje kaki. (Riit 1 Korint 4:6, 7.) Ñan waanjoñak, kwõmaroñ juon eo el̦ap an lo tõprak ilo an jino kõm̦m̦an rũkkatak Baibõl̦. Kwõjjab aikuj jenliklik in kõjerbal menin lewaj in! Bõtab elukkuun aorõk ñan keememej ñan jab kõmjãje kõn men in. Jen ba bwe bõlen ilo kiiõ epaak, kwaar iioon juon wãween elukkuun em̦m̦an ilo jerbalin kwal̦o̦k naan im kwaar maroñ jino katak Baibõl̦ ippãn juon. Kiiõ kwõlukkuun kijooror in bwebwenato kake ñan ro ilo kumi in kwal̦o̦k naan eo am̦. Bõtab ke kwõj kobal̦o̦k ippãer, juon jeid im jatid kõrã ej kwal̦o̦k kõn an kar kwal̦o̦k naan im maroñ door juon magazine ippãn juon armej. Kõrã in jeid im jatid ear door juon magazine, ak kwe kwaar jino juon rũkkatak. Ta eo kwõnaaj kõm̦m̦ane? Kwõjel̦ã bwe men eo ear wal̦o̦k ñan kwe ilo jerbalin kwal̦o̦k naan enaaj kõketak ro ilo kumi in kwal̦o̦k naan eo, bõtab kwõmaroñ kããlõt ñan kõttar ñan bar juon iien me ekkarl̦o̦k ñan kwal̦o̦ke kõnke kwõjjab kõn̦aan ko̦kkure lañlõñ eo kõrã eo jeim̦ im jatũm̦ ej loe jãn an kar lel̦o̦k juon magazine. Men in enaaj juon menin jouj. Meñe ãindein, ak jab bõjrak jãn am̦ kõm̦m̦an rũkkatak. Ewõr ippam̦ menin lewaj in​—kwõn kõjerbale!

9. Ewi wãween ad aikuj kõjerbal menin letok ko ewõr ippãd?

⁹ Jen keememej bwe jabdewõt kapeel ko ewõr ippãd rej menin letok jãn Anij. Jej aikuj kõjerbal menin letok kein ñan kõketak ro ilo eklejia eo, im jab ñan lelõñl̦o̦k kõj make. (Pil. 2:3) Ñe jej kõjerbal kajoor im maroñ ko ippãd ñan kõm̦anm̦an ankilaan Anij, enaaj wõr unin ad lañlõñ​—ejjab kõnke el̦apl̦o̦k men ko jej kõm̦m̦ani jãn ro jet im bwe jej kajjioñ kwal̦o̦k bwe jem̦m̦anl̦o̦k jãn ro jet, ak ej kõnke jej kõjerbal menin letok kein ewõr ippãd ñan bõktok nõbar ñan Jeova.

10. Etke ejjab juon menin mãlõtlõt ñan keidi kõj make ippãn ro jet?

¹⁰ Ñe juon ejjab kõjparok, emaroñ jino keidi men ko ewõr an kapeel ie ñan m̦õjn̦o̦ ko an bar juon armej. Ñan waanjoñak, emaroñ lukkuun polel im em̦m̦an wãween an juon jeid im jatid  em̦m̦aan kõm̦m̦an public talk. Eñin men eo ekapeel ie. Bõtab ilo bũruon, emaroñ reilal̦l̦o̦k ñan bar juon jeid im jatid em̦m̦aan me em̦õjn̦o̦ ilo kõm̦m̦an katak. Meñe ãindein, ak em̦m̦aan in juon jeid im jatid emaroñ juon eo elukkuun jel̦ã kwal̦o̦k karwainene, ekapeel ilo an katakin ajri ro nejin, ak ekijejeto ilo jerbalin kwal̦o̦k naan. El̦ap ad kam̦m̦oolol bwe elukkuun lõñ em̦m̦aan im kõrã ro jeid im jatid me rekapeel im rej kõjerbal menin lel̦o̦k kein ewõr ippãer ñan karejar ñan Jeova im jipañ ro jet!

11. Etke jej aikuj kate kõj ñan l̦oore joñak eo an Jesus?

¹¹ Meñe jej aikuj kõjparok jãn ad keidi kõj make ñan ro jet, ak jemaroñ bõk tokjãn ilo ad katak jãn joñak ko an ro retiljek. Ñan waanjoñak, jemaroñ katak jãn Jesus. Meñe ekar weeppãn, ak jemaroñ katak jãn kadkad ko kadkadin rem̦m̦an im men ko rem̦m̦an ear kõm̦m̦ani. (1 Pit. 2:21) Ñe jej kate kõj joñan wõt ad maroñ ñan lukkuun l̦oore joñak eo an Jesus, enaaj em̦m̦anl̦o̦k ad karejar ñan Jeova im enaaj l̦apl̦o̦k ad lo tõprak ilo jerbalin kwal̦o̦k naan.

12-13. Ta eo jemaroñ katak jãn Kiiñ Devid?

¹² Ilo Naanin Anij, jej lo elõñ joñak ko an em̦m̦aan im kõrã ro retiljek me jemaroñ l̦oori meñe rejjab weeppãn. (Hib. 6:12) L̦õmn̦ak kõn Kiiñ Devid, eo me Jeova ear ba bwe ‘ej juon em̦m̦aan eo ebuñbũruen kake’ ak, ãinwõt an bar juon ukokin Baibõl̦ ba, “ej kain armej rot eo me el̦aptata an kam̦õn̦õn̦õik bũruõ.” (Jrb. 13:22) Ijoke, Devid ear jab weeppãn. Ilo m̦ool, ear kõm̦m̦ani jet bõd ko rel̦l̦ap. Meñe ãindein, ak ej juon joñak em̦m̦an ñan kõj. Etke? Kõnke ke kar kajim̦weiki, ear jab kajjioñ in jojomare make. Ijello̦kun an ãindein, ear m̦õn̦õn̦õ in eo̦roñ naanin kauwe eo ekajju im ear lukkuun bũrom̦õj kõn men ko ear kõm̦m̦ani. Eñin unin Jeova ear jeorl̦o̦k an bõd.​—Sam 51:3, 4, 10-12, UBS.

¹³ Jemaroñ katak jãn Devid ikijjeen ad kajjitõk ippãd make kajjitõk kein: ‘Ewi wãween aõ em̦m̦akũt ñe rej letok naanin kauwe ko? Ij m̦õkaj im kwal̦o̦k bwe ibõd ke, ak ij kajjioñ jojomar eõ make? Em̦õkaj ke aõ n̦aruon ro jet? Ij ke lukkuun kate eõ ñan jab bar kõm̦m̦ani ejja bõd ko wõt?’ Kwõmaroñ kajjitõk ippam̦ make kain kajjitõk rot kein ñe kwõj riit kõn bwebwenatoun em̦m̦aan im kõrã ro jet retiljek ilo Baibõl̦. Rar ke iioon wãween ko reppen me rej ãinl̦o̦kwõt wãween ko kwõj iiooni? Ta kadkad ko rem̦m̦an me rar kwal̦o̦ki? Ilo kajjojo bwebwenato, kajjitõk ippam̦ make: ‘Ewi wãween imaroñ kal̦apl̦o̦k aõ anõke ri-karejar in etiljek an Jeova?’

14. Ewi wãween jemaroñ bõk tokjãn jãn ad lale joñak ko an rũttõmak ro m̦õttad?

 ¹⁴ Jemaroñ bar bõk tokjãn jãn ad lale joñak ko an rũttõmak ro m̦õttad, ro reddik im ro rerũtto jim̦or. Ñan waanjoñak, kwõmaroñ ke l̦õmn̦ak kõn juon ilo eklejia eo am̦ me ej kwal̦o̦k an tiljek ilo an kijenmej ium̦win juon apañ​—emaroñ kõn ijjiped jãn ro m̦õttan, jum̦ae jãn baam̦le, ak kõn an jab em̦m̦an ãjmour eo an? Kwõj ke lo kadkad ko rem̦m̦an ippãn armej in me kokõn̦aan kal̦apl̦o̦k am̦ kwal̦o̦ki? Ilo am̦ l̦õmn̦ak kõn joñak eo an em̦m̦an, kwõmaroñ katak kõn wãween ko me remaroñ jipañ eok ñan kijenmej kõn apañ ko am̦ make. El̦ap ad kam̦m̦oolol bwe ewõr joñak ko rem̦m̦an kõn tõmak me jemaroñ anõki—​juon men ej bõktok el̦ap lañlõñ!​—Hib. 13:7; Jem. 1:2, 3.

15. Ta naanin kakapilõklõk eo rijjilõk Paul ear kwal̦o̦ke me emaroñ jipañ kõj ñan lo wõt lañlõñ ilo ad jerbal ñan Jeova?

¹⁵ Ñan kõm̦m̦an bwe en wõr wõt aenõm̦m̦an im bõrokuk ilo eklejia eo, kajjojo iaad ej aikuj kate joñan wõt an maroñ. L̦õmn̦ak kõn Kũrjin ro ilo kar iien ko an rijjilõk ro. Ear wõr ippãer menin lel̦o̦k ko kab eddo ko me reoktak jãn doon. (1 Kor. 12:4, 7-11) Bõtab men in ear jab kõm̦m̦an bwe en wõr jiãe im jepel ikõtaer. Ijello̦kun an ãindein, Paul ear rõjañ er ñan kõm̦m̦ani men ko rar aikuj kõm̦m̦ani ñan “kalõk ãnbwinnin Christ.” Ear jeje ñan ro ilo Epesõs im ba: “El̦aññe kajjojo iaan m̦õttan ko em̦m̦an aer jerbal ilo yokwe, enaaj em̦m̦an an ãnbwin eo eddekl̦o̦k.” (Eps. 4:1-3, 11, 12, 16) Ro me rar kõm̦m̦ane men in rar kõm̦m̦an bwe en wõr wõt aenõm̦m̦an im bõrokuk​—kadkad kein me jej loi ilo eklejia ko ad ilo raan kein.

16. Ta eo jej aikuj in jek ilo bũruod ñan kõm̦m̦ane? (Hibru 6:10)

¹⁶ Kwõn jek ilo bũruom̦ ñan kõjparok jãn am̦ keidi eok make ippãn ro jet. Ijello̦kun am̦ ãindein, kwõmaroñ katak jãn joñak eo an Jesus, im kate eok ñan anõke kadkad ko kadkadin. Bõk tokjãn jãn joñak ko an ro ilo Baibõl̦ kab ro ilo raan kein kõn tõmak. Ilo am̦ wõnm̦aanl̦o̦k wõt im kate eok joñan wõt am̦ maroñ, kwõmaroñ lõke bwe Jeova “ewãnõk im eban mel̦o̦kl̦o̦k jerbal ko [am̦].” (Riit Hibru 6:10.) Wõnm̦aanl̦o̦k wõt im lañlõñ ilo am̦ karejar ñan Jeova, im jel̦ã bwe el̦ap an m̦õn̦õn̦õ ñe ej lo am̦ kate eok jãn aolepen bũruom̦ ñan kam̦õn̦õn̦õiki.