1. Vika vie ku tu vuisa ndzolela ya kama?

 YEHOVA ua tonda tu yoye mu ndzolela. Tua tantekeya ngoco, muomu ndzolela ya pua umo ua mihako ya sipilitu yeni. (Ngal. 5:22) Mu ku linga ku hana ce ku vuisa ndzolela ya kama ku hiana ku tambula, netu tue ku ivua ndzolela ya kama nga tu lihaka na vutuntu vuetu mu cipanga ca ku ambulula na mu ku kuasa vamuanetu mu vinjila via ku liseza-seza.—Vili. 20:35.

2-3. (a) Ngue mu ya muesa Ngalata 6:4, viuma vika vivali vi hasa ku tu kuasa ku tualelelaho ku viukilila mu vipanga via Yehova? (b) Vika tu hilula mu cilongesa cino?

² Ku Ngalata 6:4, kapostolo Paulu ua tumbulako viuma vivali vi hasa ku tu kuasa ku tualelelaho ku kala na ndzolela. (Tandenu.) Ha katete, vutumbe vuetu vua pande ku pua, ku hana Yehova viuma via cili cikuma vi tua kala navio. Kaha nga tuli na ku mu hana viuma via cili cikuma vi tua kala navio, tua pande ku kala mu ndzolela. (Mat. 22:36-38) Ca mu civali, ka tua pandele ku lisetekesa na vakuetu. Viose-ovio vi tue ku hasa ku puisamo, kuliya na cihindu, vutongue ni vuana vu tua semuka navuo, tua pande ku santsela kuli Yehova. Muomu viose vi tua kala navio, ikeye ua tu hanavio. Vunoni, nga vakuetu ve ku hasa ku puisamo via vingi mu cipanga ca ku ambulula, tua pande ku viukilila muomu vutongue vuavo vue ku hana vumpahu kuli Yehova, kati kuli vakevo ni ku vizango viavo. Ngeci mukemuo, ka tua pandele ku lituala navo ha matunta, vunoni ku tambuluisa lungano luavo.

³ Mu cilongesa cino, tu hilula vati tu hasa ku linga, nga tuli na ku livua ku kutiua omo tu pangela Yehova. Tu hilula naua, vati tu hasa ku pangesa vuino nkala vuana vu tua kala navuo na vati tu hasa ku lilongesela ku malungano a vakuetu.

4. Vika vi hasa ku tu uisila mu vusiua? Hanenu cimueso.

⁴ Vamo vangamba va Yehova, ce ku va kaluuila ku pangela Yehova na ndzili yavo yose, omo lia vukulupe ni cihindu ca cindende. Kaha evi vie ku va vuisa vusiua. Evi vikevio via lihitile navio ndumbuetu Carol. Ntsimbu imo, ua kele na civezikiso ca ku ka pangela kuze kua tondeka cikuma vukuasi. Ku cihela caco, ua kendeseleko vilongesa via Mbimbiliya via ku pua 35 kaha ua kuasele cingi cavo va hete ku mbatizimu. Mua vusunga, ku ambulula ceni ca kele na kuenda vuino! Vunoni mu nima yaco, ua vavalele cikuma. Kaha evi via mu lingisile ku kala lika hembo. Ivene ngueni: “Nji tantekeya nguange, cihindu cange ka ci nji tavesa naua fuitangana ngue mu vali na ku linga vakuetu. Vunoni vintsimbu vimo, nje ku livua ngue vakuetu vakevo vali na lutsilielo ku hiana yange. Kaha mu linga ka nje ku hasa ku linga viose vi nji tonda, nje ku uila mu vusiua.” Ndumbuetu Carol, ua tonda ku pangela Yehova na ndzili yeni yose. Vutumbe vueni vua cili cikuma! Kaha tuli na vusunga ngecize Njambi yetu ua cikeketima ua haka seho ya kama ku cimbembesi ceni.

5. (a) Vika tua pande ku vuluka nga ku kutiua cetu ci li na ku tu vuisa vusiua? (b) Vati muanetu u va na muesa ha vikupulo, ue ku tualelelaho ku pangela Yehova na ndzili yeni yose?

⁵ Nga vintsimbu vimo ku livua ku kutiua na visoti ce ku mi vuisa vusiua, lihulenu nguenu: ‘Vika Yehova a tonda kuli yange?’ A tonda mu mu pangele na ndzili yose-oyo i muli nayo mu ntsimbu ino. Aci singaniekenu ha cimueso eci: Umo ndumbuetu ua miaka 80, ali na ku ivua vusiua, muomu kesi naua na ku ambulula ngue mua kele na miaka 40. Kaha ue ku singanieka ngueni vutuhu ali na ku pangela Yehova na ndzili yeni yose, vunoni vie ku linga ka vie kuya Yehova ku mutima. Vuno cili vene ni? Aci singaniekenu hali evi: Nga muntu ua kele na ku pangela Yehova na ndzili yeni yose ku vi 40, kaha kasi ali na ku tualelelaho ku vi 80, kaha muntu uaco ka kokolokele, ni vati? Nga tu putuka ku livua ngecize kapandi ka tue ku lihakela ka ka puilemo mu kuya Yehova ku mutima, kaha tua pande ku livuluisa etu vavene ngecize Yehova ikeye ua tumbika vitume ku tuala ha vika vie ku muya ku mutima. Nga tu pangela Yehova na ndzili yetu yose kaha ikeye a ka tu sangala ngueni: “U mukuamanda ua ku viuka.”—Setekesenu na Mateo 25:20-23.

6. Vika tu lilongesa ku muzimbu ua ndumbuetu Maria?

⁶ Ci ka tu puila ca casi ku ivua ndzolela nga tu tuala mana ku vize vi tu hasa ku puisamo, kati ku vize ka tu hasa. Tu talenu lungano lua ndumbuetu Maliya, ua kala na vumo vuvezi vue ku tanganesa mua kama cipanga ceni ca ku ambulula. Ha katete, ua vuile vusiua vua kama kaha ua livuile ngue ka kele na seho. Vunoni mua singaniekele hali umo ndumbuetu ua mu cikungulukilo cavo, ua kala lika ha muhela, ua tondele mana a ku mu kuaselamo. Ndumbuetu Maria ngueni: “Nja viukisile viuma linga nji pue na ku ambulula na uze ndumbuetu ku hitila mu telefone na mu ku soneka mikanda. Kaha nkala ntsimbu i tua pangelele hamo lika, nja kele na ku hiluka na ndzolela ku ndzivo, omo lia ku tantekeya ngecize nji na lingi vimo vi na kuasa ndumbuetu.” Na vuno vene, netu tu hasa u vueza ku ndzolela yetu mu ku tuala mana ku vize vi tu hasa ku linga, kati ku vize ka tu hasa. Vati co nga tue ku hasa ku linga via vingi ni kuli vimo vi tue ku linga vuino mu vipanga via Yehova?

7. Cimamuna cika kapostolo Petulu ua hanene kuli Vakua Kilistu?

⁷ Mu mukanda ueni ua katete, kapostolo Petulu ua mamuine vamuanaye va pangese nkala vuana ni vutongue vu va kele navuo, mu ku kaniamesa vakuavo mu lutsilielo. Ua sonekele ngueni: “Ngue ku muntu ku muntu mu na  tambula vuana, pangenu navuo ha kati kenu, ngue vangamba va cili va kavumbi ka Njambi.” (1 Pet. 4:10) Ka tua pandele ku likela ku pangesa vuana vuetu mu vutuntu, omo lia ku singanieka nguetu halumo vakuetu va ka tu vuila cipululu ni va ka zeya. Muomu nga tu lingamo kaha ka tuesi na ku pangela Yehova na ngolo yetu yose.

8. Kuliya na 1 Kolintu 4:6, 7, omo lia vika ka tua pandele ku lihalesa na vuana vu tua kala navuo?

⁸ Vutuhu tua pande ku pangesa vuana vuetu mu vutuntu, vunoni tua pande naua ku zangama linga kati tu lihalese omo lia vuana vuaco. (Tandenu 1 Kolintu 4:6, 7.) Ca ku muenako, halumo mua kala na vuana vua ku putuka vilongesa via Mbimbiliya. Nga mukemuo, ka mua pandele ku likanuuela ku pangesa vuana vuaco! Vunoni naua ka tua pandele ku lihalesa. A ci singaniekenu nga mu na tuhukile mu lihia kaha mu na liuanene na muntu na muesele seho ya kama ku vusunga na ku tava cilongesa ca Mbimbiliya. Kaha mu ivua cizango ca kama ca ku lekako vakua civunga cenu ca mu lihia. Vunoni mu mu ka liuana navo, mu ka uana umo ndumbuetu ali na ku tanga muzimbu ua vati na hasa ku hana mukanda ku muntu. Ikeye na hana mukanda, enu mu na putuka cilongesa ca Mbimbiliya. Vati mu linga? Vutuhu mua tantekeya ngecize muzimbu uenu u hasa ku kaniamesa mua kama civunga, vunoni mu hasa ku lavelela ku hangula ntsimbu yeka ya ku ambulula muzimbu uaco, linga kati mu zime ndzolela ya uze ndumbuetu na hanene mukanda. Nga mu linga ngoco, muli na ku linga mua cili cikuma. Vunoni kati mu likele ku tonda vilongesa via Mbimbiliya. Mu ku linga vukevuo vuana vu mua kala navuo, vu pangesenu!

9. Vati tua pande ku pangesa vuana vuetu?

⁹ Tu puenu na ku vuluka ngecize nkala vuana vu tua kala navuo, Njambi ua tu hanavuo. Kaha tua pande ku pangesa vuana vuaco, mu ku kaniamesa cikungulukilo kati mu ku lituameka etu vavene. (Filp. 2:3) Nga tu lihakela kapandi ka ku pangesa ngolo na vuana vuetu mu ku linga cizango ca Njambi, tu ka kala na vusunga vua ku ivua ndzolela. Kaha ndzolela yaco ka tu ka i vuila muomu tu tonda ku hiana vakuetu, vunoni muomu tu tonda ku i pangesa mu ku zumbangeya Yehova.

10. Omo lia vika ku lisetekesa na vakuetu ka ca puile ca cili?

¹⁰ Nga ka tua zangamene, tu hasa ku uila mu ngandzo ya ku setekesa vuhasi vuetu ku vuzeye vua vakuetu. Ca ku muenako, halumo umo muanetu ua kala na vuana vua ku hana vimpande via cili. Vukevuo vuhasi vueni. Vunoni mu  mutima ueni, ue ku sembulula umo muanetu mukuavo ua kala na citanga ca ku hana vimpande. Vunoni halumo muanetu uaco, ua kala na vuana vua ku muesa vuhuanga, ku longesa vana veni, ni ua kala na ntuima mu cipanga ca ku ambulula. Mua vusunga, tue ku santsela mua kama mu ku kala na vamuanetu na vandumbuetu va kala na vutongue vua ku liseza-seza, vuze vu ve ku pangesa mu ku pangela Yehova na ku kuasa vakuavo!

11. Omo lia vika tua pande ku lihakela kapandi ka ku kava lungano lua Yesu?

¹¹ Vutuhu ka tua pandele ku lisetekesa na vakuetu, tu hasa ku lilongesa via vingi mu ku tambuluisa lungano luavo. Linga vi tu lumbunuke vuino, tu ci hilulenu hali Yesu. Vutuhu ua puile ua ku tantuluka, vunoni tu hasa ku lilongesa via vingi ku vifua vieni via cili na ku vilinga vieni. (1 Pet. 2:21) Mu tue ku linga cose mu ku kava vuino lungano lueni, tue ku pua vangamba va cili va Yehova kaha na ku puisamo vuino cipanga cetu ca ku ambulula.

12-13. Vika tu hasa ku lilongesa kuli Muangana Ndaviti?

¹² Mu Lizi lia Njambi mua kala malungano a engi a cili a vamala na vampuevo va tu hasa ku tambuluisa, vutuhu ka va puile va ku tantuluka. (VaHe. 6:12) Aci singaniekenu hali Muangana Ndaviti, uze ya tumbuile Yehova ngueni, “yala ua ku mutima uange.” (Vili. 13:22) Ndaviti ka puile ua ku tantuluka. Kaha ua lingile vimo visevuka via kama. Vutuhu ngoco, ua pua lungano lua cili kuli yetu. Omo lia vika? Muomu mu va mu sungamesele ka setekele ku sanguluka. Vunoni ua tavele ku sungamesa ca cikalu ca tambuile kaha ua liveyele mua kama visevuka vieni. Omo liaco, Yehova ua mu ecelele.—Visa. 51:3, 4, 10-12.

¹³ Tu hasa ku lilongesa ku lungano lua Ndaviti mu ku lihula nguetu: ‘Vati nje ku linga nga va nji mamuna? Vuno nje ku litavela vuasi visevuka viange ni nje ku seteka ku sanguluka? Vuno nje ku tuntila ku tuika vakuetu mulonga ni? Nje ku lihakela kapandi linga kati nji hilukile mu visevuka viaco ni? ‘Mu hasa kuli linga vihula ngeci mua evi omo mu tanda mizimbu ikuavo ya vantu va va tumbula mu Mbimbiliya. Vuno navo va hitile mu vitanga via lifua na vieni ni? Vifua vika via cili va muesele? Mu nkala muzimbu u mu tanda puenu na ku lihula nguenu, Vati nji hasa ku tambuluisa ou ngamba ua Yehova?’

14. Vukuasi vuka tu hasa ku uana mu ku tala ku lungano lua vamuanetu?

¹⁴ Tu hasa ku lilongesa via vingi mu ku tala ku malungano lua vamuanetu, cipue vanike ni vakuluntu. Ca ku muenako, aci singaniekenu  mu cikungulukilo cenu, vuno muli umo muanetu ue ku pinda na cimo ceseko ngeci mua ntsindiye ya vakuavo, ku luisa ca vavusoko ni vitanga via cihindu ni? Vuno mue ku mona muli ou muanetu uaco, vimo vifua via cili vi mu tonda ku kala navio nenu ni? Mu ku hilula vuino lungano lueni lua cili mu hasa ku lilongesako vimo ku tuala ha vati mu lua na vieseko vienu. Mua vusunga, tue ku santsela mua kama mu ku kala na vamuanetu va tu hasa ku tambuluisa cipue mu ntsimbu ino!—VaHe. 13:7; Tia. 1:2, 3.

15. Cimamuna cika ua hele kapostolo Paulu, ci hasa ku tu kuasa ku viukilila mu vipanga vietu kuli Yehova?

¹⁵ Linga tu sambeye ciyulo na ku likata mu cikungulukilo, muntu ku muntu tua pande ku pangela Yehova na ndzili yetu yose kuliya na vuhasi vuetu. Tu hilulenu lungano lua Vakua Kilistu va katete. Va kele na vuana vua ku liseza-seza kaha naua va tambuile vipanga via ku liseza-seza. (1 Kol. 12:4, 7-11) Vunoni eci ka ca kokele matepeso ni ku va lingisa ku lituala ha matunta. Va lingile ngue mua va mamuine kapostolo Paulu ngueni: “Muntu ku muntu a linge vize vi tondeka mu ku tungisa muvila ua Kilistu.” Paulu ua lekele vakua Efeso ngueni: “Nga nkala cilio ca muvila ci panga vuino “muvila u likulisa na ku litungisa mu cilemo.” (Efe. 4:1-3, 11, 12, 16) Vose va lingilemo, va sambeyele ciyulo na ku likata: vifua via kala mu vikungulukilo vietu lelo lino.

16. Kapandi kaka tua pande ku lihakela? (VaHevelu 6:10)

¹⁶ Lihakelenu kapandi ka ku viana ku lisetekesa na vakuenu. Vunoni lihakelenu kapandi ka ku lilongesa kuli Yesu na ku tambuluisa vifua vieni via cili. Puenu na ku lilongesa ku malungano a mu Mbimbiliya na a ku matangua ano. Omo mu tualelelaho ku pangela Yehova na ndzili yenu yose, vulukenu ngecize ikeye “kati mukua vuhenge linga a suve vipanga vienu.” (Tandenu VaHevelu 6:10.) Tualelenuho ku viukilila omo mu pangela Yehova, oku mua tantekeya ngecize ua haka seho ya kama ku vipanga vi mue ku mu lingila na mutima uose.