1. ¿Tlake tlamantli kichiua ma tiyolpakikaj?

 JEHOVÁ kineki ma tiyolpakikaj. Kiampa tijmatij pampa nopa pakilistli eli se tlen nopa kuajkuali tlamantli tlen toTeotsij itonal techpaleuia ma tijnextikaj (Gál. 5:22). Biblia kiijtoua: “Más pakilistli kiselia tlen temaka se tlenijki, uan axkeja tlen kiselia”, yeka tlauel kuali tijyolmatij kema titlajtolmoyauaj uan tikinpaleuiaj toikniuaj (Hech. 20:35).

2, 3. 1) Kej kiijtoua Gálatas 6:4, ¿tlake techpaleuis nojua tiyolpaktosej? 2) ¿Tlake tikitasej ipan ni tlamachtili?

² Apóstol Pablo kiijtok ome tlamantli tlen techpaleuis nochipa ma tiyolpaktokaj. Ni tijpantiaj ipan Gálatas 6:4 (xijpoua). Se. Tlauel tiyolpakisej tlaj tijchiuaj kampeka kuali tijtekipanosej Jehová, uan ni moneki nochi tijchiuasej (Mat. 22:36-38). Ome. Amo kinamiki tikitasej tlen tijchiuaj ika tlen kichiuaj sekinok. Tlaj kuali tiitstokej, tlaj techmachtijtokej kenijkatsa tijchiuasej se tlenijki o tlaj ipa tijchijtokej se keski tlamantli, moneki tijtlaskamatisej Jehová, pampa ya techmakatok nochi. Yeka, tlaj tikitaj sekij tlauel kuali tlajtolmoyauaj, ma tiyolpakikaj pampa kiueyichiuaj Jehová uan amo pampa moueyimatij o pampa kinekij sekinok ma kinitakaj. Moneki tijyekosej tlen inijuantij kichiuaj, uan amo ma tikinkualankaitakaj.

³ Ipan ni tlamachtili tikitasej tlake techpaleuis amo timoyolkokosej tlaj tikitaj amo tiuelij titlatekipanouaj kej tijnekiskiaj. Nojkia, tikitasej kenijkatsa kuali tijtekiuisej tlen tijmatij tijchiuaj uan tlake uelis tijyekosej tlen sekinok uelij kichiuaj.

4. ¿Tlake ueliskia kichiuas ma timoyolkokokaj? Xikijto tlen kipanok Carol.

⁴ Se keskij toikniuaj moyolkokouaj pampa mokokouaj o ya uejueyij, uan nopa kichiua ayokmo ma tlatekipanokaj kej kinekiskiaj. Kiampa kiyolmati Carol, katli tlajtolmoyajki se keski xiuitl kampa amo itstoyaj miakej toikniuaj. Ya kinmachtik 35 maseualmej uan kinpaleuik miakej ma moatsonpoliuiltikaj. ¡Tlauel kuali kej tlatekipanok! Teipa, mokokok uan ayokmo uelki kisa ichaj. Ya kiijtoua: “Ni kokolistli tlen nijpia kichiua ayokmo ma nitlatekipano kej sekinok. Yeka, nijmati kejuak amo kuali nitlatekipanoua. Nochipa nijneki nijchiuas tlen amo niueli uan nopa kichiua tlauel ma nimoyolkoko”. Tlauel kuali tlen kineki kichiuas Carol, pampa kineki kuali tlatekipanos. Timotemachiaj Jehová, katli tlauel tetlasojtla, kipatiita tlen tosiuaikni kineki kichiuas.

5. 1) ¿Tlake moneki tikilnamikisej tlaj timoyolkokouaj pampa amo tiuelij tijchiuaj tlen tijnekiskiaj? 2) Kej nesi ipan tlaixkopinkayomej, ¿kenijkatsa toikni kichijtok kampeka kuali tlatekipanos?

⁵ Tlaj kemantika timoyolkokouaj pampa amo tiuelij tijchiuaj tlen tojuantij tijnekiskiaj, ma timotlatsintokikaj: “¿Tlake kineki Jehová ma nijchiua?”. Ya san kineki ma tijchiuakaj kampeka ika tlen kena tiuelij tijchiuaj. Ma timoiljuikaj ipan ni neskayotl. Se tosiuaikni katli kipia 80 xiuitl moyolkokoua pampa ayokmo ueli tlajtolmoyaua kej kichiuayaya kema kipixtoya 40 xiuitl. Ya moiljuia maske kichiua kampeka tlatekipanos, Jehová amo kuali kiita tlen kichiua. ¿Nelia tlen moiljuia? Ma timoiljuikaj, tlaj kema kipixtoya 40 xiuitl tlauel kuali tlatekipanok uan nama maske kipia 80 xiuitl nojua kichiua kampeka, kinextia ya nojua tlatekipanojtok kej ipa kichijtok. Tlaj peua timoiljuiaj Jehová amo kipaktia tlen tijchiuaj, ma tikilnamikikaj san ya uelis kiijtos tlaj kena o amo kipaktia. Tlaj nochipa tijchiuaj kampeka, ya techiljuis: “Tlauel kuali tlen tijchijtok” (nojkia xikita Mateo 25:20-23).

6. ¿Tlake techmachtia tlen kichijki María?

⁶ Tlauel techpaleuis nojua ma tiyolpakikaj tlaj san timosentlaliaj ipan tlen kena tiuelij tijchiuaj. Ma tikitakaj tlen kipanok María, ya kipia se kokolistli uan yeka amo ueli tlauel tlajtolmoyaua. Achtouia, tlauel mokuesouayaya uan moiljuiyaya ayokmo tleno ipati o amo ipa. Teipa, kiilnamijki ipan itlanechikol itstoya se tosiuaikni katli ayokmo ueliyaya meua pampa tlauel mokokouayaya. Yeka, kiitak kenijkatsa kipaleuiskia. María kiijtoua: “Niajki ichaj uan titlajtolmoyajkej ika teléfono uan tijchijkej amatlajkuiloli. Nochipa nitlakuepiliyaya ika pakilistli pampa nijpaleuijtoya tosiuaikni”. Tojuantij nojkia uelis nojua tlauel tiyolpakisej tlaj san timosentlaliaj ipan tlen kena tiuelij tijchiuaj. Uan, ¿tlake uelis tijchiuasej tlaj nojua kuali titlatekipanouaj o tiuelij tijchiuaj se keski tlamantli?

7. ¿Tlake kiniljuik Pedro ma kichiuakaj toikniuaj?

⁷ Ipan nopa achtoui amatlajkuiloli tlen apóstol Pedro kiijkuilok, kiniljuik toikniuaj ma kinyolchikauakaj sekinok ika tlen uelij kichiuaj. Kiijtok: “Ika nopa yajatili tlen inkiselijtokej pampa ueyi iyolo toTeko, ximopaleuikaj se ika seyok para initstosej ininkualtekipanojkauaj” (1 Ped. 4:10). Amo ma timoiljuikaj tikinyolkokosej sekinok o uelis techkualankaitasej tlaj tijchiuaj tlen tiuelij. Tlaj amo tijchiuasej, uajka amo tijueyichiuasej Jehová kej kinamiki.

8. Kej kiijtoua 1 Corintios 4:6, 7, ¿kenke amo kinamiki timoueyimatisej ika tlen tiuelij tijchiuaj?

⁸ Maske moneki tijchiuasej tlen tiuelij,  amo kinamiki timoueyimatisej (xijpoua 1 Corintios 4:6, 7). Se neskayotl, uelis amo ouij tijmati tijpeualtis tijmachtis se akajya. Nopa tlauel kuali, yeka nojua kiampa xijchijto. San xikilnamiki, amo kinamiki timoueyimatis ika tlen tiueli tijchiua. Ximoiljui kema titlajtolmoyauayaya kuali mitstlakakilijkej uan pejki tijmachtia se akajya. Yeka, nima tijneki tikiniljuis katli ininuaya titlajtolmoyaua nochi tlen mitspanok. Uan kema tiasi kampa itstokej, tijkaki se tosiuaikni kiijtoua temakak se pilamochtsi. ¿Tlake tijchiuaskia? Ya san temakak se amatlajkuiloli, uan ta pejki tijmachtia se akajya. Maske tijmati tlen tikiniljuis toikniuaj tlauel kinpaleuis, ueliskia tikijtos seyok tonali, kiampa amo tijyolkokos tosiuaikni uan tijnextis tijpia moyolo. Maske kiampa tijchiuas, xikilnamiki ta tijpia se “yajatili”, yeka kuali xijtekiui uan nochipa xikinmachti maseualmej.

9. ¿Kenijkatsa moneki tijtekiuisej tlen tiuelij tijchiuaj?

⁹ Ma tikilnamikikaj toTeotsij techmakatok tlen tiuelij tijchiuaj. Yeka, moneki tijtekiuisej uan kiampa tikinyolchikauasej toikniuaj uan amo pampa tijnekisej timoueyimatisej (Filip. 2:3). Tijyolpakiltiaj toTeotsij kema tijtekiuiaj tochikaualis uan tlen tiuelij, uan nojkia kichiua ma tiyolpakikaj. ¿Kenke? Pampa nochi tlen tijpiaj tijtekiuiaj kema tijueyichiuaj Jehová, uan amo pampa tijnekij ma techitakaj sekinok o pampa timoiljuiaj tlauel kuali tijchiuaj se tlenijki uan sekinok amo.

10. ¿Kenke amo kinamiki tikitasej tlen tiuelij tijchiuaj ika tlen sekinok kichiuaj?

¹⁰ Tlaj amo timomokuitlauiaj uelis timoiljuisej san tojuantij tiuelij tijchiuaj se keski tlamantli uan toikniuaj amo. Ma timoiljuikaj ipan ni neskayotl. Se toikni uelis tlauel kuali tlamachtia ipan tlanechikoli. Maske kiampa kichiua, ipan iyolo moueyimati kema kiita seyok toikni kimati ouij tlamachtis. Ni toikni, maske amo ueli kuali tlamachtia, uelis kipaktia temakas tlen kipia, kinpaleuia ikoneuaj kuali ma tlaneltokakaj o tlajtolmoyaua ika pakilistli. Tlauel tijpatiitaj pampa itstokej toikniuaj uan tosiuaikniuaj katli kitekipanouaj Jehová ika tlen kimatij kichiuasej uan kinpaleuiaj sekinok.

11. ¿Kenke moneki tijchiuasej kampeka tijchiuasej kej Jesús?

¹¹ Maske amo kinamiki san tikitasej tlen sekinok uelij kichiuaj, tlauel techpaleuis tlaj tikitaj tlen kichijkej uejkajkia toTeotsij  itekipanojkauaj. Ma timoiljuikaj ipan Jesús, katli eli se kuali neskayotl. Maske titlajtlakolejkej, uelis tijyekosej tlen nopa kuajkuali tlamantli tlen kinextik uan tlen kichijki (1 Ped. 2:21). Tlaj tijchiuaj kampeka tijchiuasej kej ya, techpaleuis kuali ma titlatekipanokaj uan maseualmej kuali techtlakakilisej kema titlajtolmoyauasej.

12, 13. ¿Tlake tijyekouaj tlen David kichijki?

¹² Ipan Biblia kiijtoua tlen kichijkej se keskij toTeotsij itekipanojkauaj. Maske elkej tlajtlakolejkej, techpaleuia tlen kichijkej (Heb. 6:12). Ma tikitakaj tlen David kichijki. Se tonali Jehová kiijtok: “Nijpantijtok [...] se tlakatl tlen tlauel nech[yol]paktia” (Hech. 13:22). David elki se kuali neskayotl maske nojkia mokuapolok. ¿Kenke? Pampa kema kitlalnamiktijkej, ya amo motechtik. David kiselik tlen kiiljuijkej uan nelnelia moyolkuepki. Yeka, Jehová kitlapojpoljuik (Sal. 51:3, 4, 10-12).

¹³ Tlen David kichijki uelis techpaleuis tlaj timotlatsintokiaj: “¿Tlake nijchiua kema se akajya nechtlajtolmaka? ¿Nikita nelia nimokuapolok o san nimotechtia? ¿Nima nikintlajtlakoltia sekinok? ¿Nijchiua kampeka ayokmo nijchiuas tlen amo kuali?”. Kema timomachtiaj tlen kichijkej toTeotsij itekipanojkauaj, uelis timotlatsintokisej: “¿Nojkia kiixnamijkej tlaouijkayotl kej na? ¿Tlake kuajkuali tlamantli kinextijkej?”. Uan kema tijchiuasej sejse tlen ni tlajtlanili, ma timotlatsintokikaj: “¿Tlake uelis nijchiuas tlaj nijneki nielis kej ya?”.

14. ¿Kenijkatsa techpaleuis tlaj tikitaj tlen kichiuaj toikniuaj?

¹⁴ Nojkia tlauel techpaleuis tlen kichiuaj toikniuaj katli nojua telpokamej o katli ya uejueyij. Uelis timoiljuisej ipan se toikni tlen totlanechikol katli kichiua kampeka nojua kuali tlaneltokas pampa sekinok telpokamej kitetsopaj, ichampoyouaj amo kikauaj ma tlatekipano o pampa mokokoua. ¿Kinextia ni toikni kuajkuali tlamantli tlen tojuantij nojkia ueliskia tijnextisej? Tlaj tikitaj tlen kichiua, techpaleuis ma tikixnamikikaj tlaouijkayotl. Tlauel tiyolpakij pampa itstokej toikniuaj katli kuali tlaneltokaj uan techpaleuia nojkia kiampa ma tijchiuakaj (Heb. 13:7; Sant. 1:2, 3).

15. ¿Tlake kintlajtolmakak Pablo toikniuaj tlen nojkia techpaleuis ma titlatekipanokaj ika pakilistli?

¹⁵ Tlaj nochi tijchiuaj kampeka kuali titlatekipanosej, nopa kichiuas ma tiitstokaj ika tlaseuilistli ika toikniuaj uan  amo timoxelosej. Kiampa kichijkej Cristo itokilijkauaj tlen achtoui siglo, katli amo kichiuayayaj sanse tlamantli yon kipixtoyaj sanse tekitl ipan tlanechikoli (1 Cor. 12:4, 7-11). Maske amo sanse tlapaleuiyayaj, amo moueyimatiyayaj yon amo kinxelojkej toikniuaj. Pablo kiniljuik ni tlamantli toikniuaj tlen Éfeso: “Ma timotekipanokaj se ika seyok para tijmakasej tetili nochi tojuantij tlen tiitlakayo Cristo, kineki kiijtos nopa tlasentilistli tlen axmoita tlen nochi itlakauaj”. Uan nojkia kiijtok: “Kema sejse tlaneltokaketl ika miak teiknelijkayotl kichiua tlen iteki uan timopaleuiaj se ika sekinok, uajka kena, nochi itlakayo Cristo moskaltia” (Efes. 4:1-3, 11, 12, 16). Kema kiampa kichijkej kinpaleuik ma kipiakaj tlaseuilistli uan amo ma moxelokaj, uan ipan ni tonali nojkia techpaleuia.

16. Kej kiijtoua Hebreos 6:10, ¿tlake moneki timosentlalisej tijchiuasej?

¹⁶ Ma tijchiuakaj kampeka amo san tikitasej tlen sekinok kichiuaj ika tlen tojuantij tijchiuaj. Moneki tikitasej tlen Jesús kichijki uan tijchiuasej kampeka tijnextisej nopa kuajkuali tlamantli tlen ya kinextik. Nojkia, ma tijchiuakaj kampeka tijyekosej tlen kichijkej se keskij toTeotsij itekipanojkauaj katli itstoyaj uejkajkia uan katli nama itstokej. Nochipa ma tijchijtokaj kampeka nojua kuali tijtekipanosej Jehová uan ma tikilnamikikaj “yajaya axkiilkauas nopa tekitl” tlen tijchijtokej (xijpoua Hebreos 6:10). Yeka, nojua ma tijtekipanojtokaj Jehová ika miak pakilistli uan ma timotemachikaj ya nochipa kipatiita tlen tijchiuaj.