1. ¿Toni kichiua maj tiyolpakikan?

 JIOVA kineki maj tiyolpakikan. Tikmatij nejin porin ika iespíritu yejuatsin techpaleuia maj tiyolpakikan (Gál. 5:22). Uan kemej okachi tiyolpakij keman tiktemakaj teisa ke keman tikseliaj, kuali timomachiliaj keman timochikauaj tikteixmatiltiskej iTajtol Dios nochi tein tiueliskej uan keman tikinpaleuiaj tokniuan (Hech. 20:35).

2, 3. 1) Kemej kinextia Gálatas 6:4, ¿toni techpaleuis maj tiksentokakan tiyolpakikan? 2) ¿Toni tikitaskej itech nejin tamachtilis?

² ¿Toni techpaleuis maj tiksentokakan tiyolpakikan? Tatitanil Pablo kijtoj ome taman tein uelis techpaleuis. Tikajsij itech Gálatas 6:4 (xikonixtajtolti). Yekinika, uelis tiyolpakiskej keman tiktekitiliskej Jiova komo tikchiuaj nochi tein tiuelij. Uan nejon tinochin moneki tikchiuaskej (Mat. 22:36-38). Ojpatika, maj amo tikitakan tein oksekin kichiuaj ika tein tejuan tikchiuaj. Komo ueli tikchiuaj teisa porin tipaktokej, porin techmachtijkej seki taman oso porin ipa tiuelij, maj tiktasojkamatilikan Jiova, porin tein melauj nochi tein tikpiaj yejuatsin techmakatok. Uan komo okseki tokniuan okachi kuali kichiuaj seki taman itech tanojnotsalis ke tejuan, maj tiyolpakikan porin kichiuaj tein uelij para kiueyichiuaskej Jiova uan amo porin kinekij maj kinueyitalikan. Maj amo tiktemokan timotataniskej iniuan, ta okachi kuali maj tikchiuakan kemej yejuan.

³ Itech nejin tamachtilis tikitaskej toni techpaleuis maj amo timotayokoltikan komo tikitaj ke amo ueli tikchiuaj nochi tein tiknekiskiaj itech tanojnotsalis. No tikitaskej keniuj uelis titapaleuiskej ika tein ueli tikchiuaj, uan keniuj uelis tikchiuaskej kemej oksekin.

4. ¿Toni ueliskia kichiuas maj timotayokoltikan? Xikonijto tein kipanok Carol.

⁴ Seki tokniuan motayokoltiaj porin kemej xiuejkejya oso mokokouaj, amo ueli semi kichiuajok miak taman itech itekiyo Jiova kemej kinekiskiaj. Yejua nejon tein kipanok se tokniuj siuat akin monotsa Carol, akin tapaleuijka kampa okachi monekia. Kipiaya 35 nemachtilmej ika Biblia uan kinpaleuij miakej maj motemaktikan iuan Jiova uan maj moauikan. ¡Semi kualtsin tein kipanok! Sayoj ke satepan kokolispeuak uan amo semi ueliaok kisaya ichan. Yejua kijtoua: “Nikmati ke kemej nimokokoua amo ueli nikchiua tein oksekin kichiuaj. Maski ijkon, nikmachilia ke amo nikchiujtok tein monekiskia kichiuas se itekitikauj Dios. Amo ueli nikchiua nochi tein niknekiskia, uan nejon kichiua maj nimotayokolti”. Carol kineki kitekitilis Jiova hasta kampa uelis uan nejon semi kuali. Uelis senkis tikmatiskej ke Dios, akin semi teiknelia, kipatiuita nochi tein Carol kichiua.

5. 1) ¿Toni moneki tikelnamikiskej komo timotayokoltiaj porin amo ueli tikchiuaj nochi tein tiknekiskiaj? 2) Ijkon kemej nesi itech taixkopimej tein kipia nejin tamachtilis, ¿keniuj nejin tokniuj takat nochipa kimakani Jiova tein okachi kuali?

⁵ Komo kemansa timotayokoltiaj porin amo ueli tikchiuaj nochi tein tiknekiskiaj, maj timotajtanikan: “¿Toni kineki Jiova maj nikchiua?”. Yejuatsin kineki maj tikmakakan tein okachi kuali, tein kijtosneki ke maj tiktekitilikan nochi tein tiueliskej. Itech xiontanemili nejin. Se tokniuj siuat akin kipia 80 xiujmej motayokoltia porin amo semi ueli tanojnotsaok kemej ijkuak kipiaya 40 xiujmej. Kinemilia ke Jiova amo yolpaki maski yejua kichiujtok nochi tein ueli. Sayoj ke, ¿melauj nejon? Maj tikitakan. Komo nejin tokniuj kichiuak nochi tein uelik keman kipiaya 40 xiujmej uan kisentoka ijkon kichiua axkan ke kipia 80 xiujmej, nejin kijtosneki ke nochipa kimakani Jiova tein okachi kuali. Komo peua tiknemiliaj ke tein tikchiuaj amo kiyolpaktia Jiova, maj tikelnamikikan ke yejuatsin kiixtalia toni kiyolpaktia uan toni amo. Komo timochikauaj tikchiuaskej nochi tein tiuelij, yejuatsin techiluis: “Kuali tein tikchiuak” (no xikonita Mateo 25:20-23, TNM).

6. ¿Toni techmachtia tein kichiuak María?

⁶ Uelis tiyolpakiskej komo itech titanemiliaj tein ueli tikchiuaj, uan amo tein amo ueli tikchiuaj. Maj tikitakan tein kipanok María, se tokniuj siuat akin amo semi ueli tanojnotsa porin mokokoua. Yekinika semi motayokoltiaya uan kinemiliaya ke amo teyi ika tapaleuiayaok. Sayoj ke kimatik ke se tokniuj siuat itech inechikol uetstoya porin mokokouaya. Yejua ika kitemoj keniuj ueliskia kipaleuis. María kijtoua: “Nikixtalij nias ichan uan iuan nitanojnotsas ika teléfono uan ika carta. Nochipa keman nimokepayaya nochan niyolpakia porin nikpaleuijka nokniuj”. Tejuan no okachi tiyolpakiskej komo okachi tikitaj tein ueli tikchiuaj uan amo tein amo tiuelij. Sayoj ke, ¿toni uelis tikchiuaskej komo tejuan okachi kuali titanojnotsaj, oso okachi kuali tikchiuaj seki taman ke oksekin?

7. ¿Toni tein kuali kinyolmajxitij tatitanil Pedro tokniuan?

⁷ Itech yekinika amat tein tatitanil Pedro kijkuiloj, kinyolmajxitij tokniuan maj kinyolchikauanij oksekin ika tein uelia kichiuayaj. Kijkuiloj: “Xikintekitilikan in oksekin taneltokani ijkon keme Dios namechmajmaktilij ya ne uelilisme” (1 Ped. 4:10). Komo teisa tiuelij maj tikchiuakan, maj amo tiknemilikan ke amo moneki tikchiuaskej porin oksekin technexikoluiskej oso porin motayokoltiskej.  Komo amo tikchiuaskiaj, amo tikmakatoskiaj Jiova tein okachi kuali.

8. Kemej kijtoua 1 Corintios 4:6, 7, ¿keyej amo monekiskia timoueyimatiskej ika tein tiuelij tikchiuaj?

⁸ Komo teisa ueli tikchiuaj moneki tikchiuaskej, sayoj ke maj amo ika timoueyimatikan (xikonixtajtolti 1 Corintios 4:6, 7). Kemej neskayot, tejuatsin xa amo ouij mitsonkisa peuas tikonmachtis aksa ika Biblia. Komo ijkon, ¡xikonsentoka xikonchiua! Kuali yetok maj tikchiuakan teisa tein tiuelij, sayoj ke moneki tikelnamikiskej ke amo moneki ika timoueyimatiskej. Xikonnemili ke yankuixtok tikonpanok se taman tein kuali itech tanojnotsalis uan peuak tikonmachtia aksa, yejua ika semi tikonneki tikontapouis nejon akin iniuan tiontanojnotsato. Sayoj ke, keman tionyetokya iniuan tokniuan, tikonkaki ke se tokniuj siuat kintapouijtok ke uelik kitemakak se amaix. Yejua kikauak se amaix uan tejuatsin peuak tikonmachtia aksa. ¿Toni tikonchiuas? Tejuatsin tikonmati ke tein tikonpanok, kinyolchikauas tokniuan. Sayoj ke, xa tikonnemilis ke okachi kuali tikontapouis okse tonal porin amo tikonneki maj tokniuj siuat amo kuali momachili. ¡Semi kualtsin komo ijkon tikonchiuaskia! Sayoj ke xikonsentoka xionmochikaua peuas tikonmachtis oksekin. Tejuatsin ueli tikonchiua nejon, yejua ika xikonsentoka xikonchiua.

9. ¿Toni monekiskia tikchiuaskej ika tein tiuelij?

⁹ Maj tikelnamikikan ke ueli tikchiuaj teisa porin Dios techpaleuia. Maj amo tikchiuakan tein tiuelij para maj tokniuan kuali techitakan, ta maj ika tikinyolchikauakan (Filip. 2:3). Tiyolpakij keman tikuij tochikaualis uan tein tiuelij tikchiuaj para tiktekitiliskej Jiova. ¿Keyej? Porin tikueyichiuaj ika nochi tein tikpiaj, amo porin tiknekij maj oksekin kuali techitakan nion porin tiknekij maj kinemilikan ke okachi tiuelij ke yejuan.

10. ¿Keyej amo kuali yetok maj tikitakan tein tejuan ueli tikchiuaj ika tein oksekin kichiuaj?

¹⁰ Komo amo timoyekpiaj, ueliskia peuas tikitaskej tein tejuan ueli tikchiuaj uan tein oksekin amo ueli kichiuaj. Maj itech titanemilikan nejin. Se tokniuj takat xa semi kuali kitemaka tanojnotsmej. Yejua nejon tein okachi ueli kichiua uan xa kinemilis ke okachi ueyichiujkej ke okse tokniuj takat akin kiouijmaka kitemakas tanojnotsmej. Sayoj ke, nejin tokniuj xa okachi kuali kichiua seki taman porin xa kiuelita kinmakas oksekin tein kipia, xa kuali kiniskaltijtok ikoneuan oso semi kiuelita tanojnotsas. Semi tiktasojkamatij maj moajsikan tokniuan takamej uan  siuamej akin kichiuaj tein okachi uelij para kitekitiliskej Jiova uan kinpaleuiskej oksekin.

11. ¿Keyej moneki timochikauaskej tikchiuaskej kemej Jesús?

¹¹ Maski amo kuali yetok maj tikitakan tein tejuan ueli tikchiuaj ika tein oksekin kichiuaj, semi techpaleuis komo tikitaj tein kichiujkej seki itekitikauan Jiova. Maj itech titanemilikan Jesús, akin techkauilij okachi kuali neskayot. Maski tejuan titajtakolejkej, uelis tiknextiskej kualneskayomej tein yejua kinextij uan tikchiuaskej kemej yejua (1 Ped. 2:21). Komo timochikauaj tikchiuaskej kemej Jesús, okachi kuali tiktekitiliskej Jiova uan okachi kuali techyas itech tanojnotsalis.

12, 13. ¿Toni techmachtia tein kipanok tekiuaj David?

¹² Itech Biblia ininka tajtoua miakej takamej uan siuamej, uan tein kichiujkej uelis techpaleuis maski tajtakolejkej katkaj (Heb. 6:12). Semej katka tekiuaj David. Keman Jiova ika tajtoj, kijtoj nejin: “Nijin tagat David, […] nechyolpaktia” (Hech. 13:22). Sayoj ke David tajtakolej katka. Tein melauj, semi tajtakoj. Maski ijkon, tein kichiuak uelis techpaleuis. ¿Keyej? Porin keman kiluijkaj ke amo kuali tein kichiujka, amo kitemoj motenpaleuis, ta kikakik tein kiyolmajxitijkej uan yekmelauj moyolnonotsak. Uan yejua ika Jiova kitapojpoluij (Sal. 51:3, 4, 10-12).

¹³ Tein kichiuak David uelis techpaleuis komo timotajtaniaj nejin: “¿Keniuj nitanankilia keman nechyolmajxitiaj? ¿Niman nikajsikamati ke amo kuali tein nikchiuak oso niktemoua nimotenpaleuis? ¿Nikintajtakoltia oksekin tein nikchiua? ¿Nimochikaua amo oksepa nikchiuasok?”. Maj timotajtanikan seki taman kemej nejin keman timomachtiskej itech Biblia tein kinpanok seki itekitikauan Jiova. ¿Kipanokej kuejmolmej kemej tein tejuan tikpanouaj? ¿Katiyejua kualneskayomej kinextijkej? Keman timomachtijtoskej tein kipanok se itekitikauj Jiova maj timotajtanikan: “¿Keniuj uelis okachi nikchiuas kemej yejua?”.

14. ¿Keniuj techpaleuia tikitaskej tein kichiuaj okseki tokniuan?

¹⁴ Tein kichiuaj telpochmej, ichpochmej uan akin xiuejkejya, no uelis techpaleuis. Xa itech titanemiliskej se tokniuj itech tonechikol akin kipanotok se ouijkayot. Xa okseki telpochmej oso ichpochmej kichikaujkauiaj maj kichiua tein amo kuali, ichankauan xa kiixnamikij oso xa mokokoua. ¿Kinextia nejon tokniuj seki kualneskayomej tein tejuan xa moneki no tiknextiskej? Komo tikitaj tein kichiua,  techpaleuis maj tikmatikan keniuj tikixnamikiskej seki ouijkayomej tein tikpiaj. ¿Melauj ke semi tikpatiuitaj tein kichiuaj nejin tokniuan porin semi takuaujtamatij? Tein kichiuaj, techpaleuia maj tiyolpakikan (Heb. 13:7; Sant. 1:2, 3).

15. ¿Toni tein tayolmajxitij Pablo techpaleuis maj tiksentokakan tiktekitilikan Jiova ika yolpakilis?

¹⁵ Komo tinochin timochikauaj tikmakaskej Jiova tein okachi kuali, titapaleuiskej maj nochin kuali mouikakan uan maj amo moxexelokan itech nechikol. Yejua nejon tein kichiujkej tokniuan itech yekinika siglo. Yejuan tataman tekimej kipiayaj uan tataman tein uelia kichiuayaj (1 Cor. 12:4, 7-11). Sayoj ke amo monekia motataniskej iniuan oksekin nion kichiuaskej maj oksekin moxexelokan. Keman Pablo kintajkuilouilij tokniuan akin nemiaj Éfeso kiniluij maj sejsemej mochikauanij kichiuaskej tein tapaleuiskia “maj moskalti inakayo Cristo”. Uan no kijtoj: “Keman sejse kiyekchiua tekit tein kipia tapaleuia maj nochi kuali moskalti uan maj motasojtakan se iuan okse” (Efes. 4:1-3, 11, 12, 16, TNM). Keman kichiujkej nejon, tapaleuijkej maj tokniuan kuali mouikanij uan maj amo moxexelouanij uan nejin no mochiua axkan itech nechikolmej.

16. ¿Toni moneki tikonixtalis tikonchiuas? (Hebreos 6:10).

¹⁶ Xikonixtali amo tikonitas tein oksekin kichiuaj ika tein tejuatsin tikonchiua, ta okachi kuali xikonita tein kichiuak Jesús uan xionmochikaua tikonnextis kualneskayomej tein yejua kipiaya. Xikonchiua tein kichiujkej sekin itekitikauan Dios ne uejkauj uan tein kichiuaj seki tokniuan axkan. Xikonsentoka xikonmaka Jiova tein okachi kuali uan xikonelnamiki ke “Yejuatsin Yolmelauaktsin. lka ya nojon Yejuatsin amo keman kelkauatiu” nochi tein tejuatsin tikonchiuani porin tikontekitilia (xikonixtajtolti Hebreos 6:10). Xikonsentoka xikontekitili Jiova ika yolpakilis uan xikonelnamiki ke yejuatsin kipatiuita nochi tein tikonchiua.